ទាហាន Archives - Kampuchea Thmey Daily

រុស្ស៊ី ដោះលែងទាហានអ៊ុយក្រែន ២០៥នាក់ មកមាតុភូមិវិញ សម្របសម្រួលដោយអាមេរិក

Minea Neu — Fri, 15 May 2026 14:09:00 +0000

អ៊ុយក្រែនបាននាំយកទាហានចំនួន ២០៥នាក់ ពីប្រទេសរុស្ស៊ីមកមាតុភូមិវិញ ក្រោយការចាប់ខ្លួនអស់ជិត៤ឆ្នាំ ដែលនេះជាផ្នែកមួយនៃដំណាក់កាលដំបូងនៃការផ្លាស់ប្តូរទាហាន ១០០០ ទល់នឹង ១០០០ ជាមួយរុស្ស៊ី។

យោងតាមភ្នាក់ងារសារព័ត៌មានរ៉យទ័រ និងសារព័ត៌មានផ្សេងទៀត ចុះផ្សាយថ្ងៃទី១៥ ខែឧសភា ឆ្នាំ២០២៦ សមាជិកយោធាដែលត្រូវបានដោះលែងរួមមានទាហាន ពលបាលឯក និងមន្ត្រីការពារទីក្រុង Mariupol តំបន់ Azovstal និងតំបន់ជួរមុខជាច្រើនចាប់តាំងពីឆ្នាំ ២០២២ ។

ទាហានអ៊ុយក្រែនជាមួយប្រពន្ធ។ រូបភាព៖ Reuters

ប្រធានាធិបតី វ៉ូឡូឌីមៀ ហ្សេលេនស្គី ថា ទាហានអ៊ុយក្រែនចំនួន ២០៥នាក់ បានត្រឡប់ពីប្រទេសរុស្ស៊ីវិញនៅថ្ងៃសុក្រ ទី១៥ ខែឧសភា ក្នុងដំណាក់កាលដំបូងនៃការផ្លាស់ប្តូរទាហាន ១០០០នាក់ជាមួយរុស្ស៊ី ដែលបានគ្រោងទុក។

យោងតាមគេហទំព័រផ្លូវការរបស់ លោក ហ្សេលេនស្គី ទាហានដែលត្រូវបានដោះលែងរួមមានសមាជិកកងកម្លាំងប្រដាប់អាវុធអ៊ុយក្រែន ឆ្មាំជាតិ និងសេវាឆ្មាំព្រំដែនរដ្ឋ។

លោកបន្តថា៖ « នេះជាដំណាក់កាលដំបូងនៃការដោះដូរទាហាន ១០០០ ទល់នឹង ១០០០ »។

ទីស្នាក់ការកណ្តាលសម្របសម្រួលអ្នកទោសសង្គ្រាមរបស់អ៊ុយក្រែន ថា ការដោះដូរនេះត្រូវបានអនុវត្តក្រោមកិច្ចព្រមព្រៀងដែលសម្រេចបានជាមួយនឹងការសម្របសម្រួលរបស់សហរដ្ឋអាមេរិក។

ការដោះដូរនេះបម្រើជាលក្ខខណ្ឌជាមុនសម្រាប់កិច្ចព្រមព្រៀងរបស់ទីក្រុងកៀវ ចំពោះបទឈប់បាញ់ឯកតោភាគីរបស់ទីក្រុងមូស្គូចាប់ពីថ្ងៃទី ៩ ដល់ ថ្ងៃទី១១ ខែឧសភា ទោះបីជាភាគីទាំងពីរបានចោទប្រកាន់គ្នាទៅវិញទៅមកថាបានរំលោភលើបទឈប់បាញ់រយៈពេលបីថ្ងៃ និងពន្យារពេលការដោះដូរអ្នកទោសក៏ដោយ៕

សម្រួល៖ ណឺ មិនា

The post រុស្ស៊ី ដោះលែងទាហានអ៊ុយក្រែន ២០៥នាក់ មកមាតុភូមិវិញ សម្របសម្រួលដោយអាមេរិក appeared first on Kampuchea Thmey Daily.

ទាហានអ៊ុយក្រែន កំពុងតស៊ូនឹងភាពអត់ឃ្លានយ៉ាងធ្ងន់ធ្ងរ នៅជួរមុខ

Minea Neu — Wed, 13 May 2026 11:20:00 +0000

រូបភាពអង្វររបស់ទាហានស្គមស្គាំងអ៊ុយក្រែន ៤នាក់ ធ្វើឱ្យប្រជាជនអ៊ុយក្រែនរំជើបរំជួលចិត្ត នៅចុងខែមេសា។ ទាហានទាំង៤នាក់នោះ អត់អាហារនៅជួរមុខរយៈពេល១៧ថ្ងៃ ដោយគ្មានការដឹកជញ្ជូនអាហារ ជាពិសេសមិនបានប្តូរវេនច្រើនខែ។

យោងតាមសារព័ត៌មាន Al Jazeera ចុះផ្សាយថ្ងៃទី១២ ខែឧសភា ឆ្នាំ២០២៦ អ្នកស្រី Anastasia Silchuk មានស្វាមីបម្រើការជាកងពលតូចលេខ១៤ សរសេរលើបណ្តាញសង្គម នៅថ្ងៃទី២២ ខែមេសា ថា៖ « យុទ្ធជនដួលសន្លប់ដោយសារភាពអត់ឃ្លាន ពួកគេផឹកទឹកភ្លៀង»។

ទាហានអ៊ុយក្រែនកំពុងតស៊ូប្រយុទ្ធជាមួយរុស្ស៊ី។ រូបភាព៖ Reuters

យុទ្ធជនទាំងនោះលាក់ខ្លួននៅខាងឆ្វេងច្រាំងទន្លេ Oskil ខាងកើតក្នុងតំបន់ Donetsk បន្ទាប់ពីគ្រាប់បែករុស្ស៊ីបានបំផ្លាញស្ពាន តភ្ជាប់ទៅកាន់ក្រុមកងពលតូចរបស់ពួកគេនៅច្រាំងខាងស្តាំ។

អ្នកស្រី Silchuk សរសេរថា៖ « មនុស្សមិនស្តាប់ពួកគេតាមវិទ្យុទេ ឬប្រហែលជាគ្មាននរណាម្នាក់ចង់ស្តាប់ពួកគេទេ។ ស្វាមីរបស់ខ្ញុំបានស្រែកនិងអង្វរ ថាគ្មានអាហារ និងទឹកផឹកទេ»។ យ៉ាងណា អ្នកស្រីមិនបានឆ្លើយតបជាមួយសារព័ត៌មាន Al Jazeera លម្អិតឡើយ។

ដោយឡែក លោក Oleksandr ជាទាហានម្នាក់ទើបតែបម្រើការថ្មីៗ ប្រាប់ Al Jazeera ថា៖ « មានអារម្មណ៍ថា ផលប៉ះពាល់នៃភាពអត់ឃ្លានគឺកាន់តែខ្លាំង អំឡុងពេលកំពុងប្រយុទ្ធដើម្បីមាតុភូមិ»។

ខណៈកំពុងលាក់ខ្លួននៅក្នុងលេណដ្ឋានដាច់ស្រយាល និងលាក់បាំងបំផុតលើខ្សែត្រៀមជួរមុខ គ្មានដើមឈើ នាភាគអាគ្នេយ៍អ៊ុយក្រែនកាលពីដើមឆ្នាំនេះ លោក Oleksandr នឹកគ្រួសារ ផ្ទះសម្បែងនិងជីវិតដែលខ្លួនធ្លាប់មាន មុនពេលការឈ្លានពានទ្រង់ទ្រាយធំរបស់រុស្ស៊ីនៅដើមឆ្នាំ ២០២២ ប៉ុន្តែអ្វីដែលលោកនឹកបំផុត គឺអាហារដ៏ពិតប្រាកដមួយចានប៉ុណ្ណោះ។

រីឯទាហានម្នាក់សុំមិនបញ្ចេញឈ្មោះ អាយុ ៣១ឆ្នាំ មានស្នាមសាក់ កំពុងស៊ាំនឹងជង្គង់សេរ៉ាមិចនៅទីក្រុងកៀវប្រាប់ Al Jazeera ថា៖ « យើងស្រមៃចង់បានអាហារក្តៅៗ ពីព្រោះអ្វីដែលយើងទទួលទានជាច្រើនសប្តាហ៍គឺសូកូឡា អូតមីល (ធញ្ញជាតិលាយជាមួយស្រូវសាលី) និងទឹកមួយដបក្នុងមួយថ្ងៃប៉ុណ្ណោះ»៕

សម្រួល៖ ណឺ មិនា

The post ទាហានអ៊ុយក្រែន កំពុងតស៊ូនឹងភាពអត់ឃ្លានយ៉ាងធ្ងន់ធ្ងរ នៅជួរមុខ appeared first on Kampuchea Thmey Daily.

បុរសជនជាតិអាមេរិកដែលមានអាយុ១៨ឆ្នាំ នឹងត្រូវចុះឈ្មោះបម្រើកងទ័ពដោយស្វ័យប្រវត្តិ

Minea Neu — Fri, 10 Apr 2026 06:36:13 +0000

បុរសជនជាតិអាមេរិកនឹងត្រូវចុះឈ្មោះចូលបម្រើកងទ័ពដោយស្វ័យប្រវត្តិចាប់ពីអាយុ១៨ឆ្នាំ។ ការផ្លាស់ប្តូរនេះតម្រូវឱ្យលុបបំបាត់នីតិវិធីស្មុគស្មាញផ្សេងៗសម្រាប់បុរសមានអាយុចន្លោះពី១៨ ទៅ ២៥ឆ្នាំ ដើម្បីចុះឈ្មោះដោយខ្លួនឯងជាមួយប្រព័ន្ធសេវាកម្មជ្រើសរើស (SSS) ជាទីភ្នាក់ងាររដ្ឋាភិបាលរក្សាទិន្នន័យមូលដ្ឋាលរបស់ពួកគេ ក្នុងករណីណាមួយដែលអាចហៅឱ្យចូលបម្រើកងទ័ពក្នុងគ្រាអាសន្នរបស់ជាតិ។ នេះបើយោងតាមកាសែត The Telegraph ផ្សាយថ្ងៃទី៩ ខែមេសា ឆ្នាំ២០២៦ ។

ព័ត៌មានលម្អិតរបស់ពួកគេនឹងត្រូវទាញយកដោយស្វ័យប្រវត្តិពីប្រភពទិន្នន័យសហព័ន្ធក្នុងប្រព័ន្ធមួយកំណត់ឱ្យដាក់ឱ្យដំណើរការនៅខែធ្នូ។

ទាហានអាមេរិក។ រូបភាព៖ Reuters

ក្រោមច្បាប់ថ្មីរបស់សហរដ្ឋអាមេរិក បុរសនឹងត្រូវចុះឈ្មោះដោយស្វ័យប្រវត្តិក្នុងរយៈពេល ៣០ថ្ងៃ បន្ទាប់ពីពួកគេមានអាយុ ១៨ឆ្នាំ។ យ៉ាងណា ស្ត្រីនៅតែមិនមានសិទ្ធិចូលរួមបំពេញកាតព្វកិច្ចយោធានេះនៅឡើយទេ ទោះបីអ្នកនយោបាយ ព្យាយាមឱ្យបញ្ចូលពួកគេក្នុងការបម្រើវិស័យយោធាម្តងហើយម្តងទៀត ប៉ុន្មានឆ្នាំចុងក្រោយនេះក៏ដោយ។

សហរដ្ឋអាមេរិកចាប់ផ្តើមបង្កើនការត្រៀមខ្លួនផ្នែកយោធាដែលឆ្លុះបញ្ចាំងពីនិន្នាការនៅទូទាំងបស្ចិមប្រទេស ដោយអាល្លឺម៉ង់និងបារាំងណែនាំទម្រង់ថ្មីនៃការបម្រើជាតិក្នុងឆ្នាំកន្លងមក។ សភាសហរដ្ឋអាមេរិកបានអនុម័តច្បាប់ចុះឈ្មោះដោយស្វ័យប្រវត្តិថ្មីនេះ ជាផ្នែកមួយនៃច្បាប់អនុញ្ញាតលើវិស័យការពារជាតិឆ្នាំ២០២៦ ។

យោងតាមប្រព័ន្ធ SSS ការផ្លាស់ប្តូរនេះមានបំណងកាត់បន្ថយការចំណាយនិងកាត់បន្ថយប្រព័ន្ធរដ្ឋបាល ប៉ុន្តែវាកើតឡើងចំពេលមានភាពតានតឹង អំឡុងសង្គ្រាមជាមួយអ៊ីរ៉ង់។

មនុស្សជាច្រើនសួរថា៖ « តើសង្គ្រាមបច្ចុប្បន្នដែលស្ថិតក្នុងបទឈប់បាញ់រយៈពេលពីរសប្តាហ៍ដ៏ផុយស្រួយ អាចនាំឱ្យមានការជ្រើសរើសទាហានបន្ថែមដែរឬទេ»?

លោកស្រី Karoline Leavitt អ្នកនាំពាក្យសេតវិមានឆ្លើយថា៖ « វាមិនមែនជាផ្នែកណាមួយនៃផែនការបច្ចុប្បន្នទេ! ប៉ុន្តែលោក ដូណាល់ ត្រាំ រក្សាជម្រើសរបស់គាត់ប្រកបដោយភាពឈ្លាសវៃ»។

គួរបញ្ជាក់ថា ការដាក់ឱ្យដំណើរការឡើងវិញនូវការជ្រើសរើសទាហានមិនមែនជាអំណាចរបស់ប្រធានាធិបតីតែម្នាក់ឯងនោះទេ។ រដ្ឋបាលនឹងត្រូវអនុម័តធ្វើវិសោធនកម្មច្បាប់ជ្រើសរើសទាហាន មុនពេលប្រធានាធិបតីណាម្នាក់អាចចាប់ផ្តើមបញ្ចូលពួកគេទៅក្នុងជួរកងទ័ព៕

ប្រែសម្រួល៖ ណឺ មិនា

The post បុរសជនជាតិអាមេរិកដែលមានអាយុ១៨ឆ្នាំ នឹងត្រូវចុះឈ្មោះបម្រើកងទ័ពដោយស្វ័យប្រវត្តិ appeared first on Kampuchea Thmey Daily.

ទាហានអាមេរិក៤នាក់ ក្នុងចំណោម ៦នាក់ស្លាប់ដំណាលគ្នា ដោយដ្រូនរបស់អ៊ីរ៉ង់នៅគុយវ៉ែត

Minea Neu — Wed, 04 Mar 2026 08:11:16 +0000

មន្ទីរបញ្ចកោណបានកំណត់អត្តសញ្ញាណទាហានអាមេរិកចំនួន៤នាក់ ក្នុងចំណោមទាហានទាំង៦នាក់កាលពីថ្ងៃអង្គារ ថាត្រូវបានសម្លាប់ក្នុងពេលដំណាលគ្នា ដោយការវាយប្រហារដោយដ្រូនរបស់អ៊ីរ៉ង់នៅប្រទេសគុយវ៉ែត។ នេះបើយោងតាម ABC News ចុះផ្សាយនៅថ្ងៃទី០៤ ខែមីនា ឆ្នាំ២០២៦ ។

ទាហានទាំង៤ ដែលបានស្លាប់នៅគុយវ៉ែត។ រូបភាព៖ Reuters

ក្នុងនោះមាន លោកអនុសេនីយ៍ឯក លោក Cody A. Khork អាយុ ៣៥ឆ្នាំ ពលបាលឯក លោក Noah L. Tietjens អាយុ៤២ឆ្នាំ លោកស្រី Nicole M. Amor អាយុ ៣៩ឆ្នាំ និង លោក Declan J. Coady អាយុ ២០ឆ្នាំ បានស្លាប់កាលពីថ្ងៃសៅរ៍ នៅប្រទេសគុយវ៉ែតដោយសារការវាយប្រហារដោយយន្តហោះគ្មានមនុស្សបើក(ដ្រូន) របស់អ៊ីរ៉ង់។

គួរបញ្ជាក់ថា ទាហានទាំងអស់ត្រូវបានចាត់តាំងឱ្យទៅកាន់កងបញ្ជាការទ្រទ្រង់ទី១០៣ ដែលជាអង្គភាពកងទ័ពបម្រុងមានមូលដ្ឋាននៅ Des Moines រដ្ឋ Iowa។

ទាហានទាំង៦នាក់បានស្លាប់នៅក្នុងការវាយប្រហារដូចគ្នា នៅកំពង់ផែ Shuaiba ក្នុងប្រទេសគុយវ៉ែត ជាកំពង់ផែពាណិជ្ជកម្មមួយ ដើរតួជាមជ្ឈមណ្ឌលភស្តុភារកម្ម ដែលយោធាសហរដ្ឋអាមេរិកដឹកជញ្ជូនយានយន្តយុទ្ធសាស្ត្រ និងសម្ភារៈផ្គត់ផ្គង់ចូលទៅក្នុងតំបន់។

ចំណែកអត្តសញ្ញាណពីរនាក់ផ្សេងទៀតត្រូវបានលាក់ទុកមួយថ្ងៃពេញ បន្ទាប់ពីសាច់ញាតិជិតស្និទ្ធបានជូនដំណឹង។ សមាជិកយោធាចំនួន ១៨នាក់បន្ថែមទៀត បានរងរបួសក្នុងការវាយប្រហារនេះ។

អ្នកទាំង ៦ នាក់តំណាងឱ្យជនជាតិអាមេរិកដំបូងគេ ដែលស្លាប់នៅក្នុងសមរភូមិក្នុងសង្គ្រាមរួមគ្នារវាងសហរដ្ឋអាមេរិក និងអ៊ីស្រាអែលប្រឆាំងនឹងអ៊ីរ៉ង់។

យុទ្ធនាការរួមគ្នារវាងសហរដ្ឋអាមេរិក និងអ៊ីស្រាអែលបានចូលដល់ថ្ងៃទី៤ នៅថ្ងៃអង្គារ ដោយកងកម្លាំងអាមេរិកបានវាយប្រហារគោលដៅជាង ១ ៧០០ ក្នុងប្រទេសអ៊ីរ៉ង់ ខណៈការប្រយុទ្ធគ្នាបានរីករាលដាលពាសពេញប្រទេសយ៉ាងហោចណាស់១២។

លោក ដូណាល់ ត្រាំ និងមន្ត្រីជាន់ខ្ពស់នៃមន្ទីរបញ្ចកោណបានព្រមានថា ចំនួនអ្នកស្លាប់នឹងអាចកើនឡើង៕

ប្រែសម្រួល៖ ណឺ មិនា

The post ទាហានអាមេរិក៤នាក់ ក្នុងចំណោម ៦នាក់ស្លាប់ដំណាលគ្នា ដោយដ្រូនរបស់អ៊ីរ៉ង់នៅគុយវ៉ែត appeared first on Kampuchea Thmey Daily.

ជនជាតិសិង្ហបុរី២នាក់រកឃើញចូលប្រយុទ្ធជាមួយកម្លាំងអ៊ីស្រាអែល

Minea Neu — Thu, 19 Feb 2026 08:37:17 +0000

ជនជាតិសិង្ហបុរីពីរនាក់ ត្រូវបានគេរកឃើញថា កំពុងមានឈ្មោះនៅក្នុងចំណោមទាហានជាង ៥០ ០០០នាក់នៃកងកម្លាំងការពារជាតិអ៊ីស្រាអែល (IDF) គិតត្រឹមខែមីនា ឆ្នាំ២០២៥ ក្នុងរយៈពេល១៧ខែនៃសង្គ្រាមនៅហ្គាហ្សា ដោយពួកគេមានសញ្ជាតិយ៉ាងហោចណាស់មួយផ្សេងទៀត។ នេះបើយោងតាមព័ត៌មានដែលទទួលបានដោយអង្គការមិនមែនរដ្ឋាភិបាលអ៊ីស្រាអែល (Hatzlacha )។

កងកម្លាំងអ៊ីស្រាអែល។ Anadolu

យោងតាម AsiaOne ចុះផ្សាយថ្ងៃទី១៩ខែកុម្ភៈឱ្យដឹងថា ទិន្នន័យដែលទទួលបានដោយអង្គការ Hatzlacha រាយការណ៍លើកដំបូងដោយក្រុមអ្នកសារព័ត៌មានស៊ើបអង្កេតរបស់អង់គ្លេស Declassified UK នៅថ្ងៃទី១១ ខែកុម្ភៈ។

យោងតាមទិន្នន័យ ទាហានអ៊ីស្រាអែលម្នាក់ត្រូវបានចុះបញ្ជីជាជនជាតិអ៊ីស្រាអែលផង និងសិង្ហបុរីផង ខណៈដែលទាហានឯទៀតបានចុះបញ្ជីដែលមានសញ្ជាតិច្រើន។ ជាពិសេសមានលិខិតឆ្លងដែនយ៉ាងហោចណាស់មួយផ្សេងទៀត រួមទាំងលិខិតឆ្លងដែនសិង្ហបុរី និងអ៊ីស្រាអែលផងដែរ។

គួរបញ្ជាក់ថា ប្រទេសសិង្ហបុរីមិនអនុញ្ញាតឱ្យមានសញ្ជាតិពីរទេ ប៉ុន្តែអនីតិជនអាចកាន់លិខិតឆ្លងដែនពីររហូតដល់ពួកគេមានអាយុ ២១ឆ្នាំ ពេលដែលពួកគេត្រូវសម្រេចចិត្តថាត្រូវលះបង់សញ្ជាតិសិង្ហបុរីឬអត់។

យោងតាមរដ្ឋធម្មនុញ្ញ រដ្ឋាភិបាលក៏អាចដកហូតសញ្ជាតិសិង្ហបុរីរបស់ពលរដ្ឋមានអាយុលើសពី ១៨ឆ្នាំ ដែលដាក់ពាក្យសុំចេញ ឬបន្តលិខិតឆ្លងដែន ឬប្រើប្រាស់លិខិតឆ្លងដែនបរទេសសម្រាប់ការធ្វើដំណើរ។

យ៉ាងណា លោក Amrin Amin អតីតលេខាធិការសភាជាន់ខ្ពស់ទទួលបន្ទុកកិច្ចការផ្ទៃក្នុងបានបង្ហោះនៅលើហ្វេសប៊ុកថ្ងៃទី១៨ ខែកុម្ភៈថា បើយោងតាមច្បាប់សិង្ហបុរី ពលរដ្ឋ និងអ្នករស់នៅអចិន្ត្រៃយ៍ក្នុងប្រទេសមិនអាចកាន់អាវុធនៅបរទេសបានទេ។

លោកលើកឡើងថា៖ « ខ្ញុំជឿជាក់ថាអាជ្ញាធររបស់យើងនឹងដោះស្រាយរឿងនេះបានយ៉ាងហ្មត់ចត់ និងយុត្តិធម៌។ ប្រសិនបើរបាយការណ៍នេះមិនត្រឹមត្រូវទេ ខ្ញុំសង្ឃឹមថាវានឹងត្រូវបញ្ជាក់ឱ្យច្បាស់លាស់។ ទោះជាយ៉ាងណាក៏ដោយ ការរកឃើញដែលមានតម្លាភាពគឺជាគន្លឹះក្នុងការរក្សាទំនុកចិត្តពីសាធារណជនលើភាពយុត្តិធម៌ និងភាពសុចរិតរបស់ប្រទេសសិង្ហបុរី»។

ទិន្នន័យ IDF ទទួលបានពី Hatzlacha បានបង្ហាញថាមានទាហានចំនួន ១៣ ១៣៥ នាក់របស់អ៊ីស្រាអែលកាន់លិខិតឆ្លងដែនអាមេរិក ដែលឈរនៅលំដាប់កំពូលនៃបញ្ជីដែលមានចំនួនច្រើន និងមានខ្លះទៀតមានលិខិតឆ្លងដែនមួយផ្សេងទៀត។

លើសពីនេះ មានជនជាតិរុស្ស៊ីយ៉ាងហោចណាស់ ៥ ០៦៧ នាក់ អាល្លឺម៉ង់ ៣ ៩០១ នាក់ អ៊ុយក្រែន ៣ ២១០ នាក់ និងអង់គ្លេស ១ ៦៨៦ នាក់ បានចុះឈ្មោះចូលក្នុងជួរកងទ័ពអ៊ីស្រាអែល គិតត្រឹមខែមីនា ឆ្នាំ ២០២៥៕

ប្រែសម្រួល៖ ណឺ មិនា

The post ជនជាតិសិង្ហបុរី២នាក់រកឃើញចូលប្រយុទ្ធជាមួយកម្លាំងអ៊ីស្រាអែល appeared first on Kampuchea Thmey Daily.

តុលាការរដ្ឋ Virginia បដិសេធមិនឲ្យអ្នកផ្ទុកមេរោគអេដស៍ចូលបម្រើកងទ័ព

Minea Neu — Thu, 19 Feb 2026 08:28:40 +0000

តុលាការឧទ្ធរណ៍សហរដ្ឋអាមេរិកគាំទ្រនូវគោលនយោបាយដ៏យូរអង្វែងរបស់យោធាសហរដ្ឋអាមេរិក ហាមឃាត់អ្នកផ្ទុកមេរោគអេដស៍ឱ្យចូលបម្រើកងទ័ព ហើយអះអាងថា ការរីកចម្រើនក្នុងវិស័យវេជ្ជសាស្រ្តគឺមិនសមហេតុផល។ នេះបើយោងតាមការចុះផ្សាយរបស់រ៉យទ័រ កាលពីថ្ងៃទី១៩ខែកុម្ភៈ ឆ្នាំ២០២៥ ។

កងកម្លាំងយោធាអាមេរិក។ Reuters

ចៅក្រមបីរូបរបស់សហរដ្ឋអាមេរិកមានមូលដ្ឋាននៅទីក្រុង Richmond រដ្ឋ Virginia បាននិយាយថា៖« ការអនុញ្ញាតឱ្យបុគ្គលដែលផ្ទុកមេរោគអេដស៍ ចូលរួមបម្រើវិស័យកងកម្លាំងប្រដាប់អាវុធអាចមិនល្អ ឬធ្វើឱ្យស្មុគស្មាញដល់បេសកកម្មរបស់យោធាដោយដាក់បន្ទុក និងការចំណាយផ្សេងៗ»។

តុលាការបានបដិសេធសេចក្តីសម្រេចឆ្នាំ២០២៤ ដោយចៅក្រមម្នាក់នៅរដ្ឋ Virginia ដោយការលុបចោលការហាមឃាត់ការចូលបម្រើកងទ័ព។

គោលនយោបាយនេះ បានអនុម័តជាផ្លូវការជាលើកដំបូងក្នុងឆ្នាំ ១៩៩១ ត្រូវបានជំទាស់ដោយមនុស្សបីនាក់ដែលមានផ្ទុកមេរោគអេដស៍។ ពួកគេនិយាយថាខ្លួនមិនមានរោគសញ្ញា មិនអាចរកឃើញការផ្ទុកមេរោគអ្វីឡើយ ដោយសារតែការព្យាបាល និងយកចិត្តទុកដាក់របស់គ្រូពេទ្យ។

មានអ្នកផ្ទុកមេរោគអេដស៍រហូតដល់ ៩៥ភាគរយ ទទួលការព្យាបាល តែមិនអាចរកឃើញថាមានរោគសញ្ញាអ្វី មានន័យថា ពួកគេមិនអាចចម្លងមេរោគទៅដៃគូផ្លូវភេទរបស់ពួកគេបានទេ។ នេះបើយោងតាមមជ្ឈមណ្ឌលគ្រប់គ្រង និងបង្ការជំងឺរបស់សហរដ្ឋអាមេរិក។

យ៉ាងណា តុលាការបាននិយាយកាលពីថ្ងៃពុធថា ការព្យាបាលអាចធ្វើឱ្យយោធាចំណាយរហូតដល់ ២០ ០០០ដុល្លារ ក្នុងមនុស្សម្នាក់ជារៀងរាល់ឆ្នាំ។ ពេលដែលមានសមាជិកយោធាផ្ទុកមេរោគអេដស៍នៅជួរមុខនឹងបង្ហាញពីបញ្ហាជាក់ស្តែងនិងផ្នែកការទូត។

តុលាការបន្តថា៖ «លើកឡើងទាំងអស់របស់យោធាគឺជាការវិនិច្ឆ័យសមហេតុផល ទាក់ទងនឹងបេសកកម្មស្របច្បាប់របស់យោធា ចំណែកគោលនយោបាយនេះគឺមានសុពលភាពខ្ពស់»។

ចំណែកមេធាវីម្នាក់បានលើកឡើងថា អ្នកផ្ទុកមេរោគដែលមិនអាចរកឃើញថាមានរោគសញ្ញាអ្វី កម្លាំងរបស់ពួកគេអាចដាក់ពង្រាយនៅគ្រប់ទីកន្លែង និងអនុវត្តភារកិច្ចគ្មានដែនកំណត់ ហើយពុំមានហានិភ័យនៃការចម្លងទៅអ្នកដទៃឡើយ។

លោក Gregory Nevins អ្នកធ្វើការលើសិទ្ធិអ្នកស្រឡាញ់ភេទដូចគ្នា (LGBTQ Lambda Legal) បានលើកឡើងក្នុងសេចក្តីថ្លែងការណ៍មួយថា៖ « សេចក្តីសម្រេចនេះមិនអើពើនឹងការរីកចម្រើនផ្នែកវេជ្ជសាស្ត្ររាប់ទសវត្សរ៍មកហើយនោះទេ ជាពិសេសសមត្ថភាពរបស់មនុស្សដែលរស់នៅជាមួយអ្នកផ្ទុកមេរោគអេដស៍គឺមានភាពខុសគ្នានិងមានសក្តានុពលរបស់ពួកគេរៀងខ្លួន»។

យ៉ាងណា ក្រសួងការពារជាតិអាមេរិកមិនទាន់ឆ្លើយតបពីករណីនេះនៅឡើយទេ៕

ប្រែសម្រួល៖ ណឺ មិនា

The post តុលាការរដ្ឋ Virginia បដិសេធមិនឲ្យអ្នកផ្ទុកមេរោគអេដស៍ចូលបម្រើកងទ័ព appeared first on Kampuchea Thmey Daily.

ទាហានអាមេរិកម្នាក់ស្លាប់ បន្ទាប់ពីធ្លាក់ពីលើនាវាចម្បាំង ក្បែរឆ្នេរសមុទ្រវ៉េណេស៊ុយអេឡា

Minea Neu — Fri, 13 Feb 2026 10:00:04 +0000

ទាហានអាមេរិកម្នាក់សន្មត់ថាស្លាប់ បន្ទាប់ពីបានធ្លាក់ពីលើនាវាចម្បាំងម៉ាក USS Iwo Jima នៅឯឆ្នេរសមុទ្រនៃប្រទេសវ៉េណេស៊ុយអេឡា និងស្វែងរករយៈពេលបីថ្ងៃ តែគ្មានផ្លែផ្កា។

លោក Chukwuemeka Oforah ក្នុងឆ្នាំ ២០២៤ អំឡុងពេលការវាយតម្លៃការត្រៀមខ្លួនប្រយុទ្ធរបស់កងម៉ារីននៅ Camp Lejeune ។ (រូបភាព៖ Marine Corps)

យោងតាម AFP ចុះផ្សាយថ្ងៃទី១៣ ខែកុម្ភៈ ឱ្យដឹងថា កងកម្លាំងម៉ារីនអាមេរិក (USMC) បានប្រកាសបញ្ចប់ប្រតិបត្តិការស្វែងរក លោក Chukwuemeka Oforah នៅថ្ងៃទី១២ ខែកុម្ភៈ ជាទាហាន មានអាយុ ២១ ឆ្នាំ ធ្លាក់ពីនាវាម៉ាក USS Iwo Jima ក្នុងសមុទ្រការ៉ាប៊ីន (Caribbean) ក្បែរប្រទេសវ៉េណេស៊ុយអេឡា កាលពីថ្ងៃទី៧ ខែកុម្ភៈ។

លោក Oforah ត្រូវបានគេកំណត់ថាបានស្លាប់ បន្ទាប់ពីការស្វែងរកមិនទទួលបានផ្លែផ្កាអស់រយៈពេល ៧២ ម៉ោង។

ប្រតិបត្តិការស្វែងរក និងការជួយសង្គ្រោះ ធ្វើឡើងដោយមានការចូលរួមពីកងកម្លាំងអាមេរិកជាច្រើន ក្នុងនោះមាននាវាកងទ័ពជើងទឹកចំនួន៥ យន្តហោះចំនួន១០គ្រឿង កម្លាំងទ័ពអាកាស និងកងម៉ារីន។ លើសពីនេះ USMC កំពុងស៊ើបអង្កេតពីមូលហេតុនៃការធ្លាក់របស់ លោក Oforah ចូលទៅក្នុងសមុទ្រ។

គួរបញ្ជាក់ថា លោក Oforah គឺជាសមាជិកសេវាកងកម្លាំងអាមេរិកដំបូងគេ ដែលត្រូវបានគេស្គាល់ច្រើនក្នុងប្រតិបត្តិការ Southern Spear របស់ក្រុងវ៉ាស៊ីនតោន នៅសមុទ្រការ៉ាប៊ីនកាលពីឆ្នាំមុន។

យោងតាមរដ្ឋបាលរបស់ប្រធានាធិបតី លោក ដូណាល់ ត្រាំ ប្រតិបត្តិការនេះត្រូវបានធ្វើឡើង ដើម្បីស្វែងរក និងចាប់បណ្តាញឧក្រិដ្ឋកម្មឆ្លងដែននៅតាមសមុទ្រ ជាពិសេសពាក់ព័ន្ធនឹងការជួញដូរគ្រឿងញៀន។

គួរបញ្ជាក់ថា យ៉ាងហោចណាស់មានទូកចំនួន ៣៩ ដែលគេសង្ស័យថាបានផ្ទុកសារធាតុហាមឃាត់បានលិចក្នុងសមុទ្រការ៉ាប៊ីន និងប៉ាស៊ីហ្វិកចាប់តាំងពីការចាប់ផ្តើមប្រតិបត្តិការ។ ជាពិសេសបានសម្លាប់មនុស្សរាប់សិបនាក់ ហើយកប៉ាល់វាយប្រហារម៉ាក់ USS Iwo Jima បានដើរតួនាទីសំខាន់ក្នុងប្រតិបត្តិការនេះ។

ចំណែក នាវាចម្បាំងនេះក៏បានចូលរួមក្នុងការប្រហាររបស់សហរដ្ឋអាមេរិក ដើម្បីចាប់យកប្រធានាធិបតីវ៉េណេស៊ុយអេឡា លោក នីកូឡាសម៉ាឌូរ៉ូ (Nicolas Maduro) កាលពីថ្ងៃទី៣ ខែមករា ផងដែរ៕

ប្រែសម្រួល៖ ណឺ មិនា

The post ទាហានអាមេរិកម្នាក់ស្លាប់ បន្ទាប់ពីធ្លាក់ពីលើនាវាចម្បាំង ក្បែរឆ្នេរសមុទ្រវ៉េណេស៊ុយអេឡា appeared first on Kampuchea Thmey Daily.

ពេលចាប់ខ្លួនម៉ាឌូរ៉ូ ទាហានវ៉េណេស៊ុយអេឡា និងគុយបាជាង៨០នាក់ ត្រូវបានសម្លាប់

Minea Neu — Sun, 18 Jan 2026 02:10:28 +0000

ទាហានស្រី្ត៩នាក់ ក្នុងចំណោមទាហានវ៉េណេស៊ុយអេឡាចំនួន ៤៧នាក់ ត្រូវបានសម្លាប់កាលពីដើមខែនេះ នៅពេលដែលសហរដ្ឋអាមេរិក បានវាយប្រហារលើរដ្ឋធានីការ៉ាកាស ពីការចាប់ខ្លួន អតីតប្រធានាធិបតី លោក នីកូឡាស ម៉ាឌូរ៉ូ ។ នេះបើតាមរដ្ឋមន្ត្រីការពារជាតិវ៉េណេស៊ុយអេឡា លោក Vladimir Padrino Lopez ។

ទាហាន វ៉េណេស៊ុយអេឡា។ Reuters

បើតាម Al Jazeera រដ្ឋមន្ត្រីក្រសួងការពារជាតិវ៉េណេស៊ុយអេឡា បានថ្លែងកាលពីថ្ងៃសុក្រ ចំនួនកងកម្លាំងវ៉េណេស៊ុយអេឡាដែលត្រូវបានសម្លាប់មានការកើនឡើង។ របាយការណ៍រកឃើញថា អ្នកស្លាប់មានចំនួន ២៣នាក់ និងទាហានសរុបចំនួន៨៣នាក់ ត្រូវបានសម្លាប់នៅក្នុងការវាយឆ្មក់ ដោយកងកម្លាំងសហរដ្ឋអាមេរិក កាលពីថ្ងៃទី៣ ខែមករា។

គួរឱ្យដឹងផងដែរថា ទាហានដែលត្រូវបានគេសម្លាប់ រួមមានទាហានគុយបាចំនួន ៣២នាក់ ដែលអ្នកខ្លះត្រូវបានចាត់ឱ្យទៅការពារផ្ទាល់ ឬជាជំនិតរបស់លោក ម៉ាឌូរ៉ូ ។

លោក Padrino បានថ្លែងនៅក្នុងកម្មពិធីមួយដើម្បី គោរពដល់អ្នកដែលត្រូវបានសម្លាប់ក្នុងការវាយប្រហារថា៖ «តើកងកម្លាំងទាំងបុរស និងស្ត្រី នៃកងកម្លាំងប្រដាប់អាវុធជាតិ Bolivarian National Armed Forces របស់យើង បានធ្វើអ្វីខ្លះ ក្នុងការតស៊ូប្រយុទ្ធ ពីការឈ្លានពានរបស់យោធាអាមេរិក? ជាការពិត ពួកគេបានលះបង់ជីវិតរបស់ពួកគេ ជាពិសេសពួកគេបានផ្តល់កិត្តិយសដល់ប្រវត្តិសាស្ត្រ និងមាតុភូមិ»។

មិនតែប៉ុណ្ណោះ មនុស្សជាង ១១២នាក់ ត្រូវបានគេរាយការណ៍ថាបានរងរបួសនៅក្នុងការវាយឆ្មក់របស់កងកម្លាំងសហរដ្ឋអាមេរិក ដែលបានចាប់ផ្តើមដោយការទម្លាក់គ្រាប់បែកមកលើគោលដៅយោធា ជាពិសេសទាហានអាមេរិកចាប់ពង្រត់ លោក ម៉ាឌូរ៉ូ និងភរិយារបស់ លោក គឺលោកស្រី Cilia Flores ពីលំនៅឋានរបស់ពួកគេក្នុងទីក្រុងការ៉ាកាស៕

ប្រែសម្រួល៖ ណឺ មិនា

The post ពេលចាប់ខ្លួនម៉ាឌូរ៉ូ ទាហានវ៉េណេស៊ុយអេឡា និងគុយបាជាង៨០នាក់ ត្រូវបានសម្លាប់ appeared first on Kampuchea Thmey Daily.

ទាហាន Archives - Kampuchea Thmey Daily

រុស្ស៊ី​ ដោះ​លែង​ទាហាន​អ៊ុយ​ក្រែន​ ២០៥​នាក់​ មក​មាតុ​ភូមិ​វិញ​ ​សម្រប​សម្រួល​ដោយ​អាមេរិក​​

​ទាហាន​អ៊ុយ​ក្រែន កំពុង​តស៊ូ​នឹង​ភាព​​អត់​ឃ្លាន​​យ៉ាងធ្ងន់ធ្ងរ​ នៅ​ជួរ​មុខ​

បុរស​ជនជាតិ​អាមេរិក​ដែល​មាន​អាយុ​១៨ឆ្នាំ​ នឹង​ត្រូវ​ចុះ​ឈ្មោះ​បម្រើ​កង​ទ័ព​ដោយ​ស្វ័យ​ប្រវត្តិ​

ទាហាន​អា​មេរិក​៤នាក់ ​ក្នុងចំណោម ៦នាក់ស្លាប់​ដំណាល​​គ្នា ដោយ​​ដ្រូន​របស់​អ៊ីរ៉ង់នៅ​គុយ​វ៉ែត​

ជន​ជាតិ​សិង្ហ​បុរី​២នាក់​រកឃើញ​​ចូល​​ប្រយុទ្ធ​ជាមួយ​កម្លាំង​អ៊ី​ស្រា​អែល​

តុលាការ​រដ្ឋ Virginia បដិសេធ​មិនឲ្យ​​អ្នក​ផ្ទុក​មេរោគអេដស៍ចូល​បម្រើកងទ័ព​

​ពេល​​ចាប់ខ្លួន​ម៉ាឌូរ៉ូ ទាហាន​​វ៉េណេ​ស៊ុយ​អេ​ឡា និងគុយបា​​ជាង​៨០​នាក់​​​ ត្រូវ​បាន​សម្លាប់​​​

រុស្ស៊ី ដោះលែងទាហានអ៊ុយក្រែន ២០៥នាក់ មកមាតុភូមិវិញ សម្របសម្រួលដោយអាមេរិក

ទាហានអ៊ុយក្រែន កំពុងតស៊ូនឹងភាពអត់ឃ្លានយ៉ាងធ្ងន់ធ្ងរ នៅជួរមុខ

បុរសជនជាតិអាមេរិកដែលមានអាយុ១៨ឆ្នាំ នឹងត្រូវចុះឈ្មោះបម្រើកងទ័ពដោយស្វ័យប្រវត្តិ

ទាហានអាមេរិក៤នាក់ ក្នុងចំណោម ៦នាក់ស្លាប់ដំណាលគ្នា ដោយដ្រូនរបស់អ៊ីរ៉ង់នៅគុយវ៉ែត

ជនជាតិសិង្ហបុរី២នាក់រកឃើញចូលប្រយុទ្ធជាមួយកម្លាំងអ៊ីស្រាអែល

តុលាការរដ្ឋ Virginia បដិសេធមិនឲ្យអ្នកផ្ទុកមេរោគអេដស៍ចូលបម្រើកងទ័ព

ពេលចាប់ខ្លួនម៉ាឌូរ៉ូ ទាហានវ៉េណេស៊ុយអេឡា និងគុយបាជាង៨០នាក់ ត្រូវបានសម្លាប់