ឌឿ វិសាល Archives - Kampuchea Thmey Daily

ឌឿ វិសាល លូកខ្លួនកាន់តែខ្លាំងលើវិស័យភាពយន្តក្រៅពីអាជីពគ្រូពេទ្យ

អ៊ិន ពិសី — Wed, 10 Jan 2024 06:50:56 +0000

តារាចម្រៀង និងជាគ្រូពេទ្យរូបសង្ហា លោក ឌឿ វិសាល ហៅ ធូ បច្ចុប្បន្នមិនត្រឹមមមាញឹកក្នុងការបំពេញបេសកកម្មជាគ្រូពេទ្យសង្គ្រោះអ្នកជំងឺប៉ុណ្ណោះទេ តែលោកក៏កាន់តែលេចវត្តមានច្រើនតាមរយៈការសម្ដែងភាពយន្តខ្មែរជាបន្តបន្ទាប់ដែរ។

តួយ៉ាងតារាប្រុសលោក ឌឿ វិសាល កន្លងមក បានឱកាសទទួលការថតសម្តែងរឿងភាគ និងខ្នាតធំមួយចំនួន ខណៈបណ្តាផលិតករបានមើលឃើញពីសមត្ថភាពសម្តែង ព្រមទាំងទេពកោសល្យល្អៗ របស់តារាប្រុសរូបនេះផងដែរ។ លោក ឌឿ វិសាល ក៏ជាតារាចម្រៀង Original Song សាងបានប្រជាប្រិយភាពមិនចាញ់មិត្តរួមជំនាន់ឡើយ។

ប្រាប់ “កម្ពុជាថ្មី” លោក ឌឿ វិសាល បាននិយាយឲ្យដឹងថា រាល់ថ្ងៃក្រៅពីរវល់បំពេញការងារជាគ្រូពេទ្យ លោកក៏ឆ្លៀតពេលទំនេរដើម្បីថតសម្តែងភាពយន្តផងដែរ ព្រោះសុទ្ធតែការងារ និងអាជីពដែលខ្លួនស្រលាញ់ដូចគ្នា។ លោកបន្តថា សម្រាប់ការចេញច្រៀង ខ្លួនមិនជាទទួលនោះឡើយ ដោយសារងាកមកចាប់វិស័យថតសម្តែងភាពយន្តច្រើនជាង។

លោក ឌឿ វិសាល បានបញ្ជាក់ថា “ទំនេរពីការងារនៅមន្ទីរពេទ្យមួយចំណែក ខ្ញុំបានចាប់ប្រឡូកក្នុងវិស័យភាពយន្ត រីឯច្រៀងស្ទើរ ១០០ ភាគរយ គឺ ខ្ញុំលែងទទួលការងារច្រៀងហើយ ព្រោះពេលនេះ ខ្ញុំចូលខ្លាំងខាងភាពយន្ត ហើយម្យ៉ាងទៀតថ្មីៗ នេះ លោកក៏ទើបតែថតចប់រឿងខ្នាតធំឲ្យផលិតកម្មមួយត្រៀមចាក់បញ្ចាំងឆាប់នេះទៀតផង”។

លោក ឌឿ វិសាល បាននិយាយទៀតថា រឿងដែលទើបថតចប់នេះ លោកបានសម្តែងជាតួអង្គខ្មោច ខណៈការថតរឿងលើកនេះពិបាកជាងរាល់ដង ដោយសារជារឿងខ្មោច ត្រូវចេញថតតែពេលយប់ ហើយមានដាច់យប់ក៏មាន ព្រោះទីតាំងថតនៅតាមខេត្តឆ្ងាយៗ ទៀត អ៊ីចឹងពិបាក តែសមតម្លៃណាស់ដែលរឿងចេញមកមានគុណភាព ហើយល្អមើល។ យ៉ាងណា វិសាល បានដាក់ក្តីរំពឹង នឹងទទួលបានការគាំទ្របន្ថែមពីទស្សនិកជនតាមរយៈការសម្តែងភាពយន្តនានា។

គួរបញ្ជាក់ថា កន្លងមក លោក ឌឿ វិសាល ហៅ ធូ គឺជាតារាចម្រៀង និងជាគ្រូពេទ្យស្ម័គ្រចិត្តប្រយុទ្ធប្រឆាំងជំងឺកូវីដ-១៩។ នៅគ្រានោះ លោកក៏បានធ្វើឲ្យមហាជនផ្ទុះការគាំទ្រគ្រប់គ្នា បន្ទាប់ពីបង្ហាញសកម្មភាពដ៏ល្អក្នុងនាមជាគ្រូពេទ្យស្ម័គ្រចិត្តជួយដល់អ្នកជំងឺកូវីដ-១៩។ សកម្មភាពនេះ ត្រូវបានការសរសើរ និងលើកទឹកចិត្តដល់លោក ឌឿ វិសាល អំឡុងពេលបំពេញបេសកកម្មជាកងទ័ពអាវសជួយអ្នកជំងឺកូវីដ-១៩ នាពេលកន្លងមកផងដែរ៕

អត្ថបទ ៖ ចាន់រ៉ា

The post ឌឿ វិសាល លូកខ្លួនកាន់តែខ្លាំងលើវិស័យភាពយន្តក្រៅពីអាជីពគ្រូពេទ្យ appeared first on Kampuchea Thmey Daily.

ឌឿ វិសាល ស្នើពលរដ្ឋប្រុងប្រយ័ត្ន កុំជឿសម្ដីអ្នកលក់ Online ម្នាក់ ជំរុញស្ត្រីមានផ្ទៃពោះលាបឡេ

អ៊ិន ពិសី — Thu, 05 Oct 2023 08:15:38 +0000

បន្ទាប់ពីមានការចែករំលែកពាក់ព័ន្ធរឿងរ៉ាវដែលមានអ្នកលក់ Online ម្នាក់ បានជំរុញស្ត្រីមានផ្ទៃពោះត្រូវលាបឡេ ឬ ប្រើគ្រឿងសម្អាងផ្សេងៗ ដើម្បីម្តាយស្អាត ហើយស្អាតដល់កូនទៀតនោះ លោក ឌឿ វិសាល ហៅ ធូ តារាចម្រៀង និងជាគ្រូពេទ្យវ័យក្មេង បានចេញមកស្នើឲ្យប្រុងប្រយ័ត្នខ្ពស់។

ខ្លឹមសារដែលត្រូវបានលោក ឌឿ វិសាល លើកឡើងនោះ បញ្ជាក់ថា «សូមបងប្អូនកុំជឿលើសម្តីរបស់អ្នកលក់ Online ម្នាក់ ដែលគាត់និយាយថា ស្ត្រីមានផ្ទៃពោះត្រូវតែលាបឡេ ឬ ប្រើគ្រឿងសម្អាងផ្សេងៗ ដើម្បីម្តាយស្អាត ហើយស្អាតដល់កូនទៀត វាមិនពិតទេ»។

តារាចម្រៀង និងជាគ្រូពេទ្យសង្ហា ឌឿ វិសាល បានបន្តថា «សូមបងប្អូនស្តាប់តាមការណែនាំរបស់គ្រូពេទ្យ ដើម្បីសុខភាពបងប្អូន និងដើម្បីអនាគតកូនរបស់បងប្អូន ព្រោះអំឡុងពេលមានផ្ទៃពោះវាជាការចាប់ផ្ដើម នៃអនាគតសុខភាពកូនរបស់បងប្អូនទៅអនាគត»។

លោក ឌឿ វិសាល បានបន្ថែមទៅកាន់ចម្ងល់មហាជនទៀតថា «ដោយសារអ្នកគ្រប់គ្នាដឹងរួចហើយថាជានរណា ហើយណាមួយទៀតខ្ញុំមិនចង់ឲ្យគាត់កាន់តែល្បី បើយកឈ្មោះបុគ្គលនោះមកនិយាយ»។

បន្ថែមពីនេះ តារាប្រុសលោក ឌឿ វិសាល បញ្ជាក់ថា «ការលើកឡើងនេះព្រោះគោលបំណងគាត់(អ្នកលក់អនឡាញ) គឺចង់ឲ្យល្បី ដើម្បីលក់ផលិតផលដាច់ តែគោលបំណងខ្ញុំគឺចង់ការពារសុខភាពប្រជាជន»។

ការពិត លោក ឌឿ វិសាល ហៅធូ គឺជាតារាចម្រៀង និងគ្រូពេទ្យស្ម័គ្រចិត្តប្រយុទ្ធប្រឆាំងជំងឺកូវីដ-១៩។ ហើយកន្លងមក លោកបានធ្វើឲ្យមហាជនផ្ទុះការគាំទ្រគ្រប់គ្នា បន្ទាប់ពីលោកបានបង្ហាញសកម្មភាពដ៏ល្អក្នុងនាមជាគ្រូពេទ្យស្ម័គ្រចិត្តជួយដល់អ្នកជំងឺកូវីដ-១៩។ សកម្មភាពនេះ ទទួលបានការសរសើរ និងលើកទឹកចិត្តពីមហាជនចំពោះ លោក ឌឿ វិសាល អំឡុងពេលបំពេញបេសកកម្មជាកងទ័ពអាវសជួយអ្នកជំងឺកូវីដ-១៩ នាពេលកន្លងមកផងដែរ៕

អត្ថបទ ៖ ចាន់រ៉ា

The post ឌឿ វិសាល ស្នើពលរដ្ឋប្រុងប្រយ័ត្ន កុំជឿសម្ដីអ្នកលក់ Online ម្នាក់ ជំរុញស្ត្រីមានផ្ទៃពោះលាបឡេ appeared first on Kampuchea Thmey Daily.

អារម្មណ៍ពិត ឌឿ វិសាល ក្រោយទទួលមេដាយមាស និងប័ណ្ណសរសើររាជរដ្ឋាភិបាល សម្រាប់គ្រូពេទ្យសម្ដេចតេជោ ប្រឆាំងកូវីដ-១៩

អ៊ិន ពិសី — Fri, 26 May 2023 03:21:34 +0000

លោក ឌឿ វិសាល ហៅ ធូ តារាចម្រៀង និងជាគ្រូពេទ្យស្ម័គ្រចិត្តប្រយុទ្ធប្រឆាំងជំងឺកូវីដ-១៩ កន្លងមក បានធ្វើឲ្យមហាជនផ្ទុះការគាំទ្រគ្រប់គ្នា បន្ទាប់ពីលោកបង្ហាញសកម្មភាពដ៏ល្អ ក្នុងនាមជាគ្រូពេទ្យស្ម័គ្រចិត្តជួយដល់អ្នកជំងឺកូវីដ-១៩។ សកម្មភាពនេះ ត្រូវបានសរសើរ និងលើកទឹកចិត្តដល់លោក ឌឿ វិសាល អំឡុងពេលបំពេញបេសកកម្មជាកងទ័ពអាវសជួយអ្នកជំងឺកូវីដ-១៩។

យ៉ាងណាមិញ ថ្មីៗ កំលោះសង្ហាដែលជាគ្រូពេទ្យរូបនេះ បានសម្ដែងអារម្មណ៍រំភើប និងត្រេកអរខ្លាំង ក្រោយពេលលោកទើបទទួលបានមេដាយការងារថ្នាក់មាស និងប័ណ្ណសរសើររាជរដ្ឋាភិបាល សម្រាប់គ្រូពេទ្យសម្ដេចតេជោ ប្រឆាំងកូវីដ-១៩ ក្រោមអធិបតីភាពដ៏ខ្ពង់ខ្ពស់របស់ ឯកឧត្ដមបណ្ឌិត ហ៊ុន ម៉ាណែត និងលោកជំទាវបណ្ឌិត ពេជ្រ ចន្ទមុន្នី។

ជាមួយគ្នានេះ លោក ឌឿ វិសាល ក៏បានប្រាប់កម្ពុជាថ្មី ដោយចាត់ទុកថាការទទួលមេដាយការងារថ្នាក់មាស និងប័ណ្ណសរសើររាជរដ្ឋាភិបាលសម្រាប់គ្រូពេទ្យសម្ដេចតេជោ ប្រឆាំងកូវីដ-១៩ គឺជាមហាកិត្តិយសធំធេងបំផុតសម្រាប់រូបលោកផ្ទាល់ និងក្រុមគ្រួសារ។ ពិសេសលោកថ្លែងការអរគុណជូនចំពោះ ឯកឧត្ដមបណ្ឌិត ហ៊ុន ម៉ាណែត និងលោកជំទាវ ពេជ្រ ចន្ទមុន្នី ដែលលោកទាំងពីរតែងនៅក្បែរផ្ដល់ការលើកទឹកចិត្ត និងគាំទ្របេសកកម្មជាកងទ័ពអាវសជួយអ្នកជំងឺកូវីដ-១៩។

លោក ឌឿ វិសាល បានបន្តថា «សម្រាប់ការទទួលបានមេដាយមាសនេះ មិនមែនបានមកដោយការខិតខំប្រឹងប្រែងរបស់ខ្ញុំតែម្នាក់ទេ គឺដំបូងឡើយ ក៏ជាការជួយជ្រោមជ្រែងផ្ដល់កម្លាំងចិត្តពីខាងឪពុក-ម្ដាយ និងក្រុមគ្រួសារទាំងមូល ដែលពួកគាត់ស្ម័គ្រចិត្តឲ្យខ្ញុំទៅចូលរួមការងារជួយព្យាបាលដល់អ្នកជំងឺកូវីដ-១៩»។

លោក ឌឿ វិសាល បានបញ្ជាក់ទៀតថា បន្ទាប់ពីទទួលបានការអនុញ្ញាតពីក្រុមគ្រួសាររួចហើយ លោកក៏បានការមើលថែ និងការដឹកនាំដ៏ល្អពីសំណាក់ឯកឧត្ដមបណ្ឌិត ហ៊ុន ម៉ាណែត និងលោកជំទាវ ពេជ្រ ចន្ទមុន្នី យ៉ាងយកចិត្តទុកដាក់បំផុតសម្រាប់រូបលោក ក៏ដូចគ្រូពេទ្យសម្ដេចតេជោ ប្រឆាំងកូវីដ-១៩ ទាំងអស់ ទើបធ្វើឲ្យលោកមានថ្ងៃនេះ៕

អត្ថបទ ៖ ចាន់រ៉ា

The post អារម្មណ៍ពិត ឌឿ វិសាល ក្រោយទទួលមេដាយមាស និងប័ណ្ណសរសើររាជរដ្ឋាភិបាល សម្រាប់គ្រូពេទ្យសម្ដេចតេជោ ប្រឆាំងកូវីដ-១៩ appeared first on Kampuchea Thmey Daily.

បទ «បងស្រី» របស់ ឌឿ វិសាល ធ្វើឲ្យលោកជំទាវ ពេជ្រ ច័ន្ទមុន្នី ស្តាប់ហើយរំភើបស្រក់ទឹកភ្នែក

Sokhom Khon — Mon, 04 Apr 2022 09:07:58 +0000

ថ្មីៗនេះតារាចម្រៀងលោក ឌឿ វិសាល ហៅ ធូ ឆ្លៀតពេលទំនេរពីការងារជាគ្រូពេទ្យប្រយុទ្ធប្រឆាំងកូវីដ-១៩ បានផលិតMVបទចម្រៀងដែលមានចំណងជើងថា «បងស្រី» បង្ហាញពីការដឹងគុណចំពោះលោកជំទាវ ពេជ្រ ច័ន្ទមុន្នី ខណ:បទនេះកំពុងធ្វើឲ្យមហាជនផ្ទុះការសរសើរនិងគាំទ្រគ្រប់គ្នា។

លោក ឌឿ វិសាល បានប្រាប់កម្ពុជាថ្មីថា តាមរយបទ«បងស្រី» ជាចម្រៀងផ្ញើជូនលោកជំទាវ ពេជ្រ ច័ន្ទមុន្នី ដើម្បីជាការអរគុណដែលគាត់បានមើលថែខ្ញុំ និងក្រុមគ្រូពេទ្យស្ម័គ្រចិត្តប្រឆាំងកូវីដ-១៩ទាំងអស់។ លោកជំទាវជាបងស្រីផង និងជាម្តាយផងគាត់នៅពីក្រោយផ្តល់កម្លាំងដល់ពួកយើងគ្រប់គ្នា។ លោកបន្តថា នៅពេលខ្ញុំជួបមិត្តភ័ក្តិបងប្អូនក្រុមការងារគាត់មកសួរនាំពីបទ «បងស្រី» គាត់សរសើរ គាត់អោយមេដាយមានអារម្មណ៍ថា សប្បាយចិត្តណាស់ ហើយក៏អរគុណដល់គ្រប់គ្នាដែលចូលចិត្ត។

ឌឿ វិសាល បន្ថែមទៀតថា បទ«បងស្រី» គឺធ្វើឡើងជូនលោកជំទាវ ពេជ្រ ច័ន្ទមុន្នី ដែលលោកជំទាវតែងតែមើលថែការពារយកចិត្តទុកដាក់លើប្អូនៗ។ លោកជំទាវជាកម្លាំងធ្វើអោយប្អូនអាចតស៊ូជាមួយជំងឺកូវីដ-១៩បាន បងតែងតែនៅពីក្រោយភាពជោគជ័យរបស់ប្អូនៗ បទនេះ ជាអនុស្សាវរីយ៍ដ៏មានតម្លៃសម្រាប់ប្អូនៗអរគុណបងស្រី។

ដោយឡែកសម្រាប់លោកជំទាវ ពេជ្រ ច័ន្ទមុន្នី បានឆ្លើយតបទៅតារាចម្រៀង ឌឿ វិសាល ទាំងអារម្មណ៍រំភើបបែបនេះថាអរគុណប្អូន ឌឿ វិសាល ចំពោះចម្រៀងមួយបទនេះ។ បងពិតជារំភេីបណាស់នៅពេលដែលស្តាប់ម្តងៗស្រក់ទឹកភ្នែករហូត។ អរគុណប្អូនៗទាំងអស់គ្នា ដែលបានលះបង់ពេលវេលា និងភាពក្លាហានក្នុងការធ្វេីសង្គ្រាមជាមួយសត្រូវដែលគ្មានរូបcovidក្នុងរយ:ពេលជាង២ឆ្នាំនេះ។

លោកជំទាវលើកឡើងទៀតថា បងពិតជាមានមោទនៈភាពចំពោះប្អូនៗទាំងអស់គ្នា។ បងក៏ចង់ប្រាប់ប្អូនៗថា ប្អូនៗក៏ជាកម្លាំងចិត្តអោយដល់បងផងវិញដែរ។ បងឈរនិងបន្តក្នុងការដឹកនាំដល់ក្រុមគ្រូពេទ្យស្មគ្រ័ចិត្តនេះបាន គឺដោយការស្រលាញ់និងកម្លាំងចិត្តដែលផ្តល់ពីប្អូនៗទាំងអស់គ្នាដល់បងស្រីម្នាក់នេះ៕

អត្ថបទ៖ ចាន់រ៉ា

The post បទ «បងស្រី» របស់ ឌឿ វិសាល ធ្វើឲ្យលោកជំទាវ ពេជ្រ ច័ន្ទមុន្នី ស្តាប់ហើយរំភើបស្រក់ទឹកភ្នែក appeared first on Kampuchea Thmey Daily.

ឌឿ វិសាល ទម្លាក់ចោលសិល្បៈមួយរយៈទៀតដើម្បីបំពេញតួនាទីជួយសង្គ្រោះអ្នកជំងឺកូវីដ

Sokhom Khon — Wed, 10 Nov 2021 03:45:52 +0000

ស្របពេលដែលបច្ចុប្បន្នកំពុងមមាញឹកការងារជួយសង្គម តារាចម្រៀងរូបសង្ហាលោក ឌឿ វិសាល បានប្រកាសផ្អាកសិល្ប:មួយរយ:ទៀតសិន ដើម្បីយកពេលបំពេញតួនាទីជាកងទ័ពអាវសជួយសង្គ្រោះអ្នកជំងឺកូវីដ-១៩។ នេះបើតាមការបញ្ជាក់ប្រាប់ឲ្យដឹងពីសាមីខ្លួនលោក ឌឿ វិសាល។

លោក ឌឿ វិសាល ហៅ ធូ បានរៀបរាប់ថា ចំពោះបំណងប្រាថ្នាធំៗសម្រាប់ជីវិតបានសម្រេចអស់ហើយនៅឡើយតែការងារសិល្បៈដែលស្រលាញ់មិនទាន់ជោគជ័យដោយសារតែការងារទាំងនេះតែងតែចូលមកស្របពេលតែមួយ អញ្ចឹងជ្រើសរើសបានតែមួយទេ។ ឌឿ វិសាល បញ្ជាក់ប្រាប់កម្ពុជាថ្មីទៀតថា បំណងធំដែលខ្លួនសម្រេចបានពេលនេះ គឺបន្ទាប់ពីចូលរួមស្ម័គ្រចិត្តប្រយុទ្ធប្រឆាំងជំងឺកូវីដ-១៩អស់មួយរយ:កាលកន្លងទៅនោះ ឥឡូវលោកត្រូវបានបញ្ចូលឈ្មោះទៅក្នុងក្របខណ្ឌរបស់រដ្ឋ និងក្រសួងហើយ។

លោកបន្តថា នេះហើយដែលជាភាពជោគជ័យធំទទួលបានពីកិច្ចខិតខំប្រឹងប្រែងរបស់ខ្ញុំ និងក៏ជាក្តីប្រាថ្នាជូនដល់ឪពុកម្តាយដែលពួកគាត់ចង់បានកន្លងមកដែរ។ ដោយឡែកសម្រាប់បំណងប្រាថ្នាមួយទៀតគឺការសាងកេរ្តិ៍ឈ្មោះលើវិស័យសិល្ប: ចម្រៀងប៉ុន្តែពេលនេះខ្ញុំមិនទាន់ធ្វើបាននៅឡើយទេ ព្រោះអំឡុងពេលនេះត្រូវបំពេញតួនាទីជាទ័ពអាវសចូលរួមជួយសង្គ្រោះអ្នកជំងឺកូវីដ-១៩ជាមួយសង្គមជាតិសិន។

ឌឿ វិសាល និយាយទៀតថា ទន្ទឹមគ្នាដែលលោកកំពុងតែបំពេញតួនាទីជាគ្រូពេទ្យប្រយុទ្ធប្រឆាំងកូវីដ-១៩នេះដែរ ថ្មីៗនេះក៏មានកម្មវិធីសិល្ប:មួយចំនួនដូចជាខាងទូរទស្សន៍ជាដើមបានទាក់ទងហៅជាបន្តបន្ទាប់។ប៉ុន្តែខណ:ពេលនេះលោកមិនអាចទទួលបានទេ ពោលគឺត្រូវផ្អាកមួយរយ:ទៀតសិន ហើយក៏សូមការអធ្យាស្រ័យនិងអរគុណដល់បណ្តាអ្នករៀបចំកម្មវិធីទាំងអស់ដែលបានទាក់ទងមកលោក៕

អត្ថបទ៖ ចាន់រ៉ា

The post ឌឿ វិសាល ទម្លាក់ចោលសិល្បៈមួយរយៈទៀតដើម្បីបំពេញតួនាទីជួយសង្គ្រោះអ្នកជំងឺកូវីដ appeared first on Kampuchea Thmey Daily.