ក្នុងអំឡុងពេលពិភាក្សា SIAVB បានបង្ហាញគំរូធារាសាស្ត្រមួយដែលត្រូវបានប្រើសម្រាប់ការគ្រប់គ្រងពីចម្ងាយនៃតំបន់ជ្រលង Bièvres ដែលជាប្រព័ន្ធទំនើបមួយក្នុងចំណោមប្រព័ន្ធទំនើបបំផុតនៅប្រទេសបារាំង សម្រាប់ការការពារភូមិដ្ឋានប្រជាពលរដ្ឋពីគ្រោះទឹកជំនន់។ ការបង្ហាញនេះបានផ្តោតលើរបៀបនៃការគ្រប់គ្រងពីចម្ងាយដែលគំរូនេះអាចនឹងត្រូវបានកែសម្រួល និងផ្ទេរពីបរិបទទន្លេ Bièvres មកប្រើប្រាស់ក្នុងបណ្តាញគ្រប់គ្រងទឹកនៃប្រព័ន្ធធារាសាស្ត្រអង្គរ។

នៅខែសីហា ឆ្នាំ២០២៦ ឧបករណ៍បច្ចេកទេសចំនួនពីរឈុត នឹងត្រូវដឹកជញ្ជូនពីប្រទេសបារាំងមកកម្ពុជា ដើម្បីដំឡើងក្នុងប្រព័ន្ធធារាសាស្ត្រអង្គរ។ នេះនឹងក្លាយជាជំហានដ៏សំខាន់មួយ ឆ្ពោះទៅរកការបង្កើតប្រព័ន្ធធារាសាស្ត្រទំនើបរួមបញ្ចូលគ្នា និងអាចគ្រប់គ្រងពីចម្ងាយសម្រាប់តំបន់អង្គរ។

ដំណើរទស្សនកិច្ចនៅទីតាំងជាក់ស្តែង បានអនុញ្ញាតឱ្យក្រុមការងារទាំងពីរ ពិនិត្យមើលការតភ្ជាប់រវាងឧបករណ៍បញ្ជានៅការិយាល័យត្រួតពិនិត្យ និងប្រព័ន្ធបញ្ជាទ្វារទឹកនៅតាមទីតាំងនានា។ SIAVB ក៏បានបង្ហាញអាងស្តុកទឹកនានានៅតាមបណ្ដោយជ្រលង Bièvres ដែលបានកែលម្អដោយពង្រីកអាចស្តុកទឹក រួមទាំងបង្កើតទេសភាពលម្អដែលត្រូវបានរចនាឡើង មិនត្រឹមតែដើម្បីបង្ការទឹកជំនន់ប៉ុណ្ណោះទេ ប៉ុន្តែថែមទាំងលើកកម្ពស់សោភ័ណភាពទេសភាព និងផ្តល់អត្ថប្រយោជន៍​ដល់ប្រជាពលរដ្ឋក្នុងជ្រលងBièvres និងភ្ញៀវទេសចរផងដែរ។ រូបថតទាំងនេះបង្ហាញពីវឌ្ឍនភាពដែល SIAVB សម្រេចបានរហូតមកដល់ពេលនេះ។

គួរបញ្ជាក់ដែរថា SIAVB បានទទួលជោគជ័យក្នុងការការពារតំបន់លំនៅដ្ឋានក្នុងជ្រលង Bièvres របស់ខ្លួន មិនលិចលង់ដោយទឹកជំនន់ ដូចដែលអាជ្ញាធរជាតិអប្សរា បានការពារតំបន់អង្គរកុំឱ្យប៉ះពាល់ដោយទឹកជំនន់ចាប់តាំងពីឆ្នាំ២០០៧ និងក្រុងសៀមរាប ចាប់តាំងពីឆ្នាំ២០១២ កន្លងមកដែរ៕

The post ជំហានថ្មីក្នុងការគ្រប់គ្រងទឹកអង្គរ៖ កម្ពុជា-បារាំងរួមដៃអភិវឌ្ឍប្រព័ន្ធបញ្ជាពីចម្ងាយ appeared first on Kampuchea Thmey Daily.

ផ្លូវបេតុងដែលមានទទឹង ៦ ម៉ែត្រ និងកម្រាស់ ២០ សង់ទីម៉ែត្រនេះ គឺ ១ ខ្សែ ប្រវែង ២១៨០ ម៉ែត្រ ចេញពីមុខខ្លោងទ្វារដីឆ្នាំង នៃអតីតក្រុងអង្គរធំ កែងនឹងផ្លូវទិសខាងជើងប្រាសាទព្រះខ័ន ស្ថិតនៅក្នុងភូមិនគរក្រៅ សង្កាត់គោកចក ក្រុងសៀមរាប ឆ្ពោះទៅដល់ផ្លូវបំបែកទៅឃុំពាក់ស្នែង នៃស្រុកអង្គរធំ និង ១ ខ្សែទៀត ប្រវែង ៨៣០ ម៉ែត្រ ចេញពីស្ពានក្រាំងក្រូច ឆ្ពោះទៅភូមិថ្នល់បណ្ដោយ នៃឃុំព្រះដាក់ ស្រុកបន្ទាយស្រី។

លោក ជុំ សុភមករា អគ្គនាយករង និងជាអ្នកនាំពាក្យ នៃអាជ្ញាធរជាតិអប្សរា បានមានប្រសាសន៍ក្នុងកិច្ចសម្ភាសន៍ជាមួយអ្នកសារព័ត៌មាន កាលពីរសៀលថ្ងៃទី ៣១ ខែមីនា ថា ការប្រកាសដាក់ឲ្យប្រើប្រាស់ផ្លូវបេតុងទាំងពីរខ្សែនេះ គឺមានប្រយោជន៍ជាច្រើន ដូចជា ការជួយបញ្ចៀសការកកស្ទះចរាចរណ៍នៅមុខប្រាសាទព្រះខ័នខាងលិច ផ្តល់ជម្រើសបន្ថែមក្នុងការធ្វើដំណើរ ប្រកបដោយសុវត្ថិភាព ចំណេញទាំងពេលវេលា និងថវិការបស់ពលរដ្ឋ។

លោកបញ្ជាក់ទៀតថា លើសពីផលប្រយោជន៍ខាងលើនេះ ផ្លូវបេតុងទាំងពីរខ្សែនេះ ក៏នឹងរួមចំណែកផ្ដល់បទពិសោធថ្មីដល់ដំណើរទស្សនាក្នុងរមណីយដ្ឋានអង្គរ ឲ្យកាន់តែប្រសើរមួយកម្រិតទៀត ស្របតាមផែនការយុទ្ធសាស្រ្ត និងផែនការសកម្មភាពរបស់អាជ្ញាធរជាតិអប្សរា លើការរៀបចំហេដ្ឋារចនាសម្ព័ន្ធពាក់ព័ន្ធ ក្នុងគោលដៅត្រៀមខ្លួនឲ្យបានរួចរាល់ ដើម្បីទទួលទេសចរក្នុងបរិមាណច្រើនលាននាក់ អាចនឹងលើសជាងមុនសម័យកូវីដ-១៩ ជាពិសេស នៅពេលស្ថានភាពសេដ្ឋកិច្ចពិភពលោកប្រសើរឡើងនាពេលខាងមុខ។

លោក សុខ សូសិលា អនុប្រធាននាយកដ្ឋានគ្រប់គ្រងទឹក ព្រៃឈើ និងហេដ្ឋារចនាសម្ព័ន្ធ នៃអាជ្ញាធរជាតិអប្សរា ទទួលបន្ទុកផ្លូវថ្នល់ បានឲ្យដឹងថា ការកសាងផ្លូវបេតុងនៅមុខខ្លោងទ្វារដីឆ្នាំងនេះឡើង គឺធ្វើនៅលើផ្លូវចាស់ឲ្យក្លាយទៅជាផ្លូវថ្មីឡើងវិញ។ ក្នុងទស្សនៈជួយសម្រួលដល់ចរាចរណ៍ប្រចាំថ្ងៃផង និងជួយកែលម្អសោភ័ណភាពទីក្រុងបុរាណផង។

លោក សុខ សូសិលា សង្កត់ធ្ងន់ថា នៅរៀងរាល់រដូវបុណ្យទាន អាជ្ញាធរជាតិអប្សរា តែងសម្គាល់ឃើញផ្លូវចន្លោះពីមុខខ្លោងទ្វារដីឆ្នាំងរហូតផ្លូវខាងលិចប្រាសាទព្រះខ័ន តែងស្ទះចរាចរណ៍។ ក្នុងនោះ ដោយសារតែមើលឃើញបញ្ហាទាំងនេះហើយ ទើបថ្នាក់ដឹកនាំ នៃអាជ្ញាធរជាតិអប្សរា រៀបចំកែលម្អជាផ្លូវថ្មីនេះឡើង ដើម្បីសម្រួលក្នុងការធ្វើដំណើររបស់ទេសចរ និងពលរដ្ឋក្នុងតំបន់ត្រូវធ្វើដំណើរចាំបាច់ទៅមន្ទីរពេទ្យ ក្នុងករណីមានអ្នកជំងឺ ឬ ស្រ្តីមានផ្ទៃពោះសង្គ្រោះទាន់វេលា។

អាជ្ញាធរជាតិអប្សរា បានយកចិត្តទុកដាក់យ៉ាងខ្លាំងក្នុងការកសាង និងស្ដារផ្លូវថ្នល់ឡើងវិញនៅក្នុងតំបន់រមណីយដ្ឋានអង្គរ បានកាន់តែប្រសើរឡើង។ រហូតមកដល់បច្ចុប្បន្ននេះ អាជ្ញាធរជាតិអប្សរា បានកសាង និងកែលម្អផ្លូវថ្នល់នៅក្នុងតំបន់រមណីយដ្ឋានអង្គរ សរុបប្រវែងជាង ២១២ គីឡូម៉ែត្រ ក្នុងចំណោមផ្លូវទាំងនោះ មានប្រភេទជាផ្លូវដីក្រហម ផ្លូវកៅស៊ូ និងផ្លូវបេតុង ជាដើម៕

អត្ថបទ ៖ អាជ្ញាធរជាតិអប្សរា

The post ផ្លូវបេតុងថ្មី ២ ខ្សែ នឹងរួមចំណែកលើកតម្លៃបេតិកភណ្ឌ និងកាត់បន្ថយការកកស្ទះក្នុងតំបន់អង្គរ appeared first on Kampuchea Thmey Daily.

លោក សេង សុធារ៉ា ប្រធាន​នាយកដ្ឋាន​អភិវឌ្ឍន៍​ទេសចរណ៍ និង​វប្បធម៌ នៃ​អាជ្ញាធរ​ជាតិ​អប្សរា បាន​ឲ្យ​ដឹង​ថា បច្ចុប្បន្ន អាជ្ញាធរ​ជាតិ​អប្សរា កំពុង​សិក្សា​រៀបចំ​ទៅ​លើ​វង់​ទស្សនា​ជាច្រើន​នៅ​តំបន់​អង្គរ តាមរយៈ​ការ​ដំឡើង​បរិក្ខារ​ទេសចរណ៍ ដែល​អាច​ផ្តល់​ព័ត៌មាន​បន្ថែម​អំពី​ប្រាសាទ​នីមួយៗ ដល់​ទេសចរ​ជាតិ និង​អន្តរជាតិ នូវ​ចំណុច​ទាក់ទាញ រយៈពេល នៃ​ការ​ទស្សនា ព្រមទាំង​ប្រវត្តិ នៃ​ប្រាសាទ​ផង ដើម្បី​លើកទឹកចិត្ត​ដល់​ទេសចរ។ ពិសេស ភ្ញៀវ​ទេសចរ​ជាតិ ដែល​មក​ទស្សនា​ប្រាសាទ​នានា នឹង​យល់ដឹង​អំពី​រឿងរ៉ាវ​ប្រវត្តិសាស្ត្រ និង​ប្រវត្តិ​សិល្បៈ​ច្រើន​ជាង​មុន​ផង​ដែរ។

លោក​បាន​បន្ត​ថា ការ​សិក្សា​រៀបចំ​វង់​ទស្សនា​ទាំងនោះ បាន​ធ្វើ​នៅ​តាម​ប្រាសាទ​ជាច្រើន​ក្នុង​វង់​តូច និង​វង់​ធំ រួច​មក​ហើយ គឺ ខ្វះ​តែ​ការ​ដំឡើង​បរិក្ខារ​ទេសចរណ៍​មួយ​ចំនួន​ឲ្យ​រួចរាល់ ទើប​ដាក់​ឲ្យ​អនុវត្ត​ដូច​ប្រាសាទ​ផ្សេងៗ។ កន្លង​មក​នេះ អាជ្ញាធរ​ជាតិ​អប្សរា បាន​ប្រកាស​ដាក់​ឲ្យ​ដំណើរការ​វង់​ទស្សនា​ជា​ផ្លូវការ​មួយ​ចំនួន​ដូចជា នៅ​ប្រាសាទ​ភ្នំ​ក្រោម ប្រាសាទ​នាគព័ន្ធ ប្រាសាទ​បាយ័ន ប្រាសាទ​តាព្រហ្ម និង​ប្រាសាទអង្គរវត្ត​ជាដើម។ ប្រសិន​បើ​អាច​បំពាក់​បរិក្ខារ​រួចរាល់ អាច​នឹង​ប្រកាស​ឲ្យ​ប្រើប្រាស់​វង់​ទស្សនា​ថ្មី ចំនួន ២ បន្ថែម​ទៀត គឺ ប្រាសាទ​ព្រះខ័ន និង​ប្រាសាទ​តាកែវ។

លោក​បញ្ជាក់​ដែរ​ថា បច្ចុប្បន្ន អាជ្ញាធរ​ជាតិ​អប្សរា បាន​និង​កំពុង​សិក្សា​វង់​ទស្សនា​ទៅកាន់​ប្រាសាទ​បន្ទាយ​ធំ ក្បាលស្ពាន និង​ប្រាសាទ​មួយ​ចំនួន​ទៀត ដែល​ទេសចរ​មិន​សូវ​ចាប់​អារម្មណ៍ រួមមាន ប្រាសាទ​ចៅ​ស្រី​វិបុល ក្រុម​ប្រាសាទ​តំបន់​រលួស និង​ប្រាសាទ​បេង​មាលា ផង​ដែរ។ លោក​បន្ថែម​ថា នេះ​ជា​ការ​កែសម្រួល​បន្ថែម​លើ​ផលិតផល​ទេសចរណ៍​ឲ្យ​មាន​ភាព​ទាក់ទាញ និង​លើកទឹកចិត្ត​ឲ្យ​ទេសចរ​ចូល​ទៅ​ទស្សនា​ប្រាសាទ​ជាច្រើន​ដែល​ពួកគេ​ពុំ​ធ្លាប់​បាន​ទៅ​ពីមុន និង​ជា​ជម្រើស​សម្រាប់​ភ្ញៀវ​ទេសចរ​​មក​ទស្សនា​តំបន់​អង្គរ​លើក​ទី ២ ឬ លើក​ទី ៣៕

​

The post អាជ្ញាធរជាតិអប្សរា កំពុងសិក្សាវង់ទស្សនាតាមប្រាសាទមួយចំនួន ដែលទេសចរមិនសូវចាប់អារម្មណ៍ appeared first on Kampuchea Thmey Daily.

ក្រុមការងារ​ផ្សព្វផ្សាយ នៃ​អាជ្ញាធរ​ជាតិ​អប្សរា បាន​ចុះ​យក​ព័ត៌មាន ផ្ដិត​រូបភាព និង​វីដេអូ នៅ​ភូមិ​នគរ​ក្រៅ ប្រាសាទអង្គរវត្ត និង​ប្រាសាទ​វត្ត​អធ្វារ។ អ្នកស្រុក​នៅ​ភូមិ​នគរ​ក្រៅ រៀបចំ​ពិធី​នេះ​នៅ​ទួល​អ្នកតា​គង់។ រីឯ​នៅ​ប្រាសាទអង្គរវត្ត រៀបចំ​ចំពោះ​តា​រាជ នៅ​បរិវេណ​ទល់មុខ​គុក​តា​រាជ។ ចំពោះ​ប្រាសាទ​វត្ត​អធ្វារ អ្នកភូមិ​តែង​ប្រារព្ធ​កិច្ច​ពិធី​នេះ​នៅ​ទីតាំង ៣ ផ្សេងគ្នា គឺ ទី ១-នៅ​លើ​ប្រាសាទ , ទី ២-នៅ​ទួល​ដូន​ប៉ុក , និង​ទី ៣-នៅ​ទួល​តា​មឿង។

គ្រឿង​សំណែន​នៅ​ក្នុង​កិច្ច​ពិធី​នេះ គឺ​ក្នុង​រូបភាព​តូច ឬ​ធំ ទៅតាម​សហគមន៍​នីមួយៗ ក្នុង​នោះ មុខ​ម្ហូប​ដែល​គេ​មិន​អាច​ចោល​បាន​មាន​ដូចជា ក្បាល​ជ្រូក មាន់ នំ​បញ្ចុក បារី ស្រា ទៀន ធូប បាយសី ស្លាធម៌ ម្ហូបអាហារ បង្អែម ភេសជ្ជៈ​ជាដើម។

កិច្ច​ពិធី​ឡើង​មាឃ មាន​ប្រវត្តិ​យូរលង់​មក​ហើយ ដោយ​អ្នកស្រុក​អង្គរ តែង​ធ្វើ​ជា​ទៀងទាត់ នៅ​រដូវ​ក្រោយ​ច្រូតកាត់ ដែល​បញ្ជាក់​ថា វដ្ដ​រដូវ​កសិកម្ម​បាន​បញ្ចប់​ហើយ។ កិច្ច​ពិធី​នេះ អ្នកស្រុក ក៏បាន​ស្នើ​សុំ​អ្នកតា​ដែល​ជា​ម្ចាស់​ស្រុក សូម​ជួយ​ថែរក្សា​ដល់​អ្នកភូមិ​ឲ្យ​សុខ​សប្បាយ ជៀស​ឆ្ងាយ​ពី​ជំងឺ​នានា និង​សុំ​ឲ្យ​មាន​ភ្លៀង​ធ្លាក់​គ្រប់គ្រាន់ នា​រដូវ​កសិកម្ម​បន្ទាប់៕

The post ពលរដ្ឋតំបន់អង្គរ ប្រារព្ធពិធីឡើងអ្នកតា តាមទំនៀមពីបុរាណ appeared first on Kampuchea Thmey Daily.

បុរសជនជាតិកូរ៉េម្នាក់នេះ ឈ្មោះ ហ្វាង ប៊ុកដុង ជាអ្នកបកប្រែបន្តភាសាកូរ៉េ នៅខេត្តសៀមរាប ខណៈពេលដែលកំពុងដឹកនាំភ្ញៀវទេសចរដើរកម្សាន្តនៅតំបន់អង្គរ បានឈរបន្ទោបង់ (នោម) ដាក់ក្នុងកូនដបទឹកសុទ្ធ ហើយក៏ចាក់ទឹកនោមចេញពីកូនដប ពេលដឹកនាំភ្ញៀវរបស់ខ្លួន ទៅដល់ក្នុងបរិវេណប្រាសាទអង្គរវត្ត។ វីដេអូអំពីសកម្មភាព ដែលមិនគួរកើតមាននេះត្រូវបានគេថតជាប់ និងបង្ហោះលើបណ្តាញសង្គម។ អ្នកលេងបណ្ដាញជាពលរដ្ឋខ្មែរ បានសម្ដែងការមិនពេញចិត្តចំពោះទង្វើអសីលធម៌ និងមិនសមរម្យនេះ ហើយបានស្នើឱ្យអាជ្ញាធរចាត់វិធានការ។

ក្រោយឃើញព័ត៌មានេះ មន្ទីរទេសចរណ៍ខេត្តសៀមរាប ក៏បានហៅជនជាតិកូរ៉េរូបនេះ មកសួរនាំ ដើម្បីចាត់វិធានការតាមនីតិវិធីរដ្ឋបាល។ ក្នុងពេលជួបជាមួយមន្ត្រីជំនាញ បុគ្គលជាអ្នកបកប្រែភាសាកូរ៉េ បានសារភាព និងទទួលស្គាល់ចំពោះកំហុសរបស់ខ្លួន និងបានចេញលិខិតសុំទោសចំពោះថ្នាក់ដឹកនាំគ្រប់ជាន់ថ្នាក់ និងប្រជាជនកម្ពុជាទាំងអស់។

ជនជាតិកូរ៉េនេះ បានសារភាពនៅមន្ត្រីជំនាញកម្ពុជា ថា កាលពីថ្ងៃទី១៣ ខែកុម្ភៈ ឆ្នាំ២០២៥ រូបគេបាននាំភ្ញៀវទេសចរកូរ៉េមួយក្រុមមកទស្សនាប្រាសាទអង្គរវត្ត ហើយបានបន្ទោរបង់ (នោម) នៅទីកន្លែងសាធារណៈក្នុងបរិវេណប្រាសាទអង្គរវត្ត ដែលជាសម្បត្តិវប្បធម៌ និងបេតិកភ័ណ្ឌរបស់ពិភពលោក។

លោក ថា «ខ្ញុំពិតជាសោកស្តាយចំពោះទង្វើដែលខ្ញុំបានប្រព្រឹត្ត និងទទួលស្គាល់កំហុសនេះ ព្រមទាំងធ្វើការសុំទោសជាសាធារណៈទៅកាន់ថ្នាក់ដឹកនាំគ្រប់ជាន់ថ្នាក់ និងប្រជាជនកម្ពុជាទាំងអស់ចំពោះកំហុសខាងលើ»។

ភ្ជាប់ជាមួយការសុំទោស អ្នកបកប្រែជនជាតិកូរ៉េនេះ មន្ទីរទេសចរណ៍ខេត្តសៀមរាប បញ្ឈប់សកម្មភាពលែងឱ្យគាត់ដើរបកប្រែកតែម្ដង ហើយក៏ក្រុមហ៊ុន រួមទាំងអ្នកបកប្រែកកូរ៉េផ្សេងទៀត ក៏បានឯកភាព ឱ្យបុរសនេះឈប់ផងដែរ។ នេះបើតាមការបញ្ជាក់របស់លោក គង់ សឿន អនុប្រធានមន្ទីរទេសចរណ៍ខេត្តសៀមរាប។

លោក គង់ សឿន លើកឡើងដូច្នេះថា៖ «គាត់មានជំងឺនោមញឹក មានអាយុ៦៣ឆ្នាំ ហើយគាត់អត់អាចគ្រប់គ្រងទឹកនោមបាន ហើយគាត់សារភាព តាំងមុនយើងសួរហ៎។ អ៊ីចឹង ជាការវិវត្តថ្មីមួយទៀត យើងគិតថា បើយើងធ្វើកិច្ចសន្យាជាមួយគាត់ ក៏គាត់មិនអាចគ្រប់គ្រងការនោមបាន អ៊ីចឹង ជាបច្ចេកទេស យើងផ្អាកគាត់តែម្ដង ឈប់ឱ្យគាត់ដើរបកប្រែទៀតហើយ ហើយសាម៉ីខ្លួនគាត់ ក៏ពេញចិត្តដែរ»៕

ដោយ៖ ធឿន វ៉ាន់សុង

The post ក្រោយប្រព្រឹត្តទង្វើមិនគប្បីក្នុងតំបន់អង្គរ បុរសជនជាតិកូរ៉េ បានចេញសុំទោស និងលែងធ្វើជាអ្នកបកប្រែ appeared first on Kampuchea Thmey Daily.

ពិធីចាប់ត្រីនោះធ្វើឡើងនៅថ្ងៃទី៩ ខែកុម្ភៈ ឆ្នាំ២០២៥ ដោយមានប្រជាពលរដ្ឋចាស់ ក្មេង ប្រុស ស្រីជាច្រើនរយនាក់ ក្នុងដៃមានកាន់សំណាញ់ អង្រុត ឈ្នាង និងទ្រុង បានមកជួបជុំគ្នាដោយគណៈកម្មការបានកំណត់ការជួបជុំគ្នា និងចុះចាប់ត្រីនៅម៉ោង៧ព្រឹក ដែលមានបាញ់កាំជ្រួចធ្វើជាសញ្ញាឱ្យចាប់ត្រីរួមគ្នានៅក្នុងបឹងសហគមន៍ ស្ថិតនៅភូមិបង្កោង ឃុំអំពិល ស្រុកប្រាសាទបាគង ដោយមានអ្នកចូលរួមមកពីគ្រប់ទិសទីយ៉ាងច្រើនកុះករ។

លោក សូរ ប្លាតុង អភិបាលស្រុកប្រាសាទបាគង បានឱ្យដឹងថា ពិធីចាប់ត្រីរួមគ្នានៅក្នុងបឹងសហគមន៍ ដែលត្រូវបានអភិរក្ស ថែរក្សាដោយគណៈកម្មាការក្នុងភូមិ សម្រាប់យកធ្វើម្ហូបអាហារ ឬធ្វើទឹកសម្លរនំបញ្ចុកនៅក្នុងពិធីឡើងមាឃនោះ ប្រជាពលរដ្ឋរស់នៅភូមិបង្កោង បានប្រកាន់ភ្ជាប់យ៉ាងខ្ជាប់ខ្ជួន តាំងពីបុរាណមកមិនដែលខកខានឡើយ។

លោកថា ពិធីចាប់ត្រីរួមគ្នានៅឆ្នាំ២០២៥នេះ មិនខុសប្លែកពីរាល់ៗឆ្នាំប៉ុន្មានឡើយ ដោយទឹកនៅក្នុងបឹងសហគមន៍សម្រាប់ឆ្នាំនេះហាក់សំបូរត្រីច្រើនជាងឆ្នាំមុន ព្រោះកាលពីរដូវវស្សាកន្លងមក អាជ្ញាធរបានលែងត្រីជាច្រើនប្រភេទប្រមាណ១ម៉ឺនក្បាលនៅក្នុងបឹង ដែលធ្វើឱ្យអ្នកចូលរួមចាប់ត្រីពីក្នុងបឹងសហគមន៍នេះ មានភាពសប្បាយរីករាយ។
លោកបន្តថា ឆ្នាំនេះមានភាពកុះករជាងឆ្នាំមុនៗ ដោយបើកឱ្យចាប់ត្រីជាសាធាណៈ ដោយមិនគិតថា ប្រជាពលរដ្ឋនៅក្នុងសហគមន៍ ឬមកពីទីជិតឆ្ងាយនោះទេ គឺពួកគាត់អាចរកត្រីបានដូចគ្នា ដោយប្រើប្រាស់តែឧបករណ៍បុរាណទាំងអស់ រួមមានដូចជា ឈ្នាង អង្រុត និងសំណាញ់ជាដើម។ លោកបន្ថែមថា សម្រាប់ទិន្នផលត្រីឆ្នាំនេះ មានប្រហាក់ប្រហែលឆ្នាំមុន ប៉ុន្តែអ្នកចូលរួមមានចំនួនច្រើនជាងឆ្នាំមុនៗ។ លោកបន្ថែមថា ប្រជាពលរដ្ឋនឹងបន្ដថែរក្សាប្រពៃណីដូនតាចាប់ត្រីនេះជារៀងរហូត ដើម្បីទាក់ទាញអ្នកទេសចរទៅកម្សាន្ដ ដោយពួកគាត់ នឹងអភិរក្សត្រីក្នុងបឹងសហគមន៍មួយនេះនៅឆ្នាំក្រោយៗទៀត។

លោក ទា គឹមសុទ្ធ ប្រធានមន្ទីរកសិកម្មរុក្ខាប្រម៉ាញ់ និងនេសាទ ខេត្តសៀមរាប បានឲ្យដឹងថា បឹងសហគម៍មួយនេះ ត្រូវបានលែងកូនត្រីប្រមាណមួយម៉ឺនក្បាលកាលពីរដូវវស្សាកន្លងមក ហើយបានអភិរក្សបានយ៉ាងល្អ ដែលធ្វើឱ្យក្នុងបឹងរក្សាបានកំណើនត្រីច្រើនគួរឱ្យកត់សំគាល់។ លោកបន្ថែមថា ពិធីចាប់ត្រីសហគមន៍ឆ្នាំនេះ មានមនុស្សចូលរួមច្រើន ដោយសារអាជ្ញាធរបានប្រកាសចាប់ត្រីប្រពៃណីនេះជាសាធារណៈដោយមិនប្រកាន់អ្នកមកពីទីជិតឆ្ងាយឡើយ។

លោកបានបន្តថា ពិធីនេះមានសារៈសំខាន់ណាស់ ទី១ រក្សាបានវប្បធម៌ ប្រពៃណី ទំនៀមទម្លាប់ របស់ដូនតាយើង ទី២ទាក់ទាញភ្ញៀវទេសចរជាតិ និងអន្តរជាតិឱ្យពួកគាត់មកឃើញអំពីទំនៀមទម្លាប់ និងអ្វីដែលយើងបានអភិរក្សនេះ ព្រោះស្រុកប្រាសាទបាគង ជាស្រុកមរតកវប្បធម៌ និងទី៣នៅពេលគេស្គាល់កន្លែងយើងច្រើន ប្រជាសហគមន៍ និងទទួលបានចំណូល ហើយក៏មានការអភិវឌ្ឍនៅមូលដ្ឋានយើងជាបន្តបន្ទាប់ផងដែរ។

លោកបានបន្តថា កាលពីមុនពិធីចាប់ត្រីនេះ អ្នកមកចូលរួមគឺមានតែអ្នកភូមិបង្កោងប៉ុណ្ណោះ ប៉ុន្តែឥឡូវដោយមានការផ្សព្វផ្សាយបានទូលំទូលាយ ធ្វើឱ្យមានការចូលរួមច្រើនមកពីគ្រប់ទិសទី មានទាំងភ្ញៀវទេសចរបរទេសផងដែរ។ ដូចនេះអាជ្ញាធរមានគម្រោងបន្តលេងកូនត្រីនៅក្នុងបឹងនេះបន្ថែម ហើយដល់ខែទឹកឡើងដាក់ព្រួលការពារកុំឱ្យត្រី នៅក្នុងបឹងនេះចេញទៅខាងក្រៅ ជាពិសេសនោះ គឺអាជ្ញាធរមានគម្រោងរៀបចំធ្វើយ៉ាងម៉េចឱ្យប្រជាពលរដ្ឋនៅក្នុងមូលដ្ឋាននេះទទួលបានចំណូលដោយផ្ទាល់ផងដែរ៕

អត្ថបទ៖ ជុន កុសល

The post អ្នកស្រុកតំបន់អង្គរ បន្ដធ្វើពិធីចាប់ត្រីរួមគ្នា​តាមទំនៀមទម្លាប់ពីដូនតា សម្រាប់ប្រារព្ធពិធីឡើង​មាឃ appeared first on Kampuchea Thmey Daily.

ការបញ្ជាក់នេះ ធ្វើឡើងនៅថ្ងៃទី១ ខែសីហា ឆ្នាំ២០២៤ នៅក្នុងសន្និសីទសារព័ត៌មាន ស្តីពីលទ្ធផលលើកទី៤៦ របស់គណកម្មការបេតិកភណ្ឌពិភពលោក នៅប្រទេសឥណ្ឌា ដែលធ្វើឡើងនៅព្រឹកថ្ងៃទី១ ខែសីហា ឆ្នាំ២០២៤ នៅក្រសួងវប្បធម៌ និងវិចិត្រសិល្បៈ។ ការបកស្រាយនេះ ក្រោយពីសប្តាហ៍មុន មានហេតុការណ៍គួរឱ្យរន្ធត់បានកើតឡើងដោយសារដើមឈើធំ១ នៅក្បែរខ្លោងទ្វារទន្លេអុំ បានរលំសង្កត់ត្រូវអ្នកដំណើរមួយក្រុមធ្វើឱ្យមានអ្នកបាត់បង់ជីវិត និងរបួសផងដែរ។ ក្រោយមានហេតុការណ៍នេះ អាជ្ញាធរជាតិអប្សរា ក៏បានកាប់ដើមឈើដែលពុកចាស់ ចោលដើម្បីបង្ការកុំឱ្យមានគ្រោះថ្នាក់បន្តទៀត។ ពាក់ព័ន្ធការកាប់ដើមឈើទាំងនេះ បានធ្វើឱ្យប្រជាជនមួយចំនួនសម្តែងការមិនពេញចិត្ត ថែមទាំងចោទទៅអាជ្ញាធរជាតិអប្សរាថា ឆ្លៀតឱកាសនេះកាប់ដើមឈើធំៗ ដើម្បីផលប្រយោជន៍ផ្ទាល់ខ្លួនទៅវិញ។

យ៉ាងណាមិញ លោក ហង់ ពៅ បកស្រាយថា ករណីកាប់ដើមឈើនេះ គឺអាជ្ញាធរជាតិអប្សរា បានសិក្សាច្បាស់លាស់ គ្រប់ជ្រុងជ្រោយ ដោយមន្ត្រីជំនាញ មុននឹងសម្រេចចិត្តថាកាប់ដើមឈើទាំងនោះ ព្រោះថា ដើមឈើខ្លះមើលពីខាងក្រៅគឺល្អ ប៉ុន្តែ ឫស និងផ្នែកខាងក្នុងនៃដើមឈើមួយចំនួននោះគឺពុកទៅហើយ។ ដូច្នេះ ដើម្បីសុវត្ថិភាពរបស់អ្នកដំណើរ ទើបអាជ្ញាធរជាតិអប្សរាសម្រេចធ្វើបែបនេះ។

លោកបញ្ជាក់ទៀតថា អាជ្ញាធរធ្វើនេះ មិនមែនក្នុងន័យបំផ្លាញ ឬ កេងចំណេញដូចមតិមហាជនបានលើកឡើងទេ ប៉ុន្តែ ដើម្បីការពារសុវត្ថិភាពប្រជាជនប៉ុណ្ណោះ មួយវិញទៀត អាជ្ញាធរជាតិអប្សរា ក៏ស្រឡាញ់ដើមឈើដូចគ្នា ព្រមទាំងខិតខំអភិរក្ស និងដាំដើមឈើរាប់ម៉ឺនដើមនៅតំបន់អង្គរវត្តថែមទៀត។

ឆ្លៀតក្នុងឱកាសនេះ លោក ហង់ ពៅ ក៏បានផ្តាំដល់សាធារណជនដែលមានបំណងចង់ដាំដើមឈើនៅដំបន់អង្គរ អាចយកទៅដាំបាន ព្រោះក៏មានការចែកពូជកូនឈើនៅតំបន់អង្គររាប់ម៉ឺនដើមដល់សាធារណជនផងដែរ៕

ដោយ៖ អុន ស្រីមាន

The post អគ្គនាយកអាជ្ញាធរជាតិអប្សរា៖ ការកាប់ដើមឈើនៅតំបន់អង្គរ មិនមែនបំផ្លាញ ឬយកចំណេញទេ តែដើម្បីសុវត្ថិភាព appeared first on Kampuchea Thmey Daily.

បើតាមលោកអភិបាលខេត្ត គោលបំណងនៃកិច្ចប្រជុំនេះ គឺដើមី្បណែនាំដល់អាជ្ញាធរមូលដ្ឋានគ្រប់ជាន់ថ្នាក់ក្នុងការចូលរួមសហការគ្នាឱ្យបានល្អលើការទប់ស្កាត់មិនឱ្យមានការសាងសង់សំណង់ថ្មីក្នុងតំបន់រមណីយដ្ឋានអង្គរ  ក្នុងរយៈពេលយុទ្ធនាការតម្រង់ទិសនេះ។ ក្នុងនោះ អាជ្ញាធរក្រុង ស្រុក មេឃុំ ចៅសង្កាត់ និងមេភូមិ ក៏បានធ្វើសេចក្តីរាយការណ៍ស្តីពីកិច្ចសហការរបស់អាជ្ញាធរមូលដ្ឋាន ជាមួយកម្លាំងអាជ្ញាធរជាតិអប្សរា ក្នុងពេលកន្លងមក និងបញ្ហាប្រឈមដែលធ្វើឱ្យប៉ះពាល់ដល់ផលប្រយោជន៍របស់ពលរដ្ឋុ។  

បើតាមរបាយការណ៍របស់អាជ្ញាធរមូលដ្ឋាន ក្នុងរយៈពេលយុទ្ធនាការតម្រង់ទិសនេះ ប្រជាពលរដ្ឋស្ថិតនៅក្នុងតំបន់រមណីយដ្ឋានអង្គរបានស្ម័ត្រចិត្តផ្លាស់ប្ដូរលំនៅដ្ឋានរបស់ខ្លួន ទៅរស់នៅលើតំបន់អភិវឌ្ឍន៍រុនតាឯក និងតំបន់ពាក់ស្នែង នាស្រុកអង្គរធំ ដែលរាជរដ្ឋាភិបាល បានផ្តល់ជូន ក៏ប៉ុន្តែមួយចំនួន នៅមិនទាន់បានរុះរើផ្ទះនៅឡើយ។ តែយ៉ាងណា អាជ្ញាធរមូលដ្ឋាន បានប្តេជ្ញាក្នុងការទប់ស្កាត់មិនឱ្យមានការសាងសង់សំណង់ថ្មី នៅក្នុងតំបន់រមណីយដ្ឋានអង្គរ ឬសំណង់អាណាធិបតេយ្យទៀតឡើយ។

លោក ប្រាក់ សោភ័ណ  អភិបាលខេត្តសៀមរាប​ បានលើកឡើងនូវចំណារលិខិតរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី ដែលបានបញ្ជាក់ថា រាជរដ្ឋាភិបាល បានផ្តល់ភារកិច្ចជូនអាជ្ញាធរខេត្តសៀមរាប ក្រុងសៀមរាប ស្រុកប្រាសាទបាគង ស្រុកពួក ស្រុកបន្ទាយស្រី និងស្រុកអង្គរធំ ត្រូវធ្វើការហាមឃាត់ដាច់ខាត គឺមិនអនុញ្ញាតឱ្យប្រជាពលរដ្ឋ ចូលទៅតាំងទីលំនៅ និងសាងសង់ផ្ទះ នៅក្នុងតំបន់ការពារបេតិកភណ្ឌឡើយ។

លោកអភិបាលខេត្ត បានក្រើនរំលឹកដល់អាជ្ញាធរមូលដ្ឋានស្ថិតនៅក្នុងតំបន់រមណីយដ្ឋានអង្គរ ត្រូវផ្តោតការយកចិត្តទុក ដាក់ខ្ពស់ ក្នុងការការពារនៅតំបន់ដែលប្រជាពលរដ្ឋបានស្ម័ត្រចិត្តផ្លាស់ប្ដូរ ទៅរស់នៅតំបន់រុនតាឯក ដើមី្បកុំឱ្យមានការចូលមករស់នៅបន្តទៀត។ លោកអភិបាលខេត្ត បានណែនាំអាជ្ញាធរមូលដ្ឋានឱ្យចូលរួមទប់ស្កាត់ និងបំពេញតួនាទីឱ្យបានត្រឹមត្រូវ  ស្របតាមការណែនាំ និងលិខិតបទដ្ឋានគតិយុត្តជាធរមាន ព្រមទាំងបានសំណូមពរដល់ប្រជាពលរដ្ឋកុំឱ្យសាងសង់សំណង់ថ្មី ឬសាងសង់បន្ថែមលើសំណង់ដែលមានស្រាប់ផងដែរ។

រាល់ការងារដែលកំពុងអនុវត្តក្នុងយុទ្ធនាការតម្រង់ទិសនេះ ត្រូវបានលោកអភិបាលខេត្ត បញ្ជាក់ថា គឺដើមី្បចូលរួមជាមួយរាជរដ្ឋាភិបាលក្នុងការថែទាំអភិរក្សនៅក្នុងតំបន់រមណីយដ្ឋានអង្គរ ដែលជាមរតកកេរ្តិ៍ដូនតា ជាអត្តសញ្ញាណ និងដួងព្រលឹងរបស់ជាតិ ក៏ដូចជាតម្លៃជាសកល នៃសម្បត្តិបេតិកភណ្ឌពិភពលោក សម្រាប់មនុស្សជាតិទាំងមូល៕

ដោយ៖ គឿន វេត

The post អភិបាលខេត្តសៀមរាប បញ្ជាឱ្យអាជ្ញាធរទប់ស្កាត់ការសាងសង់សំណង់ថ្មីក្នុងតំបន់រមណីយដ្ឋានអង្គរ appeared first on Kampuchea Thmey Daily.