តម្លៃប្រេងអន្តរជាតិ Archives - Kampuchea Thmey Daily

លោក ស៊ីន ចាន់សិរីវុត្ថា៖ ប្រសិនបើសង្គ្រាមនៅមជ្ឈិមបូព៌ា បន្តអូសបន្លាយ តម្លៃប្រេងនឹងកើនឡើង ហើយរាលដាលដល់គ្រប់វិស័យ

Din Thary — Thu, 12 Mar 2026 04:19:00 +0000

លោក ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលកម្ពុជា បានអះអាងថា បើសង្គ្រាមនៅតំបន់មជ្ឈិមបូព៌ាបន្តអូសបន្លាយ មិនមែនត្រឹមតែធ្វើឱ្យប៉ះពាល់ដល់វិស័យអាកាសចរណ៍ឡើយ តែនឹងធ្វើឱ្យប៉ះពាល់យ៉ាងធ្ងន់ធ្ងរដល់តម្លៃប្រេងឥន្ទនៈ ហើយរាលដាលដល់គ្រប់វិស័យ។

លោក ស៊ីន ចាន់សិរីវុត្ថា បានលើកឡើងថា បញ្ហាសង្គ្រាម បានជះឥទ្ធិពលទៅលើវិស័យផ្សេងៗជាច្រើន ដូច្នេះប្រសិនសង្គ្រាមនៅមជ្ឈិមបូព៌ាបន្តអូសបន្លាយ នោះអ្វីដែលប៉ះពាល់ធ្ងន់ធ្ងរមិនមែនត្រឹមតែវិស័យអាកាសចរណ៍ឡើយ គឺប៉ះពាល់ខ្លាំងដល់តម្លៃប្រេងឥន្ទនៈ នៅពេលប្រេងកើនឡើងហើយនឹងធ្វើឱ្យប៉ះពាល់ដល់គ្រប់វិស័យទំាងអស់។

លោកក៏បានបញ្ជាក់ថា៖ «ភ្ញៀវទេសចរដែលចូលមកប្រទេសកម្ពុជា គឺមិនមែនមកតែពីតំបន់មជ្ឈិមបូព៌ាទាំងស្រុងនោះទេ មជ្ឈិមបូព៌ាជាផ្នែកមួយហើយ ប៉ុន្តែអ្វីដែលប៉ះពាល់ដល់ការដឹកជញ្ជូនរបស់កម្ពុជា គឺដោយសារភ្ញៀវទាំងអស់នោះជា Hub នៃការតភ្ជាប់។ ប៉ុន្តែ Hub នៃការតភ្ជាប់គឺអាចផ្លាស់ប្តូរទិសនៃការហោះហើរទៅប្រទេសផ្សេងទៀត គ្រាន់តែរំខានដល់ការធ្វើដំណើរយូជាង ឆ្ងាយជាង ដោយអ្វីៗនឹងជំនួសមកវិញដោយទីតាំងកន្លែងផ្សេង»។

អាកាសយានដ្ឋាននៅឈូងសមុទ្រធំៗទាំង ៧ ទាំងដែលរងផលប៉ះពាល់ពីសង្គ្រាមនៅតំបន់មជ្ឈិមបូព៌ា រួមមាន នៅ ឌូបៃ (DXB), ដូហា (DOH), អាប៊ូ ដាប៊ី (AUH), Sharjah (SHJ), គុយវ៉ែត (KWI), បារ៉ែន (BAH) និង Dubai World Central (DWC)។

យោងតាមអាកាសចរស៊ីវិល ផលប៉ះពាល់ជាអវិជ្ជមានបឋម សម្រាប់កម្ពុជា អាចមានអ្នកដំណើរប្រមាណ ១២,៩៦០ នាក់ ក្នុងមួយសប្ដាហ៍ និង ៥១,៨៤០ នាក់ ក្នុងមួយខែ៕

ដោយ៖ ឌិន ថារី

The post លោក ស៊ីន ចាន់សិរីវុត្ថា៖ ប្រសិនបើសង្គ្រាមនៅមជ្ឈិមបូព៌ា បន្តអូសបន្លាយ តម្លៃប្រេងនឹងកើនឡើង ហើយរាលដាលដល់គ្រប់វិស័យ appeared first on Kampuchea Thmey Daily.

កម្ពុជាចំណាយជាង ១៨៨ លានដុល្លារ នាំចូលប្រេងឥន្ធនៈ

deth leng — Mon, 23 Feb 2026 03:41:54 +0000

កម្ពុជាបានចំណាយថវិកាជាង ១៨៨ លានដុល្លារ ក្នុងការនាំចូលប្រេងឥន្ធនៈ នៅក្នុងខែមករា ឆ្នាំ ២០២៦ ដើម្បីផ្គត់ផ្គង់ការប្រើប្រាស់ក្នុងស្រុក ក្នុងនោះប្រេងម៉ាស៊ូត (D.O) មានតម្លៃជាង ១៣៣ លានដុល្លារ កើនឡើង ១២,៦១% និងប្រេងសាំង មានតម្លៃ ៥៥,៥ លានដុល្លារ ធ្លាក់ចុះ ១៥,១៥% ប្រៀបធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា (GDCE)។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាមានប្រសាសន៍ថា ដើមឡើយយើងវាយតម្លៃលើប្រេងទៅលើកំណើនចរាចរសេដ្ឋកិច្ចក្នុងប្រទេស កំណើនប្រើប្រាស់ប្រេងមានន័យថា ដំណើរការដឹកជញ្ជូន សេដ្ឋកិច្ច ឬសេវាកម្ម ដំណើរការល្អប្រសើរ ប៉ុន្តែឥឡូវ ដំណើរការសេដ្ឋកិច្ចពិបាកប៉ាន់ស្មានតាមរយៈការប្រើប្រាស់ប្រេង។

រោងចក្រមួយចំនួន បានផ្លាស់ប្ដូរមកប្រើថាមពលអគ្គិសនីជំនួសដោយប្រេង ជាពិសេសគឺយានយន្ត។

យោងតាមក្រសួងពាណិជ្ជកម្ម នៅក្នុងឆ្នាំ ២០២៥ កម្ពុជាបានចំណាយប្រាក់ជាង ១,៦៨ ពាន់លានដុល្លារ លើការនាំចូលប្រេងឥន្ធនៈ និងប្រេងម៉ាស៊ូត ធ្លាក់ចុះប្រមាណ ១១% ធៀបនឹងឆ្នាំ ២០២៤៕

អត្ថបទ៖ ឡេង ដេត

The post កម្ពុជាចំណាយជាង ១៨៨ លានដុល្លារ នាំចូលប្រេងឥន្ធនៈ appeared first on Kampuchea Thmey Daily.

តម្លៃប្រេងកើនឡើងតិចតួច ពេលបញ្ចប់ការជួញដូរថ្ងៃពុធ

Huon Dina — Thu, 20 Mar 2025 02:13:35 +0000

តម្លៃប្រេងបានកើនឡើងពេលបញ្ចប់ការជួញដូរកាលពីថ្ងៃពុធ បន្ទាប់ពីទិន្នន័យរបស់រដ្ឋាភិបាលសហរដ្ឋអាមេរិកបានបង្ហាញពីការធ្លាក់ចុះនៃស្តុកប្រេង ប៉ុន្តែការសម្រេចចិត្តមិនបន្តកាត់អត្រាការប្រាក់របស់ធនាគារកណ្ដាលសហព័ន្ធ ធ្វើឱ្យតម្លៃមានកំណើនតិចតួច។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃប្រេងឆៅនាពេលអនាគត ម៉ាក Brent បានកើនឡើង ២២ សេន ឬ ០,៣១ ភាគរយ ដោយបិទការជួញដូរនៅតម្លៃ ៧០,៧៨ ដុល្លារ/បារ៉ែល។ ចំណែកឯតម្លៃប្រេងឆៅអាមេរិក ម៉ាក West Texas Intermediate (WTI) បានកើនឡើង ២៦ សេន ឬ ០,៣៩ ភាគរយ ដោយបិទការជួញដូរនៅ ៦៧,១៦ ដុល្លារ/បារ៉ែល។

ទិន្នន័យរដ្ឋាភិបាលអាមេរិកបានបង្ហាញថា ស្តុកប្រេងឆៅរបស់សហរដ្ឋអាមេរិក បានកើនឡើង ១,៧ លានបារ៉ែល ដល់ ៤៣៧ លានបារ៉ែល។ ក៏ប៉ុន្តែ ស្តុកប្រេងចម្រាញ់ រួមទាំងប្រេងម៉ាស៊ូត និងប្រេងកំដៅបានធ្លាក់ចុះចំនួន ២,៨ លានបារ៉ែល មកនៅត្រឹម ១១៤,៨ លានបារ៉ែល។ ការធ្លាក់ចុះនៃបង្ហាញពីកំណើនតម្រូវការ ដែលជាធម្មតាធ្វើឱ្យតម្លៃប្រេងឆៅកើនឡើងផងដែរ។

អ្នកជំនាញក៏បានគូសភ្ជាប់ផងដែរអំពីកំណើនតម្លៃទៅនឹងភាពតានតឹងជាថ្មីនៃជម្លោះនៅមជ្ឈិមបូព៌ា ដែលអាចបង្កការផ្គត់ផ្គង់ប្រេងរបស់សកល។ យ៉ាងណាមិញ កំណើនតម្លៃនៅមានកំណត់ ដោយសារតែការសម្រេចចិត្តមិនបន្តកាត់បន្ថយអត្រាការប្រាក់របស់ធនាគារសហព័ន្ធ និងការព្រួយបារម្ភផ្នែកសេដ្ឋកិច្ចជុំវិញគោលនយោបាយពន្ធ ដែលអាចប៉ះពាល់ដល់តម្រូវការប្រេង៕

The post តម្លៃប្រេងកើនឡើងតិចតួច ពេលបញ្ចប់ការជួញដូរថ្ងៃពុធ appeared first on Kampuchea Thmey Daily.

OPEC+ នឹងបន្តគម្រោងដំឡើងផលិតកម្មប្រេងជាថ្មី ចាប់ពីខែក្រោយ

Huon Dina — Tue, 04 Mar 2025 03:09:03 +0000

អង្គការនៃប្រទេសនាំចេញប្រេងកាត និងសម្ព័ន្ធមិត្ត (OPEC+) គ្រោងនឹងបន្តគម្រោងដំឡើងផលិតកម្មប្រេងរបស់ខ្លួនជាថ្មី ចាប់ពីខែមេសាទៅ ចំពេលដែលប្រធានាធិបតីអាមេរិក លោក ដូណាល់ ត្រាំ ដាក់សម្ពាធឱ្យប្លុកបង្កើនផលិតកម្មដើម្បីទម្លាក់តម្លៃប្រេង។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

បើតាម OPEC សមាជិកចំនួន ៨ របស់ OPEC + ដែលរួមបញ្ចូលទាំងរុស្ស៊ី និងអារ៉ាប៊ីសាអ៊ូឌីត បានបើកកិច្ចប្រជុំមួយតាមប្រព័ន្ធវិដេអូកាលពីថ្ងៃចន្ទ ហើយបានយល់ព្រមដើម្បីបន្តដំឡើងផលិតកម្មប្រេងតាមគម្រោងនៅខែមេសា។ រ៉យទ័របានគណនាថា ការដំឡើងនេះ មានប្រមាណ ១៣៨ ០០០ បារ៉ែល/ថ្ងៃ។

គេមើលឃើញថា តម្លៃប្រេងត្រូវបានជួញដូរក្នុងចន្លោះពី ៧០-៨២ ដុល្លារ/បារ៉ែល ក្នុងរយៈពេលជាច្រើនសប្ដាហ៍ចុងក្រោយនេះ ដោយមានការស្រពិចស្រពិលជុំវិញការផ្លាស់ប្តូរសំខាន់ៗចំពោះការដាក់ទណ្ឌកម្មរបស់សហរដ្ឋអាមេរិកលើប្រទេសផលិតប្រេងធំៗ ដូចជា អ៊ីរ៉ង់ រុស្ស៊ី និងវេណេហ្ស៊ុយអេឡា ក៏ដូចជាពន្ធលើទំនិញចិន ដែលអាចធ្វើឱ្យតម្រូវការប្រេងធ្លាក់ចុះជាដើម។

តម្លៃប្រេងបានឡើងដល់ ៨២ ដុល្លារ/បារ៉ែល ដែលជាតម្លៃខ្ពស់បំផុតរាប់ខែ កាលពីខែមករា នៅពេលអតីតប្រធានាធិបតីអាមេរិក លោក ចូ បៃដិន បានកំណត់គោលដៅទណ្ឌកម្មជុំថ្មីលើវិស័យប្រេងឆៅរុស្ស៊ី។ យ៉ាងណាមិញ ប្រេងបានធ្លាក់ចុះតម្លៃតាំងពីពេលនោះមក បើទោះបីជាការធ្លាក់ចុះនៅតែមានកម្រិត ដោយសារតែបញ្ហាផ្សេងៗ រួមទាំងជម្លោះភូមិសាស្រ្តនយោបាយ និងភាពស្រពិចស្រពិលនៃគោលនយោបាយរបស់ ត្រាំ ជាដើម។ លោក ត្រាំ ដែលមានគម្រោងបង្កើនផលិតកម្មប្រេងអាមេរិក ទាមទារម្ដងហើយម្ដងទៀត ឱ្យ OPEC+ បង្កើនផលិតកម្ម រាប់តាំងពីលោកឡើងកាន់អំណាច។

គួរគូសបញ្ជាក់ថា វានឹងក្លាយជាការដំឡើងផលិតកម្មប្រេងជាលើកដំបូងរាប់តាំងពីការប្រកាសកាត់បន្ថយនៅខែតុលា ឆ្នាំ ២០២២។ OPEC+ បានចាប់ផ្ដើមការកាត់បន្ថយផលិតកម្មក្នុងឆ្នាំ ២០២០ នៅពេលតម្រូវការប្រេងសកលធ្លាក់ចុះដោយសារតែវិបត្តិកូវីដ១៩ ប៉ុន្តែក្រោយមកបង្កើនវិញ ជាពិសេសនៅពេលប្រេងឡើងថ្លៃ ក្នុងអំឡុងពេលរុស្ស៊ីឈ្លានពានអ៊ុយក្រែនថ្មីៗនៅដើមឆ្នាំ ២០២២។ យ៉ាងណាមិញ តម្លៃប្រេងបានធ្លាក់ចុះនៅចុងឆ្នាំដដែល នៅពេលមានការប្រួលបារម្ភពីសេដ្ឋកិច្ចសកល ហើយចាប់តាំងពីពេលនោះមក អង្គការ OPEC+ បានកាត់បន្ថយផលិតកម្មប្រេងប្រមាណ ៥,៨៥ លានបារ៉ែល/ថ្ងៃ ឬប្រហែល ៥,៧ ភាគរយ នៃការផ្គត់ផ្គង់របស់ពិភពលោក ដើម្បីជំរុញតម្លៃប្រេងលើទីផ្សារ៕

The post OPEC+ នឹងបន្តគម្រោងដំឡើងផលិតកម្មប្រេងជាថ្មី ចាប់ពីខែក្រោយ appeared first on Kampuchea Thmey Daily.

តម្លៃប្រេងអន្តរជាតិ បន្តកើនឡើង ជុំវិញកង្វល់ការផ្គត់ផ្គង់

Huon Dina — Fri, 21 Feb 2025 02:12:51 +0000

តម្លៃប្រេងឆៅអន្តរជាតិបានកើនឡើងនៅពេលបញ្ចប់ការជួញដូរនៅថ្ងៃព្រហស្បតិ៍ ដែលជាកំណើន៣ថ្ងៃជាប់ៗគ្នា ក្រោយទិន្នន័យរដ្ឋាភិបាលអាមេរិកបង្ហាញថាស្ដុកប្រេងសាំងរបស់ខ្លួនធ្លាក់ចុះ ហើយការព្រួយបារម្ភអំពីការរំខានផ្នែកផ្គត់ផ្គង់ប្រេងរបស់រុស្ស៊ីនៅតែបន្ត។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃប្រេងឆៅនាពេលអនាគត ម៉ាក Brent បានកើនឡើង ៤៤ សេន ឬ ០,៥៨ ភាគរយ ដោយបញ្ចប់ការជួញដូរនៅតម្លៃ ៧៦,៤៨ ដុល្លារ/បារ៉ែល។ ចំណែកឯតម្លៃប្រេងឆៅនាពេលអនាគតរបស់អាមេរិក West Texas Intermediate (WTI) វិញ បានកើនឡើង ៣២ សេន ឬ ០,៤៤ ភាគរយ ដោយបញ្ចប់ការជួញដូរនៅតម្លៃ ៧២,៥៧ ដុល្លារ/បារ៉ែល។

រដ្ឋបាលព័ត៌មានថាមពលអាមេរិក (EIA) បានចេញទិន្នន័យដែលបង្ហាញថា ស្តុកប្រេងឆៅរបស់ប្រទេសបានកើនឡើងច្រើនជាងការរំពឹងទុកតិចតួច ប៉ុន្តែស្ដុកប្រេងចម្រាញ់រួចវិញ បានធ្លាក់ចុះកាលពីសប្ដាហ៍មុន។ ការណ៍នេះ មានឥទ្ធិពលទៅលើកំណើនតម្លៃប្រេងអន្តរជាតិ។

ទន្ទឹមនឹងនេះ ការព្រួយបារម្ភផ្នែកផ្គត់ផ្គង់លើប្រេងរបស់រុស្ស៊ី ក៏នៅបន្តជាបញ្ហាផងដែរ ដោយវាជួយជំរុញតម្លៃថាមពល ទោះបីជា រុស្ស៊ី និងសហរដ្ឋអាមេរិកចរចាគ្នាលើការបញ្ចប់សង្រ្គាមនៅអ៊ុយក្រែនក៏ដោយ។ អ៊ុយក្រែនច្រានចោលការចរចាដែលគ្មានវត្តមានខ្លួនមួយនេះ ខណៈមន្រ្តីរបស់ប្រទេសបានលើកឡើងថា រុស្ស៊ីនៅតែបន្តវាយប្រហារលើហេដ្ឋារចនាសម្ព័ន្ធថាមពលរបស់ខ្លួន។ រុស្ស៊ីឯណោះវិញ បានឱ្យដឹងថា ការវាយប្រហារដោយដ្រូនរបស់អ៊ុយក្រែនលើបំពង់បង្ហូរប្រេងកាត់តាមប្រទេសកាហ្សាក់ស្ថាន បានកាត់បន្ថយលំហូរប្រេងចន្លោះពី ៣០-៤០ ភាគរយ កាលពីថ្ងៃអង្គារ៕

The post តម្លៃប្រេងអន្តរជាតិ បន្តកើនឡើង ជុំវិញកង្វល់ការផ្គត់ផ្គង់ appeared first on Kampuchea Thmey Daily.

តម្លៃប្រេងធ្លាក់ចុះពេលបើកការជួញដូរ ក្រោយពេល ត្រាំ ទទូចឱ្យ OPEC ទម្លាក់តម្លៃប្រេង

Huon Dina — Mon, 27 Jan 2025 02:50:01 +0000

តម្លៃប្រេងបានធ្លាក់ចុះជាង ១ ភាគរយ សម្រាប់ការជួញដូរនៅលើទីផ្សារអាស៊ីនាព្រឹកថ្ងៃចន្ទនេះ បន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ បានទទូចទាមទារឱ្យអង្គការនៃប្រទេសនាំចេញប្រេងកាត (OPEC) ទម្លាក់តម្លៃប្រេង បន្ទាប់ពីលោកប្រកាសផែនការបង្កើនផលិតកម្មប្រេងនៅអាមេរិក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃប្រេងឆៅនាពេលអនាគត ម៉ាក Brent បានធ្លាក់ចុះ ៨៧ សេន ឬ ១,១១ ភាគរយ ដោយជួញដូរនៅតម្លៃ ៧៧,៦៣ ដុល្លារ/បារ៉ែល ខណៈប្រេងឆៅអាមេរិក ម៉ាក West Texas Intermediate (WTI) ធ្លាក់ចុះ ៨៩ សេន ឬ ១,១៩ ភាគរយ ដោយជួញដូរនៅតម្លៃ ៧៣,៧៧ ដុល្លារ/បារ៉ែល។

កំណើននៃតម្លៃជួញដូរព្រឹកថ្ងៃចន្ទនេះ ជំរុញដោយការទាមទារជាថ្មីរបស់លោក ត្រាំ កាលពីថ្ងៃសុក្រ ឱ្យ OPEC ទម្លាក់តម្លៃប្រេង ដើម្បីបំបាក់វិស័យហិរញ្ញវត្ថុរុស្ស៊ី ហើយឆ្ពោះទៅរកការបញ្ចប់សង្រ្គាមនៅអ៊ុយក្រែន។

លោក ត្រាំ បាននិយាយថា៖ «វិធីមួយដើម្បីបញ្ឈប់វាឱ្យបានឆាប់រហ័ស គឺឱ្យ OPEC ឱ្យឈប់កើបលុយច្រើនពេក ហើយទម្លាក់តម្លៃប្រេង។ នោះសង្គ្រាមនឹងបញ្ឈប់ភ្លាមៗ»។ លោកក៏បានព្រមានផងដែរ ឱ្យរុស្ស៊ី និងប្រទេសចូលដៃជើងជាមួយរុស្ស៊ី រកដំណោះស្រាយបញ្ចប់សង្រ្គាមជាមួយអ៊ុយក្រែន បើមិនដូច្នោះទេ ពួកគេនឹងរងពន្ធគយ និងទណ្ឌកម្មថ្មីធ្ងន់ធ្ងរ។

មកទល់ពេលនេះ OPEC មិនទាន់ប្រតិកម្មយ៉ាងណាទៅនឹងសំណើររបស់ ត្រាំ នោះទេ។ ហើយបើទោះបីជាយ៉ាងណាក៏ដោយ អ្នកវិភាគមើលឃើញថា ការធ្លាក់ចុះនៃតម្លៃប្រេងនៅតែមានកំណត់ ចំពេលដែលទណ្ឌកម្មលើរុស្ស៊ីអាចរឹតត្បឹតការផ្គត់ផ្គង់។

នាពេលនេះ វិនិយោគិនក៏រំពឹងទុកពីការរំខានផ្នែកពាណិជ្ជកម្មបន្ថែមទៀត ក្រោយលោក ត្រាំ បានប្រកាសកាលពីថ្ងៃអាទិត្យថា លោកនឹងដាក់វិធានការសងសឹកទ្រង់ទ្រាយធំលើកូឡុំប៊ី រួមទាំងពន្ធគយ និងទណ្ឌកម្ម បន្ទាប់ពីប្រទេសនេះបានបដិសេធមិនឱ្យចុះចត នូវយន្តហោះយោធាអាមេរិក២គ្រឿងដែលដឹកជនអន្តោប្រវេសន៍សម្រាប់ការនិរទេស។

ទិន្នន័យពីក្រុមហ៊ុនវិភាគ Kpler បានបង្ហាញថា សហរដ្ឋអាមេរិកគឺជាអតិថិជនធំបំផុតនៃការនាំចេញប្រេងឆៅតាមសមុទ្ររបស់កូឡុំប៊ី ក្នុងបរិមាណ ១៨៣ ០០០ បារ៉ែល/ថ្ងៃ ក្នុងឆ្នាំ ២០២៤ ឬ ៤១ ភាគរយ នៃការនាំចេញប្រេងរបស់កូឡុំប៊ី៕

The post តម្លៃប្រេងធ្លាក់ចុះពេលបើកការជួញដូរ ក្រោយពេល ត្រាំ ទទូចឱ្យ OPEC ទម្លាក់តម្លៃប្រេង appeared first on Kampuchea Thmey Daily.

តម្លៃប្រេងកើនខ្ពស់បំផុតក្នុងរយៈពេល៣ខែ ជុំវិញទណ្ឌកម្មថ្មីរបស់អាមេរិកលើរុស្ស៊ី

Huon Dina — Sat, 11 Jan 2025 03:09:55 +0000

តម្លៃប្រេងឆៅអន្តរជាតិ បានកើនឡើងជាង ៣ ភាគរយ នៅពេលបញ្ចប់ការជួញដូរកាលពីថ្ងៃសុក្រ (១០ មករា) ដែលជាកំណើនខ្ពស់បំផុតក្នុងរយៈពេល ៣ ខែ ក្រោយសហរដ្ឋអាមេរិកប្រកាសកញ្ចប់ទណ្ឌកម្មថ្មីទ្រង់ទ្រាយធំប្រឆាំងនឹងការផ្គត់ផ្គង់ប្រេងរបស់រុស្ស៊ី។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃប្រេងឆៅនាពេលអនាគត ម៉ាក Brent បានកើនឡើង ២,៨៤ ដុល្លារ ឬ ៣,៧ ភាគរយ ដោយបញ្ចប់ការជួញដូរនៅតម្លៃ ៧៩,៧៦ ដុល្លារ/បារ៉ែល ពោលគឺខ្ពស់បំផុតរាប់តាំងពីថ្ងៃទី ៧ តុលា ២០២៤។ ចំណែកឯប្រេងឆៅអាមេរិក West Texas Intermediate បានកើនឡើង ២,៥៦ ដុល្លារ ឬ ៣,៦ ភាគរយ ដោយបញ្ចប់ការជួញដូរនៅតម្លៃ ៧៦,៥៧ ដុល្លារ/បារ៉ែល ដែលជាកម្រិតខ្ពស់បំផុតក្នុងរយៈពេល ៣ ខែដូចគ្នា។

ការកើនឡើងគួរឱ្យកត់សម្គាល់នេះ ត្រូវបានអ្នកវិភាគគូសភ្ជាប់ទៅនឹងវិធានការទណ្ឌកម្មរបស់សហរដ្ឋអាមេរិកលើវិស័យប្រេងរបស់រុស្ស៊ី ជុំវិញការឈ្លានពានអ៊ុយក្រែន ដែលកំពុងបន្ត។ រដ្ឋបាលជិតផុតអាណត្តិរបស់លោកប្រធានាធិបតី ចូ បៃដិន បានប្រកាសទណ្ឌកម្មថ្មីៗកាលពីថ្ងៃសុក្រ ដោយកំណត់គោលដៅលើក្រុមហ៊ុនផលិតប្រេង នាវាដឹកប្រេង អ្នកពាក់ព័ន្ធ ពាណិជ្ជករ និងកំពង់ផែនានារបស់រុស្ស៊ី ក្នុងគោលបំណងវាយប្រហារលើគ្រប់ដំណាក់កាលនៃខ្សែច្រវ៉ាក់ផលិតកម្ម និងចែកចាយប្រេងរបស់រុស្ស៊ី។

ប្រភពក្នុងពាណិជ្ជកម្មប្រេងរុស្ស៊ី និងការចម្រាញ់ប្រេងរបស់ឥណ្ឌា បានប្រាប់រ៉យទ័រថា កញ្ចប់ទណ្ឌកម្មថ្មីនឹងរំខានយ៉ាងខ្លាំងដល់ការនាំចេញប្រេងរបស់រុស្ស៊ីទៅកាន់ឥណ្ឌា និងចិន ដែលបានទិញប្រេងរុស្ស៊ីយ៉ាងច្រើនសណ្ធឹកក្រោយការឈ្លានពានអ៊ុយក្រែនទ្រង់ទ្រាយធំរបស់រុស្ស៊ី បានចាប់ផ្ដើមឡើង។ ការណ៍នេះ អាចនឹងធ្វើឱ្យចិន និងឥណ្ឌា ត្រូវស្វែងរកប្រភពផ្គត់ផ្គង់ជំនួស៕

The post តម្លៃប្រេងកើនខ្ពស់បំផុតក្នុងរយៈពេល៣ខែ ជុំវិញទណ្ឌកម្មថ្មីរបស់អាមេរិកលើរុស្ស៊ី appeared first on Kampuchea Thmey Daily.

តម្លៃប្រេងកើនជាង ១ ភាគរយ ពេលបញ្ចប់ការជួញដូរថ្ងៃអង្គារ ក្នុងរដូវបុណ្យសកល

Huon Dina — Wed, 25 Dec 2024 02:37:32 +0000

តម្លៃប្រេងបានកើនឡើងច្រើនជាង ១ ភាគរយ ពេលបញ្ចប់ការជួញដូរនៅថ្ងៃអង្គារ ជុំវិញការរំពឹងទុកពីការរឹតត្បឹតការផ្គត់ផ្គង់ ចំពេលដែលសកម្មភាពពាណិជ្ជកម្មបានធ្លាក់ចុះនៅមុនថ្ងៃបុណ្យណូអែល និងហាណូខាហ៍ (២៥ ធ្នូ-២ មករា)។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃប្រេងឆៅនាពេលអនាគត ម៉ាក Brent បានបញ្ចប់ការជួញដូរនៅតម្លៃ ៧៣,៥៨ ដុល្លារ/បារ៉ែល ដោយកើនឡើង ៩៥ សេន ឬ ១,៣ ភាគរយ ខណៈតម្លៃប្រេងឆៅអាមេរិក ម៉ាក West Texas Intermediate (WTI) បានបញ្ចប់ការជួញដូរនៅតម្លៃ ៧០,១០ ដុល្លារ/បារ៉ែល ដោយកើនឡើង ៨៦ សេន ឬ ១,២ ភាគរយ។

ទោះបីជាយ៉ាងណាក៏ដោយ ក្រុមអ្នកវិភាគពីក្រុមហ៊ុនប្រឹក្សាថាមពល FGE បានលើកឡើងថា តម្លៃប្រេងនឹងឡើងចុះនៅត្រឹមកម្រិតនេះ ដោយសារតែរដូវបុណ្យឈប់សម្រាកអន្តរជាតិចុង និងឆ្លងឆ្នាំ ដែលធ្វើឱ្យសកម្មភាពពាណិជ្ជកម្មធ្លាក់ចុះ ខណៈវិនិយោគិនរងចាំមើលរហូតដល់ពួកគេទទួលបានទិដ្ឋភាពកាន់តែច្បាស់អំពីសមតុល្យប្រេងពិភពលោកឆ្នាំ ២០២៤ និង ២០២៥។

ក្រុមអ្នកវិភាគដដែល បានកត់សម្គាល់ថា ការផ្លាស់ប្តូរនៃការផ្គត់ផ្គង់ និងតម្រូវការប្រចាំខែធ្នូ បានគាំទ្រដល់ទស្សនវិស័យ «មិនសូវទុទិដ្ឋិនិយម»។ ពួកគេបានបន្ថែមថា ស្ថានភាពទីផ្សារក្នុងរដូវបុណ្យទានដូច្នេះ មានន័យថា ការរំខានការផ្គត់ផ្គង់ណាមួយ អាចបណ្តាលឱ្យមានការកើនឡើងតម្លៃយ៉ាងខ្លាំង។

ការឡើងថ្លៃនៃតម្លៃប្រេង អាចជាផ្នែកមួយផងដែរនៃការធ្លាក់ចុះប្រេងឆៅក្នុងស្រុកអាមេរិកកាលពីសប្ដាហ៍មុន។ មួយផ្នែកទៀតគឺដោយសារតែការរំពឹងទុកពីគោលនយោបាយជំរុញសេដ្ឋកិច្ចរបស់ចិន ដែលជាប្រទេសនាំចូលប្រេងដ៏ច្រើនបំផុតមួយរបស់ពិភពលោក៕

The post តម្លៃប្រេងកើនជាង ១ ភាគរយ ពេលបញ្ចប់ការជួញដូរថ្ងៃអង្គារ ក្នុងរដូវបុណ្យសកល appeared first on Kampuchea Thmey Daily.

តម្លៃប្រេង​អន្តរជាតិ Archives - Kampuchea Thmey Daily

​កម្ពុជា​ចំណាយ​​ជាង ​១៨៨ ​លានដុល្លារ ​នាំចូល​ប្រេង​ឥន្ធនៈ​

តម្លៃប្រេងកើនឡើងតិចតួច​ ពេលបញ្ចប់ការជួញដូរថ្ងៃពុធ

OPEC+ ​នឹង​បន្តគម្រោងដំឡើងផលិតកម្មប្រេង​ជាថ្មី ចាប់ពីខែក្រោយ

តម្លៃ​ប្រេង​អន្តរជាតិ​ បន្តកើនឡើង ជុំវិញកង្វល់ការផ្គត់ផ្គង់

តម្លៃប្រេងធ្លាក់ចុះ​ពេល​បើក​ការជួញដូរ​ ក្រោយពេល ត្រាំ ទទូចឱ្យ OPEC ទម្លាក់តម្លៃប្រេង

តម្លៃប្រេងកើនខ្ពស់បំផុត​ក្នុងរយៈពេល​​៣ខែ ជុំវិញទណ្ឌកម្មថ្មីរបស់​អាមេរិក​លើ​រុស្ស៊ី​

តម្លៃប្រេងកើន​ជាង ១ ភាគរយ ពេលបញ្ចប់ការ​ជួញដូរថ្ងៃអង្គារ​ ក្នុង​​រដូវបុណ្យសកល