ព័ត៌មានអន្ដរជាតិ

ទាហានអ៊ុយក្រែន កំពុងតស៊ូនឹងភាពអត់ឃ្លានយ៉ាងធ្ងន់ធ្ងរ នៅជួរមុខ

បានផុស

២ ខែ មុន

នៅ

ថ្ងៃពុធ ១៣ ឧសភា ២០២៦

ដោយ

រូបភាពអង្វររបស់ទាហានស្គមស្គាំងអ៊ុយក្រែន ៤នាក់ ធ្វើឱ្យប្រជាជនអ៊ុយក្រែនរំជើបរំជួលចិត្ត នៅចុងខែមេសា។ ទាហានទាំង៤នាក់នោះ អត់អាហារនៅជួរមុខរយៈពេល១៧ថ្ងៃ ដោយគ្មានការដឹកជញ្ជូនអាហារ ជាពិសេសមិនបានប្តូរវេនច្រើនខែ។

យោងតាមសារព័ត៌មាន Al Jazeera ចុះផ្សាយថ្ងៃទី១២ ខែឧសភា ឆ្នាំ២០២៦ អ្នកស្រី Anastasia Silchuk មានស្វាមីបម្រើការជាកងពលតូចលេខ១៤ សរសេរលើបណ្តាញសង្គម នៅថ្ងៃទី២២ ខែមេសា ថា៖ « យុទ្ធជនដួលសន្លប់ដោយសារភាពអត់ឃ្លាន ពួកគេផឹកទឹកភ្លៀង»។

ទាហានអ៊ុយក្រែនកំពុងតស៊ូប្រយុទ្ធជាមួយរុស្ស៊ី។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យុទ្ធជនទាំងនោះលាក់ខ្លួននៅខាងឆ្វេងច្រាំងទន្លេ Oskil ខាងកើតក្នុងតំបន់ Donetsk បន្ទាប់ពីគ្រាប់បែករុស្ស៊ីបានបំផ្លាញស្ពាន តភ្ជាប់ទៅកាន់ក្រុមកងពលតូចរបស់ពួកគេនៅច្រាំងខាងស្តាំ។

អ្នកស្រី Silchuk សរសេរថា៖ « មនុស្សមិនស្តាប់ពួកគេតាមវិទ្យុទេ ឬប្រហែលជាគ្មាននរណាម្នាក់ចង់ស្តាប់ពួកគេទេ។ ស្វាមីរបស់ខ្ញុំបានស្រែកនិងអង្វរ ថាគ្មានអាហារ និងទឹកផឹកទេ»។ យ៉ាងណា អ្នកស្រីមិនបានឆ្លើយតបជាមួយសារព័ត៌មាន Al Jazeera លម្អិតឡើយ។

ដោយឡែក លោក Oleksandr ជាទាហានម្នាក់ទើបតែបម្រើការថ្មីៗ ប្រាប់ Al Jazeera ថា៖ « មានអារម្មណ៍ថា ផលប៉ះពាល់នៃភាពអត់ឃ្លានគឺកាន់តែខ្លាំង អំឡុងពេលកំពុងប្រយុទ្ធដើម្បីមាតុភូមិ»។

ខណៈកំពុងលាក់ខ្លួននៅក្នុងលេណដ្ឋានដាច់ស្រយាល និងលាក់បាំងបំផុតលើខ្សែត្រៀមជួរមុខ គ្មានដើមឈើ នាភាគអាគ្នេយ៍អ៊ុយក្រែនកាលពីដើមឆ្នាំនេះ លោក Oleksandr នឹកគ្រួសារ ផ្ទះសម្បែងនិងជីវិតដែលខ្លួនធ្លាប់មាន មុនពេលការឈ្លានពានទ្រង់ទ្រាយធំរបស់រុស្ស៊ីនៅដើមឆ្នាំ ២០២២ ប៉ុន្តែអ្វីដែលលោកនឹកបំផុត គឺអាហារដ៏ពិតប្រាកដមួយចានប៉ុណ្ណោះ។

រីឯទាហានម្នាក់សុំមិនបញ្ចេញឈ្មោះ អាយុ ៣១ឆ្នាំ មានស្នាមសាក់ កំពុងស៊ាំនឹងជង្គង់សេរ៉ាមិចនៅទីក្រុងកៀវប្រាប់ Al Jazeera ថា៖ « យើងស្រមៃចង់បានអាហារក្តៅៗ ពីព្រោះអ្វីដែលយើងទទួលទានជាច្រើនសប្តាហ៍គឺសូកូឡា អូតមីល (ធញ្ញជាតិលាយជាមួយស្រូវសាលី) និងទឹកមួយដបក្នុងមួយថ្ងៃប៉ុណ្ណោះ»៕

សម្រួល៖ ណឺ មិនា