លោក កែវ ឈា តំណាងអចិន្ត្រៃយ៍កម្ពុជាប្រចាំអង្គការសហប្រជាជាតិ បានបញ្ជាក់ពី​ការព្រួយបារម្ភយ៉ាងខ្លាំងរបស់កម្ពុជាចំពោះការកើនឡើងគួរឱ្យតក់ស្លុត​នៃការរំលោភបំពានយ៉ាងធ្ងន់ធ្ងរទៅលើ​កុមារក្នុងជម្លោះប្រដាប់អាវុធ ហើយក្នុងន័យនេះ កម្ពុជាអំពាវនាវឱ្យមានការអនុវត្តឱ្យបាន​ពេញលេញនៃកាតព្វកិច្ចផ្លូវច្បាប់អន្តរជាតិ ដើម្បីការពារកុមារក្នុងជម្លោះប្រដាប់អាវុធ។

ថ្លែងក្នុងកិច្ចពិភាក្សាបើកចំហរបស់ក្រុមប្រឹក្សាសន្តិសុខអង្គការសហប្រជាជាតិ ​ស្តីពីកុមារ និងជម្លោះប្រដាប់អាវុធ កាលពីថ្ងៃទី២៥ ខែមិថុនា ឆ្នាំ២០២៦ លោក ក៏បានរាយការណ៍ពីស្ថានភាពនៅកម្ពុជា ដែលមានកុមារជាង៦ ៤០០នាក់ នៅតែបន្តភៀសសឹក ដោយសារភាពតានតឹងនៅតាមបណ្ដោយព្រំដែនរវាងកម្ពុជា-ថៃ។

លោក បានគូសបញ្ជាក់ពីសារៈសំខាន់នៃការការពារ ការអប់រំ រួមទាំងតាមរយៈគំនិតផ្តួចផ្តើមដូចជាសាលារៀនបណ្ដោះអាសន្ននៅជំរំ របស់កម្ពុជា ដែលរៀបចំសម្រាប់កុមារភៀសសឹក​ និងសារៈសំខាន់នៃការធានាឱ្យបាននូវជំនួយមនុស្សធម៌ដែលយកចិត្តទុកដាក់ចំពោះកុមារ ដែលផ្តល់ជូនកុមារ​រងផលប៉ះពាល់។

លោក កែវ ឈា ក៏បានបញ្ជាក់ផងដែរថា កម្ពុជានៅតែប្តេជ្ញាធ្វើការជាមួយដៃគូទាំងអស់ ដើម្បីធានាថាកុមារគ្រប់រូបអាចរស់នៅសិក្សា និងរីកចម្រើន ដោយគ្មានអំពើហិង្សា និងការភ័យខ្លាច៕

The post កម្ពុជាគូសបញ្ជាក់ពីតម្លៃរបស់ច្បាប់អន្តរជាតិ ដោយជំរុញឱ្យមានការអនុវត្តពេញលេញ ដើម្បីធានាសន្តិភាពសកល appeared first on Kampuchea Thmey Daily.

ថ្លែងក្នុងមហាសន្និបាតអង្គការសហប្រជាជាតិនាបុរីញូយ៉ក កាលពីថ្ងៃទី២៤ ខែមិថុនា ឆ្នាំ២០២៦ លោក កែវ ឈា តំណាងអចិន្ត្រៃយ៍កម្ពុជា បានមានប្រសាសន៍ថា កម្ពុជានៅតែប្តេជ្ញាចិត្តយ៉ាងមុតមាំក្នុងការសម្រេចឱ្យបាននូវគោលដៅនៃការចាកចេញនេះដោយរលូន និងប្រកបដោយចីរភាព។

ដើម្បីសម្រេចគោលដៅនេះ លោក បានគូសបញ្ជាក់​ថា ​រាជរដ្ឋាភិបាល​កម្ពុជាបានដាក់ចេញនូវយន្តការ និងគោលនយោបាយ​ជាតិ ដើម្បីគាំទ្រដល់អន្តរកាល​នេះ រួមទាំងការបង្កើតឡើងគណៈកម្មាធិការជាតិសម្រាប់ការត្រៀមចាកចេញរបស់កម្ពុជាពីចំណាត់ក្រុមប្រទេសអភិវឌ្ឍន៍តិចតួច។

លោកក៏បានអំពាវនាវឱ្យ​មាន​សាមគ្គីភាពអន្ដរជាតិជាថ្មី និងភាពជាដៃគូកាន់តែរឹងមាំ ពិសេសចំពោះ​ហិរញ្ញប្បទានសម្រាប់ការអភិវឌ្ឍ​ ការផ្ទេរបច្ចេកវិទ្យា ការកសាង​សមត្ថភាព ភាពធន់​នឹង​អាកាសធាតុ និងការគាំទ្រដល់អន្តរកាលដោយរលូន។

គួរជម្រាបថា កម្ពុជាបានត្រៀមខ្លួនក្នុងការបោះជំហានចេញពីប្រទេសអភិវឌ្ឍតិចតូច (LDC) ទៅជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០ បន្ទាប់ពី​អង្គការសហប្រជាជាតិបានអនុម័តជាឯកច្ឆ័ន កាលពីចុងឆ្នាំ២០២៤ ដោយសម្រេចឱ្យកម្ពុជាចាប់ផ្តើមចាកចេញជាផ្លូវការពីចំណាត់ក្រុមប្រទេសអភិវឌ្ឍន៍តិចតួច ក្នុងអំឡុងពេល៥ឆ្នាំ។

ការចាកចេញពីក្រុមប្រទេសក្រីក្រនេះមិនត្រឹមតែជាសមិទ្ធផលជាតិប៉ុណ្ណោះទេ តែថែមទាំងជាតំណាងឱ្យភាពជោគជ័យរួមនៃសាមគ្គីភាព និងភាពជាដៃគូសកលដូចបានចារឹកទុកនៅក្នុងរបៀបវារៈឆ្នាំ២០៣០ សម្រាប់ការអភិវឌ្ឍន៍ប្រកបដោយចីរភាព។ មិនត្រឹមតែប៉ុណ្ណោះ ការចាកចេញនេះ ក៏បានឆ្លុះបញ្ចាំងឱ្យឃើញពីឯករាជ្យភាពរបស់កម្ពុជាក្នុងការកសាងប្រទេស តាមរយៈការធ្វើពិពិធកម្មសេដ្ឋកិច្ចដ៏រឹងមាំ ការពង្រឹងសមត្ថភាពស្ថាប័ន ការពង្រឹងធនធានមនុស្ស និងការចូលរួមកាន់តែស៊ីជម្រៅជាមួយភាពជាដៃគូក្នុងតំបន់ និងពិភពលោក៕

ដោយ៖ ធឿន វ៉ាន់សុង

The post កម្ពុជាបេ្តជ្ញាចិត្តសម្រេចឱ្យបានគោលដៅចាកចេញពីក្រុមប្រទេសក្រីក្រត្រឹមឆ្នាំ២០២៩ appeared first on Kampuchea Thmey Daily.

ថ្លែងនៅក្នុងកិច្ចប្រជុំរបស់ក្រុមប្រឹក្សាសន្តិសុខអង្គការសហប្រជាជាតិស្ដីពីការបំពេញចន្លោះខ្វះខាតក្នុងការអនុវត្តនូវសេចក្ដីសម្រេចចិត្តរបស់ក្រុមប្រឹក្សាសន្តិសុខ កាលពីថ្ងៃទី២៣ ខែមិថុនា ឆ្នាំ២០២៦ លោក កែវ ឈា តំណាងអចិន្ត្រៃយ៍កម្ពុជាប្រចាំអង្គការសហប្រជាជាតិ បាននិយាយថា សេចក្តីសម្រេចចិត្តរបស់ក្រុមប្រឹក្សាសន្តិសុខដើរតួនាទីយ៉ាងសំខាន់​ក្នុងការទប់ស្កាត់ និងការកាត់បន្ថយភាពតានតឹងនៃជម្លោះ ហើយឈានឆ្ពោះទៅរកការដោះស្រាយជម្លោះ​ដោយសន្តិវិធី។

ក្នុងន័យនេះ លោក សង្កត់ធ្ងន់ថា រដ្ឋសមាជិកទាំងអស់ត្រូវតែអនុវត្តឱ្យបាន​ពេញលេញចំពោះសេចក្តីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិ។

ដូចគ្នានឹងសេចក្តីសម្រេចចិត្តរបស់ក្រុមប្រឹក្សាសន្តិសុខ លោក កែវ ឈា បានគូសបញ្ជាក់ពីសារៈសំខាន់នៃច្បាប់អន្តរជាតិ ជាពិសេសសាលដីការបស់តុលាការយុត្តិធម៌អន្តរជាតិ។ លោក បញ្ជាក់ថា សាលដីការបស់តុលាការយុត្តិធម៌អន្តរជាតិដែលមានអនុភាពគតិយុត្តិ​ គឺមិនត្រូវរងការ​រំលោភបំពានបានឡើយ ទោះក្រោមលេស​ណាមួយក៏ដោយ៕

The post កម្ពុជាជំរុញឱ្យមានការអនុវត្តពេញលេញចំពោះសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ appeared first on Kampuchea Thmey Daily.

ក្នុង​​សេចក្តីថ្លែងការណ៍នៅឯកិច្ចប្រជុំនោះ លោក បានគូសបញ្ជាក់​ពីកិច្ចខិតខំប្រឹងប្រែងឥតឈប់ឈររបស់រាជរដ្ឋាភិបាលកម្ពុជា ក្នុងការវិនិយោគលើយុវជន ដែលកម្ពុជាចាត់ទុកថា គឺជាការវិនិយោគលើសន្តិភាព។ តាមការគូសបញ្ជាក់បន្ថែមរបស់លោក កែវ ឈា ប្រជាជន​កម្ពុជាជាង ៦០% មាន​អាយុតិចជាង ៣០ឆ្នាំ ហើយរាជ​រដ្ឋាភិបាលកម្ពុជាកំពុងដាក់​ការ​អប់រំស្តីពី​សន្តិភាព និងសីលធម៌ ទៅ​ក្នុង​កម្មវិធី​សិក្សា​ជាតិ។

តំណាងកម្ពុជា បានសង្កត់ធ្ងន់ថា សន្តិភាពទាមទារឱ្យមានការច្របាច់​បញ្ចូលគ្នារវាង​សេដ្ឋកិច្ច និងសាមគ្គីភាពសង្គម ហើយការពង្រឹងកិច្ចសហប្រតិបត្តិការអន្តរជាតិ និងភាពជាដៃគូរវាងរដ្ឋាភិបាល និងប្រព័ន្ធអង្គការសហប្រជាជាតិ នៅតែជាកត្តាដ៏មានសារៈសំខាន់ផងដែរ៕

The post កម្ពុជា​ចាត់​ទុក​ការ​វិនិយោគ​លើ​យុវជន ​ជា​ការ​វិនិយោគ​លើ​សន្តិភាព appeared first on Kampuchea Thmey Daily.

ក្នុងសេចក្ដីថ្លែងការណ៍របស់លោក កែវ ឈា បានគូសបញ្ជាក់ថា រាជរដ្ឋាភិបាលកម្ពុជាបានខិតខំប្រឹងប្រែងយ៉ាងសកម្មក្នុងការជំរុញរបៀបវារៈស្ត្រី សន្តិភាព និងសន្តិសុខ ទាំងនៅកម្រិតថ្នាក់ជាតិ តំបន់ និងពិភពលោក។

ក្នុងន័យនេះ លោក បានសង្កត់ធ្ងន់ពីការចូលរួមរបស់កម្ពុជាជាមួយសហគមន៍អន្តរជាតិ តាមរយៈការបញ្ជូនកងកម្លាំងរក្សាសន្តិភាពជាង១ម៉ឺននាក់ ដែលក្នុងនោះមានកម្លាំងរក្សាសន្តិភាពស្ត្រីជាង១ពាន់នាក់ បានទៅបំពេញបេសកកម្មថែរក្សាសន្តិភាពនៅ១២ប្រទេស ទូទាំងពិភពលោក ក្រោមឆត្រអង្គការសហប្រជាជាតិ។

កម្ពុជាត្រូវបានទទួលស្គាល់លើឆាកអន្តរជាតិ ជាប្រទេសដែលបានបញ្ជូនកងកម្លាំងរក្សាសន្តិភាពជាស្ត្រី ក្រោមឆត្រអង្គការសហប្រជាជាតិ សម្រាប់បេសកកម្មថែរក្សាសន្តិភាពនៅតាមប្រទេសនានា ពោលគឺប្រមាណ១០លើកមកហើយ។ កម្ពុជាបានប្ដេជ្ញាចិត្តក្នុងការលើកកម្ពស់ការចូលរួមរបស់ស្ត្រីក្នុងប្រតិបត្តិការរក្សាសន្តិភាព ដោយរាជរដ្ឋាភិបាល បានដាក់ចេញកម្មវិធីនយោបាយជាអាទិភាពក្នុងការបន្តចូលរួមបេសកកម្មរក្សាសន្តិភាពនៅក្នុងក្របខណ្ឌអង្គការសហប្រជាជាតិ ដើម្បីរួមចំណែកជាមួយសហគមន៍អន្តរជាតិ ស្វែងរកសន្តិភាពដល់ប្រជាជនកំពុងតែរងគ្រោះរងទុក្ខលំបាក ដោយសារសង្គ្រាមនៅប្រទេសដទៃនៅលើពិភពលោក។ 

កម្ពុជា គឺជារដ្ឋសមាជិកអាស៊ានឈានមុខគេមួយ ដែលត្រូវបានទទួលស្គាល់ថា បានបង្កើនការចល័តកម្លាំងជាស្រ្តីទៅក្នុងប្រតិបត្តិការថែរក្សាសន្តិភាពរបស់អង្គការសហប្រជាជាតិច្រើនជាងគេ៕

The post លោក កែវ ឈា បញ្ជាក់ទៅក្រុមប្រឹក្សាសន្តិសុខថា កម្ពុជាប្ដេជ្ញាចិត្តបន្តជំរុញតួនាទីស្ត្រីក្នុងការរក្សាសន្តិភាព appeared first on Kampuchea Thmey Daily.

លោក កែវ ឈា បាននិយាយថា ដោយសារប្រទេសថៃបានលុបចោលជាឯកតោភាគីនូវអនុស្សរណៈនៃការយោគយល់គ្នាឆ្នាំ២០០១ (MoU 2001) ដែលជាឧបករណ៍គតិយុត្តិទ្វេភាគីតែមួយគត់សម្រាប់ប្រើជាមូលដ្ឋាននៃការដោះស្រាយតំបន់ត្រួតស៊ីគ្នាលើព្រំដែនសមុទ្ររបស់ប្រទេសកម្ពុជា និងប្រទេសថៃ ទើបកម្ពុជាមិនមានជម្រើសណា ក្រៅពីចាប់ផ្តើមដំណើរការផ្សះផ្សារដោយបង្ខំ ក្រោមអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS)។

ដោយឡែក ក្នុងការឆ្លើយតបទៅនឹងការលើកឡើងរបស់តំណាងថៃ ដែលថា កម្ពុជាមិនចាប់យកនូវការចរចាទ្វេភាគី ហើយបែរជាធ្វើអន្តរជាតិវូបនីយកម្មនៃជម្លោះទ្វេភាគី លោក យោង ចាន់សុភារ តំណាងអចិន្ត្រៃយ៍រងរបស់កម្ពុជា បានបញ្ជាក់នៅក្នុងកិច្ចប្រជុំដដែលនោះថា ថៃមិនបានធ្វើនូវអ្វីដូចដែលខ្លួនបានលើកឡើងនោះទេ។

តំណាងអចិន្ត្រៃយ៍រង បានប្រាប់ទៅអង្គប្រជុំថា ថៃបានលើកពីលេសរាប់សិប ដើម្បីបដិសេធការស្នើកោះប្រជុំចរចាទ្វេភាគីក្រោមក្របខ័ណ្ឌអនុស្សរណៈនៃការយោគយល់គ្នា។ ផ្ទុយទៅវិញថៃលុបចោលអនុស្សរណៈឆ្នាំ២០០១ ជាឯកតោភាគី ហើយថែមទាំងប្រើកម្លាំងទ័ពរំលោភលើដែនអធិបតេយ្យភាពកម្ពុជាតែម្តង។

លោក យោង ចាន់សុភារ បានបញ្ជាក់ថា ខណៈកម្ពុជាប្រកាន់ខ្ជាប់នូវការដោះស្រាយជម្លោះដោយសន្តិវិធីជាមួយប្រទេសជិតខាងទាំងអស់ កម្ពុជាជ្រើសរើសដំណើរការផ្សះផ្សារដោយបង្ខំនេះ គឺដើម្បីធានានូវការការពារ និងការគោរពអធិបតេយ្យ និងសិទ្ធិដែនសមុទ្ររបស់កម្ពុជា។

គួរជម្រាបថា កិច្ចប្រជុំខាងលើ បានប្រព្រឹត្តទៅពីថ្ងៃ១៥ ដល់ថ្ងៃទី១៨ មិថុនា ឆ្នាំ២០២៦ នៅទីស្នាក់ការកណ្ដាលអង្គការសហប្រជាជាតិ ទីក្រុងញូវយ៉ក ដោយមានការចូលរួមពី១៧១ប្រទេស និងអង្គការតំបន់មួយ ដែលជាសមាជិកនៃអនុសញ្ញាស្តីពីច្បាប់សមុទ្រ UNCLOS៕

The post កម្ពុជាប្រាប់រដ្ឋភាគី UNCLOS ពីមូលហេតុដែលខ្លួនរើសយកការផ្សះផ្សារដោយបង្ខំ ក្នុងដំណោះស្រាយជម្លោះដែនសមុទ្រជាមួយថៃ appeared first on Kampuchea Thmey Daily.

ក្នុងសេចក្ដីថ្លែងការណ៍នៅក្នុងកិច្ចប្រជុំបើកចំហររបស់ក្រុមប្រឹក្សាសន្តិសុខអង្គការសហប្រជាជាតិ កាលពីរសៀលថ្ងៃទី២១ ខែឧសភា លោក កែវ ឈា បានរៀបរាប់ប្រាប់តំណាងប្រទេសឯទៀតឱ្យដឹងថា សង្គ្រាមឈ្លានពានរបស់ថៃ ទាំងពីរលើក កាលពីខែកក្កដា និងខែធ្នូ ឆ្នាំ២០២៥ បានបង្កផលវិបាកមនុស្សធម៌យ៉ាងធ្ងន់ធ្ងរ ក្នុងនោះជនស៊ីវិលកម្ពុជាប្រមាណ ៦៤៩ ០០០នាក់បានរត់ភៀសសឹក ហេដ្ឋារចនាសម្ព័ន្ធស៊ីវីលជាច្រើន ត្រូវបានបំផ្លិចបំផ្លាញ ហើយប្រាសាទព្រះវិហារ ដែលជាបេតិកភណ្ឌពិភពលោករបស់អង្គការយូណេស្កូ ក៏ត្រូវបានរងការខូចខាតយ៉ាងធ្ងន់ធ្ងរផងដែរ។

អំពើឈ្លានពានបែបនេះ លោក ថា ជាការរំលោភបំពានយ៉ាងធ្ងន់ធ្ងរចំពោះច្បាប់មនុស្សធម៌អន្តរជាតិ ហើយខណៈដែលលោកក៏បានកត់សម្គាល់ឃើញថា ការរំលោភលើច្បាប់មនុស្សធម៌អន្តរជាតិនេះនៅតែបន្តកើតមាននៅតាមតំបន់ជាច្រើន មិនមែនតែនៅក្នុងប្រទេសកម្ពុជានោះទេ។

ក្នុងន័យនេះ តំណាងកម្ពុជាបានសង្កត់ធ្ងន់អំពីគោលការណ៍ និងសារៈសំខាន់នៃការគោរពច្បាប់មនុស្សធម៌អន្តរជាតិ និងកិច្ចការពារជនស៊ីវីលនៅក្នុងគ្រប់ជម្លោះប្រដាប់អាវុធ។

គួរជម្រាបថា ក្នុងជម្លោះព្រំដែនកម្ពុជា-ថៃ កន្លងមក បានបង្កើតឱ្យមានពលរដ្ឋភៀសសឹកជាង៦សែន៤ម៉ឺននាក់ ត្រូវបង្ខំឱ្យចាកចេញពីផ្ទះសម្បែង ប៉ុន្តែក្រោយមានបទឈប់បាញ់ ពលរដ្ឋជិត៦សែន២ម៉ឺននាក់ បានវិលត្រឡប់ទៅលំនៅឋានវិញ។ គិតត្រឹមថ្ងៃទី២១ ខែឧសភា ឆ្នាំ២០២៦ នៅមានជនភៀសសឹកកម្ពុជាប្រមាណ ៣០ ៩៣៤នាក់ទៀត ពុំទាន់អាចវិលទៅលំនៅឋានវិញ ដោយសារកងកម្លាំងថៃបានរាយបន្លាលួស ដាក់ទូកុងតឺន័រ កាន់កាន់ផ្នែកខ្លះនៃភូមិឋានរបស់ពួកគាត់៕

ដោយ៖ ធឿន វ៉ាន់សុង

The post តំណាងកម្ពុជាប្រើវេទិកាអន្តរជាតិលើកឡើងជាថ្មីពីការឈ្លានពានរបស់ថៃដែលបានបង្កផលប៉ះពាល់លើជនស៊ីវិល appeared first on Kampuchea Thmey Daily.

លោក កែវ ឈា តំណាងអចិន្ត្រៃយ៍កម្ពុជាប្រចាំអង្គការសហប្រជាជាតិបានរាយការណ៍ពីការបាត់បង់ជីវិតរបស់ជនស៊ីវិល និងការខូចខាតហេដ្ឋារចនាសម្ព័ន្ធស៊ីវិលកម្ពុជា ដែលបណ្តាលមកពីអំពើឈ្លានពានរបស់យោធាថៃ ខណៈការបាញ់ផ្លោង និងការវាយប្រហារតាមអាកាសរបស់យោធាថៃកាន់តែខ្លាំងឡើង រហូតដល់ ៩០គីឡូម៉ែត្រ មកក្នុងតំបន់ជនស៊ីវិលកម្ពុជារស់នៅ ដែលលោក កែវ ឈា គូសបញ្ជាក់ថា គឺជាទង្វើឈ្លានពានយ៉ាងជាក់ច្បាស់ មិនមែនជាជម្លោះព្រំដែន ហើយក៏មិនមែនជាការការពារខ្លួននោះដែរ។

ការលើកឡើងរបស់តំណាងអចិន្ត្រៃយ៍កម្ពុជា បានធ្វើឡើងតាមរយៈសេចក្ដីថ្លែងការណ៍នៅថ្ងៃទី១៥ ខែធ្នូ ឆ្នាំ២០២៥ ក្នុងកិច្ចពិភាក្សាបើកចំហប្រចាំខែរបស់ក្រុមប្រឹក្សាសន្តិសុខអង្គការសហប្រជាជាតិស្តីពីភាពជាអ្នកដឹកនាំដើម្បីសន្តិភាព នៅទីស្នាក់ការកណ្តាល UN ក្នុងទីក្រុងញូវយ៉ក។

ស្របនឹងប្រធានបទនៃកិច្ចប្រជុំខាងលើរបស់ក្រុមប្រឹក្សាសន្តិសុខអង្គការសហប្រជាជាតិ តំណាងអចិន្ត្រៃយ៍កម្ពុជា បានលើកឡើងពីការគាំទ្ររបស់កម្ពុជាចំពោះការពង្រឹងភាពជាអ្នកដឹកនាំដើម្បីសន្តិភាព ក្នុងកាលៈទេសៈដែលកម្ពុជាកំពុងទទួលរងការឈ្លានពានពីប្រទេសថៃ។

តំណាងកម្ពុជា បានសង្កត់ធ្ងន់ថា ប្រទេសថៃតែងតែតាំងខ្លួនឯងថា ជាប្រទេសស្រឡាញ់សន្តិភាព ប៉ុន្តែបែរជាបដិសេធនូវរាល់ដំណោះស្រាយដោយសន្តិវិធីទៅវិញ ដោយលោក គូសបញ្ជាក់ថា ថៃបានបដិសេធការដោះស្រាយជម្លោះតាមយន្តការតុលាការយុត្តិធម៌អន្តរជាតិ ប្រកាសផ្អាកកិច្ចព្រមព្រៀងសន្តិភាពទីក្រុងគូឡាឡាំពួរដោយឯកតោភាគី ប្រកាសបិទការចរចា បដិសេធរាល់បទឈប់បាញ់ និងបញ្ជាក់ពីចេតនារបស់ខ្លួនកាច់បំបាក់សមត្ថភាពយោធារបស់កម្ពុជា។

លោកក៏សង្កត់ធ្ងន់ទៅកាន់ក្រុមប្រឹក្សាសន្តិសុខអង្គការសហប្រជាជាតិពីបញ្ហាខាងលើ ដែលសបញ្ជាក់ពីតម្រូវការសម្រាប់ភាពជាអ្នកដឹកនាំដើម្បីសន្តិភាព ដែលផ្អែកលើច្បាប់អន្តរជាតិ។ ក្នុងន័យនេះ តំណាងកម្ពុជាអំពាវនាវដល់ក្រុមប្រឹក្សាសន្តិសុខអង្គការសហប្រជាជាតិ និងសហគមន៍អន្តរជាតិ ឱ្យការពារធម្មនុញ្ញ UN និងរម្លឹកថា ភាពស្ងៀមស្ងាត់ អាចនឹងធ្វើឱ្យមានសកម្មភាពឈ្លានពានកាន់តែខ្លាំងឡើង ហើយធ្វើឱ្យប៉ះពាល់ដល់ពហុភាគីនិយម៕

ដោយ៖ ធឿន វ៉ាន់សុង

The post កម្ពុជាទទូចដល់ក្រុមប្រឹក្សាសន្តិសុខ UN កុំព្រងើយកន្តើយចំពោះទង្វើឈ្លានពានរបស់ថៃលើកម្ពុជា appeared first on Kampuchea Thmey Daily.