តម្លៃប្រេងឆៅ Archives - Kampuchea Thmey Daily

តម្លៃប្រេងសាំងលក់រាយធ្លាក់ចុះនៅ ៥០០០ រៀល មួយលីត្រ

deth leng — Sun, 29 Mar 2026 00:51:31 +0000

តម្លៃប្រេងសាំងលក់រាយតាមស្ថានីយប្រេងឥន្ធនៈ ចាប់ពីថ្ងៃទី ២៩ ខែមីនា រហូតដល់ថ្ងៃជូនដំណឹងបន្ទាប់ លក់ចេញក្នុងតម្លៃ ៥០០០ រៀល ក្នុងមួយលីត្រ ចុះពី ៥៤៥០ រៀល និងប្រេងម៉ាស៊ូតលក់ចេញក្នុងតម្លៃ ៧២០០ រៀល ក្នុងមួយលីត្រកើនឡើង ១០០ រៀល។

រាជរដ្ឋាភិបាលកម្ពុជា បានបន្តដាក់ចេញនូវវិធានការឧបត្ថម្ភធន និងបញ្ចុះពន្ធអាករផ្សេងៗ ដើម្បីទម្លាក់តម្លៃប្រេងឥន្ធនៈ ដើម្បីជួយសម្រួលដល់ជីវភាពរបស់ប្រជាពលរដ្ឋនៅចំពេលដែលតម្លៃប្រេងបានកើនឡើងខ្ពស់ បន្ទាប់ពីផ្ទុះសង្គ្រាមនៅតំបន់មជ្ឈិមបូព៌ា។

យោងតាមក្រសួងពាណិជ្ជកម្ម រាជរដ្ឋាភិបាល បន្តបញ្ចុះតម្លៃប្រេងឥន្ធនៈចំនួន ៦,៥សេនដុល្លារ ក្នុងមួយលីត្រ និង១សេនដុល្លារ/លីត្របន្ថែមទៀត ដោយសារតម្លៃប្រេងសាំងអន្តរជាតិកើនឡើងលើសពី ៩០ ដុល្លារ ក្នុងមួយបារ៉ែល និងប្រេងម៉ាស៊ូតកើនលើសពី ១០០ ដុល្លាក្នុងមួយបារ៉ែល។

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានសម្រេចបញ្ចុះអាករបន្ថែមលើប្រេងសាំង និងម៉ាស៊ូតមកសូន្យ និងអាករពិសេសលើប្រេងម៉ាសូតពី៤% មកសូន្យ និងបញ្ចុះអាករលើតម្លៃបន្ថែមលើប្រេងសាំង និងប្រេងម៉ាស៊ូតពី ១០% មក ៤% ដោយរាជរដ្ឋាភិបាលទទួលបន្ទុកជំនួស ៦%។

ថ្លៃប្រេងឥន្ធនៈមុនការបញ្ចុះអាករបន្ថែម, អាករពិសេស និងអាករលើតម្លៃបន្ថែម ប្រេងសាំង ៥២០០ រៀល ក្នុងមួយលីត្រ៕

The post តម្លៃប្រេងសាំងលក់រាយធ្លាក់ចុះនៅ ៥០០០ រៀល មួយលីត្រ appeared first on Kampuchea Thmey Daily.

នាយករដ្ឋមន្ត្រី អំពាវនាវកុំឱ្យម្ចាស់ស្ថានីយឆ្លៀតឱកាស ដំឡើងថ្លៃប្រេង

deth leng — Fri, 06 Mar 2026 10:21:54 +0000

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអំពាវនាវដល់ម្ចាស់ស្ថានីយប្រេងឥន្ធនៈកុំដំឡើងថ្លៃ ដែលនឹងធ្វើឱ្យប៉ះពាល់ដល់ប្រជាពលរដ្ឋអ្នកប្រើប្រាស់។

ការលើកឡើងបែបនេះ របស់ប្រមុខដឹកនាំរាជរដ្ឋាភិបាលបានធ្វើឡើង បន្ទាប់ពីមានម្ចាស់អាជីវកម្ម និងស្ថានីយប្រេងឥន្ធនៈមួយចំនួន បានឆ្លៀតឱកាសដំឡើងថ្លៃហួសហេតុ បន្ទាប់ពីបញ្ហាសង្គ្រាមនៅតំបន់មជ្ឈិមបូព៌ា។

សម្ដេច ហ៊ុន ម៉ាណែត មានប្រសាសន៍នៅក្នុងពិធីបិទសន្និបាតបូកសរុបលទ្ធផលការងារ របស់អាជ្ញាធរជាតិប្រយុទ្ធប្រឆាំងគ្រឿងញៀន នៅថ្ងៃទី ០៦ ខែមីនា ឆ្នាំ ២០២៦ ដោយបានប្រគល់ភារកិច្ច ឱ្យក្រសួងពាណិជ្ជកម្ម ក្រសួងរ៉ែ និងថាមពល និងក្រសួងសេដ្ឋកិច្ច និងហិរញ្ញវត្ថុ តាមដានទិន្នន័យ និងការប្រែប្រួលអំពីបញ្ហានាំចូល ការផ្គត់ផ្គង់ និងតម្លៃប្រេង។

សម្ដេចធិបតី ហ៊ុន ម៉ាណែត បញ្ជាក់ថា៖ «រឿងបរិមាណ ការនាំចូលកម្រិតណា? តើមានប្រទេសណាដែលគ្រោងបិទការនាំចេញ? ព្រោះស្ថានភាព បើយូរអង្វែងអាចមានការបិទការនាំចេញ ដែលនាំឱ្យមានការខ្វះប្រេង អញ្ចឹងត្រូវតាមដានឱ្យជាប់ដាក់វិធានការឱ្យទាន់ពេលវេលា»។

ឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ គ្រោងនឹងដឹកនាំកិច្ចប្រជុំដើម្បីគ្រប់គ្រង់សភាពការណ៍។

លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម មានប្រសាសន៍កាលពីពេលថ្មីៗនេះថា ដោយសារតម្លៃប្រេងអន្តរជាតិមានការកើនឡើង តម្លៃប្រេងលក់រាយក្នុងស្រុកអាចនឹងកើនឡើងពី ៥% ទៅ ២៥% អាស្រ័យលើទីផ្សារអន្តរជាតិ។

ក្នុងករណីដែលតម្លៃប្រេងសាំងនៅលើទីផ្សារអន្តរជាតិកើនឡើងចាប់ពី ៩០ ដុល្លារ ក្នុងមួយបារ៉ែល រដ្ឋាភិបាលនឹងបញ្ចុះថ្លៃលក់រាយ ១ សេន ក្នុងមួយលីត្រ ចំណែកប្រេងម៉ាស៊ូតម្លៃចាប់ពី ១០០ ដុល្លារ ក្នុងមួយបារ៉ែល នឹងបញ្ចុះថ្លៃលក់រាយ ១ សេន ក្នុងមួយលីត្រ ដែលនឹងជួយកាត់បន្ថយការចំណាយរបស់ប្រជាពលរដ្ឋ។

លោកបណ្ឌិត ជ័យ តិច អ្នកតាមដានភូមិសាស្ត្រនយោបាយ និងសេដ្ឋកិច្ច មានប្រសាសន៍ថា អ៊ីរ៉ង់បានប្រកាសបិទច្រកសមុទ្រ Hormuz ដែលជាច្រកដឹកប្រេងប្រមាណ ២០% សម្រាប់ផ្គត់ផ្គង់នៅលើពិភពលោក បន្ទាប់ពីការវាយប្រហាររបស់អ៊ីស្រាអែល និងអាមេរិក។ តម្លៃប្រេងនឹងកើនឡើងជិត ១០០ ដុល្លារ ក្នុងមួយបារ៉ែល ប្រសិនបើសង្គ្រាមអូសបន្លាយយូរ នាំឱ្យកើតមានអតិផរណា។

តម្លៃប្រេងសាំងលក់រាយតាមស្ថានីយប្រេងឥន្ធនៈ លក់ចាប់ពីថ្ងៃទី ០១ រហូតដល់ថ្ងៃទី ១០ ខែមីនា ឆ្នាំ ២០២៦ កើនឡើង ១០០ រៀល សម្រាប់សាំងធម្មតា ដោយលក់ក្នុងតម្លៃ ៣៨៥០ រៀល ក្នុងមួយលីត្រ។ ចំណែកប្រេងម៉ាស៊ូតលក់រាយមានតម្លៃ ៣៨៥០ រៀល កើនឡើង ៥០ រៀលក្នុងមួយលីត្រ។

យោងតាមប្រព័ន្ធផ្សព្វផ្សាយរបស់អាមេរិក តម្លៃប្រេងឆៅអន្តរជាតិបានហក់ឡើងខ្លាំងពេលបិទការជួញដូរកាលពីថ្ងៃព្រហស្បតិ៍ជុំវិញសង្រ្គាមនៅមជ្ឈិមបូព៌ា ប៉ុន្តែថយមកវិញខ្លះសម្រាប់ជួញដូរលើទីផ្សារអាស៊ីនាព្រឹកថ្ងៃសុក្រ (៦ មីនា) នេះ។

តម្លៃប្រេងឆៅអាមេរិក ម៉ាក West Texas Intermediate (WTI) បានហក់ឡើង ៦,៣៥ ដុល្លារ ឬ ៨,៥១% ដល់ ៨១,០១ ដុល្លារ/បារ៉ែល ដែលជាកម្រិតខ្ពស់បំផុតចាប់តាំងពីខែកក្កដា ឆ្នាំ ២០២៤។ ដោយឡែកតម្លៃប្រេងឆៅនាពេលអនាគត ម៉ាក Brent វិញ បានកើនឡើង ៤,០១ ដុល្លារ ឬ ៤,៩៣% ដល់ ៨៥,៤១ ដុល្លារ/បារ៉ែល។

កំណើនតម្លៃប្រេងនេះ បណ្ដាលមកពីជម្លោះរវាងសម្ព័ន្ធមិត្តអ៊ីស្រាអែល-សហរដ្ឋអាមេរិក និងអ៊ីរ៉ង់ ដែលនៅតែបន្តតានតឹង និងបង្កការរាំងស្ទះដល់ច្រកសមុទ្រហ័រមូហ្ស ដែលរួមចំណែកដល់ការដឹកជញ្ជូនប្រេងប្រមាណ ២០% នៃតម្រូវការសកល៕

អត្ថបទ៖ ឡេង ដេត

The post នាយករដ្ឋមន្ត្រី អំពាវនាវកុំឱ្យម្ចាស់ស្ថានីយឆ្លៀតឱកាស ដំឡើងថ្លៃប្រេង appeared first on Kampuchea Thmey Daily.

រដ្ឋ ត្រៀមឧបត្ថម្ភធន លើការបញ្ចុះថ្លៃប្រេង ក្នុងករណីកើនឡើងខ្ពស់

deth leng — Wed, 04 Mar 2026 09:12:47 +0000

រាជរដ្ឋាភិបាលកម្ពុជាគ្រោងត្រៀមវិធានការផ្ដល់ការឧបត្ថម្ភធន ក្នុងការបញ្ចុះថ្លៃប្រេងដល់ប្រជាពលរដ្ឋ ក្នុងករណីតម្លៃប្រេងកើនឡើងខ្ពស់ ដោយសារសង្គ្រាមនៅតំបន់មជ្ឈិមបូព៌ា។ នេះបើយោងតាមអ្នកនាំពាក្យក្រសួងពាណិជ្ជកម្ម។

លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម មានប្រសាសន៍ថា ដោយសារតម្លៃប្រេងអន្តរជាតិមានការកើនឡើង តម្លៃប្រេងលក់រាយក្នុងស្រុកអាចនឹងកើនឡើងពី ៥% ទៅ ២៥% អាស្រ័យលើទីផ្សារអន្តរជាតិ។

លោកបានបញ្ជាក់ថា ក្នុងករណីដែលតម្លៃប្រេងសាំងនៅលើទីផ្សារអន្តរជាតិកើនឡើងចាប់ពី ៩០ ដុល្លារ ក្នុងមួយបារ៉ែល រដ្ឋាភិបាលនឹងបញ្ចុះថ្លៃលក់រាយ ១ សេន ក្នុងមួយលីត្រ ចំណែកប្រេងម៉ាស៊ូតម្លៃចាប់ពី ១០០ ដុល្លារ ក្នុងមួយបារ៉ែល នឹងបញ្ចុះថ្លៃលក់រាយ ១ សេន ក្នុងមួយលីត្រ ដែលនឹងជួយកាត់បន្ថយការចំណាយរបស់ប្រជាពលរដ្ឋ។

យោងតាមប្រព័ន្ធផ្សព្វផ្សាយរបស់អាមេរិក តម្លៃប្រេងឆៅអន្តរជាតិ បានកើនឡើង ៤,៧% ពេលបិទការជួញដូរនៅថ្ងៃអង្គារ ដល់កម្រិតខ្ពស់បំផុតចាប់តាំងពីខែមករា ឆ្នាំ២០២៥ ខណៈសង្គ្រាមរវាងអ៊ីស្រាអែល-សហរដ្ឋអាមេរិក និងអ៊ីរ៉ង់បន្តតានតឹងខ្លាំង ដោយរំខានដល់ការដឹកជញ្ជូនថាមពលពីមជ្ឈិមបូព៌ា និងបង្កឱ្យមានការភ័យខ្លាចចំពោះជម្លោះដែលអូសបន្លាយពេលយូរ។

តម្លៃប្រេងឆៅនាពេលអនាគត ម៉ាក Brent បានកើនឡើង ៣,៦៦ ដុល្លារ ឬ ៤,៧% នៅត្រឹម ៨១,៤០ ដុល្លារ ក្នុងមួយបារ៉ែល ដែលជាអត្រាតម្លៃខ្ពស់បំផុតចាប់តាំងពីខែមករា ឆ្នាំ២០២៥។ តម្លៃប្រេងឆៅអាមេរិក ម៉ាក West Texas Intermediate (WTI) វិញ បានកើនឡើង ៣,៣៣ ដុល្លារ ឬ ៤,៧% ដល់ ៧៤,៥៦ ដុល្លារ ក្នុងមួយបារ៉ែល៕

The post រដ្ឋ ត្រៀមឧបត្ថម្ភធន លើការបញ្ចុះថ្លៃប្រេង ក្នុងករណីកើនឡើងខ្ពស់ appeared first on Kampuchea Thmey Daily.

ក្រុមហ៊ុន Total Energies របស់បារាំងបង្ហាញជំហរពង្រីកការវិនិយោគប្រេង និងឧស្ម័ន នៅកម្ពុជា

deth leng — Mon, 23 Jun 2025 02:23:20 +0000

ក្រុមហ៊ុនប្រេងបារាំង Total Energies បានបញ្ជាក់ជំហរពង្រីកការវិនិយោគក្នុងទីផ្សារប្រេង ឧស្ម័ន និងថាមពលកកើតឡើងវិញនៅកម្ពុជា។

លោក Mehmet CELEPOGLU នាយករងក្រុមហ៊ុនសម្រាប់តំបន់អូសេអានី និងអាស៊ីអាគ្នេយ៍បានជួបពិភាក្សាការងារជាមួយលោក កែវ រតនៈ រដ្ឋមន្រ្តីក្រសួងរ៉ែ និងថាមពល។

ក្រសួងរ៉ែ និងថាមពល បានបញ្ជាក់ថា កម្ពុជាមានលទ្ធភាពគ្រប់គ្រាន់ ក្នុងការផ្គត់ផ្គង់ប្រេងឥន្ធនៈ និងឧស្ម័នសម្រាប់តម្រូវការក្នុងប្រទេស។

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅថ្ងៃទី ២២ ខែមិថុនា ឆ្នាំ ២០២៥ បានប្រកាសផ្អាកការនាំចូលប្រេងឥន្ធនៈ និងឧស្ម័នពីប្រទេសថៃ បន្ទាប់ពីភាគីថៃបង្ករហេតុជាមួយកម្ពុជាជាបន្តបន្ទាប់ជុំវិញបញ្ហាព្រំដែន។

សម្ដេច ហ៊ុន ម៉ាណែត បានអះអាងថា ក្រុមហ៊ុនចែកចាយប្រេងឥន្ធនៈនៅកម្ពុជា មានលទ្ធភាពនាំចូលប្រេងឥន្ធនៈ និងឧស្ម័នពីប្រភពផ្សេង គ្រប់គ្រាន់ ដើម្បីផ្គត់ផ្គង់តម្រូវការប្រើប្រាស់ក្នុងស្រុក៕

អត្ថបទ៖ ឡេង ដេត

The post ក្រុមហ៊ុន Total Energies របស់បារាំងបង្ហាញជំហរពង្រីកការវិនិយោគប្រេង និងឧស្ម័ន នៅកម្ពុជា appeared first on Kampuchea Thmey Daily.

តម្លៃប្រេងអន្តរជាតិធ្លាក់ចុះ ២ ដុល្លារ ពេលបញ្ចប់ការជួញដូរ

Huon Dina — Sat, 22 Feb 2025 02:29:54 +0000

តម្លៃប្រេងអន្តរជាតិបានធ្លាក់ចុះប្រមាណ ២ ដុល្លារ នៅពេលបញ្ចប់ការជួញដូរកាលពីថ្ងៃសុក្រ ដែលជាថ្ងៃបញ្ចប់ការជួញដូរប្រចាំសប្ដាហ៍ ដោយសារតែការស្រាកស្រាន្តនៃភាពតានតឹងនៅតំបន់មជ្ឈិមបូព៌ា និងការរំពឹងទុកអំពីកិច្ចព្រមព្រៀងសន្តិភាពនៃជម្លោះអ៊ុយក្រែនទោះបីមានភាពមិនប្រាកដប្រជា។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃប្រេងឆៅនាពេលអនាគត ម៉ាក Brent បានធ្លាក់ចុះ ២,០៥ ដុល្លារ ឬ ២,៦៨ ភាគរយ ដោយបញ្ចប់ការជួញដូរនៅត្រឹម ៧៤,៤៣ ដុល្លារ/បារ៉ែល ខណៈតម្លៃប្រេងឆៅនាពេលអនាគតអាមេរិក ម៉ាក West Texas Intermediate (WTI) បានធ្លាក់ចុះ ២,០៨ ដុល្លារ ឬ ២,៨៧ ភាគរយ ដោយបញ្ចប់ការជួញដូរនៅត្រឹម ៧០,៤០ ដុល្លារ/បារ៉ែល។

ក្នុងអត្រាប្រចាំសប្ដាហ៍ តម្លៃ Brent ធ្លាក់ចុះ ០,៤ ភាគរយ ខណៈ WTI ធ្លាក់ចុះ ០,៥ ភាគរយ។

អ្នកជំនាញលើកឡើងថា ការធ្លាក់ចុះនៃតម្លៃប្រេងអន្តរជាតិនេះ គឺដោយសារតែការស្រាកស្រាន្តនៃជម្លោះនៅមជ្ឈិមបូព៌ា ដែលកន្លងមកបានគំរាមកំហែងដល់ការផ្គត់ផ្គង់ប្រេងឆៅអន្តរជាតិ។

កត្តាផ្សេងៗទៀត រួមមានសេចក្ដីរាយការណ៍ដែលថា អ្នកស្រាវជ្រាវនៅវិទ្យាស្ថានមេរោគវិទ្យានៅក្រុង វ៉ូហាន នៃប្រទេសចិន បាននិយាយថា ពួកគេបានរកឃើញវីរុសកូរ៉ូណាថ្មីនៅក្នុងសត្វប្រចៀវ។ ជាមួយគ្នានេះ អ្នកវិនិយោគក៏សម្លឹងមើលពីស្តុកប្រេងសហរដ្ឋអាមេរិក ដែលកើនឡើងផងដែរ ចំពេលដែលអ្នកមួយចំនួនមានសុទិដ្ឋិនិយមលើកិច្ចព្រមព្រៀងបទឈប់បាញ់នៃជម្លោះអ៊ុយក្រែន៕

The post តម្លៃប្រេងអន្តរជាតិធ្លាក់ចុះ ២ ដុល្លារ ពេលបញ្ចប់ការជួញដូរ appeared first on Kampuchea Thmey Daily.

PTT ព្យាករពីតម្លៃប្រេងសកលធ្លាក់ចុះ

Huon Dina — Wed, 29 Jan 2025 07:23:18 +0000

ក្រុមហ៊ុនប្រេង និងឧស្ម័នជាតិថៃ PTT Plc បានចេញផ្សាយរបាយការណ៍របស់ខ្លួនស្ដីពីទីផ្សារប្រេងពិភពលោកប្រចាំសប្តាហ៍ ដែលថា តម្លៃទីផ្សារថាមពលសកលរំពឹងថានឹងធ្លាក់ចុះ ជុំវិញការផ្លាស់គោលនយោបាយថាមពលនៅសហរដ្ឋអាមេរិក។ នេះបើតាមការចុះផ្សាយរបស់កាសែតបាងកកប៉ុស្តិ៍ថ្ងៃពុធនេះ។

របាយការណ៍ PTT បានលើកឡើងថា ផលិតកម្មប្រេងសកលរំពឹងថានឹងកើនឡើងលើសតម្រូវការ ក្រោយប្រធានាធិបតីអាមេរិកថ្មី លោក ដូណាល់ ត្រាំ បានប្រកាសពីភាពអាសន្នផ្នែកថាមពលជាតិនៅថ្ងៃដំបូងដែលលោកចូលកាន់តំណែង ហើយបានចុះហត្ថលេខាលើអធិបញ្ជាស្តីពីថាមពល ដើម្បីបង្កើនការខួងយក និងផលិតកម្មប្រេង។

លោក Poonpat Leesombatpiboon អគ្គលេខាធិការនៃគណៈកម្មាការនិយតកម្មថាមពលថៃ បាននិយាយថា ការបញ្ជារបស់លោក ត្រាំ នឹងមិនត្រឹមតែប៉ះពាល់ដល់តម្លៃប្រេងប៉ុណ្ណោះទេ ប៉ុន្តែថែមទាំងតម្លៃឧស្ម័នធម្មជាតិផងដែរ ពីព្រោះសហរដ្ឋអាមេរិកគឺជាអ្នកនាំចេញឧស្ម័នធម្មជាតិរាវ និងប្រេងឆៅលំដាប់កំពូលរបស់ពិភពលោកក្នុងឆ្នាំ ២០២៣ ដោយផ្អែកលើរដ្ឋបាលព័ត៌មានថាមពលរបស់សហរដ្ឋអាមេរិក។

ទោះបីជាមានការព្យាករបែបនេះក៏ដោយ អ្នកជំនាញខ្លះបានលើកឡើងថា ការធ្លាក់ចុះនៃតម្លៃប្រេងសកលអាចនឹងមានកម្រិត ហើយស្ថិតនៅក្នុងភាពស្រពិចស្រពិលនៃការឡើងចុះ ដោយសារតែទណ្ឌកម្មរបស់អាមេរិកលើរុស្ស៊ី និងកូឡុំប៊ី ដែលជាប្រទេសផ្គត់ផ្គង់ប្រេងដ៏សំខាន់ៗ ធ្វើឱ្យប៉ះពាល់ដល់ការផ្គត់ផ្គង់ ខណៈការជំរុញសេដ្ឋកិច្ចរបស់ចិនអាចធ្វើឱ្យប្រទេសនេះនាំចេញប្រេងច្រើន៕

The post PTT ព្យាករពីតម្លៃប្រេងសកលធ្លាក់ចុះ appeared first on Kampuchea Thmey Daily.

តម្លៃប្រេងធ្លាក់ចុះជាង ២ ភាគរយ នៅថ្ងៃចន្ទ ជុំវិញកង្វល់នៃសេដ្ឋកិច្ចចិន

Huon Dina — Tue, 12 Nov 2024 03:59:39 +0000

តម្លៃប្រេងឆៅសកលបានធ្លាក់ចុះជាង ២ ភាគរយ ពេលបញ្ចប់ការជួញដូរកាលពីថ្ងៃចន្ទ ដោយផែនការជំរុញសេដ្ឋកិច្ចថ្មីរបស់ប្រទេសចិនបរាជ័យមិនដល់ការរំពឹងទុកដើម្បីជំរុញកំណើនតម្រូវការ ខណៈការផ្គត់ផ្គង់ប្រេរំពឹងថានឹងកើនឡើងនៅឆ្នាំ ២០២៥។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃប្រេងឆៅនាពេលអនាគត ម៉ាក Brent បានធ្លាក់ចុះ ១,៩៩ ដុល្លារ ឬ ២,៦៩ ភាគរយ ដោយបញ្ចប់ការជួញដូរនៅតម្លៃ ៧១,៨៨ ដុល្លារ/បារ៉ែល ខណៈតម្លៃប្រេងឆៅអាមេរិក ម៉ាក West Texas Intermediate (WTI) មានតម្លៃ ៦៨,២៧ ដុល្លារ/បារ៉ែល ដោយធ្លាក់ចុះ ២,១១ ដុល្លារ ឬ ៣ ភាគរយ។

តម្លៃប្រេងទាំង២ បានធ្លាក់ចុះប្រមាណ ២ ភាគរយ រួចហើយ ពេលបញ្ចប់ការជួញដូរកាលពីថ្ងៃសុក្រ។

កាលពីថ្ងៃសុក្រ ចិនបានប្រកាសពីកញ្ចប់ជំរុញសេដ្ឋកិច្ចថ្មីប្រមាណ ១,៤ ទ្រីលានដុល្លារ ដើម្បីឱ្យរដ្ឋាភិបាលមូលដ្ឋានយកទៅដោះស្រាយបំណុលរបស់ខ្លួន។ សេដ្ឋវិទូលើកឡើងថា វិធានការនេះជំរុញសេដ្ឋកិច្ចដោយប្រយោជន៍ និងមិនដោយផ្ទាល់នោះទេ ខណៈវិនិយោគិនបានរំពឹងទុកមុននោះថា រដ្ឋាភិបាលចិននឹងមានវិធានការខ្លាំងៗដើម្បីឱ្យដំណើរការសេដ្ឋកិច្ចមានលក្ខណៈសកម្ម ហើយជំរុញតម្រូវការប្រេង ក្នុងប្រទេសដែលប្រើប្រាស់ប្រេងដ៏ធំបំផុតទី២លើពិភពលោកមួយនេះ។

ការខកចិត្តរបស់វិនិយោគិនលើផែនការថ្មី និងបញ្ហាបរិត្តផរណានៅចិន រួមចំណែកដ៏ធំលើការធ្លាក់ចុះនៃតម្លៃប្រេងចុងក្រោយ។ ជាមួយគ្នានោះ ធនាគារ Bank of America Securities បាននិយាយក្នុងកំណត់ត្រាមួយកាលពីថ្ងៃចន្ទថា ការផ្គត់ផ្គង់ប្រេងឆៅពីប្រទេសក្រៅអង្គការ OPEC រំពឹងថានឹងកើនឡើង ១,៤ លានបារ៉ែល/ថ្ងៃ នៅឆ្នាំ ២០២៥ និង ៩០០ ០០០ បារ៉ែល/ថ្ងៃ។ ជាធម្មតា កំណើននៃការផ្គត់ផ្គង់ ឬផលិតកម្មប្រេង តែងតែរួមចំណែកដល់ការធ្លាក់ចុះនៃតម្លៃប្រេងជួញដូរ៕

The post តម្លៃប្រេងធ្លាក់ចុះជាង ២ ភាគរយ នៅថ្ងៃចន្ទ ជុំវិញកង្វល់នៃសេដ្ឋកិច្ចចិន appeared first on Kampuchea Thmey Daily.

តម្លៃប្រេងឡើងជាង ២ ភាគរយ ពេលបញ្ចប់ការជួញដូរ

Huon Dina — Sat, 26 Oct 2024 03:04:32 +0000

តម្លៃប្រេងបានកើនឡើងជាង ១ ដុល្លារ ពេលបញ្ចប់ការជួញដូរកាលពីថ្ងៃសុក្រ ដោយធ្វើឱ្យតម្លៃកើនឡើងជាង ៤ ភាគរយ ក្នុងអត្រាប្រចាំសប្ដាហ៍ ដោយសារតែភាពតានតឹងនៃជម្លោះមជ្ឈិមបូព៌ា និងភាពស្រពិចស្រពិលនៃការបោះឆ្នោតនៅសហរដ្ឋអាមេរិកនាដើមខែក្រោយ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃប្រេងឆៅនាពេលអនាគត ម៉ាក Brent បានកើនឡើង ១,៦៧ ដុល្លារ ឬ ២,២៥ ភាគរយ ដោយបញ្ចប់ការជួញដូរនៅ ៧៦,០៥ ដុល្លារ/បារ៉ែល។ ចំណែកឯតម្លៃប្រេងឆៅអាមេរិកម៉ាក West Texas Intermediate (WTI) វិញ បានកើនឡើង ១,៥៩ ដុល្លារ ឬ ២,២៧ ភាគរយ ដោយបញ្ចប់ការជួញដូរនៅ ៧១,៧៨ ដុល្លារ/បារ៉ែល។

ក្នុងអត្រាប្រចាំសប្ដាហ៍ តម្លៃប្រេងម៉ាក Brent បានកើនឡើង ៤ ភាគរយ ខណៈតម្លៃប្រេងម៉ាក WTI បានកើនឡើង ៣,៧ ភាគរយ។ យ៉ាងណាមិញ កាលពីសប្ដាហ៍មុន តម្លៃប្រេងទាំង២ បានធ្លាក់ចុះប្រមាណ ៧ ភាគរយ ក្នុងអត្រាប្រចាំសប្ដាហ៍ ដោយសារតែក្ដីបារម្ភពីកម្សោយតម្រូវការ និងការរំពឹងទុកពីដំណោះស្រាយនៃជម្លោះមជ្ឈិមបូព៌ា។

យ៉ាងណាមិន សម្រាប់សប្ដាហ៍នេះ តម្លៃប្រេងបានហក់ឡើងមកវិញ ដោយសារតែជម្លោះមជ្ឈិមបូព៌ាកាន់តែកើនកម្ដៅ ខណៈមានសេចក្ដីរាយការណ៍នៅព្រឹកថ្ងៃសៅរ៍នេះ (ម៉ោងនៅកម្ពុជា) ថាអ៊ីស្រាអែលបានវាយប្រហារសងសឹកលើអ៊ីរ៉ង់ ដោយកំណត់គោលដៅលើហេដ្ឋារចនាសម្ព័ន្ធ ខណៈបន្តជម្លោះជាមួយក្រុមហាម៉ាស់របស់ប៉ាឡេស្ទីន និងហេសប៊ូឡារបស់លីបង់ជាដើម។ ជាមួយគ្នានោះ ការបោះឆ្នោតសកលនៅអាមេរិកដែលខិតកាន់តែជិតមកដល់ កំពុងបន្ថែមភាពស្រពិចស្រពិលសម្រាប់វិនិយោគិន៕

The post តម្លៃប្រេងឡើងជាង ២ ភាគរយ ពេលបញ្ចប់ការជួញដូរ appeared first on Kampuchea Thmey Daily.

តម្លៃប្រេងឆៅ Archives - Kampuchea Thmey Daily

​តម្លៃ​ប្រេងសាំង​លក់រាយ​ធ្លាក់ចុះនៅ ​៥០០០ ​រៀល មួយលីត្រ​

​នាយករដ្ឋមន្ត្រី អំពាវនាវកុំឱ្យម្ចាស់ស្ថានីយឆ្លៀតឱកាស ​ដំឡើងថ្លៃប្រេង

​រដ្ឋ​ ត្រៀម​ឧបត្ថម្ភធន ​លើ​ការ​បញ្ចុះ​ថ្លៃ​ប្រេង​ ក្នុង​ករណី​កើន​ឡើង​ខ្ពស់​