អភិបាលខេត្តសៀមរាប បញ្ជាឱ្យអាជ្ញាធរទប់ស្កាត់ការសាងសង់សំណង់ថ្មីក្នុងតំបន់រមណីយដ្ឋានអង្គរ

ក្នុងឱកាសដឹកនាំកិច្ចប្រជុំ នៅថ្ងៃទី១៦ ខែមករា ឆ្នាំ២០២៤នេះ លោក ប្រាក់ សោភ័ណ អភិបាលខេត្តសៀមរាប ណែនាំដល់អាជ្ញាធរមូលដ្ឋានឱ្យទប់ស្កាត់ការសាងសង់សំណង់ថ្មីនៅក្នុងតំបន់រមណីយដ្ឋានអង្គរ តាមរយៈការសម្រេចរបស់ក្រុមការងារអនុវត្តកន្លងមក។

បើតាមលោកអភិបាលខេត្ត គោលបំណងនៃកិច្ចប្រជុំនេះ គឺដើមី្បណែនាំដល់អាជ្ញាធរមូលដ្ឋានគ្រប់ជាន់ថ្នាក់ក្នុងការចូលរួមសហការគ្នាឱ្យបានល្អលើការទប់ស្កាត់មិនឱ្យមានការសាងសង់សំណង់ថ្មីក្នុងតំបន់រមណីយដ្ឋានអង្គរ  ក្នុងរយៈពេលយុទ្ធនាការតម្រង់ទិសនេះ។ ក្នុងនោះ អាជ្ញាធរក្រុង ស្រុក មេឃុំ ចៅសង្កាត់ និងមេភូមិ ក៏បានធ្វើសេចក្តីរាយការណ៍ស្តីពីកិច្ចសហការរបស់អាជ្ញាធរមូលដ្ឋាន ជាមួយកម្លាំងអាជ្ញាធរជាតិអប្សរា ក្នុងពេលកន្លងមក និងបញ្ហាប្រឈមដែលធ្វើឱ្យប៉ះពាល់ដល់ផលប្រយោជន៍របស់ពលរដ្ឋុ។  

បើតាមរបាយការណ៍របស់អាជ្ញាធរមូលដ្ឋាន ក្នុងរយៈពេលយុទ្ធនាការតម្រង់ទិសនេះ ប្រជាពលរដ្ឋស្ថិតនៅក្នុងតំបន់រមណីយដ្ឋានអង្គរបានស្ម័ត្រចិត្តផ្លាស់ប្ដូរលំនៅដ្ឋានរបស់ខ្លួន ទៅរស់នៅលើតំបន់អភិវឌ្ឍន៍រុនតាឯក និងតំបន់ពាក់ស្នែង នាស្រុកអង្គរធំ ដែលរាជរដ្ឋាភិបាល បានផ្តល់ជូន ក៏ប៉ុន្តែមួយចំនួន នៅមិនទាន់បានរុះរើផ្ទះនៅឡើយ។ តែយ៉ាងណា អាជ្ញាធរមូលដ្ឋាន បានប្តេជ្ញាក្នុងការទប់ស្កាត់មិនឱ្យមានការសាងសង់សំណង់ថ្មី នៅក្នុងតំបន់រមណីយដ្ឋានអង្គរ ឬសំណង់អាណាធិបតេយ្យទៀតឡើយ។

លោក ប្រាក់ សោភ័ណ  អភិបាលខេត្តសៀមរាប​ បានលើកឡើងនូវចំណារលិខិតរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី ដែលបានបញ្ជាក់ថា រាជរដ្ឋាភិបាល បានផ្តល់ភារកិច្ចជូនអាជ្ញាធរខេត្តសៀមរាប ក្រុងសៀមរាប ស្រុកប្រាសាទបាគង ស្រុកពួក ស្រុកបន្ទាយស្រី និងស្រុកអង្គរធំ ត្រូវធ្វើការហាមឃាត់ដាច់ខាត គឺមិនអនុញ្ញាតឱ្យប្រជាពលរដ្ឋ ចូលទៅតាំងទីលំនៅ និងសាងសង់ផ្ទះ នៅក្នុងតំបន់ការពារបេតិកភណ្ឌឡើយ។

លោកអភិបាលខេត្ត បានក្រើនរំលឹកដល់អាជ្ញាធរមូលដ្ឋានស្ថិតនៅក្នុងតំបន់រមណីយដ្ឋានអង្គរ ត្រូវផ្តោតការយកចិត្តទុក ដាក់ខ្ពស់ ក្នុងការការពារនៅតំបន់ដែលប្រជាពលរដ្ឋបានស្ម័ត្រចិត្តផ្លាស់ប្ដូរ ទៅរស់នៅតំបន់រុនតាឯក ដើមី្បកុំឱ្យមានការចូលមករស់នៅបន្តទៀត។ លោកអភិបាលខេត្ត បានណែនាំអាជ្ញាធរមូលដ្ឋានឱ្យចូលរួមទប់ស្កាត់ និងបំពេញតួនាទីឱ្យបានត្រឹមត្រូវ  ស្របតាមការណែនាំ និងលិខិតបទដ្ឋានគតិយុត្តជាធរមាន ព្រមទាំងបានសំណូមពរដល់ប្រជាពលរដ្ឋកុំឱ្យសាងសង់សំណង់ថ្មី ឬសាងសង់បន្ថែមលើសំណង់ដែលមានស្រាប់ផងដែរ។

រាល់ការងារដែលកំពុងអនុវត្តក្នុងយុទ្ធនាការតម្រង់ទិសនេះ ត្រូវបានលោកអភិបាលខេត្ត បញ្ជាក់ថា គឺដើមី្បចូលរួមជាមួយរាជរដ្ឋាភិបាលក្នុងការថែទាំអភិរក្សនៅក្នុងតំបន់រមណីយដ្ឋានអង្គរ ដែលជាមរតកកេរ្តិ៍ដូនតា ជាអត្តសញ្ញាណ និងដួងព្រលឹងរបស់ជាតិ ក៏ដូចជាតម្លៃជាសកល នៃសម្បត្តិបេតិកភណ្ឌពិភពលោក សម្រាប់មនុស្សជាតិទាំងមូល៕

ដោយ៖ គឿន វេត