នេះជាការបញ្ជាក់របស់លោកស្រី យ៉ាស្មីន ស៊ីឌីគី (Yasmin Siddiqi) នាយិកា ADB ប្រចាំកម្ពុជា ក្នុងឱកាសចូលជួបពិភាក្សាការងារជាមួយលោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ កាលពីថ្ងៃទី៥ ខែមិថុនា ឆ្នាំ២០២៦ នៅទីស្តីការក្រសួង។

ក្នុងជំនួបនេះ ភាគីទាំងពីរបានពិភាក្សាអំពីវឌ្ឍនភាពនៃកិច្ចសហប្រតិបត្តិការ និងផ្លាស់ប្តូរយោបល់លើសេចក្តីព្រាងគោលនយោបាយជាតិស្តីពីមុខរបរ និងការងារ ឆ្នាំ២០២៦-២០៣៥ ព្រមទាំងគោលនយោបាយជាតិស្តីពីការអប់រំបណ្ដុះបណ្ដាលបច្ចេកទេស និងវិជ្ជាជីវៈ (NTVET)។

ក្នុងជំនួបនោះ លោក ហេង សួរ បានវាយតម្លៃខ្ពស់ចំពោះភាពជាដៃគូដ៏រឹងមាំ និងយូរអង្វែងរវាង ADB និងរាជរដ្ឋាភិបាលកម្ពុជា ដែលបានរួមចំណែកសំខាន់ក្នុងការអភិវឌ្ឍជំនាញ កម្លាំងពលកម្ម និងការពង្រឹងសមត្ថភាពប្រកួតប្រជែងរបស់ប្រទេស។ លោកបានគូសបញ្ជាក់ថា វិស័យ TVET និងកម្មវិធីបណ្ដុះបណ្ដាលជំនាញ ១,៥លាននាក់ កំពុងដើរតួនាទីសំខាន់ក្នុងការបំប្លែងកម្លាំងពលកម្ម និងផ្តល់ឱកាសឱ្យយុវជនទទួលបានជំនាញស្របតាមតម្រូវការឧស្សាហកម្ម។

ជាការឆ្លើយតប លោកស្រី យ៉ាស្មីន ស៊ីឌីគី បានកោតសរសើរចំពោះវឌ្ឍនភាពការងាររបស់ក្រសួងការងារ និងបណ្ដុះបណ្ដាលវិជ្ជាជីវៈ និងបានបង្ហាញការប្តេជ្ញាចិត្តបន្តគាំទ្រការអនុវត្តគោលនយោបាយ និងកម្មវិធីយុទ្ធសាស្ត្រនានាក្នុងវិស័យការងារ និង TVET។ ភាគីទាំងពីរក៏បានពិភាក្សាអំពីការពង្រីកកម្មវិធីបណ្ដុះបណ្ដាលគ្រូបង្គោល និងការអភិវឌ្ឍសាលា TVET នៅតំបន់គោលដៅសំខាន់ៗបន្ថែមទៀត។

ជាមួយនឹងកិច្ចពិភាក្សាប្រកបដោយការស្ថាបនា  លោក ហេង សួរ បានបញ្ជាក់ថា ក្រសួងការងារ បានត្រៀមខ្លួនបន្តពង្រឹង និងពង្រីកកិច្ចសហការជាមួយ ADB ដើម្បីជំរុញការអភិវឌ្ឍមូលធនមនុស្ស និងកសាងកម្លាំងពលកម្មជំនាញប្រកបដោយគុណភាព សម្រាប់គាំទ្រដល់ការអភិវឌ្ឍសេដ្ឋកិច្ច និងសង្គមរបស់កម្ពុជាក្នុងរយៈពេលវែង៕

The post ADB បន្តគាំទ្រកម្ពុជា លើការអភិវឌ្ឍវិស័យ TVET និងកម្លាំងពលកម្មជំនាញ appeared first on Kampuchea Thmey Daily.

លោករដ្ឋមន្ត្រីបានស្នើក្នុង​ឱកាស​ទទួល​ជួប​ស្វាគមន៍លោកស្រី Yasmin Siddiqi នាយកធនាគារអភិវឌ្ឍន៍អាស៊ី (ADB) ប្រចាំ​ប្រទេស​កម្ពុជា ដែលទើបត្រូវបានតែងតាំងថ្មី នៅ​ថ្ងៃ​ទី​២៤ ខែ​វិច្ឆិកា ឆ្នាំ​២០២៥។

លោក​រដ្ឋមន្ត្រី ហែម វណ្ណឌី បានអបអរចំពោះតួនាទីថ្មីរបស់លោកស្រី Yasmin និងបានបញ្ជាក់ថា ក្រសួងត្រៀមបន្តសហការជិតស្និទ្ធជាមួយធនាគារអភិវឌ្ឍន៍អាស៊ី។ លោក​រដ្ឋមន្ត្រី​បាន​លើក​ឡើង​ពី​ភាព​ជាដៃគូដ៏រឹងមាំរវាង ADB ជាមួយក្រសួង ព្រមទាំងការគាំទ្រយ៉ាងខ្ជាប់ខ្ជួនរបស់ធនាគារ ក្នុងដំណើរអភិវឌ្ឍន៍របស់កម្ពុជា រួមទាំងក្នុងអំឡុងពេលនៃវិបត្តិកូវីដ-១៩ ។

លោក​រដ្ឋមន្ត្រីបានលើក​ឡើង​អំពីកិច្ចខិតខំប្រឹងប្រែងរបស់កម្ពុជា ឆ្ពោះទៅ​ការចាកចេញ​ពីឋានៈ​ជាប្រទេស​ដែល​មានការអភិវឌ្ឍតិចតួច និងភាពចាំបាច់នៃការត្រៀមលក្ខណៈរបស់សហគ្រាសធុនតូច និងមធ្យម ឧស្សាហកម្ម និងស្ថាប័នរាជរដ្ឋាភិបាល ដើម្បីប្រឈមកំណើននៃការប្រកួតប្រជែង និងបរិវត្តកម្មបច្ចេកវិទ្យាយ៉ាងឆាប់រហ័ស។

លោក​រដ្ឋមន្ត្រីក៏បានលើកឡើងពី តួនាទី​សំខាន់​របស់ ADB ក្នុង​ការគាំទ្រ​គំនិតផ្តួចផ្តើម​កែទម្រង់​វិស័យ​ទឹកស្អាត និងបរិវត្តកម្មឧស្សាហកម្មផងដែរ។

លោកស្រី Siddiqi បានវាយតម្លៃខ្ពស់ចំពោះសន្ទុះនៃការអភិវឌ្ឍរបស់កម្ពុជា និង​កិច្ចសហប្រតិបត្តិការ​ជាមួយក្រសួង និងរាជរដ្ឋាភិបាល ព្រមទាំងបានបញ្ជាក់ការប្តេជ្ញាចិត្តរបស់ធនាគារ ចំពោះការផ្តល់ហិរញ្ញប្បទានផ្អែកលើគោលនយោបាយ។

លោកស្រីក៏បានជម្រាបជូនថា ក្រុមប្រឹក្សាភិបាលរបស់ ADB គ្រោងនឹងអនុម័តកញ្ចប់ហិរញ្ញប្បទានវិស័យទឹកស្អាតក្នុងសប្តាហ៍នេះ ដែលសបញ្ជាក់ពីការបន្តកិច្ចសហការរឹងមាំ ក្រោមកម្មវិធីភាពជាដៃគូប្រចាំប្រទេសថ្មីរបស់ខ្លួន។

លោក​រដ្ឋមន្ត្រី បានសង្កត់ធ្ងន់លើសារៈសំខាន់នៃការសម្របសម្រួល និងបានស្នើឱ្យធនាគារអភិវឌ្ឍន៍អាស៊ី បន្តកៀរ​គរ​ហិរញ្ញប្បទាន ជំនួយបច្ចេកទេស និងផ្តល់​ឱកាសហិរញ្ញប្បទាន​សម្រាប់​ក្រុមហ៊ុន​នវានុវត្តន៍​ថ្មី​ៗ​កាន់​តែ​ច្រើន ដើម្បី​ពន្លឿន​ការអភិវឌ្ឍវិស័យឯកជននៅកម្ពុជា៕

The post រដ្ឋមន្ត្រីឧស្សាហកម្មស្នើឱ្យ ADB ផ្តល់អាទិភាពខ្ពស់ដល់ការអភិវឌ្ឍវិស័យឯកជន appeared first on Kampuchea Thmey Daily.

ការវាយតម្លៃរបស់ ADB បានកត់សម្គាល់ថា សសរស្តម្ភទាំង ៣ នៃសេដ្ឋកិច្ចរបស់​បង់ក្លាដែស ដែលរួមមានវិស័យធនាគារ ស្ថាប័នហិរញ្ញវត្ថុមិនមែនធនាគារ (NBFIs) និងទីផ្សារភាគហ៊ុន ត្រូវបានជាប់គាំងនៅក្នុងអស្ថិរភាព ទោះបីជា​រដ្ឋាភិបាលរបស់មេដឹកនាំបណ្ដោះអាសន្នលោក Muhammad Yunus ប្រឹងប្រែងក្នុងការធ្វើអ្វីៗ​ឱ្យ​វិលទៅរកភាពប្រក្រតីឡើងវិញក៏ដោយ។​

បង់ក្លាដែស បានជាប់​បញ្ហា​ដ៏អាក្រក់ដដែលៗ ដែល​រួមមានបញ្ហា​​​​​កម្ចីដែល​ខកសំណង ឬសងមិនរួច​ (Defaulted Loans) កម្សោយ​បទប្បញ្ញត្តិ​ ឥទ្ធិពលនយោបាយ អំពើពុករលួយ និងចំនួន​ច្រើន​នៃក្រុមហ៊ុនដែលមាន​ហានិភ័យ​ហិរញ្ញវត្ថុ​។ ​កត្តាទាំងអស់នេះ បានធ្វើឱ្យសេដ្ឋកិច្ចរបស់ប្រទេសស្ថិតក្នុងស្ថានភាពមិនច្បាស់លាស់ ដែលនាំឱ្យមានភាពមិនច្បាស់លាស់អំពីអនាគត ខណៈ​បង់ក្លាដែសកំពុងត្រៀមរៀបចំការបោះឆ្នោត​ជ្រើសរើសមេដឹកនាំថ្មី​នៅឆ្នាំក្រោយ។

ទាំងនេះគឺជាស្ថានភាពនៃសសរស្តម្ភទាំង ៣ នៃសេដ្ឋកិច្ចបង់ក្លាដែស៖

1. វិស័យធនាគារជាប់គាំងក្នុងបញ្ហា​​ឥណទានខកសំណង

អ្នកជំនាញផ្នែកហិរញ្ញវត្ថុបានកត់សម្គាល់ថា គោលនយោបាយដ៏ធូររលុងជាច្រើនឆ្នាំ ការជ្រៀតជ្រែកផ្នែកនយោបាយ និងអំពើពុករលួយ បានធ្វើឱ្យវិស័យធនាគារបង់ក្លាដែស​ធ្លាក់ចូលទៅក្នុង​បន្ទុក ដោយសារតែបញ្ហា​កម្ចីមិនអាចសង​។ នេះបើតាមការរាយការណ៍របស់កាសែត Dhaka Tribune។ យោង​តាម​ការ​ប៉ាន់​ស្មាន​ពី​ធនាគារកណ្ដាល​​បង់ក្លាដែស ​កម្ចីមិនអាចសង មាន​រហូតដល់ទៅ ៦ ទ្រីលាន តាកា (៤៩,៣ ប៊ីលាន​ដុល្លារអាមេរិក) ​គិតត្រឹមបំណាច់ខែមិថុនា ឆ្នាំ ២០២៥។ ​

ក្រៅពីនេះ ឥណទានសងមិនរួចលួចលាក់ (Hidden Defaults) មាន​រហូតដល់ទៅ ៣,១៨ ទ្រីលាន​ តាកា (ប្រហែល ២៦ ប៊ីលាន​ដុល្លារ)។

ក្នុង​អំឡុង​ពេល​រដ្ឋាភិបាល​មុន មាន​ «ការ​លួច​ប្លន់ក្នុងនាមប្រាក់កម្ចី» ​ទ្រង់ទ្រាយធំ។ អ្នកជំនួញដែលមានអំណាចជាច្រើនមិនបានសងប្រាក់កម្ចីរបស់ពួកគេទេ ទោះបីជាពួកគេមានលុយក៏ដោយ។ ដោយ​សារ​តែបញ្ហានេះ ​រដ្ឋាភិបាលបានស្នើឱ្យដកចេញនូវនិយមន័យនៃ «អ្នកខ្មីមិនសងដោយ​ចេតនា» ​ក្នុងសេចក្តីព្រាងច្បាប់ស្តីពីក្រុមហ៊ុនធនាគារថ្មី។ នេះបើតាមការឱ្យដឹងរបស់​មន្ត្រីធនាគារបង់ក្លាដែសម្នាក់ ប្រាប់ The Dhaka Tribune ​។

ច្បាប់ដែលបានធ្វើវិសោធនកម្មឆ្នាំ ២០២៣ បានតម្រូវឱ្យគ្រប់ធនាគារទាំងអស់រៀបចំបញ្ជី «អ្នកខ្មីមិនសងដោយ​ចេតនា» ហើយបញ្ជូនវាទៅធនាគារកណ្តាល។​​ ប៉ុន្តែសេចក្តីព្រាងច្បាប់របសរដ្ឋាភិបាល​លោក Yunus បាន​អះអាងថា ការកំណត់អត្តសញ្ញាណ «អ្នកខ្មីមិនសងដោយ​ចេតនា» ​គឺស្មុគស្មាញ និងមិនស្របតាមការពិត។

ទាក់ទិញនឹង​បញ្ហានេះ លោកបណ្ឌិត Ahsan H Mansur ទេសាភិបាលធនាគារបង់ក្លាដែសបានសន្យាថានឹងមានតម្លាភាពកាន់តែច្រើនដោយនិយាយថា៖ «ចាប់ពីពេលនេះតទៅ គ្មានព័ត៌មានណាមួយត្រូវបានរក្សាទុកជាសម្ងាត់ទេ។ ប្រាក់កម្ចីដែលមិនសងទាំងអស់ នឹងត្រូវបានបង្ហាញជាសាធារណៈ ហើយកិច្ចខិតខំប្រឹងប្រែងស្តារឡើងវិញយ៉ាងតឹងរឹងនឹងត្រូវអនុវត្ត»។

– ABD៖ ប្រព័ន្ធធនាគារដ៏ខ្សោយបំផុតនៅអាស៊ី​

របាយការណ៍ថ្មីៗរបស់ធនាគារអភិវឌ្ឍន៍អាស៊ី (ADB) បាន​បង្ហាញថា បង់ក្លាដែសឥឡូវនេះមានបរិមាណប្រាក់កម្ចី​ខកសំណងច្រើនជាងគេនៅអាស៊ី។ នៅឆ្នាំ ២០២៤ ​មាន ២០,២ ភាគរយ នៃប្រាក់កម្ចីទាំងអស់ គឺជាប្រាក់កម្ចីខកសំណង ឬសងមិនរួច ​ដោយ​កើនឡើង ២៨ ភាគរយ ធៀបនឹង​ឆ្នាំមុន។

ADB បាន​ពណ៌នា​​បង់ក្លាដែស​ថា​មាន «ប្រព័ន្ធ​ធនាគារ​ខ្សោយ​បំផុត» នៅ​អាស៊ី ហើយ​ផ្ទុយទៅវិញ ឥណ្ឌា ប៉ាគីស្ថាន និងស្រីលង្កា បានគ្រប់គ្រងកាត់បន្ថយប្រាក់កម្ចី​ខកសំណង​តាមរយៈកំណែទម្រង់ផ្សេងៗ​។

អតីតប្រធានសេដ្ឋវិទូរបស់ធនាគារពិភពលោក លោកបណ្ឌិត Zahid Hussain បាននិយាយថា៖ «ច្បាប់កាន់តែតឹងរ៉ឹង នោះចំនួនប្រាក់កម្ចី​ខកសំណងនឹងកើនឡើងកាន់តែច្រើន។ បើគ្មានកំណែទម្រង់ដិតដល់ដូចប្រទេសឥណ្ឌាទេ វិបត្តិនេះនឹងមិនបញ្ចប់ឡើយ»។

លោក Selim Raihan នាយកប្រតិបត្តិនៃវិទ្យាស្ថានស្រាវជ្រាវ បណ្តាញអាស៊ីខាងត្បូងស្តីពីគំរូសេដ្ឋកិច្ច (SANEM) បានបន្ថែមថា៖ «បញ្ហានឹងមិនត្រូវបានដោះស្រាយទេ លុះត្រាតែ​ការជ្រៀតជ្រែកផ្នែកនយោបាយត្រូវបានបញ្ឈប់ ហើយប្រព័ន្ធតុលាការត្រូវបានពង្រឹង»។

ក្នុងបរិបទនៃកង្វល់ទាំងនេះ ធនាគារកណ្ដាល​បង់ក្លាដែសបានសម្រេចចិត្តច្របាច់បញ្ចូលគ្នានូវធនាគារអ៊ិស្លាមចំនួន ៥ ដែលរួមមាន First Security, Social Islami, Global Islami, Union និង Exim Bank ចូលទៅក្នុងធនាគារ​គ្រប់គ្រងដោយរដ្ឋថ្មី​ឈ្មោះ «United Islami Bank»។ អត្រា​កម្ចីខកសំណងរបស់ធនាគារទាំងនេះ មាន​ចន្លោះពី ៤៨-៩៨ ភាគរយ។

​

ទេសាភិបាលធនាគារបង់ក្លាដែសបាននិយាយ​នៅពេលច្របាច់បញ្ចូលគ្នានេះថា៖ «គំនិតផ្តួចផ្តើមនេះគឺដើម្បីការការពារអ្នកដាក់ប្រាក់បញ្ញើ»។ លោក​បាន​បន្ថែម​ថា​៖ «​មិន​មាន​អ្វី​ដែល​ត្រូវ​ភ័យ​ខ្លាច​ទេ។ រដ្ឋាភិបាល​នឹង​ទទួល​ខុស​ត្រូវ​ទាំង​អស់»។

២. វិវត្តិនៅក្នុងវិស័យធនាគារ រាលដាលដល់ NBFI ​

កាសែត The Dhaka Tribune បាន​រាយការណ៍ថា វិបត្តិ​ក្នុងវិស័យធនាគារបង់ក្លាដែស បានសាយភាយចូលទៅក្នុងស្ថាប័នហិរញ្ញវត្ថុមិនមែនធនាគារ (NBFI) ​ហើយ​​ស្ថានភាព​ក្នុង​វិស័យ​នេះ​កាន់​តែ​គួរ​ឲ្យ​ព្រួយ​បារម្ភ ដោយកៀកនឹង​ដួលរលំ។

យោងតាមធនាគារបង់ក្លាដែស ប្រាក់កម្ចី​ខកសំណងក្នុង​ NBFIs ដែល​ប្រឈមបញ្ហា មាន​ចំនួន ២១៤,៦២ ប៊ីលាន តាកា (១,៧៦ ប៊ីលាន​ដុល្លារ) ដែល​ស្មើនឹង ៨៣ ភាគរយ ​នៃផលប័ត្រប្រាក់កម្ចីរបស់ពួកគេ។​

អ្នកជំនាញបានអះអាងថា វិស័យនេះស្ទើរតែក្ស័យធនទៅហើយ ដោយស្ថាប័នជាច្រើនមិនអាចបង់ប្រាក់បញ្ញើវិញបាន ធ្វើឲ្យបាត់បង់ទំនុកចិត្តសាធារណៈបន្ថែមទៀត។ ធនាគារកណ្ដាលបង់ក្លាដែស បាន​ឱ្យដឹងថា ​គិតត្រឹមខែធ្នូ ឆ្នាំ ២០២៤ ស្ថាប័នចំនួន ២០ ជំពាក់បំណុល ២៥៨,០៨ ប៊ីលាន​ តាកា ​ប៉ុន្តែវត្ថុបញ្ចាំរបស់ពួកគេមានត្រឹមតែ ៦៨,៩៩ ប៊ីលាន​កាតា ប៉ុណ្ណោះ ដែលស្មើនឹង ២៦ ភាគរយ នៃបំណុលសរុប។  ​មន្ត្រីធនាគារកណ្តាលបានព្រមានថា ប្រសិនបើមិនមានវិធានការណ៍រហ័សដើម្បីការពារអ្នកដាក់ប្រាក់បញ្ញើទេ វិស័យនេះអាចដួលរលំទាំងស្រុង។

៣. ផ្សារហ៊ុនរបស់បង់ក្លាដែសស្ថិតនៅក្នុងស្ថានភាពអាក្រក់

ទីផ្សារភាគហ៊ុនរបស់បង់ក្លាដែស ស្ថិតនៅក្រោមភាពតានតឹងយូរយារមកហើយ​។ យោងតាម ​​The Dhaka Tribune ក្នុងរយៈពេល ១៦ ឆ្នាំកន្លងមកនេះ ទីផ្សារបានធ្លាក់ចុះប្រហែល ៣៨ ភាគរយ។ ​បើកែសម្រួលតាមអតិផរណា វិនិយោគិននៅបង់ក្លាដែស​បានបាត់បង់ដើមទុនក្នុងអត្រាជាមធ្យម ៣ ភាគរយ/ឆ្នាំ។

យោងតាមផ្សារហ៊ុន Dhaka Stock Exchange (DSE) ភាគហ៊ុនរបស់ក្រុមហ៊ុនដែលបានចុះបញ្ជីចំនួន ៩៨ ក្នុងចំណោម ៣៩៧ ក្រុមហ៊ុន ​ បាន​ធ្លាក់ចុះក្រោម ១០ តាកា/ហ៊ុន ដែលជាតម្លៃដើម​។ ច្រើនជាងពាក់កណ្តាលនៃភាគហ៊ុនទាំងនោះទៀតសោត មានតម្លៃក្រោម ៥ តាកា/ហ៊ុន ។

លោក Kazi Monirul Islam នាយកប្រតិបត្តិនៃក្រុមហ៊ុន Shanta Asset Management បានប្រាប់កាសែត Dhaka Tribune ថា៖ «ការពិតដែលថាតម្លៃនៃភាគហ៊ុនមួយចំនួនធំបែបនេះ បានធ្លាក់ចុះក្រោមតម្លៃដើម​ បង្ហាញថា ដំណើរការរបស់ក្រុមហ៊ុនទាំងនេះមិនល្អ។ ជាលទ្ធផល វិនិយោគិនកំពុងពឹង​ផ្ដោតលើក្រុមហ៊ុន​ដែល​មាន​ដំណើរការខ្លាំងមួយចំនួន»។

ចំណែកឯលោក Saiful Islam ប្រធានសមាគមឈ្មួញកណ្តាល DSE ​របស់បង់ក្លាដែសវិញ បានពន្យល់ថា៖ «ភាគហ៊ុនឥតប្រយោជន៍ជាច្រើន​ក្នុងទីផ្សារភាគហ៊ុន កំពុងបំបាក់ទឹកចិត្តវិនិយោគិនជាបរទេស និងស្ថាប័ន​។ ក្រុមហ៊ុនទន់ខ្សោយត្រូវតែបិទ ឬច្របាច់បញ្ចូលគ្នាឱ្យ​ឆាប់រហ័ស ហើយក្រុមហ៊ុនខ្លាំងថ្មីៗត្រូវតែមាន​លើទីផ្សារ»។ ​

ខណៈរដ្ឋបាលលោក Yunus កំពុងព្យាយាមនាំយកកំណែទម្រង់ អ្នកជំនាញនៅតែមានការព្រួយបារម្ភអំពី​អនាគតសេដ្ឋកិច្ចរបស់បង់ក្លាដែស៕

The post អ្នកជំនាញបារម្ភពី​សេដ្ឋកិច្ចបង់ក្លាដែស ដែលប្រឈមមុខនឹង​វិបត្តិហិរញ្ញវត្ថុ appeared first on Kampuchea Thmey Daily.

ការ​ឱ្យ​ដឹង​បែបនេះ តាម​រយៈ​លទ្ធផល​ជំនួប​រវាង​រដ្ឋមន្ត្រី​ក្រសួង​សេដ្ឋកិច្ច​ និង​ហិរញ្ញវត្ថុ រវាង​អនុ​ប្រធាន​ធនាគារ​អភិវឌ្ឍន៍​អាស៊ី (ADB) ទទួល​បន្ទុក​ផ្នែ​កដំណោះស្រាយទីផ្សារ ក្នុង​អំឡុង​ពេល​ដំណើរ​ទស្សនកិច្ច​របស់​គណៈប្រតិភូ​នៃ​ធនាគារអភិវឌ្ឍន៍អាស៊ី នៅកម្ពុជា កាល​ពី​ពេល​ថ្មី​ៗ​នេះ​។

ក្នុង​ឱកាស​នោះ​ដែរ លោក​ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានវាយ តម្លៃខ្ពស់​ចំពោះការចូលរួមដ៏សំខាន់របស់ ADB ក្នុងការចាប់ផ្តើមប្រតិបត្តិការមុនគេក្នុងចំណោមបណ្តាស្ថាប័ន ហិរញ្ញវត្ថុ​អន្តរជាតិ​នានា​ក្នុងតំបន់ និងសកលលោក សម្រាប់ការគាំទ្រដំណើការអភិវឌ្ឍន៍សេដ្ឋកិច្ចកម្ពុជា ។

លោក បាន​គូស​បញ្ជាក់​ថា «កិច្ចសហប្រតិបត្តិការដ៏ល្អរវាងកម្ពុជា និង ADB រយៈពេលជាង ៣០ឆ្នាំ មកនេះ បាន​វិវឌ្ឍ​ឈាន​ឡើង​ជាបន្ត​បន្ទាប់រហូតបង្កើតបានក្របខ័ណ្ឌ “យុទ្ធសាស្រ្តភាពជាដៃគូសម្រាប់អភិវឌ្ឍន៍កម្ពុជា” ដ៏មាន​សារសំខាន់​ដែល​ផ្តល់ការគាំទ្រយ៉ាងរឹងមាំ​ដល់​ការ​អភិវឌ្ឍ​វិស័យ​អាទិភាព​សំខាន់​ៗ​ជា​ច្រើន​របស់កម្ពុជា សំដៅ​ជំរុញ​កំណើន​ប្រកប​ដោយភាពធន់ ចីរភាព និងបរិយាប័ន្ន»។

ជាក់ស្តែង ក្នុងចំណោមវិស័យអាទិភាពដែល ADB បាននិងកំពុងផ្តល់ការ​គាំទ្រដល់ការ​ពង្រឹងវិស័យ​ហេដ្ឋារចនាសម្ព័ន្ធ, វិស័យ​សហគ្រាស​ធុនតូច និង​មធ្យម (SMEs), វិស័យ ហិរញ្ញវត្ថុ, ហិរញ្ញប្បទាន​ពាណិជ្ជកម្ម, កសិធុរកិច្ច និង​ការ​អភិវឌ្ឍភាព​ជាដៃគូរវាងរដ្ឋ និងឯកជន (PPP) ជាដើម ។

បន្ថែមលើនេះ, “ការគាំទ្រវិស័យឯកជន” ត្រូវបានតម្កល់ជាចលករដ៏សំខាន់ក្នុងការជំរុញកំណើន សេដ្ឋកិច្ចសង្គម ស្របតាម “យុទ្ធសាស្ត្របញ្ចកោណ ដំណាក់កាល ទី១” របស់រាជរដ្ឋាភិបាល ។

ជា​ការ​ឆ្លើយតប លោក បាហ្គាវ ជាសម្ហូបតា បានគូសរំលេចថា វិស័យអាទិភាពរបស់រាជរដ្ឋាភិបាលមានសង្គតិ-ភាពទៅនឹងគោលដៅយុទ្ធសាស្ត្រអភិវឌ្ឍន៍របស់ ADB គឺការអភិវឌ្ឍវិស័យឯកជន និងកិច្ចសហប្រតិបត្តិការ ក្នុងតំបន់។ តាមរយៈ​ភាពជាដៃគូដ៏ល្អនេះ, ADB នឹងបន្តផ្តល់ការគាំទ្រយ៉ាងពេញទំហឹងដល់កម្ពុជា រួមគ្នាដោះ​ស្រាយ​បញ្ហា​ប្រឈម នានា ដើម្បី​កម្ពុជា​អាច​សម្រេច​បាន​ជោគជ័យ​នូវការ​ចាកចេញ​ពី​ចំណាត់​ថ្នាក់​ក្រុម​ប្រទេស​អភិវឌ្ឍន៍​តិច​តួច​នៅ ពេលខាងមុខ ។ 

លោកបានបង្ហាញអំពីការប្តេជ្ញាចិត្តរបស់ ADB ក្នុងការបន្តកិច្ចសហប្រតិបត្តិការជាមួយកម្ពុជា លើការអភិវឌ្ឍវិស័យអាទិភាពសំខាន់ៗរបស់រាជរដ្ឋាភិបាល ដើម្បីធ្វើពិពិធកម្មសេដ្ឋកិច្ចកម្ពុជា សំដៅឈាន ឆ្ពោះទៅសម្រេចនូវចក្ខុវិស័យឆ្នាំ ២០៥០ របស់កម្ពុជាក្លាយជាប្រទេសមានចំណូលខ្ពស់ ។

ជាក់ស្តែង, ADB បានផ្តល់ការគាំទ្រវិស័យឯកជនកម្ពុជាដោយផ្ទាល់ទាំងជំនួយបច្ចេកទេស ការកសាងសមត្ថភាព និងការផ្តល់ ហិរញ្ញប្បទានសម្រាប់ SMEs កម្ពុជាដោយផ្ទាល់ ក្រោមកញ្ចប់កម្មវិធី ADB Frontier ដែលជាកម្មវិធី ផ្តល់ហិរញ្ញប្បទានជាដើមទុនដំបូងសម្រាប់គាំទ្រ SMEs ហើយកម្ពុជាជាប្រទេសដែល ADB ជ្រើសរើសក្នុងការ ផ្តល់ទុនសាកល្បងដំបូងគេក្នុងចំណោមប្រទេសក្នុងតំបន់។

ការជំរុញប្រសិទ្ធភាពពាណិជ្ជកម្ម និងការប្រកួត ប្រជែងនៅកម្ពុជា ដោយផ្តោតលើកំណែទម្រង់ ០៣ គឺ៖ (១) ការបង្កើនបរិយាកាសអំណោយផលសម្រាប់ វិនិយោគទុន និងអាជីវកម្ម, (២)ការលើកកម្ពស់ពាណិជ្ជកម្មមីក្រូ, ខ្នាតតូច, និងខ្នាតមធ្យម និ ង(៣) ការ កែលម្អគោលនយោបាយពាណិជ្ជកម្ម និងការបង្កើនប្រសិទ្ធភាពនៃកិច្ចសម្របសម្រួលពាណិជ្ជកម្ម ។

ការផ្តល់ ហិរញ្ញប្បទានសម្រាប់ការគាំទ្រដល់ការវិនិយោគរបស់វិស័យឯកជន តាមរយៈការផ្តល់ប្រាក់កម្ចីដែលមានការ ប្រាក់ទាប និងក្នុងលក្ខខណ្ឌអំណោយផលសម្រាប់សកម្មភាពការងារផ្សេងៗរបស់ SMEs សំដៅចូលរួម ចំណែកដល់ការគ្រប់គ្រងការប្រើប្រាស់ថាមពលប្រកបដោយប្រសិទ្ធភាពខ្ពស់ ។ ការជំរុញការអភិវឌ្ឍវិស័យ ហេដ្ឋារចនាសម្ព័ន្ធ និងការអភិវឌ្ឍភាពជាដៃគូរវាងរដ្ឋ និងឯកជន ផងដែរ៕

The post ADB ប្តេជ្ញាបន្តគាំទ្រយ៉ាងពេញទំហឹង ដើម្បីកម្ពុជាអាចសម្រេចបានជោគជ័យ ចាកចេញពីចំណាត់ថ្នាក់ក្រុមប្រទេស LDC appeared first on Kampuchea Thmey Daily.

អនុកម្មវិធីជំហានដំបូងនៃកម្មវិធីពង្រឹងអភិបាលកិច្ចដើម្បីការផ្តល់សេវាសាធារណៈកាន់តែប្រសើរឡើងនេះ ជាការគាំទ្របន្តរបស់ ADB ដើម្បីពង្រីក និងធ្វើឱ្យកាន់តែស៊ីជម្រៅនូវ​ការអនុវត្តកម្មវិធីកែទម្រង់​ការគ្រប់គ្រងហិរញ្ញវត្ថុសាធារណៈរបស់កម្ពុជា ដែលបច្ចុប្បន្នស្ថិតក្នុងដំណាក់កាលទី ៤ ដើម្បីបង្កើនគណនេយ្យភាព​​នៃការអនុវត្ត។

កម្មវិធីនេះបានជួយកំណែទម្រង់បង្កើនប្រសិទ្ធភាពនៃស្ថាប័នសាធារណៈ​ដែលទទួលខុសត្រូវលើការប្រមូលចំណូល និងការគ្រប់គ្រងចំណាយ បង្កើតលំហសារពើពន្ធដើម្បីបង្កើនបរិមាណ និងគុណភាពនៃសេវាសាធារណៈ។

ការកែលម្អអភិបាលកិច្ចវិនិយោគសាធារណៈក៏ជួយជំរុញការអភិវឌ្ឍវិស័យឯកជន តាមរយៈក្របខ័ណ្ឌភាពជាដៃគូរវាងរដ្ឋនិងឯកជន(PPP) ដែលរឹងមាំជាងមុន និងប្រព័ន្ធលទ្ធកម្មដែលមានតម្លាភាពជាងមុន។

លោកស្រី Jyotsana Varma នាយិកា ADB ប្រចាំប្រទេសកម្ពុជា មានប្រសាសន៍ថា «កម្មវិធីនេះគឺជាកត្តាជំរុញការផ្លាស់ប្តូរអភិវឌ្ឍន៍ រចនាឡើងដើម្បីបង្កើនសក្តានុពលសេដ្ឋកិច្ចរបស់កម្ពុជាតាមរយៈយន្តការសំខាន់បីគឺ ការលើកកម្ពស់ប្រសិទ្ធភាពនៃប្រព័ន្ធគ្រប់គ្រងចំណូលនិងចំណាយ ការពន្លឿនកំណើនតាមរយៈការវិនិយោគសាធារណៈដែលមានភាពធន់ និងការកែលម្អប្រព័ន្ធសម្រាប់ការគ្រប់គ្រងការអនុវត្តដែលនឹងកែលម្អជីវិតរស់នៅ​ តាមរយៈសេវាសាធារណៈកាន់តែប្រសើរ។

កំណែទម្រង់នេះត្រូវបានរំពឹងថា នឹងបង្កើតចំណូលបន្ថែមប្រមាណជាង ២ ពាន់លានដុល្លារអាមេរិក និង ប្រសិទ្ធភាពនៃការសន្សំសំចៃ ប្រមាណ៣ ពាន់លានដុល្លារ នៅឆ្នាំ ២០២៨។ សហគមន៍ទូទាំងប្រទេសកម្ពុជា នឹងទទួលបានអត្ថប្រយោជន៍ពីការងារនេះដែរសម្រាប់ឆ្នាំខាងមុខៗ។»

វិធីសាស្រ្តនៃអនុកម្មវិធីជំហានទី១នេះជួយរាជរដ្ឋាភិបាលអនុវត្តកំណែទម្រង់គោលនយោបាយក្នុងផ្នែកនៃការគ្រប់គ្រង ហិរញ្ញវត្ថុសាធារណៈជាលំដាប់លំដោយ​ និងដែលមានការសម្របសម្រួលច្បាស់លាស់​ ស្របតាមរបៀបវារៈកំណែទម្រង់ជាតិ។

តាមរយៈវិធីសាស្រ្តនេះ រាជរដ្ឋាភិបាលអាចរៀបចំកំណែទម្រង់យ៉ាងពេញលេញ ដោយធ្វើឱ្យប្រាកដថា ការងារនេះមាននិរន្តរភាព និងសមាហរណកម្មគ្រប់ជ្រុងជ្រោយទៅក្នុងប្រព័ន្ធរបស់ខ្លួន៕

The post ADB អនុម័តប្រាក់កម្ចី ៥០ លានដុល្លារ គាំទ្រការផ្តល់សេវាសា​ធារណៈ នៅកម្ពុជា appeared first on Kampuchea Thmey Daily.

​ក្នុងរបាយការណ៍ទស្សនវិស័យអភិវឌ្ឍន៍អាស៊ី (ADO) ប្រចាំខែកក្កដា ឆ្នាំ ២០២៥ ដែល​ចេញផ្សាយនៅថ្ងៃពុធ ២៣ កក្កដា នេះ ADB បាន​ព្យាករថា សេដ្ឋកិច្ចវៀតណាម​នឹង​កើនឡើង ៦,៣ ភាគរយ នៅឆ្នាំ ២០២៥ និង ៦ ភាគរយ នៅឆ្នាំក្រោយ​។

ធនាគារដដែល​បាន​គូសបញ្ជាក់ថា កំណើនការនាំចេញ និងនាំចូលដ៏រឹងមាំ រួមជាមួយនឹងការកើនឡើងនៃការបញ្ចេញទុនវិនិយោគពីបរទេស បានជំរុញដំណើរការសេដ្ឋកិច្ចនៅក្នុងឆមាសទី ១ នៃឆ្នាំ ២០២៥។

​ការប្ដេជ្ញា​វិនិយោគផ្ទាល់ពីបរទេស បានកើនឡើង ៣២,៦ ភាគរយ ​ខណៈ​ការបញ្ចេញដើមទុន​បានកើនឡើង ៨,១ ភាគរយ នៅឆមាសទី ១ ​ដែលវា​បង្ហាញពីភាព​រឹងមាំនៃទំនុកចិត្តអន្តរជាតិ​ចំពោះទស្សនវិស័យសេដ្ឋកិច្ចរបស់វៀតណាម។ ការវិនិយោគសាធារណៈវិញ បានឈានដល់កម្រិតខ្ពស់បំផុតចាប់តាំងពីឆ្នាំ ២០១៨ ខណៈក្រុមហ៊ុន​​នាំ​ចេញវិញ ​​បាន​បង្កើន​ការ​ដឹក​ជញ្ជូន​ទំនិញ​​របស់​ខ្លួន​ ​ឱ្យ​បាន​មុនពេល​ពន្ធខ្ពស់ចូលជាធរមាន ដែលធ្វើឱ្យ​ការធ្វើពាណិជ្ជកម្ម​កើនឡើង។ ​

យ៉ាង​ណាមិញ ​ADB បានព្រមានថា អស្ថិរភាពពាណិជ្ជកម្មសកល និងពន្ធខ្ពស់របស់សហរដ្ឋអាមេរិក អាចប៉ះពាល់ដល់ការនាំចេញ និងលំហូរវិនិយោគក្នុងប្រទេសវៀតណាម​។ ​ប៉ុន្តែធនាគារ​បាន​លើកឡើងថា ​ប្រសិនបើវៀតណាម​អនុវត្តកំណែទម្រង់ក្នុងស្រុក​ប្រកបដោយប្រសិទ្ធភាព និងឆាប់រហ័សនោះ វា​អាចជួយ​ប៉ះប៉ូវហានិភ័យទាំងនោះបាន​ ដោយការពង្រឹងសេដ្ឋកិច្ចក្នុងស្រុក៕

The post ADB៖ សេដ្ឋកិច្ចវៀតណាម​នឹងបន្តកំណើនរឹងមាំ ទោះមានហានិភ័យសកល appeared first on Kampuchea Thmey Daily.