ឈូងសមុទ្រពែក្ស Archives - Kampuchea Thmey Daily

ច្រកសមុទ្រ Hormuz សំខាន់យ៉ាងណាសម្រាប់ដឹកប្រង និងឧស្ម័នទៅកាន់ពិភពលោក?

Minea Neu — Tue, 03 Mar 2026 10:38:05 +0000

តម្លៃប្រេងបានកើនឡើងចាប់ពីថ្ងៃចន្ទក្រោយការផ្ទុះការប្រយុទ្ធនៅអ៊ីរ៉ង់ ខណៈសង្គ្រាមកាន់តែរីករាលដាលក្នុងប្រទេសអ៊ីរ៉ង់ និងទៅប្រទេសជុំវិញក្នុងតំបន់ រំខានដល់កប៉ាល់ដឹកប្រេងឆ្លងកាត់ច្រកសមុទ្រហ័រមូស ( Hormuz) បង្ហាញពីសារៈសំខាន់នៃច្រកសមុទ្រនេះ ចំពោះការផ្គត់ផ្គង់ប្រេងរបស់ពិភពលោក។

ច្រកសមុទ្រ Hormuz គឺជាមាត់សមុទ្រតូចចង្អៀតនៃឈូងសមុទ្រពែរ្ស៍ ដែលប្រេងប្រហែលមួយភាគប្រាំរបស់ពិភពលោកត្រូវឆ្លងកាត់។

កប៉ាល់ដឹកប្រេងនៅច្រកសមុទ្រ Hormuz ។ រូបភាព៖ Reuters

នាវាដឹកប្រេងធ្វើដំណើរឆ្លងកាត់ច្រកសមុទ្រនេះ មានព្រំប្រទល់ជាប់ភាគខាងជើងជាមួយអ៊ីរ៉ង់ អារ៉ាប៊ីសាអូឌីត គុយវ៉ែត អ៊ីរ៉ាក់ កាតា បារ៉ែន អារ៉ាប់រួម និងអ៊ីរ៉ង់។ ប្រេងភាគច្រើននាំទៅកាន់អាស៊ី។

គួរបញ្ជាក់ថា ការរំខានណាមួយចំពោះចរាចរណ៍ឆ្លងកាត់ច្រកសមុទ្រ Hormuz គឺជាការរំខានយ៉ាងខ្លាំងដល់ពាណិជ្ជកម្មប្រេង។

លោក Hakan Kaya អ្នកគ្រប់គ្រងផលប័ត្រជាន់ខ្ពស់នៅក្រុមហ៊ុនគ្រប់គ្រងការវិនិយោគ Neuberger Berman លើកឡើងថា៖ « ទំហំនៃអ្វីដែលកំពុងប្រឈមមិនអាចនិយាយបំផ្លើសបានទេ។ ការធ្លាក់ចុះដោយផ្នែក មានរយៈពេលមួយឬពីរសប្តាហ៍អាចត្រូវទាញយកដោយក្រុមហ៊ុនប្រេង»។

លោកបន្តថា៖ «ប៉ុន្តែការបិទទ្វារទាំងស្រុង ឬស្ទើរតែទាំងស្រុងដែលមានរយៈពេលមួយខែ ឬច្រើនជាងនេះ នឹងជំរុញឱ្យតម្លៃប្រេងឆៅមានតម្លៃជួញដូរប្រហែល ៧០ដុល្លារនៅថ្ងៃចន្ទ កើនឡើងដល់បីខ្ទង់ និងតម្លៃឧស្ម័នធម្មជាតិអឺរ៉ុបឆ្ពោះទៅខ្ពស់ជាងកម្រិតវិបត្តិដែលបានឃើញក្នុងឆ្នាំ ២០២២»។

គួរឱ្យដឹងថា ច្រកសមុទ្រហ័រមូសគឺជាផ្លូវតូចចង្អៀតមួយមានឥទ្ធិពលលើពិភពលោកយ៉ាងខ្លាំង។ វាជាចំណុចសំខាន់ក្នុងការផ្គត់ផ្គង់ថាមពលភាគច្រើនរបស់ពិភពលោកត្រូវតែហូរឆ្លងកាត់ ហើយការរំខានណាមួយនឹងជះឥទ្ធិពលអាក្រក់ដល់ទីផ្សារអន្តរជាតិ។

តាមប្រវត្តិសាស្ត្រ ច្រកសមុទ្រនេះគឺជាផ្លូវពាណិជ្ជកម្មសម្រាប់ទំនិញដូចជាសេរ៉ាមិច ភ្លុកដំរី សូត្រ និងវាយនភណ្ឌដែលដឹកជញ្ជូនពីប្រទេសចិន និងប្រទេសមួយចំនួនទៀតនៅអាស៊ី។

យ៉ាងណា សព្វថ្ងៃនេះវាត្រូវបានគ្របដណ្ដប់ដោយកប៉ាល់ដឹកប្រេងឆៅ និងឧស្ម័នធម្មជាតិរាវ។

ចំណែកការរំខាន មិនថាមកពីជម្លោះយោធា ការបិទផ្លូវ ឬសូម្បីតែការបិទផ្លូវជាបណ្ដោះអាសន្ន ក៏បណ្តាលឱ្យមានការកើនឡើងម្តងហើយម្តងទៀតនៃតម្លៃថាមពលជាសកល។

ការវាយប្រហាររបស់សហរដ្ឋអាមេរិកនិងអ៊ីស្រាអែលបានធ្វើឱ្យកប៉ាល់ដឹកប្រេងរាប់សិបគ្រឿងជាប់គាំង នៅក្នុងឈូងសមុទ្រពែរ្ស និងបង្ខំឱ្យកប៉ាល់ផ្សេងទៀតរង់ចាំនៅខាងក្រៅ ដែលបង្ហាញពីភាពផុយស្រួយ និងសារៈសំខាន់នៃផ្លូវឆ្លងកាត់នេះ៕

ប្រែសម្រួល៖ ណឺ មិនា

The post ច្រកសមុទ្រ Hormuz សំខាន់យ៉ាងណាសម្រាប់ដឹកប្រង និងឧស្ម័នទៅកាន់ពិភពលោក? appeared first on Kampuchea Thmey Daily.

អ៊ីរ៉ង់ គំរាមវាយម្ដងមួយៗ បើរដ្ឋនៃឈូងសមុទ្រពែក្សហ៊ានលូកដៃជួយអ៊ីស្រាអែល

Chheang — Fri, 11 Oct 2024 07:26:54 +0000

មន្ត្រីជាន់ខ្ពស់អ៊ីរ៉ង់ បានប្រកាសថា បើរដ្ឋណាមួយនៃឈូងសមុទ្រពែក្សហ៊ានចេញមុខជួយអ៊ីស្រាអែល ប្រទេសនោះនឹងក្លាយជាសត្រូវរបស់អ៊ីរ៉ង់ ហើយត្រូវតៀមខ្លួនទទួលរងការឆ្លើយតបពីរដ្ឋាភិបាលក្រុងតេហេរ៉ង់មិនខាន។

មន្ត្រីអ៊ីរ៉ង់ បានព្រមានរដ្ឋនៃឈូងសមុទ្រពែក្ស ប្រឆាំងនឹងការជួយអ៊ីស្រាអែលតាមរយៈការផ្ដល់ជាមូលដ្ឋានយោធា និងទ័ពអាកាស។ មន្ត្រីអ៊ីរ៉ង់ បានប្រាប់ទីភ្នាក់ងារព័ត៌មាន Reuters ថា៖ «អ៊ីរ៉ង់កំណត់ច្បាស់លាស់ណាស់ថា សកម្មភាពណាមួយដោយប្រទេសនៃឈូងសមុទ្រពែក្សប្រឆាំងនឹងក្រុងតេហេរ៉ង់ មិនថាតាមរយៈការប្រើប្រាស់មូលដ្ឋានយោធាឬទ័ពអាកាស នឹងត្រូវចាត់ទុកដោយក្រុងតេហេរ៉ង់ថាជាសកម្មភាពដែលធ្វើឡើងដោយក្រុមប្រទេសទាំងមូល ហើយក្រុងតេហេរ៉ង់នឹងឆ្លើយតបម្ដងម្នាក់ៗ»។

ការព្រមានរបស់អ៊ីរ៉ង់ បានកើតឡើងចំពេលមានរបាយការណ៍ដែលថា ទីក្រុងតេហេរ៉ង់បានក្រើនរំឭកប្រទេសនៃឈូងសមុទ្រពែក្ស ដោយបញ្ជាក់ថា ប្រសិនបើ «អ្នកគាំទ្រអ៊ីស្រាអែល» ធ្វើអន្តរាគមន៍ដោយផ្ទាល់នៅក្នុងជម្លោះ នោះផលប្រយោជន៍ក្នុងតំបន់របស់ពួកគេនឹងត្រូវកំណត់គោលដៅ។ បណ្តាប្រទេសនៅឈូងសមុទ្រពែក្ស បានបង្ហាញក្ដីបារម្ភថា អ៊ីរ៉ង់អាចវាយប្រហារទីតាំងប្រេងរបស់ពួកគេ ប្រសិនបើពួកគេឈរនៅខាងអ៊ីស្រាអែលសម្រាប់ជម្លោះដែលកំពុងបន្ត។

មន្ត្រីអ៊ីរ៉ង់ បានបញ្ជាក់ថា៖ «សារនេះបានសង្កត់ធ្ងន់លើតម្រូវការសម្រាប់ការរួបរួមក្នុងតំបន់ប្រឆាំងនឹងអ៊ីស្រាអែល និងសារៈសំខាន់នៃការធានាស្ថិរភាព។ វាក៏បានបញ្ជាក់យ៉ាងច្បាស់ថាជំនួយណាមួយដល់អ៊ីស្រាអែល ដូចជាការអនុញ្ញាតឲ្យប្រើប្រាស់ដែនអាកាសរបស់ប្រទេសក្នុងតំបន់សម្រាប់សកម្មភាពប្រឆាំងនឹងអ៊ីរ៉ង់ គឺមិនអាចទទួលយកបាននោះទេ»។

កាលពីថ្ងៃទី១ខែតុលា អ៊ីរ៉ង់ បានបាញ់រ៉ុកកែតប្រហែល ២០០គ្រាប់ទៅកាន់អ៊ីស្រាអែល ដែលភាគច្រើនត្រូវបានស្ទាក់ចាប់ និងបំផ្លាញដោយខែលការពាររបស់អ៊ីស្រាអែល។ អ៊ីរ៉ង់ ថា នេះជាការឆ្លើយតបទៅនឹងការសម្លាប់ប្រមុខក្រុមហេសបូឡាគឺ លោក Hassan Nasrallah និងសកម្មភាពយោធារបស់អ៊ីស្រាអែលនៅប្រទេសលីបង់ និងតំបន់ហ្គាហ្សា។ យោងតាមរបាយការណ៍ អ៊ីស្រាអែលកំពុងរៀបចំការសងសឹក ដោយមតិមួយចំនួនបានលើកឡើងថា ទីតាំងប្រេងក្នុងប្រទេសអ៊ីរ៉ង់ អាចត្រូវបានកំណត់គោលដៅជាផ្នែកមួយនៃការវាយលុកទ្រង់ទ្រាយធំ។

ដោយមើលឃើញពីការគំរាមកំហែងកាន់តែខ្លាំងនោះ រដ្ឋនៃឈូងសមុទ្រពែក្ស បានជំរុញឲ្យសហរដ្ឋអាមេរិករារាំងអ៊ីស្រាអែលវាយប្រហារលើទីតាំងប្រេងរបស់អ៊ីរ៉ង់។ ទីភ្នាក់ងារព័ត៌មាន Reuters ធ្លាប់បានរាយការណ៍ថា អារ៉ាប៊ីសាអូឌីត សហព័ន្ធអារ៉ាប់រួម និងកាតា បានបដិសេធការអនុញ្ញាតឲ្យអ៊ីស្រាអែលប្រើប្រាស់ដែនអាកាសរបស់ពួកគេ សម្រាប់ការវាយប្រហារណាមួយលើអ៊ីរ៉ង់ ហើយក៏បានបង្ហាញជំហរនេះទៅកាន់សហរដ្ឋអាមេរិកផងដែរ៕

ដោយ៖ ឈាង

The post អ៊ីរ៉ង់ គំរាមវាយម្ដងមួយៗ បើរដ្ឋនៃឈូងសមុទ្រពែក្សហ៊ានលូកដៃជួយអ៊ីស្រាអែល appeared first on Kampuchea Thmey Daily.

នាវាមុជទឹក អាមេរិក ទៅដល់ឈូងសមុទ្រពែក្សដើម្បីបង្ហាញសាច់ដុំរារាំងសកម្មភាពរបស់ អ៊ីរ៉ង់

Sok Chivon — Wed, 08 Nov 2023 03:30:08 +0000

យោងតាមការរាយការណ៍របស់សារព័ត៌មាន Bloomberg ដោយដកស្រង់សម្ដីមន្ត្រីការពារជាតិអាមេរិកបានឲ្យដឹងថា នាវាមុជទឹកដើរដោយថាមពលនុយក្លេអ៊ែរថ្នាក់រដ្ឋ Florida បានចូលទៅដល់ឈូងសមុទ្រពែក្សហើយដើម្បីបង្ហាញសាច់ដុំ ក៏ដូចជាធ្វើសកម្មភាពរារាំងប្រទេសអ៊ីរ៉ង់ ។

Bloomberg បានចុះផ្សាយទៀតថា ទោះបីជានាវាមុជទឹកថ្នាក់រដ្ឋ Florida ដើរដោយថាមនុយក្លេអ៊ែរក៏ពិតមែន ប៉ុន្តែវាមិនមានផ្ទុកអាវុធនុយក្លេអែរនោះទេ ។ ទោះយ៉ាងណា នាវាមុជទឹកមួយគ្រឿងនេះអាចមានសមត្ថភាពផ្ទុកកាំជ្រួចមីស៊ីល Tomahawk រហូតដល់ ១៥៤ គ្រាប់ ឬគ្រាប់មីស៊ីលរបស់កងទ័ពជើងទឹកដល់ទៅ ៦៦ គ្រាប់ ។

ទន្ទឹមនោះ ការបញ្ជូននាវាមុជទឹក Florida ទៅកាន់ឈូងសមុទ្រពែក្សនេះកើតមានឡើងតែប៉ុន្មានថ្ងៃប៉ុណ្ណោះ បន្ទាប់ពីទីបញ្ជាការកណ្ដាលរបស់សហរដ្ឋអាមេរិក (CENTCOM) ក៏ទើបតែបញ្ជូននាវាមុជទឹកដើរដោយថាមពលនុយក្លេអ៊ែរថ្នាក់រដ្ឋ Ohio ទៅកាន់មជ្ឈិមបូព៌ា ។

លោក John Kirby

អ្នកសម្របសម្រួលក្រុមប្រឹក្សាសន្តិសុខជាតិអាមេរិកលោក John Kirby បាននិយាយកាលពីថ្ងៃចន្ទថា ការបញ្ជូននាវាមុជទឹក Ohio របស់សហរដ្ឋអាមេរិកទៅកាន់មជ្ឈិមបូព៌ា គឺដើម្បីធានាសុវត្ថិភារបស់កងកម្លាំងអាមេរិកនៅតំបន់ដ៏រសើបមួយនេះ ស្របពេលដែលជម្លោះរវាងអ៊ីស្រាអែល និងប៉ាឡេស្ទីនក៏កំពុងបែកផ្កាភ្លើងខ្លាំងផងដែរ ។

ពាក់ព័ន្ធនឹងបញ្ហានេះដែរ អ្នកនាំពាក្យមន្ទីរបញ្ចកោណលោក Pat Ryder ធ្លាប់បានលើកឡើងកាលពីចុងខែតុលាថា សហរដ្ឋអាមេរិកក៏នឹងបញ្ជូនកម្លាំងទ័ពប្រមាណ ៣០០ នាក់ទៅកាន់មជ្ឈិមបូព៌ាផងដែរ ប៉ុន្តែលោកមិនបានបញ្ជាក់ឲ្យច្បាស់ថា កងទ័ពទាំងនោះនឹងត្រូវដាក់ពង្រាយនៅទីកន្លែងណាឡើយ ដោយគ្រាន់តែបង្ហើបថា គឺមិនមែននៅក្នុងប្រទេសអ៊ីស្រាអែលនោះទេ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ តើសង្គ្រាមរវាង អ៊ីស្រាអែល-ប៉ាឡេស្ទីន និងរុស្ស៊ី-អ៊ុយក្រែន មួយណាសម្លាប់ជនស៊ីវិលច្រើនជាង?

The post នាវាមុជទឹក អាមេរិក ទៅដល់ឈូងសមុទ្រពែក្សដើម្បីបង្ហាញសាច់ដុំរារាំងសកម្មភាពរបស់ អ៊ីរ៉ង់ appeared first on Kampuchea Thmey Daily.

មើលហើយញាក់សាច់! អ៊ីរ៉ង់ បញ្ចេញវីដេអូការសាកល្បងយន្តហោះដ្រូនធ្វើអត្តឃាតចំៗគោលដៅ

Sok Chivon — Thu, 22 Apr 2021 08:51:26 +0000

អង្គភាពឆ្មាំបដិវត្តឥស្លាមរបស់អ៊ីរ៉ង់ (IRGC) បានបញ្ចេញនូវរូបភាព និងវីដេអូនៃយន្តហោះដ្រូនធ្វើអត្តឃាតដោយសំដៅទៅលើការវាយប្រហារនាវាដឹកយន្តហោះរបស់កងទ័ពជើងទឹកអាមេរិកនៅឈូងសមុទ្រពែក្ស ។

វីដេអូដែលចេញផ្សាយដោយទូរទស្សន៍រដ្ឋ Press TV បានបង្ហាញថា IRGC បានធ្វើតេស្តការហោះហើរសព្វាវុធដែលគេហៅថា យន្តហោះដ្រូនធ្វើអត្តឃាត ហើយក្នុងវីដេអូនោះក៏បង្ហាញពី យន្តហោះរាងត្រីកោណ UAV របស់អ៊ីរ៉ង់ ធ្លាក់ចំគោលដៅ និងផ្ទុះឡើង ផងដែរ ។

កាលពីដើមខែនេះ ប្រទេសអ៊ីរ៉ង់បានរាយការណ៍ពីឧប្បត្តិហេតុមួយនៅឯរោងចក្រថាមពលនុយក្លេអ៊ែរ Natanz របស់ខ្លួន ដែលបានបំផ្លាញបណ្តាញអគ្គិសនីរបស់រោងចក្រ នៅក្នុងអ្វីដែលលោក Ali Akbar Salehi នាយកទីភ្នាក់ងារថាមពលបរមាណូអ៊ីរ៉ង់ (IAEA) បានពិពណ៌នាថាជា “ភេរវកម្មនុយក្លេអ៊ែរ” ។

ទន្ទឹមនោះ កាលពីសប្តាហ៍មុន អ៊ីរ៉ង់បានជូនដំណឹងដល់ IAEA អំពីចេតនារបស់ខ្លួនក្នុងការចាប់ផ្តើមធ្វើឲ្យប្រសើរឡើងនូវសារធាតុអ៊ុយរ៉ានីញ៉ូមរហូតដល់ ៦០ ភាគរយ ខណៈការសម្រេចចិត្តជំរុញការចម្រាញ់សារធាតុអ៊ុយរ៉ានីញ៉ូម និងតំឡើងម៉ាស៊ីនកំដៅបែបទំនើបនៅឯរោងចក្រនុយក្លេអ៊ែរ Natanz ត្រូវបានធ្វើឡើងដោយមើលឃើញពីឧប្បត្តិហេតុថ្មីៗនេះ ៕

សូមទស្សនាវីដេអូ!

UPDATE
Iran’s IRGC also released footage of its suicide drone test flight pic.twitter.com/t4PCUpFthz
— Press TV (@PressTV) April 21, 2021

ប្រែសម្រួលដោយ ៖ ជីវ័ន្ត

ប្រភព ៖ Sputnik

The post មើលហើយញាក់សាច់! អ៊ីរ៉ង់ បញ្ចេញវីដេអូការសាកល្បងយន្តហោះដ្រូនធ្វើអត្តឃាតចំៗគោលដៅ appeared first on Kampuchea Thmey Daily.

អ៊ីរ៉ង់បង្ហាញមូលដ្ឋានមីស៊ីលនៅឈូងសមុទ្រពែក្ស ចំពេលមានភាពតានតឹងជាមួយអាមេរិក

Sok Chivon — Sat, 09 Jan 2021 02:42:41 +0000

អង្គភាពឆ្មាំបដិវត្តឥស្សរជនអ៊ីរ៉ង់កាលពីថ្ងៃសុក្របានបង្ហាញមូលដ្ឋានមីស៊ីលប្រឆាំងនាវាក្រោមដីនៅតាមបណ្តោយឆ្នេរឈូងសមុទ្រពែក្សដល់ភាគខាងត្បូងរបស់ប្រទេស ចំពេលមានភាពតានតឹងកើនឡើងនៅក្នុងតំបន់ ។

មេបញ្ជាការកងឆ្មាំបដិវត្តឥស្លាម (IRGC) លោកឧត្តមសេនីយ៍ Hossein Salami បាននិយាយនៅក្នុងពិធីសម្ពោធមូលដ្ឋាននោះថា គោលបំណងនៃមូលដ្ឋានមីស៊ីលនៅខេត្ត Hormozgan គឺដើម្បីការពារបូរណភាពទឹកដី និងអធិបតេយ្យភាពរបស់ប្រទេស ។

លោកបាននិយាយថា អ៊ីរ៉ង់បានប្តេជ្ញាចិត្តក្នុងការពង្រឹងអំណាចការពារ និងការវាយប្រហារដើម្បីការពារខ្លួនពីសត្រូវដូចជាសហរដ្ឋអាមេរិកជាដើម ។

រឿងនេះកើតឡើង ចំពេលភាពតានតឹងកាន់តែខ្លាំងឡើងរវាងអ៊ីរ៉ង់ និងអាមេរិក បន្ទាប់ពីទីក្រុងវ៉ាស៊ីនតោនបានបញ្ជូននាវាចម្បាំងទៅកាន់ឈូងសមុទ្រ ហើយបានបញ្ជាឲ្យនាវាដឹកយន្តហោះ Nimitz បន្តស្ថិតនៅក្នុងតំបន់នេះ ខណៈដែលយន្តហោះទម្លាក់គ្រាប់បែកយុទ្ធសាស្ត្រ B-52 ក៏បានចូលដែនអាកាសអ៊ីរ៉ង់នៅលើឈូងសមុទ្រជាច្រើនដងក្នុងរយៈពេលមួយខែចុងក្រោយនេះ ។

ការវាយប្រហារថ្មីៗនេះទៅលើស្ថានទូតអាមេរិកនៅទីក្រុងបាកដាដដែលក្រុមមន្រ្តីអាមេរិកបានស្តីបន្ទោសទៅលើក្រុមសម្ព័ន្ធមិត្តអ៊ីរ៉ង់បានបង្កឲ្យមានការសង្ស័យថាទីក្រុងតេអេរ៉ង់ប្រហែលជាកំពុងស្វែងរកការសងសឹកប្រឆាំងនឹងការសម្លាប់មេបញ្ជាការយោធាកំពូលលោក Qassem Soleimani និងអ្នកវិទ្យាសាស្ត្រនុយក្លេអ៊ែរ Mohsen Fakhrizadeh ខណៈអ៊ីរ៉ង់បានច្រានចោលការពាក់ព័ន្ធនៅក្នុងការវាយប្រហារលើស្ថានទូតអាមេរិក ។

ការបង្ហាញនេះក៏បានកើតឡើងផងដែរ បន្ទាប់ពីការធ្វើសមយុទ្ធកងនាវាចរដ៏ធំមួយរបស់ IRGC រយៈពេលមួយសប្តាហ៍នៅក្នុងឈូងសមុទ្រដែលក្នុងនោះនាវាធុនស្រាល និងពាក់កណ្តាលធុនធ្ងន់ចំនួន ៧០០ គ្រឿងត្រូវបានដាក់តាំងបង្ហាញស្របគ្នានឹងខួបមួយឆ្នាំចាប់តាំងពីការធ្វើឃាតលោក Soleimani នៅក្នុងការវាយប្រហារតាមអាកាសរបស់អាមេរិកនៅទីក្រុងបាកដាដ ។

លោក Salami បាននិយាយថា គោលបំណងសំខាន់នៃសមយុទ្ធនេះគឺដើម្បីផ្ញើសារថា កងកម្លាំងប្រដាប់អាវុធអ៊ីរ៉ង់បានត្រៀមខ្លួនដើម្បីការពារផលប្រយោជន៍សំខាន់ៗរបស់ប្រទេស ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ សង្ស័យជាការសងសឹកឲ្យលោក Soleimani យន្តហោះមួយគ្រឿងហោះលើអគារ Capitol របស់អាមេរិក

ចុចអាន ៖ អ៊ីរ៉ង់នឹងសងសឹកឲ្យលោក Soleimania បន្ទាប់ពីលោក Biden ចូលកាន់តំណែង

The post អ៊ីរ៉ង់បង្ហាញមូលដ្ឋានមីស៊ីលនៅឈូងសមុទ្រពែក្ស ចំពេលមានភាពតានតឹងជាមួយអាមេរិក appeared first on Kampuchea Thmey Daily.

កងទ័ពអ៊ីរ៉ង់ ចាប់ផ្តើមសមយុទ្ធយន្ដហោះគ្មានមនុស្សបើកទ្រង់ទ្រាយធំខណៈភាពតានតឹងក្នុងឈូងសមុទ្រពែក្សកាន់តែខ្លាំង

Sok Sovann — Wed, 06 Jan 2021 01:35:40 +0000

កងទ័ពអ៊ីរ៉ង់បានចាប់ផ្តើមសមយុទ្ធយន្ដហោះគ្មានមនុស្សបើកទ្រង់ទ្រាយធំលើកដំបូងរបស់ខ្លួនចំពេលមានភាពតានតឹងក្នុងតំបន់រវាងទីក្រុងតេរ៉ង់និងវ៉ាស៊ីនតោន។

អគ្គមេបញ្ជាការរងកងទ័ព ឧត្តមនាវី Mahmoud Mousavi បាននិយាយនៅពេលសមយុទ្ធចាប់ផ្តើមកាលពីថ្ងៃអង្គារថា “សព្វថ្ងៃនេះ សាធារណរដ្ឋឥស្លាមអ៊ីរ៉ង់គឺជាប្រទេសមួយក្នុងចំណោមប្រទេសដែលមានថាមពលខ្លាំងក្លាបំផុតនៅក្នុងវិស័យផលិតយន្ដហោះដ្រូន”។

សមយុទ្ធនេះធ្វើឡើងក្នុងខេត្ត Semnan ពេញមួយថ្ងៃអង្គារដោយមានការចូលរួមពីយន្តហោះគ្មានមនុស្សបើករាប់រយគ្រឿងដែលប្រើដោយកងទ័ពជើងគោក អាកាសនិងជើងទឹក។

លោក Mousavi បន្ថែមថា “ប្រតិបត្តិការប្រយុទ្ធរបស់យន្តហោះគ្មានមនុស្សបើករួមទាំងការស្ទាក់ចាប់និងបំផ្លាញគោលដៅដោយប្រើមីស៊ីលបាញ់ពីលើមេឃផងដែរនោះ បានកម្ទេចចំគោលដៅនៅលើដីដោយប្រើគ្រាប់បែកនិងមីស៊ីលបាញ់ចំគោលដៅជាក់លាក់ក៏ដូចជាការប្រើប្រាស់ដ្រូនអត្តឃាតផងដែរ”។

រូបភាពនិងវីដេអូនៃយន្តហោះគ្មានមនុស្សបើកតម្រង់ជួរដើម្បីត្រៀមខ្លួនសម្រាប់សមយុទ្ធនេះត្រូវបានបញ្ចេញដោយអាជ្ញាធរអ៊ីរ៉ង់។

ថ្លែងកាលពីចុងខែធ្នូ រដ្ឋមន្រ្តីក្រសួងការពារជាតិអ៊ីរ៉ង់លោក Amir Hatami បាននិយាយថា ក្រុមហ៊ុនម៉ៅការផ្នែកវិស័យការពារជាតិរបស់ប្រទេសនេះ ឥឡូវអាចបំពេញបានតាមរាល់តម្រូវការអាវុធនិងយោធារបស់ខ្លួន។

គួរបញ្ជាក់ថា សមយុទ្ធនេះបានកើតឡើងចំពេលមានភាពតានតឹងខ្ពស់នៅក្នុងឈូងសមុទ្រពែក្សរួមទាំងការរឹបអូសនាវាដឹកប្រេងរបស់កូរ៉េខាងត្បួងដោយកងកម្លាំងអ៊ីរ៉ង់និងការប្រកាសថា ទីក្រុងតេអេរ៉ង់កំពុងជំរុញកម្មវិធីបង្កើនសារធាតុអ៊ុយរ៉ានីញ៉ូមរបស់ខ្លួនផងដែរ៕

ប្រែសម្រួលដោយ៖ Vann Vann

ប្រភព៖ RT

The post កងទ័ពអ៊ីរ៉ង់ ចាប់ផ្តើមសមយុទ្ធយន្ដហោះគ្មានមនុស្សបើកទ្រង់ទ្រាយធំខណៈភាពតានតឹងក្នុងឈូងសមុទ្រពែក្សកាន់តែខ្លាំង appeared first on Kampuchea Thmey Daily.

អាមេរិកបញ្ជូននាវាដឹកយន្តហោះទៅឈូងសមុទ្រពែក្សបន្ទាប់ពីការធ្វើឃាតអ្នកវិទ្យាសាស្រ្តអ៊ីរ៉ង់

Sok Sovann — Sat, 28 Nov 2020 05:52:55 +0000

យោធាអាមេរិកបានបញ្ជូននាវាដឹកយន្តហោះ USS Nimitz ទៅកាន់ឈូងសមុទ្រពែក្សរួមជាមួយនាវាចម្បាំងផ្សេងទៀតដើម្បីប្រុងប្រៀបត្រៀមប្រយុទ្ធនិងផ្តល់ការពារពីលើអាកាសសម្រាប់ទាហានដែលកំពុងដកចេញពីប្រទេសអ៊ីរ៉ាក់និងអាហ្វហ្គានីស្ថាន។

ការដាក់ពង្រាយនេះបានកើតឡើងចំពេលភាពតានតឹងក្នុងតំបន់បានកើនឡើងខ្ពស់បន្ទាប់ពីការធ្វើឃាតអ្នកវិទ្យាសាស្ត្រកំពូលម្នាក់ដែលដឹកនាំកម្មវិធីនុយក្លេអ៊ែររបស់ប្រទេសអ៊ីរ៉ង់។

ការសម្រេចចិត្តដាក់ពង្រាយនាវា Nimitz ទៅឈូងសមុទ្រពែក្សបានធ្វើឡើងមុនការសម្លាប់លោក Mohsen Fakhrizadeh-Mahabadi ដែលជាសាស្ត្រាចារ្យរូបវិទ្យានិងជាអតីតមន្រ្តីម្នាក់នៅក្នុងឆ្មាំបដិវត្តអ៊ីរ៉ង់។

រដ្ឋបាលលោក Trump បានកំណត់ឱសានវាទយកថ្ងៃទី១៥ខែមករាសម្រាប់យោធាអាមេរិកក្នុងការដកកងទ័ពរបស់ខ្លួនចេញពីប្រទេសអ៊ីរ៉ាក់និងអាហ្វហ្គានីស្ថាន។

ប្រទេសអ៊ីរ៉ង់បានចោទប្រកាន់អ៊ីស្រាអែលពីបទព្យាយាមបង្កសង្គ្រាមដោយការធ្វើឃាតលោក Fakhrizadeh-Mahabadi។ គាត់ជាអ្នកវិទ្យាសាស្រ្តម្នាក់ដែលនាយករដ្ឋមន្រ្តីអ៊ីស្រាអែលលោក Benjamin Netanyahu ចាត់ទុកជាបិតានៃកម្មវិធីនុយក្លេអ៊ែររបស់អ៊ីរ៉ង់។

មន្ត្រីអាមេរិកម្នាក់និងមន្ត្រីស៊ើបការណ៍សម្ងាត់២នាក់ទៀតបានបញ្ជាក់ប្រាប់កាសែត New York Times ថា អ៊ីស្រាអែលនៅពីក្រោយការវាយប្រហារនេះ។

លោក Fakhrizadeh-Mahabadi ត្រូវបានសម្លាប់នៅក្នុងការវាយឆ្មក់មួយដែលពាក់ព័ន្ធនឹងការផ្ទុះមួយហើយបន្ទាប់មកមានការបាញ់កាំភ្លើងយន្តលើផ្លូវចន្លោះទីប្រជុំជន Absard និងទីក្រុងតេអេរ៉ង់។

ទូរទស្សន៍រដ្ឋអ៊ីរ៉ង់បានផ្សាយថា គ្រាប់បែកដែលលាក់នៅក្នុងរថយន្តភីកអាប់មួយគ្រឿងបានផ្ទុះនៅពីមុខរថយន្ដរបស់គាត់មុនពេលខ្មាន់កាំភ្លើង៦នាក់បានចេញពីរថយន្ដមួយគ្រឿងហើយបើកការបាញ់ប្រហារ។

អ្នករងរបួសនៅក្នុងការវាយប្រហារនេះត្រូវបានបញ្ជូនទៅមន្ទីរពេទ្យក្នុងតំបន់ប៉ុន្តែគ្រូពេទ្យមិនអាចជួយសង្គ្រោះជីវិតលោក Fakhrizadeh-Mahabadi បានទេ៕

ប្រែសម្រួលដោយ៖ Vann Vann

ប្រភព៖ Daily Mail

The post អាមេរិកបញ្ជូននាវាដឹកយន្តហោះទៅឈូងសមុទ្រពែក្សបន្ទាប់ពីការធ្វើឃាតអ្នកវិទ្យាសាស្រ្តអ៊ីរ៉ង់ appeared first on Kampuchea Thmey Daily.