ធនាគារពិភពលោក Archives - Kampuchea Thmey Daily

ធនាគារពិភពលោកអនុម័តកញ្ចប់ប្រាក់កម្ចី ១,០២ ប៊ីលានដុល្លារសម្រាប់ហ្វីលីពីន

Huon Dina — Tue, 30 Jun 2026 07:22:33 +0000

ធនាគារពិភពលោកបានអនុម័តកញ្ចប់ហិរញ្ញប្បទានចំនួន ១,០២ ប៊ីលានដុល្លារសម្រាប់ប្រទេសហ្វីលីពីន ដើម្បីជួយកាត់បន្ថយថ្លៃអគ្គិសនី ពង្រីកថាមពលកកើតឡើងវិញ និងកែលម្អសេវាកម្មទឹកនៅទូទាំងប្រទេស។ នេះបើតាមការចុះផ្សាយរបស់កាសែត Manila Bulletin។

កញ្ចប់កម្ចីដែលធនាគារពិភពលោកប្រកាសឡើងកាលពីថ្ងៃទី ២៩ ខែមិថុនា នេះ រួមមានប្រាក់កម្ចីចំនួន ១ ប៊ីលានដុល្លារពីធនាគារអន្តរជាតិសម្រាប់ការស្ដារឡើងវិញ និងអភិវឌ្ឍន៍ (IBRD) និងជំនួយឥតសំណងចំនួន ២០ លានដុល្លារពីមូលនិធិ Livable Planet Fund។ វាគឺជាការផ្ដល់ហិរញ្ញប្បទានដ៏ធំបំផុត ដែលធនាគារពិភពលោកធ្លាប់ធ្វើសម្រាប់ហ្វីលីពីន។

មូលនិធិដដែល នឹងផ្ដោតលើការគាំទ្រដល់ការផ្លាស់ប្តូរថាមពលរបស់រដ្ឋាភិបាល និងកំណែទម្រង់ភាពធន់នឹងអាកាសធាតុ ជាជាងគម្រោងហេដ្ឋារចនាសម្ព័ន្ធជាក់លាក់។ ធនាគារពិភពលោកបាននិយាយថា កម្មវិធីនេះមានបំណងកាត់បន្ថយការពឹងផ្អែកលើឥន្ធនៈហ្វូស៊ីលរបស់ហ្វីលីពីន ការពារអ្នកប្រើប្រាស់ពីការប្រែប្រួលតម្លៃថាមពលសកល និងពន្លឿនការប្រើប្រាស់ប្រភពថាមពលកកើតឡើងវិញក្នុងស្រុក ដូចជាថាមពលខ្យល់ ថាមពលព្រះអាទិត្យ និងថាមពលកំដៅផែនដី។

ធនាគារពិភពលោកក៏រំពឹងថា ចំណែកនៃថាមពលកកើតឡើងវិញក្នុងល្បាយថាមពលរបស់ហ្វីលីពីននឹងកើនឡើងពី ៣០% ដល់ ៤២% នៅឆ្នាំ ២០២៧ ដែលជួយប្រទេសនេះក្នុងធ្វើពិពិធកម្មផ្នែកផ្គត់ផ្គង់ថាមពល និងកាត់បន្ថយផលប៉ះពាល់ពីការប្រែប្រួលនៃតម្លៃប្រេងឥន្ធនៈនាំចូល។

ក្រៅពីវិស័យថាមពល ការផ្តល់ហិរញ្ញប្បទាននឹងគាំទ្រដល់កំណែទម្រង់ដើម្បីពង្រឹងសេវាកម្មទឹកក្នុងស្រុក រួមទាំងការផ្តល់ហិរញ្ញប្បទាន និងក្របខ័ណ្ឌកំណត់តម្លៃថ្មី ដែលមានគោលបំណងធ្វើឱ្យប្រសើរឡើងនូវការទទួលបានទឹកដែលប្រើបាន ជាពិសេសក្នុងសហគមន៍ក្រីក្រ និងងាយរងគ្រោះដោយសារអាកាសធាតុ។

ហិរញ្ញប្បទានថ្មីនេះ អនុម័តឡើងបន្ទាប់ពីធនាគារពិភពលោកដដែល អនុម័តកម្ចី ៨០០ លានដុល្លារកាលពីឆ្នាំមុន ដើម្បីគាំទ្រដល់ការផ្លាស់ប្តូរថាមពលរបស់ហ្វីលីពីន ខណៈប្រទេសនេះកំពុងស្ថិតនៅក្រោមគ្រាអាសន្នថាមពលជាតិ ដែលបណ្តាលមកពីតម្លៃប្រេងពិភពលោកខ្ពស់ និងការរំខានដល់ការផ្គត់ផ្គង់ជុំវិញជម្លោះមជ្ឈិមបូព៌ា៕

The post ធនាគារពិភពលោកអនុម័តកញ្ចប់ប្រាក់កម្ចី ១,០២ ប៊ីលានដុល្លារសម្រាប់ហ្វីលីពីន appeared first on Kampuchea Thmey Daily.

ធនាគារពិភពលោករំពឹងថា កំណើនសេដ្ឋកិច្ចវៀតណាមនឹងធ្លាក់សន្ទុះឆ្នាំនេះ

Huon Dina — Sun, 17 May 2026 04:54:28 +0000

ធនាគារពិភពលោកបានឱ្យដឹងនូវការព្យាករចុងក្រោយរបស់ខ្លួនកាលពីថ្ងៃសុក្រថា កំណើនសេដ្ឋកិច្ចវៀតណាមនឹងធ្លាក់ចុះសន្ទុះពី ៨% នៅឆ្នាំមុន មកត្រឹម ៦,៨% នៅឆ្នាំនេះ ចំពេលដែលសេដ្ឋកិច្ចពិភពលោកស្ថិតនៅក្នុងភាពមិនប្រាកដប្រជា។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

លោកស្រី Mariam J. Sherman នាយិកាធនាគារពិភពលោកប្រចាំវៀតណាម បានថ្លែងថា៖ «ស្ថានភាពពិភពលោកកាន់តែទន់ខ្សោយ កំពុងធ្វើឱ្យបរិយាកាសខាងក្រៅរបស់វៀតណាមកាន់តែប្រឈមនឹងបញ្ហា ដោយវិបត្តិប្រេងបានបន្ថែមហានិភ័យអវិជ្ជមានដល់សេដ្ឋកិច្ច»។

កំណើន ៦,៨% គឺទាបជាងឆ្ងាយ បើធៀបទៅនឹងគោលដៅរបស់រដ្ឋាភិបាលវៀតណាម ១០% នៅឆ្នាំនេះ និងពេញមួយទសវត្សបច្ចុប្បន្ន ប៉ុន្តែនៅតែខ្ពស់ជាងគេ ធៀបនឹងគូប្រជែងក្នុងតំបន់។

វៀតណាមកំពុងប្រឈមមុខនឹងសម្ពាធអតិផរណា ដែលជំរុញដោយសង្រ្គាមនៅអ៊ីរ៉ង់។ អតិផរណាប្រទេសនេះ បានហក់ឡើងដល់ ៥,៤៦% នៅខែមេសា ដោយខ្ពស់ជាងគោលដៅ ៤,៥% របស់រដ្ឋាភិបាល។

ធនាគារពិភពលោកព្យាករអតិផរណាប្រចាំឆ្នាំ ២០២៦ របស់វៀតណាមនៅ ៤,២%។

ធនាគារបាននិយាយថា វិស័យធនាគាររបស់ប្រទេសវៀតណាមបានជួបប្រទះនឹងភាពតានតឹងផ្នែកហិរញ្ញប្បទាន ដោយកំណើនឥណទានបានលើសពីការកៀរគរប្រាក់បញ្ញើ។ ជាមួយគ្នានោះ ជម្លោះនៅមជ្ឈិមបូព៌ាដែលអូសបន្លាយ អាចធ្វើឱ្យការនាំចេញរបស់ប្រទេសវៀតណាមធ្លាក់ចុះ និងធ្វើឱ្យវិបត្តិក្នុងវិស័យធនាគារ និងសម្ពាធរូបិយប័ណ្ណកាន់តែធ្ងន់ធ្ងរឡើងៗ ចំពេលដែលក្រុមហ៊ុនសាជីវកម្មជាប់បំណុលច្រើន ហើយទុនបម្រុងបរទេសរបស់រដ្ឋាភិបាលក៏មានកម្រិត។

ធនាគារពិភពលោកជំរុញឱ្យប្រទេសវៀតណាមផ្លាស់ប្តូរគំរូកំណើនសេដ្ឋកិច្ចរបស់ខ្លួន ពីការពឹងផ្អែកលើការប្រើប្រាស់ធនធានកាន់តែច្រើន និងការផ្តល់ហិរញ្ញប្បទានតាមធនាគារទៅជាកំណើនដែលជំរុញដោយផលិតភាព ទីផ្សារមូលធនកាន់តែស៊ីជម្រៅ និងការវិនិយោគផ្ទាល់ពីបរទេសដែលមានគុណភាពខ្ពស់៕

The post ធនាគារពិភពលោករំពឹងថា កំណើនសេដ្ឋកិច្ចវៀតណាមនឹងធ្លាក់សន្ទុះឆ្នាំនេះ appeared first on Kampuchea Thmey Daily.

ធនាគារពិភពលោកអនុម័តលុយ៣០០លានដុល្លារដល់កម្ពុជាសម្រាប់កែលម្អស្ថានភាពផ្លូវ

hun sirivadh — Wed, 29 Apr 2026 03:36:28 +0000

ធនាគារពិភពលោកបានអនុម័តកញ្ចប់ថវិកាចំនួន៣០០លានដុល្លារអាមេរិកសម្រាប់កែលម្អស្ថានភាពផ្លូវ និងប្រព័ន្ធដឹកជញ្ជូននៅកម្ពុជា។ ថវិកានេះត្រូវបានផ្ដល់មកជាដំណាក់កាលដោយដំណាក់កាលទី១និងផ្ដល់មកកម្ពុជាមានតម្លៃ១៥០លានដុល្លារអាមេរិក សម្រាប់កែលម្អហេដ្ឋារចនាសម្ព័ន្ធប្រវែង ២៤៧គីឡូម៉ែត្រ ជាមួយនឹងសកម្មភាពមួយចំនួនដើម្បីពង្រឹងសមត្ថភាពដឹកជញ្ជូន និងសម្រួលដល់ពាណិជ្ជកម្ម។

ក្នុងសេចក្ដីប្រកាសព័ត៌មានថ្ងៃទី២៧ ខែមេសា ឆ្នាំ២០២៦ គម្រោងនេះនឹងផ្ដល់អត្ថប្រយោជន៍ដល់ប្រជាជនជាង១,៦លាននាក់ រួមទាំងអ្នកប្រើប្រាស់ផ្លូវ និងសហគមន៍ដែលរស់នៅតាមបណ្ដោយផ្លូវនេះដែរ។

ក្នុងសេចក្ដីប្រកាសនោះបញ្ជាក់ថា៖ «តាមរយៈការកែលម្អស្ថានភាពផ្លូវ និងប្រព័ន្ធឡូហ្ស៊ីស្ទិក, កម្មវិធី CRCI មានគោលបំណងគាំទ្រដល់ការបង្កើតការងារ, ពង្រីកលទ្ធភាពរកបានទីផ្សារ និងសេវាកម្ម និងជំរុញការវិនិយោគឯកជនក្នុងវិស័យដូចជា ឡូហ្ស៊ីស្ទិក កសិឧស្សាហកម្ម សេវាកម្មដឹកជញ្ជូន និងទេសចរណ៍»។

អនុប្រធានធនាគារពិភពប្រចាំតំបន់អាស៊ីបូព៌ា និងប៉ាស៊ីហ្វិក លោក Carlos Felipe Jaramillo បានលើកឡើងថាធនាគារពិភពលោកប្ដេជ្ញាចិត្តគាំទ្រកម្ពុជាក្នុងពេលដែលប្រទេសកម្ពុជាកំពុងខិតខំពង្រឹងហេដ្ឋារចនាសម្ព័ន្ធ និងប្រព័ន្ធចាំបាច់សម្រាប់កំណើនប្រកបដោយបរិយាបន្ន និងការងារដែលមានគុណភាព។

ដោយឡែករដ្ឋមន្ត្រីក្រសួងសាធារណការលោក ប៉េង ពោធិ៍នា ក៏បានលើកឡើងផងដែរថាតាមរយៈជំនួយនេះ វាក៏នឹងជួយដល់ការធ្វើឱ្យប្រសើរឡើងតាមបណ្ដាយផ្នែកខ្លះនៃហាយវ៉េអាស៊ី២១ ដែលមិនត្រឹមតែធ្វើឱ្យការតភ្ជាប់ក្នុងប្រទេសល្អប្រសើរទេ តែថែមទាំងបង្កើនប្រសិទ្ធផលនៃផ្នែកដឹកជញ្ជូន ការស្ដុកទុក កាត់បន្ថយថ្លៃដឹកជញ្ជូន និងអនុញ្ញាតឱ្យសហគមន៍ កសិករ និងអ្នកជួញដូរ អាចចូលទៅទីផ្សារបានកាន់តែងាយស្រួលទាំងក្នុងស្រុក និងឆ្លងព្រំដែនផងដែរ។

អាស៊ីហាយវ៉២១ គឺជាផ្លូវតភ្ជាប់ពីកើតទៅលិចរវាងកម្ពជា និងវៀតណាម ហើយភ្ជាប់ខេត្តភាគឦសាននៃកម្ពុជាទីទីផ្សារក្នុងស្រុក និងផ្លូវពាណិជ្ជកម្មក្នុងតំបន់។ ដំណាក់កាលទី១នៃកម្មវិធីនេះ និងផ្ដោតលើការកែលម្អហេដ្ឋារចនាសម្ព័ន្ធប្រវែង២៤៧ គីឡូម៉ែត្រ ជាមួយសកម្មភាពជាមួលដ្ឋានមួយចំនួន ដើម្បីពង្រឹងសមត្ថភាពស្ថាប័នក្នុងវិស័យដឹកជញ្ជូន និងការជួយសម្រួលដល់ពាណិជ្ជកម្ម។ ដំណាក់កាលទី២នឹងបញ្ចប់ការកែលម្អផ្លូវនៃផ្នែកសេសសល់ប្រវែង ១៤៥ គីឡូម៉ែត្រ ពង្រីកការគាំទ្រការសម្រួលពាណិជ្ជកម្ម និងបង្កើនលទ្ធភាពធ្វើដំណើរទៅមកក្នុងស្រុកតាមរយៈការកែលម្អផ្លូវជនបទ៕

អត្ថបទដោយ ហ៊ុន សិរីវឌ្ឍន៍

The post ធនាគារពិភពលោកអនុម័តលុយ៣០០លានដុល្លារដល់កម្ពុជាសម្រាប់កែលម្អស្ថានភាពផ្លូវ appeared first on Kampuchea Thmey Daily.

ធនាគារពិភពលោក៖ កម្ពុជា និងវៀតណាម ជាប្រទេសលេចធ្លោជាងគេក្នុងតំបន់លើការរីកចម្រើនផ្នែករោងចក្រ

hun sirivadh — Thu, 23 Apr 2026 03:52:55 +0000

ប្រទេសកម្ពុជា និងវៀតណាម ជាប្រទេស២គត់ក្នុងតំបន់អាស៊ីខាងកើត និងអាស៊ីប៉ាស៊ីហ្វិកដែលមានការកើនឡើងច្រើននៃចំណែកវិស័យកម្មន្តសាលក្នុងសេដ្ឋកិច្ចនៅរយៈពេល២ទស្សវត្សចុងក្រោយ នេះបើតាមតាមរបាយការណ៍របស់ធនាគារពិភពលោកចេញផ្សាយក្នុងខែមេសានេះ។ ធនាគារពិភពលោកក៏ទស្សន៍ទាយពីកំណើនសេដ្ឋកិច្ចរបស់ប្រទេសទាំងពីរនេះក្នុងឆ្នាំ២០២៦ និង២០២៧ គឺមានភាពវិជ្ជមានផងដែរ។

ក្នុងរបាយការណ៍ដែលចេញនៅខែមេសា ឆ្នាំ២០២៦នេះ ដែលមានចំណងជើងថា East Asia & Pacific Economic Update Industrial in the Digital Age (បច្ចុប្បន្នភាពសេដ្ឋកិច្ចអាស៊ីខាងកើត និងប៉ាស៊ីហ្វិក គោលនយោបាយឧស្សាហកម្មក្នុងយុគសម័យឌីជីថល) ធនាគារពិភពលោកបានកត់សម្គាល់ថាក្នុងរយៈពេល២០ឆ្នាំចុងក្រោយបណ្ដាប្រទេសភាគច្រើនក្នុងតំបន់អាស៊ីខាងកើត និងប៉ាស៊ីហ្វិក កំពុងជួបប្រទេសនូវការថយចុះនៃចំណែកនៃវិស័យឧស្សាហកម្មក្នុងផលិតផលក្នុងស្រុកសរុប (GDP) របស់ខ្លួន លើកលែងតែកម្ពុជា និងវៀតណាម។

ក្នុងរបាយការណ៍នោះក៏បានឱ្យដឹងដែរថាមូលហេតុដែលធ្វើឱ្យប្រទេសទាំងពីរនេះមានកំណើននោះគឺដោយសារកម្ពុជា និងវៀតណាមបានផ្សារភ្ជាប់ខ្លួនយ៉ាងជ្រៅក្នុងខ្សែច្រវាក់ផ្គត់ផ្គង់សាកល ដែលនៅតែរក្សាបាននូវអត្ថប្រយោជន៍ខ្ពស់ក្នុងវិស័យវាយនភណ្ឌ និងកាត់ដេរ ហើយលើសពីនេះការហូរចូលនៃទំនិញពាក់កណ្ដាលសម្រាប់ពីប្រទេសចិនដើម្បីយកផលិតបន្តនៅក្នុងស្រុកក៏ជាកត្តាជំរុញដ៏សំខាន់ផងដែរ។

ទោះជាយ៉ាងណាធនាគារនេះក៏បានព្រមានពីហានិភ័យមួយចំនួនផងដែរដែលអាចប៉ះពាល់ដល់កំណើននេះគឺការប្រែប្រួលនៃគោលនយោបាយពន្ធ និងការដំឡើងពន្ធពីបណ្ដាប្រទេសធំៗ។ បន្ថែមលើនេះកម្ពុជាត្រូវចាំបាច់វិនិយោគបន្ថែមលើវិស័យថាមពល និងដឹកជញ្ជូន ដើម្បីកាត់បន្ថយថ្លៃដើម និងការពង្រឹងជំនាញផ្នែកឌីជីថលដល់កម្លាំងពលកម្មផងដែរ។

របាយការណ៍របស់ធនាគារពិភពលោកនេះក៏បានទស្សន៍ទាយពីកំណើនសេដ្ឋកិច្ចកម្ពុជាក្នុងឆ្នាំ២០២៦ដែលមានកំណើន ៣.៩ ខណៈឆ្នាំ២០២៧ មានកំណើត៤.៩ ភាគរយ ដែលកំណើននេះត្រូវបានប៉ាន់ស្មានដោយសារងើបឡើងវិញនៃវិស័យទេសចរណ៍ និងភាពរឹងមាំនៃការនាំចេញផលិតផលឧស្សាហកម្មរបស់ប្រទេស៕

អត្ថបទដោយ ហ៊ុន សិរីវឌ្ឍន៍

The post ធនាគារពិភពលោក៖ កម្ពុជា និងវៀតណាម ជាប្រទេសលេចធ្លោជាងគេក្នុងតំបន់លើការរីកចម្រើនផ្នែករោងចក្រ appeared first on Kampuchea Thmey Daily.

ធនាគារពិភពលោក គ្រោងផ្ដល់កម្ចី ២៦០ លានដុល្លារ ដល់កម្ពុជា

deth leng — Thu, 04 Dec 2025 09:10:58 +0000

ធនាគារពិភពលោក (WB) គ្រោងចុះកិច្ចព្រមព្រៀងផ្ដល់ហិរញ្ញប្បទានក្នុងទំហំ ២៦០ លានដុល្លារ ដល់កម្ពុជា នៅឆ្នាំ ២០២៦ ខាងមុខនេះ ហើយគ្រោងបង្កើនទំហំនេះ បន្ថែមទៀត។

ឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានវាយតម្លៃខ្ពស់ចំពោះភាពជាដៃគូរវាងរាជរដ្ឋាភិបាល និងធនាគារពិភពលោក សម្រាប់ការបន្តគាំទ្រដល់ការអភិវឌ្ឍរបស់កម្ពុជា ដែលផ្តោតលើ វិស័យសំខាន់ៗរួមមាន៖ វិស័យអប់រំ, វិស័យសុខាភិបាល, វិស័យថាមពល, វិស័យហេដ្ឋារចនាសម្ព័ន្ធតភ្ជាប់ និងការកែទម្រង់ជារចនាសម្ព័ន្ធតាមរយៈកម្មវិធីអភិវឌ្ឍន៍គោលនយោបាយ ដើម្បីពង្រឹងភាពធន់, ជំរុញការធ្វើពិពិធកម្មសេដ្ឋកិច្ច, ការពង្រឹងខ្សែច្រវ៉ាក់ផលិតកម្ម, ការពង្រឹងភាពប្រកួតប្រជែង, និងការបង្កើនការងារធ្វើ សំដៅជំរុញកំណើន និងការអភិវឌ្ឍរបស់កម្ពុជាឱ្យកាន់ តែលឿនរហ័ស។

លោកឧបនាយករដ្ឋមន្ត្រី បានលើកឡើងនៅក្នុងជំនួប ពិភាក្សាការងារជាមួយលោកស្រី ម៉ារីយ៉ាម សឺរម៉ែន (Mariam J. Sherman) នាយកគ្រប់គ្រងធនាគារពិភពលោកប្រចាំកម្ពុជា ឡាវ វៀតណាមនៅព្រឹកថ្ងៃទី ០២ ខែធ្នូ ឆ្នាំ ២០២៥។

លោកស្រី ម៉ារីយ៉ាម សឺរមែន បានរំលេចអំពីការប្តេជ្ញាចិត្តរបស់ធនាគារពិភពលោក ក្នុងការបន្តកិច្ចសហប្រតិបត្តិការ និងគាំទ្រដល់កម្ពុជា រួមចំណែកក្នុងដំណើរឆ្ពោះទៅសម្រេចតាមចក្ខុវិស័យកម្ពុជា ឆ្នាំ២០៥០ តាមរយៈក្របខ័ណ្ឌថ្មីនៃកិច្ច សហប្រតិបត្តិការភាពជាដៃគូ រវាងរាជរដ្ឋាភិបាលកម្ពុជាជាមួយធនាគារពិភពលោក ឆ្នាំ២០២៥-២០២៩។

លោកស្រីក៏បានរាយការណ៍អំពីការវិភាគថ្មី ដែលធនាគារពិភពលោកកំពុងរៀបចំ ក្នុងគោលបំណងពិនិត្យលើសមិទ្ធផល សម្រេចបាននាពេលកន្លងមក ក៏ដូចជា វាយតម្លៃអំពីកំណើន និងការងាររបស់ប្រទេសជាសមាជិក រួមទាំងកម្ពុជាផង ដើម្បីផ្តល់ភាពងាយស្រួលដល់រាជរដ្ឋាភិបាល ក្នុងការដាក់ចេញវិធានការអន្តរាគមន៍ឱ្យចំគោលដៅ ជំរុញបង្កើតការងារ ដែលជាគោលដៅអភិវឌ្ឍន៍ដ៏ចម្បងរបស់ធនាគារពិភពលោក។

ក្នុងបរិការណ៍នៃភាពមិនប្រាកដប្រជានៃសេដ្ឋកិច្ចសកល ដូចជា គោលនយោបាយពន្ធគយបដិការ, និងកម្មវិបាកនៃជម្លោះព្រំដែនកម្ពុជា-ថៃ, អគ្គបណ្ឌិតសភាចារ្យ និងលោកស្រី ម៉ារីយ៉ាម សឺរមែន បានឯកភាពជំរុញ និងពង្រឹងកិច្ចសហប្រតិបត្តិការឱ្យកាន់តែជិតស្និទ្ធបន្ថែមទៀត លើវិស័យគន្លឹះដូចជា៖ ១. វិស័យហិរញ្ញវត្ថុ ដែលផ្តោតលើការរៀបចំសំណាញ់សុវត្ថិភាព ក្នុងវិស័យហិរញ្ញវត្ថុ និងកម្មវិធីវាយតម្លៃវិស័យហិរញ្ញវត្ថុ, ២. វិស័យគាំពារសង្គម ដែលផ្តោតលើការបន្តពង្រឹងសមត្ថភាពទាំងយន្តការ និងការវិភាជធនធាន ឆ្លើយតបឱ្យបានរហ័សទាន់ពេលវេលាក្នុងពេលមានវិបត្តិ ជាពិសេស បន្តគាំទ្រដល់ជនងាយរងគ្រោះឱ្យកាន់តែមានប្រសិទ្ធភាព ក្រោមក្របខ័ណ្ឌគោលនយោបាយជាតិគាំពារសង្គម ឆ្នាំ ២០២៤-២០៣៥, ៣. ការចូលរួមពីវិស័យឯកជននៅកម្ពុជាក្នុងវិស័យថាមពល ៤. ការបន្តអភិវឌ្ឍវិស័យហេដ្ឋារចនាសម្ព័ន្ធតភ្ជាប់ និងការអភិវឌ្ឍមនុស្ស៕

The post ធនាគារពិភពលោក គ្រោងផ្ដល់កម្ចី ២៦០ លានដុល្លារ ដល់កម្ពុជា appeared first on Kampuchea Thmey Daily.

ក្រសួងសុខាភិបាល និងធនាគារពិភពលោក ប្ដេជ្ញារួមគ្នាលើកកម្ពស់គុណភាពសេវាសុខាភិបាលនៅកម្ពុជាកាន់តែប្រសើរ

អ៊ិន ពិសី — Fri, 14 Nov 2025 01:50:12 +0000

ក្រសួងសុខាភិបាល និងធនាគារពិភពលោក បានប្ដេជ្ញារួមគ្នាបន្តពង្រឹងកិច្ចសហប្រតិបត្តិការក្នុងភាពជាដៃគូ ដើម្បីលើកកម្ពស់គុណភាពសេវាសុខាភិបាលនៅប្រទេសកម្ពុជាឱ្យកាន់តែប្រសើរ សំដៅឈានទៅរកការគ្របដណ្ដប់សុខភាពជាសកល។

ការប្តេជ្ញារួមគ្នានេះបានធ្វើឡើងក្នុងឱកាសដែលលោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានទទួលជួបលោកស្រី Mariam Sherman នាយកប្រចាំប្រទេសកម្ពុជា ឡាវ និងវៀតណាម នៃធនាគារពិភពលោក និងក្រុមការងារ កាលពីថ្ងៃទី ១៣ វិច្ឆិកា ដើម្បីពិភាក្សាអំពីផែនការគ្របដណ្តប់សុខភាពជាសកល ការបណ្តុះបណ្តាលផ្នែកវេជ្ជសាស្ត្រ អាហារូបត្ថម្ភ សុខភាពមាតា និងទារក និងអាទិភាពសម្រាប់កិច្ចសហប្រតិបត្តិការបន្ត។

លោកសាស្ត្រាចារ្យរដ្ឋមន្ត្រី បានថ្លែងអំណរគុណដល់ ធនាគារពិភពលោក ដែលបានសហការគាំទ្រក្រសួងសុខាភិបាលទាំងបច្ចេកទេស និងហិរញ្ញវត្ថុ ក្នុងការងារលើកកម្ពស់សុខុមាលភាពរបស់ប្រជាជនកម្ពុជា ជាពិសេសចំពោះគម្រោងអាហារូបត្ថម្ភ គម្រោងពង្រឹងប្រព័ន្ធអប់រំមុនពេលបម្រើការងារសម្រាប់មន្ត្រីសុខាភិបាល គម្រោងលើកកម្ពស់សមធម៌សុខភាព និងគុណភាព ដំណាក់កាលទី ២ និងគម្រោងឆ្លើយតបគ្រោះអាសន្នកូវីដ-១៩។

លោកស្រី Mariam Sherman បានលើកឡើងថា ក្នុងរយៈពេលប៉ុន្មានឆ្នាំចុងក្រោយនេះ ការគាំទ្ររបស់ធនាគារពិភពលោក បានចូលរួមចំណែកក្នុងវិស័យសុខាភិបាលរបស់ប្រទេសកម្ពុជា ដើម្បីឈានទៅសម្រេចបានការគ្របដណ្តប់សុខភាពជាសកល (UHC) ដែលបង្ហាញពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការលើកកម្ពស់សុខភាពប្រជាជន និងភាពជាដៃគូដ៏រឹងមាំរវាងធនាគារពិភពលោក និងក្រសួងសុខាភិបាល។

ពាក់ព័ន្ធក្នុងជំនួបនេះដែរ លោកស្រី បានបន្ថែមថា កិច្ចប្រជុំនេះបានផ្តោតលើអាទិភាពសំខាន់ៗ របស់ ក្រសួងសុខាភិបាល និងចំណុចបន្ស៊ីគ្នាដែលអាចទទួលបានការគាំទ្រពីដៃគូអភិវឌ្ឍន៍ រួមទាំងធនាគារពិភពលោក និងពិភាក្សាអំពីលទ្ធផលការងារ កត្តាប្រឈម និងដំណោះស្រាយចំពោះ គម្រោងដែលនឹងត្រូវបានបញ្ចប់មានជាអាទិ៍ គម្រោងអាហារូបត្ថម្ភ គម្រោងពង្រឹងប្រព័ន្ធអប់រំមុនពេលបម្រើការងារសម្រាប់មន្ត្រីសុខាភិបាល និងគម្រោងលើកកម្ពស់សមធម៌សុខភាព និងគុណភាព ដំណាក់កាលទី ២។

លោកសាស្ត្រាចារ្យរដ្ឋមន្ត្រី បានថ្លែងអំណរគុណដល់ការគាំទ្ររបស់ធនាគារពិភពលោក និងបានសំណូមពរ ឱ្យអ្នកជំនាញការ និងអ្នកបច្ចេកទេសរបស់ធនាគារពិភពលោក សហការ និងបន្តពិភាក្សាឱ្យបានជិតស្និទ្ធជាមួយនឹងគណៈគ្រប់គ្រងគម្រោងនីមួយៗ ដើម្បីធានាឱ្យបាននូវប្រសិទ្ធភាព និងធ្វើយ៉ាងណាដើម្បីឱ្យសម្រេចបាននូវសូចនាករដែលបានកែសម្រួល។

ជាងនេះទៅទៀត លោកសាស្ត្រាចារ្យរដ្ឋមន្ត្រី បានផ្តោតសំខាន់ថា គម្រោងខាងលើ ពិតជាមានសារៈសំខាន់ក្រៃលែង ដើម្បីចូលរួមចំណែកក្នុងការសម្រេចឱ្យបាននូវផែនការយុទ្ធសាស្ត្រសុខាភិបាល ក៏ដូចជាចំណុចជាអាទិភាពសុខាភិបាល ដើម្បីឈានទៅរកការសម្រេចបាននូវការគ្របដណ្ដប់សុខភាពជាសកល ស្របតាមផែនការយុទ្ធសាស្ត្របញ្ចកោណ នៃរាជរដ្ឋាភិបាលកម្ពុជា៕

អត្ថបទ ៖ សំអឿន

The post ក្រសួងសុខាភិបាល និងធនាគារពិភពលោក ប្ដេជ្ញារួមគ្នាលើកកម្ពស់គុណភាពសេវាសុខាភិបាលនៅកម្ពុជាកាន់តែប្រសើរ appeared first on Kampuchea Thmey Daily.

WB ដំឡើងការព្យាករកំណើនសេដ្ឋកិច្ចចិនដល់ ៤,៨ % ឆ្នាំនេះ

Huon Dina — Tue, 07 Oct 2025 08:57:02 +0000

ធនាគារពិភពលោក (WB) បានបង្កើនការព្យាករកំណើនសេដ្ឋកិច្ចចិនសម្រាប់ឆ្នាំ ២០២៥ ដល់ ៤,៨ ភាគរយ ប៉ុន្តែបានព្រមានពីសន្ទុះយឺតយ៉ាវឆ្នាំបន្ទាប់ ដោយសារតែកម្សោយទំនុកចិត្តអ្នកប្រើប្រាស់ អាជីវកម្ម និងការបញ្ជាទិញថ្មីៗ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

ធនាគារបាននិយាយក្នុងរបាយការណ៍ទស្សនវិស័យសេដ្ឋកិច្ចប្រចាំឆ្នាំរបស់ខ្លួនសម្រាប់តំបន់អាស៊ីបូព៌ា និងប៉ាស៊ីហ្វិក ដែលចេញផ្សាយនៅថ្ងៃអង្គារនេះថា សេដ្ឋកិច្ចចិនរំពឹងថានឹងកើនឡើង ៤,៨ ឆ្នាំនេះ និង ៤,២ ភាគរយ នៅឆ្នាំក្រោយ ធៀបនឹងការព្យាករចាស់ ៤ ភាគរយ សម្រាប់ទាំងឆ្នាំនេះ និងឆ្នាំក្រោយ និងកំណើន ៥ ភាគរយ កាលពីឆ្នាំមុន។

សេដ្ឋវិទូរបស់ធនាគារ បាននិយាយក្នុងរបាយការណ៍ដដែលថា៖ «កំណើននៅចិន ដែលជាប្រទេសមានសេដ្ឋកិច្ចធំជាងគេក្នុងតំបន់ រំពឹងថានឹងធ្លាក់ចុះ» ដោយសារតែការធ្លាក់ចុះកំណើននៃការនាំចេញ និងការចំណាយរបស់រដ្ឋាភិបាល ដោយសារបំណុលសាធារណៈកើនឡើង គួបផ្សំនឹងបញ្ហារយៈពេលវែងដែលមានស្រាប់។

WB បានរំពឹងផងដែរថា សេដ្ឋកិច្ចនៃតំបន់អាស៊ីបូព៌ា និងប៉ាស៊ីហ្វិក នឹងកើនឡើងត្រឹម ៤,៤ ភាគរយ ក្នុងឆ្នាំ ២០២៥ ដោយកើនឡើង ០,២ ភាគរយ ធៀបនឹងការព្យាករកាលពីលើកមុន ខណៈរក្សាការព្យាករកំណើន ៤,៥ ភាគរយ សម្រាប់ឆ្នាំ ២០២៦។

គួរគូសបញ្ជាក់ថា កំណើនសេដ្ឋកិច្ចសកលបានស្ថិតក្រោមសម្ពាធនៅឆ្នាំនេះ ដោយសារតែគោលនយោបាយពន្ធគយរបស់សហរដ្ឋអាមេរិក និងភាពបន្តតានតឹងនៃជម្លោះភូមិសាស្រ្តនយោបាយ។ អាស៊ី ដែលពឹងផ្អែកខ្លាំងលើការនាំចេញ រងគ្រោះខ្លាំងដោយពន្ធខ្ពស់របស់សហរដ្ឋអាមេរិក។

ឥឡូវនេះ ក្រុមអ្នកវិភាគរំពឹងថា ចិនអាចនឹងបញ្ចេញវិធានការជំរុញសេដ្ឋកិច្ចបន្ថែមទៀត ដើម្បីគាំទ្រដល់គោលដៅកំណើនប្រចាំឆ្នាំរបស់រដ្ឋាភិបាល «ប្រហែល ៥ ភាគរយ»។

ជុំវិញបញ្ហានេះផងដែរ ធនាគារពិភពលោក បានជំរុញឱ្យប្រទេសនានាបន្តផ្តោតលើការរំពឹងទុកផ្នែកសេដ្ឋកិច្ចរយៈពេលវែង ដោយនិយាយថា ការជំរុញកំណើនរយៈពេលខ្លីតាមរយៈវិធានការសារពើពន្ធអាចផ្តល់នូវអត្ថប្រយោជន៍នៃការអភិវឌ្ឍន៍យូរអង្វែងតិចជាងកំណែទម្រង់ក្នុងស្រុកដ៏ស៊ីជម្រៅ៕

The post WB ដំឡើងការព្យាករកំណើនសេដ្ឋកិច្ចចិនដល់ ៤,៨ % ឆ្នាំនេះ appeared first on Kampuchea Thmey Daily.

ក្រសួងសុខាភិបាល៖ ធនាគារពិភពលោក ប្តេជ្ញាបន្តឧបត្ថម្ភគាំទ្រដល់វិស័យសុខាភិបាលកម្ពុជាឱ្យកាន់តែប្រសើរឡើង

Ken Malis — Thu, 22 May 2025 07:40:22 +0000

ក្នុងអំឡុងពេលចូលរួមមហាសន្និបាតអង្គការសុខភាពពិភពលោក លើកទី៧៨ ចាប់ពីថ្ងៃទី១៩ ដល់ថ្ងៃទី២៧ ខែឧសភា ឆ្នាំ២០២៥ លោក ឈាង រ៉ា រដ្ឋមន្រ្តីក្រសួងសុខាភិបាល បានទទួលជួបសម្តែងការគួរសម និងពិភាក្សាការងារជាមួយលោកវេជ្ជបណ្ឌិត Juan Pablo នាយកសកលផ្នែកសុខភាព នៃធនាគារពិភពលោក និងជានាយកផ្នែកហិញ្ញវត្ថុសកល សម្រាប់ស្រ្តី កុមារ និងយុវវ័យប្រចាំនៅទីក្រុងវ៉ាស៊ីនតោន សហរដ្ឋអាមេរិក នាថ្ងៃទី២១ ខែឧសភា ឆ្នាំ២០២៥។

ក្នុងឱកាសនោះ លោករដ្ឋមន្រ្តី បានសម្តែងនូវការស្វាគមន៍ និងថ្លែងអំណរគុណយ៉ាងជ្រាលជ្រៅចំពោះធនាគារ ពិភពលោក ដែលបានឧបត្ថម្ភគាំទ្រដល់វិស័យសុខាភិបាលកម្ពុជាកន្លងមក ជាពិសេសកម្មវិធីលើកកម្ពស់គុណភាព និងសមធម៌សុខាភិបាល កម្មវិធីអាហរូបត្ថម្ភ ការប្រយុទ្ធប្រឆាំងនឹងជំងឺមិនឆ្លង និងការបណ្តុះបណ្តាលធនធានមនុស្ស រួមទាំងការបណ្តុះបណ្តាលមុនពេលបំពេញការងារ។

ចំណែកលោកវេជ្ជបណ្ឌិត Juan Pablo បានសម្តែងនូវការកោតសរសើរដល់កម្ពុជា ដែលតែងតែសហការយ៉ាងជិតស្និទ្ធ និងគាំទ្រធនាគារពិភពលោក ក្នុងការជំរុញលើកកម្ពស់សេវាសុខាភិបាលកម្ពុជា ព្រមទាំងប្តេជ្ញាបន្តឧបត្ថម្ភគាំទ្រដល់វិស័យសុខាភិបាលកម្ពុជា៕

The post ក្រសួងសុខាភិបាល៖ ធនាគារពិភពលោក ប្តេជ្ញាបន្តឧបត្ថម្ភគាំទ្រដល់វិស័យសុខាភិបាលកម្ពុជាឱ្យកាន់តែប្រសើរឡើង appeared first on Kampuchea Thmey Daily.

ធនាគារពិភពលោក Archives - Kampuchea Thmey Daily

ធនាគារពិភពលោកអនុម័តកញ្ចប់ប្រាក់កម្ចី ១,០២ ប៊ីលានដុល្លារសម្រាប់​ហ្វីលីពីន

ធនាគារពិភព​លោក​រំពឹងថា កំណើនសេដ្ឋកិច្ច​វៀតណាម​​នឹងធ្លាក់សន្ទុះឆ្នាំនេះ

ធនាគារ​ពិភព​លោក​អនុម័ត​លុយ​៣០០លានដុល្លារ​ដល់​កម្ពុជា​សម្រាប់​កែ​លម្អ​ស្ថានភាព​ផ្លូវ​

ធនាគារ​ពិភពលោក ​គ្រោង​ផ្ដល់​កម្ចី​ ២៦០ ​លានដុល្លារ ​ដល់​កម្ពុជា​