ព័ត៌មានជាតិ

ធនាគារពិភពលោក៖ កម្ពុជា និងវៀតណាម ជាប្រទេសលេចធ្លោជាងគេក្នុងតំបន់លើការរីកចម្រើនផ្នែករោងចក្រ

បានផុស

៣ ខែ មុន

នៅ

ថ្ងៃព្រហស្បតិ៍ ២៣ មេសា ២០២៦

ដោយ

ប្រទេសកម្ពុជា និងវៀតណាម ជាប្រទេស២គត់ក្នុងតំបន់អាស៊ីខាងកើត និងអាស៊ីប៉ាស៊ីហ្វិកដែលមានការកើនឡើងច្រើននៃចំណែកវិស័យកម្មន្តសាលក្នុងសេដ្ឋកិច្ចនៅរយៈពេល២ទស្សវត្សចុងក្រោយ នេះបើតាមតាមរបាយការណ៍របស់ធនាគារពិភពលោកចេញផ្សាយក្នុងខែមេសានេះ។ ធនាគារពិភពលោកក៏ទស្សន៍ទាយពីកំណើនសេដ្ឋកិច្ចរបស់ប្រទេសទាំងពីរនេះក្នុងឆ្នាំ២០២៦ និង២០២៧ គឺមានភាពវិជ្ជមានផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងរបាយការណ៍ដែលចេញនៅខែមេសា ឆ្នាំ២០២៦នេះ ដែលមានចំណងជើងថា East Asia & Pacific Economic Update Industrial in the Digital Age (បច្ចុប្បន្នភាពសេដ្ឋកិច្ចអាស៊ីខាងកើត និងប៉ាស៊ីហ្វិក គោលនយោបាយឧស្សាហកម្មក្នុងយុគសម័យឌីជីថល) ធនាគារពិភពលោកបានកត់សម្គាល់ថាក្នុងរយៈពេល២០ឆ្នាំចុងក្រោយបណ្ដាប្រទេសភាគច្រើនក្នុងតំបន់អាស៊ីខាងកើត និងប៉ាស៊ីហ្វិក កំពុងជួបប្រទេសនូវការថយចុះនៃចំណែកនៃវិស័យឧស្សាហកម្មក្នុងផលិតផលក្នុងស្រុកសរុប (GDP) របស់ខ្លួន លើកលែងតែកម្ពុជា និងវៀតណាម។

ក្នុងរបាយការណ៍នោះក៏បានឱ្យដឹងដែរថាមូលហេតុដែលធ្វើឱ្យប្រទេសទាំងពីរនេះមានកំណើននោះគឺដោយសារកម្ពុជា និងវៀតណាមបានផ្សារភ្ជាប់ខ្លួនយ៉ាងជ្រៅក្នុងខ្សែច្រវាក់ផ្គត់ផ្គង់សាកល ដែលនៅតែរក្សាបាននូវអត្ថប្រយោជន៍ខ្ពស់ក្នុងវិស័យវាយនភណ្ឌ និងកាត់ដេរ ហើយលើសពីនេះការហូរចូលនៃទំនិញពាក់កណ្ដាលសម្រាប់ពីប្រទេសចិនដើម្បីយកផលិតបន្តនៅក្នុងស្រុកក៏ជាកត្តាជំរុញដ៏សំខាន់ផងដែរ។

ទោះជាយ៉ាងណាធនាគារនេះក៏បានព្រមានពីហានិភ័យមួយចំនួនផងដែរដែលអាចប៉ះពាល់ដល់កំណើននេះគឺការប្រែប្រួលនៃគោលនយោបាយពន្ធ និងការដំឡើងពន្ធពីបណ្ដាប្រទេសធំៗ។ បន្ថែមលើនេះកម្ពុជាត្រូវចាំបាច់វិនិយោគបន្ថែមលើវិស័យថាមពល និងដឹកជញ្ជូន ដើម្បីកាត់បន្ថយថ្លៃដើម និងការពង្រឹងជំនាញផ្នែកឌីជីថលដល់កម្លាំងពលកម្មផងដែរ។

របាយការណ៍របស់ធនាគារពិភពលោកនេះក៏បានទស្សន៍ទាយពីកំណើនសេដ្ឋកិច្ចកម្ពុជាក្នុងឆ្នាំ២០២៦ដែលមានកំណើន ៣.៩ ខណៈឆ្នាំ២០២៧ មានកំណើត៤.៩ ភាគរយ ដែលកំណើននេះត្រូវបានប៉ាន់ស្មានដោយសារងើបឡើងវិញនៃវិស័យទេសចរណ៍ និងភាពរឹងមាំនៃការនាំចេញផលិតផលឧស្សាហកម្មរបស់ប្រទេស៕