មិនត្រឹមគ្រោះធម្មជាតិ តែរដ្ឋកាលីហ្វ័រញ៉ា ត្រូវជួបវិបត្តិសុខភាពទៀត

ដ្បិតថា កាលីហ្វ័រញ៉ាទើបធូរស្រាលពីភ្លើងឆេះព្រៃដ៏សាហាវក៏ពិតមែន ប៉ុន្តែក្រោយមករដ្ឋនេះត្រូវជួបគ្រោះធម្មជាតិថែមទៀតដូចជាអាកាសធាតុត្រជាក់ស្រួចស្រាវនិងរញ្ជួយដី ហើយឥឡូវនេះ កាលីហ្វ័រញ៉ា បែរជាត្រូវប្រឈមនឹងវិបត្តិសុខភាពវិញម្តង ដោយជំងឺផ្តាសាយកំពុងវាយលុកខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមនាយកដ្ឋានសុខាភិបាលរដ្ឋកាលីហ្វ័រញ៉ា, បើគិតចាប់តាំងពីខែធ្នូឆ្នាំ២០២៤មក មនុស្សស្លាប់ដោយសារជំងឺផ្តាសាយគ្រប់ទម្រង់ គឺមានភាគរយខ្ពស់ជាងអ្នកបាត់បង់ជីវិតដោយសារកូវីដ១៩ទៅទៀត។ ជាក់ស្តែង ឥឡូវអ្នកស្លាប់ដោយសារផ្តាសាយគឺមានប្រហែល ២%ក្នុងចំណោមការស្លាប់នៅទូទាំងរដ្ឋ។

វេជ្ជបណ្ឌិត John Swartzberg អ្នកជំនាញខាងជំងឺឆ្លងនៅសាកលវិទ្យាល័យកាលីហ្វ័រញ៉ា Berkeley បានព្រមានថា រដូវផ្តាសាយឆ្នាំនេះអាចជារដូវផ្តាសាយអាក្រក់បំផុតប្រចាំសតវត្សរ៍ទី២១ ហើយអ្វីដែលសំខាន់គឺការផ្ទុះករណីឆ្លងផ្តាសាយប្រភេទ H1N1 និង H3N2។

ចាប់តាំងពីថ្ងៃទី១ខែកក្កដាមក រដ្ឋកាលីហ្វ័រញ៉ា បានកត់ត្រាការស្លាប់ដោយសារជំងឺគ្រុនផ្តាសាយយ៉ាងតិច ៥៦១នាក់ ដែលភាគច្រើនកើតឡើងក្នុងចំណោមមនុស្សមានអាយុលើស៦៥ឆ្នាំ។

ពាក់ព័ន្ធបញ្ហានេះដែរ ក្រុមអ្នកជំនាញបានចង្អុលចំៗទៅអត្រាចាក់វ៉ាក់សាំងដ៏ទាប ថាជាមូលហេតុចម្ប​ងបណ្តាលឲ្យមានមនុស្សស្លាប់ដោយសារជំងឺផ្តាសាយយ៉ាងច្រើនបែបនេះ ជាពិសេសក្នុងចំណោមកុមារតែម្តង។

បើនិយាយពីគ្រោះធម្មជាតិវិញ កាលពីថ្ងៃចន្ទ គ្រោះរញ្ជួយដីបានកើតឡើងក្នុងទីក្រុង San Bernardino ភាគខាងត្បូងរដ្ឋ ដោយការរញ្ជួយលើកដំបូងមានកម្រិត៣.៦រ៉ិចទ័រ វាយប្រហារនៅម៉ោង៩:៤៥នាទីព្រឹក ខណៈ៣នាទីក្រោយ មានការរញ្ជួយលើកទី២ កម្រិត ៣.០រ៉ិចទ័រ។ ការរញ្ជួយទាំងពីរលើកនេះ គឺសុទ្ធសឹងមានជម្រៅជាង ៦គីឡូម៉ែត្រ។

មុននេះ ភាគកណ្តាលរដ្ឋកាលីហ្វ័រញ៉ា ក៏ប្រឈមនឹងអាកាសធាតុត្រជាក់ដល់ឆ្អឹងដែរ ខណៈសីតុណ្ហភាពត្រូវបានគេព្យាករថា នឹងធ្លាក់ចុះដល់ -២៨អង្សាសេឯណោះ នៅប៉ុន្មានថ្ងៃខាងមុខ ដោយសារតែឥទ្ធិពលម៉ាស់ខ្យល់មកពីតំបន់អាក់ទិក៕

អត្ថបទ៖ សុខ សុវណ្ណ

ចុចអាន៖ រងទុក្ខផ្ទួនៗ រដ្ឋកាលីហ្វ័រញ៉ា ជួបគ្រោះរញ្ជួយដី ២លើកទៀតហើយ