ធន់ រិទ្ធី Archives - Kampuchea Thmey Daily

កូនប្រុស ធន់ រិទ្ធី ជាប់ឈ្មោះទៅប្រកួតកីឡាយុវជនអាស៊ី នៅប្រទេសបារ៉ែន

Sina Noun — Mon, 06 Oct 2025 02:23:30 +0000

កីឡាករវ័យក្មេង ធន់ សុវណ្ណស្កាយ ដែលជាកូនប្រុសរបស់អ្នកលេងគុនខ្មែរ ធន់ រិទ្ធី ក៏បានជាប់ឈ្មោះចេញទៅប្រកួតព្រឹត្តិការណ៍កីឡាយុវជនអាស៊ី លើកទី៣ នៅប្រទេសបារ៉ែន ផងដែរ ខណៈនេះជាការចេញទៅប្រទេសលើកដំបូងផងដែរ។

ធន់ សុវណ្ណស្កាយ

កីឡាករ ធន់ រិទ្ធី បានបង្ហោះវីដេអូកំពុងបង្វឹកកូនប្រុសយ៉ាងសកម្មដើម្បីពង្រឹងសមត្ថភាពឲ្យបានល្អគ្រប់គ្រាន់ត្រៀមចេញទៅប្រកួតនៅព្រឹត្តិការណ៍កីឡាយុវជនអាស៊ី ឯប្រទេសបារ៉ែនឆាប់ៗខាងមុខនេះ។ ជាមួយគ្នានោះដែរ រិទ្ធី បានជួនពរកូនឲ្យឈ្នះក្នុងការប្រកួត និងសំណូមពរដល់មហាជនឲ្យជួយគាំទ្រការប្រកួតរបស់កូនប្រុសផងដែរ។

រិទ្ធី កំពុងបង្ហាត់កូន

បញ្ជាក់ដែរថា ព្រឹត្តិការណ៍កីឡាយុវជនអាស៊ីជាកម្មវិធីប្រកួតដ៏ធំមានប្រទេសជាច្រើនក្នុងទ្វីបអាស៊ីចូលរួមប្រកួតប្រជែង។ ការប្រកួតនេះនឹងធ្វើឡើងនៅប្រទេសបារ៉ែន ចាប់ពីថ្ងៃទី២២ ដល់ ៣១ ខែតុលា ឆ្នាំ២០២៥។ ដោយឡែកសម្រាប់សហព័ន្ធប្រដាល់គុនខ្មែរបញ្ជូនគ្រូបង្វឹក កីឡាករ កីឡាការិនី សរុប ១១នាក់ដើម្បីប្រជែងមេដាយជូនកម្ពុជា៕

អត្ថបទដោយ៖ នូន ស៊ីណា

The post កូនប្រុស ធន់ រិទ្ធី ជាប់ឈ្មោះទៅប្រកួតកីឡាយុវជនអាស៊ី នៅប្រទេសបារ៉ែន appeared first on Kampuchea Thmey Daily.

ធន់ រិទ្ធី មិនហ៊ានប្ដូរដៃជាមួយកីឡាកររុស្សីម្នាក់នេះទេ ប្រើស្នៀតនេះវិញទប់ទល់បាន

Sina Noun — Mon, 28 Apr 2025 04:24:09 +0000

អ្នកប្រដាល់មកពីក្លឹបធន់សុភាគុនខ្មែរ ធន់ រិទ្ធី ថាខ្លួនមិនហ៊ានប្ដូរកណ្ដាប់ដៃជាមួយកីឡាកររុស្សី សូឡូម៉ុន ឌេមីន នោះទេកាលយប់ថ្ងៃទី២៦ ខែមេសា ឆ្នាំ២០២៥ ដោយប្រើស្នៀតវែងវាយទប់ទល់វិញបានផលដូចការរំពឹងទុក។

កីឡាករ ធន់ រិទ្ធី

ធន់ រិទ្ធី បានឲ្យដឹងក្រោយការប្រកួតថា ខ្លួនក៏មិននឹកស្មានថាឈ្នះលឿនបែបនេះដែរ ដោយសារកីឡាករ សូឡូម៉ុន ឌេមីន រូបនេះយកដៃរងការទាត់ធ្ងន់ៗ។ ការទាត់នេះធ្ងន់ និងពេញៗស្នងជើងរបស់ខ្លួនតែម្ដង។

កីឡាកររុស្សី សូឡូម៉ុន ឌេមីន

មុនការប្រកួតមកដល់ រិទ្ធី បានមើលវីដេអូចាស់ៗរបស់កីឡាកររុស្សីខាងលើមិនក្រោម ២០ដងនោះឡើយ ពោលអ្នកប្រដាល់រូបនេះល្អមែនកាលនៅឯប្រទេសរបស់គេពិសេសកណ្ដាប់ដៃ និងជាប្រភេទកីឡាករ MMA មួយរូបផងដែរ។ ដូច្នេះហើយខ្លួនមិនអាចចូលប្ដូរកណ្ដាប់ដៃជាមួយនោះឡើយ ព្រោះជាប្រភេទហ្គង់តូចទៀតផងបើត្រូវមិនស្រួលអាចចប់របស់ដៃគូវិញ។

កីឡាករ ធន់ រិទ្ធី

កូនសិស្សលោក ធន់ សុភា រូបនេះគឺហាត់ត្រៀមស្នៀតវាយប្រយោល និងមួយទៀតខ្លួនមានផ្លែវែងជាងផង ហេតុនេះវាយបែបឆ្ងាយឲ្យបានច្រើនពិសេសទាត់តែម្ដងគឺទទួលបានផលដូចការរំពឹងទុកមុនប្រកួតអីចឹងដែរ។ រិទ្ធី មិនដឹងថាកីឡាកររុស្សីរូបគេចាញ់អាកាសធាតុ ឬមានបញ្ហាសុខភាពអ្វីនោះទេបានបរាជ័យលឿនបែបនេះ។

បញ្ជាក់ដែរថា កាលពីយប់ថ្ងៃសៅរ៍ ទី២៦ ខែមេសា ឆ្នាំ២០២៥ នេះកីឡាករ ធន់ រិទ្ធី បានផ្ដួលកីឡាកររុស្សី សូឡូម៉ុន ឌេមីន ឲ្យបោះបង់ការប្រកួតនៅទឹកទី១ ក្នុងកម្មវិធីប្រដាល់ស៊ីម៉ង់អូដ្ឋរបស់សង្វៀនបាយ័ន។ រិទ្ធី ជាសិស្សគុនមកពីក្លឹបប្រដាល់ធន់សុភាគុនខ្មែរ៕

កីឡាករ ធន់ រិទ្ធី

The post ធន់ រិទ្ធី មិនហ៊ានប្ដូរដៃជាមួយកីឡាកររុស្សីម្នាក់នេះទេ ប្រើស្នៀតនេះវិញទប់ទល់បាន appeared first on Kampuchea Thmey Daily.

ធន់ រិទ្ធី ទទួល១ប្រកួតទៀតប៉ុណ្ណោះកម្ដៅសាច់ដុំត្រៀមចេញទៅអាមេរិក

Sina Noun — Tue, 25 Mar 2025 01:58:33 +0000

អ្នកលេងគុនខ្មែរ ធន់ រិទ្ធី បានសម្រេចទទួលយក១ប្រកួតទៀតប៉ុណ្ណោះ មុនពេលចេញទៅប្រកួតនៅសហរដ្ឋអាមេរិកពាក់កណ្ដាលខែមេសាខាងមុខ។

កីឡាករ ធន់ រិទ្ធី

ធន់ រិទ្ធី បានឲ្យដឹងថា រូបគេទទួលការប្រកួត១ប្រកួតទៀតប៉ុណ្ណោះជាការកម្ដៅសាច់ដុំផងដើម្បីត្រៀមការប្រកួតដ៏សំខាន់នៅសហរដ្ឋអាមេរិក។ ចាប់ពីពេលនេះទៅ រូបគេថែរក្សាខ្លួន និងសុខភាពជានិច្ចពោលគឺមិនធ្វេសប្រហែសឡើយ ដើម្បីឲ្យស្មារតី ក៏ដូចជាសមត្ថភាពល្អប្រសើរគ្រប់គ្រាន់។

កីឡាករគុនខ្មែរដែលត្រូវចេញទៅអាមេរិក

សិស្សគុនក្លឹបប្រដាល់ ធន់ សុភា គុនខ្មែរ បានបន្ថែមទៀតថា ការចេញទៅសហរដ្ឋអាមេរិកនេះគឺមានសារសំខាន់ខ្លាំងក្នុងការផ្សព្វផ្សាយពីក្បាច់គុនខ្មែរដល់អ្នករស់នៅទីនោះ និងបានឲ្យប្រជាពលរដ្ឋខ្មែររស់នៅអាមេរិកទស្សនាផ្ទាល់ផង។ ដូច្នេះមិនថាប៉ះដៃគូសមត្ថភាពយ៉ាងណានោះទេ ពោលខ្លួននឹងខំប្រឹងវាយឲ្យអស់ពីសមត្ថភាពបំពេញចិត្តអ្នកគាំទ្រទាំងនៅអាមេរិក និងនៅកម្ពុជា។

បញ្ជាក់ដែរថា កីឡាករ ធន់ រិទ្ធី, រឿង សោភ័ណ្ឌ, ពេជ្រ សម្បត្តិ និងកីឡាការិនី អេ យ៉ានុត នឹងត្រូវចេញទៅសហរដ្ឋអាមេរិក នៅថ្ងៃទី៥ ខែមេសា ២០២៥ និងត្រូវឡើងប្រកួតនៅថ្ងៃទី១២ ខែមេសា។ កីឡាករខ្មែរត្រូវប៉ះបរទេសរូបណាខ្លះនោះនៅមិនទាន់មានការផ្សព្វផ្សាយនោះឡើយ៕

អត្ថបទដោយ៖ នួន ស៊ីណា

The post ធន់ រិទ្ធី ទទួល១ប្រកួតទៀតប៉ុណ្ណោះកម្ដៅសាច់ដុំត្រៀមចេញទៅអាមេរិក appeared first on Kampuchea Thmey Daily.

កីឡាករ លន បញ្ញា, ធន់ រិទ្ធី និង ធន់ ផានិត រួមគ្នាជួយគ្រូដើម្បីធ្វើក្លិបថ្មី

chean virakbot — Thu, 02 Jan 2025 07:15:36 +0000

កីឡាករគុនខ្មែរ លន បញ្ញា, ធន់ រិទ្ធី និង ធន់ ផានិត បានប្រកាសជួយថវិកាមួយចំនួនដល់លោកគ្រូ ធន់ សុភា សម្រាប់ការកសាងក្លិបថ្មីដើម្បីជំរុញឲ្យការបណ្តុះបណ្តាលធន់ធានកីឡាករ កីឡាការិនីគុនខ្មែរកាន់តែល្អប្រសើរ។

នៅព្រឹកថ្ងៃទី២ ខែមករា ឆ្នាំ២០២៥ កីឡាករ ធន់ រិទ្ធី បានប្រកាសផ្តល់ថវិកាចំនួន៥លានរៀលដល់គ្រូ ធន់ សុភា ដើម្បីរួមចំណែកក្នុងការកសាងក្លិបថ្មី។ កីឡាកររូបនេះកាលពីមុនជាអ្នកប្រដាល់គុនចម្រុះ និងគុនខ្មែរ ប៉ុន្តែមិនសូវកាក់កបប៉ុន្មានឡើយ ប៉ុន្តែចាប់តាំងពីផ្លាស់ចូលក្លិបរបស់លោកគ្រូ ធន់ សុភា មកបានធ្វើឲ្យអាជីពកាន់តែជោគជ័យ។

ចំណែក ធន់ ផានិត និង លន បញ្ញា មុនពេលដាច់ឆ្នាំ២០២៤ បានប្រកាសផ្តល់តម្លៃខ្លួនទាំងអស់ដល់លោកគ្រូ ធន់ សុភា ដើម្បីរួមចំណែកក្នុងការកសាងក្លិបថ្មី។ គេនៅមិនទាន់ច្បាស់ពីចំនួនជាក់លាក់ពីតម្លៃខ្លួនរបស់កីឡាករទាំងពីរឡើយ ប៉ុន្តែ លន បញ្ញា អាចត្រូវបានចាត់ជាកីឡាករកម្ពស់ខ្ពស់លំដាប់ A ក្នុងប្រភេទទម្ងន់៦៥គីឡូក្រាម។

សម្រាប់កីឡាករជួរមុខកម្រិត A មានតម្លៃខ្លួនមិនក្រោម១០០០ដុល្លារឡើយ ហើយ ធន់ ផានិត ក៏ជាកីឡាករល្អម្នាក់ដែរ ដូច្នេះតម្លៃខ្លួនខ្ពស់ដែរ។ បើគិតលើតម្លៃខ្លួន ហោចណាស់ក៏ពួកគេផ្តល់ហោចណាស់៤លានរៀលម្នាក់ៗសម្រាប់ការជួយដល់ការកសាងក្លិបថ្មី។

លន បញ្ញា ដែលហ្វឹកហាត់ជាមួយលោកគ្រូ ធន់ សុភា ជាច្រើនឆ្នាំមក មិនបានប្តូរត្រកូលទៅតាមឈ្មោះគ្រូឡើយ។ អ្វីដែលគួរឲ្យសរសើរគឺរូបគេរក្សាទម្ងន់ និងសមត្ថភាពបានយ៉ាងល្អក្នុងរយៈពេលប៉ុន្មានឆ្នាំចុងក្រោយ។ កីឡាកររូបនេះអាចចាត់ទុកជាកូនសិស្សដែលទទួលបានជោគជ័យជាងគេក្នុងចំណោមសិស្សទាំងអស់របស់លោកគ្រូ ធន់ សុភា។ រូបគេបានឈ្នះមេដាយមាស មេដាយប្រាក់កីឡាស៊ីហ្គេមជូនជាតិ, ឈ្នះរង្វាន់រថយន្ត និងឈ្នះខ្សែក្រវាត់ជាច្រើនគ្រឿង។

ក្លិបប្រដាល់មជ្ឈមណ្ឌលកីឡាកងយោធពលខេមរភូមិន្ទ ដែលបង្វឹកដោយលោកគ្រូ ធន់ សុភា នៃសមាគមកីឡាកងយោធពលខេមរភូមិន្ទុ ស្ថិតនៅក្នុងអគារស្តាតចាស់អស់រយៈពេលជាច្រើនឆ្នាំ ប៉ុន្តែនៅពេលខាងមុខនេះនឹងលេចចេញជារូបរាងក្លិបថ្មីមួយទៀតដែលអាចជាទីតាំងអគារមួយពិតប្រាកដសម្រាប់ការបណ្តុះបណ្តាលកីឡាករ កីឡាការិនី។

តាមប្លង់ដែលចេញតាមបណ្តាញទំនាក់ទំនងសង្គមគឺឈ្មោះ«ក្លិបប្រដាល់ ធន់ សុភា គុនខ្មែរ» ដែលដូចមិត្តរួមជំនាន់មួយចំនួនមានក្លិបផ្ទាល់ខ្លួនដូចជា លោកគ្រូ សេន ប៊ុនថេន និង ពេជ្រ សុផាន់ ជាដើម៕

អត្ថបទ៖ វីរបុត្រ

The post កីឡាករ លន បញ្ញា, ធន់ រិទ្ធី និង ធន់ ផានិត រួមគ្នាជួយគ្រូដើម្បីធ្វើក្លិបថ្មី appeared first on Kampuchea Thmey Daily.

Sammy វិភាគថា ធន់ រិទ្ធី មាន៧០%ក្នុងការយកឈ្នះ Saiyok

chean virakbot — Thu, 01 Feb 2024 01:50:23 +0000

កីឡាករថៃ Sammy Banchamek បានយល់ឃើញជើងខ្លាំងគុនខ្មែរ ធន់ រិទ្ធី សង្ឃឹម៧០%ក្នុងការយកឈ្នះលើខ្លាចាស់កំណាចឆ្លងដែនថៃ Saiyok Pumpanmuang នៅថ្ងៃអាទិត្យ ទី៤ ខែធ្នូ ឆ្នាំ២០២៤ នៅសង្វៀនទូរទស្សន៍ជាតិកម្ពុជា។

Sammy ដែលធ្លាប់ឈ្នះ ធន់ រិទ្ធី ម្តង និងចាញ់ម្តងបានចេញវិភាគថា រូបគេពិតជាចាប់អារម្មណ៍ចំពោះជំនួបជើងខ្លាំងគុនខ្មែរ និងជើងខ្លាំងថៃនាចុងសប្តាហ៍នេះណាស់។ ផ្អែកលើកត្តាសំខាន់៣ដែល ធន់ រិទ្ធី មានភាគរយដល់៧០%ដែលអាចយកឈ្នះលើកីឡាករ Saiyok។ ទី១ ការប្រកួតនៅទឹកដីកម្ពុជា ដូច្នេះកីឡាករម្ចាស់ផ្ទះមានប្រៀបទៅហើយ។

កីឡាករថៃរូបនេះបន្តទៀតថា ទី២ ធន់ រិទ្ធី មានកណ្តាប់ដៃធ្ងន់ និងច្បាស់ ប្រសិនបើ Saiyok ភ្លាត់ចូលកណ្តាប់ដៃរបស់កីឡាករកម្ពុជាប្រាកដជាពិបាកទប់ទល់ណាស់។ ជាក់ស្តែងរូបគេបានស្គាល់កណ្តាប់ដៃរបស់ ធន់ រិទ្ធី ច្បាស់ណាស់នៅពេលជួបគ្នាចុងក្រោយសន្លប់ធំ។ ទី៣ កីឡាករកម្ពុជានៅវ័យក្មេងជាង ដូច្នេះកម្លាំងស៊ុហ្វល្អដែលអាចជាផលល្អសម្រាប់ការតស៊ូគ្នា៣ទឹក។

ទោះបីជាយ៉ាងណា Sammy បាននិយាយពីកីឡាករថៃថា Saiyok មានសង្ឃឹមឈ្នះ៤០% ប៉ុន្តែកីឡាករថៃរូបនេះមានអាវុធល្អច្រើនជាង។ រូបគេមានកណ្តាប់ដៃល្អ និងទាត់ជើងឆ្វេងដ៏គ្រោះថ្នាក់ ហើយភាពធន់រឹងមាំរបស់គេល្អជាង ដូច្នេះ ធន់ រិទ្ធី ត្រូវប្រយ័ត្នខ្លាំងមែនចំពោះជើងរបស់ Saiyok។

នេះជាការជួបគ្នាលើកទី២ រវាង ធន់ រិទ្ធី និង Saiyok បន្ទាប់ពីលើកទី១ កីឡាករកម្ពុជាបានចាញ់ក្នុងទឹកទី២។ ការជួបគ្នាលើកទី១នោះ ជើងខ្លាំងកម្ពុជាបានវាយកណ្តាប់ដៃឲ្យខ្លាចាស់ថៃត្រូវបានអាជ្ញាកណ្តាលរាប់៨ម្តងក្នុងទឹកទី១ ប៉ុន្តែចូលទឹកទី២ រូបគេបានប្តូរពីការប្រើកណ្តាប់ដៃមកទាត់រហូតធ្វើឲ្យ ថៃ រិទ្ធី បោះបង់ចោលការប្រកួតក្នុងទឹកទី២។

គិតរហូតដល់ពេលនេះ Saiyok ធ្លាប់ប្រកួតជាមួយកីឡាករកម្ពុជា៣រូបហើយគឺលើកទី១បានឈ្នះ ផាន់ គ្រាន់ ក្នុងទឹកទី១កាលពីឆ្នាំ២០១៦។ លើកទី២ រូបគេបានឈ្នះ ធន់ រិទ្ធី ក្នុងទឹកទី២កាលពីឆ្នាំ២០២២ និងលើកទី៣បានចាញ់កីឡាករ ធឿន ធារ៉ា ក្នុងទឹកទី១កាលពីឆ្នាំ២០២២។

នៅថ្ងៃអាទិត្យ ទី៤ ខែកុម្ភៈនេះ ធន់ រិទ្ធី បានត្រៀមខ្លួនរួចរាល់ហើយដើម្បីសងសឹកខ្លាចាស់ Saiyok៕

អត្ថបទ៖ វីរបុត្រ

The post Sammy វិភាគថា ធន់ រិទ្ធី មាន៧០%ក្នុងការយកឈ្នះ Saiyok appeared first on Kampuchea Thmey Daily.

ក្រោយទៅសង្គ្រោះនៅមន្ទីរពេទ្យ Sammy និយាយពីការចាញ់ ធន់ រិទ្ធី

chean virakbot — Mon, 04 Sep 2023 02:34:34 +0000

កីឡាករប្រដាល់ថៃ សាមី បេនចាមែក បានចាញ់សន្លប់ក្រោមកណ្តាប់ដៃរបស់កីឡាករកម្ពុជា ធន់ រិទ្ធី ក្នុងទឹកទី២សម្រាប់ការប្រកួតដណ្តើមខ្សែក្រវាត់ Krud គុនខ្មែរអន្តរជាតិ នៅយប់ថ្ងៃអាទិត្យ ទី៣ ខែកញ្ញា ឆ្នាំ២០២៣ នៅសង្វៀនទូរទស្សន៍ជាតិកម្ពុជារហូតត្រូវបានបញ្ជូនទៅសង្គ្រោះនៅមន្ទីរពេទ្យ។

ការប្រកួតនៅទឹកទី១ ធន់ រិទ្ធី ធ្វើបានយ៉ាងល្អដោយបានវាយត្រូវមុខ សាមី ជាច្រើនដៃដែលស្ទើរតែដួលម្តងៗទៅហើយ ប៉ុន្តែកីឡាករថៃម្នាក់នៅតស៊ូ និងទប់ទល់រហូតចប់ទឹកទី១។ ចូលទឹកទី២ អ្នកលេងគុនខ្មែរនៅតែធ្វើបានល្អដោយចេញកណ្តាប់ធ្ងន់ៗ និងចំគោលដៅដែលបណ្តាលឲ្យកីឡាករថៃដួលត្រូវបានអាជ្ញាកណ្តាលរាប់៨លើកទី១។ បន្ទាប់មក ធន់ រិទ្ធី វាយឲ្យអាជ្ញាកណ្តាលរាប់លើកទី២ និងលើកទី៣ត្រូវបានអាជ្ញាកណ្តាលបញ្ឈប់ការប្រកួតតែម្តង។

កាលពីយប់មិញនេះ សាមី បានចេញវីដេអូនិយាយថា ការប្រកួតនេះ កីឡាករកម្ពុជា ធន់ រិទ្ធី ពិតជាធ្វើបានល្អ។ រូបគេបានប្រឹងប្រែងអស់ពីសមត្ថភាពហើយ។ រូបគេពិតជាទទួលស្គាល់ចំពោះបរាជ័យដ៏ធ្ងន់ធ្ងរនេះ។

សាមី បានពន្យល់ថា តាមពិតទៅរូបគេពិតជាប្រឹងប្រែង និងតស៊ូងើបឡើងដើម្បីតតាំងឡើងវិញដែរសម្រាប់ការប្រកួតនេះ ប៉ុន្តែនៅតែមិនអាចស៊ូទ្រាំនឹងទម្ងន់ដៃធ្ងន់របស់ ធន់ រិទ្ធី ដែលធ្វើឲ្យផ្ទៃមុខរបស់ខ្លួនហើមយ៉ាងដំណំ។

ទន្ទឹមជាមួយគ្នា សាមី បានអរគុណដល់អ្នកគាំទ្រទាំងកម្ពុជា និងថៃដែលបានយកចិត្តទុកដាក់ និងខ្វល់ខ្វាយពីខ្លួន។

កាលពីយប់មិញនេះ សាមី ត្រូវបានបញ្ជូនទៅកាន់មន្ទីរពេទ្យភ្លាមៗដោយសារត្រូវកណ្តាប់ដៃយ៉ាងធ្ងន់ធ្ងររហូតចេញក្អួត។

នេះជាការសងសឹកបានសម្រេចរបស់ ធន់ រិទ្ធិ បន្ទាប់ពីធ្លាប់ចាញ់ សាមី ម្តងហើយ ហើយក៏ជាជ័យជម្នះដែលធ្វើឲ្យកីឡាករកម្ពុជាក្លាយជាម្ចាស់ខ្សែក្រវាត់អន្តរជាតិលើកដំបូងរបស់ខ្លួន៕

អត្ថបទ៖ វីរបុត្រ

The post ក្រោយទៅសង្គ្រោះនៅមន្ទីរពេទ្យ Sammy និយាយពីការចាញ់ ធន់ រិទ្ធី appeared first on Kampuchea Thmey Daily.

ប្រេស៊ីលកម្ពស់ជិត២ម៉ែត្រ សន្លប់ក្រោមកណ្តាប់ដៃ ធន់ រិទ្ធី យប់មិញ (វីដេអូ)

chean virakbot — Sat, 16 Jul 2022 01:57:59 +0000

អ្នកលេងកណ្តាប់ដៃយក្ស ធន់ រិទ្ធី បានផ្តួលអ្នកប្រដាល់ប្រេស៊ីល ហ្គាព្រីល ពេរ៉េយ៉ា (Gabriel Pereira) ឲ្យសន្លប់ក្នុងទឹកទី៣ កាលពីវេលាម៉ោង៨យប់មិញនៅសង្វៀនបាយ័នក្នុងកម្មវិធីប្រដាល់«ការប្រកួតជើងឯក គូបូតា បច្ចេកវិទ្យាកសិកម្មថ្មី»។

វាមិនមែនជាការប្រកួតងាយស្រួលសម្រាប់អ្នកលេងគុនខ្មែរពូកែកណ្តាប់ដៃផ្តួលដៃគូច្រើននាក់ហើយនោះទេ ពីព្រោះកីឡាករប្រេស៊ីលម្នាក់នេះមានកម្ពស់ដល់ទៅ១.៨៩ម៉ែត្រ និងមានអាវុធល្អដែរ។

សម្រាប់ការប្រកួតដែលដំណើរការតែ៣ទឹកឃើញថា ហ្គាព្រីល ពេរ៉េយ៉ា ជាអ្នកដើរចូលវ៉ៃតាមរយៈការទាត់ដោយសាររូបគេមានប្រៀបខាងកម្ពស់។ ក្រៅពីទាត់ដ៏គ្រោះថ្នាក់ រូបគេក៏មានកណ្តាប់ដៃធ្ងន់គួរឲ្យចាប់អារម្មណ៍ដែរដែលបានធ្វើឲ្យ ធន់ រិទ្ធី ព្យាយាមគេចខ្លួន និងវ៉ៃកណ្តាប់ដៃសងវិញមួយៗ។

នៅចុងទឹកទី២ ធន់ រិទ្ធី វ៉ៃកណ្តាប់ដៃឲ្យប្រេស៊ីលម្នាក់នេះស្រុតចុះម្តង ប៉ុន្តែអាជ្ញាកណ្តាលមិនបានរាប់ដោយសាររូបគេនៅមានស្មារតីនៅរឹងមាំ។ នៅទឹកទី៣ ហ្គាព្រីល បានព្យាយាមចូលវ៉ៃកណ្តាប់ដៃ ហើយចំគោលដៅធ្វើឲ្យ ធន់ រិទ្ធី ឡេះឡះម្តងម្កាលដែរ ប៉ុន្តែទន្ទឹមជាមួយនឹងការរត់គេច ហើយវាយសងចំគោលដៅធ្វើឲ្យ ហ្គាព្រីលដួល ត្រូវបានអាជ្ញាកណ្តាលរាប់៨លើកទី១។

ក្រោយពេលត្រូវបានអាជ្ញាកណ្តាលរាប់៨លើកទី១ ហ្គាព្រីល ក៏ចាប់ផ្តើមប្តូរកណ្តាប់ដៃ ហើយក្រោយមក ធន់ រិទ្ធី វាយកណ្តាប់ដៃឆ្វេងពេញដួលដាច់ផ្ងា ហើយអាជ្ញាកណ្តាលរាប់ និងបញ្ឈប់ការប្រកួតក្នុងទឹកទី៣តែម្តង។

៣ប្រួតចុងក្រោយរបស់ ធន់ រិទ្ធី ផ្តួលដៃគូឲ្យសន្លប់មិនឆ្លងផុតទឹកទី៣ឡើយ។ លើកទី១រូបគេ ផ្តួលជើងខ្លាំងថៃ សនខាវ សន្លប់ក្នុងទឹកទី១ ហើយជួបគ្នាលើកទី២ផ្តួលឲ្យសន្លប់ក្នុងទឹកទី៣ និងប្រកួតចុងក្រោយនេះផ្តូលកីឡាករប្រេស៊ីលសន្លប់ក្នុងទឹកទី៣។ ការផ្តួលដៃគូសុទ្ធតែកើតឡើងដោយកណ្តាប់ដៃ៕

អត្ថបទ៖ វីរបុត្រ

The post ប្រេស៊ីលកម្ពស់ជិត២ម៉ែត្រ សន្លប់ក្រោមកណ្តាប់ដៃ ធន់ រិទ្ធី យប់មិញ (វីដេអូ) appeared first on Kampuchea Thmey Daily.

កុំភ្លេច! កណ្តាប់ដៃយក្ស ធន់ រិទ្ធី ប៉ះ ជើងខ្លាំងប្រេស៊ីលកម្ពស់ជិត១.៩០ម៉ែត្រល្ងាចនេះ

chean virakbot — Fri, 15 Jul 2022 02:39:36 +0000

អ្នកលេងកណ្តាប់យក្ស ធន់ រិទ្ធី ត្រូវធ្វើការធ្ងន់មែនទែនវេលាម៉ោង៧យប់នៅសង្វៀនបាយ័នក្នុងកម្មវិធីប្រដាល់«ការប្រកួតជើងឯក គូបូតា បច្ចេកវិទ្យាកសិកម្មថ្មី» នៅពេលជួបជើងខ្លាំងប្រេស៊ីល ហ្គាព្រីល ពេរ៉េយ៉ា (Gabriel Pereira)។

អ្នកលេងគុនខ្មែរ ធន់ រិទ្ធី ត្រូវបានទទួលស្គាល់ជាជើងខ្លាំងមួយរូបក្នុងចំណោមជើងខ្លាំងទម្ងន់ធ្ងន់ៗនៅក្នុងប្រទេសកម្ពុជា។ រូបគេធ្វើបានល្អជាបន្តបន្ទាប់ក្នុងការប្រកួតជាមួយជើងខ្លាំងគុនខ្មែរដូចជា ធឿន ធារ៉ា, ឡៅ ចន្ទ្រា និង វង្ស វិឆ័យជាដើម ហើយក៏ទទួលបានជ័យជម្នះជាច្រើនអ្នកលេងឆ្លងដែន។

ធន់ រិទ្ធី VS ហ្គាព្រីល

ជាពិសេសពីរប្រកួតចុងក្រោយ ធន់ រិទ្ធី បានផ្តួលជើងខ្លាំងថៃ សនខាវ នៅទឹកទី១ សម្រាប់ការប្រកួតលើកទី១ និងលើកទី២ផ្តួលឲ្យសន្លប់ក្នុងទឹកទី៣។ សម្រាប់ការប្រកួតថ្ងៃសុក្រល្ងាចនេះគឺជាលើកដំបូងដែលជួបកីឡាករប្រេស៊ីល។

ហ្គាព្រីល ពេរ៉េយ៉ា ជាជើងខ្លាំងមួយរូបដែលមានបទពិសោធលើសង្វៀនអន្តរជាតិច្រើន ហើយក៏បានចេញប្រកួតជាច្រើនប្រទេសដែរ។ រូបគេត្រូវបានអ្នកគាំទ្រមើលឃើញថា មានអាវុធល្អគឺកណ្តាប់ដៃ ហើយធ្ងន់ថែមទៀត។ ជាពិសេសទៀតនោះ រូបគេមានអំណោចផល និងប្រៀបខាងកាយសម្បទា ខណៈរូបគេមានកម្ពស់រហូតដល់១.៨៩ម៉ែត្រ។

ជុំវិញការប្រកួតនេះ ធន់ រិទ្ធី បាននិយាយថា ៖«ខ្ញុំឡើងវ៉ៃដើម្បីបងប្អូនអ្នកទស្សនា។ ខ្ញុំឡើងវ៉ៃហើយគឺវ៉ៃហើយ តែស្ទាប់ស្ទង់ខ្លះនៅទឹកទី១ ឬទី២។ ខ្ញុំបារម្ភដែរចំពោះការប្រកួតល្ងាចនេះ ពីព្រោះគេ (ពេរ៉េយ៉ា) ល្បីថា មានអាវុធល្អ។ ពិសេសគេមានមាឌធំជាងខ្ញុំច្រើនណាស់។ គេជិត១.៩០ម៉ែត្រ ខ្ញុំត្រឹមតែ១.៧០ម៉ែត្រជាង។ នេះជាលើកដំបូងរបស់ខ្ញុំដែលត្រូវប៉ះដៃគូកម្ពស់ជិត២ម៉ែត្រ»។

ដោយសាររូបគេមានកណ្តាប់ដៃធ្ងន់ល្អ និងមានប្រសិទ្ធភាពស្រាប់ហើយ ធន់ រិទ្ធី បានបញ្ជាក់ថា រាល់ថ្ងៃនេះរូបគេបាន និងកំពុងបង្កើនទម្ងន់ជើងទាត់ដើម្បីឲ្យមានក្បាច់ ក៏ដូចជាអាវុធវ៉ៃបានល្អចម្រុះច្រើន៕

អត្ថបទ៖ វីរបុត្រ

The post កុំភ្លេច! កណ្តាប់ដៃយក្ស ធន់ រិទ្ធី ប៉ះ ជើងខ្លាំងប្រេស៊ីលកម្ពស់ជិត១.៩០ម៉ែត្រល្ងាចនេះ appeared first on Kampuchea Thmey Daily.

ធន់ រិទ្ធី Archives - Kampuchea Thmey Daily

កូន​ប្រុស​ ធន់​​ រិទ្ធី​ ជាប់​ឈ្មោះ​ទៅ​ប្រកួត​កីឡា​យុវជន​អាស៊ី​ នៅ​ប្រទេស​បារ៉ែន​

ធន់​ រិទ្ធី​ មិន​ហ៊ាន​ប្ដូរ​ដៃ​ជា​មួយ​កីឡាករ​រុស្សី​ម្នាក់​នេះ​ទេ​ ប្រើ​ស្នៀត​នេះ​វិញទប់ទល់​បាន​ ​

ធន់​ រិទ្ធី ទទួល​១ប្រកួត​ទៀត​ប៉ុណ្ណោះ​​​​កម្ដៅ​សាច់ដុំ​ត្រៀម​ចេញ​ទៅ​អាមេរិក​

កីឡាករ លន បញ្ញា, ធន់ រិទ្ធី និង ធន់ ផានិត រួម​គ្នា​ជួយ​គ្រូ​ដើម្បី​ធ្វើ​ក្លិប​ថ្មី

Sammy វិភាគ​ថា ធន់ រិទ្ធី មាន៧០%ក្នុង​ការយកឈ្នះ Saiyok

ក្រោយទៅសង្គ្រោះនៅមន្ទីរពេទ្យ Sammy និយាយពីការចាញ់ ធន់ រិទ្ធី

ប្រេស៊ីល​​កម្ពស់​​ជិត​​២​​ម៉ែត្រ​​ សន្លប់​​ក្រោម​​កណ្តាប់​ដៃ​​ ធន់​ រិទ្ធី​​ យប់​​មិញ​ (វីដេអូ)​

កូនប្រុស ធន់ រិទ្ធី ជាប់ឈ្មោះទៅប្រកួតកីឡាយុវជនអាស៊ី នៅប្រទេសបារ៉ែន

ធន់ រិទ្ធី មិនហ៊ានប្ដូរដៃជាមួយកីឡាកររុស្សីម្នាក់នេះទេ ប្រើស្នៀតនេះវិញទប់ទល់បាន

ធន់ រិទ្ធី ទទួល១ប្រកួតទៀតប៉ុណ្ណោះកម្ដៅសាច់ដុំត្រៀមចេញទៅអាមេរិក

កីឡាករ លន បញ្ញា, ធន់ រិទ្ធី និង ធន់ ផានិត រួមគ្នាជួយគ្រូដើម្បីធ្វើក្លិបថ្មី

Sammy វិភាគថា ធន់ រិទ្ធី មាន៧០%ក្នុងការយកឈ្នះ Saiyok

ប្រេស៊ីលកម្ពស់ជិត២ម៉ែត្រ សន្លប់ក្រោមកណ្តាប់ដៃ ធន់ រិទ្ធី យប់មិញ (វីដេអូ)