តាមការបញ្ជាក់ពីលោក ចិត្ត កក្កដា តំណាងសហគមន៍ «ត្រពាំងក្អើម» បានឱ្យដឹងថា ជារៀងរាល់ឆ្នាំ ចាប់ពីខែមីនាដែលជារដូវប្រាំង ប្រជាសហគមន៍នាំគ្នាចូលព្រៃ ដើម្បីប្រមូលទឹកឃ្មុំព្រៃតាមបែបប្រពៃណីរបស់ជនជាតិដើមភាគតិចពូនង។ សកម្មភាពយកឃ្មុំព្រៃបែបធម្មជាតិនេះ មិនត្រឹមតែបន្តអភិរក្សវប្បធម៌បុរាណប៉ុណ្ណោះទេ ប៉ុន្តែថែមទាំងជួយបង្កើនចំណូលសម្រាប់គ្រួសារផងដែរ។

សហគមន៍ «ត្រពាំងក្អើម» ត្រូវបានបង្កើតឡើងជាង១០ឆ្នាំមកហើយ ដោយមានការគាំទ្រពីអង្គការដៃគូ និងមានសមាជិកប្រមាណ២០០នាក់។ ក្នុងមួយឆ្នាំ សហគមន៍អាចប្រមូលទឹកឃ្មុំពីសមាជិកបានប្រមាណពី ២ ទៅ ៣ តោន ហើយបានធ្វើការសម្អាតតាមស្តង់ដាអនាម័យ មុននឹងលក់ជូនអតិថិជន និងក្រុមហ៊ុនឯកជនក្នុងស្រុក ដែលបន្តនាំចេញទៅកាន់ទីផ្សារបរទេសដូចជា សហរដ្ឋអាមេរិកជាដើម។

លោក ចិត្ត កក្កដា បញ្ជាក់ថា ទឹកឃ្មុំព្រៃពីមណ្ឌលគិរីមានគុណភាពសុទ្ធល្អ និងមានអត្ថប្រយោជន៍ច្រើនសម្រាប់សុខភាព។ ទោះបីជាការឡើងប្រមូលឃ្មុំមានហានិភ័យក៏ដោយ សហគមន៍នៅតែអនុវត្តវិធីសាស្ត្រដោយប្រុងប្រយ័ត្ន និងគោរពតាមបច្ចេកទេសបរិស្ថាន ដើម្បីធានាថាមិនប៉ះពាល់ដល់ជីវចម្រុះ។

ជាមួយគ្នានេះ សមាជិកសហគមន៍ត្រូវបានណែនាំឱ្យកាត់យកទឹកឃ្មុំត្រឹមតែប្រហែល ៨០% នៃសំបុកប៉ុណ្ណោះ ដើម្បីរក្សាប្រព័ន្ធអេកូឡូស៊ី និងអាចប្រមូលបានបន្តទៀតនាពេលអនាគត។

តំណាងសហគមន៍រូបនេះ អំពាវនាវដល់ប្រជាពលរដ្ឋ ភ្ញៀវទេសចរ និងក្រុមហ៊ុននានា ឱ្យចូលរួមគាំទ្រទឹកឃ្មុំព្រៃធម្មជាតិពីសហគមន៍ «ត្រពាំងក្អើម» ខេត្តមណ្ឌលគិរីបន្ថែមទៀត។ ការអំពាវនាវនេះធ្វើឡើងក្នុងបរិបទដែលចំនួនសមាជិកសហគមន៍កើនឡើងជាបន្តបន្ទាប់ពីមួយឆ្នាំទៅមួយឆ្នាំ ហើយសកម្មភាពប្រមូលទឹកឃ្មុំព្រៃក៏មានការកើនឡើងដូចគ្នា។

ការគាំទ្រពីអតិថិជនមិនត្រឹមតែជួយបង្កើនប្រាក់ចំណូល និងលើកកម្ពស់ជីវភាពរស់នៅរបស់ប្រជាពលរដ្ឋក្នុងសហគមន៍ប៉ុណ្ណោះទេ ប៉ុន្តែថែមទាំងចូលរួមចំណែកលើកស្ទួយសេដ្ឋកិច្ចជាតិឱ្យកាន់តែរីកចម្រើនផងដែរ៕

អត្ថបទ៖រៀម សុខហេង

The post ទឹកឃ្មុំព្រៃខេត្តមណ្ឌលគិរី ក្លាយជាផលិតផលមានសក្តានុពលខ្ពស់ ហើយលក់បន្តទៅក្រៅប្រទេស appeared first on Kampuchea Thmey Daily.

ប្រជាសហគមន៍ជនជាតិដើមភាគតិច និងប្រជាពលរដ្ឋនៅតំបន់ជាប់ព្រៃ បានចាប់ផ្តើមចូលព្រៃប្រមូលទឹកឃ្មុំតាមរបៀបប្រពៃណី ដែលគោរពតាមបច្ចេកទេសអភិរក្ស ដើម្បីរក្សាពូជឃ្មុំ និងធនធានធម្មជាតិឲ្យបានយូរអង្វែង។ ការប្រមូលទឹកឃ្មុំព្រៃមិនត្រឹមតែជាមធ្យោបាយបង្កើនចំណូលគ្រួសារប៉ុណ្ណោះទេ ប៉ុន្តែថែមទាំងជាផ្នែកមួយនៃអត្តសញ្ញាណវប្បធម៌ និងជីវភាពប្រចាំថ្ងៃរបស់សហគមន៍ផងដែរ។

លោក ស្រុះ វឿន អាយុ ៥៦ ឆ្នាំ ប្រធានសហគមន៍រនុសខ្ញែង ស្ថិតនៅឃុំចុងផ្លាស់ ស្រុកកែវសីមា ខេត្តមណ្ឌលគិរី បានឲ្យដឹងថា បច្ចុប្បន្នប្រជាពលរដ្ឋជាជាតិដើមភាគតិចក្នុងសហគមន៍កំពុងមមាញឹកចូលព្រៃប្រមូលទឹកឃ្មុំព្រៃធម្មជាតិ ដើម្បីបង្កើនប្រាក់ចំណូលសម្រាប់ផ្គត់ផ្គង់ជីវភាពគ្រួសារ។លោកបន្តថា រដូវទឹកឃ្មុំព្រៃសម្បូរមានចន្លោះពីខែកុម្ភៈដល់ខែមេសា។ ទោះជាយ៉ាងណា ឆ្នាំនេះរដូវប្រមូលផលមកយឺតជាងរាល់ឆ្នាំ ដោយសារការប្រែប្រួលអាកាសធាតុ ដែលបណ្តាលឲ្យសំបុកឃ្មុំដាក់ក្បាលទឹកយឺត។

ជាមួយគ្នានេះ លោក ឌិន ប៊ុនធឿន អនុប្រធានមន្ទីរបរិស្ថានខេត្តមណ្ឌលគិរី បានឲ្យដឹងថា តាមការសម្គាល់របស់ប្រជាពលរដ្ឋនៅតាមសហគមន៍មូលដ្ឋាន ពួកគេតែងចូលប្រមូលផលទឹកឃ្មុំព្រៃចាប់ពីខែកុម្ភៈ ដល់ខែមេសា។ ចំពោះការចូលប្រមូលអនុផលព្រៃឈើក្នុងដែនជម្រកអភិរក្ស ក្នុងនាមជាមន្ត្រីពាក់ព័ន្ធ លោកបានអំពាវនាវឲ្យប្រជាពលរដ្ឋប្រមូលផលដោយប្រុងប្រយ័ត្ន ដោយត្រូវពន្លត់ភ្លើងឲ្យបានរួចរាល់មុនចាកចេញពីកន្លែងយកឃ្មុំ ព្រោះអាចបង្កហានិភ័យអគ្គិភ័យព្រៃឈើ។ ជាពិសេស ត្រូវជៀសវាងការកាប់បំផ្លាញដើមឈើ។

មន្ត្រីជំនាញរូបនេះ ក៏បានលើកទឹកចិត្តឲ្យប្រជាពលរដ្ឋអនុវត្តការប្រមូលសំបុកឃ្មុំតាមស្តង់ដារ ដើម្បីធានាគុណភាពទឹកឃ្មុំ អនាម័យ សុវត្ថិភាព និងបង្កើនតម្លៃទីផ្សារឲ្យកាន់តែល្អប្រសើរ។ បន្ថែមពីនេះ ការអភិវឌ្ឍផលិតផលទឹកឃ្មុំព្រៃ និងការផ្សព្វផ្សាយតាមរយៈទេសចរណ៍ធម្មជាតិ ដើម្បីទាក់ទាញភ្ញៀវទេសចរជាតិ និងអន្តរជាតិ មកកម្សាន្តខេត្តនេះ នឹងជួយលើកកម្ពស់ជីវភាពសហគមន៍ និងចូលរួមថែរក្សាការពារធនធានព្រៃឈើឲ្យកាន់តែមានប្រសិទ្ធភាព។

គួរបញ្ជាក់ថា ទឹកឃ្មុំព្រៃមណ្ឌលគិរី ត្រូវបានគេស្គាល់ថាមានរសជាតិឈ្ងុយឆ្ងាញ់ និងគុណភាពខ្ពស់ ដោយសារបរិស្ថានធម្មជាតិស្អាត និងមានផ្កាព្រៃចម្រុះប្រភេទ។ រដូវប្រមូលទឹកឃ្មុំជាទូទៅបន្តរហូតដល់ខែឧសភា ឬខែមិថុនា អាស្រ័យលើស្ថានភាពអាកាសធាតុអំណោយផល៕

អត្ថបទ៖ រៀម សុខហេង

The post ប្រជាសហគមន៍នៅមណ្ឌលគិរី ចាប់ផ្ដើមនាំគ្នាប្រមូលទឹកឃ្មុំព្រៃធម្មជាតិ ពីខែមីនាតទៅ appeared first on Kampuchea Thmey Daily.

ស្ថិតនៅក្នុងវ័យ ៣៥ឆ្នាំ លោក ឆុំ ប៊ុនឡូ ជាម្ចាស់កសិដ្ឋាន ទឹកឃ្មុំវីប៊ី  WeBee ប្រាប់ កម្ពុជាថ្មី ថា របរចិញ្ចឹមឃ្មុំនេះ លោកបានចាប់ផ្ដើមធ្វើវាឡើងមកតាំងពីឆ្នាំ ២០១៩មកម្ល៉េះ។ របរចិញ្ចឹមឃ្មុំនេះ ក៏អាចជាចំណែកជួយឱ្យគ្រួសាររបស់លោក ប៊ុនឡូ អាចមានជីវភាពធូរធារបានមួយកម្រិត ផងដែរ។

លោកបានឱ្យដឹងទៀតថា ទីផ្សារទឹកឃ្មុំចិញ្ចឹមនាពេលបច្ចុប្បន្ន ទឹកឃ្មុំ១លីត្រ អាចលក់ចេញទៅកាន់ទីផ្សារបានចន្លោះពី ៦ម៉ឺនរៀល ទៅ ៨ម៉ឺនរៀល។

ចំណែកទីផ្សារគោលវិញ ប៊ុនឡូ ថាភាគច្រើនទឹកឃ្មុំរបស់លោកលក់ចេញទៅកាន់រាជធានីភ្នំពេញ និងប​ណ្ដាខេត្តមួយចំនួនទៀត ដែលមានតម្រូវការទឹកឃ្មុំយកទៅប្រើប្រាស់ប្រចាំថ្ងៃ។

យ៉ាងណាមិញ លោក ឆុំ ប៊ុនឡូ យល់ឃើញថា បច្ចុប្បន្នប្រជាជនខ្មែរបានងាកមកគាំទ្រទឹកឃ្មុំចិញ្ចឹមក្នុងស្រុកកាន់តែច្រើនជាងមុន នេះក៏ដោយតែទឹកឃ្មុំចិញ្ចឹមតាមចម្ការគរ និងចម្ការមៀន វាមានសុវត្ថិភាពខ្ពស់ និងមានរសជាតិឆ្ញាញ់មិនចាញ់ទឹកឃ្មុំធម្មជាតិ ឬទឹកឃ្មុំព្រៃ នោះឡើយ។

លោកបានបញ្ជាក់ដែរថា កសិដ្ឋានរបស់លោកមានធុងចិញ្ចឹមឃ្មុំប្រមាណជាង៥០ធុង និងអាចផលិតទឹកឃ្មុំបានជាង១០០លីត្រ ក្នុង១ខែ។ កសិដ្ឋានចិញ្ចឹមឃ្មុំរបស់កសិកររូបនេះ បច្ចុប្បន្នមានទីតាំងស្ថិតនៅ ឃុំកោះសំរោង ស្រុកកំពង់សៀម ខេត្តកំពង់ចាម៕

អត្ថបទ ៖ សួស សិត

The post របរចិញ្ចឹមឃ្មុំអាចរកចំណូលផ្គត់ផ្គង់គ្រួសារបានសមរម្យ appeared first on Kampuchea Thmey Daily.

ស្ថិតនៅក្នុងវ័យ ៣៥ឆ្នាំ លោក ហ៊ន់ សៀងហៃ ជាម្ចាស់កសិដ្ឋានចិញ្ចឹមឃ្មុំខ្មែរ នៅខេត្តបាត់ដំបងបានឱ្យដឹងថា ឆ្នាំនេះ ការប្រមូលផលទឹកឃ្មុំរបស់លោក អាចប្រមូលផលបានជិត៤តោន ខណៈទីផ្សារទឹកឃ្មុំចិញ្ចឹមក្នុងស្រុកក៏កំពុងតែមានតម្រូវការខ្ពស់។

លោក សៀងហៃ បន្តថា សម្រាប់ពេលបច្ចុប្បន្ន ទឹកឃ្មុំចិញ្ចឹមអាចលក់ចេញទៅកាន់ទីផ្សារបាន ៦ម៉ឺនរៀល ទៅ៨ម៉ឺន​រៀល ក្នុង១លីត្រអាស្រ័យទៅការបោះដុំ និងលក់រាយ។

ម្ចាស់កសិដ្ឋានរូបនេះ បា​នឱ្យដឹងទៀតថា មូលហេតុដែលទឹកឃ្មុំខ្មែរ មានតម្រូវខ្ពស់ នេះក៏ដោយសារតែទឹកឃ្មុំដែលចិញ្ចឹម​តាមចម្ការមៀន និងចម្ការគរ ភាគច្រើនមានរសជាតិផ្អែមឆ្ងាញ់ និងមានសុវត្ថិភាពខ្ពស់ដូចទៅនឹងទឹកឃ្មុំធម្មជាតិ ផងដែរ។

យ៉ាងណាមិញ ចំពោះទីផ្សារលក់ចេញ ទឹកឃ្មុំរបស់លោក ហ៊ន់ សៀងហៃ បច្ចុប្បន្នក៏អាចផ្គត់ផ្កង់ទៅតាមផ្សារទំនើបមួយចំនួនដែលស្ថិតនៅរាជធានីភ្នំពេញ និងតាមបណ្ដាខេត្តខ្លះ ផងដែរ។

គួរជម្រាបថា កសិដ្ឋានចិញ្ចឹមឃ្មុំខ្មែររបស់លោក ហ៊ន់ សៀងហៃ បច្ចុប្ប​ន្នមានធុងចិញ្ចឹមឃ្មុំ ប្រមាណជាង៣០០ធុង សម្រាប់ធ្វើជាជម្រកសត្វឃ្មុំ និងផលិតទឹកឃ្មុំសម្រាប់ផ្គត់ផ្គង់ទីផ្សារបានចន្លោះពី ៥០០០លីត្រ ទៅ៦០០០លីត្រ ក្នុងមួយខែ៕

អត្ថបទ៖ សួស សិត            

The post កសិករចិញ្ចឹមឃ្មុំ ប្រមូលផលបានជិត៤តោន ក្នុងមួយឆ្នាំ ខណៈទីផ្សារមានតម្រូវខ្ពស់ appeared first on Kampuchea Thmey Daily.

លោក ហ៊ន់ សៀងហៃ អាយុ៣៥ឆ្នាំ ជាអ្នកចិញ្ចឹមឃ្មុំតាមចម្ការមៀន ស្ថិតនៅស្រុកកំរៀង ខេត្តបាត់ដំបង ប្រាប់កម្ពុជាថ្មី ថា មួយរយៈពេលចុងក្រោយនេះ ទិន្នផលទឹកឃ្មុំមានការធ្លាក់ចុះប្រមាណ៥០ភាគរយ ដោយសារតែមានភ្លៀងធ្លាក់ច្រើន ដែលនាំឱ្យឃ្មុំពិបាកក្នុងការហើររកចំណីរបស់វា។

លោកបន្តថា កាលពីខែឧសភាកន្លងទៅ អាកាសធាតុអំណោយផលល្អ ទិន្នផលទឹកឃ្មុំក៏អាចប្រមូលផលច្រើនគួរសម ក៏ព្រោះតែសម្បូរផ្កាមៀន និងផ្កាគរច្រើន។

លោក ហ៊ន់ សៀងហៃ បញ្ជាក់ថា ចូលមកដល់រដូវការថ្មីនេះ ការផលិតទឹកឃ្មុំក៏មានការយឺតយ៉ាវ នេះក៏ដោយសារតែការចិញ្ចឹមត្រូវប្រើរយៈពេលជាង២០ថ្ងៃ ទើបអាចប្រមូលផលបាន។ ក្រៅពីការចិញ្ចឹមឃ្មុំ កសិកររូបនេះ ក៏ឆ្លៀតពេលរៀបចំកន្លែងបង្កាត់ពូជឃ្មុំ សម្រាប់ទុកធ្វើពូជបន្តទៅឆ្នាំក្រោយ ផងដែរ។

ចំពោះទីផ្សារពេលបច្ចុប្បន្ន លោក ហ៊ន់ សៀវហៃ បានបញ្ជាក់ដែរថា ក្រោយពេលប្រមូលផលទឹកឃ្មុំ រួចមក ទឹកឃ្មុំរបស់លោកអាចលក់ចេញទៅកាន់ទីផ្សារមួយចំនួនដូចជា៖ ផ្សារទំនើប និងលក់ទៅកាន់ឈ្មួញមួយចំនួនទៀតដែលរស់នៅក្នុងរាជធានីភ្នំពេញ។

បច្ចុប្បន្ន លោក ហ៊ន់ សៀងហៃ មានធុងចិញ្ចឹមឃ្មុំ ប្រមាណជាង៣០០ធុង សម្រាប់ធ្វើជាជម្រកសត្វឃ្មុំ និងផលិតទឹកឃ្មុំសម្រាប់ផ្គត់ផ្គង់ទីផ្សារបានចន្លោះពី ៥០០០លីត្រ ទៅ៦០០០លីត្រ ក្នុងមួយខែ៕

អត្ថបទ ៖ សួស សិត

The post ទិន្នផលទឹកឃ្មុំចិញ្ចឹមក្នុងចម្ការមៀន ធ្លាក់ចុះ៥០% ដោយសារអាកាសធាតុ appeared first on Kampuchea Thmey Daily.

ជាក់ស្តែងយុវជនម្នាក់ មានឈ្មោះ អ៊ុន សាមៀង អាយុ ១៩ឆ្នាំ មានទីលំនៅបច្ចុប្បន្ន ភូមិពូង៉ោល ឃុំមេម៉ង់ ស្រុកកែវសីមា ខេត្តមណ្ឌលគិរី ជាជនជាតិដើមភាគតិចព្នង បានរៀបរាប់ប្រាប់សារព័ត៌មាន«កម្ពុជាថ្មី»ថា រូបគេបានបោះបង់ការសិក្សាចោលជាច្រើនឆ្នាំមកហើយ ដោយរូបគេតែងតែជួយធ្វើកិច្ចការងារផ្ទះជាប្រចាំ ដូចជាស្រែចម្ការជាដើម។ ឱ្យតែរដូវប្រាំងចូលមកដល់ ចន្លោះចាប់ពីខែ១ ដល់ខែ៤ ពួកគេតែងតែនាំគ្នីគ្នា មួយក្រុមដើររុករកមើលសម្បុកឃ្មុំក្នុងព្រៃសហគមន៍របស់ខ្លួនដើម្បីឡើងយកក្បាលទឹក យកទៅលក់ឱ្យអ្នកភូមិ ក៏ដូចជាភ្ញៀវទេសចរ ដែលបានដើរកម្សាន្តនៅតាមតំបន់ភូមិស្រុករបស់ពួកគេ ដើម្បីបានកម្រៃផ្គត់ផ្គង់ជីវភាពគ្រួសារ។

យុវជនរូបនេះបន្តថា ទឹកឃ្មុំទម្រាំយកបានលក់ទៅឱ្យអ្នកភូមិ គឺមានការលំបាកខ្លាំងណាស់ ព្រោះការឡើងយកឃ្មុំទាំងនោះ ដំបូងឡើយពួកគេត្រូវនាំគ្នាយកដែកគោលដំលើដើមឈើ ដើម្បីជាន់ឡើងជាច្រើនសិបកាំទម្រាំដល់លើ ហើយដើមឈើដែលគេវាយដំដែកគោលឡើងម្ដងៗនោះភាគច្រើន ជាប្រភេទដើមឈើទាលដែលមានកម្ពស់រហូតទៅដល់ជាង ៣០ម៉ែត្រ ឯណោះ ឬអាចខ្ពស់ជានេះក៏មានដែរ។ យុវជនរូបនេះបន្តែមថា ក្រុមពួកគេដែលបានឡើងយកសម្បុកឃ្មុំចង្អេរទាំងនោះ មានឆ្នាំខ្លះសម្បូរ មួយសំបុកធំបានរហូតទៅដល់ ២០លីត្រ ប៉ុន្តែជាក់ស្ដែង នៅក្នុងឆ្នាំនេះ ដោយសារអាកាសធាតុប្រែប្រួល សម្បុកឃ្មុំទម្រាំដាក់ក្បាលទឹក គឺយឺតជាងរាល់ឆ្នាំបន្តិច សម្បុកឃ្មុំចង្អេរដែលធំជាងគេ ចម្រាញ់យកទឹករួចបានប្រហែល ១០លីត្រប៉ុណ្ណោះ។

យុវជនដដែល បានឱ្យដឹងថា គេចេះប្រកបមុខរបរឡើងយកឃ្មុំព្រៃតាំងពីឆ្នាំ២០១៥ មកម្ល៉េះ។ ប៉ុន្តែ ការយកឃ្មុំឆ្នាំនេះប្លែកជាងរាល់ដងបន្តិច គឺពួកគេត្រូវតែយកទាំងសម្បុក ទាំងក្បាលទឹកឃ្មុំយកមកលក់ឱ្យអតិថិជនតែម្ដង ព្រោះនាពេលកន្លងទៅ តាមតំបន់ផ្សេងៗ ឮគេថាមានអ្នកលក់ទឹកឃ្មុំក្លែងក្លាយមួយចំនួនតូច។ រូបភាពទាំនោះហើយ ដែលធ្វើឱ្យពួកគេបាត់បង់ទំនុកចិត្តពីសំណាក់មហាជន។

យុវជន អ៊ុន សាមៀង បានបញ្ជាក់ថា ពួកគេដើររុករកយកទឹកឃ្មុំព្រៃដោយផ្ទាល់ ដូច្នេះសូមកុំមានការសង្ស័យតម្រូវឱ្យពួកគេនាំគ្នាយកឃ្មុំទាំងក្បាលទឹកមក ដើម្បីបញ្ជាក់ថា ទឹកឃ្មុំដែលពួកគេយកមកពីក្នុងព្រៃសុទ្ធ ឬមិនសុទ្ធ ព្រោះទឹកឃ្មុំរបស់ពួកគេ គឺធម្មជាតិពិតៗ ហើយបើអតិថិជនចង់បានគេពូតចេញក្បាលទឹក ជូនតាមតម្រូវការភ្លាមៗតែម្តង។

ចំណែក អ្នកស្រី ជ្រោម ដែង ត្រូវជាម្តាយមីងយុវជនរូបនេះ បានដើរជួយលក់ទឹកឃ្មុំក្មួយប្រុសរបស់ខ្លួន ហើយក៏បានអំពាវនាវទៅដល់ អតិថិជនគ្រប់រូប ដែលបានគាំទ្រទឹកឃ្មុំព្រៃសុទ្ធខេត្តមណ្ឌលគិរី សូមជួយគាំទ្របន្ថែមទៀត ព្រោះទឹកឃ្មុំព្រៃសុទ្ធតែជារបស់ធម្មជាតិពិតៗ ដែលយកចេញពីក្នុងព្រៃសហគមន៍ផ្ទាល់។ ព្រមទាំងបានសំណូមពរដល់អតិថិជនមេត្តាជួយទិញកុំមានការតថ្លៃ ព្រោះទឹកឃ្មុំព្រៃទម្រាំឡើងយកមកលក់ជូនអតិថិជន គឺមិនងាយស្រួលនោះទេ ពោលគឺមានការលំបាកខ្លាំងណាស់ ពួកគេត្រូវឡើងដើមឈើធំៗ ខ្ពស់ៗរាប់សិបម៉ែត្រទាំងប្រថុយ ដែលប្រឈមនឹងគ្រោះថ្នាក់គ្រប់វិនាទីទម្រាំតែបាន ឃ្មុំមួយបង្កងសម្រូតទម្លាក់ចុះមកក្រោម ដើម្បីលក់បានកម្រៃផ្គត់ផ្គង់ជីវភាពគ្រួសារ៕

អត្ថបទ៖រៀម សុខហេង

The post យុវជនវ័យ ១៩ឆ្នាំ នៅខេត្តមណ្ឌលគិរី ឡើងយកឃ្មុំព្រៃសុទ្ធ សំណូមពរអតិថិជនជួយគាំទ្រ ព្រោះជារបស់ធម្មជាតិពិតៗ appeared first on Kampuchea Thmey Daily.

​ប្រធាន​សហគមន៍​កសិកម្ម​ស្ទឹង​ត្រង់​សែន​ជ័យ​ ខេត្ត​កំពង់​ចាម លោក លូង តាក់ បាន​ថ្លែងថា ទីផ្សារ​​​ទឹក​ឃ្មុំ​នៅ​ក្នុង​ឆ្នាំ​នេះ​មាន​ការ​ឆ្លាក់​ចុះ​​ច្រើន បើ​ធៀប​ទៅ​និង​ឆ្នាំ​មុន ដោយ​សារ​តម្រូវ​ការ​ទីផ្សារ​ទឹកឃ្មុំ​ក្នុង​ស្រុក​មិន​សូវ​មាន។

លោក លូង តាក់ ថ្លែងមកកាន់ «កម្ពុជា​ថ្មី​»​ ដឹង​នៅ​ថ្ងៃ​ទី​២១ ខែ​មីនា ​​ថា​ នៅឆ្នាំ​នេះ ទីផ្សារ​ទឹក​ឃ្មុំ​ក្នុង​ស្រុក​ហាក់​បី​ដូច​ជា​ធ្លាក់​ចុះ​ជាង​ឆ្នាំមុន​ ដោយ​ពេល​បច្ចុប្បន្ន​នេះ សហគមន៍​មាន​នៅ​សល់​ទឹក​ឃ្មុំ​ប្រមាណ​ជាង ១ ពាន់​លីត្រ​ទៀត ដែល​មិន​ទាន់​លក់​ចេញ​នៅ​ឡើយ​ ដោយ​សារ​ទីផ្សារ​ធ្លាក់​ចុះ​ទាប​ពេក ហើយ​តម្លៃ​ថោក​មិន​អាច​លក់​បាន​។

លោក​ថា «នៅ​ក្នុង​ឆ្នាំ​២០២៤ កន្លង​ទៅ​នេះ យើង​អាច​លក់​ចេញ​ទឹក​ឃ្មុំ​ទៅ​កាន់​ទីផ្សារ​ក្នុង​ស្រុក​បាន​ក្នុង​រង្វង់ ៣០០-​៤០០​លីត្រ ប៉ុណ្ណោះ​ ហើយ​សម្រាប់​រយៈ​ពេល ៣ ខែ​ ដើម​ឆ្នាំ​២០២៥ នេះ សហគមន៍​បាន​នាំ​ចេញ​ទឹក​ឃ្មុំ​ប្រមាណ​ជាង ៧០ ​លីត្រ​ប៉ុណ្ណោះ​សម្រាប់​សមាជិក​ផ្ទាល់»​។

ជុំ​វិញ​បញ្ហា​នេះ ម្ចាស់​សហគមន៍​រូប​នេះ ​បាន​ពន្យល់ថា «​ជា​ទូទៅ​អ្នក​មិន​ប្រើប្រាស់​មិន​បាន​យល់ច្បាស់​ពី​អត្ថប្រយោជន៍​ទឹក​ឃ្មុំ​ធម្មជាតិ និង​ទឹក​ឃ្មុំ​ព្រៃ ដោយ​អ្នក​ទិញ​ភាគ​ច្រើន​យល់​ឃើញ​ថា ទឹក​ឃ្មុំ​ចិញ្ចឹម​មិន​មាន​​គុណភាព​ល្អ​ដូច​ទឹក​ឃ្មុំព្រៃ​ ប៉ុន្តែ​តាម​អ្វី​ដែល​ខ្ញុំ​​សិក្សា​ និង​នៅ​ជា​មួយ​​ឃ្មុំ​កន្លង​មក ឃ្មុំ​ចិញ្ចឹម គឺ​ល្អ​ជាង​ទឹក​ឃ្មុំ​ព្រៃ»។

«បាន​ជា​ខ្ញុំ​និយាយ​ថា ឃ្មុំ​ចិញ្ចឹម​ល្អ ព្រោះ​ទី​១ ឃ្មុំ​ចិញ្ចឹម​យើង​មាន​កន្លែង​ឱ្យ​វា​នៅ ទី​២ ឃ្មុំ​ចិញ្ចឹម​ក៏​យក​លម្អង​ផ្កា តាម​ព្រៃ​ដូច​ជា​ឃ្មុំ​ព្រៃ​ដែរ​ ទី​៣ ពេល​មាន​ភ្លៀង​ធ្លាក់​ ទឹក​ភ្លៀង​គឺ​មិន​អាច​ជ្រាប​ចូល​ទៅ​ក្នុង​ទឹក​ឃ្មុំ​បាន​ទេ​ ដោយ​ឡែក​ឃ្មុំ​ព្រៃ​ទឹក​អាច​ចូល​បាន​ ទី​៤ ពេល​ដែល​ប្រមូល​ផល យើង​អាច​ត្រួតពិនិត្យ​បាន​ថា បង្គង​ណាមួយ​ដែល​អាច​ប្រមូល​ផល​បាន​ និង​មិន​ទាន់​អាច​ប្រមូល​ផល​បាន»។ លោក លូង តាក់ បន្ថែម​បែប​នេះ។

ជា​មួយ​គ្នា​នេះ លោក ក៏​បាន​បញ្ជាក់​ដែរ​ថា៖« ជា​ធម្មតា​ទឹក​ឃ្មុំ​តម្លៃ​លក់​នៅ​លើ​ទីផ្សារ គឺ​យើង​លក់​ក្នុង​តម្លៃ ៨ម៉ឺន​រៀល ក្នុង​មួយ​លីត្រ​ដូច​គ្នា ប៉ុន្តែ​ខុស​ត្រង់​ថា អ្នក​ប្រើប្រាស់​នៅ​តែ​ចាត់​​ទុក​ថា​ទឹក​ឃ្មុំ​ចិញ្ចឹម​ជា​ទឹកឃ្មុំ​មិន​ល្អ​ដដែល​ទើប​មិន​សូវមាន​ការ​ចាប់​អារម្មណ៍​ច្រើន និង​តម្រូវ​ការ​ដូច​មុន»​។

បើ​តាម​លោក លូង តាក់ ដដែល​ក្នុង​មួយ​ឆ្នាំ ឃ្មុំ​អាច​ប្រមូល​ផល​បាន ៦​ខែ គឺ​ចាប់​ពី​ខែ​ធ្នូ ​អាច​ប្រមូល​ផល​បាន​ រហូត​ដល់​ខែ​ឧសភា ប៉ុណ្ណោះ​។

ម្ចាស់​សហគមន៍​រូប​នេះ ​បាន​សង្កង់​ធ្ងន់​ថា ប្រសិន​បើ​ទីផ្សារ​អាជីវកម្ម​ឃ្មុំ​នៅ​តែ​បន្ត​ធ្លាក់ចុះ​បែប​នេះ វា​អាច​ប៉ះពាល់​ដល់​ទីផ្សារ​ឃ្មុំ, ឃ្មុំ​អាច​ជួប​បញ្ហា​ច្រើន​ទៅ​លើ​ការ​ថែទាំ ជា​ពិសេស​ការ​ប្រើប្រាស់​ថ្នាំ​ពុល​ច្រើន​របស់​ប្រជាកសិករ សម្រាប់​រដូវ​កាល​នេះ​តែ​ម្តង ព្រោះ​ជា​រដូវ​ស្វាយ​ចន្ទី ដោយ​ពួកគេ​ប្រើថ្នាំ​ពុល​ដើម្បី​សម្លាប់​សត្វ​ល្អិត ហើយ​ឃ្មុំ​ក៏​ទៅ​យក​លម្អង​ផ្កា​ចន្ទី​ដែរ​ ដូច្នេះ​ពេល​ខ្លះ​វា​អាច​ប៉ះពាល់​ដែល​ធ្វើ​ឱ្យ​ឃ្មុំ​ងាប់​ច្រើន​ក៏មាន​ដែរ​។ ហេតុ​ដូច​នេះ​ប្រសិន​បើ​នៅ​តែ​មាន​បញ្ហា​ប្រឈម​ច្រើន​បែប​នេះ​ទៀត ក្រុម​របស់​លោក​អាច​នឹង​ផ្អាក​នៅ​ក្នុង​ការ​ធ្វើ​អាជីវកម្ម​ឃ្មុំ​នេះ ដោយ​មិន​បន្ត​ទិញ​ចូល​ពូជឃ្មុំ​​បន្ថែម គ្រាន់​តែ​បន្ត​ថែរក្សា​ពូជ​ចាស់​ដែល​នៅ​សេស​សល់ ព្រោះ​បញ្ហា​កំពុង​តែ​ប្រឈម​ច្រើន ប្រសិន​បើ​នៅ​តែ​ព្យាយាម​ទៀត នោះ​ការ​ខាតបង់​នឹង​មាន​កាន់​តែ​ច្រើន​។

ជុំវិញទីផ្សារទឹកឃ្មុំនេះដែរ កន្លងមក​បន្ទាប់ពីមានករណីពាក់ព័ន្ធនាំចូលទឹកឃ្មុំក្លែងក្លាយ គ្មានប្រភពច្បាស់លាស់សមាជិកសហគម​ន៍​ចិញ្ចឹមឃ្មុំកម្ពុជា ធ្លាប់ចេញការស្រាយបំភ្លឺរួចហើយដែរទាក់ទងបញ្ហាទឹកឃ្មុំក្លែងក្លាយដែលកំពុងចរាចរនៅលើទីផ្សារប្រទេសកម្ពុជានេះ ដោយសហគមន៍បានអំពាវនាវឈប់មានការយល់ច្រឡំថា ទឹកឃ្មុំដែលចែកចាយនៅលើទីផ្សារស្រុកខ្មែរជាទឹកឃ្មុំមិនល្អ ជាទឹកឃ្មុំក្លែងក្លាយប្រភព ព្រោះប្រជាកសិករខ្មែរ រក្សាក្រមសីលធម៌ រក្សាវិជ្ជាជីវៈអ្នកចិញ្ចឹមឃ្មុំបែបធម្មជាតិ ចែកចាយតែទឹកឃ្មុំដែលមានគុណភាពដល់ពលរដ្ឋតែប៉ុណ្ណោះ ពុំមានការកែច្នៃ ពុំមានការក្លែងបន្លំគុណភាពទឹកឃ្មុំនោះទេ៕

The post ទីផ្សារទឹកឃ្មុំក្នុងស្រុកកំពុងធ្លាក់ចុះ ដោយសារកត្តាតម្រូវការ appeared first on Kampuchea Thmey Daily.

ជុំវិញរឿងខាងលើនេះ សមាជិកសហគមន៍ចិញ្ចឹមឃ្មុំកម្ពុជា តំណាងឱ្យប្រជាពលរដ្ឋខ្មែរ ប្រជាកសិករចិញ្ចឹមឃ្មុំទូទាំងប្រទេសកម្ពុជា ក៏បានចេញវីដេអូបំភ្លឺទាក់ទងបញ្ហាដែលកំពុងតែផ្ទុះការវែកញែកទៅលើរឿងទឹកឃ្មុំក្លែងក្លាយដែលកំពុងចរាចរនៅលើទីផ្សារប្រទេសកម្ពុជានេះផងដែរ ដោយសហគមន៍បានលើកឡើងថា ក្រុមហ៊ុន ច័ន្ទ ហាន់នី អិមផត អិចផតគឺជាក្រុមហ៊ុនដែលនាំចូលនូវទឹកឃ្មុំសុទ្ធធម្មតាពីប្រទេសជិតខាងរបស់យើងយកមកស្តុកទុកក្នុងប្រទេសកម្ពុជា ហើយក្លែងបន្លំប្រភព(ដោយនិយាយថាជាទឹកឃ្មុំរបស់ប្រជាកសិករខ្មែរ ជារបស់សហគមន៍ចិញ្ចឹមឃ្មុំនៅប្រទេសកម្ពុជា) ហើយធ្វើការនាំចេញទៅប្រទេសទី៣ គឺសហរដ្ឋអាមេរិក។

សហគមន៍ចិញ្ចឹមឃ្មុំកម្ពុជា បានបន្តថា ក្រុមហ៊ុននេះពុំបានផលិតទឹកឃ្មុំក្លែងក្លាយដើម្បីចែកចាយនៅក្នុងទីផ្សារប្រទេស កម្ពុជាទេ។ ដោយក្រុមហ៊ុននេះធ្វើសកម្មភាពទុច្ចរិត គឺបាននាំទឹកឃ្មុំពីប្រទេសជិតខាងមកស្តុកនៅកម្ពុជា ក្លែងបន្លំ កុហកបោកប្រាស់ទៅកាន់ដៃគូនាំចេញទឹកឃ្មុំរបស់ខ្លួនថា ជាទឹកឃ្មុំរបស់ប្រជាកសិករខ្មែរ ទាំងដែលការពិតមិនមែនជាទឹកឃ្មុំរបស់សហគមន៍ទេ។

ជាមួយគ្នានេះ សហគមន៍ចិញ្ចឹមឃ្មុំកម្ពុជា បានអំពាវនាវឈប់មានការយល់ច្រឡំថា ទឹកឃ្មុំដែលចែកចាយនៅលើទីផ្សារស្រុកខ្មែរជាទឹកឃ្មុំមិនល្អ ជាទឹកឃ្មុំក្លែងក្លាយប្រភព ព្រោះប្រជាកសិករខ្មែរយើងរក្សាក្រមសីលធម៌ រក្សាវិជ្ជាជីវៈអ្នកចិញ្ចឹមឃ្មុំបែបធម្មជាតិ ចែកចាយតែទឹកឃ្មុំដែលមានគុណភាពដល់បងប្អូនតែប៉ុណ្ណោះ ពុំមានការកែច្នៃ ពុំមានការក្លែងបន្លំគុណភាពទឹកឃ្មុំនោះទេ។

សូមជម្រាបជូនផងដែរថា កាលពីពេលថ្មីៗកន្លងទៅនេះ កម្លាំងជំនាញការិយាល័យប្រឆាំងបទល្មើសកម្មសិទ្ធិបញ្ញា នៃនាយកដ្ឋាននគរបាលប្រឆាំងបទល្មើសសេដ្ឋកិច្ច សហការជាមួយមន្ដ្រីសាខា ក.ប.ប រាជធានីភ្នំពេញ និងមន្ត្រីជំនាញ នៃស្នងការដ្ឋាននគរបាលរាជធានីភ្នំពេញ បានចុះបង្រ្កាបទីតាំងក្រុមហ៊ុន CHAN HONEY IMPORT EXPORT CO.,LTD ស្ថិតនៅផ្ទះលេខ៧៦ ផ្លូវបេតុង ភូមិតាងៅកណ្តាល សង្កាត់និរោធ ខណ្ឌច្បារអំពៅ រាជធានីភ្នំពេញ ដែលសង្ស័យធ្វើការនាំចូល ស្តុកទុក ទឹកឃ្មុំក្លែងបន្លំប្រភពដើមទំនិញ។ នៅក្នុងអំឡុងពេលប្រតិបត្តិការនោះ សមត្ថិកិច្ចជំនាញបានរកឃើញទឹកឃ្មុំក្លែងបន្លំ សរុបចំនួន១៣០ធុង ដែលមានទម្ងន់សរុបជិត២០តោន ។

ជាមួយនឹងការស្រាយបំភ្លឺខាងលើ សហគមន៍ចិញ្ចឹមឃ្មុំកម្ពុជា ដដែលសូមស្នើដល់ដល់ស្ថាប័នពត៌មានមួយចំនួន ដែលចុះពត៌មានមិនច្បាស់លាស់ធ្វើឲ្យប៉ះពាល់ដល់ ជំនឿទុកចិត្តរបស់ប្រជាពលរដ្ឋខ្មែរ មកលើផលិតផលទឹកឃ្មុំ របស់ប្រជាសហគមន៍ចិញ្ចឹមឃ្មុំ នៅក្នុងប្រទរសកម្ពុជា មេត្តាកែតម្រូវសាឡើងវិញ ដើម្បីបញ្ឈប់កុំឲ្យមានការយល់ច្រឡំបន្តទៅទៀត៕

The post សហគមន៍ចិញ្ចឹមឃ្មុំកម្ពុជា បំភ្លឺបញ្ហាផ្ទុះការវែក ញែករឿងទឹកឃ្មុំក្លែងក្លាយកំពុងចរាចរលើទីផ្សារកម្ពុជា appeared first on Kampuchea Thmey Daily.