នីហ្សេរីយ៉ា Archives - Kampuchea Thmey Daily

ឧបទ្ទវហេតុក្រឡាប់ឡាននៅភាគខាងជើងនីហ្សេរីយ៉ា សម្លាប់មនុស្ស ៣០នាក់ និងរបួសច្រើននាក់

Minea Neu — Mon, 09 Feb 2026 10:35:33 +0000

អាជ្ញាធរនីហ្សេរីយ៉ាបានឱ្យដឹងកាលពីថ្ងៃអាទិត្យថា រថយន្តដឹកទំនិញដឹកអ្នកដំណើរមួយគ្រឿងក្រឡាប់ នៅភាគខាងជើងប្រទេសនៃប្រទេស សម្លាប់មនុស្សយ៉ាងហោចណាស់ ៣០ នាក់ និងមានអ្នករងរបួសផ្សេងទៀត ដោយសារតែបើកបរខ្វះការប្រុងប្រយ័ត្ន។

ឡានដឹកទំនិញ នៅប្រទេសនីហ្សេរីយ៉ា។ Reuters

យោងតាមភ្នាក់ងារ AP, ចុះផ្សាយថ្ងៃទី៨ ខែកុម្ភៈ ឱ្យដឹងថា រថយន្តបានបើកបរតាមបណ្តោយផ្លូវល្បឿនលឿនក្នុងទីប្រជុំជន Kwanar Barde ក្នុងតំបន់ Gezawa ក្រុង Kano នាំឱ្យបាត់បង់ការគ្រប់គ្រង។ នេះបើយោងតាមសេចក្តីថ្លែងការណ៍មួយពីការិយាល័យអភិបាលក្រុង Kano ។

គួរឱ្យដឹងថាប្រទេសនីហ្សេរីយ៉ា មានគ្រោះថ្នាក់ចរាចរណ៍កើតឡើងជាញឹកញាប់នៅក្នុងប្រទេស ច្រើនជាងគេនៅទ្វីបអាហ្រ្វិក ដោយសារតែស្ថានភាពផ្លូវមិនល្អ និងការអនុវត្តន៍ច្បាប់ចរាចរណ៍មានភាពយឺតយ៉ាវ។

យ៉ាងណា រថយន្តដឹកទំនិញដែលជាប់ពាក់ព័ន្ធក្នុងឧប្បត្តិហេតុចុងក្រោយនេះ បានដឹកអ្នកដំណើរ និងទំនិញមួយចំនួនឆ្ពោះទៅកាន់ទីប្រជុំជន Gujungu ក្នុងទីក្រុង Kano ពេលដែលធ្លាក់កាលពីព្រឹកថ្ងៃអាទិត្យ។

ចំណែកមនុស្សដែលរងរបួស ភាគច្រើនពួកគេមានរបួសធ្ងន់ធ្ងរ និងទទួលសេវាសុខភាពនៅក្នុងមន្ទីរពេទ្យផ្សេងៗគ្នា។ នេះបើយោងតាមសេចក្តីថ្លែងការណ៍ ដែលចេញដោយ លោក Sunusi Bature Dawakin Tofa អ្នកនាំពាក្យរបស់ពេទ្យក្នុងតំបន់ Kano Gov Abba Kabir Yusuf ។

ក្នុងសេចក្តីថ្លែងការណ៍បានបន្ថែមថា៖ « ឧបទ្ទវហេតុនេះថាជាការសោកស្តាយដ៏ធំមួយ ជាពិសេសជាការបាត់បង់ដែលមិនធ្លាប់កើតមាន មិនត្រឹមតែចំពោះគ្រួសារជនរងគ្រោះប៉ុណ្ណោះទេ ប៉ុន្តែចំពោះប្រជាជននៃរដ្ឋកាណូ (Kano) ទាំងមូល»។

មិនតែប៉ុណ្ណោះ គ្រោះថ្នាក់កាលពីថ្ងៃអាទិត្យ អភិបាលក្រុងបានអំពាវនាវដល់អាជ្ញាធរ មានប៉ូលិស និងប្រជាជន គួរប្រកាន់ខ្ជាប់នូវបទប្បញ្ញត្តិចរាចរណ៍ បើមិនដូច្នេះ គឺប្រឈមការដាក់ទណ្ឌកម្មយ៉ាងធ្ងន់ធ្ងរ ចំពោះជនណាល្មើសច្បាប់។

គួររំឭកថា កាលពីខែធ្នូ ម្ចាស់ជើងឯកទម្ងន់ធ្ងន់ជនជាតិអង់គ្លេស លោក Anthony Joshua បានរងរបួស និងសហការីផ្ទាល់ខ្លួនចំនួនពីរនាក់បានបាត់បង់ជីវិត ពេលអ្នកបើកបររបស់ពួកគេ បើកបុកឡានដឹកទំនិញដែលកំពុងឈប់នៅលើផ្លូវ Lagos-Ibadan Expressway ៕

ប្រែសម្រួល៖ ណឺ មិនា

The post ឧបទ្ទវហេតុក្រឡាប់ឡាននៅភាគខាងជើងនីហ្សេរីយ៉ា សម្លាប់មនុស្ស ៣០នាក់ និងរបួសច្រើននាក់ appeared first on Kampuchea Thmey Daily.

ការវាយប្រហារដ៏ខ្លាំងក្លាមួយ នៅនីហ្សេរីយ៉ា សម្លាប់មនុស្ស ១៦២នាក់

Minea Neu — Fri, 06 Feb 2026 10:56:56 +0000

ការវាយប្រហារដ៏ខ្លាំងក្លាមួយបានកើតឡើង កាលពីល្ងាចថ្ងៃអង្គារ លើភូមិ Woro ក្នុងរដ្ឋ Kwara បន្ទាប់ពីយោធានីហ្សេរីយ៉ា បានធ្វើប្រតិបត្តិការក្នុងតំបន់ប្រឆាំងនឹងភេរវករ។ ភេរវករ ដែលជាខ្មាន់កាំភ្លើងបានដុតហាង និងផ្ទះរបស់ពលរដ្អ្ន ចំណែក អ្នករងរបួសមួយចំនួនបានរត់ចូលព្រៃ។ នេះបើតាមរដ្ឋលេខាធិការកាកបាទក្រហមតំបន់ Kwara បានប្រាប់ភ្នាក់ងារ AFP។

លោក Bola Ahmed Tinubu ក្នុងសន្និសីទ្ធសារព័ត៌មានមួយ។ Reuters

ប្រធានាធិបតីនីហ្សេរីយ៉ា (Nigeria) លោក Bola Ahmed Tinubu បានដាក់ពង្រាយកម្លាំង ទៅប្រចាំការក្នុងរដ្ឋដែលមានការប្រយុទ្ធគ្នា បន្ទាប់ពីខ្មាន់កាំភ្លើងបានសម្លាប់មនុស្សដល់ទៅ១៦២នាក់ នៅក្នុងការវាយប្រហារដ៏សាហាវបំផុតមួយរបស់ប្រទេសខ្លួន ក្នុងរយៈពេលប៉ុន្មានខែថ្មីៗនេះ។

ចំណែក លោក Babaomo Ayodeji រដ្ឋលេខាធិការកាកបាទក្រហម បាននិយាយថា៖ «ចំនួនអ្នកស្លាប់ឥឡូវនេះមានចំនួន ១៦២ នាក់ ខណៈការស្វែងរកសាកសពបន្ថែម នៅតែបន្ត»។

គួរឱ្យដឹងថា ការវាយប្រហារនេះត្រូវបានរាយការណ៍ដោយប៉ូលិស តែមិនបានប្រាប់ពីតួលេខអ្នករងរបួសទាំងអស់នៅឡើយទេ។

នៅមុននេះ សមាជិកសភាក្នុងស្រុក លោក Sa’idu Baba Ahmed បានឱ្យដឹងថាចំនួនអ្នកស្លាប់ដំបូងរកឃើញ ៣៥ ទៅ ៤០ នាក់។

លោកបានបន្ថែមថា៖ « ចំនួនសាកសពនឹងត្រូវរកឃើញបន្ថែមទៀត ខណៈដែលអ្នករបួសជាច្រើននាក់បានរត់ចូលទៅក្នុងព្រៃ»។

ចំណែកអភិបាលរដ្ឋភាគខាងលិច និងកណ្តាល លោក AbdulRahman AbdulRazaq បានផ្តល់ព័ត៌មានថាមានចំនួនអ្នកស្លាប់ចំនួន ៧៥នាក់ ។

គួរឱ្យដឹងថា ករណីជម្លោះដែលកើតមានញឹកញាប់ គឺជាការវាយប្រហារនៅតំបន់ជនបទ។

យ៉ាងណាគ្មានក្រុមណាមួយទទួលខុសត្រូវទេលើរឿងនេះឡើយ ប៉ុន្តែរដ្ឋាភិបាលបានស្តីបន្ទោសលើពួកភេរវករ។

គួរឱ្យដឹងថា ផ្នែកខ្លះនៃប្រទេសនីហ្សេរីយ៉ាត្រូវបានញាំញីដោយក្រុមក្មេងទំនើងប្រដាប់អាវុធដែលលួចរបស់អ្នកភូមិ និងចាប់ជំរិតយកប្រាក់ ក៏ដូចជាអំពើហិង្សាដែលកើតឡើងក្នុងរដ្ឋ ជាពិសេសក្រុមជីហាដ ( jihadist) ដែលមានភាពសកម្មខ្លាំងនៅភាគខាងជើង។

សេចក្តីថ្លែងការណ៍មួយបាននិយាយថា៖ « ប្រធានាធិបតី លោក Tinubu បានសម្តែងការខឹងសម្បារ ដែលអ្នកវាយប្រហារបានសម្លាប់សមាជិកសហគមន៍។ ជាពិសេសបានបដិសេធការប៉ុនប៉ងដ៏គួរឱ្យស្អប់ខ្ពើម ដែលកើតឡើងក្នុងតំបន់នេះ»៕

ប្រែសម្រួល៖ ណឺ មិនា

The post ការវាយប្រហារដ៏ខ្លាំងក្លាមួយ នៅនីហ្សេរីយ៉ា សម្លាប់មនុស្ស ១៦២នាក់ appeared first on Kampuchea Thmey Daily.

ប្រទេសនីហ្សេរីយ៉ាបានសង្រ្គោះសិស្សចំនួន១៣០នាក់ បន្ទាប់ពីការចាប់ជំរិត

Minea Neu — Mon, 22 Dec 2025 10:11:47 +0000

អាជ្ញាធរនីហ្សេរីយ៉ា បាននិយាយថា ខ្លួនបានធានាឱ្យមានការដោះលែងសិស្សសាលាចំនួន១៣០នាក់ដែលត្រូវបានចាប់ជំរិត នៅសាលារៀនកាតូលិកមួយនៅរដ្ឋ Niger កណ្តាលប្រទេសនេះ។ រដ្ឋាភិបាលសហព័ន្ធរបស់ប្រទេសនីហ្សេរីយ៉ាបានរៀបរាប់នៅក្នុងការផ្សាយចុងក្រោយរបស់ខ្លួនថា៖ «ជាជ័យជំនះ និងការសង្គ្រោះដ៏អស្ចារ្យ» បន្ទាប់ពីមានការចាប់ជំរិតដ៏ច្រើនកើតឡើងក្នុងប្រទេសនេះ។

សិស្សសាលាកាតូលិក ប្រទេសនីហ្សេរីយ៉ា។ AP

យ៉ាងណាក្តីមានសិស្សនិងបុគ្គលិកបម្រើការងារជាង ២៥០នាក់ ត្រូវបានចាប់ខ្លួននៅលើផ្លូវម៉ារី ក្នុងសាលាកាតូលិក តំបន់ Papiri កាលពីថ្ងៃទី ២១ខែឆ្នូ ហើយក្នុងដើមខែនេះក្មេងៗប្រហែល១០០នាក់ ត្រូវបានដោះលែង។

នៅក្នុងសេចក្តីថ្លែងការណ៍មួយអាជ្ញាធរបានបញ្ជាក់ថា៖ «កុមារ និងបុគ្គលិកចំនួន១៣០នាក់ ការត្រូវបានជួយសង្គ្រោះ។ ហើយគ្មានសិស្សណាម្នាក់ត្រូវបានទុកឱ្យនៅជាប់ឃុំទេ» ។

អ្នកនាំពាក្យប្រធានាធិបតីលោក Bayo Onanuga បាននិយាយកាលពីថ្ងៃអាទិត្យថាសិស្សសរុបដែលត្រូវបានដោះលែងមានចំនួន ២៣០នាក់។

ចាប់តាំងពីមានការចាប់ជំរិតមក ចំនួនពិតប្រាកដនៃមនុស្សត្រូវបានគេចាប់យកទៅ និងអ្នកដែលជាប់ឃុំនៅមិនទាន់ដឹងច្បាស់នោះទេ។

ជាក់ស្តែងព័ត៌មាននេះមិនត្រូវបានគេផ្សព្វផ្សាយជាសាធារណៈពីរបៀបដែលរដ្ឋាភិបាលធ្វើការ ដើម្បីធានានូវការចេញផ្សាយចុងក្រោយនេះទេ ថាប៉ុន្មាននាក់ពិតជាបានសង្រ្គោះ និងប៉ុន្មាននាក់ទៀតមិនទាន់ដោះលែង។

ទោះជាយ៉ាងណាមិនមានភស្តុតាងច្បាស់លាស់ ថាអ្នកណានៅពីក្រោយការចាប់ជំរិតនេះទេ ចំណែកអ្នកវិភាគជាច្រើនជឿថាពួកគេត្រូវបានចាប់ដោយក្រុមឧក្រិដ្ឋជន ដើម្បីរកប្រាក់ពីបទឧក្រិដ្ឋមួយនេះ ដោយឱ្យឳពុកម្តាយបង់រំលោះ ករណីបើគ្មានប្រាក់គ្រប់គ្រាន់។

កាលពីថ្ងៃទី៩ ខែធ្នូ ប្រធានាធិបតីនីហ្សេរីយ៉ា លោក Bola Ahmed Tinubu បាននិយាយថា រដ្ឋាភិបាលរបស់លោកនឹងបន្តធ្វើការជាមួយប្រទេសនីហ្សេរីយ៉ា និងរដ្ឋផ្សេងទៀត៖ «ដើម្បីធានាឱ្យបាននូវសាលារៀនដែលមានសុវត្ថិភាព ធ្វើយ៉ាងណាឱ្យបរិយាកាសសិក្សាកាន់តែមានភាពងាយស្រួល និងអំណោយផលសម្រាប់ក្មេងៗរបស់យើង»។

គួរឱ្យដឹងផងដែរថានៅភាគខាងជើងប្រទេសនីហ្សេរីយ៉ា ចន្លោះខែមករា ឆ្នាំ២០២៣ ដល់ខែមីនា ឆ្នាំ២០២៤ យ៉ាងហោចណាស់មានការចាប់ជំរិតទ្រង់ទ្រាយធំចំនួនប្រាំផ្សេងគ្នា នៅក្នុងបរិវេណសាលា៕

អត្ថបទ៖ ណឺ មិនា

The post ប្រទេសនីហ្សេរីយ៉ាបានសង្រ្គោះសិស្សចំនួន១៣០នាក់ បន្ទាប់ពីការចាប់ជំរិត appeared first on Kampuchea Thmey Daily.

អាហ្វ្រិក ហាមម៉ូដែលស្បែកស មិនឱ្យផ្សាយពាណិជ្ជកម្មនៅក្នុងប្រទេស

Sonya — Sun, 28 Aug 2022 08:57:00 +0000

រដ្ឋាភិបាលរបស់ប្រទេសអាហ្រ្វិកបានប្រកាសក្នុងសប្តាហ៍នេះថា ការផ្សព្វផ្សាយពាណិជ្ជកម្មរបស់នីហ្សេរីយ៉ានឹងអនុញ្ញាតសម្រាប់តែតារាបង្ហាញម៉ូដ និងសិល្បករបញ្ចូលសំឡេងក្នុងស្រុកប៉ុណ្ណោះ។

ក្រុមប្រឹក្សានិយតកម្មការផ្សាយពាណិជ្ជកម្មនៃប្រទេសនីហ្សេរីយ៉ាធ្វើសេចក្ដីថ្លែងការណ៍ថា “រាល់ការផ្សាយពាណិជ្ជកម្មគ្រប់ប្រភេទមិនថា ការធ្វើទីផ្សារ ឬ PR គឺត្រូវប្រើតែជាតារាម៉ូដែលរបស់នីហ្សេរីយ៉ា និងជាអ្នកបញ្ជូលសំឡេងដែលនៅក្នុងប្រទេស”។

ការប្រកាសនេះធ្វើឡើងក្នុងគោលបំណង អភិវឌ្ឍទេពកោសល្យតារាក្នុងស្រុក ជួយជំរុញកំណើនសេដ្ឋកិច្ចក្នុងប្រទេស ក៏ដូចជាគាំទ្រដល់ឧស្សាហកម្មផ្សាយពាណិជ្ជកម្មក្នុងស្រុកផងដែរ៕

ប្រែសម្រួល៖ សន្យា

ប្រភព៖ RT

The post អាហ្វ្រិក ហាមម៉ូដែលស្បែកស មិនឱ្យផ្សាយពាណិជ្ជកម្មនៅក្នុងប្រទេស appeared first on Kampuchea Thmey Daily.

ទៅយកអំណោយ បែរជារត់ជាន់គ្នាស្លាប់ ជាង៣០នាក់ នៅ នីហ្សេរីយ៉ា

Sonya — Sat, 28 May 2022 13:50:00 +0000

មនុស្សជាង ៣០នាក់បានស្លាប់ និងច្រើននាក់ទៀតរងរបួស ក្នុងហេតុការណ៍រត់ជាន់គ្នា នៅព្រះវិហារ Kings Assembly ក្នុងទីក្រុង Port Harcourt ភាគអាគ្នេយ៍ប្រទេសនីហ្សេរីយ៉ា នៅថ្ងៃសៅរ៍ទី២៨ ខែឧសភានេះ។
អ្នកស្លាប់ភាគច្រើន ត្រូវបានគេបញ្ជាក់ថា ជាកុមារ។

យោងតាមលោក Olufemi Ayodele អ្នកនាំពាក្យកងការពារជនស៊ីវិលរបស់ប្រទេសនីហ្សេរីយ៉ា បានឲ្យដឹងថា ឧប្បត្តិហេតុនេះបានកើតឡើងនៅព្រះវិហារ ដែលរៀបចំការចែកអំណោយ។ លោកបន្តថា “ខណៈពេលចែកអំណោយនោះ មានការរត់ជាន់គ្នាដោយសារតែមានមនុស្សច្រើនហួស។ ជនរងគ្រោះភាគច្រើនជាកុមារ”។

លោកស្រី Woyengikuro Iringe-Koko អ្នកនាំពាក្យប៉ូលិសរដ្ឋបាននិយាយថា មនុស្សចំនួន ៣១ នាក់ត្រូវបានបញ្ជាក់ថា ស្លាប់។ អ្នករងរបួស ៧នាក់ត្រូវបានបញ្ជូនទៅមន្ទីរពេទ្យបន្ទាប់ពីហេតុការណ៍នោះ៕

ប្រែសម្រួល៖ សន្យា

ប្រភព៖ CNN

ចុចអាន៖ ប្រជាជាតិកោះប៉ាស៊ីហ្វិក ប្រកាសភាពអាសន្នអាកាសធាតុ

The post ទៅយកអំណោយ បែរជារត់ជាន់គ្នាស្លាប់ ជាង៣០នាក់ នៅ នីហ្សេរីយ៉ា appeared first on Kampuchea Thmey Daily.

ចេញពីវាយប្រហារប៉ុស្តិ៍យោធា ខ្មាន់កាំភ្លើងបន្តចាប់ជម្រិតក្មេងស្រីសិស្សសាលានីហ្សេរីយ៉ា ៣០០ នាក់

Sok Chivon — Fri, 26 Feb 2021 09:53:52 +0000

ប្រព័ន្ធផ្សព្វផ្សាយបានរាយការណ៍នៅថ្ងៃសុក្រនេះថា ក្រុមសកម្មប្រយុទ្ធបានចាប់ជម្រិតក្មេងស្រីសិស្សសាលាជាង ៣០០ នាក់នៅក្នុងរដ្ឋ Zamfara ភាគពាយព្យនៃប្រទេសនីហ្សេរីយ៉ា ។

យោងតាមកាសែត Punch បានឲ្យដឹងថា ខ្មាន់កាំភ្លើងបានតម្រង់គោលដៅទៅលើអនុវិទ្យាល័យមួយនៅក្នុងភូមិ Jangebe កាលពីយប់ថ្ងៃព្រហស្បតិ៍ ។ បុគ្គលិកសាលាបាននិយាយថា ក្រុមសកម្មប្រយុទ្ធបានមកដល់សាលារៀនតាមម៉ូតូ និងរថយន្តដឹកទំនិញភ្លាមៗនៅពាក់កណ្តាលអធ្រាត្រ ។

ប្រភពមួយបានប្រាប់កាសែតក្នុងលក្ខខណ្ឌអនាមិកថា “នៅពេលពួកគេចូលសាលា យើងគិតថា ពួកគេជាបុគ្គលិកសន្តិសុខ ប៉ុន្តែវាមិនមែនដូចអ្វីដែលគិតនោះនោះទេ បន្ទាប់មកពួកគេបានចាប់ផ្តើមដាក់ក្មេងស្រីទាំងនោះចូលទៅក្នុងរថយន្តប្រភេទ Hilux និងម៉ូតូ ហើយបានបើកចេញពីសាលារៀន” ។

ទន្ទឹមនឹងនេះដែរប្រព័ន្ធផ្សព្វផ្សាយរបស់នីហ្សេរីយ៉ា PM News បានរាយការណ៍ថា ខ្មាន់កាំភ្លើងក៏បានវាយប្រហារប៉ុស្តិ៍ត្រួតពិនិត្យយោធាមួយក្បែរនោះផងដែរ មុនពេលធ្វើដំណើរទៅសាលារៀន ខណៈទាហានជាច្រើនត្រូវបានគេរាយការណ៍ថាបានរងរបួស បន្ទាប់ពីការវាយប្រហាររបស់ពួកសកម្មប្រយុទ្ធ ។

ស្របពេលជាមួយគ្នានេះកាសែត PM News បានបន្ថែមថា ក្រុមអ្នកឃ្លាំមើលក្នុងស្រុកកំពុងស្វែងរកអ្នកចាប់ជម្រិតដើម្បីជួយសង្គ្រោះក្មេងស្រីទាំងនោះ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ រកឃើញក្រុមនៅពីក្រោយការចាប់ជម្រិតក្មេងសិស្សសាលានីហ្សេរីយ៉ាជាង ៣០០ នាក់

ចុចអាន ៖ បាតុករនីហ្សេរីយ៉ារាប់ម៉ឺននាក់សម្រុកចូលលួចស្បៀងអាហារទាំងបាវៗពីឃ្លាំងស្តុកដោយចោទថា រដ្ឋាភិបាលលាក់ទុក (មានវីដេអូ)

The post ចេញពីវាយប្រហារប៉ុស្តិ៍យោធា ខ្មាន់កាំភ្លើងបន្តចាប់ជម្រិតក្មេងស្រីសិស្សសាលានីហ្សេរីយ៉ា ៣០០ នាក់ appeared first on Kampuchea Thmey Daily.

ផ្ទុះជំងឺមួយនៅប្រទេសនីហ្សេរីយ៉ាសម្លាប់មនុស្ស ៨ នាក់

Sok Chivon — Tue, 10 Nov 2020 04:33:10 +0000

មន្រ្តីសុខាភិបាលក្នុងតំបន់បានបញ្ជាក់កាលពីល្ងាចថ្ងៃចន្ទថា ការផ្ទុះជំងឺគ្រុនលឿងបានសម្លាប់មនុស្ស ៨ នាក់នៅភាគឦសាននៃប្រទេសនីហ្សេរីយ៉ា ។

លោក Rilwanu Mohammed ប្រធានទីភ្នាក់ងារអភិវឌ្ឍន៍ថែទាំសុខភាពបឋមរបស់រដ្ឋ Bauchi បាននិយាយថា មនុស្ស ៨ នាក់ផ្សេងទៀតត្រូវបានបញ្ជូនទៅមន្ទីរពេទ្យ ខណៈដែលជំងឺនៅតែបន្តរាលដាលនៅក្នុងតំបន់ Ganjuwa នៃរដ្ឋ Bauchi ។

លោក Mohammed បានប្រាប់ក្រុមអ្នកយកព័ត៌មាននៅរដ្ឋ Bauchi ថា បុគ្គលិកសុខាភិបាលបានកត់ត្រាការស្លាប់ដោយជំងឺគ្រុនលឿងចំនួន ៨ នាក់នៅក្នុងតំបន់ Ganjuwa ។

ជំងឺនេះត្រូវបានរីករាលដាលភាគច្រើនដោយសារមូសមួយប្រភេទឈ្មោះ “Aedes Aepyti” ដែលត្រូវបានគេរកឃើញនៅតំបន់ត្រូពិក និងអនុតំបន់ត្រូពិក ។ ជំងឺនេះក៏ត្រូវបានគេរាយការណ៍ផងដែរថាអាចចម្លងដោយសត្វស្វាព្រៃ ។

ដើម្បីទប់ស្កាត់ការផ្ទុះនេះ មន្ត្រីសុខាភិបាលបាននិយាយថា ការធ្វើលំហាត់ប្រាណ ការចាក់វ៉ាក់សាំងគឺជាភាពចាំបាច់ផងដែរ ។ ជំងឺនេះអាចបង្ការបានដោយការចាក់វ៉ាក់សាំងជំងឺលឿងនេះតែមួយដូសប៉ុណ្ណោះដែលផ្តល់នូវភាពស៊ាំសម្រាប់ជីវិត ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

The post ផ្ទុះជំងឺមួយនៅប្រទេសនីហ្សេរីយ៉ាសម្លាប់មនុស្ស ៨ នាក់ appeared first on Kampuchea Thmey Daily.

បាតុករនីហ្សេរីយ៉ារាប់ម៉ឺននាក់សម្រុកចូលលួចស្បៀងអាហារទាំងបាវៗពីឃ្លាំងស្តុកដោយចោទថា រដ្ឋាភិបាលលាក់ទុក (មានវីដេអូ)

Sok Sovann — Wed, 28 Oct 2020 07:02:47 +0000

មនុស្សរាប់ម៉ឺននាក់ត្រូវបានគេឃើញចូលលុកលុយរើកកាយក្នុងឃ្លាំងស្តុកជំនួយស្បៀងអាហារមួយក្នុងប្រទេសនីហ្សេរីយ៉ាចំពេលមានភាពវឹកវរកាន់តែខ្លាំងឡើងនៅក្នុងប្រទេសអាហ្វ្រិកមួយនេះ។

ឃ្លាំងដែលមានទីតាំងនៅទីក្រុង Jos ត្រូវបានកំណត់គោលដៅកាលពីចុងសប្តាហ៍បន្ទាប់ពីក្រុមបាតុករខឹងសម្បាបានចោទប្រកាន់រដ្ឋាភិបាលថាបានលាក់ជំនួយស្បៀងអាហារពីពួកគេ។

វីដេអូបង្ហាញថា មនុស្សម្នានាំគ្នាឡើងដំបូលឃ្លាំងដោយរុះរើដំបូលហើយបន្ទាប់មកបោះបាវច្រកស្បៀងអាហារទៅឲ្យហ្វូងមនុស្ស។

ឃ្លាំងនៅទីក្រុង Jos គឺជាឃ្លាំងមួយក្នុងចំណោមឃ្លាំងស្រដៀងគ្នាដែលត្រូវរងគ្រោះខណៈស្ទើរតែមួយភាគបីនៃរដ្ឋទាំង៣៦របស់ប្រទេសនេះបានរាយការណ៍អំពីការវាយឆ្មក់លើជំនួយស្បៀងអាហារ។

ក្រុមរដ្ឋមន្រ្តីបាននិយាយថា ស្បៀងអាហារនេះមានគោលបំណងជួយដល់អ្នកដែលរងគ្រោះដោយការបិទប្រទេសការពារវីរុសកូរ៉ូណាហើយវាកំពុងស្ថិតក្នុងដំណើរការចែកចាយ។

ប៉ុន្តែចំពេលមានការតវ៉ាប្រឆាំងនឹងរដ្ឋាភិបាលយ៉ាងខ្លាំងក្លាហើយបន្ទាប់ពីសកម្មជនសន្តិភាពត្រូវបានបាញ់សម្លាប់ ប្រជាជនមិនអាចទិញអាហារបានទេ។

មនុស្សម្នាក់នៅឃ្លាំងស្បៀងអាហារ Jos បានប្រាប់គេហទំព័រ France24 ថា “តើយើងអាចមានរដ្ឋាភិបាលអាក្រក់បែបនេះយ៉ាងដូចម្តេចទៅ ពលរដ្ឋរបស់ពួកគេកំពុងស្លាប់ដោយអត់អាហារហើយតើពួកគេបានលាក់សម្ភារៈជំនួយទាំងនោះពីពលរដ្ឋយ៉ាងដូចម្តេចទៅ?”។

មានភាពអត់ឃ្លានពីព្រោះមានអតិផរណាខ្ពស់នៃតម្លៃស្បៀងអាហារនៅលើទីផ្សារហើយមិនមែនគ្រប់គ្នាសុទ្ធតែអាចទិញបានទេដោយសារកង្វះការងារនិងប្រាក់ឈ្នួលនិងប្រាក់ខែទាប។

យោងតាមរដ្ឋាភិបាលនីហ្សេរីយ៉ាបានឲ្យដឹងថា ជាងពាក់កណ្តាលនៃប្រជាជនរបស់ប្រទេសនេះត្រូវបានបង្ខំឲ្យទទួលយកប្រាក់កម្ចីដើម្បីបង់ថ្លៃអាហារអំឡុងពេលបិទប្រទេសកាលពីដើមឆ្នាំនេះ៕

ប្រែសម្រួលដោយ៖ Vann Vann

ប្រភព៖ Daily Mail

The post បាតុករនីហ្សេរីយ៉ារាប់ម៉ឺននាក់សម្រុកចូលលួចស្បៀងអាហារទាំងបាវៗពីឃ្លាំងស្តុកដោយចោទថា រដ្ឋាភិបាលលាក់ទុក (មានវីដេអូ) appeared first on Kampuchea Thmey Daily.