ឧបនាយករដ្ឋមន្ត្រី កើត រិទ្ធ ថាសំណងរាប់លានដុល្លារមិនស្មើអាយុជីវិតមនុស្សទេតែនេះជា «យុត្តិធម៌ក្នុងយុគសម័យនៃពិភពលោកបច្ចុប្បន្ន»

លោកឧបនាយករដ្ឋមន្ត្រី រដ្ឋមន្ត្រីយុត្តិធម៌ កើត រិទ្ធ បានលើកឡើងពាក់ព័ន្ធការកាត់ទោសឧក្រិដ្ឋជន ស្រី ស៊ីណា ថាជាប្រវត្តិសាស្រ្តមួយក្នុងវិស័យយុត្តិធម៌កម្ពុជា។ លោកថាថ្វីត្បិតតែសំណង ១លានដុល្លាក្នុងមួយគ្រួសារមិនអាចដោះដូរនឹងតម្លៃអាយុជីវិតមនុស្សទេតែនេះជាអ្វីដែល «យុត្តិធម៌ក្នុងយុគសម័យនៃពិភពលោកបច្ចុប្បន្ន»។

លោកឧបនាយករដ្ឋមន្ត្រី កើត រិទ្ធ បានសរសេរនៅលើហ្វេសបុកផ្ទាល់ខ្លួនលោកនៅព្រឹកថ្ងៃទី២៥ ខែធ្នូ ឆ្នាំ២០២៤នេះ បានអរគុណ និងកោតសរសើរចំពោះសាលាដំបូងរាជធានីភ្នំពេញ ដែលបានកាត់ទោសឧក្រិដ្ឋជន ស្រី ស៊ីណា ដោយត្រឹមត្រូវ និងម៉ឺងម៉ាត់ ដើម្បីរកយុត្តិធម៌ដល់ជនរងគ្រោះទាំងឡាយ។

ចំពោះការសម្រេចសេចក្ដីឱ្យទណ្ឌិត ស្រី ស៊ីណា ផ្ដល់សំណងជំងឺចិត្តដល់គ្រួសារអ្នករងគ្រោះដែលបានស្លាប់បាត់បង់ជីវិតចំនួន ១ លានដុល្លារ ក្នុងមួយគ្រួសារ លោកឧបនាយករដ្ឋមន្ត្រីយល់ថា ទោះបីជាលុយមិនអាចដោះដូរនឹងតម្លៃនៃអាយុជីវិតរបស់យុវជនទាំងពីររូបឡើយ ប៉ុន្តែនេះជាអ្វីដែលហៅថា «យុត្តិធម៌ក្នុងយុគសម័យនៃពិភពលោកបច្ចុប្បន្ន»។

លោកសរសេរថា៖ «អាចធ្វើបាន ដើម្បីជាសំណងជំងឺចិត្តដល់គ្រួសារជនរងគ្រោះ និង អ្នករងគ្រោះ បន្ថែមពីលើអ្វីដែលជាការផ្តន្តាទោសដាក់ពន្ធនាគារ។ ផ្អែកតាម «គោលការណ៍សមទណ្ឌោ”, ផ្នែកនៃការសម្រេចអំពីសំណងនេះ គឺ សក្តិសមជាទីបំផុតសម្រាប់ឧកញ៉ាមានលុយ ដែលក្អេងក្អាងប្រមាថជីវិតអ្នកដទៃ និង បានប្រព្រឹត្តអំពើឃាតកម្មដ៏ឃោរឃៅបែបនេះ។ ខ្ញុំសូមបញ្ជាក់ជូនថា “គោលការណ៍សមទណ្ឌោ” នេះ ជាគោលការណ៍មួយនៅក្នុង ពាក្យសច្ចាប្រណិធានដែលចៅក្រមទាំងអស់ ត្រូវស្បថមុនចូលកាន់តំណែង»។

លោកក៏នឹងតាមដានអំពីការអនុវត្តសំណងចំពោះជនរងគ្រោះនៅក្នុងសំណុំរឿងនេះដែរ ជាមួយនឹងការបន្តតាមដានការអនុវត្តច្បាប់ចំពោះករណីនេះមិនត្រឹមតែត្រឹមនៅសាលាជម្រះក្តីជាន់ខ្ពស់ ក្នុងករណីមានបណ្តឹងតវ៉ានឹងសាលក្រមនោះទេ ប៉ុន្តែនឹងបន្តតាមដាននៅពេលអនុវត្តទោសក្នុងពន្ធនាគាររបស់ទណ្ឌិត ពិសេសគឺអ្វីដែលលោកបានលើកឡើងក្នុងសន្និសីទសារព័ត៌មានលើករណីនេះនាពេលកន្លងទៅថា នឹងដាក់ឈ្មោះឧក្រិដ្ឋជនសាហាវឃោរឃៅ ស្រី ស៊ីណា ក្នុងបញ្ជីខ្មៅ ដែលនឹងមិនត្រូវទទួលបាននូវការបន្ធូរបន្ថយទោស ឬលើកលែងទោសឡើយ។

គួរឱ្យដឹងដែរថាសាលាដំបូងរាជធានីភ្នំពេញកាលពីថ្ងៃទី២៣ ខែធ្នូ ឆ្នាំ២០២៤ បានសម្រេច​ផ្ដន្ទាទោសឧក្រិដ្ឋជន ស្រី ស៊ីណា អាយុ៥១ឆ្នាំឱ្យជាប់គុក៣១ឆ្នាំ និងបង្គាប់ឱ្យសងសំណងជូនគ្រួសារជនរងគ្រោះដែលស្លាប់២នាក់ក្នុងមួយគ្រួសារ១លានដុល្លារ និងសំណងចំនួន៥០ម៉ឺនដុល្លារដល់អ្នករងរបួសចំនួន២នាក់៕

អត្ថបទដោយ ហ៊ុន សិរីវឌ្ឍន៍