តារាខ្មែរ Archives - Kampuchea Thmey Daily

ស្រី អ៊ីត ផ្ទុះប្រតិកម្ម ក្រោយបុរសម្នាក់ប្រមាថកូនស្រី

អ៊ិន ពិសី — Fri, 18 Apr 2025 02:52:30 +0000

តារាកំប្លែង អ្នកនាង ស្រី អ៊ីត បានសម្ដែងការហួសចិត្តជាខ្លាំង និងប្រតិកម្មឆ្លើយតបមិនសំចៃមាត់ បន្ទាប់ពីមានបុរសម្នាក់ ឆាតតាមហ្វេសប៊ុកទៅកូនស្រីរបស់នាង គឺ កញ្ញា ណាន ណាន ដោយប្រើពាក្យសម្ដីប្រមាថប៉ះពាល់កិត្តិយស។

ម្ចាស់គណនីហ្វេសប៊ុករូបនោះ បានឆាតទៅកូនស្រីនាង កញ្ញា ណាន ណាន ដូច្នេះថា «បបូរមាត់អូនស្អាតគួរឲ្យចង់បឺតមាត់អូនឯង»។ ឆ្លើយតបនឹងពាក្យសម្ដីមិនសមរម្យពីសំណាក់បុគ្គលរូបនោះ តារាកំប្លែង ស្រី អ៊ីត ក្នុងនាមជាម្តាយ បានចាត់ទុកថានេះទង្វើដ៏អសីលធម៌បំផុត និងថោកទាបណាស់ដែលបុគ្គលខាងលើប្រមាថកិត្តិយសកូនស្រីខ្លួន។

ទោះបីយ៉ាងណាគេនៅមិនទាន់ដឹងទេថា តារាកំប្លែងអ្នកនាង ស្រី អ៊ីត នឹងមានចំណាត់ការផ្លូវច្បាប់លើបុគ្គលរូបនោះយ៉ាងណា ដើម្បីការពារកិត្តិយសកូនស្រី ខណៈ កញ្ញា ណាន ណាន បានលើកឡើងថា សម្ដីបុរសខាងលើពិតជាថោកទាបបំផុត។

គេកត់សម្គាល់ថា កូនស្រីរបស់តារាកំប្លែង ស្រី អ៊ីត គឺ កញ្ញា ណាន ណាន បច្ចុប្បន្ននាងបានដើរតាមគន្លងរបស់ម្តាយដោយស្រវាចាប់អាជីពសិល្បៈ ខណៈពេលនេះនាងក៏ក្រមុំពេញរូបរាងស្រស់ស្អាតគួរឲ្យស្រលាញ់ផងដែរ៕

អត្ថបទ ៖ ចាន់រ៉ា

The post ស្រី អ៊ីត ផ្ទុះប្រតិកម្ម ក្រោយបុរសម្នាក់ប្រមាថកូនស្រី appeared first on Kampuchea Thmey Daily.

ភរិយាកវី ស្វាយ សំអឿ ដង្ហោយរកជំនួយព្យាបាលជំងឺ និងអាហារ សម្រាប់ជីវិតចុងក្រោយ

អ៊ិន ពិសី — Mon, 10 Mar 2025 07:25:36 +0000

ភរិយារបស់វីរកវីនិពន្ធបទចម្រៀងដ៏ល្បីកាលពីជំនាន់ដើមលោក ស្វាយ សំអឿន គឺ អ្នកស្រី ដុំ សុផានី បានដាច់ចិត្តដង្ហោយរកជំនួយពីសប្បុរសជន ដើម្បីព្យាបាលជំងឺ និងអាហារ ក្នុងដង្ហើមជីវិតចុងក្រោយដែលសព្វថ្ងៃកំពុងជួបជីវភាពខ្វះខាតខ្លាំង។

បើយោងតាមសំណេរដែលបានសរសេរបង្ហោះតាមបណ្ដាញសង្គមពីតារាចម្រៀងលោក សុះ ម៉ាច បានឲ្យដឹងថា ភរិយាវីរកវីនិពន្ធលោក ស្វាយ សំអឿ គឺ លោកយាយ ដុំ សុផានី ដែលកម្សត់ទុរគត គ្មានកូនចៅ ផ្ញើខ្លួននឹងក្មួយ ឥឡូវកំពុងតែដង្ហោយសុំជំនួយ ដើម្បីបន្តព្យាបាលជំងឺ និងបន្តជីវិតរស់នៅរហូតជីវិតចុងក្រោយ។

លោក សុះ ម៉ាច បានរៀបរាប់ថា ភរិយាវីរកវី ស្វាយ សំអឿ គឺ លោកយាយ ដុំ សុផានី ដង្ហោយរកជំនួយឧបត្ថម្ភ ដើម្បីព្យាបាលជំងឺ និងអាហារ ខណៈដែលជីវភាពគ្រួសារខ្សត់ខ្សោយខ្លាំង។ លោក ស្វាយ សំអឿ បានបន្សល់ទុកស្នាដៃនិពន្ធទាំងទំនុកច្រៀង ពិសេសគឺបទភ្លេងជាច្រើនរហូតសព្វថ្ងៃ ប៉ុន្តែភរិយារបស់លោកមិនមានវាសនាបានទទួលមរតកពីប្តីរបស់លោកយាយឡើយ។

តារាចម្រៀងលោក សុះ ម៉ាច បន្តទៀតថា កាលលោកនៅជាប្រធានសមាគម លោកបានយកអំណោយទៅជូនលោកយាយ ២ ដងផងដែរ នៅឯកងមាសខេត្តកំពង់ចាម។ លោកសង្ឃឹមថា នឹងមានសប្បុរសជនជួយលោកយាយផងទៅចុះ ជាពិសេសសមាគមសិល្បករខ្មែរ។ សប្បុរសជនអាចទំនាក់ទំនងតាមរយៈលេខទូរស័ព្ទលោកយាយ ០៨៩ ៣០២ ៣៧៦។

គួរបញ្ជាក់ថា ស្នាដៃរបស់កវីនិពន្ធ ស្វាយ សំអឿ ដែលជាស្វាមីរបស់អ្នកស្រី ដុំ សុផានី គឺមានច្រើនអនេករាប់មិនអស់ តាំងពីទសវត្ស ៦០ ភាគច្រើនបទចម្រៀងក្នុងខ្សែភាពយន្តបទមនោសញ្ចេតនា បទប្រជាប្រិយខ្មែរមានដូចជា សំណព្វចិត្ត , កងកម្មកងកែវ , ស្ទឹងកែវ , កណ្តាលដួងចិត្ត , ស្ម័គ្របងដែរឬអូនស្រី ជាដើម…៕

អត្ថបទ ៖ ចាន់រ៉ា

The post ភរិយាកវី ស្វាយ សំអឿ ដង្ហោយរកជំនួយព្យាបាលជំងឺ និងអាហារ សម្រាប់ជីវិតចុងក្រោយ appeared first on Kampuchea Thmey Daily.

ចិត្ត កញ្ចនា បង្ហើរសំនៀង ច្រៀងបទដែលពិបាកច្រៀង បានយ៉ាងពិរោះ ធ្វើឲ្យមហាជនស្ដាប់សរសើរមិនដាច់ពីមាត់

Linda — Wed, 05 Mar 2025 03:16:15 +0000

ជាការពិតណាស់ តារាចម្រៀងស្រី ចិត្ត កញ្ចនា ត្រូវបានគេស្គាល់ថា មានសម្លេងពិរោះ ជាមួយនឹងបទចម្រៀងនីមួយៗបែបមនោសញ្ចេតនា ធ្វើឲ្យអ្នកស្ដាប់ចូលចិត្ត។ រូបនាងទទួលបានការស្រឡាញ់គាំទ្រពីសំណាក់មិត្តៗយុវវ័យតាមរយៈបទឈឺ ដែលចេញតាំងពី៨ឆ្នាំមុន បច្ចុប្បន្ន ចិត្ត កញ្ចនា នូវតែមានការពេញនិយម។

ថ្មីៗនេះ កញ្ចនា បានធ្វើឲ្យអ្នកគាំទ្រងាកមកចាប់អារម្មណ៍ជាខ្លាំង ទៅលើសម្លេងដ៏ស្រទន់ តាមរយៈវីដេអូ ការច្រៀងផ្ទាល់ ជាមួយនឹងបទចម្រៀងបរទេស ចំណងជើង Before Spring Ends។ បទនេះ ត្រូវបានគេពេញនិយមប្រើប្រាស់នៅក្នុងបណ្ដាញសង្គម TikTok និង ត្រូវបានគេស្គាល់ថា ជាបទចម្រៀងពិបាកច្រៀង។

យ៉ាងណាមិញ កញ្ចនា បានច្រៀងចម្រៀងមួយនេះ ជាមួយនឹងសម្លេងដ៏ពិរោះរណ្ដំ ធ្វើឲ្យអ្នកស្ដាប់អន្លង់អន្លោចទៅតាមសំនៀង មិនចាញ់ម្ចាស់សំនៀងដើម។ វីដេអូច្រៀងផ្ទាល់ជាមួយបទ Before Spring Ends របស់ តារាចម្រៀងស្រីរូបនេះ ទទួលបានអ្នកទស្សនាយ៉ាងច្រើន និងអ្នកចែករំលែកពេញបណ្ដាញសង្គម៕

@kanhchna.chet_official
♬ original sound – Kanhchna Chet – Kanhchna Chet

The post ចិត្ត កញ្ចនា បង្ហើរសំនៀង ច្រៀងបទដែលពិបាកច្រៀង បានយ៉ាងពិរោះ ធ្វើឲ្យមហាជនស្ដាប់សរសើរមិនដាច់ពីមាត់ appeared first on Kampuchea Thmey Daily.

លោកជំទាវអ្នកឧកញ៉ា ម៉ៅ ចំណាន ៖ ជុំវិញទស្សនកិច្ចផ្លូវក្រវាត់ព្រំដែនកម្ពុជា-វៀតណាម នៅខេត្តមណ្ឌលគិរី ធ្វើឡើងក្នុងគោលបំណងសំខាន់ៗ ៣

អ៊ិន ពិសី — Thu, 20 Feb 2025 04:57:59 +0000

លោកជំទាវអ្នកឧកញ៉ា ម៉ៅ ចំណាន គិតម៉េង គូសបញ្ជាក់ថា ជុំវិញការដឹកនាំសិល្បករ-សិល្បការិនី មកទស្សនកិច្ចផ្លូវក្រវាត់ព្រំដែនកម្ពុជា-វៀតណាម នៅខេត្តមណ្ឌលគិរី នេះ ធ្វើឡើងក្នុងគោលបំណងសំខាន់ៗ ចំនួន ៣។

ការគូសបញ្ជាក់នេះ ក្នុងឱកាស លោកជំទាវអ្នកឧកញ៉ា ម៉ៅ ចំណាន គិតម៉េង ប្រធានសមាគមសិល្បករខ្មែរ ដោយមានការអញ្ជើញចូលរួមពីសំណាក់ លោក ទិត ថាវរិទ្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលសមាគម និង លោកស្រី ឡុង ភិរម្យ រដ្ឋលេខាធិការក្រសួងទេសចរណ៍ ជាក្រុមប្រឹក្សាភិបាល បានដឹកនាំក្រុមការងារ និងសមាជិក-សមាជិកាសមាគមសិល្បករខ្មែរ មកទស្សនកិច្ចផ្លូវក្រវាត់ព្រំដែន ដែលបច្ចុប្បន្នកងកម្លាំងវិស្វកម្មកំពុងតែសស្រាក់សស្រាំក្នុងការកសាងតបតាមគោលការណ៍ណែនាំដ៏ខ្ពង់ខ្ពស់របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា កាលពីថ្មីៗ នេះ។

លោកជំទាវអ្នកឧកញ៉ា ម៉ៅ ចំណាន គិតម៉េង គូសបញ្ជាក់ថា ទស្សនកិច្ចខាងលើនេះ ធ្វើឡើងក្នុងគោលបំណង ៣ យ៉ាងសំខាន់ គឺ ៖ ទី១.ដឹកនាំសិល្បករ-សិល្បការិនី ដែលតែងទទូចចង់មកទស្សនាផ្ទាល់ពីដែនអធិបតេយ្យ បូរណភាពដែនដីរបស់ខ្លួន នៅតាមបណ្ដោយផ្លូវក្រវាត់ព្រំដែន ពិសេសក្នុងខេត្តមណ្ឌលគិរីនេះតែម្ដង។ ទី២.មកស្វែងយល់ និងផ្សព្វផ្សាយបន្តពីកិច្ចខិតខំប្រឹងប្រែង ការលះបង់ពុះពារក្នុងកិច្ចការពារបូរណភាពទឹកដីរបស់រាជរដ្ឋាភិបាលកម្ពុជាដែលគ្រប់នីតិកាលកន្លងមក បានយកចិត្តទុកដាក់ខ្ពស់ចំពោះបញ្ហាព្រំដែន ហើយបានកែប្រែតំបន់ព្រំដែនដែលធ្លាប់តែប្រឈមមុខដាក់គ្នា ទៅជាព្រំដែនសន្តិភាព និងអភិវឌ្ឍន៍។ ហើយរាជរដ្ឋាភិបាលនីតិកាលទី ៧ នេះ បានប្ដេជ្ញាចិត្តលើកិច្ចការពារព្រំដែន និងបូរណភាពទឹកដីផងដែរ។ អ្នកចូលរួមទាំងអស់ ក៏បានស្វែងយល់ពីការលំបាករបស់កងកម្លាំងដែលពុះពារគ្រប់ឧបសគ្គ ប្រឈមនឹងគ្រាប់មីន និងយុទ្ធភណ្ឌមិនទាន់ផ្ទុះ អាកាសធាតុ និងបញ្ហាប្រឈមជាច្រើនទៀត ដូចជាទីតាំងភូមិសាស្ត្រលំបាក។ ទី៣.ដើម្បីរួមចំណែក តបតាមការអំពាវនាវរបស់ប្រមុខរាជរដ្ឋាភិបាលនាពេលកន្លងមក សមាគមសិល្បករខ្មែរ បានកៀរគរសិល្បករ-សិល្បការិនីចូលរួមបរិច្ចាគថវិកាតាមលទ្ធភាពជាមួយនឹង«មូលនិធិកសាងហេដ្ឋារចនាសម្ព័ន្ធព្រំដែន»។ ដូច្នេះសមាគមបាននាំសិល្បៈមួយចំនួន មកទស្សនានូវសមិទ្ធផលដែលកើតចេញពីការចូលរួមរបស់ពួកគាត់ រួមគ្នាជាមួយប្រជាពលរដ្ឋទូទាំងប្រទេស។

លោកជំទាវអ្នកឧកញ៉ា បញ្ជាក់បន្ថែមថា «ខ្ញុំ ក៏ដូចជាបងប្អូនទាំងអស់ បានមើលឃើញយ៉ាងជាក់ច្បាស់ ពីភាពរឹងមាំ នៃដែនអធិបតេយ្យរបស់កម្ពុជាយើង នាពេលនេះ និងតទៅអនាគត។ ទី១.ការចរចាបោះបង្គោលព្រំដែនឲ្យបានច្បាស់លាស់ និងត្រឹមត្រូវបំផុតតាមនិយាមការអន្តរជាតិជារបង។ ទី២.ការកសាងហេដ្ឋារចនាសម្ព័ន្ធ និងការអភិវឌ្ឍផ្លូវក្រវាត់ព្រំដែន។ និងទី៣.ជំរុញការអភិវឌ្ឍ និងប្រជាជនមករស់នៅតាមបណ្ដោយព្រំដែនឲ្យកាន់តែច្រើន ដើម្បីបង្កើតរបងខឿនការពារជាតិ»។

គួរជម្រាបថា អំណោយសមាគមសិល្បករខ្មែរ បានប្រគល់ជូនថវិកាចំនួន ១០ លានរៀល សម្រាប់ ៥ អង្គភាព និងជូនថវិកាដល់កងកម្លាំង ៥០ នាក់ ក្នុង ១ នាក់ ៥ ម៉ឺនរៀល។ លោកជំទាវអ្នកឧកញ៉ា ក៏បានប្រគល់ថវិកាផ្ទាល់ចំនួន ១០ លានរៀលបន្ថែមផងដែរ។

សូមបញ្ជាក់ថា ការអនុវត្តគម្រោងកសាងផ្លូវខ្សែក្រវាត់ព្រំដែន ប្រើប្រាស់ថវិកាមូលនិធិព្រំដែន។ ក្នុងខេត្តមណ្ឌលគិរី និងរតនគិរី គឺបានចាត់តាំងកងឯកភាពសរុបចំនួន ៨ កងឯកភាព។ យោងតាមរបាយការណ៍ លទ្ធផលសម្រេចបានការងារបោសសម្អាតមីន-យុទ្ធភណ្ឌមិនទាន់ផ្ទុះ សម្រេចបានលើផ្ទៃដីទំហំ ២.៣៩២.៥០០ ម៉ែត្រគូបា រកគ្រាប់ឃើញគ្រាប់បែកចំនួន ៧១ គ្រាប់។ ការឈូសផ្លូវទទឹង ៥. បើកមុខសម្រាប់រកខ្សែផ្លូវដំបូង សម្រេចបានប្រវែង ៩៥,៧០ គ.ម (ខេត្តមណ្ឌលគិរី សម្រេចបានប្រវែង ៦០,៧០ គ.ម, ខេត្តរតនគិរី សម្រេចបានប្រវែង ៣៥ គ.ម) ការឈូសផ្លូវទទឹង ២០ ម សម្រាប់រកអ័ក្សផ្លូវ សម្រេចបានប្រវែង ៨២,៧០ គ.ម (ខេត្តមណ្ឌលគិរីសម្រេចបានប្រវែង ៥៣,៣០ គ.ម, ខេត្តរតនគិរី សម្រេចបានប្រវែង ៣៥ គ.ម។ ចំពោះការងារលុបជ្រលង ចិតជញ្ជាំងភ្នំ និងបន្ទាបចំណោទភ្នំ សម្រេចបានប្រវែង ៧១,៦០ គ.ម (ខេត្តមណ្ឌលគិរី សម្រេចបានប្រវែង ៤២,២០ គ.ម , ខេត្តរតនគិរី សម្រេចបានប្រវែង ២៩,៤០ គ.ម)។

ជាមួយនេះ លោកឧត្ដមសេនីយ៍ទោ សឹង សុខន បានសង្កត់ធ្ងន់ថា កងកម្លាំងវិស្វកម្ម នៃកងយោធពលខេមរភូមិន្ទ បានប្ដេជ្ញាខិតខំបំពេញភារកិច្ចដោយការទទួលខុសត្រូវខ្ពស់ ដើម្បីសម្រេចឲ្យបានតាមផែនការជាប្រវត្តិសាស្ត្រនេះ៕

សម្រួល ៖ ពិសី

The post លោកជំទាវអ្នកឧកញ៉ា ម៉ៅ ចំណាន ៖ ជុំវិញទស្សនកិច្ចផ្លូវក្រវាត់ព្រំដែនកម្ពុជា-វៀតណាម នៅខេត្តមណ្ឌលគិរី ធ្វើឡើងក្នុងគោលបំណងសំខាន់ៗ ៣ appeared first on Kampuchea Thmey Daily.

តារាល្បីៗណាខ្លះ? នឹងមានវត្តមាននៅប្រាសាទបាយ័ន ក្នុងកម្មវិធី BVLGARI AETERNA 2025

Linda — Thu, 20 Feb 2025 03:10:04 +0000

ជាការពិតណាស់កម្មវិធី BVLGARI Aeterna 2025 លំដាប់ថ្នាក់ពិភពលោក បានជ្រើសរើសទឹកដីខេត្តសៀមរាបធ្វើជាទីតាំងបង្កើតកម្មវិធីដែលនឹងធ្វើឡើងនៅបរិវេណប្រាសាទបាយ័ន ថ្ងៃទី21 ខែកុម្ភៈ នេះហើយ។

តាមប្រភពបានឲ្យដឹងថា តារាល្បីៗតាមបណ្ដាប្រទេសដែលជាអ្នកតំណាងឲ្យ BVLGARI ដូចជា តារាខ្មែរ តារាចិន តារាកូរ៉េ តារាថៃ និងតារាហូលីវូដ នឹងមកជួបជុំគ្នានៅទឹកដីកម្ពុជា ដើម្បីចូលរួមបង្ហាញវត្តមាននៅក្នុងកម្មវិធីមួយនេះដូចកាលពីឆ្នាំកន្លងទៅ។

គេបានរំពឹងថា Lisa និង Mingyu នឹងបង្ហាញវត្តមាន ហើយចំពោះតារាចិនគេប្រាកដចិត្តថា Lui Yifei និង Yang Yang តារាសម្ដែងលំដាប់ហូលីវូដ Anne Hathaway និង Zendaya ក៏នឹងមកចូលរួមផងដែរ។ លើសពីនោះ មហាសេដ្ឋីមកពីជុំវិញពិភពលោក ក៏ត្រូវបានអញ្ជើញឲ្យចូលរួម ព្រមទាំងសេដ្ឋីនៅប្រទេសកម្ពុជាក៏នឹងមានកិត្តិយសបង្ហាញវត្តមានទៀតផង។

កាលពីឆ្នាំ2024កន្លងទៅនេះ BVLGARI បានប្រារព្ធពិធីនៅឯប្រទេសសិង្ហបុរី ដែលមានវត្តមានរបស់តារាល្បីៗដូចជា កញ្ញា ស៊ីន យូប៊ីន ជាអ្នកតំណាងឲ្យកម្ពុជា តារាកូរ៉េគឺ Kim Jiwon។ ចំណែកឯ ឆ្នាំ2025នេះ កញ្ញា ស៊ីន យូប៊ីន មានកិត្តិយសធ្វើជាម្ចាស់ផ្ទះទទួល BVLGARI៕

The post តារាល្បីៗណាខ្លះ? នឹងមានវត្តមាននៅប្រាសាទបាយ័ន ក្នុងកម្មវិធី BVLGARI AETERNA 2025 appeared first on Kampuchea Thmey Daily.

ពិធីករ សុខ រ៉ាស៊ី អង្វរបុរសៗ សូមកុំមានជម្លោះជាមួយមនុស្សស្រី

អ៊ិន ពិសី — Tue, 18 Feb 2025 03:23:02 +0000

ពិធីករល្បីឈ្មោះ និងមានប្រជាប្រិយភាព លោក សុខ រ៉ាស៊ី សុខៗ ស្រាប់តែគេឃើញពិធីករសង្ហារូបនេះ បានចេញមក ដោយអង្វរបុរសៗ សូមកុំមានជម្លោះជាមួយមនុស្សស្រី មិនថាជាប្តីប្រពន្ធ ឬជាមួយអ្នកផ្សេងទេ។

ការលើកឡើងរបស់ពិធីករ លោក សុខ រ៉ាស៊ី នេះដែរ ក៏ស្របពេលនឹងគ្នាដែលតារាចម្រៀងស្រីវ័យក្មេង កញ្ញា វ៉ាន់ នីឡា បាននិងកំពុងជួបរឿងមិនសប្បាយចិត្ត ក្រោយរងការប្រមាថមាក់ងាយពីសំណាក់បុគ្គលមួយចំនួនជាមនុស្សប្រុសមកលើនាងដែលជាស្ត្រីទន់ខ្សោយ។

លោក សុខ រ៉ាស៊ី បានឲ្យដឹងថា «ខ្ញុំសូមអង្វរបងប្អូនប្រុសៗ បើអាច សូមកុំមានជម្លោះជាមួយមនុស្សស្រី អ្នកណាក៏មានរាសីឡើងរាសីចុះដែរ ម្តងគេម្តងយើង សូមកុំរុញគាត់ទៅរឿងចាស់ ផ្លូវចិត្តគាត់ជួសជុលបានប៉ុណ្ណេះវាមិនងាយទេ សូមអង្វរឈប់បានឈប់ទៅ»។

តាមរយៈខ្លឹមសារបំផុសរបស់ពិធីករ លោក សុខ រ៉ាស៊ី ខាងលើនេះពិតជាទទួលបានការគាំទ្រពីសំណាក់មហាជនអ្នកលេងបណ្តាញសង្គមហ្វេសប៊ុកជាច្រើន ទោះបីថាការលើកឡើងរបស់លោកមិនសំដៅចំលើបុគ្គលរូបណាក៏ដោយ តែនេះក៏ជាសារដាស់តឿនមួយដែលមានប្រយោជន៍ និងជាគំរូល្អសម្រាប់សង្គមផងដែរ។

ដោយឡែក កាលពីថ្មីៗ កន្លងមកនេះដែរ ឧកញ៉ា នឹម វណ្ណៈ ដែលជាកូនស្រីបង្កើតលោកជំទាវចិត្តធម៌ ហ៊ុន ស៊ីណាត បានបង្ហោះខ្លឹមសារខ្លីពាក់ព័ន្ធស្ត្រីដែរថា ស្ត្រី ជាមាតាពិភពលោក អ្នកជេរប្រមាថស្ត្រី គឺដូចជាប្រមាថដល់ស្ត្រីទូទាំងពិភពលោកដូច្នេះដែរ៕

អត្ថបទ ៖ ចាន់រ៉ា

The post ពិធីករ សុខ រ៉ាស៊ី អង្វរបុរសៗ សូមកុំមានជម្លោះជាមួយមនុស្សស្រី appeared first on Kampuchea Thmey Daily.

ដួង សុខគា សរសើរភាពយន្តសម័យបុរាណប្រើពាក្យច្បាស់ៗ វេយ្យាករណ៍ពេញ ជាការអប់រំគំរូល្អ

អ៊ិន ពិសី — Mon, 17 Feb 2025 04:40:29 +0000

តារាពហុជំនាញ លោក ដួង សុខគា ថ្មីៗ នេះ បានធ្វើការចែករំលែកនូវវីដេអូបង្ហាញពីរឿងកាលពីសម័យបុរាណមួយភ្ជាប់នឹងសំណេរសរសើរមិនដាច់ពីមាត់ថា ភាពយន្តសម័យបុរាណមួយនេះ ប្រើពាក្យពេចន៍ច្បាស់ៗ និងវេយ្យាករណ៍ពេញ ជាការអប់រំគំរូល្អ។

ភាពយន្តសម័យបុរាណដែលត្រូវបាន លោក ដួង សុខគា ធ្វើការចែករំលែក និងបង្កការចាប់អារម្មណ៍នេះ មានចំណងជើងថា «ព្រះប្រជាកុមារ» ជារឿងត្រូវប្រភពមួយចំនួនឲ្យដឹងថាថតអំឡុងសម័យសង្គមរាស្ត្រនិយម។

លោក ដួង សុខគា លើកឡើងថា ពាក្យច្បាស់ៗ វេយ្យាករណ៍ពេញ មានឃ្លា មានប្រយោគប្រធានកិរិយាសព្ទកម្មបទ សព្វនាម គុណនាមកិរិយាវិសេសន៍ អាយតនិបាត..សិល្បៈជ្រោងយោងភាសាជាតិ មិនឃ្លាតពីសីលធម៌ សុជីវធម៌ យុត្តិធម៌ ការអប់រំគំរូល្អ ភាពឆ្លាតវៃ នៃជីវិត។

មានការបញ្ចេញមតិស្រដៀង លោក ដួង សុខគា ដែរថា ខ្មែរពីដើមផូរផង់ណាស់,រឿងនេះផលិតមកនិយាយខ្មែរចំច្បាស់ៗ ល្អ គឺដើម្បីទុករក្សាជាអត្តសញ្ញាណជាតិ។ រឿងភាពយន្តរបស់ សម្ដេចឪ សម័យសង្គមរាស្ត្រនិយម «ប្រជាកុមារ»។

គួរបញ្ជាក់ថា បើយោងតាមឯកសាររឿង«ព្រះប្រជាកុមារ» គឺជាស្នាព្រះហស្តនិពន្ធ និងដឹកនាំរឿងដោយព្រះករុណាព្រះបរមរតនកោដ្ឋ និងតួអង្គសំខាន់ក្នុងរឿងគឺ ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា(ថតនៅក្នុងឆ្នាំ ១៩៦៧)៕

អត្ថបទ ៖ ចាន់រ៉ា

The post ដួង សុខគា សរសើរភាពយន្តសម័យបុរាណប្រើពាក្យច្បាស់ៗ វេយ្យាករណ៍ពេញ ជាការអប់រំគំរូល្អ appeared first on Kampuchea Thmey Daily.

ខេម ចាត់ទុកការនិពន្ធបទចម្រៀង ឬ ច្រៀងប្រើពាក្យអសុរោះ ជាការសាបព្រោះគំរូអាក្រក់ទាំងមិនដឹងខ្លួន

អ៊ិន ពិសី — Mon, 17 Feb 2025 02:45:56 +0000

ស្របពេលក្រសួងវប្បធម៌ និងវិចិត្រសិល្បៈ ឲ្យបញ្ឈប់ការតែងនិពន្ធបទចម្រៀង ឬ ច្រៀង ដែលមានខ្លឹមសារគ្រោតគ្រាត អសុរោះ តារាចម្រៀង ខេម បានបង្ហាញការគាំទ្រយ៉ាងពេញទំហឹងចំពោះសេចក្ដីណែនាំនេះ ហើយចាត់ទុកទង្វើនេះជាការសាបព្រោះគំរូអាក្រក់ទាំងមិនដឹងខ្លួន។

ជាមួយគ្នានេះ តារាចម្រៀងសំឡេងស្អក លោក ខេម ក៏បានបញ្ចេញទស្សនៈរបស់ខ្លួនដោយយល់ឃើញថា រាល់ការតែងនិពន្ធបទចម្រៀង ឬ ច្រៀង តាមរយៈន័យប្រើពាក្យគ្រោតគ្រាតអសុរោះវាជាការសាបព្រោះទង្វើ និងជាគំរូអាក្រក់ទៅកាន់ហ្វេន និងប្រជាជន ទាំងមិនដឹងខ្លួន។

លោក ខេម លើកឡើងថា នេះជាអ្វីដែលលោកតែងតែសង្ឃឹមចង់ឃើញបែបនេះ ជាការពិតខ្មែរមានពាក្យច្រើនណាស់ដែលអាចយកមកនិយាយ ឬ ច្រៀងបាន ឧទាហរណ៍ ,លោកតា អធិរាជសំឡេងមាស លោកមិនចាំបាច់ទេដែលចាំបាច់ត្រូវយកពាក្យអសុរោះមកច្រៀងអួតអាងពាក្យឈ្លើយ ពាក្យ ជេរប្រមាថ ដើម្បីឲ្យបានល្បីលើសិល្បៈផ្នែកចម្រៀងនោះទេ។

តារាចម្រៀង ខេម បន្តថា «បងចង់ឲ្យប្អូនៗ មួយចំនួនដែលតែងតែប្រើពាក្យអសុរោះបែបនេះលើវិស័យចម្រៀងមួយនេះ សាកឆែកចម្រៀងខ្លួនឯងទៅក្រោយលមើល តើប៉ុន្មានឆ្នាំនេះប្អូនបានធ្វើអ្វីខ្លះក្នុងបណ្ដាញសង្គមមួយនេះ សង្គមយើង ក្មេងៗ ឬ មនុស្សមួយចំនួន ចាប់ផ្ដើមឲ្យតម្លៃពាក្យជេរ ពាក្យប្រមាថ អួតអាង ដូចអ្វីដែលបងនិយាយដែរឬទេ?»។

ក្នុងន័យនេះ លោក ខេម បានសង្កត់ធ្ងន់ថា «នេះជាការសាបព្រោះទង្វើ និងជាគំរូអាក្រក់ទៅកាន់ហ្វេន និងប្រជាជនទាំងមិនដឹងខ្លួន រឿងល្អដែលមនុស្សគ្រប់គ្នាចង់ធ្វើនោះ ពិបាកធ្វើណាស់។ ប៉ុន្តែការអាក្រក់ដែលមនុស្សមិនចូលចិត្ត វារមែងចូលមកក្នុងជីវិតអ្នកដោយមិនបានព្រាងទុក ឬ មិនដឹងខ្លួន»។

ខេម បន្ថែមថា «បញ្ជាក់ ខ្ញុំ សរសេរសារនេះ មិនមែនជាការជាន់ពន្លិចអ្វីនោះទេ សូម្បីបទមួយចំនួនរបស់ប្អូនៗ បងក៏ស្តាប់ដែរ ប៉ុន្តែបងស្តាប់ចម្រៀងណាដែលលើកទឹកចិត្ត ពាក្យល្អ ដូច្នេះខ្ញុំសង្ឃឹមប្អូនៗ ជំនាន់ក្រោយ មិនចាំបាច់អ្វីទេប្រើពាក្យមិនល្អចំពោះគ្នានោះទេ ដោយក្តីស្រលាញ់ក្នុងនាមយើងជាជនជាតិតែមួយ បងប្អូនអាចបញ្ចេញមតិបានដោយក្រមសីលធម៌»៕

អត្ថបទ ៖ ចាន់រ៉ា

The post ខេម ចាត់ទុកការនិពន្ធបទចម្រៀង ឬ ច្រៀងប្រើពាក្យអសុរោះ ជាការសាបព្រោះគំរូអាក្រក់ទាំងមិនដឹងខ្លួន appeared first on Kampuchea Thmey Daily.