បញ្ញាសិប្បនិម្មិត (AI) Archives - Kampuchea Thmey Daily

អាមេរិកប្រើកម្មវិធី AI មួយជាជំនួយ ក្នុងការចាប់ខ្លួនលោកម៉ាឌូរ៉ូ

Minea Neu — Sat, 14 Feb 2026 03:59:46 +0000

យោធាអាមេរិកបានប្រើប្រាស់កម្មវិធី Claude AI របស់ក្រុមហ៊ុន Anthropic ដែលមានបច្ចេកវិទ្យាដ៏គ្រោះថ្នាក់ និងប្រសិទ្ធភាពខ្ពស់បំផុតក្នុងការវាយឆ្មក់ អំឡុងពេលប្រតិបត្តិការចាប់ខ្លួនប្រធានាធិបតីវ៉េណេស៊ុយអេឡា លោក នីកូឡាស ម៉ាឌូរ៉ូ (Nicolas Maduro) កាលពីខែមុន។ នេះបើយោងតាមគេហទំព័ររបស់ Axios និង The Wall Street Journal បង្ហាញពីបច្ចេកវិទ្យារបស់ក្រុមហ៊ុន ផ្តោតលើសុវត្ថិភាព និងដើរតួនាទីដោយផ្ទាល់ក្នុងការវាយឆ្មក់នៅក្រៅប្រទេសដ៏មានប្រសិទ្ធភាព។

លោក Pete Hegseth និងលោក ត្រាំ។ White House

យោងតាមការចុះផ្សាយ RT ថ្ងៃទី១៤ ខែកុម្ភៈ ឱ្យដឹងថា កម្មវិធី Claude ត្រូវបានប្រើប្រាស់អំឡុងពេលប្រតិបត្តិការយ៉ាងសកម្មដោយផ្ទាល់ មិនមែនគ្រាន់តែក្នុងដំណាក់កាលត្រៀមខ្លួននោះទេ។ នេះបើតាមរាយការណ៍ Axios និង WSJ រាយការណ៍កាលពីថ្ងៃសុក្រ។

តួនាទីដ៏វៃឆ្លាតរបស់វា នៅតែមិនច្បាស់លាស់ ទោះបីជាយោធាធ្លាប់ប្រើគំរូ AI នេះ ដើម្បីវិភាគរូបភាពផ្កាយរណប និងស៊ើបការណ៍សម្ងាត់ក្នុងពេលវេលាជាក់លាក់ណាមួយក៏ដោយ។

គួរបញ្ជាក់ថា គោលការណ៍នៃការប្រើប្រាស់មន្ទីរពិសោធន៍ AI ប្រភេទនេះ គឺមានមូលដ្ឋាននៅ San Francisco ហើយហាមឃាត់ដាច់ខាតនូវបច្ចេកវិទ្យារបស់ខ្លួនក្នុងការប្រើប្រាស់ដើម្បីក្នុងផ្លូវអវិជ្ជមាន ដូចជា អំពើហិង្សា បង្កើតអាវុធ ឬធ្វើការឃ្លាំមើលនានា។

យ៉ាងណា គ្មានប្រជាជនអាមេរិកណាម្នាក់បាត់បង់ជីវិតក្នុងការវាយឆ្មក់នេះទេ ប៉ុន្តែទាហាននិងកងកម្លាំងគុយបារាប់សិបនាក់ត្រូវបានសម្លាប់នៅថ្ងៃទី៣ ខែមករា។

អ្នកនាំពាក្យរបស់ក្រុមហ៊ុន Anthropic បានប្រាប់គេហទំព័រ Axios ថា៖ «យើងមិនអាចធ្វើអត្ថាធិប្បាយលើកម្មវិធី Claude ឬគំរូ AI ផ្សេងទៀត ដែលប្រើប្រាស់សម្រាប់ប្រតិបត្តិការជាក់លាក់ណាមួយ ការចាត់ថ្នាក់ ឬក៏មធ្យោបាយអ្វីផ្សេងទៀតនោះទេ»។ ការប្រើប្រាស់លើផ្នែកណាមួយនៃ កម្មវិធី Claude មិនថាក្នុងវិស័យឯកជនឬរដ្ឋាភិបាល គឺតម្រូវឱ្យគោរពតាមគោលការណ៍ប្រើប្រាស់របស់យើង»។

គូប្រជែងរបស់ Anthropic គឺក្រុមហ៊ុន OpenAI, Google, និង xAI របស់ Elon Musk សុទ្ធតែមានកិច្ចព្រមព្រៀងផ្តល់សិទ្ធិឱ្យមន្ទីរបញ្ចកោណ(Pentagon) ចូលទៅកាន់កម្មវិធីរបស់ពួកគេដោយពុំមានភាពស្មុគស្មាញ និងមិនមាន ការការពារច្រើន ចំពោះអ្នកប្រើប្រាស់នោះទេ។ មានតែកម្មវិធី Claude ប៉ុណ្ណោះដែលត្រូវបានបំពាក់ដោយបច្ចេកវិទ្យា Palantir Technologies ចាត់ថ្នាក់ជាកម្មវិធីដែលប្រើសម្រាប់ការងាររសើបបំផុត របស់យោធាអាមេរិក។

ទន្ទឹមនឹងនេះក្រុមហ៊ុន Anthropic ត្រូវបានរាយការណ៍ថាកំពុងចរចាជាមួយមន្ទីរបញ្ចកោណ ថាតើត្រូវបន្ធូរបន្ថយការរឹតបន្តឹងលើការដាក់ពង្រាយកម្មវិធី AI សម្រាប់កំណត់គោលដៅជាអាវុធ និងការឃ្លាំមើលក្នុងស្រុក។

យ៉ាងណា ការប្រឈមមុខដាក់គ្នានេះ បានបញ្ឈប់កិច្ចសន្យាដែលមានតម្លៃរហូតដល់ ២០០ លានដុល្លារ ដោយរដ្ឋមន្ត្រីការពារជាតិ លោក Pete Hegseth ប្តេជ្ញាថានឹងមិនប្រើគំរូណា ដែលអនុញ្ញាតធ្វើឱ្យសង្គ្រាមនោះទេ៕

ប្រែសម្រួល៖ ណឺ មិនា

The post អាមេរិកប្រើកម្មវិធី AI មួយជាជំនួយ ក្នុងការចាប់ខ្លួនលោកម៉ាឌូរ៉ូ appeared first on Kampuchea Thmey Daily.

សារព័ត៌មានថៃ យករូបកែដោយ Ai ទៅផ្សាយបោកប្រាស់ពលរដ្ឋខ្លួននិងពិភពលោក

Sok Sovann — Sat, 15 Nov 2025 02:21:51 +0000

មិនមែនជារឿងថ្មីឡើយ ដែលសារព័ត៌មានថៃ ខិតខំផ្សាយព័ត៌មានក្លែងក្លាយបោកប្រាស់ពលរដ្ឋខ្លួននិងពិភពលោក ក្នុងពេលមានភាពតានតឹងព្រំដែនជាមួយកម្ពុជា។

ជាក់ស្តែង រឿងរ៉ាវកើតឡើងថ្មីបំផុត គឺសារព័ត៌មានថៃមួយ បានយករូបភាពអ្នករបួសកម្ពុជាដែលកំពុងសម្រាកព្យាបាលនៅមន្ទីរពេទ្យមិត្តភាពកម្ពុជា-ជប៉ុនមង្គលបុរី ហើយរូបនោះកែដោយ Ai ទៅផ្សាយបោកប្រាស់ពិភពលោកជាថ្មី។

ក្នុងសារព័ត៌មានថៃនោះ បានសរសេរចំណងជើងថា ទាហានកម្ពុជា ដែលថាមានរបួសធ្ងន់បែរជាសើចក្នុងបន្ទប់ ICU ទៅវិញ។ លើសពីនេះ ក្នុងខ្លឹមសារអត្ថបទដែលចេញផ្សាយកាលពីថ្ងៃព្រហស្បតិ៍ទី១៣ខែវិច្ឆិកាឆ្នាំ២០២៥នោះ សារព័ត៌មានដដែល បានដកស្រង់ប្រភពពីទំព័រ Facebook របស់កងទ័ពថៃ ដោយដាក់ការចោទប្រកាន់កម្ពុជាថា ភូតកុហកនិងសម្តែងល្ខោន។

ជុំវិញបញ្ហានេះដែរ រដ្ឋមន្ត្រីក្រសួងព័ត៌មានកម្ពុជា ផ្ដល់មេរៀនដល់អ្នកនាំពាក្យយោធាថៃឲ្យមានវិជ្ជាជីវៈ និងការទទួលខុសត្រូវ ពោលគឺត្រូវផ្ទៀងផ្ទាត់ព័ត៌មានមុនពេលនិយាយ។

សូមជម្រាបថា តាំងពីភាពតានតឹងផ្ទុះឡើងកាលពីខែកក្កដាមក មន្ត្រីថៃតែលាបពណ៌កម្ពុជា ជាពិសេសសារព័ត៌មានថៃ ដែលក្បត់វិជ្ជាជីវៈសុខចិត្តផ្សាយព័ត៌មានក្លែងក្លាយដើម្បីបម្រើមហិច្ឆតាស្រេកឃ្លានសង្គ្រាមរបស់ថ្នាក់ដឹកនាំរបស់ខ្លួន៕

អត្ថបទ៖ សុខ សុវណ្ណ

ចុចអាន៖ ថៃ ប្រកាសអាសន្ននៅខេត្ត Singburi ដោយសារបាក់ទំនប់

The post សារព័ត៌មានថៃ យករូបកែដោយ Ai ទៅផ្សាយបោកប្រាស់ពលរដ្ឋខ្លួននិងពិភពលោក appeared first on Kampuchea Thmey Daily.

របាយការណ៍៖ AI ធ្វើឱ្យសញ្ញាបត្រមហាវិទ្យាល័យ «ហួសសម័យ»

Huon Dina — Wed, 11 Jun 2025 09:37:00 +0000

តម្រូវការសញ្ញាបត្រផ្លូវការសម្រាប់ការរកការងារធ្វើ កំពុងធ្លាក់ចុះនៅគ្រប់មុខជំនាញការងារទាំងអស់ ដោយសារតែការរីកចម្រើនយ៉ាងលឿននៃបច្ចេកវិទ្យាបញ្ញាសិប្បនិម្មិត (AI)។ នេះបើតាមការចុះផ្សាយរបស់បណ្ដាញទូរទស្សន៍ CNBC ដោយស្រង់របាយការណ៍ «2025 AI Jobs Barometer» របស់ក្រុមហ៊ុនសេវាកម្មវិជ្ជាជីវៈ PwC ដែលចេញផ្សាយកាលពីសប្តាហ៍មុន។

របាយការណ៍ ដែលបានវិភាគការផ្សាយពាណិជ្ជកម្មការងារជិត ១ ពាន់លាន និងរបាយការណ៍ហិរញ្ញវត្ថុរបស់ក្រុមហ៊ុនរាប់ពាន់នៅទូទាំងទ្វីបចំនួន ៦ បាននិយាយថា៖ «AI ជួយមនុស្សកសាងចំណេះជំនាញយ៉ាងឆាប់រហ័ស ដែលអាចឱ្យតម្រូវការលក្ខណៈសម្បត្តិផ្លូវការលែងសូវសំខាន់»។

របាយការណ៍បានបន្ថែមថា AI ក៏បង្កើតការផ្លាស់ប្តូរយ៉ាងឆាប់រហ័សនៅក្នុងជំនាញ និងចំណេះដឹងដែលកម្មករត្រូវការដើម្បីជោគជ័យ ដែលអាចមានន័យថា សញ្ញាបត្រផ្លូវការក្លាយជា «ហួសសម័យ» កាន់តែលឿនជាងមុន។

របាយការណ៍ដដែលបាននិយាយយ៉ាងដូច្នេះថា៖ «សម្រាប់កម្មករ ការផ្តោតលើជំនាញច្រើនជាងសញ្ញាបត្រ អាចពង្រីកឱកាស ជាពិសេសសម្រាប់អ្នកដែលគ្មានមធ្យោបាយដើម្បីទទួលបានលក្ខណៈសម្បត្តិ។ ក្នុងវិស័យដែលរងផលប៉ះពាល់ដោយ AI អ្វីដែលសំខាន់បំផុតគឺអ្វីដែលមនុស្សអាចធ្វើបាននៅពេលនេះ មិនមែនអ្វីដែលពួកគេបានសិក្សាកាលពីអតីតកាលនោះទេ»។

ប្រធាន PwC សម្រាប់កិច្ចការ AI សកល លោក Joe Atkinson បានប្រាប់ CNBC ថា សព្វថ្ងៃនេះ ការអប់រំមិនត្រូវបានកំណត់ដោយស្ថាប័នផ្លូវការ ឬសាកលវិទ្យាល័យទៀតទេ ដោយមនុស្សអាចរៀនដោយប្រើឧបករណ៍ AI និង LLMs (គំរូភាសាធំ) ដើម្បីសម្របខ្លួន និងការពារអនាគតអាជីពរបស់ខ្លួន ក្នុងទិដ្ឋភាពការងារ ដែលមានការផ្លាស់ប្តូរយ៉ាងឆាប់រហ័ស។ លោកបានស្នើឱ្យមនុស្សបង្កើនជំនាញលើ AI នៅផ្ទះខ្លួនឯង។

លោកបានបន្តថា៖ «អ្វីដែលសំខាន់បំផុតនោះគឺថា ជំនាញ AI គឺជាជំនាញអនុវត្តជាក់ស្តែង។ វាជាជំនាញអនុវត្ត អ្នកត្រូវតែប្រើបច្ចេកវិទ្យា។ ការយកចិត្តទុកដាក់លើការរៀនដោយខ្លួនឯងក្នុងសម័យនេះ កាន់តែសំខាន់។ ប្រសិនបើអ្នកមិនអាចធ្វើវាបានទេ អ្នកនឹងដើរក្រោយគេ»៕

The post របាយការណ៍៖ AI ធ្វើឱ្យសញ្ញាបត្រមហាវិទ្យាល័យ «ហួសសម័យ» appeared first on Kampuchea Thmey Daily.

សម្ដេចធិបតី៖ការពឹងលើបញ្ញាសិប្បនិម្មិត AI ពេក អាចធ្វើឱ្យមនុស្សលែងចេះអាន សរសេរ សង្ខេប ខ្សោយការគិត

Ngoeul Narath — Wed, 21 May 2025 04:01:01 +0000

សម្ដេច ហ៊ុន ម៉ាណែត នាយករដ្ឋមន្ត្រី ព្រួយបារម្ភថា ការពឹងផ្អែកទៅលើបញ្ញាសិប្បនិម្មិតឬ AI ទាំងស្រុងពេក អាចនឹងធ្វើឱ្យមនុស្សលែងចេះអាន លែងចេះសរសេរ សង្ខេប ខ្សោយការគិត ដែលជាបញ្ហាប្រឈមធ្ងន់ធ្ងរមួយទៅថ្ងៃអនាគត។ សម្ដេចធិបតី ថ្លែងដូច្នេះ ក្នុងពិធីសម្ពោធសមិទ្ធិផលកំណែទម្រង់វិទ្យាស្ថានជាតិអប់រំ និងប្រគល់សញ្ញាបត្រជូននិស្សិត និងគរុនិស្សិត នៃវិទ្យាស្ថានជាតិអប់រំ នាព្រឹកថ្ងៃទី២១ ខែឧសភា នេះ។

នៅចំពោះមុខនិស្សិត និងគរុនិស្សិត សម្ដេចនាយករដ្ឋមន្ត្រី បង្ហាញក្ដីព្រួយបារម្ភដូច្នេះ៖«ខ្ញុំឃើញគេផ្សាយ នៅតាមទូរទស្សន៍ គេថាប្រជុំម្ដងៗមិនបាច់កត់ត្រាទេឥឡូវ ថតតែសំឡេងទៅ អាហ្នឹង( AI) វាកូពី(បម្លែងចេញជាអក្សរ)ឱ្យយើងហើយ វាសង្ខេបឱ្យយើងទៀត។ យូរៗទៅមនុស្សលែងចេះអាន។ អត់ទេមែន! និយាយឱ្យច្បាស់ អាល័យតែប្រើឧបករណ៍ច្រើនពេក ថ្ងៃណាមួយឧបករណ៍(សិប្បនិម្មិត្តឬ AI )ខូច (យើង)លែងចេះសរសេរ Summary (សង្ខេប) ព្រោះការគិត ការសរសេរ ការសង្ខេប វាជួយឱ្យយើងគិត តែបើយើងពឹងទៅលើរបស់ក្រៅខ្លួន(AI) ហើយ គឺមានបញ្ហា»។

ត្រង់ចំណុចនេះ សម្ដេចប្រមុខរាជរដ្ឋាភិបាលកម្ពុជា គូសបញ្ជាក់ថា ទោះបីជាប់រាប់ពាន់ឆ្នាំទៅមុន បច្ចេកវិទ្យារីកចម្រើនជឿនលឿនខ្លាំងយ៉ាងណាក៏ដោយ ក៏ការសិក្សាស្រាវជ្រាវ នៅតែមិនអាចកាត់ផ្ដាច់ ឬឃ្លាតចេញពីការកត់ត្រា ការអាន ការសង្ខេបបានឡើយ ព្រោះកត្តាទាំងនេះ នឹងនាំឱ្យមនុស្សចេះគិតគ្រប់ជ្រុងជ្រោយ និងស៊ីជម្រៅ មានសមត្ថភាពគ្រប់គ្រាន់ អាចបំពេញការងារ ឬឆ្លើយសំណួរ ដោះស្រាយបញ្ហាបានភ្លាម ដោយខ្លួនឯង បើទោះបីជាគ្មាន ឬបញ្ញាសិប្បនិម្មិតគាំង ខូចខាតរយៈពេលខ្លីក៏ដោយ។

ជុំវិញបញ្ហានេះដែរ សម្ដេចធិបតី ហ៊ុន ម៉ាណែត ប្រាប់ទៅគ្រូបង្រៀនទាំងអស់ ត្រូវតែបង្រៀនកុមារឱ្យចេះគិតលេខដោយប្រើខួរក្បាលសិន មុននឹងបង្រៀនពួកគេប្រើប្រាស់ឧបករណ៍គិតលេខតាមក្រោយ ដើម្បីឱ្យកុមារមានសមត្ថភាពគណនា ដោយសមត្ថភាពខួរក្បាល ក្នុងពេលគ្មានឧបករណ៍គិតលេខ ឬឧបករណ៍នោះខូច។

ជាមួយគ្នា សម្ដេចធិបតី អតីតនិស្សិតយោធារៀននៅអាមេរិក ក៏បានរម្លឹកពីគុណវិបត្តិនៃបច្ចេកវិទ្យា GPS ផងដែរ។ សម្ដេចឱ្យដឹងថា ក្នុងពេលសិក្សា នៅបណ្ឌិត្យសភាយោធាអាមេរិក មានថ្ងៃមួយត្រូវចុះអនុវត្តសមយុទ្ធ សម្ដេចត្រូវប្រើប្រាស់ បច្ចេកវិទ្យា GPS និងផែនទី។ កាលនោះសម្ដេចប្រើ GPS ចាស់ ដែលមិនធ្វើបច្ចុប្បន្នភាព ជាហេតុនាំឱ្យសម្ដេចវង្វេងនៅក្នុងព្រៃច្រើនម៉ោង។ សម្ដេច ក៏លើកករណីទាហានអាមេរិក ប្រើបច្ចេកវិទ្យា GPS ប៉ុន្តែចំពេល GPS មានបញ្ហា ទាហានអាមេរិក ត្រូវទាហានអ៊ីរ៉ាក់ចាប់បាន និងសម្លាប់ចោល ដែលនេះជាគុណវិបត្តិនៃបច្ចេកវិទ្យា ជាបញ្ហា ដែលទាមឱ្យមនុស្សគ្រប់រូប ជៀសវាងការពឹងផ្អែកលើបច្ចេកវិទ្យាទាំងស្រុងពេក ដោយត្រូវមានចំណេះដឹងមូលដ្ឋានរឹងមាំជាមុនសិន។

សម្ដេចធិបតី ហ៊ុន ម៉ាណែត បន្តប្រាប់អ្នកសិក្សា ក្នុងន័យដើមដូច្នេះ៖« បើយើងជាអ្នកសិក្សាទោះបីបច្ចេកវិទ្យាទៅដល់ណាក៏ដោយ កុំភ្លេច ការអាន ការសរសេរ ការស្រាវជ្រាវ និងការចងក្រងទុក ព្រោះមានតែអាហ្នឹងទេ ដែលអាចឱ្យយើងមានចំណេះនៅក្នុងខ្លួនពិតប្រាកដ មិនអាចពឹងទៅលើរបស់នៅក្នុងហោប៉ៅយើង ដែលទាញមកធ្វើឱ្យយើងនោះទេ។ វាជាជំនួយការល្អហើយ ប៉ុន្តែវាអត់អាចបំពេញនូវអ្វីដែលអាចយើងដោះស្រាយពេលដែលយើងមានសភាពការណ៍នោះទេ »។

បន្ថែមពីនេះ សម្ដេចធិបតី ប្រាប់ទៅគ្រូបង្រៀនថា ធ្វើគ្រូបង្រៀនទាល់តែមានចំណេះ លើមេរៀននិមួយៗ ១១០% ហើយការបង្រៀនសិស្ស គឺមិនអាចពឹងលើបញ្ញាសិប្បនិម្មិត AI Chat GPT ឬកម្មវិធីថ្មី ឱ្យជួយបង្រៀនជំនួស ១០០%បានឡើយ ជៀសវាងសិស្សសួរមេរៀនហើយ គ្រូមិនអាចឆ្លើយសំណួរសិស្សឱ្យគ្រប់ជ្រុងជ្រោយ៕

ដោយ៖ ង៉ិល ណារ៉ាត់

The post សម្ដេចធិបតី៖ការពឹងលើបញ្ញាសិប្បនិម្មិត AI ពេក អាចធ្វើឱ្យមនុស្សលែងចេះអាន សរសេរ សង្ខេប ខ្សោយការគិត appeared first on Kampuchea Thmey Daily.

ក្រុមហ៊ុន Apple នឹងបញ្ចូល AI របស់ Alibaba ក្នុង iPhone លក់នៅចិន

Huon Dina — Thu, 13 Feb 2025 09:02:00 +0000

ប្រធានក្រុមហ៊ុនបច្ចេកវិទ្យាពហុជាតិចិន Alibaba Group លោក Joe Tsai បានបញ្ជាក់នៅថ្ងៃព្រហស្បតិ៍នេះថា ក្រុមហ៊ុនកំពុងចាប់ដៃគូជាមួយក្រុមហ៊ុនបច្ចេកវិទ្យាយក្សអាមេរិក Apple ដើម្បីដាក់បញ្ចូលបច្ចេកវិទ្យាបញ្ញាសិប្បនិម្មិត (AI) របស់ Alibaba ទៅក្នុងទូរស័ព្ទ iPhones ដែលលក់ក្នុងប្រទេសចិន។ នេះបើតាមការចុះផ្សាយរបស់បណ្ដាញទូរទស្សន៍ CNBC។

លោក Tsai បានឱ្យដឹងការណ៍នេះ នៅឯកិច្ចប្រជុំកំពូលរដ្ឋាភិបាលពិភពលោកនៅទីក្រុងឌូបៃ ដោយនិយាយយ៉ាងដូច្នេះថា៖ «[Apple] បានពិភាក្សាជាមួយក្រុមហ៊ុនមួយចំនួនក្នុងប្រទេសចិន ហើយនៅទីបំផុត ពួកគេបានជ្រើសរើសធ្វើអាជីវកម្មជាមួយយើង។ ពួកគេចង់ប្រើ AI របស់យើង ដើម្បីដំណើរការទូរស័ព្ទរបស់ពួកគេ»។

ការប្រកាសនេះ អាចផ្តល់នូវភាពច្បាស់លាស់លើយុទ្ធសាស្ត្រ AI របស់ Apple ក្នុងប្រទេសចិន ដោយជួយក្រុមហ៊ុនឱ្យកាន់តែប្រសើរឡើងក្នុងការទប់ទល់នឹងកំណើននៃការប្រកួតប្រជែង ចំពេលដែលចំណែកទីផ្សារលក់ iPhone បានធ្លាក់ចុះនៅចិន ដែលជាទីផ្សារស្មាតហ្វូនធំបំផុតរបស់ពិភពលោក។

ខណៈគូប្រកួតប្រជែងដូចជាក្រុមហ៊ុនចិន Huawei បានដាក់មុខងារពិសេស AI នៅលើទូរស័ព្ទរបស់ខ្លួនតាំងពីឆ្នាំមុន ក្រុមហ៊ុន Apple បានរក្សាភាពស្ងៀមស្ងាត់អំពីការបើកដំណើរការ «Apple Intelligence» របស់ខ្លួន បើទោះបីជាមានគម្រោងបញ្ចេញមុខងារនៅសហរដ្ឋអាមេរិកឆ្នាំនេះក៏ដោយ។

កន្លងមក អ្នកវិភាគបានប្រាប់ស្ថានីយទូរទស្សន៍ CNBC ថា ការដាក់ឱ្យដំណើរការ AI របស់ Apple នៅចិន ទំនងជាបានជាប់គាំង ដោយសារតែច្បាប់តឹងរ៉ឹងរបស់ប្រទេសនេះ លើបច្ចេកវិទ្យា។ ចិនបានអនុម័តបទប្បញ្ញត្តិផ្សេងៗលើ AI ក្នុងរយៈពេលប៉ុន្មានឆ្នាំចុងក្រោយនេះ ជាមួយនឹងច្បាប់មួយចំនួនដែលតម្រូវឱ្យមានគំរូភាសាធំៗ ដើម្បីទទួលបានការយល់ព្រមសម្រាប់ការប្រើប្រាស់ពាណិជ្ជកម្ម។ អ្នកផ្តល់សេវា « AI បង្កើត» ក៏ត្រូវទទួលខុសត្រូវចំពោះការដកខ្លឹមសារ «ខុសច្បាប់» ផងដែរ។

ទោះជាយ៉ាងណាក៏ដោយ លោក Tsai បាននិយាយនៅថ្ងៃព្រហស្បតិ៍ថា ភាពជាដៃគូរបស់ Alibaba នឹងជួយឱ្យ Apple សម្របទៅនឹងបរិយាកាសបទប្បញ្ញត្តិ និងធ្វើមូលដ្ឋានូបនីយកម្ម AI របស់ខ្លួន នៅចិន៕

The post ក្រុមហ៊ុន Apple នឹងបញ្ចូល AI របស់ Alibaba ក្នុង iPhone លក់នៅចិន appeared first on Kampuchea Thmey Daily.

ក្រសួងប្រៃសណីយ៍ ប្រាប់វិធីសាស្រ្តការពារខ្លួនពីឧបាយកលឆបោកដោយការប្រើប្រាស់ AI

Thoeun Vansong — Tue, 04 Feb 2025 07:07:27 +0000

ខណៈក្រុមឆបោកបានប្រើបច្ចេកវិទ្យាបញ្ញាសិប្បនិម្មិត (AI) ក្នុងការបោកប្រាស់កាន់តែមានច្រើន ក្រសួងប្រៃសណីយ៍ និងទូរគមនាគមន៍ បានរម្លឹកពលរដ្ឋឱ្យបង្កើនការប្រុងប្រយ័ត្ន ហើយក្រសួង ក៏ប្រាប់វិធីសាស្រ្តការពារខ្លួនពីឧបាយកលឆបោកដោយការប្រើប្រាស់បច្ចេកវិទ្យា AI។

ការក្រើនរម្លឹករបស់ក្រសួងប្រៃសណីយ៍ គឺស្របពេលដែលបច្ចេកវិទ្យាកំពុងអភិវឌ្ឍឥតឈប់ឈរ ការឆបោកកាន់តែមានច្រើន ដែលជាបញ្ហាសកលកំពុងកើនឡើងគួរឱ្យកត់សម្គាល់។ ថ្មីៗនេះ ក្រុមឆបោកបានប្រើប្រាស់បច្ចេកវិទ្យាបញ្ញាសិប្បនិម្មិត (AI) ក្នុងការបោកប្រាស់តាមប្រព័ន្ធទូរសព្ទ ក៏ដូចជាប្រព័ន្ធទូរគមនាគមន៍ផ្សេងៗដើម្បីឱ្យអ្នកផ្ទេរប្រាក់ ឬចែករំលែកទិន្នន័យសំខាន់ៗមួយចំនួន ដោយក្លែងបន្លំជាការសន្ទនាសំឡេង រូបភាព ឬវីដេអូ ដែលមានមុខមាត់ពិតរបស់សមាជិកគ្រួសារ មិត្តភក្តិ ឬអ្នកស្គាល់គ្នា ដែលធ្វើឱ្យមានការពិបាកក្នុងការកំណត់អត្តសញ្ញាណថា ពិត ឬក្លែងក្លាយ។

ឧបាយកលឆបោកតាមប្រព័ន្ធ AI បានធ្វើឡើងនៅក្នុងទម្រង់ការប្រើប្រាស់បច្ចេកវិទ្យាបញ្ញាសិប្បនិម្មិត (AI) ដើម្បីបង្កើតជាការសន្ទនាសំឡេង រូបភាព ឬ វីដេអូ ដែលសឹងតែដូចទាំងស្រុងនឹងម្ចាស់ដើម មានលក្ខណៈស្វ័យប្រវត្តិ និងពិបាកសម្គាល់ថា ពិត ឬក្លែងក្លាយ ដែលធ្វើឱ្យអ្នកងាយនឹងចាញ់បោក និងធ្លាក់ចូលក្នុងឧបាយកលរបស់ជនទុច្ចរិត បើសិនមិនបានពិនិត្យ និងផ្ទៀងផ្ទាត់ច្បាស់លាស់។ នេះជាការកត់សម្គាល់របស់ក្រសួងប្រៃសណីយ៍ ដែលបានបង្ហាញឱ្យតាមរយៈសេចក្ដីជូនដំណឹងនៅថ្ងៃទី០៤ ខែកុម្ភៈ ឆ្នាំ២០២៥។ ក្រសួង បន្ថែមថា ពេលនោះ ក្រុមឆបោកនេះ បានទាមទារ ស្នើសុំ ឬ ខ្ចីប្រាក់ ដែលតម្រូវឱ្យអ្នកផ្ទេរប្រាក់តាមអនឡាញ ឬស្នើសុំឱ្យចែករំលែកទិន្នន័យផ្ទាល់ខ្លួន ជាអាទិ៍ លេខកូដសម្ងាត់គណនីធនាគារ លេខកូដបណ្តាញ ទំនាក់ទំនងសង្គម លេខកូដផ្ទៀងផ្ទាត់ ឬព័ត៌មានសំខាន់ផ្សេងៗ។

តែយ៉ាងណា ក្រសួងប្រៃសណីយ៍ ក៏បានចែករំលែកនូវវិធីសាស្រ្តការពារខ្លួនពីការឆបោកនេះមួយចំនួន។ បើតាមក្រសួង ដើម្បីការពារខ្លួនពីការឆបោកខាងលើ រាល់ពេលទទួលបានការហៅទូរសព្ទ សារ សំឡេង រូបភាព ឬ វីដេអូ ដែលមានលក្ខណៈគួរឱ្យសង្ស័យ គប្បីផ្ទៀងផ្ទាត់អត្តសញ្ញាណរបស់បុគ្គលនោះឱ្យបានច្បាស់ ដោយពិនិត្យលេខទូរសព្ទ ឬរូបភាពគណនី និងតម្រូវឱ្យបុគ្គលនោះបើកកាមេរ៉ាវីដេអូបង្ហាញមុខភ្លាមៗ ព្រមទាំងពិនិត្យផ្ទៀងផ្ទាត់អាកប្បកិរិយារបស់បុគ្គលនោះ ថា ដូចប្រក្រតី ឬប្លែកពីអ្នកដែលយើងស្គាល់។

បន្ថែមពីនេះ ត្រូវសួរសំណួរផ្ទាល់ខ្លួន ឬសកម្មភាពដែលបានទាក់ទងគ្នាចុងក្រោយ ដែលគិតថា ត្រូវតែដឹង ហើយបង្កើនការប្រុងប្រយ័ត្នចំពោះការចែករំលែកព័ត៌មាន សំឡេង រូបភាព ឬវីដេអូសាម៉ីខ្លួនជាសាធារណៈ ព្រោះអាចឱ្យជនខិលខូច យកមាតិកាទាំងនោះទៅក្លែងបន្លំ ជាអ្នក ដើម្បីប្រព្រឹត្តបទល្មើសផ្សេងៗ និងមិនត្រូវផ្តល់ទិន្នន័យផ្ទាល់ខ្លួន ទៅជនដែលសង្ស័យ ជាដាច់ខាត៕

The post ក្រសួងប្រៃសណីយ៍ ប្រាប់វិធីសាស្រ្តការពារខ្លួនពីឧបាយកលឆបោកដោយការប្រើប្រាស់ AI appeared first on Kampuchea Thmey Daily.

Alibaba បញ្ចេញម៉ូដែល AI ដែលខ្លួនអះអាងថា ល្អជាង DeepSeek-V3

Huon Dina — Thu, 30 Jan 2025 04:52:05 +0000

ក្រុមហ៊ុនបច្ចេកវិទ្យាយក្សរបស់ចិន Alibaba កាលពីថ្ងៃពុធ បានបញ្ចេញកំណែថ្មីនៃម៉ូដែលបញ្ញាសិប្បនិម្មិត Qwen 2.5 របស់ខ្លួន ដោយអះអាងថា វាដំណើរការល្អជាងដាច់ ធៀបនឹង AI ជំនួយ DeepSeek-V3 របស់ក្រុមហ៊ុនបញ្ញាសិប្បនិម្មិត DeepSeek។

Alibaba បានបញ្ចេញម៉ូឌែលរបស់ខ្លួននៅថ្ងៃចូលឆ្នាំចិន ដែលការណ៍នេះបង្ហាញពីសម្ពាធនៃការប្រកួតប្រជែងរបស់ DeepSeek ដែលក្លាយជាពេញនិយមយ៉ាងឆាប់រហ័ស ទាំងសម្រាប់ក្នុង និងក្រៅស្រុក។

អង្គភាពខ្លោដ(ពពក)របស់ក្រុមហ៊ុន Alibaba បានប្រកាសថា៖ «ម៉ូឌែល Qwen 2.5-Max ប្រសើរជាងប្រព័ន្ធ AI បង្កើត GPT-4 (របស់ក្រុមហ៊ុន OpenAI), DeepSeek-V3, និង Llama-3.1-405B (របស់ក្រុមហ៊ុនបច្ចេកវិទ្យា Meta)»។

គួរគូសបញ្ជាក់ថា ការដាក់ដំណើរការ AI ជំនួយ របស់ DeepSeek ដែលដំណើរការដោយម៉ូដែល DeepSeek-V3 កាលពីថ្ងៃទី ១០ មករា ក៏ដូចជាការដាក់ដំណើរការ DeepSeek-R1 កាលពីថ្ងៃ ២០ មករា បានបង្កការភ្ញាក់ផ្អើលដល់បណ្ដុំក្រុមហ៊ុនបច្ចេកវិទ្យាយក្សនៅអាមេរិក ដោយធ្វើឱ្យទីផ្សារភាគហ៊ុនបច្ចេកវិទ្យាធ្លាក់ចុះ។ ការចំណាយទាបលើការអភិវឌ្ឍន៍ និងការប្រើប្រាស់នៃម៉ូឌែល AI របស់ DeepSeek បានធ្វើឱ្យវិនិយោគិនចោទសួរអំពីផែនការចំណាយដ៏ធំដោយក្រុមហ៊ុន AI ឈានមុខគេនៅសហរដ្ឋអាមេរិក។

ប៉ុន្តែភាគជោគជ័យរបស់ DeepSeek ក៏បាននាំឱ្យមានការប្រជែងគ្នាក្នុងចំណោមដៃគូប្រកួតប្រជែងក្នុងស្រុករបស់ខ្លួន ក្នុងការធ្វើឱ្យប្រសើរឡើងនូវគំរូ AI ផ្ទាល់ខ្លួនរបស់ពួកគេផងដែរ។

២ថ្ងៃបន្ទាប់ពីការចេញផ្សាយ DeepSeek-R1 ក្រុមហ៊ុនអ៊ិនធឺណិត ByteDance ដែលជាក្រុមហ៊ុន TikTok បានចេញផ្សាយការកំណែថ្មីសម្រាប់ម៉ូដែល AI ដ៏ល្បីរបស់ខ្លួន ដែលអះអាងថា វាដំណើរការល្អជាង AI បង្កើត o1 របស់ OpenAI ក្នុងការវាស់វែង និងការវាយតម្លៃបញ្ញាសិប្បនិម្មិត (AIME)៕

The post Alibaba បញ្ចេញម៉ូដែល AI ដែលខ្លួនអះអាងថា ល្អជាង DeepSeek-V3 appeared first on Kampuchea Thmey Daily.

ការស្ទង់មតិ៖ ៤៥ ភាគរយ នៃអ្នកធ្វើការនៅសិង្ហបុរី មិនហ៊ាននិយាយថាខ្លួនប្រើ AI ជាជំនួយ

Huon Dina — Tue, 17 Dec 2024 09:06:49 +0000

ការស្ទង់មតិថ្មីមួយបានរកឃើញថា ៤៥ ភាគរយ នៃអ្នកធ្វើការនៅប្រទេសសិង្ហបុរី មិនហ៊ានសារភាពថាខ្លួនប្រើបញ្ញាសិប្បនិម្មិត (AI) ដើម្បីជាជំនួយក្នុងការងាររបស់ពួកគេទេ។ នេះបើតាមការចុះផ្សាយរបស់សារព័ត៌មាន The Independent Singapore។

ការស្ទង់មតិស្ដីពីសន្ទស្សន៍កម្លាំងពលកម្មរបស់ក្រុមហ៊ុនបច្ចេកវិទ្យា Slack បានរកឃើញថា មូលហេតុដែលធ្វើឱ្យពួកគេមិនហ៊ាននិយាយបែបនេះ គឺដោយសារតែខ្លាចគេយល់ថា ខ្លួនអសមត្ថភាព ខ្ជិល ឬបន្លំការងារជាដើម។

របាយការណ៍ស្ទង់មតិបានកត់សម្គាល់ផងដែរថា កម្មករដែលខ្វះការណែនាំច្បាស់លាស់ មិនដឹងថាតើពេលណាត្រូវប្រើ AI ឱ្យសមស្រប នៅកន្លែងការងារនោះទេ ដែលនេះហើយជាហេតុធ្វើឱ្យពួកគេត្រូវលាក់បាំងវា។

ដោយបញ្ហានេះហើយ អ្នកស្រី Christina Janzer អនុប្រធានជាន់ខ្ពស់ផ្នែកស្រាវជ្រាវ និងវិភាគរបស់ក្រុមហ៊ុន Slack បានលើកឡើងថា និយោជកគួរតែបង្កើតគោលការណ៍ណែនាំច្បាស់លាស់ អំពីឧបករណ៍ AI ដែលត្រូវប្រើ និងគួរឱ្យទុកចិត្ត សម្រាប់កន្លែងការងាររបស់ពួកគេ។

អ្នកស្រីបន្តថា៖ «បន្ទុកច្រើនពេកនាពេលបច្ចុប្បន្ននេះ ធ្វើឱ្យកម្មករងាកទៅរក AI ។ វាជារឿងសំខាន់ដែលអ្នកដឹកនាំមិនត្រឹមតែបណ្តុះបណ្តាលកម្មករឱ្យប្រើ AI ប៉ុណ្ណោះទេ ប៉ុន្តែលើកទឹកចិត្តបុគ្គលិកឱ្យនិយាយអំពីវា និងពិសោធន៍ជាមួយ AI ដោយបើកចំហ»។

ទោះបីជាមានការព្រួយបារម្ភក៏ដោយ អ្នកធ្វើការ ៨៨ ភាគរយ នៅក្នុងប្រទេសសិង្ហបុរីចង់អភិវឌ្ឍជំនាញ AI របស់ពួកគេ ហើយយល់ឃើញថា មានតម្រូវការចាំបាច់ដើម្បីក្លាយជាអ្នកជំនាញក្នុងវិស័យនេះ។ ប៉ុន្តែ ៦៣ ភាគរយ ប៉ុណ្ណោះ នៃពួកគេ បានចំណាយពេលតិចជាង ៥ ម៉ោង ដើម្បីរៀនពីរបៀបប្រើប្រាស់ AI៕

The post ការស្ទង់មតិ៖ ៤៥ ភាគរយ នៃអ្នកធ្វើការនៅសិង្ហបុរី មិនហ៊ាននិយាយថាខ្លួនប្រើ AI ជាជំនួយ appeared first on Kampuchea Thmey Daily.

​បញ្ញាសិប្បនិម្មិត (AI) Archives - Kampuchea Thmey Daily

អាមេរិកប្រើកម្មវិធី AI មួយជាជំនួយ ក្នុងការចាប់ខ្លួនលោកម៉ាឌូរ៉ូ

សារព័ត៌មានថៃ យករូបកែដោយ Ai ទៅផ្សាយបោកប្រាស់ពលរដ្ឋខ្លួននិងពិភពលោក

របាយការណ៍៖ AI ធ្វើឱ្យសញ្ញាបត្រ​មហាវិទ្យាល័យ​ «ហួសសម័យ»

សម្ដេចធិបតី៖ការពឹងលើបញ្ញាសិប្បនិម្មិត AI ពេក អាចធ្វើឱ្យមនុស្សលែងចេះអា​ន សរសេរ សង្ខេប ខ្សោយការគិត

ក្រុមហ៊ុន Apple នឹង​បញ្ចូល AI របស់ Alibaba ក្នុង ​iPhone លក់នៅចិន​