តម្លៃសំបុត្រ Archives - Kampuchea Thmey Daily

SSCA៖ តម្លៃសំបុត្រយន្តហោះនឹងកើនឡើង បើតម្លៃប្រេងនៅបន្តអូសបន្លាយ

Din Thary — Fri, 13 Mar 2026 09:51:37 +0000

ជុំការកើនឡើងនៃតម្លៃប្រេងនាពេលបច្ចុប្បន្ន លោក ស៊ិន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលកម្ពុជា (SSCA) បានពន្យល់ថា តម្លៃសំបុត្រយន្តហោះអាចនឹងមានការប្រែប្រួលខុសពីតម្លៃដើម ប្រសិនបើថ្លៃប្រេងនៅបន្តអូសបន្លាយពេលយូជាងនេះ។

ក្នុងបទសម្ភាសជាមួយ«កម្ពុជាថ្មី» ដោយឆ្លើយតបទៅនឹងសំណួរថាតើ ប្រសិនបើសង្គ្រាមមជ្ឈិមបូព៌ាបន្តអូសបន្លាយ តម្លៃប្រេងក៏កំពុងកើនឡើង តើតម្លៃសំបុត្រយន្តហោះនឹងប្រែប្រួល ឬយ៉ាងណា? លោក ស៊ិន ចាន់សិរីវុត្ថា បានថ្លែងថា ជាកត្តាសត្យានុម័តជាទូទៅនៅពេលដែលមានផលវិបត្តិអ្វីមួយទាក់ទងនឹងប្រេង គឺមិនមែណប៉ះពាល់ត្រឹមតែវិស័យដឹកជញ្ជូនតាមផ្លូវអាកាសទេ តែវាប៉ះពាល់ដល់វិស័យទាំងអស់។

លោកបានពន្យល់ថា «ជាទូទៅក្រុមហ៊ុនអាកាសចរណ៍ធំៗ ដែលមានយុទ្ធសាស្រ្តល្អ តែងតែទិញប្រេងស្តុកទុក យ៉ាងហោចណាស់ពី ២ សប្តាហ៍ ទៅ ១ខែ ស្តុកទុកនៅក្នុងតម្លៃមួយ ព្រោះគាត់ធ្វើការគណនាតម្លៃសំបុត្រយន្តហោះអាស្រ័យទៅតាមតម្លៃប្រេង ចឹងនៅពេលគាត់ដឹងតម្លៃប្រេងមុន និងទិញស្តុកទុកមុន តម្លៃសំបុត្រយន្តហោះថោក ឬថ្លៃ ទៅតាមតម្លៃប្រេងនេះអែង»។

«ប៉ុន្តែប្រសិនបើតម្លៃប្រេងកើនឡើងនៅបន្តអូសបន្លាយពេលយូ បញ្ហាកាន់តែវែង ដូច្នេះច្បាស់ណាថា នឹងប៉ះពាល់ដល់នូវប្រេងស្តុកចាស់ដែលគាត់បានទិញស្តុកទុក ចឹងហើយគាត់ត្រូវការទិញប្រេងស្តុកថ្មី ដូច្នេះប្រេងស្តុកថ្មី តម្លៃសំបុត្រយន្តហោះថ្មី»។ លោក ស៊ិន ចាន់ បន្ថែមបែបនេះ។

ជាមួយគ្នានេះ លោកបានអះអាងថា សង្គ្រាមមជ្ឈិមបូព៌ានេះមិនមែនត្រឹមតែប៉ះពាល់ដល់វិស័យដឹកជញ្ជូនតាមផ្លូវអាកាសទេ គឺប៉ះពាល់ដល់វិស័យដឹកជញ្ជូនទូទៅ ព្រោះយើងបានដឹងហើយថាច្រកសមុទ្រ Hormoz គឺមិនអាចដឹកជញ្ជូនប្រេងបានទេ ដោយកប៉ាល់ទាំងអស់ត្រូវបានកកស្ទះនៅទីនេះទាំងអស់ ដូច្នេះវាធ្វើឱ្យមានហានិភ័យខ្ពស់ ដោយយើងកំពុងបារម្ភពីការផ្គត់ផ្គង់ប្រេង ដែលធ្វើឱ្យតម្លៃប្រេងឡើងថ្លៃ។

អ្នកនាំពាក្យរូបនេះ បានបន្ថែមទៀតថា កាលណាតម្លៃប្រេងឡើងថ្លៃវានឹងធ្វើឱ្យប៉ះពាល់ទៅដល់ជីវភាពប្រជាជនប្រចាំថ្ងៃដែរ ព្រោះយើងការប្រើប្រាស់សព្វថ្ងៃយើងដឹងហើយថាការនាំចូលប្រេងសាំង គឺច្រើនបំផុតពីការនាំចូលសុទ្ធសាត ហើយតម្លៃ គឺជាតម្លៃអន្តរជាតិ ដូច្នេះនៅពេលតម្លៃអន្តរជាតិ អ្វីៗក៏ត្រូវកើនឡើងដូចគ្នាដែរ៕

The post SSCA៖ តម្លៃសំបុត្រយន្តហោះនឹងកើនឡើង បើតម្លៃប្រេងនៅបន្តអូសបន្លាយ appeared first on Kampuchea Thmey Daily.

តម្លៃសំបុត្ររថភ្លើងល្បឿនលឿនរបស់ ឥណ្ឌូណេស៊ី ក្នុងម្នាក់

ratanak neang — Tue, 03 Oct 2023 08:10:44 +0000

ឥណ្តូណេស៊ីបានដាក់ឲ្យដំណើរការរថភ្លើងល្បឿនលឿនជាផ្លូវការហើយកាលពីថ្ងៃទី២ ខែតុលា ក្រោមតម្លៃសាងសង់ប្រមាណជាង ៧ ពាន់លានដុល្លារ ក្នុងកិច្ចសហការសាងសង់ជាមួយក្រុមហ៊ុនចិន ហើយក៏ជាគម្រោងផ្លូវមួយខ្សែក្រវាត់មួយរបស់ចិនផងដែរ ។

ចំណែកសម្រាប់តម្លៃសំបុត្ររបស់រថភ្លើងល្បឿនលឿននេះវិញ មានតម្លៃប្រមាណ ១៥.៧០ ដុល្លារក្នុងម្នាក់សម្រាប់ការធ្វើដំណើរមួយដង និងអង្គុយលើកៅអីលំដាប់លេខ ២ ខណៈចំពោះលំដាប់ VIP មានតម្លៃជាង ២២ ដុល្លារ ។

បន្ថែមពីនេះ អ្នកដំណើរដែលចង់ធ្វើដំណើរទៅកាន់កណ្តាលទីក្រុង Bandung ត្រូវជិះរថភ្លើងពីស្ថានីយ៍ Padalarang ដែលនឹងចាយពេល ២០ នាទីទៀត ក៏ដូចជាចំណាយថវិកាបន្ថែមប្រហែល ៣.២០ ដុល្លារទៀត ។

គួរបញ្ជាក់ថា រថភ្លើងដែលមានឈ្មោះ “Whoosh” មួយនេះ ជារថភ្លើងល្បឿនលឿនដំបូងគេបង្អស់នៅអាស៊ីអាគ្នេយ៍ ដោយមានសមត្ថភាពដឹកមនុស្សបានជាង ៦០០ នាក់ ហើយចាយពេលធ្វើដំណើរពីទីក្រុងហ្សាការតា ទៅទីក្រុង Bandung របស់ខេត្ត West Java ក្នុងរយៈពេលតែ ៤៥ នាទីប៉ុណ្ណោះ ក្នុងល្បឿន ៣៥០ គីឡូម៉ែត្រក្នុងមួយម៉ោង ៕

ប្រែសម្រួល៖ នាង រតនៈ

ប្រភព៖ Oxford Mail

ចុចអាន៖ ឥណ្ឌូណេស៊ី បើកដំណើរការរថភ្លើងល្បឿនលឿនដំបូងគេបំផុតនៅ អាស៊ីអាគ្នេយ៍

The post តម្លៃសំបុត្ររថភ្លើងល្បឿនលឿនរបស់ ឥណ្ឌូណេស៊ី ក្នុងម្នាក់ appeared first on Kampuchea Thmey Daily.

គ្រឹះស្ថានអង្គរ ទទួលបានចំណូលពីការលក់សំបុត្រជាង ៣លានដុល្លារ ក្នុងខែ កុម្ភៈ

Sophal Tuon — Thu, 02 Mar 2023 05:15:03 +0000

គ្រឹះស្ថានអង្គរ បានលក់សំបុត្រដល់ភ្ញៀវទេសចរអន្តរជាតិ ចូលទស្សនាអង្គរ និងប្រាសាទកោះកេរ បានប្រមាណជាង ៣លានដុល្លារ ក្នុងខែកុម្ភៈ ឆ្នាំ ២០២៣។ ក្នុងនោះ មានអ្នកទេសចរប្រមាណជាង ៧ម៉ឺននាក់ ពោលគឺកើនឡើង ៩០០ភាគរយ បើធៀបនឹងឆ្នាំ ២០២២។

កំណើនភ្ញៀវទេសចរអន្តរជាតិ បានចាប់ផ្តើមងើបឡើងវិញ ក្រោយពីរាជរដ្ឋាភិបាលទប់ស្កាត់ការឆ្លងរីករាលដាលជំងឺកូវីដ-១៩ ទទួលបានជោគជ័យ និងផ្តល់ភាពអនុគ្រោះជាច្រើនដល់ភ្ញៀវបរទេស។

លោក ជា អូន អ្នកនាំពាក្យអាកាសចរស៊ីវិល បានប្រាប់កម្ពុជាថ្មីថា ក្រុមហ៊ុនអាកាសចរបានភ្ជាប់ជើងហោះហើរឡើងវិញអស់ហើយ មានដូចជា សាំងហ្គាពួ ថៃ ជាដើម ដោយចំនួនហោះហើរកើនឡើងខ្ពស់ជាង ២០១៩។ ដោយឡែក ទេសចរពីប្រទេសចិនមានការកើនឡើងសន្សឹមៗ នៅឡើយ។

លោកលើកឡើងដូច្នេះថា «ប្រទេសទាំងអស់ ភ្ជាប់ជើងហោះហើរជាមួយកម្ពុជាឡើងវិញទាំងអស់ហើយ។ ប៉ុន្តែចំនួនជើងហោះហើរពីប្រទេសចិននៅមានកម្រិត មិនទាន់ដូចកាលពីឆ្នាំ ២០១៩នៅឡើយ។ ពោលគឺពីមុន ៣០ជើង ឥឡូវមានប្រហែល ១០ជើងនៅឡើយ»។

បើតាមអ្នកនាំពាក្យរូបនេះ កាលពីខែ មករា ឆ្នាំ ២០២៣ អ្នកដំណើរមានចំនួន ៤០ ម៉ឺននាក់ ចេញចូល អាកាសយានដ្ឋានអន្តរជាតិភ្នំពេញ ស្មើនឹង៤០% ធៀបនឹងខែ មករាឆ្នាំ ២០១៩ ដែលមានមានអ្នកដំណើររហូតដល់ ១ លាននាក់៕

The post គ្រឹះស្ថានអង្គរ ទទួលបានចំណូលពីការលក់សំបុត្រជាង ៣លានដុល្លារ ក្នុងខែ កុម្ភៈ appeared first on Kampuchea Thmey Daily.

មកដឹងតម្លៃសំបុត្រ ចូលទស្សនាការប្រកួត World Cup វគ្គផ្តាច់ព្រ័ត្រយប់នេះ

Sok Sovann — Sun, 18 Dec 2022 04:15:00 +0000

អ្វីដែលអ្នកគាំទ្របាល់ទាត់ទូទាំងពិភពលោកទន្ទឹងរង់ចាំបានមកដល់ហើយ។ នោះគឺការប្រកួតវគ្គផ្តាច់ព្រ័ត្រពានរង្វាន់ World Cup 2022។

ក្រុមមាន់គកបារាំង និងត្រូវការពារតំណែងជើងឯកជាមួយក្រុម តុងហ្គោអាហ្សង់ទីន នៅកីឡដ្ឋា Lusail Iconic Stadium នាម៉ោង ១០យប់ ថ្ងៃអាទិត្យទី១៨ខែធ្នូ។

ទាំងអ្នកគាំទ្របារាំង និងអាហ្សង់ទីន បានកក់សំបុត្រចូលមើលវគ្គផ្តាច់ព្រ័ត្ររួចរាល់អស់ទៅហើយ ខណៈមនុស្សរាប់លាននាក់ នឹងទស្សនាតាមទូរទស្សន៍ ទូរស័ព្ទ និងអេក្រង់ផ្សេងៗ។

ចុះតើអ្នកដឹងទេថា សំបុត្រចូលទស្សនាផ្ទាល់ក្នុងកីឡដ្ឋាននៅវគ្គផ្តាច់ព្រ័ត្រនេះ មានតម្លៃប៉ុន្មាន?

យោងតាមគេហទំព័រ The National News បានចុះផ្សាយថា សំបុត្រចូលទស្សនាវគ្គផ្តាច់ព្រ័ត្ររវាងបារាំងនិងអាហ្សង់ទីនគឺមានតម្លៃ ១៦០៦ដុល្លារសម្រាប់ Cat 1; ១០០២ដុល្លារសម្រាប់ Cat 2; ៦០៥ដុល្លារសម្រាប់ Cat 3 និង ២០៥ដុល្លារសម្រាប់ Cat 4៕

ប្រែសម្រួល៖ Vann Vann

ប្រភព៖ The National News

ចុចអាន៖ មិនថោកទេ តម្លៃសំបុត្រចូលទស្សនា World Cup នៅ កាតា

The post មកដឹងតម្លៃសំបុត្រ ចូលទស្សនាការប្រកួត World Cup វគ្គផ្តាច់ព្រ័ត្រយប់នេះ appeared first on Kampuchea Thmey Daily.

មកដឹងតម្លៃសំបុត្រជិះរថភ្លើងរត់លើផ្លូវដែក ចិន-ឡាវ

Sok Chivon — Fri, 17 Dec 2021 03:49:31 +0000

ផ្លូវដែកចិន-ឡាវ ដែលជាគម្រោងដ៏សំខាន់មួយតភ្ជាប់ទីក្រុង Kunming ក្នុងខេត្ត Yunnan ភាគនិរតីនៃប្រទេសចិន ជាមួយនឹងរដ្ឋធានីវៀងច័ន្ទរបស់ឡាវ បានចាប់ផ្តើមដំណើរការកាលពីថ្ងៃសុក្រ ទី២ ខែធ្នូកន្លងទៅ នេះ ។

ទន្ទឹមនោះក្រសួងសាធារណការ និងដឹកជញ្ជូនឡាវបានឲ្យដឹងថា បច្ចុប្បន្នសេវាកម្មផ្លូវដែកចិន-ឡាវបានដាក់ដំណើរការរថភ្លើងអគ្គិសនី (EMU) ចំនួន ២ គ្រឿង និងមានស្ថានីយ៍ធំៗចំនួន ៤ ជាមួយនឹងគោលដៅ ឈប់ចំនួន ៥ ។

ក្រសួងបញ្ជាក់ថា សម្រាប់តម្លៃសំបុត្រធ្វើដំណើរនៅ លើផ្លូវដែកឡាវ-ចិន មានចាប់ពី ៣.៤៣ ដុល្លារទៅ ៤៧.៨៣ ដុល្លារ អាស្រ័យលើចម្ងាយ ។

ចំណែកតម្លៃសំបុត្រធ្វើដំណើរទូទាំងប្រទេសឡាវ ចាប់ពីស្ថានីយរាជធានីវៀងចន្ទន៍ ដល់ស្ថានីយ Boten ទីក្រុង Luang Namtha ព្រំដែនឡាវ-ចិន ចម្ងាយ ៤០០ គីឡូម៉ែត្រ គឺតម្លៃ ១២.៦៨ ដុល្លារ ៕

ប្រែសម្រួលដោយ ៖ ជីវ័ន្ត

ប្រភព ៖ Laotian Times

ចុចអាន ៖ ៥ ថ្ងៃដំបូង រថភ្លើង ឡាវ-ចិន ទទួលបានអ្នកដំណើរជាង ៥ ពាន់នាក់