ក្នុងចំណោមគោលដៅទេសចរណ៍ល្បីៗ «ទេទឹកពុះ» គឺជារមណីយដ្ឋានធម្មជាតិដ៏កម្រមួយ ដែលទាក់ទាញអារម្មណ៍ភ្ញៀវទេសចរជាច្រើន។ ទឹកក្តៅធម្មជាតិដែលពុះឡើងពីក្រោមដី បង្កើតជាផ្សែងស្រទន់ៗនៅកណ្ដាលព្រៃ ធ្វើឱ្យទីតាំងនេះមានសម្រស់ប្លែកភ្នែក និងពោរពេញដោយអាថ៌កំបាំងនៃធម្មជាតិ។

ក្រៅពីនេះ ខេត្តកំពង់ស្ពឺ ក៏ល្បីល្បាញខាងតំបន់ទឹកធ្លាក់ធម្មជាតិជាច្រើនផងដែរ។ ក្នុងនោះមាន ទឹកធ្លាក់ជ្រាវ ទឹកធ្លាក់ចំការក្រូច ទឹកធ្លាក់ចំការមៀន និងទឹកធ្លាក់អន្លង់ស្វាយ ដែលស្ថិតក្នុងភូមិសាស្ត្រស្រុកថ្ពង និងស្រុកទឹកផុស។ ទីតាំងទាំងនេះ មានទឹកហូរត្រជាក់ស្រាយ អមដោយព្រៃឈើខៀវស្រងាត់ ជាកន្លែងស័ក្តិសមសម្រាប់ការលេងទឹក បោះតង់ និងសម្រាកលំហែជាមួយក្រុមគ្រួសារ។

រីឯតំបន់ឧទ្យានជាតិព្រះសុរាម្រិតកុសមៈ (គិរីរម្យ) ក៏ជាគោលដៅដ៏ពេញនិយមមួយផងដែរ។ នៅទីនោះ មានទឹកធ្លាក់ឆៃយ៉ា ទឹកធ្លាក់ចំបក់ និងបឹងចំការតែ ដែលសុទ្ធតែមានសម្រស់ធម្មជាតិទាក់ទាញ ជាមួយអាកាសធាតុត្រជាក់ស្រួលពេញមួយឆ្នាំ។ ជាពិសេសនៅរដូវវស្សា ទឹកធ្លាក់ហូរខ្លាំង បង្កើតបានជាទេសភាពដ៏អស្ចារ្យ និងសំឡេងទឹកធ្លាក់លាន់ឮពេញព្រៃភ្នំ ធ្វើឱ្យភ្ញៀវមានអារម្មណ៍ស្រស់ស្រាយ និងជិតស្និទ្ធជាមួយធម្មជាតិ។

ដោយឡែក ទឹកធ្លាក់អូរគគី ដែលស្ថិតនៅភូមិ៦ ឃុំត្រែងត្រយឹង ស្រុកភ្នំស្រួច ក៏បានក្លាយជាទិសដៅទេសចរណ៍ទាក់ទាញថ្មីមួយផងដែរ។ កាលពីមុន ទីតាំងនេះជាតំបន់ស្ងាត់ជ្រងំ ដែលអ្នកដំណើរឆ្លងកាត់មិនសូវហ៊ានឈប់កម្សាន្តឡើយ ប៉ុន្តែបច្ចុប្បន្ន វាបានប្រែក្លាយជាកន្លែងទាក់ទាញភ្ញៀវជាច្រើន ដោយសារទេសភាពធម្មជាតិដ៏ស្រស់ស្អាត និងទឹកហូរថ្លាឈ្វេងដែលអាចលេងកម្សាន្តបានយ៉ាងរីករាយ។

ក្រៅពីតំបន់ទឹកធ្លាក់ ខ្នងផ្សារ ក៏ជាកន្លែងបោះតង់ដ៏ពេញនិយមសម្រាប់យុវវ័យ និងអ្នកចូលចិត្តដំណើរផ្សងព្រេងផងដែរ។ ទីតាំងនេះ មានទេសភាពភ្នំជួរបន្តបន្ទាប់ សមុទ្រអ័ព្ទ និងខ្យល់ត្រជាក់ពេញមួយឆ្នាំ។ ទេសចរជាច្រើន និយមឡើងទៅបោះតង់មើលថ្ងៃរះ និងស្រូបយកបរិយាកាសធម្មជាតិដ៏ស្ងប់ស្ងាត់ ដែលពិបាករកបាននៅតំបន់ទីក្រុង។

ដូច្នេះសម្រាប់អ្នកដែលចង់គេចចេញពីភាពអ៊ូអរ និងស្វែងរកខ្យល់អាកាសបរិសុទ្ធនារដូវកាលបៃតងនេះ ខេត្តកំពង់ស្ពឺ គឺជាជម្រើសដ៏ល្អបំផុតមួយ ដែលអាចផ្តល់ទាំងភាពស្រស់ស្រាយ ការផ្សងព្រេង និងអនុស្សាវរីយ៍ល្អៗជាមួយធម្មជាតិដ៏អស្ចារ្យរបស់កម្ពុជា៕

The post ប្លុកទេសចរណ៍ដ៏ទាក់ទាញ រដូវកាលទេសចរណ៍បៃតង នៃទឹកដីខេត្តកំពង់ស្ពឺ appeared first on Kampuchea Thmey Daily.

ការលើកឡើងនេះ ធ្វើឡើងក្នុងឱកាសដឹកនាំប្រតិភូចុះបំពេញបេសកកម្មការងារនៅខេត្តកំពត កាលពីរសៀលថ្ងៃទី២៤ ខែមិថុនា ឆ្នាំ២០២៦។

លោក ឡូយ សុផាត បានមានប្រសាសន៍ថា បន្ទាប់ពីបានស្តាប់របាយការណ៍របស់រដ្ឋបាលខេត្តកំពត និងពិភាក្សាលើវិស័យពាក់ព័ន្ធជាច្រើន រួមមានកសិកម្ម ជលផល រុក្ខាប្រមាញ់ បរិស្ថាន ធនធានទឹក អភិវឌ្ឍន៍ជនបទ និងការវិនិយោគ លោកមានការកោតសរសើរចំពោះកិច្ចសហការរវាងក្រុមប្រឹក្សាខេត្ត និងរដ្ឋបាលខេត្ត ដែលបានដឹកនាំអភិវឌ្ឍខេត្តកំពតឱ្យមានការរីកចម្រើនយ៉ាងឆាប់រហ័ស។

លោកបានបញ្ជាក់ថា ខេត្តកំពតបានក្លាយជាខេត្តគោលដៅទេសចរណ៍ដ៏សំខាន់មួយរបស់ប្រទេស និងមានកិត្តិស័ព្ទល្បីល្បាញលើវិស័យទេសចរណ៍ កសិកម្ម បរិស្ថាន និងឧស្សាហកម្ម ដែលបានទាក់ទាញទាំងភ្ញៀវទេសចរ និងអ្នកវិនិយោគជាច្រើន។

ក្នុងនាមជាគណៈកម្មការទី៣ នៃរដ្ឋសភា ដែលទទួលបន្ទុកលើវិស័យផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន ធនធានទឹក និងឧតុនិយម លោកបានលើកទឹកចិត្តឱ្យអាជ្ញាធរខេត្តបន្តភាពសកម្ម និងការច្នៃប្រឌិតក្នុងការគ្រប់គ្រង និងអភិវឌ្ឍធនធានដែលមានស្រាប់ ដើម្បីបង្កើនការងារ ប្រាក់ចំណូល និងលើកកម្ពស់ជីវភាពរស់នៅរបស់ប្រជាពលរដ្ឋ។

លោកបន្ថែមថា ខេត្តកំពតនៅមានសក្តានុពលជាច្រើនទៀតដែលមិនទាន់បានប្រើប្រាស់អស់ ជាពិសេសលើវិស័យកសិកម្ម ទេសចរណ៍ធម្មជាតិ ឧស្សាហកម្មកែច្នៃ និងសេដ្ឋកិច្ចបៃតង ដែលអាចក្លាយជាកម្លាំងជំរុញដ៏សំខាន់សម្រាប់កំណើនសេដ្ឋកិច្ចក្នុងពេលអនាគត និងចូលរួមសម្រេចគោលដៅអភិវឌ្ឍន៍កម្ពុជាឆ្នាំ២០៥០។

ហើយប្រតិភូគណៈកម្មការទី៣ នៃរដ្ឋសភា បានបង្ហាញការជឿជាក់ថា ជាមួយនឹងសក្តានុពលដ៏សម្បូរបែប ការរក្សាបាននូវសន្តិសុខ សណ្តាប់ធ្នាប់ល្អ និងការដឹកនាំប្រកបដោយប្រសិទ្ធភាព ខេត្តកំពតនឹងបន្តក្លាយជាប៉ូលសេដ្ឋកិច្ច និងគោលដៅវិនិយោគដ៏សំខាន់មួយនៅភាគនិរតីនៃប្រទេសនាពេលអនាគតដ៏ខ្លី។

បើតាមរបាយការណ៍ស្វាគមន៍របស់លោក ម៉ៅ ធនិន អភិបាលខេត្តកំពត បានឲ្យដឹងថា កំណើនវិស័យទេសចរណ៍បានដើរតួនាទីយ៉ាងសំខាន់ក្នុងការគាំទ្រដល់វិស័យផ្សេងៗ រួមទាំងកសិកម្ម ឧស្សាហកម្ម និងការវិនិយោគ ខណៈបច្ចុប្បន្នខេត្តមានគម្រោងវិនិយោគសរុបចំនួន ៥៦គម្រោង ដែលបាននិងកំពុងរួមចំណែកជំរុញកំណើនសេដ្ឋកិច្ច និងបង្កើតឱកាសការងារជូនប្រជាពលរដ្ឋ។

លោក ម៉ៅ ធនិន អភិបាលខេត្តកំពតក៏បានបញ្ជាក់ថា ទោះបីខេត្តមានការរីកចម្រើនយ៉ាងណាក៏ដោយ តម្រូវការទីផ្សារលើផលិតផលកសិកម្ម និងចំណីអាហារនៅតែមានការកើនឡើង ខណៈការផ្គត់ផ្គង់មួយចំនួន មិនទាន់ឆ្លើយតបបានគ្រប់គ្រាន់នៅឡើយ។​ ផលិតផលកសិកម្ម និងដំណាំហូបផ្លែមួយចំនួន ដូចជាដូង ទុរេន  និងផលិតផលផ្សេងៗ នៅតែត្រូវការការពង្រីកការផលិត ដើម្បីឆ្លើយតបទាំងទីផ្សារក្នុងស្រុក និងក្រៅស្រុក៕

អត្ថបទ៖ សឹង រ៉ាត់

The post គណៈកម្មការទី៣នៃរដ្ឋសភាជំរុញអាជ្ញាធរខេត្តកំពតឲ្យបន្តទាញយកសក្តានុពលដើម្បីជំរុញការអភិវឌ្ឍខេត្ត appeared first on Kampuchea Thmey Daily.

លោក ប៉ុក ទាំង ប្រធានមន្ទីរទេសចរណ៍ខេត្តកែបបានប្រាប់ឲ្យដឹងថា ក្នុងរយៈពេល ៥ខែដើមឆ្នាំ២០២៦ ខេត្តកែបបានទទួលភ្ញៀវជិត៩សែននាក់ ហើយក្នុងនោះសម្រាប់ខែឧសភាដែលស្ថិនក្នុងរដូវកាលបៃតង មានភ្ញៀវមកលេងជាង២២ម៉ឺននាក់។

លោក ប៉ុក ទាំង បន្តឲ្យដឹងថា ក្រោមការដឹកនាំប្រកបដោយភាពច្នៃប្រឌិតខ្ពស់របស់លោក សោម ពិសិដ្ឋ អភិបាលខេត្ត ខេត្តកែបមានការរីកចម្រើនលើកគ្រប់វិស័យ និងធានាបាននូវសន្តិសុខ សណ្តាប់ធ្នាប់សាធារណៈ និងសុវត្ថិភាពល្អនៅគ្រប់ទីកន្លែង អំណោយផលដល់ដំណើរកម្សាន្តរបស់ភ្ញៀវជាតិ និងអន្តរជាតិ។

ជាក់ស្តែងខេត្តកែបបច្ចុប្បន្ន មានគោលដៅទេសចរណ៍ និងកន្លែងទាក់ទាញទេសចរចំនួន៤២ កន្លែង ក្នុងនោះរមណីយដ្ឋានទេសចរណ៍វប្បធម៌ ៦កន្លែង រមណីយដ្ឋានទេសចរណ៍ធម្មជាតិ២៩ កន្លែង និងរមណីយដ្ឋានកែច្នៃ ៦កន្លែង ហើយបែងចែកជា៤ប៉ូល គឺទី១.ប៉ូលទេសចរណ៍ក្រុងធម្មជាតិកែប ទី២. ប៉ូលទេសចរណ៍ ឆ្នេរធម្មជាតិអង្កោល ទី៣. ប៉ូលទេសចរណ៍តំបន់ភ្នំវល្លិ៍ និងទី៤. ប៉ូលទេសចរណ៍តំបន់សមុទ្រ និងប្រជុំកោះ។

ប្រធានមន្ទីរទេសចរណ៍ខេត្តកែបបញ្ជាក់ថា សម្រាប់រយៈពេល ៥ខែដើមឆ្នាំ២០២៦ ខេត្តកែបបានទទួលទេសចរជិត៩សែននាក់ ក្នុងនោះភ្ញៀវបរទេសប្រមាណ១ម៉ឺន៣ពាន់នាក់។ ដោយឡែកនៅក្នុងរដូវកាលបៃតង ពោលគឺក្នុងខែឧសភាកន្លងទៅនេះ ភ្ញៀវទេសចរមានចំនួន ២២៧ ១៧២នាក់ កើនឡើង២៦% បើធៀបនឹងរយៈពេលដូចគ្នានៅឆ្នាំ២០២៥។

លោកប្រធានមន្ទីរបានឲ្យដឹងដែរថា ការកើនឡើងចំនួនភ្ញៀវនេះ ដោយសារតែកិច្ចខិតខំប្រឹងប្រែងរបស់រដ្ឋបាលខេត្តកែប អាជ្ញាធរក្រុងស្រុក ក្នុងការបង្កើនបរិស្ថានបៃតង ដោយការខិតខំដាំដើមឈើលម្អ មានដូចជាដើមលឿងរាជ ដើមត្របែកព្រៃ ពិសេសដើមក្ងោករាប់ម៉ឺនដើម ដែលបាននិងកំពុងបញ្ចេញផ្កា រីកស្គុះស្គាយនារដូវភ្លៀងធ្លាក់នេះ។  

បុគ្គលិកកាហ្វេលើភ្នំ  និងខ្សែរ៉កកាហ្វេ បានបង្ហាញមោទកភាពចំពោះការអភិវឌ្ឍន៍រីកមច្រើនក្នុងខេត្តរបស់ខ្លួន ពិសេសបានថ្លែងអំណរគុណដល់លោកអភិបាលខេត្តកែប ដែលមានភាពប៉ិនប្រសប់ក្នុងការដឹកនាំ ធ្វើឲ្យខេត្តមានភាពរីកចម្រើន ភ្ញៀវទេសចរមកលេងកម្សាន្តកាន់តែច្រើន ប្រជាពលរដ្ឋមានជីវភាពកាន់តែប្រសើរឡើងជាលំដាប់។

បើតាមការបញ្ជាក់ពីមន្ត្រីជំនាញ ខេត្តកែបមានគម្រោងជាច្រើន បាននិងកំពុងអនុវត្តដូចជា៖ គម្រោងកសាងលូរំដោះទឹក និងផ្លូវថ្មើរជើងចាប់ពីឆ្នេរស្រី ស ទៅផ្សារដំណាក់ចង្អើរ គម្រោងសាងសង់​អាងប្រព្រឹត្តិកម្មទឹកកខ្វក់នៅភូមិថ្មី គម្រោងកសាងហេដ្ឋារចនាសម្ព័ន្ធ ផ្លូវចំណត និងបង្គន់សាធារណៈនៅសហគមន៍អូរក្រសារ និងឆ្នេរអង្កោល គម្រោងជួសជុល និងពង្រីករូបសំណាក់ស្រី ស និងរូបសំណាក់សេះស គម្រោងសាងសង់កំពង់ផែនេសាទ និងទេសចរណ៍ផ្សារក្តាម ក្រៅពីនេះ ខេត្តក៏ទទួលបានគម្រោងអភិវឌ្ឍន៍ថ្នាក់ជាតិ មានគ្រោងសាងសង់ឆ្នេរតេជោសន្តិភាព (២៧០០ម៉ែត្រ ) និងគម្រោងព្រែកជីកហ្វូណនតេជោជាដើម៕

អត្ថបទ៖ សឹង រ៉ាត់

The post ខេត្តកែបនៅតែបន្តទាក់ទាញភ្ញៀវទេសចរទៅលេងកម្សាន្តកាន់តែច្រើននៅរដូវកាលបៃតង appeared first on Kampuchea Thmey Daily.

លោក អន​ សុវណ្ណ​ ប្រធានសហគមន៍អេកូទេសចរណ៍ជីផាត ប្រាប់កម្ពុជាថ្មីថា តាំងពីដើមខែឧសភាមក សហគមន៍ទទួលបានភ្ញៀវទទេសចរក្នុងស្រុកជាច្រើន ទាំងទេសចរណ៍វិលល្ងាច​ និងបោះតង់ ដោយសារតែតំបន់នេះ មានកន្លែងកម្សាន្តធម្មជាតិជាច្រើន។

លោកបានឱ្យដឹងថា៖ «យើងសង្កេតឃើញថា ឆ្នាំនេះប្លែកជាងឆ្នាំមុន ព្រោះកាលពីឆ្នាំមុន ផ្លូវនៅតំបន់ជីផាតនេះ មានការលំបាកក្នុងរដូវវស្សា ដែលផ្តល់ការលំបាកសម្រាប់ភ្ញៀវទេសចរ។ ប៉ុន្តែ បច្ចុប្បន្ន ជីផាតមានផ្លូវស្អាត ហើយចាប់ពីខែឧសភាមក ជីវិតទទួលបានភ្ញៀវទេសចរច្រើនគួរឱ្យកត់សម្គាល់ ជាពិសេសនៅចុងសប្តាហ៍»។

លោកបានប្រាប់បន្តថា៖ «ពេលខ្លះភ្ញៀវកក់រហូតដល់យើងមិនអាចរកកន្លែងឱ្យស្នាក់នៅបាន។ ជាមធ្យម ភ្ញៀវទេសចរណ៍ធម្មជាតិជីផាត មានចំនួនប្រមាណជា២០០០នាក់ នៅចុងសប្តាហ៍។ សហគមន៍ និងអាជីវករពិតជាសសប្បាយចិត្តណាស់ ដោយសារតែពួកគាត់ទទួលបានផលពីការលក់ផ្លែឈើដូចជា ទុរេន និងសាវម៉ាវ ជាដើម ទៅឱ្យភ្ញៀវទេសចរដ៏ច្រើនបែបនេះ»។

ស្ថិតក្នុង​ឃុំ​ជី​ផាត ស្រុក​ថ្មបាំង ខេត្តកោះកុង «​ជី​ផាត​» ជា​តំបន់​ទេសចរណ៍ធម្មជាតិ​ដ៏​ទាក់ទាញ​មួយនា​ទិសនិរតី ដែល​អមដោយ​សម្រស់​ទឹកជ្រោះ​ ជិះទូក​គយគន់​ថ្ងៃ​លិច​ អំពិលអំពែក និង​សត្វ​ស្លាប​តាម​ដងព្រែក​សមុទ្រ​ ល្អាង​ប្រចៀ​វ​ ទី​ឈ្វេងយល់​ពាង និង​ផ្នូរ​បុរាណ​ដែលមាន​អាយុកាល​ជាង​៥០០​ឆ្នាំ​។​

អ្វីដែលកាន់តែពិសេសនោគឺថា ទឹកជ្រោះដែលមានភ្ញៀវទេសចរចូលចិត្តទៅកម្សាន្ត និងមានប្រជាប្រិយភាពជាងគេ​គឺទឹកជ្រោះអូម្លូ តែម្តង ដោយសារតែមានទឹកធ្លាក់ស្អាត ហើយនៅជុំវិញឡោមព័ទ្ធជ្រលងភ្នំ និងព្រៃឈើធម្មជាតិ អមដោយសំឡេងសត្វស្លាបយ៉ាងពិរោះ។

កត្តា​ដែល​ភ្ញៀវទេសចរ​បរទេស​ចូលចិត្ត​ទៅ​កម្សាន្ត​នៅ​ជី​ផាត មួយទៀត គឺការធ្វើទេសចរណ៍​បែប​ផ្សងព្រេង​ បោះតង់ ជាពិសេស​ការ​ឈ្វេងយល់​ពី​ការរស់នៅ​របស់​ប្រជាពលរដ្ឋ​នា​តំបន់​ដាច់ស្រយាល​ផងដែរ​។​

ដោយឡែក លោក អ៊ឹម ឈួន ម្ចាស់រមណីយដ្ឋាន​ The Stop Stay ស្ថិតនៅតំបន់ជីផាត ក៏កត់សម្គាល់ឃើញមានការ​កើនឡើងភ្ញៀវចរក្នុងស្រុកគួរឱ្យកត់សម្គាល់ផងដែរ ដោយកន្លែងរបស់លោកទទួលបានភ្ញៀវចន្លោះពី៧០ ទៅ៨០នាក់ នៅចុងសប្តាហ៍។

លោកបានប្រាប់ថា៖ «នៅរដូវវស្សានេះ ខ្ញុំឃើញថា ភ្ញៀវចរក្នុងស្រុកមានចំនួនច្រើន ព្រោះជីផាត ក្នុងរដូវនេះ ក្រៅពីមានទឹកជ្រោះ តំបន់ធម្មជាតិ ព្រៃឈើ និងកន្លែងទាក់ទាញជាច្រើនទៀត យើងក៏មានផ្លែឈើធម្មជាតិ ដូចជា ទុរេន និងសាវម៉ាវ ជាដើម ដែលរដូវនេះ ផ្លែឈើទាំងនោះកំពុងតែទុំ មានរសជាតិឆ្ងាញ់ និងតម្លៃសមរម»។

ជាមួយគ្នានេះ លោកបានបញ្ជាក់ថា ភ្ញៀវទេសចរណ៍ដែលចូលចិត្តទៅលេងតំបន់ធម្មជាតិ មិនថា ជីផាត ឬកន្លែងផ្សេងទៀតនៅកម្ពុជាឡើយ គួរតែទៅលេងក្នុងរដូវវស្សា ឬ រដូវកាលបៃតងនេះ​​ ព្រោះតំបន់ទាំងនោះកំពុងតែបញ្ចេញសម្រស់ដ៏ស្រស់ស្អាត។

មិនត្រឹមតែប៉ុណ្ណោះ លោកបានបញ្ជាក់ថា រមណីយដ្ឋានរបស់លោកនឹងមិនឡើងថ្លៃនោះទេ មិនថា ចំថ្ងៃឈប់សម្រាក ឬចុងសប្តាហ៍ក៏ដោយ ប៉ុន្តែ​លោកសំណូមឱ្យភ្ញៀវដែលទៅលេងតំបន់ធម្មជាតិក្នុងរដូវនេះ គួរតែយកអាវភ្ញៀង ថ្នាំការពារសត្វមូស និងសត្វទៀក ព្រោះដោយសារតែរដូវភ្ញៀវ និងមានសត្វកើតតាមទឹកច្រើន។

លោក អ៊ឹម ឈួន បានបន្ថែមថា ភ្ញៀវទេសចរ ដែលគ្រោងមកលេង ជីផាត ក៏គួរតែរកកន្លែងស្នាក់នៅ ឬធ្វើការកក់ទុកជាមុន ជៀសវាងការពិបាករកកន្លែងស្នាក់នៅ ព្រោះនៅរដូវនេះ ភ្ញៀវទេសចរកំពុងតែសម្រុកទៅលេងទៅកាន់តែច្រើន។

ទាំងប្រធានសហគមន៍អេកូទេសចរណ៍ជីផាត និងលោកឈួន ផ្ទាល់ ក៏អំពាវនាវឱ្យភ្ញៀវទេសចរទាំងអស់ដែលទៅលេងតំបន់ជីផាត ចូលរួមរក្សាអម័យទាំងអស់គ្នា តាមរយៈការទុកដាក់សំរាមឱ្យបានត្រឹមត្រូវ ដើម្បីចូលរួមថែរក្សាបរិស្ថាន និងធ្វើឱ្យតំបន់ទេសចរណ៍ជីផាត មានសម្រស់ស្អាតជានិច្ច និងទាក់ទាញភ្ញៀវទេសចរណ៍កាន់តែច្រើនបន្ថែមទៀត៕

The post ជីផាត តំបន់ទេសចរណ៍ធម្មជាតិ កំពុងបញ្ចេញសម្រស់ទាក់ទាញភ្ញៀវទេសចរ ដ៏ច្រើនកុះករក្នុងរដូវវស្សា appeared first on Kampuchea Thmey Daily.

កិច្ចប្រជុំនេះបានប្រព្រឹត្តទៅនាព្រឹកថ្ងៃទី១៩ ខែឧសភា ឆ្នាំ២០២៦ នៅសាលប្រជុំមន្ទីរទេសចរណ៍ខេត្តតាកែវ ក្រោមអធិបតីភាពលោក ប្រាក់ ចន្ទ័តារា អនុរដ្ឋលេខាធិការក្រសួងទេសចរណ៍ និងលោក ងិន ងិនដា អភិបាលរងខេត្ត តំណាងដ៏ខ្ពង់ខ្ពស់លោក វ៉ី សំណាង អភិបាលខេត្តតាកែវ ដោយមានការចូលរួមពីថ្នាក់ដឹកនាំមន្ទីរ-អង្គភាពពាក់ព័ន្ធ មន្ត្រីជំនាញ អាជ្ញាធរមូលដ្ឋាន និងភាគីពាក់ព័ន្ធក្នុងវិស័យទេសចរណ៍ជាច្រើនរូប។

ថ្លែងក្នុងកិច្ចប្រជុំ លោក ប្រាក់ ចន្ទ័តារា បានជំរុញឱ្យមន្ទីរទេសចរណ៍ខេត្ត និងស្ថាប័នពាក់ព័ន្ធ បង្កើនការផ្សព្វផ្សាយពីសក្តានុពលទេសចរណ៍របស់ខេត្តតាកែវ ឱ្យកាន់តែទូលំទូលាយ ជាពិសេសតំបន់ទេសចរណ៍ធម្មជាតិ អេកូទេសចរណ៍ និងទីកន្លែងមានទេសភាពបៃតងស្រស់បំព្រងក្នុងរដូវវស្សា ដែលអាចទាក់ទាញភ្ញៀវទេសចរជាតិ និងអន្តរជាតិឱ្យមកទស្សនាកម្សាន្តកាន់តែច្រើន។

លោកបានលើកឡើងថា យុទ្ធនាការ «Green Season» មិនត្រឹមតែជាការផ្សព្វផ្សាយទេសចរណ៍ប៉ុណ្ណោះទេ ប៉ុន្តែជាការផ្លាស់ប្តូរទស្សនៈ និងផ្នត់គំនិតរបស់ភ្ញៀវទេសចរ ឱ្យមើលឃើញពីសម្រស់ធម្មជាតិ និងបរិយាកាសស្រស់ស្រាយនៅរដូវវស្សា ដែលជាពេលវេលាដ៏ល្អសម្រាប់ការសម្រាកលំហែកាយ ទស្សនាទេសភាពបៃតង និងស្វែងយល់ពីជីវភាពរស់នៅតាមសហគមន៍មូលដ្ឋាន។

ខេត្តនេះមានតំបន់ទេសចរណ៍ល្បីៗជាច្រើន ដូចជា រមណីយដ្ឋានភ្នំដា តំបន់បុរាណវិទ្យាអង្គរបុរី ភ្នំតាម៉ៅ និងរមណីយដ្ឋានធម្មជាតិជាច្រើនទៀត ដែលមានទេសភាពស្រស់ស្អាតជាពិសេសនៅរដូវភ្លៀងធ្លាក់ បង្កើតបានជាបរិយាកាសត្រជាក់ស្រួល និងពោរពេញដោយពណ៌បៃតងខ្ចី។

មន្ត្រីជំនាញក្នុងវិស័យទេសចរណ៍ បានលើកឡើងដែរថា ការជំរុញយុទ្ធនាការ «Green Season» គឺជាផ្នែកមួយនៃយុទ្ធសាស្ត្ររបស់រាជរដ្ឋាភិបាល ក្នុងការធ្វើឱ្យវិស័យទេសចរណ៍មានចលនាពេញមួយឆ្នាំ កាត់បន្ថយភាពខុសគ្នារវាងរដូវភ្ញៀវច្រើន និងរដូវភ្ញៀវតិច ព្រមទាំងជួយលើកស្ទួយសេដ្ឋកិច្ចមូលដ្ឋាន បង្កើតការងារ និងបង្កើនប្រាក់ចំណូលជូនប្រជាពលរដ្ឋដែលប្រកបរបរពាក់ព័ន្ធនឹងវិស័យទេសចរណ៍។ ជាមួយគ្នានេះ អាជ្ញាធរខេត្ត និងមន្ទីរទេសចរណ៍ ក៏ត្រៀមជំរុញការរៀបចំហេដ្ឋារចនាសម្ព័ន្ធ កែលម្អបរិស្ថាន អនាម័យ សណ្តាប់ធ្នាប់ និងគុណភាពសេវាកម្មទេសចរណ៍ ឱ្យកាន់តែល្អប្រសើរ ដើម្បីបង្កើនភាពជឿជាក់ និងផ្តល់បទពិសោធន៍ល្អដល់ភ្ញៀវទេសចរ ដែលមកទស្សនាកម្សាន្តក្នុងខេត្តតាកែវ៕

អត្ថបទ៖ វីរៈ

The post ខេត្ត​តាកែវ ជំរុញយុទ្ធនាការ «Green Season» ប្រែក្លាយរដូវភ្ញៀវតិច ទៅជារដូវទេសចរណ៍ធម្មជាតិដ៏ទាក់ទាញ appeared first on Kampuchea Thmey Daily.

បើយោងតាមក្រសួងទេសចរណ៍ កោះសាមិត្ត គឺជាតំបន់ធម្មជាតិដ៏មានសក្តានុពលមួយ ដែលកំពុងទាក់ទាញភ្ញៀវទេសចរជាតិ និងអន្តរជាតិ ឱ្យទៅស្វែងយល់ពីជីវចម្រុះក្រោមផ្ទៃសមុទ្រ និងរីករាយជាមួយបទពិសោធទេសចរណ៍បែបអេកូធម្មជាតិ។

ក្រោមផ្ទៃទឹកសមុទ្រខៀវស្រងាត់ដូចកញ្ចក់ ភ្ញៀវទេសចរអាចទស្សនាបាននូវផ្កាថ្មចម្រុះពណ៌ ដែលកំពុងរីកលូតលាស់យ៉ាងស្រស់បំព្រង អមដោយហ្វូងត្រីតូចធំហែលឆ្វាត់ឆ្វែង បង្កើតបានជាទិដ្ឋភាពរស់រវើកគួរឱ្យចាប់អារម្មណ៍។ សម្រស់ធម្មជាតិដ៏កម្រនេះ បានធ្វើឱ្យ កោះសាមិត្ត ក្លាយជាទីតាំងស័ក្តិសមសម្រាប់អ្នកស្រលាញ់ការមុជទឹកមើលផ្កាថ្ម និងអ្នកចូលចិត្តផ្សងព្រេងក្រោមផ្ទៃសមុទ្រ។

ក្រៅពីសកម្មភាពមុជទឹក ភ្ញៀវទេសចរក៏អាចជិះទូកកម្សាន្តជុំវិញកោះ សម្រាកលំហែកាយលើឆ្នេរខ្សាច់សក្បុស ឬថតរូបជាមួយទេសភាពសមុទ្រដ៏ស្រស់ត្រកាល ដែលផ្តល់អារម្មណ៍ស្ងប់ស្ងាត់ និងស្រស់ស្រាយបំផុត។ ជាពិសេសនារដូវវស្សា ពណ៌បៃតងនៃព្រៃឈើលាយឡំជាមួយពណ៌ខៀវនៃសមុទ្រ កាន់តែធ្វើឱ្យទេសភាពនៅទីនោះមានភាពទាក់ទាញប្លែកភ្នែក។

ទីតាំង៖ តំបន់ប្រជុំកោះស្ដេច ស្រុកគិរីសាគរ ខេត្តកោះកុង
សកម្មភាពពេញនិយម៖ មុជទឹកមើលផ្កាថ្ម, ជិះទូកកម្សាន្ត, ថតរូបលើឆ្នេរខ្សាច់សក្បុស, សម្រាកលំហែកាយជាមួយធម្មជាតិ៕

The post ឋានសួគ៌ក្រោមទឹក “កោះសាមិត្ត” បង្អួតសម្រស់នារដូវកាលបៃតង ទាក់ទាញអ្នកស្រលាញ់ធម្មជាតិ appeared first on Kampuchea Thmey Daily.

ស្ថិតនៅក្នុង ឧទ្យានជាតិជួរភ្នំក្រវាញខាងត្បូង ទឹកធ្លាក់ឆាយទឹកច្រាក មានបរិយាកាសត្រជាក់ស្រួល អមដោយព្រៃទឹកភ្លៀងដ៏ក្រាស់ឃ្មឹក និងសំឡេងទឹកហូរធ្លាក់បែបធម្មជាតិដែលផ្តល់អារម្មណ៍ស្ងប់ស្ងាត់ និងស្រស់ស្រាយដល់ទេសចរដែលបានមកទស្សនា។ ទីនេះក៏ស័ក្តិសមសម្រាប់អ្នកដែលចង់គេចចេញពីតំបន់ទេសចរណ៍ដែលមានមនុស្សកកកុញ និងស្វែងរកបទពិសោធថ្មីជាមួយធម្មជាតិផងដែរ។

បើមើលលើទីតាំងភូមិសាស្ត្រ ទឹកធ្លាក់នេះស្ថិតនៅក្នុងស្រុកថ្មបាំង ខេត្តកោះកុង ចម្ងាយប្រមាណ ៤គីឡូម៉ែត្រ ពីរង្វង់មូលត្រីនាគ តាមផ្លូវឆ្ពោះទៅកាន់តំបន់ទេសចរណ៍ជីផាត។ ផ្លូវធ្វើដំណើរទៅកាន់ទីនោះ គឺក៏អំណោយផលសម្រាប់ភ្ញៀវទេសចរ គយគន់ទេសភាពធម្មជាតិដ៏ស្រស់បំព្រងនារដូវកាលបៃតងនេះ និងខ្យល់អាកាសបរិសុទ្ធពីតំបន់ជួរភ្នំក្រវាញផងដែរ។

ក្រៅពីទេសភាពដ៏ទាក់ទាញ ជួរភ្នំក្រវាញ ក៏ត្រូវបានស្គាល់ថា ជាតំបន់មានជីវចម្រុះសម្បូរបែប និងជាប្រព័ន្ធអេកូឡូស៊ីដ៏សំខាន់មួយរបស់កម្ពុជា ដែលកំពុងទាក់ទាញអ្នកស្រាវជ្រាវ អ្នកអភិរក្ស និងអ្នកទេសចរបែបអេកូឡូស៊ីពីគ្រប់ទិសទី។

ជាមួយភាពស្ងប់ស្ងាត់ ទេសភាពបៃតង និងទឹកធ្លាក់ធម្មជាតិដ៏ស្រស់ស្អាត ទឹកធ្លាក់ឆាយទឹកច្រាក កំពុងក្លាយជាជម្រើសថ្មីមួយសម្រាប់អ្នកដែលចង់ស្វែងរកបទពិសោធន៍ទេសចរណ៍បែបធម្មជាតិពិតប្រាកដក្នុងប្រទេសកម្ពុជា៕

The post ទឹកធ្លាក់ «ឆាយទឹកច្រាក» ជាគោលដៅអេកូទេសចរណ៍ដ៏ទាក់ទាញនៃតំបន់ជួរភ្នំក្រវាញ ក្នុងរដូវបៃតង appeared first on Kampuchea Thmey Daily.

អ្នកគ្រប់គ្រងការងារទូទៅនៅលើកោះអាចម៍សេះរបស់អង្គការ MCC កញ្ញា តៃ ឆេន បានប្រាប់ឲ្យដឹងថា បន្ទាប់ពីបានបង្កើតតំបន់អភិរក្សជលផលនៅតាមតំបន់ប្រជុំកោះ និងមានការចូលរួមសហការល្អពីគ្រប់ភាគីពាក់ព័ន្ធ ពិសេសអាជ្ញាធរ មន្ត្រីជំនាញ និងប្រជានេសាទ គេបានប្រទះឃើញវត្តមានត្រីសេះសមុទ្រដែលជាសត្វងាយរងគ្រោះញឹកញាប់ជាងមុន នៅក្នុងតំបន់ប្រជុំកោះ ពិសេសកោះអាចម៍សេះ។

កញ្ញា តៃ ឆេន បានបញ្ជាក់ឱ្យដឹងថា ត្រីសេះសមុទ្រមានលក្ខណៈពិសេសខុសពីត្រី និងសត្វដទៃ គឺចូលចិត្តរស់នៅស្ងាមស្ងាត់ ហើយសត្វឈ្មោលពពោះភ្ញាស់កូន។ អ្នកស្រាវជ្រាវរូបនោះ បានបញ្ជាក់បន្ថែមថា វត្តមានត្រីសេះសមុទ្រកាន់តែច្រើន បានបង្ហាញអំពីភាពវិជ្ជាមាន ចំពោះការកកើតនៃធនធានជីវចម្រុះ ពិសេសការស្តារប្រព័ន្ធអេកូឡូស៊ីសមុទ្រកម្ពុជាឡើងវិញ។

សូមបញ្ជាក់ថា តំបន់អភិរក្សជលផលខេត្តកែបសំខាន់បំផុត ហើយសំបូរត្រីសេះសមុទ្រច្រើនជាងគេ គឺនៅតំបន់ជុំវិញកោះអាចម៍សេះ ដែលជាកោះនៅឆ្ងាយពីក្រុងកែបជាងគេ ហើយនៅជាប់នឹងព្រំដែនសមុទ្រនៃប្រទេសវៀតណាម។ ក្រោមការអភិរក្សរបស់អង្គការMCC និងមន្ត្រីជលផលខេត្តកែប ទូកនេសាទ ទូកទេសចរណ៍កម្សាន្ត និងទូកស្ទួចត្រីកម្សាន្ត មិនអនុញ្ញាតឲ្យចូលទៅក្បែរកោះអាចម៍ឡើយ៕

អត្ថបទ៖ សឹង រ៉ាត់

The post វត្តមានត្រីសេះសមុទ្រជាច្រើននៅខេត្តកែបបញ្ជាក់​ពីភាពល្អប្រសើរឡើងវិញនៃប្រព័ន្ធអេកូឡូស៊ី appeared first on Kampuchea Thmey Daily.