តុលាការភ្នំពេញ Archives - Kampuchea Thmey Daily

ឧបនាយករដ្ឋមន្ត្រី កើត រិទ្ធ ថាសំណងរាប់លានដុល្លារមិនស្មើអាយុជីវិតមនុស្សទេតែនេះជា «យុត្តិធម៌ក្នុងយុគសម័យនៃពិភពលោកបច្ចុប្បន្ន»

hun sirivadh — Wed, 25 Dec 2024 02:59:48 +0000

លោកឧបនាយករដ្ឋមន្ត្រី រដ្ឋមន្ត្រីយុត្តិធម៌ កើត រិទ្ធ បានលើកឡើងពាក់ព័ន្ធការកាត់ទោសឧក្រិដ្ឋជន ស្រី ស៊ីណា ថាជាប្រវត្តិសាស្រ្តមួយក្នុងវិស័យយុត្តិធម៌កម្ពុជា។ លោកថាថ្វីត្បិតតែសំណង ១លានដុល្លាក្នុងមួយគ្រួសារមិនអាចដោះដូរនឹងតម្លៃអាយុជីវិតមនុស្សទេតែនេះជាអ្វីដែល «យុត្តិធម៌ក្នុងយុគសម័យនៃពិភពលោកបច្ចុប្បន្ន»។

លោកឧបនាយករដ្ឋមន្ត្រី កើត រិទ្ធ

លោកឧបនាយករដ្ឋមន្ត្រី កើត រិទ្ធ បានសរសេរនៅលើហ្វេសបុកផ្ទាល់ខ្លួនលោកនៅព្រឹកថ្ងៃទី២៥ ខែធ្នូ ឆ្នាំ២០២៤នេះ បានអរគុណ និងកោតសរសើរចំពោះសាលាដំបូងរាជធានីភ្នំពេញ ដែលបានកាត់ទោសឧក្រិដ្ឋជន ស្រី ស៊ីណា ដោយត្រឹមត្រូវ និងម៉ឺងម៉ាត់ ដើម្បីរកយុត្តិធម៌ដល់ជនរងគ្រោះទាំងឡាយ។

ចំពោះការសម្រេចសេចក្ដីឱ្យទណ្ឌិត ស្រី ស៊ីណា ផ្ដល់សំណងជំងឺចិត្តដល់គ្រួសារអ្នករងគ្រោះដែលបានស្លាប់បាត់បង់ជីវិតចំនួន ១ លានដុល្លារ ក្នុងមួយគ្រួសារ លោកឧបនាយករដ្ឋមន្ត្រីយល់ថា ទោះបីជាលុយមិនអាចដោះដូរនឹងតម្លៃនៃអាយុជីវិតរបស់យុវជនទាំងពីររូបឡើយ ប៉ុន្តែនេះជាអ្វីដែលហៅថា «យុត្តិធម៌ក្នុងយុគសម័យនៃពិភពលោកបច្ចុប្បន្ន»។

លោកសរសេរថា៖ «អាចធ្វើបាន ដើម្បីជាសំណងជំងឺចិត្តដល់គ្រួសារជនរងគ្រោះ និង អ្នករងគ្រោះ បន្ថែមពីលើអ្វីដែលជាការផ្តន្តាទោសដាក់ពន្ធនាគារ។ ផ្អែកតាម «គោលការណ៍សមទណ្ឌោ”, ផ្នែកនៃការសម្រេចអំពីសំណងនេះ គឺ សក្តិសមជាទីបំផុតសម្រាប់ឧកញ៉ាមានលុយ ដែលក្អេងក្អាងប្រមាថជីវិតអ្នកដទៃ និង បានប្រព្រឹត្តអំពើឃាតកម្មដ៏ឃោរឃៅបែបនេះ។ ខ្ញុំសូមបញ្ជាក់ជូនថា “គោលការណ៍សមទណ្ឌោ” នេះ ជាគោលការណ៍មួយនៅក្នុង ពាក្យសច្ចាប្រណិធានដែលចៅក្រមទាំងអស់ ត្រូវស្បថមុនចូលកាន់តំណែង»។

លោកក៏នឹងតាមដានអំពីការអនុវត្តសំណងចំពោះជនរងគ្រោះនៅក្នុងសំណុំរឿងនេះដែរ ជាមួយនឹងការបន្តតាមដានការអនុវត្តច្បាប់ចំពោះករណីនេះមិនត្រឹមតែត្រឹមនៅសាលាជម្រះក្តីជាន់ខ្ពស់ ក្នុងករណីមានបណ្តឹងតវ៉ានឹងសាលក្រមនោះទេ ប៉ុន្តែនឹងបន្តតាមដាននៅពេលអនុវត្តទោសក្នុងពន្ធនាគាររបស់ទណ្ឌិត ពិសេសគឺអ្វីដែលលោកបានលើកឡើងក្នុងសន្និសីទសារព័ត៌មានលើករណីនេះនាពេលកន្លងទៅថា នឹងដាក់ឈ្មោះឧក្រិដ្ឋជនសាហាវឃោរឃៅ ស្រី ស៊ីណា ក្នុងបញ្ជីខ្មៅ ដែលនឹងមិនត្រូវទទួលបាននូវការបន្ធូរបន្ថយទោស ឬលើកលែងទោសឡើយ។

គួរឱ្យដឹងដែរថាសាលាដំបូងរាជធានីភ្នំពេញកាលពីថ្ងៃទី២៣ ខែធ្នូ ឆ្នាំ២០២៤ បានសម្រេចផ្ដន្ទាទោសឧក្រិដ្ឋជន ស្រី ស៊ីណា អាយុ៥១ឆ្នាំឱ្យជាប់គុក៣១ឆ្នាំ និងបង្គាប់ឱ្យសងសំណងជូនគ្រួសារជនរងគ្រោះដែលស្លាប់២នាក់ក្នុងមួយគ្រួសារ១លានដុល្លារ និងសំណងចំនួន៥០ម៉ឺនដុល្លារដល់អ្នករងរបួសចំនួន២នាក់៕

អត្ថបទដោយ ហ៊ុន សិរីវឌ្ឍន៍

The post ឧបនាយករដ្ឋមន្ត្រី កើត រិទ្ធ ថាសំណងរាប់លានដុល្លារមិនស្មើអាយុជីវិតមនុស្សទេតែនេះជា «យុត្តិធម៌ក្នុងយុគសម័យនៃពិភពលោកបច្ចុប្បន្ន» appeared first on Kampuchea Thmey Daily.

តុលាការចេញដីកាចាប់ខ្លួនមេតុងទីនម្នាក់ ពីបទឆបោកលុយជិត១លានដុល្លារ

Kang Tola — Mon, 27 Mar 2023 13:32:32 +0000

ភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ បានចេញដីកាចំនួន២ច្បាប់ បង្គាប់ឲ្យសមត្ថកិច្ចតាមរកចាប់ខ្លួនមេតុងទីនប្រចាំតុលាការម្នាក់ ដែលវេចលុយសមាជិក”កូនតុងទីន”ប្រមាណជាង៦០ នាក់ ស្មើទឹកប្រាក់ជិត១លានដុល្លារអាមេរិក រត់គេចខ្លួន បាត់។

យោងតាមដីកាបង្គាប់ឲ្យចាប់ខ្លួនពីរច្បាប់របស់លោក ស សំណាង ចៅក្រមស៊ើបសួរសាលាដំបូងរាជធានីភ្នំពេញ បានបញ្ជាក់ថា ឈ្មោះ ហួយ វត្តនី ភេទស្រី អាយុ៣៥ ឆ្នាំ មានទីលំនៅភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ ត្រូវបានតំណាងអយ្យ ការធ្វើការចោទប្រកាន់ពីបទ « ឆបោក ប្រព្រឹត្តនៅរាជធានីភ្នំពេញ កាលពីថ្ងៃទី១ ទី ១៤ ខែ មីនា និងថ្ងៃទី១៥ ទី១៧ ខែកញ្ញា ឆ្នាំ ២០២២ តាមបញ្ញត្តិមាត្រា ៣៧៨ នៃក្រមព្រហ្មទណ្ឌ »។

កាលពីពេលថ្មីៗនេះ នៅលើបណ្តាញសង្គមហ្វេសប៊ុក គេបានសង្កេតឃើញមានការបង្ហោះព័ត៌មាន បន្តគ្នា អំពីករណីមេតុងទីនម្នាក់ បានវេចលុយជិត១លានដុល្លារអាមេរិកហើយរត់គេចខ្លួន ធ្វើឲ្យកូនតុងទីនប្រមាណជាង៦០ នាក់កំពុងជូតទឹកភ្នែកក្បាលជង្គង់ ដែលអ្នកខ្លះអស់ទាំងប្រាក់ខែ អ្នកខ្លះអស់ទាំងលុយខំរកស៊ីលក់ដូរបន្តិចបន្តួច យកមកលេងតុងទីនជាមួយមេ ដើម្បីសន្សំទុក និងចង់បានការប្រាក់ ។

តាមសំណេរអ្នកលេងបណ្តាញសង្គម ដែលបានបង្ហោះភ្ជាប់ជាមួយរូបថតមេតុងទីនថា (នេះជាមេតុងទីនមួយរូបឈ្មោះ ហួយ វត្តនី ភេទស្រី អាយុ៣៦ ឆ្នាំ ធ្វើមេតុងទីននៅក្នុងស្ថាប័នតុលការ ហើយបានឆបោកលុយកូនតុងទីនពេញមួយស្ថាប័ននោះ អស់ប្រាក់រាប់សិបម៉ឺនជិត១លានដុល្លារ និងបានវេចលុយកូនតុងទីនទាំង អស់នោះ រត់គេចបាត់តាំងពីថ្ងៃទី១០ ខែធ្នូ ឆ្នាំ២០២២ មកម្ល៉េះ ដែលធ្វើឲ្យកូនតុងទីនម្នាក់ៗ ដេកឈឺចាប់ និងទឹកភ្នែកជូតក្បាល ជង្គង់ ។ ចំណែកមេបានវេចលុយកូនយកទៅសំងំសុខតែម្នាក់ឯង។

មេតុងទីនឈ្មោះ អឿន ម៉ូនីការ ជាមេតុងទីនម្នាក់ដែរគេចាប់បាន ចុះហេតុអីឈ្មោះ ហួយ វត្តនី គេចាប់មិនបាន។ តាមប្រភពព័ត៌មានពីកូនតុងទីនម្នាក់ ក្នុងចំណោមអ្នកលេងតុងទីនជាង៦០ នាក់ បានសម្តែងនូវការឈឺចាប់បំផុត ចំពោះល្បិចកលឆបោករបស់មេតុងទីនឈ្មោះ ហួយ វត្តនី ដែលវេចលុយរត់ ហើយមិនត្រូវបានចាប់ខ្លួននាំមកឲ្យទទួលខុសត្រូវចំពោះមុខច្បាប់ លើទង្វើដែលគេប្រព្រឹត្ត ។

ប្រភពព័ត៌មានដដែលបានឲ្យដឹងថា មេតុងទីនឈ្មោះ ហួយ វត្តនី ជាមន្ត្រីបម្រើការងារនៅស្ថាប័នអយ្យការ នៃសាលាដំបូងរាជធានីភ្នំពេញ មានអាសយដ្ឋានផ្ទះលេខF៤E០ ផ្លូវបេតុង ភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។

កាលពីថ្ងៃទី១៤ ខែមីនា ឆ្នាំ ២០២២ បុគ្គលឈ្មោះ ហួយ វត្តនី បានប្រមូលមន្ត្រីបម្រើការងារនៅអង្គភាពជាមួយគ្នា លេងតុងទីនចំនួន៥ខ្សែ ក្នុង១ខ្សែ មានទឹកប្រាក់ចំនួន ២០០ ដុល្លារអាមេរិក ហើយមួយខែដេញម្តង ក្រោយពេលបើកប្រាក់ខែរៀងៗខ្លួន។

ប្រភពព័ត៌មានបន្តថា ដំបូងការលេងតុងទីននោះ គឺមានការជឿទុកចិត្តគ្នាណាស់ នៅពេលដល់ខែដេញតុងទីនម្តងៗ កូនបង់ឲ្យមេ ហើយមេក៏បានប្រគល់ប្រាក់ឲ្យទៅកូនណាដែលដេញបានគ្រប់ចំនួនដែរ តែមួយរយៈចុងក្រោយនេះមេមានកាន់ឈ្មោះខ្មោច រួចដេញបានប្រាក់ប្រមាណជិត១លានដុល្លារអាមេរិក ក៏រត់គេចខ្លួនបាត់ទៅ។ ក្រោយពេលដឹងថា មេតុងទីនវេចលុយជិត១លានដុល្លាររត់គេចខ្លួនហើយ កូនតុងទីនបានដាក់ពាក្យបណ្តឹងចូលស្ថាប័នអយ្យការ អមសាលាដំបូងរាជធានីភ្នំពេញ ព្រោងព្រាត ពីបទឆបោក និងរំលោភលើទំនុកចិត្ត ដើម្បីចាត់ការលើបុគ្គលរូបនោះតាមនីតិវិធី ។

ម្តងនេះចាំមើលមេតុងទីនបម្រើការងារនៅសាលាដំបូង វេចលុយបុគ្គលិក មន្ត្រី អ្នករាជការ ធ្វើការនៅសាលាដំបូងដូចគ្នា គេចខ្លួនតទៅទៀតបានទេ ក្នុងដំណាក់កាលចៅក្រមស៊ើបសួរ បានចេញ ដីកាឲ្យចាប់ខ្លួនដល់ទៅ២ដីកានោះ ឬមានស្លាបហើរដល់ពេលណាទៀត៕

ដោយ ៖ មករា

The post តុលាការចេញដីកាចាប់ខ្លួនមេតុងទីនម្នាក់ ពីបទឆបោកលុយជិត១លានដុល្លារ appeared first on Kampuchea Thmey Daily.

តុលាការផ្ដន្ទាទោសមេបក្សបេះដូងជាតិ សៀម ភ្លុក ដាក់ពន្ធនាគារ២ឆ្នាំកន្លះចោទពីបទ«ក្លែងបន្លំនិងប្រើប្រាស់លិខិតក្លែង»

Kang Tola — Sat, 25 Mar 2023 00:16:44 +0000

ចៅក្រមសាលាដំបូងរាជធានីភ្នំពេញ លោកស្រី ជុំ សង្វា និងលោក សេង ហៀង ជាតំណាងអយ្យការ កាលពីរសៀលថ្ងៃទី ២៤ ខែមីនា ឆ្នាំ២០២៣នេះ បានប្រកាសសាលក្រមសម្រេចផ្ដន្ទាទោសលោកសៀម ភ្លុក មរបក្សបេះដូងជាតិ ដាក់ពន្ធនាគារកំណត់២ឆ្នាំកន្លះ និងពិន័យជាប្រាក់ចំនួន៥លានរៀលបង់ចូលថវិការដ្ឋ ក្រោមការចោទប្រកាន់ពីបទ « ក្លែងបន្លំ និងប្រើប្រាសលិខិតក្លែង » ។

ចំណែកសហការីក្រោមបង្គាប់របដ់លោកសៀម ភ្លុក ចំនួន៥នាក់ទៀត ត្រូវបានតុលាការចេញដីកាបង្គាប់ឱ្យចាប់ខ្លួនយកមកអនុវត្តតាមសេចក្ដីសម្រេចរបស់តុលាការផងដែរ ។ជនជាប់ចោទទាំង៥នាក់ដែលចៅក្រមតុលាការចេញដីកាបង្គាប់អោយចាប់ខ្លួនរួមមាន ៖

ទី១/ ឈ្មោះ តូច ថឹង ភេទប្រុស

ទី២ / ឈ្មោះ ភ្លឺ ឈុនហេង ភេទប្រុស

ទី៣ / ឈ្មោះ នូ សិទ្ធារី ភេទប្រុស

ទី៤ / ឈ្មោះ ខឿន វីរ៉ាក់ ភេទប្រុស

ទី៥ / ឈ្មោះ ភ្លឺ ម៉េងហុង

កាលពីថ្ងៃទី ១៣ខែកុម្ភៈ ឆ្នាំ២០២៣ ចៅក្រមសាលាដំបូងរាជធានីភ្នំពេញ បានបើកសវនាការកាត់ទោស ឈ្មោះសៀម ភ្លុក មេគណបក្សបេះដូងជាតិ និងមន្ត្រីរបស់គាត់ចំនួន១២នាក់ផ្សេងទៀតដែលជាប់ពាក់ព័ន្ធនិងបទល្មើស « ក្លែងបន្លំ និងប្រើប្រាសលិខិតក្លែង » ដើម្បីបំពេញបែបបទចុះបញ្ជីឈ្មោះគណបក្សក្នុងការចូលរួមបោះឆ្នោត ។

ជនជាប់ចោទទាំង១៣នាក់ដែលតុលាការកាត់ទោសនេះរួមមាន ៖

ទី១/ឈ្មោះ សៀម ភ្លុក ភេទប្រុស អាយុ ៥៣ឆ្នាំ កំពង់ឃុំខ្លួននៅពន្ធនាគារព្រៃស ។

ទី២/ឈ្មោះ ជា សុភក្ដិ ភេទស្រី ( ក្រៅឃុំ )

ទី៣/ ឈ្មោះ ឡុង ហួន ភេទប្រុស ( ក្រៅឃុំ)

ទី៤/ ឈ្មោះ ស៊ាន ភាព ភេទប្រុស ( ក្រៅឃុំ )

ទី៥/ ឈ្មោះ ឈង ហ៊ ភេទប្រុស ( ក្រៅឃុំ )

ទី៦/ ឈ្មោះ ជាប់ ឃុន ភេទប្រុស ( ក្រៅឃុំ )

ទី៧/ ឈ្មោះ រ៉េត ចាន់រតនា ភេទប្រុស ( ក្រៅឃុំ )

ទី៨/ ឈ្មោះ តូច ចឹង ភេទប្រុស ( ក្រៅឃុំ )

ទី៩/ ឈ្មោះ នូ សិទ្ធារី ភេទប្រុស ( ក្រៅឃុំ )

ទី១០/ ឈ្មោះ ភ្លី ឈុនហុង ភេទប្រុស ( ក្រៅឃុំ )

ទី១១/ ឈ្មោះ ភ្លី ម៉េងហុង ភេទប្រុស ( ក្រៅឃុំ )

ទី១២/ ឈ្មោះ ឈឹម សាវ៉ាត ភេទប្រុស ( ក្រៅឃុំ )

ទី១៣/ ឈ្មោះ ខឿន វីរ៉ាត់ ភេទប្រុស ( ក្រៅឃុំ ) ។

ជនជាប់ចោទទាំង១៣នាក់ត្រូវបានបង្គាប់អោយនាំខ្លួន និងកោះហៅអោយមកបង្ហាញខ្លួននៅក្នុងរង្វង់ក្រចកសេះ ចំពោះមុខតុលាការ និងមេធាវីការពារផ្លូវច្បាប់របស់ជនជាប់ចោទ មានលោកមេធាវី សំ សុគង់ លោកមេធាវី កែត ឃី និងលោកមេធាវី ជួង ជូងី ។ សូមរំលឹកថាលោកសៀម ភ្លុក អតីតស្ថាបនិកគណបក្សបេះដូងជាតិត្រូវបានចៅក្រមស៊ើបសួរនៃសាលាបំបូងរាជធានីភ្នំពេញបានសម្រេចឃុំខ្លួននៅថ្ងៃទី២៨ ខែមេសា ឆ្នាំ២០២២ ពាក់ព័ន្ធនឹងករណីក្លែងបន្លំ និងប្រើប្រាស់លិខិតឯកសារក្លែង នៃការបង្កើតគណបក្សបេះដូងជាតិ។

លោកសៀម ភ្លុក ត្រូវបានឃាត់ខ្លួនកាលពីថ្ងៃទី២៧ ខែមេសា តាមដីកាបង្គាប់ឱ្យនាំខ្លួនរបស់សាលាដំបូងរាជធានីភ្នំពេញ។ក្នុងដីកាចៅក្រមស៊ើបសួរសាលាដំបូងរាជធានីភ្នំពេញបានបង្គាប់ឱ្យភ្នាក់ងារមានសមត្ថកិច្ចនៃកងកម្លាំងសាធារណៈ នាំខ្លួនជនត្រូវចោទដែលមានឈ្មោះ សៀម ភ្លុក ភេទ ប្រុស កើតនៅថ្ងៃទី១៥ ខែមេសា ឆ្នាំ១៩៧០ ទៅមណ្ឌលអប់រំកែប្រែទី១(ម១) ដោយអនុវត្តឱ្យបានត្រឹមត្រូវតាមច្បាប់។ ចៅក្រមស៊ើបសួរក៏បានបង្គាប់ឱ្យប្រធានមណ្ឌលអប់រំកែប្រែទី១(ម១)ទទួល និងឃុំខ្លួនជននេះ រហូតដល់មានបទបញ្ជាថ្មីសម្រេចផ្សេងពីនេះ ។

បន្ថែមពីនេះទៅទៀតគ្រប់ភ្នាក់ងារនៃកងកម្លាំងសាធារណៈទាំងអស់ ត្រូវសហការអនុវត្តឱ្យបានល្អនៅពេលដីកានេះ ត្រូវបានបង្ហាញក្នុងករណីចាំបាច់។ក្រសួងមហាផ្ទៃ កាលពីថ្ងៃទី០២ ខែមីនា ឆ្នាំ២០២២ បានចេញប្រកាសមួយ ដោយសម្រេចលុបឈ្មោះ «គណបក្សបេះដូងជាតិ» ចេញពីបញ្ជីគណបក្សនយោបាយ។ ការចេញប្រកាសលុបឈ្មោះគណបក្សបេះដូងជាតិនេះ បានធ្វើឡើងបន្ទាប់ពី តុលាការកំពូល បានបើកសវនការ និងបានប្រកាសសាលដីកា សម្រេចទាត់ចោលបណ្ដឹងរបស់ លោក សៀម ភ្លុក ដែលប្រឆាំងនឹងការបដិសេធក្រសួងមហាផ្ទៃ ចំពោះសំណើបង្កើតគណបក្សបេះដូងជាតិ កាលពីថ្ងៃទី២៤ ខែធ្នូ ឆ្នាំ២០២១ ហើយបានបិទផ្លូវតវ៉ា។លោកខៀវ សុភ័គ អ្នកនាំពាក្យក្រសួងមហាផ្ទៃ ធ្លាប់បានបញ្ជាក់ថា កន្លងទៅក្រសួងមហាផ្ទៃ បានរកឃើញអំពីភាពមិនប្រក្រតី ក្នុងការប្រមូលស្នាមេដៃ ដើម្បីស្នើសុំចុះបញ្ជីរបស់គណបក្សបេះដូងជាតិ ដោយក្នុងនោះមានដូចជាស្នាមមេដៃរបស់ឈ្មោះបុគ្គលមួយចំនួនខុសពីស្នាមមេដៃនៅក្នុងអត្តសញ្ញាណបណ្ណ, ស្នាមមេដៃរបស់បុគ្គលមួយចំនួន ផ្តិតលើឈ្មោះបុគ្គលដទៃ, ការក្លែងស្នាមមេដៃបុគ្គល, ស្នាមមេដៃរបស់បុគ្គលមួយចំនួន ខូចគុណភាពមិនអាចធ្វើកោសល្យវិច័យបាន និងស្នាមមេដៃមានភាពមិនប្រក្រតីធ្ងន់ធ្ងរជាដើម៕

អត្ថបទ៖ មករា

The post តុលាការផ្ដន្ទាទោសមេបក្សបេះដូងជាតិ សៀម ភ្លុក ដាក់ពន្ធនាគារ២ឆ្នាំកន្លះចោទពីបទ«ក្លែងបន្លំនិងប្រើប្រាស់លិខិតក្លែង» appeared first on Kampuchea Thmey Daily.

ចាប់ឃុំខ្លួនស្ត្រីម្នាក់ តាមអំណាចសាលក្រមតុលាការ

អ៊ិន ពិសី — Fri, 24 Feb 2023 04:12:20 +0000

ស្ត្រីម្នាក់ ត្រូវចាប់ខ្លួនដាក់ពន្ធនាគារ ២ ឆ្នាំ ពីបទឆបោក និងមិនបំពេញកាតព្វកិច្ចចំពោះឧបករណ៍អាចជួញដូរបាន តាមអំណាចសាលក្រមតុលាការ។

ដោយអនុវត្តតាមដីកាបង្គាប់ឲ្យចាប់ខ្លួនរបស់ចៅក្រមជំនុំជម្រះស៊ើបសួរសាលាដំបូងរាជធានីភ្នំពេញ កាលពីថ្ងៃទី ២២ ខែកុម្ភៈ ឆ្នាំ ២០២៣ កម្លាំងសមត្ថកិច្ចនគរបាលជំនាញផ្នែកយុត្តិធម៌ស្រុកស្វាយជ្រុំ ខេត្តស្វាយរៀង បានសហការជាមួយកម្លាំងជំនាញការិយាល័យអនុវត្តដីកា នៃនាយកដ្ឋាននគរបាលព្រហ្មទណ្ឌក្រសួងមហាផ្ទៃ ធ្វើការចាប់ខ្លួនស្ត្រីម្នាក់ឈ្មោះ ហ៊ិន រចនា អាយុ ៣៤ ឆ្នាំ ជាមួយរថយន្តម៉ាកព្រួស ១ គ្រឿង នៅចំណុចភូមិក្រោលគោ ឃុំក្រោលគោ ស្រុកស្វាយជ្រំ ខេត្តស្វាយរៀង។

ក្រោយចាប់ខ្លួន ជនជាប់ចោទត្រូវបានសមត្ថកិច្ចនាំមកកាន់នាយកដ្ឋាននគរបាលព្រហ្មទណ្ឌក្រសួងមហាផ្ទៃ មួយយប់ រហូតមកដល់រសៀលថ្ងៃទី ២៣ ខែកុម្ភៈ ទើបបានបញ្ជូនទៅសាលាដំបូងរាជធានីភ្នំពេញ ដើម្បីបន្តនីតិវិធី។

ការចាប់ខ្លួនស្ត្រីខាងលើនេះ ត្រូវបានសមត្ថកិច្ចឲ្យដឹងថា ជាការអនុវត្តតាមដីកាបង្គាប់ឲ្យចាប់ខ្លួនលេខ១៥៤៣ ក១ ដ.ច.ន ចុះថ្ងៃទី ២២ ខែធ្នូ ឆ្នាំ ២០២២ របស់លោក ហុក ពៅ ចៅក្រមជំនុំជម្រះសាលាដំបូងរាជធានីភ្នំពេញ ដែលឈ្មោះ ហ៊ិន រចនា មានទីលំនៅភូមិអង្វះមួយរយ ឃុំអន្សោង ស្រុកកំពង់ត្របែក ខេត្តព្រៃវែង ជាប់ចោទពីបទឆបោក និងមិនបំពេញកាតព្វកិច្ចចំពោះឧបករណ៍អាចជួញដូរបាន ប្រព្រឹត្តនៅរាជធានីភ្នំពេញ កាលពីខែសីហា ឆ្នាំ ២០២១។

សាលក្រម បានបង្គាប់ឲ្យមន្ត្រីនគរបាលយុត្តិធម៌ ត្រូវនាំខ្លួនពិរុទ្ធជនទៅបង្ហាញខ្លួនក្នុងរយៈពេលខ្លីបំផុតនៅចំពោះមុខព្រះរាជអាជ្ញា និងនាំបុគ្គលនោះទៅដាក់ពន្ធនាគារ និងបង្គាប់ឲ្យប្រធានមណ្ឌលអប់រំកែប្រែទី ២ (ម២) ទទួលឃុំខ្លួនពិរុទ្ធជនដែលមានអត្តសញ្ញាណដូចខាងលើតាមដីកាបង្គាប់នេះ៕

អត្ថបទ ៖ មករា

The post ចាប់ឃុំខ្លួនស្ត្រីម្នាក់ តាមអំណាចសាលក្រមតុលាការ appeared first on Kampuchea Thmey Daily.

ចាប់ខ្លួនមេតុងទីនម្នាក់បញ្ជូនទៅតុលាការ ករណីឆបោក និងចាយសែកស្អុយរាប់សិបម៉ឺនដុល្លារអាមេរិក

Kang Tola — Sat, 21 Jan 2023 15:25:11 +0000

ភ្នំពេញ ៖ នារសៀលថ្ងៃទី២១ ខែមករា ឆ្នាំ២០២៣ នេះ កម្លាំងសមត្ថកិច្ចនគរបាលនាយកដ្ឋានព្រហ្មទណ្ឌក្រសួង មហាផ្ទៃ បានធ្វើការឃាត់ខ្លួនមេតុងទីនម្នាក់ និងបញ្ជូនទៅសាលា ដំបូងរាជធានីភ្នំពេញ ពាក់ពន្ធករណី ឆបោក និងចាយសែកស្អុយរាប់សិបម៉ឺនដុល្លារអាមេរិក។ ជនសង្ស័យមានឈ្មោះ ឡុង រ៉ានី ភេទស្រី អាយុ៣៥ ឆ្នាំ មានទីលំនៅផ្ទះលេខ៤០ស ផ្លូវលេខ៣៥០ សង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ។

ការចាប់ខ្លួនមេតុងទីនខាងលើនេះ ត្រូវបានសមត្តកិច្ចបង្ហើបឲ្យដឹង ជាការធ្វើឡើងតាមដីកាបញ្ជាឲ្យចូលខ្លួន របស់ស្ថាប័នអយ្យការអមសាលាដំបូងរាជធានីភ្នំពេញ ដោយយោងទៅលើពាក្យបណ្តឹងរបស់ឈ្មោះ ឈឹម ភារី ដែលមានមេធាវីការពារក្តីតំណាងដោយអាណត្តិគឺលោកស្រី នួន មករា សមាជិកគណៈមេធាវីនៃព្រះរាជាណាចក្រកម្ពុជា។

តាមពាក្យបណ្តឹងរបស់ជនរងគ្រោះបានបញ្ជាក់ថា សុំប្តឹងឈ្មោះ ឡុង រ៉ានី និងប្តី ជាមេតុងទីនបានលេងជាមួយគ្នា មានក្បាលតុងទីនផ្តាច់ខ្សែ ១០០(៧)៦០០(៦)៥០០ (៦)(ដូចមានក្នុងឧបសម្ភ័ន្ធភ្ជាប់) ដោយដើមបណ្តឹងជាកូនតុងទីនបានបង់គ្រប់ចំនួន និងដល់ពេលត្រូវកើបប្រាក់តុងទីនទាំងអស់វិញ សរុប ៣២៧ ១៦០ ដុល្លារអាមេរិកពីមេតុងទីនឈ្មោះ ឡុង រ៉ានី និងប្តី ទើបពួកគាត់ចេញជាមូលប្បទានប័ត្រមួយសន្លឹកចុះថ្ងៃទី២ ខែមករា ឆ្នាំ២០២៣ របស់ធនាគារវឌ្ឍនៈអាស៊ីចំកាត់ ដែលមានទឹកប្រាក់ចំនួន ២២៩ ៦៦០ ដុល្លារអាមេរិក និងសន្យាប្រគល់ប្រាក់សុទ្ធខាងក្រៅឲ្យបានគ្រប់ចំនួនបន្ថែមទៀត។ ប៉ុន្តែនៅពេលដល់ថ្ងៃកំណត់បើកប្រាក់ ក្នុងមូលប្បទានប័ត្រខាងលើនៅធនាគារ (ថ្ងៃទី២ ខែមករា ឆ្នាំ២០២៣) ដើម្បីធ្វើការទូទាត់ប្រាក់តាមកាលកំណត់ ស្រាប់តែខាងធនាគារឆ្លើយតបថា មូលប្បទានប័ត្រនេះមិនមានសាច់ប្រាក់ទេ ហើយត្រូវបានខាងមេតុងទីនប្លុកមូលប្បទាប័ត្រនេះ ដោយគ្មានហេតុផលអ្វីទាំងអស់ទៀតផង ។

ពាក្យបណ្តឹងបានបញ្ជាក់ទៀតថា នៅមានកូនតុងទីនជាច្រើននាក់ដែលរងគ្រោះ ដោយសារមេតុងទីនពីរនាក់ប្តីប្រពន្ធរូបនេះវេចលុយរត់ សរុបជាទឹកប្រាក់ប្រមាណជិត ២ លានដុល្លារអាមេរិកឯណោះ ហើយកូនតុងទីនដែលរងគ្រោះទាំងអស់នោះ កំពង់រៀបចំឯកសារពាក់ពន្ធ ដើម្បីពឹងពាក់មេធាវីការពារផ្លូវច្បាប់ ប្តឹងឈ្មោះ ឡុង រ៉ានី និងប្តី ជាមេតុងទីន បន្តបន្ទាប់ទៀត ។ ដូច្នោះក្នុងនាមជាជនរងគ្រោះ ស្នើសុំឲ្យស្ថាប័នអយ្យការអមសាលាដំបូងរាជធានីភ្នំពេញ មេត្តាចាត់ការលើមេតុងទីន និងប្តី ដូចមានឈ្មោះខាងលើឲ្យបានតឹងរ៉ឹងបំផុត និងតាមផ្លូវច្បាប់ជាធរមានផងដែរ៕

ដោយ ៖ មករា

The post ចាប់ខ្លួនមេតុងទីនម្នាក់បញ្ជូនទៅតុលាការ ករណីឆបោក និងចាយសែកស្អុយរាប់សិបម៉ឺនដុល្លារអាមេរិក appeared first on Kampuchea Thmey Daily.

ចាប់ខ្លួនអ្នកចេញសែកអត់លុយ បញ្ជូនឡើងតុលាការ

អ៊ិន ពិសី — Tue, 27 Dec 2022 07:38:10 +0000

បុរសម្នាក់ ត្រូវបានសមត្ថកិច្ចអាវុធហត្ថចាប់បញ្ជូនខ្លួនមកអយ្យការអមសាលាដំបូងរាជធានីភ្នំពេញពាក់ព័ន្ធបទល្មើស មិនបំពេញកាតព្វកិច្ចចំពោះឧបករណ៍ដែលអាចជួញដូរបាន (ចេញសែកអត់លុយ)។

ជនសង្ស័យឈ្មោះ ជុំ សាវឿន ភេទប្រុស អាយុ ៥៤ ឆ្នាំ ស្នាក់នៅផ្ទះលេខ ៦៩ ផ្លូវ E បុរីឈូកវ៉ា ១ សង្កាត់ក្រាំងធ្នង់ ខណ្ឌព្រែកព្នៅ។

ឈ្មោះ ជុំ សាវឿន ត្រូវបានឃាត់ខ្លួនកាលពីថ្ងៃទី ២៤ ខែធ្នូ ឆ្នាំ ២០២២ តាមដីកាបញ្ជាឲ្យចូលខ្លួនលេខ ៥៦៤ អយក ចុះថ្ងៃទី ១២ ខែធ្នូ ឆ្នាំ ២០២២ របស់លោក ច្រឹង ខ្មៅ ព្រះរាជអាជ្ញាអមសាលាដំបូងរាជធានីភ្នំពេញ បន្ទាប់ពីមានពាក្យបណ្ដឹងរបស់ឈ្មោះ ជុំ វន ភេទប្រុស ជាថៅកែការ៉ាស់ជួសជុលរថយន្តក្នុងខណ្ឌទួលគោក។

យោងតាមពាក្យបណ្ដឹងរបស់ឈ្មោះ ជុំ វន បានឲ្យដឹងថា កាលពីថ្ងៃទី ០៥ ខែកក្កដា ឆ្នាំ ២០២១ ឈ្មោះ ជុំ សាវឿន បានសុំខ្ចីប្រាក់ខ្លួនចំនួន ១២ ០០០ ដុល្លារ ដើម្បីពង្រីកមុខរបរ ហើយខ្លួនក៏ឲ្យខ្ចី ដោយសារធ្លាប់ស្គាល់រាប់អានគ្នា។ លុះដល់ថ្ងៃកំណត់ត្រូវសងប្រាក់ ឈ្មោះ ជុំ សាវឿន បានចេញសែកសន្លឹក គឺលេខ ២២២៤៤៧ ចុះថ្ងៃទី ០៥ ខែសីហា ឆ្នាំ ២០២១ របស់ធនាគារ ABA មានទឹកប្រាក់ចំនួន ៦ ០០០ ដុល្លារ និងមួយសន្លឹកទៀតលេខ ២២២៤៤៨ មានប្រាក់ចំនួន ៦ ០០០ ដុល្លារទៀត។ លុះដល់ថ្ងៃបើកប្រាក់ ស្រាប់តែខាងធនាគារប្រាប់ថា សែកនោះអត់លុយមួយរៀលទេ បើកមិនបាន។ ពេលនោះខ្លួនបានស្វែងរកឈ្មោះ ជុំ សាវឿន ដើម្បីដោះស្រាយគ្នា ប៉ុន្តែជននេះគេចខ្លួនរហូតមក ទើបប្ដឹងមកសមត្ថកិច្ចតែម្ដង។

ចំណែកឈ្មោះ ជុំ សាវឿន បានឆ្លើយថា កាលពីឆ្នាំ ២០២១ ខ្លួន និងប្រពន្ធឈ្មោះ សឿន ចាន់ណា បានយករថយន្តម៉ាកអូឌី ផលិតឆ្នាំ ២០១១ ពណ៌សូកូឡា ទៅបញ្ចាំ ឈ្មោះ ជុំ វន យកប្រាក់ចំនួន១២ ០០០ ដុល្លារ ដើម្បីរកស៊ី។ ក្រោយមកដោយខ្វះមធ្យោបាយធ្វើដំណើរ ខ្លួនក៏បានចេញមុខសុំលួសយករថយន្តមកប្រើសិន ដោយខ្លួនជាអ្នកចេញលុយចំនួន ១២ ០០០ ដុល្លារ សងជួសប្រពន្ធ តែមិនទាន់បានសងទេ ដោយចេញសែក ២ សន្លឹក ទុកតម្កល់ធានាប្រាក់បំណុល។ ក្រោយមកនៅចុង ឆ្នាំ ២០២១ ខ្លួនបានសងប្រាក់ជាបន្តបន្ទាប់ទៅឲ្យឈ្មោះ ជុំ វន គ្រប់ចំនួន ១២ ០០០ ដុល្លារ តែមិនបានទាមទារយកសែកមកវិញទេ ស្រាប់តែឈ្មោះ ជុំ វន យកសែកនោះមកប្ដឹងខ្លួនតែម្ដង។

ឥឡូវរឿងក្ដីចេញសែកស្អុយនេះ តុលាការកំពុងសាកសួរជនសង្ស័យនៅឡើយ៕

អត្ថបទ ៖ មករា

The post ចាប់ខ្លួនអ្នកចេញសែកអត់លុយ បញ្ជូនឡើងតុលាការ appeared first on Kampuchea Thmey Daily.

សាលាឧទ្ធរណ៍តម្កល់សាលដីកាឲ្យអតីតផ្កាយ២ សូយ ចាន់សឿន អោយមានទោសដដែល

Kang Tola — Wed, 07 Dec 2022 12:32:54 +0000

ភ្នំពេញ ៖ សាលាឧទ្ធរណ៍ភ្នំពេញ កាលពីថ្ងៃទី៧ ខែធ្នូ ឆ្នាំ ២០២២ បានប្រកាសសាលដីកាសម្រេចតម្កល់សាលក្រមរបស់សាលាដំបូងរាជធានីភ្នំពេញ ទុកជាបានការដដែល លើពាក្យបណ្តឹងឧទ្ធរណ៍របស់ជនជាប់ផ្កាយ២យោធា សូយ ចាន់សឿន។

សាលដីកានោះបានប្រកាសធ្វើឡើង ដោយកំបាំងមុខជនជាប់ ចោទ តែចាត់ទុកជាចំពោះមុខដោយតុលាការបានជនដំណឹង ទៅគ្រប់ភាគីដើមបណ្តឹង និងចុងចោទរួមទាំងមេធាវីការពារក្តីផងដែរ ។ តែទោះជាយ៉ាងណាក្តីសាលដីកាសាលាឧទ្ធរណ៍ បានផ្តល់សិទ្ធិឲ្យប្តឹងសារទុកទៅតុលាការកំពូលតាមច្បាប់កំណត់ បើសិនភាគីណាមួយកើតទុក្ខមិនសុខចិត្តចំពោះការកាត់ក្តីនេះ។

សូមរម្លឹកថា កាលពីរសៀលថ្ងៃទី១៥ ខែវិច្ឆិកា ឆ្នាំ២០២២ បានបើកសវនាការជំនុំជម្រះ លើបណ្តឹងឧទ្ធរណ៍របស់ជនជាប់ចោទអតីតផ្កាយ២យោធា ឈ្មោះ សូយ ចាន់សឿន ដែលបានកើតទុកមិនសុខចិត្តចំពោះការកាត់ក្តី របស់តុលាការសាលាដំបូងរាជធានីភ្នំពេញ ក្នុងសំណុំរឿង.បរិហារបង្កាច់កេរ្តិ៍ ។ សវនាការបានធ្វើឡើងជាសាធារណៈដោយមានលោក យន់ ណារ៉ុង ប្រធានក្រុមប្រឹក្សាជំនុំជម្រះ និងចំពោះមុខដើមបណ្តឹង និងចុងចោទ រួមទាំងមេធាវីការពារក្តីឲ្យភាគីទាំងសងខាង។

ជនជាប់ចោទដែលជាដើមបណ្តឹងឧទ្ធរណ៍ឈ្មោះ សូយ ចាន់សឿន ត្រូវបានអនុរក្សពន្ធនាគារខេត្តកំពង់ស្ពឺ ដឹកតាមរថយន្តនាំមកចូលរួមសវនាការនោះដែរ ហើយនៅក្នុងរង្វង់ក្រចកសេះឆ្លើយទៅកាន់អង្គសវនាការថា ខ្លួនទទួលយកសាលក្រមរបស់សាលាដំបូងរាជធានីភ្នំពេញ ត្រង់ចំណុចផ្តន្ទាទោសដាក់ពន្ធនា គារ៨ ខែ ដោយសារតែខ្លួនបានប្រព្រឹត្តបទល្មើសព្រហ្មទណ្ឌ ធ្វើប៉ះពាល់ដល់ភាគីដើមបណ្តឹង តែមិនអាចទទួលយកបានចំពោះសាលក្រមតម្រូវឲ្យខ្លួនបង់ប្រាក់ចំនួន២០លានរៀលជាសំណងរដ្ឋប្បវេណីទៅដើមបណ្តឹងនោះឡើយ។

ចំណែកភាគីដើមបណ្តឹងនៅតែប្រកាន់ជំហរ និងទទូចស្នើសុំឲ្យតុលាការថ្នាក់កណ្តាល” សាលាឧទ្ធរណ៍”រក្សាសាលក្រមរបស់តុលាការថ្នាក់ក្រោម” សាលាដំបូងរាជធានីភ្នំពេញ”ទុកជាបានការដដែល។ សវនាការត្រូវបានបញ្ចប់ទៅវិញនារសៀលថ្ងៃនោះដែរ ទើបប្រធានក្រុមប្រឹក្សាជំនុំជម្រះ បានលើកពេលប្រកាសសាលដីកាទៅថ្ងៃទី០៧ ខែធ្នូ ឆ្នាំ២០២២ ខាងមុខនេះ។

សូមរម្លឹកថា លោក ធាម ច័ន្ទពិសិដ្ឋ ចៅក្រមជំនុំជម្រះសាលាដំបូងរាជធានីភ្នំពេញ កាលពីព្រឹកថ្ងៃទី២៥ ខែកុម្ភៈ ឆ្នាំ២០២២ បានប្រកាសសាលក្រមផ្ដន្ទាទោសអតីតផ្កាយ២ សូយ ចាន់សឿន នឹងគូកនឈ្មោះ សូ បិនឡា ដាក់ពន្ធនាគារម្នាក់កំណត់៨ ខែ និងបង្គាប់ឲ្យសងជំងឺចិត្តទៅដើមបណ្ដឹងរដ្ឋប្បវេណីលើទឹកប្រាក់២០ លានរៀល ក្រោមការចោទប្រកាន់ពីបទបរិហារបង្កាច់កេរ្តិ៍។ សាលក្រមនេះបានប្រកាសកំបាំងមុខជនជាប់ចោទទាំង២ នាក់ ប៉ុន្តែចាត់ទុកចំពោះ មុខ ព្រោះជនជាប់ចោទបានទទួលការជូនដំណឹងជាផ្លូវការរបស់តុលាការផងដែរ។

សាលក្រមក៏បានទុកពេលឲ្យដើមចោទ នឹងចុងចោទប្តឹងឧទ្ធរណ៍តាមកំណត់ច្បាប់ បើសិនភាគីណាមួយកើតទុកមិនសុខ ចិត្តចំពោះការកាត់ក្តីនេះ។ ដូច្នោះបានជាជនជាប់ ចោទឈ្មោះ សូយ ចាន់សឿន សម្រេចប្តឹងឧទ្ធរណ៍ចំពោះសាល ក្រមរបស់សាលាដំបូងរាជធានីភ្នំពេញ ដែលរឿងនេះបានប្តឹងផ្តល់គ្នាទៅវិញទៅមក ទីបំផុតតុលាការទាំង២ថ្នាក់ នៅតែរក្សាបទចោទ.បរិហារបង្កាច់កេរ្តិ៍ លើជនជាប់ចោទ សូយ ចាន់សឿន ទុកជាបានការដដែល។

សូមជម្រាបថា ជនជាប់ចោទឈ្មោះ សូយ ចាន់សឿន ភេទប្រុស អាយុ៤៥ ឆ្នាំ អតីតផ្កាយ២យោធា មានទីលំនៅផ្ទះលេខ៣១០ អឺ០ មហាវិថីព្រះមុនីវង្ស សង្កាត់ចតុមុខ ខណ្ឌដូនពេញ រាជធានីភ្នំពេញ កំពុងជាប់ឃុំនៅពន្ធនាគារខេត្តកំពង់ស្ពឺ។ ចំណែកជន ជាប់ចោទឈ្មោះ សូ បិនឡា ភេទប្រុស អាយុ៤៣ ឆ្នាំ ស្នាក់នៅផ្ទះគ្មានលេខ ផ្លូវបេតុង ភូមិត្នោតជ្រុំ៣ សង្កាត់បឹងទំពុន ខណ្ឌ មានជ័យ រាជធានីភ្នំពេញ (ស្ថិតនៅក្រៅឃុំ)។ ជនត្រូវចោទទាំង ២ នាក់ បានរងនូវពាក្យបណ្តឹងរបស់លោក កើត ខេង ភេទប្រុសអាយុ៥០ឆ្នាំ មុខរបរ ជាអាជីវករ រស់នៅរាជធានីភ្នំពេញ។

តាមពាក្យបណ្តឹងរបស់ជនរងគ្រោះបានចោទប្រកាន់ជនជាប់ ចោទទាំង២ នាក់ ពីបទបរិហារបង្កាច់កេរ្តិ៍ ប្រព្រឹត្តនៅចំណុចរាជធានី ភ្នំពេញកាលពីអំឡុងឆ្នាំ២០២០ ដែលបទល្មើសនេះមានបញ្ញត្តិឲ្យផ្តន្ទាទោសតាមមាត្រា ៣១១ នឹងមាត្រា ៣១២ នៃក្រមព្រហ្មទណ្ឌ ។ ដើមចមនៃពាក្យបណ្តឹង នៅក្នុងអំឡុងឆ្នាំ ២០២០ ឈ្មោះ សូយ ចាន់សឿននិង ឈ្មោះ សូ បិនឡាបាន ប្តឹងលោក កើត ខេង ក្លែងលិខិតសាធារណៈ ដែលពាក្យបណ្តឹងនោះត្រូវបានតំណាងអយ្យការអមសាលាដំបូងរាជធានីភ្នំពេញ បើកការស៊ើបអង្កេតតាមនីតិវិធី ដោយរកមិនឃើញថា លោក កើត ខេង ពាក់ពន្ធបទល្មើសដូចការចោទប្រកាន់របស់ឈ្មោះ សូយ ចាន់សឿន នឹងឈ្មោះ សូ បិនឡា នោះឡើយ។

បន្ទាប់ពីការស៊ើបអង្កេតរកមិនឃើញមានបទល្មើសនោះហើយ តំណាងអយ្យការអមសាលាដំបូងរាជធានីភ្នំពេញ សម្រេចតម្កល់ទុកពាក្យបណ្តឹងនោះមិនចាត់ការ។ ដោយយោងទៅលើទង្វើរបស់ឈ្មោះ សូយ ចាន់សឿន និងសូ បិនឡា បានឃុបឃិតគ្នាប្តឹងលោក កើត ខេង គ្មានមូលដ្ឋានច្បាស់លាស់ និងគ្មានឯកសារគ្រប់គ្រាន់ ទើបលោក កើត ខេង សម្រេចចិត្តពឹងពាក់មេធាវីការពារផ្លូវច្បាប់ ប្ដឹងបកជន ជាប់ចោទទាំង២នាក់វិញ ពីបទបរិហារបង្កាច់កេរ្តិ៍ ដូច្នោះបានជាតុលាការមានចំណាត់ការជាបន្តបន្ទាប់ នឹងឈានដល់ការកាត់ក្តីលើពាក្យបណ្តឹងនេះ រហូតមានសាលក្រមផ្ដន្ទាទោសជនជាប់ចោទទាំង២ នាក់នោះវិញ៕

ដោយ ៖ មករា

The post សាលាឧទ្ធរណ៍តម្កល់សាលដីកាឲ្យអតីតផ្កាយ២ សូយ ចាន់សឿន អោយមានទោសដដែល appeared first on Kampuchea Thmey Daily.

អាជីវករដែលចេញសែកស្អុយទឹកប្រាក់ជិត ៦ ម៉ឺនដុល្លារប្ដឹងដើមចោទវិញពីបទបរិហាកេរ្ដិ៍

deth leng — Wed, 30 Nov 2022 08:43:56 +0000

ស្ត្រីឡូយឆាយវ័យក្មេង ឈ្មោះ ឡេង ចាន់បុប្ឆា អាយុ ២៣ ឆ្នាំ មុខរបរជាអាជីវករ ដែលកំពុងជាប់ឃុំខ្លួននៅពន្ធនាគារពាក់ព័ន្ធនឹងសំណុំរឿងព្រហ្មទណ្ឌមួយចំនួនត្រូវបានបញ្ជូនមកកាន់អយ្យការអមសាលាដំបូងរាជធានីភ្នំពេញដើម្បីធ្វើការសាកសួរក្នុងនាមជាដើមបណ្ដឹងវិញ។

ព្រះរាជអាជ្ញារងអមសាលាដំបូងរាជធានីបានបង្គាប់ឲ្យអនុរក្សពន្ធនាគារម២ បញ្ជូនស្ត្រីឈ្មោះ ឡេង ចាន់បុប្ផាមកកាន់អយ្យការដើម្បីធ្វើការសាកសួរក្នុងនាមជាដើមបណ្ដឹងដែលបានប្ដឹងបុរសឈ្មោះ ផាន ចាន់ថា អាយុ២៩ឆ្នាំ ពីបទបរិហាកេរ្ត៍តាមបណ្ដាញសង្គមហ្វេសប៊ុក។

ចំពោះអង្គហេតុពិតនៃបណ្ដឹងបរិហាកេរ្ត៍នេះ មិនត្រូវបានបែកធ្លាយជាសាធារណៈទេ ដោយសារសំណុំរឿងស្ថិតនៅក្នុងការស៊ើបសួរបឋមរបស់តំណាងអយ្យការនៅឡើយ។

ស្ត្រីត្រូវចោទឈ្មោះ ឡេង ចាន់បុប្ផា ត្រូវបានសមត្ថកិច្ចចាប់ខ្លួនបញ្ជូននៅខណ្ឌទួលគោក ហើយបញ្ជូនមកតុលាការនៅថ្ងៃទី ២១ ខែតុលា ឆ្នាំ ២០២២ ពាក់ព័ន្ធនឹងករណីមិនបំពេញកាតព្វកិច្ចចំពោះឧបករណ៍អាចជួញដូរបាន (ចេញសែកស្អុយ) ២ សន្លឹកមានទឹកប្រាក់ជិត ៦ ម៉ឺនដុល្លារអាមេរិក ដោយខ្ចីប្រាក់គេយកទៅប្រើប្រាស់ពេលសងវិញចេញសែក២ សន្លឹកប្រព្រឹត្តនៅរាជធានីភ្នំពេញអំឡុងខែសីហា ឆ្នាំ ២០២២។

ក្រោយចៅក្រមសម្រេចឃុំខ្លួនស្ត្រីឈ្មោះ ឡេង ចាន់បុប្ផាដាក់ពន្ធនាគារ ស្រាប់តែឮថា ជនជាប់ចោទរូបនេះជាប់ពាក់ព័ន្ធនឹងសំណុំរឿងព្រហ្មទណ្ឌមួយចំនួនទៀតនៅអយ្យការអមតុលាការដោយកាលពីដើមខែនេះលោក សាយ ណូរ៉ា ព្រះរាជអាជ្ញារងអមសាលាដំបូងបានបង្គាប់ឲ្យនាំខ្លួនមកដើម្បីធ្វើការសាកសួរសំណុំរឿងព្រហ្មទណ្ឌមួយរួចទៅហើយ។

ស្រាប់តែថ្ងៃនេះ កញ្ញា សុង ឆវ័ន្ត ព្រះរាជអាជ្ញារងអមសសលាដំបូងបានបង្គាប់អោយនាំ ឡេង ចាន់បុប្ផាមកសាកសួរនូវសំណុំរឿងមួយថ្មីទៀត ប៉ុន្តែម្ដងនេះជនជាប់ចោទប្ដឹងម្ចាស់បំណុលវិញម្ដង។ មិនដឹងថាម្ចាស់បំណុលដែលមានវ័យប្រហាក់ប្រហែលគ្នាធ្វើអ្វីឲ្យកូនបំណុលអាក់អន់ស្រពន់ចិត្តបានជាត្រូវបង្ខំចិត្តប្ដឹង៕

អត្ថបទ៖មករា

The post អាជីវករដែលចេញសែកស្អុយទឹកប្រាក់ជិត ៦ ម៉ឺនដុល្លារប្ដឹងដើមចោទវិញពីបទបរិហាកេរ្ដិ៍ appeared first on Kampuchea Thmey Daily.

តុលាការភ្នំពេញ Archives - Kampuchea Thmey Daily

តុលាការ​ចេញដីកាចាប់​ខ្លួន​មេតុងទីន​ម្នាក់ ពី​បទ​ឆបោក​លុយ​ជិត​១លាន​ដុល្លារ

ចាប់ឃុំខ្លួនស្ត្រីម្នាក់ តាមអំណាចសាលក្រមតុលាការ

ចាប់ខ្លួន​មេ​តុងទីន​ម្នាក់​បញ្ជូន​ទៅ​តុលាការ ករណីឆបោក និង​ចាយ​សែក​ស្អុយ​រាប់​សិប​ម៉ឺន​ដុល្លារ​អាមេរិក

ចាប់ខ្លួនអ្នកចេញសែកអត់លុយ បញ្ជូនឡើងតុលាការ

សាលាឧទ្ធរណ៍​តម្កល់​សាលដីកា​ឲ្យ​អតីត​ផ្កាយ​២ សូ​យ ចាន់​សឿន អោយមាន​ទោស​ដដែល

អាជីវករដែលចេញសែកស្អុយទឹកប្រាក់ជិត ៦ ម៉ឺនដុល្លារប្ដឹងដើមចោទវិញពីបទបរិហាកេរ្ដិ៍

តុលាការចេញដីកាចាប់ខ្លួនមេតុងទីនម្នាក់ ពីបទឆបោកលុយជិត១លានដុល្លារ

ចាប់ខ្លួនមេតុងទីនម្នាក់បញ្ជូនទៅតុលាការ ករណីឆបោក និងចាយសែកស្អុយរាប់សិបម៉ឺនដុល្លារអាមេរិក

សាលាឧទ្ធរណ៍តម្កល់សាលដីកាឲ្យអតីតផ្កាយ២ សូយ ចាន់សឿន អោយមានទោសដដែល