និយ័តករធានារ៉ាប់រងកម្ពុជា Archives - Kampuchea Thmey Daily

រដ្ឋាភិបាលដាក់ចេញមហិច្ឆតា បណ្តុះសមត្ថភាពជនជាតិខ្មែរ ឈានចាប់កាន់តួនាទីដឹកនាំលើវិស័យធានារ៉ាប់រង

Dy Bunnara — Wed, 10 Jun 2026 07:44:42 +0000

រាជរដ្ឋាភិបាលបានដាក់ចេញមហិច្ឆតាក្នុងការបណ្តុះបណ្តាលធនធានជំនាញក្នុងស្រុក ដើម្បីអាចឈានទៅចាប់កាន់់តំណែងជាថ្នាក់ដឹកនាំក្រុមហ៊ុនធំៗលើវិស័យធានារ៉ាប់រង។

លោក ប៊ូ ច័ន្ទភីរូ អគ្គនាយកនិយ័តករធានារ៉ាប់រងកម្ពុជាបានបញ្ជាក់ថា ដោយសារកម្ពុជាមិនទាន់មានការបណ្តុះបណ្តាលជំនាញធានារ៉ាប់រងនៅសាកលវិទ្យាល័យ លោកមើលឃើញថាតំណែងថ្នាក់ដឹកនាំកណ្តាល និងកំពូលៗភាគច្រើនត្រូវបង្ខំចិត្តពឹងផ្អែកលើជនបរទេស។

«គោលនយោបាយរបស់រាជរដ្ឋាភិបាលគឺព្យាយាមបង្កើតទីផ្សារការងារសម្រាប់ប្រជាពលរដ្ឋខ្មែរ មិនមែនបង្កើតសម្រាប់ជនបរទេសឡើយ។ ចាប់ពីកម្រិតទាប មធ្យម រហូតដល់កម្រិតខ្ពស់ គឺត្រូវតែជាប្រជាពលរដ្ឋខ្មែរ ដែលមានជំនាញធានារ៉ាប់រងច្បាស់លាស់»។ លោក ប៊ូ ច័ន្ទភីរ៉ូ បញ្ជាក់។

យ៉ាងណាមិញ ស្ថានភាពមានការប្រែប្រួល។ ប្រជាពលរដ្ឋខ្មែរមានចំណុចពិសេសគឺឆាប់ចាប់បាន ពេលចូលធ្វើការផ្ទាល់។

លោក ភី ច័ន្ទភីរ៉ូ មើលឃើញពលរដ្ឋខ្មែរមានចំណុចពិសេសមួយគឺ ចង់ចេះចង់ដឹង ឆាប់ចាប់បានការងារ។ នៅពេលចូលបម្រើការងារ ពួកគេធ្វើការផងរៀនសូត្រផង រហូតអភិវឌ្ឍសមត្ថភាពខ្លួនឯង។

លោកលើកឡើងដូច្នេះថា «បច្ចុប្បន្នសូម្បីតែតំណែងថ្នាក់កណ្តាល និងថ្នាក់កំពូលៗដូចជាអគ្គនាយក (CEO) នៅក្នុងក្រុមហ៊ុនធានារ៉ាប់រងអន្តរជាតិធំៗដែលមានសាខាគ្រប់ទ្វីប ក៏មានជនជាតិខ្មែរធ្វើជា CEO ដែរ ព្រោះក្រុមហ៊ុនទទួលបានអត្ថប្រយោជន៍ពីរគឺ ចំណាយតិចជាងជនបរទេស និងមានសមត្ថភាពដឹកនាំឱ្យក្រុមហ៊ុនជោគជ័យដូចគ្នា»។

«តាមធម្មជាតិនៃការធ្វើអាជីវកម្ម ក្រុមហ៊ុនបរទេសតែងតែចង់ចំណាយតិច ដោយសារការជួលជនបរទេសមានការចំណាយខ្ពស់។ ហេតុនេះ នៅពេលដែលជនជាតិខ្មែរមានសមត្ថភាពអាចបំពេញការងារបាន ក្រុមហ៊ុនអន្តរជាតិធំៗចង់តែងតាំងជនជាតិខ្មែរជាអគ្គនាយក (CEO) និងជាថ្នាក់ដឹកនាំកណ្តាលវិញ ព្រោះសមត្ថភាពដឹកនាំជោគជ័យដូចគ្នា ហើយការចំណាយតិចជាង»។ លោក ប៊ូ ច័ន្ទភីរូ បន្ថែម។

វិស័យធានារ៉ាប់រងនៅកម្ពុជាមានការរីកចម្រើនជាបន្តបន្ទាប់។ បច្ចុប្បន្នមានអ្នកបម្រើការងារពេញម៉ោងប្រមាណ ៤,៥០០ នាក់ និងអ្នកធ្វើការជាភ្នាក់ងារជាង ១ ម៉ឺននាក់។

តាមយុទ្ធសាស្ត្ររបស់រាជរដ្ឋាភិបាលសម្រាប់ឆ្នាំ ២០៣០ វិស័យធានារ៉ាប់រងរំពឹងនឹងរួមចំណែកក្នុងសេដ្ឋកិច្ចរហូតដល់ ២% ដែលទាមទារឲ្យមានកម្លាំងពលកម្មពេញម៉ោងកើនឡើងដល់ប្រមាណ ១ ម៉ឺននាក់។

លោក ភី ច័ន្ទភីរូ បានសង្កត់ធ្ងន់ថា ប្រភពធនធានមនុស្សដ៏សំខាន់ ក្នុងការស្រូបយកមកបំពេញតម្រូវការរហូតដល់ ១ ម៉ឺននាក់នេះ គឺចេញពីនិស្សិតតាមសាកលវិទ្យាល័យនេះឯង ហើយការបណ្តុះបណ្តាលជំនាញកាន់តែលឿន នឹងជួយជំរុញកំណើនទីផ្សារបានកាន់តែឆាប់រហ័ស។

និយ័តករធានារ៉ាប់រងកម្ពុជា បានចុះហត្ថលេខាសហការជាមួយសាកលវិទ្យាល័យ បៀល ប្រាយ ដែលនេះជាសាកលវិទ្យាល័យទី ៣ នៅក្នុងប្រទេសកម្ពុជាដែលនិយ័តករបានចុះកិច្ចព្រមព្រៀងជាមួយ។ តាមរយៈការចុះកិច្ចសហការជាមួយគ្រឹះស្ថានឧត្តមសិក្សា គឺដើម្បីកសាងគ្រឹះជំនាញធានារ៉ាប់រងដល់និស្សិតតាំងពីនៅក្នុងសាកលវិទ្យាល័យ ដើម្បីពេលពួកគេបញ្ចប់ការសិក្សា អាចដើរចូលទៅក្នុងទីផ្សារការងារបានលឿន និងរុញច្រានវិស័យនេះឱ្យកាន់តែរីកចម្រើន។

លោក ឌៀប សីហា សកលវិទ្យាធិការនៃសាកលវិទ្យាល័យបៀល ប្រាយ បានបញ្ជាក់ថា ការចុះអនុស្សរណៈនេះ គឺដើម្បីពង្រឹងកិច្ចសហប្រតិបត្តិការរវាងគ្រឹះស្ថានឧត្តមសិក្សា និងវិស័យធានារ៉ាប់រងនៅកម្ពុជា។

លោកថា ស្ថាប័នទាំងពីរមានការប្តេជ្ញាចិត្តរួមគ្នាក្នុងការជំរុញ និងលើកកម្ពស់ចំណេះដឹង បទពិសោធន៍ ការបណ្ដុះបណ្ដាល និងការចូលរួមសកម្មភាពនានាពាក់ព័ន្ធនឹងការយល់ដឹងអំពីវិស័យធានារ៉ាប់រង និងការគ្រប់គ្រងហានិភ័យ។

តាមរយៈកិច្ចសហប្រតិបត្តិការនេះនឹងចូលរួមចំណែកយ៉ាងសំខាន់ក្នុងការបណ្តុះបណ្តាល និងអភិវឌ្ឍន៍ធនធានជំនាញ ដើម្បីជំរុញការរីកចម្រើន និងភាពធន់នៃឧស្សាហកម្មធានារ៉ាប់រងនៅកម្ពុជា។ លោក ឌៀប សីហា បញ្ជាក់បន្ថែម។

និយ័តករធានារ៉ាប់រងកម្ពុជា គិតត្រឹមឆ្នាំ ២០២៥ កម្ពុជាមានក្រុមហ៊ុនធានារ៉ាប់រងចំនួន ៣៩ និងក្រុមហ៊ុនអន្តរការីធានារ៉ាប់រងចំនួន ៦៥ កំពុងប្រតិបត្តិការ ខណៈបុព្វលាភធានារ៉ាប់រងសរុបសម្រេចបានប្រមាណ ៣៦៧ លានដុល្លារ កើនឡើង ២,៨ភាគរយ បើធៀបនឹងឆ្នាំ២០២៤៕

The post រដ្ឋាភិបាលដាក់ចេញមហិច្ឆតា បណ្តុះសមត្ថភាពជនជាតិខ្មែរ ឈានចាប់កាន់តួនាទីដឹកនាំលើវិស័យធានារ៉ាប់រង appeared first on Kampuchea Thmey Daily.

វិស័យធានារ៉ាប់រង រួមចំណែកនៅក្នុងសេដ្ឋកិច្ចជាតិបានត្រឹមតែជាង ១% ក្នុងឆ្នាំ ២០២៥

Dy Bunnara — Wed, 20 May 2026 06:48:54 +0000

ខណៈវិស័យធានារ៉ាប់រងមានការរីកចម្រើនគួរឲ្យកត់សម្គាល់នៅប៉ុន្មានឆ្នាំនេះ ប៉ុន្តែការចូលរួមចំណែករបស់វិស័យនេះទៅក្នុងសេដ្ឋកិច្ចជាតិនៅមានកម្រិតទាបនៅឡើយ ពោលបានត្រឹមតែប្រមាណ ១,១១% ប៉ុណ្ណោះក្នុងឆ្នាំ ២០២៥។ នេះបើតាមលោក ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជា។

ការរួមចំណែកនៃវិស័យធានារ៉ាប់រងនៅក្នុងសេដ្ឋកិច្ចកម្ពុជាគឺមានកម្រិតទាបនៅឡើយ បើធៀបទៅនឹងបណ្តាប្រទេសផ្សេងៗទៀតនៅក្នុងតំបន់។

លោក ប៊ូ ច័ន្ទភីរូ អគ្គនាយកនិយ័តករធានារ៉ាប់រងកម្ពុជា

លោក ប៊ូ ច័ន្ទភីរូ អគ្គនាយកនិយ័តករធានារ៉ាប់រងកម្ពុជាបានលើកពីបញ្ហាប្រឈមចម្បងៗចំនួនពីរ ដែលធ្វើឲ្យទីផ្សារធានារ៉ាប់រងក្នុងប្រទេសកម្ពុជានៅមានកម្រិតទាបនៅឡើយ។

លោកលើកឡើងកត្តាទីមួយគឺការខ្វះការយល់ដឹង ដែលប្រជាពលរដ្ឋនៅមិនទាន់បានយល់ច្បាស់អំពីអត្ថប្រយោជន៍នៃការប្រើប្រាស់សេវាធានារ៉ាប់រង។ កត្តាមួយទៀតគឺកង្វះទំនុកចិត្តទៅលើគុណភាពនៃការផ្តល់សេវាកម្មពីក្រុមហ៊ុនផ្តល់សេវាធានារ៉ាប់រង។

អគ្គនាយកនិយ័តករធានារ៉ាប់រងយល់ឃើញថា ទីផ្សារធានារ៉ាប់រងកម្ពុជានៅមានសក្តានុពលធំធេង សម្រាប់ការអភិវឌ្ឍនាពេលអនាគត។

ដើម្បីចូលរួមអភិវឌ្ឍន៍វិស័យធានារ៉ាប់រងក្នុងប្រទេសកម្ពុជា ក្នុងគោលដៅបង្កើនល្បឿននិងជំរុញការជឿជាក់ដល់សាធារណជន និយ័តករធានារ៉ាប់រងកម្ពុជា (IRC) បានឈានទៅចុះអនុស្សរណៈយោគយល់គ្នាជាមួយវិទ្យាស្ថានធានារ៉ាប់រង និងហិរញ្ញវត្ថុនៃប្រទេសអូស្ត្រាលី និងនូវែលសេឡង់ (ANZIIF) ដើម្បីពង្រឹងកិច្ចសហប្រតិបត្តិការយូរអង្វែងក្នុងការអភិវឌ្ឍវិស័យធានារ៉ាប់រងនៅប្រទេសកម្ពុជាឲ្យរីកចម្រើន។

លោក ប៊ូ ច័ន្ទភីរូ បានបញ្ជាក់ថា កិច្ចសហប្រតិបត្តិការគ្នានេះ ក្នុងគោលដៅលើកកម្ពស់វិជ្ជាជីវៈវិស័យធានារ៉ាប់រងក្នុងប្រទេសកម្ពុជា ដើម្បីឈានដល់កម្រិតស្តង់ដាជាសកល តាមរយៈការផ្លាស់ប្តូរជំនាញ និងបទពិសោធន៍ និងកិច្ចសហការគ្នាបង្កើតកម្មវិធីបណ្ដុះបណ្ដាលផ្សេងៗ។

លោក ប៊ូ ច័ន្ទភីរូ មើលឃើញថា នៅពេលដែលគុណភាពសេវាកម្មក្នុងវិស័យធានារ៉ាប់រងក្នុងប្រទេសកម្ពុជា ត្រូវបានពង្រឹងដល់កម្រិតស្តង់ដារអន្តរជាតិនោះ ប្រជាពលរដ្ឋនឹងមានទំនុកចិត្តកាន់តែខ្លាំង ហើយងាកមកប្រើប្រាស់សេវាធានារ៉ាប់រងកាន់តែទូលំទូលាយ ដែលជាកត្តាជំរុញដ៏សំខាន់ធ្វើឱ្យវិស័យនេះអាចរីកចម្រើនបានកាន់តែលឿន។

ទីផ្សារធានារ៉ាប់រងកម្ពុជាបានរីកធំធាត់រហូតដល់ប្រមាណ ៣៦៧ លានដុល្លារអាមេរិក។ ទ្រព្យសកម្មសរុបមានចំនួនច្រើនជាង ១.២ ពាន់លានដុល្លារអាមេរិក។

របាយការណ៍ពីនិយ័តករធានារ៉ាប់រងកម្ពុជាបានបង្ហាញថា គិតត្រឹមឆ្នាំ ២០២៥ ចំនួនក្រុមហ៊ុនធានារ៉ាប់រងដែលកំពុងប្រតិបត្តិការនៅក្នុងប្រទេសកម្ពុជាមានចំនួន ៣៩ ក្រុមហ៊ុន ក្នុងនោះក្រុមហ៊ុនធានារ៉ាប់រងទូទៅមានចំនួន ១៨ ក្រុមហ៊ុន ក្រុមហ៊ុនធានារ៉ាប់រងអាយុជីវិតមានចំនួន ១៣ ក្រុមហ៊ុន ក្រុមហ៊ុនធានារ៉ាប់រងខ្នាតតូចមានចំនួន ៧ ក្រុមហ៊ុន និងក្រុមហ៊ុនធានារ៉ាប់រងបន្តមានចំនួន ១ ក្រុមហ៊ុន៕

The post វិស័យធានារ៉ាប់រង រួមចំណែកនៅក្នុងសេដ្ឋកិច្ចជាតិបានត្រឹមតែជាង ១% ក្នុងឆ្នាំ ២០២៥ appeared first on Kampuchea Thmey Daily.

និយ័តករធានារ៉ាប់រងកម្ពុជា រៀបចំ “ទិវាធានារ៉ាប់រងកម្ពុជា ២០២៦” នៅខេត្តសៀមរាប រយៈពេល២ថ្ងៃ

Ken Malis — Sat, 25 Apr 2026 09:58:55 +0000

និយ័តករធានារ៉ាប់រងកម្ពុជា ក្រោមកិច្ចសហការជាមួយសមាគមធានារ៉ាប់រងកម្ពុជា សមាគមជើងសាធានារ៉ាប់រង កម្ពុជា និងគ្រឹះស្ថានធានារ៉ាប់រង បានរៀបចំ “ទិវាធានារ៉ាប់រងកម្ពុជា ២០២៦” នៅសួនព្រះរាជដំណាក់ ខេត្តសៀមរាប ដែលប្រព្រឹត្តទៅរយៈពេល ២ថ្ងៃ ចាប់ពីថ្ងៃទី២៥ ដល់ ថ្ងៃទី២៦ ខែមេសា។

ពិធីបើកជាផ្លូវការប្រារព្ធឡើងក្រោមអធិបតីភាព លោក រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអនុប្រធានក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ តំណាងដ៏ខ្ពង់ខ្ពស់អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ លោក លី សារី អភិបាលខេត្តរងសៀមរាប លោក ប៊ូ ច័ន្ទភីរូ អគ្គនាយក នៃនិយ័តករធានា-រ៉ាប់រងកម្ពុជា សមាជិកក្រុមប្រឹក្សាភិបាលអាជ្ញាធរសេវាហិរញ្ញវត្ថុមិនមែនធនាគារ ព្រមទាំងលោកប្រធានសមាគមធានារ៉ាប់រងកម្ពុជា និងសមាគមជើងសា ធានារ៉ាប់រងកម្ពុជា ដោយមានការចូលរួមពីរដ្ឋបាលខេត្ត តំណាងមន្ទីរពាក់ព័ន្ធ ដៃគូអភិវឌ្ឍន៍ សភាពាណិជ្ជកម្ម គ្រឹះស្ថានធានារ៉ាប់រង គ្រឹះស្ថានឧត្ដមសិក្សា និងសាធារណជននៅក្នុងខេត្តសៀមរាប យ៉ាង អធិកអធម។

ទិវាធានារ៉ាប់រងកម្ពុជានេះ រៀបចំឡើងក្នុងគោលបំណងសំខាន់ៗចំនួន ៣៖ ១) លើកកម្ពស់ការយល់ដឹងនិងជំរុញការផ្សព្វផ្សាយអំពីសេវាធានារ៉ាប់រងជូនសាធារណជន ២) បង្ហាញពីការគាំទ្ររបស់រាជរដ្ឋាភិបាលក្នុងការជំរុញឱ្យមានពិពិធកម្មផលិតផលហិរញ្ញវត្ថុនៅក្នុងវិស័យហិរញ្ញវត្ថុ ដូចមានចែងនៅក្នុងយុទ្ធសាស្រ្តបញ្ចកោណ ដំណាក់កាលទី១ នីតិកាលទី៧ របស់រាជរដ្ឋាភិបាល និង៣) បង្ហាញដល់សាធារណជនឱ្យបានជ្រាបថា វិស័យធានារ៉ាប់រងជាផ្នែកដ៏សំខាន់មួយ ដែលមានតួនាទីសកម្ម និងចាំបាច់ក្នុងការចូលរួមចំណែកកសាងសំណាញ់ សុវត្ថិភាពសង្គម និងជំរុញកំណើនសេដ្ឋកិច្ចជាតិ។

ក្នុងឱកាសនេះដែរ ជាមួយនឹងការអបអរសាទរចំពោះជោគជ័យនៃការរៀបចំទិវាធានារ៉ាប់រងកម្ពុជា ២០២៦ លោក រស់ សីលវ៉ា បានគូសរំលេចពីសារៈសំខាន់នៃវិស័យធានារ៉ាប់រងក្នុងការទ្រទ្រង់ប្រព័ន្ធសន្តិសុខ សង្គម និងរួមចំណែកយ៉ាងខ្លាំងក្លាដល់ការអភិវឌ្ឍសេដ្ឋកិច្ចជាតិ ព្រមទាំងលើកនូវទិសដៅការងារសំខាន់ៗ ក្នុងការជំរុញទីផ្សារធា នារ៉ាប់រងកម្ពុជាឱ្យកាន់តែរីកចម្រើននាពេលខាងមុខ។

ទន្ទឹមនឹងនេះ បានបង្ហាញឱ្យឃើញពីសម្ទុះរីកចម្រើនគួរឱ្យកត់សម្គាល់របស់វិស័យធានារ៉ាប់រង ក្នុងរយៈពេលប្រមាណ៥ឆ្នាំ កន្លងមកនេះ។ ជាក់ស្តែង ក្នុងឆ្នាំ២០២៥ ទីផ្សារធានារ៉ាប់រងកម្ពុជាមានគ្រឹះស្ថានធានារ៉ាប់រងសរុបចំនួន ១១២ ដែលក្នុងនោះរួមមាន ក្រុមហ៊ុនធានារ៉ាប់រងទូទៅចំនួន ១៨ ក្រុមហ៊ុនធានារ៉ាប់រងអាយុជីវិតចំនួន ១៣ ក្រុមហ៊ុនធានារ៉ាប់រងខ្នាតតូចចំនួន ៧ ក្រុមហ៊ុនធានារ៉ាប់រងបន្តចំនួន ១ ក្រុមហ៊ុនជើងសាធានារ៉ាប់រងចំនួន ២០ ក្រុមហ៊ុនភ្នាក់ងារធានារ៉ាប់រងចំនួន ៤៤ ក្រុមហ៊ុនវាយតម្លៃហានិភ័យធានារ៉ាប់រងចំនួន ៥ក្រុមហ៊ុនគ្រប់គ្រងសំណងធានារ៉ាប់រងចំនួន ២ និងក្រុមហ៊ុនគណនាបុព្វលាភធានារ៉ាប់រងចំនួន ២ កំពុងធ្វើប្រតិបត្តិការអាជីវកម្មធានារ៉ាប់រង។

ជាមួយនឹងកំណើនគ្រឹះស្ថានធានារ៉ាប់រងនេះ ទំហំទីផ្សារធានារ៉ាប់រងកម្ពុជាបានកើនឡើងដល់ប្រមាណ ៣៦៧ លានដុល្លារអាម៉េរិក ក្នុងឆ្នាំ២០២៥ និងបានចូលរួមចំណែកក្នុងសេដ្ឋកិច្ចកម្ពុជាជាអត្រាភាគទានធានារ៉ាប់រងប្រមាណ ១,១១% នៃ ផ.ស.ស. និងដង់ស៊ីតេធានារ៉ាប់រងចំនួន ២០,៩៥ ដុល្លារអាម៉េរិកក្នុងមនុស្សម្នាក់។ សូចនាករគន្លឹះទាំងពីរនេះ បញ្ជាក់ថា ទីផ្សារធានារ៉ាប់រងកម្ពុជានៅមានសក្តានុពលធំធេងសម្រាប់ការរីកចម្រើននាពេលខាងមុខ ហើយក៏បញ្ជាក់ផងដែរថាកង្វះ ការយល់ដឹងរបស់សាធារណជនអំពីអត្ថប្រយោជន៍នៃការធានារ៉ាប់រង និងជំនឿទុកចិត្តរបស់អតិថិជនលើក្រុមហ៊ុនធានារ៉ាប់រង គឺជាបញ្ហាប្រឈមមួយដែលទាមទារឱ្យមានការផ្សព្វផ្សាយ និងអប់រំបន្ថែមទៀតអំពីខ្លឹមសារនិងអត្ថប្រយោជន៍នៃការធានារ៉ាប់រង។

ដោយពិនិត្យឃើញពីសក្តានុពល និងបញ្ហាប្រឈមខាងលើនេះ និយ័តករធានារ៉ាប់រងកម្ពុជា បានរៀបចំទិវានេះឡើងដោយសង្ឃឹមជឿជាក់ថា ទិវានេះនឹងរួមចំណែកជំរុញការអភិវឌ្ឍសេដ្ឋកិច្ចសង្គម លើកកម្ពស់ការយល់ដឹងរបស់ប្រជាពលរដ្ឋក្នុងខេត្តអំពីអត្ថប្រយោជន៍នៃការធានារ៉ាប់រង និងជំរុញសេវាធានារ៉ាប់ រងឱ្យកៀកនឹងប្រជាពលរដ្ឋ។

បន្ថែមពីនេះ ទិវាធានារ៉ាប់រង មានរៀបចំកម្មវិធីសំខាន់ៗមួយចំនួន រួមមាន សន្និសីទសារព័ត៌មានពីវិស័យធានារ៉ាប់រង, ការបរិច្ចាគថវិកាជូនមូលនិធិគន្ធបុប្ផាកម្ពុជា, ការតាំងពិព័ណ៌ផលិតផលធានារ៉ាប់ រង, ការរត់កម្សាន្តក្រោមប្រធានបទ “រត់ដើម្បីគ្រួសារយើង” ក្នុងស្មារតីប្រមូលថវិកាជូនដល់កាកបាទក្រហមប្រចាំ ខេត្តសៀមរាប ដើម្បីគាំទ្រដល់សកម្មភាពសង្គមជាពិសេសរួមចំណែកក្នុងសកម្មភាព មនុស្សធម៌ដើម្បីកុមារ ដែលកំពុងទទួលការព្យាបាល ដោយឥតគិតថ្លៃ៕

ដោយ៖ គឿនវេត

The post និយ័តករធានារ៉ាប់រងកម្ពុជា រៀបចំ “ទិវាធានារ៉ាប់រងកម្ពុជា ២០២៦” នៅខេត្តសៀមរាប រយៈពេល២ថ្ងៃ appeared first on Kampuchea Thmey Daily.

ក្រុមហ៊ុនផ្តល់សេវាធានារ៉ាប់រងកើនពីជាង ៨០ ដល់ ១១២ ក្រុមហ៊ុនគិតត្រឹមឆ្នាំ ២០២៥

Dy Bunnara — Mon, 20 Apr 2026 06:42:25 +0000

ក្នុងរយៈពេល ៥ ឆ្នាំ ចុងក្រោយនេះ ទីផ្សារធានារ៉ាប់រងកម្ពុជាមានភាពរីកចម្រើន និងរក្សាបាននូវកំណើនវិជ្ជមានពីមួយឆ្នាំទៅមួយឆ្នាំ។ គ្រឹះស្ថានធានារ៉ាប់រងបានកើនឡើងពីចំនួន ៨៣ ក្រុមហ៊ុន ក្នុងឆ្នាំ២០២១ ដល់ ១១២ ក្រុមហ៊ុន ក្នុងឆ្នាំ ២០២៥។ នេះបើតាមលោក ប៊ូ ច័ន្ទភីរូ អគ្គនាយកនៃនិយ័តករធនារ៉ាប់រងកម្ពុជាថ្លែងនៅក្នុងសិក្ខាសាលាផ្សព្វផ្សាយស្តីពីផែនការយុទ្ធសាស្រ្តអភិវឌ្ឍវិស័យធានារ៉ាប់រងកម្ពុជាឆ្នាំ ២០២៥-២០៣០។

គ្រឹះស្ថានធានារ៉ាប់រងដែលកំពុងដំណើរការ ក្នុងនោះក្រុមហ៊ុនធានារ៉ាប់រងមានចំនួន ៣៩ ក្រុមហ៊ុន, ក្រុមហ៊ុនអន្តរការីមានចំនួន ៦៤ ក្រុមហ៊ុន និងក្រុមហ៊ុនផ្តល់សេវាគាំទ្រអាជីវកម្មធានារ៉ាប់រងមានចំនួន ៩ ក្រុមហ៊ុន។

លោក ប៊ូ ច័ន្ទភីរូ អគ្គនាយកនិយ័តករធនារ៉ាបរង់កម្ពុជាបានគូសបញ្ជាក់ថា ទន្ទឹមការកើនឡើងនៃគ្រឹះស្ថានធានារ៉ាប់រង ទំហំទីផ្សារបុព្វលាភដុលធានារ៉ាប់រងក៏មានកំណើនពីប្រមាណ ៣០០ លានដុល្លារអាម៉េរិក ក្នុងឆ្នាំ២០២១ រហូតដល់ប្រមាណជាង ៣៦៧ លានដុល្លារអាម៉េរិក ក្នុងឆ្នាំ២០២៥ ដែលមានកំណើនជាមធ្យមប្រមាណជាង ៦% ក្នុងរយៈពេល ៥ ឆ្នាំ ចុងក្រោយនេះ។

ទន្ទឹមនេះទ្រព្យសកម្មធានារ៉ាប់រងបានកើនឡើងពីប្រមាណជាង ៨៥០ លានដុល្លារអាម៉េរិក ក្នុងឆ្នាំ២០២១ រហូតដល់ប្រមាណជិត ១,៣ ប៊ីលានដុល្លារអាម៉េរិកក្នុងឆ្នាំ២០២៥។

វិស័យធានារ៉ាប់រង ដើរតួនាទីយ៉ាងសំខាន់ជាយន្តការក្នុងការដោះស្រាយ បន្ទុកហិរញ្ញវត្ថុនៅពេលមានហានិភ័យកើតឡើង សំដៅពង្រឹងសំណាញ់សុវត្ថិភាពសង្គម និងលើកកម្ពស់ភាពធន់នៅក្នុងសង្គម។ ស្របពេលដែលពិភពលោកកំពុងប្រឈមនឹងភាពមិនប្រាកដប្រជាខ្ពស់ វិស័យធានារ៉ាប់រងដើរតួនាទីកាន់តែសំខាន់ក្នុងការឆ្លើយតបនឹងហានិភ័យ ដែលអាចកើតមានឡើងឥតព្រាងទុក។

លោក ប៊ូ ច័ន្ទភីរូ បានអះអាងថា ការធានារ៉ាប់រងគឺជាយន្តការសំខាន់មួយក្នុងការរួមចំណែកគាំទ្រប្រព័ន្ធសន្តិសុខ និងសុវត្ថិភាពសង្គម។ ជាក់ស្តែង វិស័យធានារ៉ាប់រងក៏ជាចន្ទល់កំណើនសេដ្ឋកិច្ចសំខាន់មួយ ឆ្លុះបញ្ចាំងតាមរយៈការផ្តល់ការការពារដល់សហគ្រាស និងធុរកិច្ច ក្នុងការធានាបាននូវនិរន្តរភាពប្រតិបត្តិការអាជីវកម្ម ព្រមទាំងលើកកម្ពស់កំណើនសេដ្ឋកិច្ចតាមរយៈការវិនិយោគ និងការផ្តល់ឱកាសការងារជូនប្រជាពលរដ្ឋ។

វិស័យធានារ៉ាប់រងបានរួមចំណែកក្នុងសេដ្ឋកិច្ចកម្ពុជា តាមរយៈអត្រាភាគទានធានារ៉ាប់រងក្នុងសេដ្ឋកិច្ច ១.១១% និងដង់ស៊ីតេធានារ៉ាប់រង ២០.៩៥ ដុល្លារអាម៉េរិក ក្នុងមនុស្សម្នាក់ក្នុងឆ្នាំ ២០២៥។

ក្នុងការចូលរួមលើកកម្ពស់ការអភិវឌ្ឍសង្គម និងសេដ្ឋកិច្ច បន្ទុកហិរញ្ញវត្ថុប្រមាណជាង ១១១ ប៊ីលានដុល្លារអាម៉េរិក ត្រូវបានការពារដោយកិច្ចសន្យារ៉ាប់រង ដែលក្នុងនោះសំណងធានារ៉ាប់រងប្រមាណជិត ៦៨ លានដុល្លារអាម៉េរិក ត្រូវបានផ្តល់ជូនអ្នកត្រូវបានធានា និងអ្នកទទួលផល។

ដើម្បីរួមចំណែកអនុវត្តគោលនយោបាយរបស់រាជរដ្ឋាភិបាលកាលពីឆ្នាំ២០២១ និយ័តករធានារ៉ាប់រងកម្ពុជាបានរៀបចំនិងដាក់ឱ្យអនុវត្ត «ផែនការយុទ្ធសាស្ត្រអភិវឌ្ឍន៍វិស័យធានារ៉ាប់រងកម្ពុជា ២០២១-២០៣០» ដើម្បីឆ្លើយតបទៅនឹងការវិវត្តជាក់ស្តែងនៃទីផ្សារធានារ៉ាប់រងក្នុងស្រុក, តំបន់ និងសកល។

ផែនការយុទ្ធសាស្ត្រនេះផ្តោតលើក្របខណ្ឌយុទ្ធសាស្ត្រធំៗចំនួន ៤ រួមមាន៖ ១).ក្របខណ្ឌយុទ្ធសាស្ត្រ ២).ក្របខណ្ឌទីផ្សារធានារ៉ាប់រង ៣).ក្របខណ្ឌនិយ័តកម្ម និង ៤).ក្របខណ្ឌសហប្រតិបត្តិការ និងតំណរភ្ជាប់ដែលត្រូវអនុវត្តក្នុងរយៈពេលខ្លី (២០២៥-២០២៦) រយៈពេលមធ្យម (២០២៧-២០២៨) និងរយៈពេលវែង (២០២៩-២០៣០)។

ស្របតាមការអនុវត្តនូវក្របខណ្ឌយុទ្ធសាស្ត្រទាំង ៤ វិស័យធានារ៉ាប់រង ត្រូវបានរំពឹងថានឹងបន្តរួមចំណែកក្នុងសេដ្ឋកិច្ច តាមរយៈអត្រាភាគទានធានារ៉ាប់រងក្នុងសេដ្ឋកិច្ចប្រមាណ ២% និងដង់ស៊ីតេធានារ៉ាប់រងប្រមាណ ៤៥ ដុល្លារអាម៉េរិក ក្នុងមនុស្សម្នាក់ ក្នុងឆ្នាំ២០៣០៕

The post ក្រុមហ៊ុនផ្តល់សេវាធានារ៉ាប់រងកើនពីជាង ៨០ ដល់ ១១២ ក្រុមហ៊ុនគិតត្រឹមឆ្នាំ ២០២៥ appeared first on Kampuchea Thmey Daily.

អាជីវកម្មចំនួន ៣ ជាប់កាតព្វកិច្ចចាំបាច់ត្រូវទិញធានារ៉ាប់រងការពារគ្រោះថ្នាក់

Dy Bunnara — Wed, 18 Feb 2026 04:08:48 +0000

លោក ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជាបានបញ្ជាក់ថា យោងតាមច្បាប់បានតម្រូវឲ្យអាជីវកម្មដែលមានហានិភ័យខ្ពស់ចំនួន ៣ ត្រូវជាប់កាតព្វកិច្ចទិញធានារ៉ាប់រង ដើម្បីការពារគ្រោះថ្នាក់កើតឡើង។

លោក ប៊ូ ច័ន្ទភីរូ បានថ្លែងថា កាតព្វកិច្ចបានន័យថា ជាការចាប់បង្ខំត្រូវតែអនុវត្តដាច់ខាតដែលកំណត់ដោយច្បាប់។

លោក ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជា

លោកពន្យល់យោងតាមច្បាប់ដែលបានអនុម័តដាក់ឱ្យប្រើប្រាស់តាំងពីឆ្នាំ ២០០០ ដែលបានកំណត់លើអាជីវកម្មដែលច្បាប់តម្រូវឲ្យទិញធានារ៉ាប់រងរួមមាន៖

១).យានយន្តប្រកបអាជីវកម្ម

ច្បាប់បានកំណត់ថា ម្ចាស់យានយន្តដែលប្រកបអាជីវកម្មក្នុងព្រះរាជាណាចក្រកម្ពុជា ត្រូវមានការធានារ៉ាប់រងយានយន្តពីក្រុមហ៊ុនធានារ៉ាប់រងណាមួយ លើភារៈទទួលខុសត្រូវចំពោះរាល់ការខូចខាតបង្កឡើងដល់តតិយជន ដែលបណ្តាលមកពីគ្រោះថ្នាក់ចរាចរណ៍បង្កឡើងដោយយានយន្ដរបស់ខ្លួន។

២).យានយន្តដឹកជញ្ជូនអ្នកដំណើរ

ច្បាប់កំណត់ថា ប្រតិបត្តិករអាជីវកម្មដឹកជញ្ជូនអ្នកដំណើរ រួមទាំងភ្ញៀវទេសចរតាមមធ្យោបាយដឹកជញ្ជូននានា ត្រូវមានភារៈទទួលខុសត្រូវចំពោះអ្នកដំណើរ ដែលជិះតាមមធ្យោបាយដឹកជញ្ជូនរបស់ខ្លួន ទោះបីមធ្យោបាយនោះចរាចរតាមផ្លូវគោក ផ្លូវទឹក ផ្លូវអាកាស ឬផ្លូវដែកក៏ដោយ។

៣). ការដ្ឋានសាងសង់

ច្បាប់បានកំណត់ថា រូបវន្តបុគ្គលឬនីតិបុគ្គលដែលជាម្ចាស់ការដ្ឋាន ត្រូវមានកិច្ចសន្យាធានារ៉ាប់រងលើភារៈទទួលខុសត្រូវការដ្ឋាន ដែលធានាសំណងជូនជនរងគ្រោះ ដែលរងផលប៉ះពាល់ទាំងរូបរាងកាយ និងទ្រព្យសម្បត្តិ ដែលបង្កដោយសកម្មភាពរបស់ការដ្ឋាន។

លោក ប៊ូ ច័ន្ទភីរូ បានបន្តថា ជារួមច្បាប់បានកំណត់ជាកាតព្វកិច្ចដល់ម្ចាស់យានយន្តប្រកបអាជីវកម្ម ម្ចាស់អាជីវកម្មដឹកជញ្ជូនអ្នកដំណើរ និងម្ចាស់ការដ្ឋានសាងសង់ ត្រូវទិញធានារ៉ាប់រងភារៈទទួលខុសត្រូវចំពោះរាល់ការខូចខាតបង្កឡើងដល់តតិយជន ដែលបណ្តាលមកពីសកម្មភាពរបស់ខ្លួន។

ការធានារ៉ាប់រងជាកាតព្វកិច្ច ក្នុងច្បាប់ក៏បានកំណត់ទោសទណ្ឌចំពោះបុគ្គលដែលល្មើសមិនអនុវត្តតាមកាតព្វកិច្ចទាំងនេះ។ លោក ប៊ូ ច័ន្ទភីរូ បញ្ជាក់បន្ថែម។

បើតាមមន្រ្តីនិយ័តករធានារ៉ាប់រងកម្ពុជា ទោះបីច្បាប់ធានារ៉ាប់រងបានប្រកាសដាក់ឲ្យប្រើប្រាស់តាំងពីឆ្នាំ ២០០០ មានកត្តាចំនួន ៣ ដែលបណ្តាលឲ្យការអនុវត្តនៅមានកម្រិតទាបរួមមាន៖

ទី១).ម្ចាស់យានយន្ត ម្ចាស់អាជីវកម្មដែលប្រកបអាជីវកម្មដឹកជញ្ជូន និងម្ចាស់ការដ្ឋានពុំទាន់បានជ្រាបពីកាតព្វកិច្ចដែលត្រូវទិញធានារ៉ាប់រងសម្រាប់ការប្រកបអាជីវកម្ម

ទី២).ការផ្សព្វផ្សាយពីការអនុវត្តការធានារ៉ាប់រងជាកាតព្វកិច្ចដល់សាធារណជន ព្រមទាំងតួអង្គពាក់ព័ន្ធពុំទាន់មានភាពទូលំទូលាយ

ទី៣).ក្រសួងស្ថាប័នដែលមានសមត្ថកិច្ចអនុវត្ត ពុំទាន់ជ្រាបច្បាស់ពីកាតព្វកិច្ចនៃការអនុវត្តការធានារ៉ាប់រងនេះនៅឡើយ។

ដើម្បីចូលរួមពង្រឹងការអនុវត្តច្បាប់ និយ័តករធានារ៉ាប់រងកម្ពុជាបានរៀបចំ “ផែនការយុទ្ធសាស្ត្រអភិវឌ្ឍន៍វិស័យធានារ៉ាប់រងកម្ពុជា ២០២១-២០៣០” ដោយបានកំណត់យកការពង្រឹងការអនុវត្តការធានារ៉ាប់រងជាកាតព្វកិច្ច ជាផែនការអាទិភាពមួយតាមរយៈការជំរុញការផ្សព្វផ្សាយ និងលើកកម្ពស់ការយល់ដឹងរបស់ប្រជាពលរដ្ឋ ក៏ដូចជាស្ថាប័នមានសមត្ថកិច្ច និងស្ថាប័នពាក់ព័ន្ធការអនុវត្តការធានារ៉ាប់រង ដែលត្រូវបានកំណត់ជាកាតព្វកិច្ច ក្នុងច្បាប់ និងលិខិតបទដ្ឋានពាក់ព័ន្ធ។

ពាក់ព័ន្ធការអនុវត្តធានារ៉ាប់រងជាកាតព្វកិច្ចនេះ លោកស្រី តិមា វិច្ឆិកាល អភិបាលរងរាជធានីភ្នំពេញបានលើកគោលការណ៍ដ៏សាមញ្ញមួយគឺនៅពេលដែលមានគ្រោះកើតឡើង អាចជះឥទ្ធិពលដល់មនុស្សជាច្រើន ហេតុនេះចាំបាច់ត្រូវមានការចែករំលែកការទទួលខុសត្រូវ។

លោកស្រី តិមា វិច្ឆិកាល អភិបាលរងរាជធានីភ្នំពេញ

លោកស្រីពន្យល់ថា ហេតុអ្វីនិយាយដូចនេះ? ព្រោះពេលមានគ្រោះថ្នាក់មួយកើតឡើង នោះមិនមែនជះឥទ្ធិពលតែនៅលើមនុស្សម្នាក់នោះទេ វានឹងប៉ះពាល់ដល់មនុស្សដទៃទៀត។ ការធានារ៉ាប់រងគឺដើម្បីធានាថា នៅពេលដែលមានហេតុការណ៍អាក្រក់កើតឡើងជាយថាហេតុ បុគ្គលិកឬក្រុមមនុស្សដែលទទួលរងគ្រោះ នឹងមិនទទួលរងទម្ងន់នៃការខាតបង់តែម្នាក់ឯងនោះទេ ពិសេសការខាតបង់ផ្នែកហិរញ្ញវត្ថុ។

លោកស្រីជឿជាក់ថា ការធានារ៉ាប់រងជាកាតព្វកិច្ចពិតជាមានសារៈសំខាន់ណាស់ ក្នុងការរួមចំណែកការអភិវឌ្ឍសង្គមសេដ្ឋកិច្ចរបស់រាជធានីភ្នំពេញ ដែលជាមជ្ឈមណ្ឌលនយោបាយ សេដ្ឋកិច្ច សង្គមកិច្ច ទេសចរណ៍ វប្បធម៌ និងការទូតកំពុងមានការអភិវឌ្ឍលើគ្រប់វិស័យ៕

The post អាជីវកម្មចំនួន ៣ ជាប់កាតព្វកិច្ចចាំបាច់ត្រូវទិញធានារ៉ាប់រងការពារគ្រោះថ្នាក់ appeared first on Kampuchea Thmey Daily.

ត្រឹមបំណាច់ឆ្នាំ ២០២៥ មានក្រុមហ៊ុនធានារ៉ាប់រងចំនួន ៣៥ កំពុងប្រតិបត្តិការផ្តល់សេវាធានារ៉ាប់រងនៅកម្ពុជា

Dy Bunnara — Fri, 02 Jan 2026 02:39:16 +0000

បើតាមនិយ័តករធានារ៉ាប់រងកម្ពុជាបានឲ្យដឹងថា គិតត្រឹមបំណាច់ឆ្នាំ ២០២៥ មានក្រុមហ៊ុនផ្តល់សេវាធានារ៉ាប់រងចំនួន ៣៥ កំពុងប្រតិបត្តិការនៅកម្ពុជា ដែលក្នុងនោះក្រុមហ៊ុនធានារ៉ាប់រងអាយុជីវិតមានចំនួន ១២ ក្រុមហ៊ុនធានារ៉ាប់រងទូទៅមានចំនួន ១៧ ក្រុមហ៊ុនធានារ៉ាប់រងខ្នាតតូចមានចំនួន ៥ និងក្រុមហ៊ុនធានារ៉ាប់រងបន្តមានចំនួន ១។

វិស័យធានារ៉ាប់រងជាវិស័យមួយក្នុងចំណោមវិស័យហិរញ្ញវត្ថុមិនមែនធនាគារ ដែលបានកំពុងមានការរីកចម្រើនគួរឱ្យកត់សម្គាល់ក្នុងប្រទេសកម្ពុជា។

គិតត្រឹមដំណាច់ឆ្នាំ២០២៥ ទំហំទីផ្សារធានារ៉ាប់រងកម្ពុជាត្រូវបានព្យាករណ៍ថានឹងកើនឡើងដល់ប្រមាណ ៣៧៥ លានដុល្លារអាម៉េរិកនៃបុព្វលាភធានារ៉ាប់រងដុល។ នេះបើតាម លោក ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជាថ្លែងនៅក្នុងពិធីប្រកាសដាក់ឲ្យដំណើរការជាផ្លូវការប្រព័ន្ធទទួលបណ្តឹងធានារ៉ាប់រងតាមកម្មវិធីទូរសព្ទដៃកាលពីពេលថ្មីៗកន្លងទៅនេះ។

ទោះជាយ៉ាងណា បើពិនិត្យលើអត្រាភាគទានក្នុងសេដ្ឋកិច្ចនិងដង់ស៊ីតេធានារ៉ាប់រងនៅមានកម្រិតទាបធៀបនឹងតំបន់ ដែលនេះបញ្ជាក់ថា ទីផ្សារធានារ៉ាប់រងកម្ពុជានៅមានសក្ដានុពលធំធេងសម្រាប់ការអភិវឌ្ឍ។

ជាមួយឱកាសនៃការរីកចម្រើម ក៏គេមើលឃើញបញ្ហាប្រឈមមួយចំនួនដែលត្រូវដោះស្រាយ។ បញ្ហាប្រឈមចំបង គឺកង្វះទំនុកចិត្តរបស់ប្រជាជនលើគុណភាពសេវា ដោយសារកង្វះយន្តការសម្រាប់ប្រជាជនធ្វើបណ្តឹង ដើម្បីទទួលដំណោះស្រាយសមស្របនិងច្បាស់លាស់គួរឱ្យទុកចិត្តបាន។

លោក ប៊ូ ច័ន្ទភីរូ បានគូសបញ្ជាក់ថា ដើម្បីឆ្លើយតបនឹងបញ្ហាប្រឈមទាំងនេះ និយ័តករធានារ៉ាប់រងកម្ពុជាបានរៀបចំ និងដាក់ឱ្យអនុវត្តបទប្បញ្ញត្តិស្តីពីនីតិវិធីទទួល និងដោះស្រាយបណ្តឹងធានារ៉ាប់រង ក៏ដូចជាបានដាក់ឱ្យអនុវត្តយន្តការទទួលនិងដោះស្រាយបណ្តឹងធានារ៉ាប់រងអនឡាញ តាមរយៈគេហទំព័ររបស់និយ័តករ និងបានជំរុញការផ្សព្វផ្សាយទូទាំងប្រទេសអំពីយន្តការនៃការធ្វើបណ្ដឹងតាមអនឡាញនេះ។

និយ័តករធានារ៉ាប់រងកម្ពុជាក៏បានឈានមួយជំហានបន្ថែមទៀត ដោយបានដាក់ចេញប្រព័ន្ធទទួលបណ្តឹងធានារ៉ាប់រងតាមកម្មវិធីទូរស័ព្ទដៃ (Apps) មានឈ្មោះថា “បណ្ដឹងធានារ៉ាប់រង” ដែលអាចឱ្យប្រជាពលរដ្ឋដាក់បណ្ដឹងចំពោះក្រុមហ៊ុនធានារ៉ាប់រងណា ដែលមិនបានបំពេញតួនាទីតាមលក្ខខណ្ឌនៃកិច្ចសន្យាធានារ៉ាប់រង៕

The post ត្រឹមបំណាច់ឆ្នាំ ២០២៥ មានក្រុមហ៊ុនធានារ៉ាប់រងចំនួន ៣៥ កំពុងប្រតិបត្តិការផ្តល់សេវាធានារ៉ាប់រងនៅកម្ពុជា appeared first on Kampuchea Thmey Daily.

កម្ពុជា-ចិនចាប់ដៃគ្នាអភិវឌ្ឍន៍វិស័យមូលបត្រដើម្បីកៀរគរទុនពីវិស័យឯកជនជំរុញកំណើនសេដ្ឋកិច្ច

Din Thary — Wed, 24 Dec 2025 10:14:00 +0000

និយ័តករមូលបត្រកម្ពុជា (SERC) និង សមាគមអ្នកវិនិយោគចិននៅកម្ពុជា (CICA) បានចុះអនុស្សរណៈយោគយល់ជាមួយគ្នាមួយ ស្តីពីការផ្តល់អំណាចផ្នែកហិរញ្ញវត្ថុសម្រាប់ឧស្សាហកម្ម ការកសាងខ្សែក្រវ៉ាត់ផ្លូវមួយរួមគ្នា និងវេទិកាសហប្រតិបត្តិការហិរញ្ញវត្ថុ និងឧស្សាហកម្ម ចិន-កម្ពុជា”។

ថ្លែងក្នុងកម្មវិធីនេះនៅថ្ងៃទី២០ ខែធ្នូ ឆ្នាំ២០២៥ នៅទីក្រុងសៀងហៃ លោក ស៊ូ សុជាតិ អគ្គនាយក SERC បានគូសបញ្ជាក់ថា បន្ទាប់ពីដំណើរទស្សនកិច្ចជាផ្លូវការរបស់ប្រធានាធិបតី ស៊ី ជីនពីង មកកាន់ប្រទេសកម្ពុជាចាប់ពីថ្ងៃទី១៧ ដល់ថ្ងៃទី១៨ ខែមេសា ឆ្នាំ២០២៥ ទំនាក់ទំនង ទ្វេភាគីរបស់យើងទទួលបានសន្ទុះថ្មី ភាពជាដៃគូដែលបានពង្រឹងនេះលើសពីការចូលរួមនយោបាយ ហើយត្រូវបាន ឆ្លុះបញ្ចាំងកាន់តែខ្លាំងឡើងនៅក្នុងកិច្ចសហប្រតិបត្តិការជាក់ស្តែងនៅទូទាំងការវិនិយោគ ឧស្សាហកម្ម និងហិរញ្ញវត្ថុ។ ទំនាក់ទំនងចិន-កម្ពុជា កំពុងត្រូវបានលើកកម្ពស់ទៅជា “សហគមន៍វាសនារួមគ្រប់រដូវកាល ក្នុងយុគសម័យថ្មី” ក្នុង គុណភាពខ្ពស់ កម្រិតខ្ពស់ និងស្តង់ដារខ្ពស់។

លោក ស៊ូ សុជាតិ បានអះអាងថា «ព្រឹត្តិការណ៍សំខាន់នេះ មិនត្រឹមតែឆ្លុះបញ្ចាំងពីការជឿទុកចិត្តខាងនយោបាយយ៉ាងជ្រាលជ្រៅប៉ុណ្ណោះទេ ប៉ុន្តែថែមទាំងចក្ខុវិស័យជាយុទ្ធសាស្ត្ររួមគ្នាសម្រាប់កិច្ចសហប្រតិបត្តិការរយៈពេលវែងក្នុងការវិនិយោគ ពាណិជ្ជកម្ម ហិរញ្ញវត្ថុ និងការអភិវឌ្ឍឧស្សាហកម្ម។ នៅពេលដែលចំណងសេដ្ឋកិច្ចរបស់យើងបន្តកាន់តែស៊ីជម្រៅ ការតភ្ជាប់ហិរញ្ញវត្ថុកំពុងដើរតួនាទីជាយុទ្ធ-សាស្ត្រ និងអាចឱ្យដំណើរការបាន»។

លោក ស៊ូ សុជាតិ ក៏បានបន្តដែរថា ប្រទេសកម្ពុជាសព្វថ្ងៃនេះមានទីផ្សារមូលធនដែលដំណើរការ និងកំពុងអភិវឌ្ឍន៍ ឥតឈប់ឈរ ដោយមានការគាំទ្រពីផ្សារមូលបត្រ ក្រុមហ៊ុនមូលបត្រដែលមានអាជ្ញាបណ្ណ និងក្របខណ្ឌបទប្បញ្ញត្តិ ដែលបានបង្កើតឡើងសម្រាប់ការបោះផ្សាយភាគហ៊ុន និងមូលបត្របំណុល។ ប្រព័ន្ធអេកូឡូស៊ីទីផ្សាររបស់យើងក៏បាន ពង្រីកផងដែរ ដើម្បីរួមបញ្ចូលផលិតផលនិស្សន្ទ គម្រោងវិនិយោគរួម និងSandbox ដែលមានគោលបំណងលើកទឹក ចិត្តការច្នៃប្រឌិតដែលមានទំនួលខុសត្រូវ ខណៈពេលដែលការពារសុចរិតភាពទីផ្សារ។

ជាមួយគ្នានេះ លោក ស៊ូ សុជាតិ បានលើកឡើងថា កម្ពុជាស្វាគមន៍សហគ្រាសបរទេស រួមទាំងក្រុមហ៊ុនចិនផងដែរ ដើម្បី មើលឃើញប្រទេសកម្ពុជាមិនត្រឹមតែជាគោលដៅវិនិយោគប៉ុណ្ណោះទេ ប៉ុន្តែក៏ជាវេទិកាសម្រាប់ការបង្កើតដើមទុនរយៈ-ពេលវែងផងដែរ។ ការចូលទៅកាន់ទីផ្សារមូលធនអនុញ្ញាតឱ្យសហគ្រាសគាំទ្រដល់ការពង្រីកអន្តរជាតិ ធ្វើពិពិធកម្ម ប្រភពហិរញ្ញប្បទាន និងបង្កើនតម្លាភាព អភិបាលកិច្ច និងភាពជឿជាក់នៃទីផ្សារ។

SERC ជឿជាក់យ៉ាងមុតមាំថា ភាពជាដៃគូដ៏រឹងមាំរវាងរដ្ឋាភិបាល ដៃគូសហការ និងវិស័យឯកជន ចូលរួម ជំរុញការអភិវឌ្ឍសេដ្ឋកិច្ច វិស័យហិរញ្ញវត្ថុ តាមរយៈទីផ្សារមូលបត្រ៕

The post កម្ពុជា-ចិនចាប់ដៃគ្នាអភិវឌ្ឍន៍វិស័យមូលបត្រដើម្បីកៀរគរទុនពីវិស័យឯកជនជំរុញកំណើនសេដ្ឋកិច្ច appeared first on Kampuchea Thmey Daily.

និយ័តករធានារ៉ាប់រងកម្ពុជា លើកទឹកចិត្តពលរដ្ឋដាក់ពាក្យបណ្ដឹងធានារ៉ាប់រងតាមកម្មវិធីទូរសព្ទដៃ

Dy Bunnara — Thu, 11 Dec 2025 04:55:45 +0000

និយ័តករធានារ៉ាប់រងកម្ពុជា បានប្រកាសដាក់ឲ្យដំណើរការជាផ្លូវការនូវប្រព័ន្ធទទួលបណ្ដឹងធានារ៉ាប់រងតាមកម្មវិធីទូរសព្ទដៃ (mobile application) ដែលមានឈ្មោះថា បណ្ដឹងធានារ៉ាប់រង។

ការរៀបចំនិងដាក់ចេញនូវសមិទ្ធផលថ្មីនេះ គឺជាការឈានមួយជំហានបន្ថែមទៀតរបស់និយ័តករធានារ៉ាប់រងកម្ពុជា ដែលប្រព័ន្ធនេះផ្ដល់យន្តការងាយស្រួលដល់អតិថិជនធានារ៉ាប់រងក្នុងការធ្វើបណ្ដឹង។

លោក ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជាបានថ្លែងថា កម្មវិធីនេះអនុញ្ញាតឲ្យប្រជាពលរដ្ឋដាក់បណ្ដឹងចំពោះក្រុមហ៊ុនធានារ៉ាប់រងណា ដែលមិនបានបំពេញតួនាទីតាមលក្ខខណ្ឌនៃកិច្ចសន្យា។

«ប្រព័ន្ធទទួលបណ្ដឹងតាមទូរសព្ទដៃនេះ គឺជាយន្តការថ្មីមួយទៀតដែលបំពេញបន្ថែមឲ្យយន្តការអនឡាញដែលមានស្រាប់របស់និយ័តករធានារ៉ាប់រងកម្ពុជា។ App នេះរៀបចំឡើងដើម្បីបង្កភាពងាយស្រួលដល់សាធារណជនក្នុងការដាក់បណ្ដឹងធានារ៉ាប់រងមកនិយ័តករ ដើម្បីស្វែងរកដំណោះស្រាយប្រកបដោយប្រសិទ្ធភាព និងបង្កើនទំនុកចិត្តរបស់អតិថិជន»។ លោក ប៊ូ ច័ន្ទភីរូ បន្ថែម។

បើតាមលោក ប៊ូ ច័ន្ទភីរូ ការប្ដឹងតាម App គឺលឿន ហើយប្រជាពលរដ្ឋមិនចាំបាច់ជិះពីខេត្តមកដាក់បណ្ដឹងដល់និយ័តករនៅភ្នំពេញទេ។ តាមរយៈការរៀបចំយន្តការថ្មីបន្ថែមនេះ លោកលើកទឹកចិត្តឲ្យប្រជាពលរដ្ឋ ជាពិសេសអតិថិជនដាក់បណ្ដឹងក្រុមហ៊ុន។ គោលដៅនៃការលើកទឹកចិត្តឲ្យប្ដឹងនេះ គឺដើម្បីបង្កើនគុណភាពសេវាវិជ្ជាជីវៈរបស់វិស័យធានារ៉ាប់រង។

លោកសង្កត់ធ្ងន់យ៉ាងដូច្នេះថា «ប្រសិនបើគ្មានបណ្ដឹង ឬមតិយោបល់ នោះមិនអាចបង្កើនគុណភាពឬកែតម្រូវសេវា និងប្រតិបត្តិការរបស់ក្រុមហ៊ុនធានារ៉ាប់រងបានទេ។ តាមរយៈយន្តការនេះ និយ័តករនឹងជួយដោះស្រាយបណ្ដឹងជូនអតិថិជនធានារ៉ាប់រង។ លោក ប៊ូ ច័ន្ទភីរូ បញ្ជាក់បន្ថែម។

បញ្ហាប្រឈមក្នុងវិស័យធានារ៉ាប់រងកម្ពុជា គឺកង្វះទំនុកចិត្តរបស់ប្រជាជនលើគុណភាពសេវា ដោយសារខ្វះយន្តការច្បាស់លាស់ និងគួរឲ្យទុកចិត្តបានសម្រាប់ប្រជាជនធ្វើបណ្ដឹងដើម្បីទទួលដំណោះស្រាយសមស្រប។

បើតាមនិយ័ករធានារ៉ាប់រងកម្ពុជា ចាប់តាំងពីឆ្នាំ ២០២២ មានការកើនឡើងនៃបណ្ដឹងតាមអនឡាញនៅលើគេហទំព័ររបស់និយតករ។

នៅឆ្នាំ ២០២៤ និយតករធានារ៉ាប់រងកម្ពុជាទទួលបណ្តឹងចំនួន ២២ បណ្តឹង ដែលចំនួននេះច្រើនជាងចំនួនបណ្ដឹងនៅក្នុងឆ្នាំ ២០២៣ ប្រមាណជាងបីដង។ នៅឆមាសទី ១ ឆ្នាំ ២០២៥ និយ័តករធានារ៉ាប់រងកម្ពុជាទទួលបានបណ្ដឹងតាមប្រព័ន្ធអនឡាញចំនួន ២២ បណ្ដឹង។

ការកើនឡើងបណ្តឹងពីអតិថិជនប្រើប្រាស់សេវាធានារ៉ាបរងបង្ហាញឲ្យឃើញថា សាធារណជនកាន់តែមានការយល់ដឹងស៊ីជម្រៅអំពីយន្តការនៃការបញ្ជូនបណ្ដឹងធានារ៉ាប់រងតាមប្រព័ន្ធអនឡាញរបស់និយតករធានារ៉ាប់រងកម្ពុជា។ នេះបើតាមលោក ប៊ូ ច័ន្ទភីរូ។

ពាក់ព័ន្ធស្ថានភាពវិស័យធានារ៉ាប់រងកម្ពុជា លោក ភី ច័ន្ទភីរូ បង្ហាញពីភាពរីកចម្រើន ខណៈការយល់ដឹងពីពលរដ្ឋក្នុងការប្រើប្រាស់សេវាធានារ៉ាប់រងកាន់តែកើនឡើងពីមួយឆ្នាំទៅមួយឆ្នាំ។

ត្រឹមដំណាច់ឆ្នាំ ២០២៥ ទំហំទីផ្សារធានារ៉ាប់រងកម្ពុជាត្រូវបានព្យាករថានឹងកើនឡើងដល់ប្រមាណ ៣៧៥ លានដុល្លារអាមេរិក នៃបុព្វលាភធានារ៉ាប់រងសរុប។

បច្ចុប្បន្ន ក្រុមហ៊ុនធានារ៉ាប់រងសរុបមានចំនួន ៣៥ ក្រុមហ៊ុន ដែលក្នុងនោះមានក្រុមហ៊ុនធានារ៉ាប់រងអាយុជីវិតចំនួន ១២, ក្រុមហ៊ុនធានារ៉ាប់រងទូទៅចំនួន ១៧, ក្រុមហ៊ុនធានារ៉ាប់រងខ្នាតតូចចំនួន ៥ និងក្រុមហ៊ុនធានារ៉ាប់រងបន្តចំនួន ១៕

The post និយ័តករធានារ៉ាប់រងកម្ពុជា លើកទឹកចិត្តពលរដ្ឋដាក់ពាក្យបណ្ដឹងធានារ៉ាប់រងតាមកម្មវិធីទូរសព្ទដៃ appeared first on Kampuchea Thmey Daily.

និយ័តករធានារ៉ាប់រងកម្ពុជា Archives - Kampuchea Thmey Daily

វិស័យធានារ៉ាប់រង រួម​ចំណែក​នៅក្នុងសេដ្ឋកិច្ចជាតិ​បាន​ត្រឹម​តែ​ជាង ១% ក្នុង​ឆ្នាំ ២០២៥

និយ័តករធានារ៉ាប់រងកម្ពុជា រៀបចំ “ទិវាធានារ៉ាប់រងកម្ពុជា ២០២៦” នៅខេត្តសៀមរាប រយៈពេល២ថ្ងៃ

ក្រុមហ៊ុន​ផ្តល់​សេវា​ធានារ៉ាប់រង​កើន​ពី​ជាង​ ៨០ ដល់ ១១២ ក្រុមហ៊ុនគិត​​ត្រឹម​ឆ្នាំ ២០២៥

អាជីវកម្ម​ចំនួន ៣ ជាប់​កាតព្វកិច្ច​ចាំបាច់​ត្រូវ​ទិញ​ធានារ៉ាប់រង​ការពារ​គ្រោះថ្នាក់

កម្ពុជា-ចិនចាប់ដៃគ្នាអភិវឌ្ឍន៍វិស័យមូលបត្រដើម្បីកៀរគរទុនពីវិស័យឯកជនជំរុញកំណើនសេដ្ឋកិច្ច

និយ័តករ​ធានារ៉ាប់រងកម្ពុជា​ លើកទឹកចិត្ត​ពលរដ្ឋ​ដាក់ពាក្យ​បណ្ដឹង​ធានារ៉ាប់រង​តាម​​កម្មវិធី​ទូរសព្ទ​ដៃ

វិស័យធានារ៉ាប់រង រួមចំណែកនៅក្នុងសេដ្ឋកិច្ចជាតិបានត្រឹមតែជាង ១% ក្នុងឆ្នាំ ២០២៥

ក្រុមហ៊ុនផ្តល់សេវាធានារ៉ាប់រងកើនពីជាង ៨០ ដល់ ១១២ ក្រុមហ៊ុនគិតត្រឹមឆ្នាំ ២០២៥

អាជីវកម្មចំនួន ៣ ជាប់កាតព្វកិច្ចចាំបាច់ត្រូវទិញធានារ៉ាប់រងការពារគ្រោះថ្នាក់

និយ័តករធានារ៉ាប់រងកម្ពុជា លើកទឹកចិត្តពលរដ្ឋដាក់ពាក្យបណ្ដឹងធានារ៉ាប់រងតាមកម្មវិធីទូរសព្ទដៃ