ក្រុមហ៊ុន Total Energies របស់បារាំងបង្ហាញជំហរពង្រីកការវិនិយោគប្រេង និងឧស្ម័ន នៅកម្ពុជា

ក្រុមហ៊ុនប្រេងបារាំង Total Energies បានបញ្ជាក់ជំហរពង្រីកការវិនិយោគក្នុងទីផ្សារប្រេង ឧស្ម័ន និងថាមពលកកើតឡើងវិញនៅកម្ពុជា។

លោក Mehmet CELEPOGLU នាយករងក្រុមហ៊ុនសម្រាប់តំបន់អូសេអានី និងអាស៊ីអាគ្នេយ៍​បាន​ជួបពិភាក្សាការងារជាមួយលោក កែវ រតនៈ​ រដ្ឋមន្រ្តីក្រសួងរ៉ែ ​និងថាមពល​។

ក្រសួងរ៉ែ និងថាមពល បានបញ្ជាក់ថា កម្ពុជាមានលទ្ធភាពគ្រប់គ្រាន់ ក្នុងការផ្គត់ផ្គង់ប្រេងឥន្ធនៈ និង​ឧស្ម័នសម្រាប់តម្រូវការក្នុងប្រទេស។

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅថ្ងៃទី ២២ ខែមិថុនា ឆ្នាំ ២០២៥ បាន​ប្រកាស​​ផ្អាកការនាំចូលប្រេងឥន្ធនៈ និងឧស្ម័នពីប្រទេសថៃ​ បន្ទាប់ពីភាគីថៃបង្ករហេតុ​ជាមួយ​កម្ពុជាជាបន្តបន្ទាប់ជុំវិញបញ្ហាព្រំដែន។

សម្ដេច ហ៊ុន ម៉ាណែត បានអះអាងថា​ ក្រុមហ៊ុន​ចែក​ចាយ​ប្រេងឥន្ធនៈនៅកម្ពុជា មានលទ្ធ​ភាព​នាំ​ចូល​ប្រេងឥន្ធនៈ និងឧស្ម័នពីប្រភពផ្សេង គ្រប់គ្រាន់ ដើម្បី​ផ្គត់ផ្គង់តម្រូវការប្រើប្រាស់ក្នុងស្រុក៕

អត្ថបទ៖ ឡេង ដេត