ព័ត៌មានអន្ដរជាតិ

របាយការណ៍៖ AI ធ្វើឱ្យសញ្ញាបត្រមហាវិទ្យាល័យ «ហួសសម័យ»

បានផុស

១១ ខែ មុន

នៅ

ថ្ងៃពុធ ១១ មិថុនា ២០២៥

ដោយ

តម្រូវការសញ្ញាបត្រផ្លូវការសម្រាប់ការរកការងារធ្វើ កំពុងធ្លាក់ចុះនៅគ្រប់មុខជំនាញការងារទាំងអស់ ដោយសារតែការរីកចម្រើនយ៉ាងលឿននៃបច្ចេកវិទ្យាបញ្ញាសិប្បនិម្មិត (AI)។ នេះបើតាមការចុះផ្សាយរបស់បណ្ដាញទូរទស្សន៍ CNBC ដោយស្រង់របាយការណ៍ «2025 AI Jobs Barometer» របស់ក្រុមហ៊ុនសេវាកម្មវិជ្ជាជីវៈ PwC ដែលចេញផ្សាយកាលពីសប្តាហ៍មុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍ ដែលបានវិភាគការផ្សាយពាណិជ្ជកម្មការងារជិត ១ ពាន់លាន និងរបាយការណ៍ហិរញ្ញវត្ថុរបស់ក្រុមហ៊ុនរាប់ពាន់នៅទូទាំងទ្វីបចំនួន ៦ បាននិយាយថា៖ «AI ជួយមនុស្សកសាងចំណេះជំនាញយ៉ាងឆាប់រហ័ស ដែលអាចឱ្យតម្រូវការលក្ខណៈសម្បត្តិផ្លូវការលែងសូវសំខាន់»។

របាយការណ៍បានបន្ថែមថា AI ក៏បង្កើតការផ្លាស់ប្តូរយ៉ាងឆាប់រហ័សនៅក្នុងជំនាញ និងចំណេះដឹងដែលកម្មករត្រូវការដើម្បីជោគជ័យ ដែលអាចមានន័យថា សញ្ញាបត្រផ្លូវការក្លាយជា «ហួសសម័យ» កាន់តែលឿនជាងមុន។

របាយការណ៍ដដែលបាននិយាយយ៉ាងដូច្នេះថា៖ «សម្រាប់កម្មករ ការផ្តោតលើជំនាញច្រើនជាងសញ្ញាបត្រ អាចពង្រីកឱកាស ជាពិសេសសម្រាប់អ្នកដែលគ្មានមធ្យោបាយដើម្បីទទួលបានលក្ខណៈសម្បត្តិ។ ក្នុងវិស័យដែលរងផលប៉ះពាល់ដោយ AI អ្វីដែលសំខាន់បំផុតគឺអ្វីដែលមនុស្សអាចធ្វើបាននៅពេលនេះ មិនមែនអ្វីដែលពួកគេបានសិក្សាកាលពីអតីតកាលនោះទេ»។

ប្រធាន PwC សម្រាប់កិច្ចការ AI សកល លោក Joe Atkinson បានប្រាប់ CNBC ថា សព្វថ្ងៃនេះ ការអប់រំមិនត្រូវបានកំណត់ដោយស្ថាប័នផ្លូវការ ឬសាកលវិទ្យាល័យទៀតទេ ដោយមនុស្សអាចរៀនដោយប្រើឧបករណ៍ AI និង LLMs (គំរូភាសាធំ) ដើម្បីសម្របខ្លួន និងការពារអនាគតអាជីពរបស់ខ្លួន ក្នុងទិដ្ឋភាពការងារ ដែលមានការផ្លាស់ប្តូរយ៉ាងឆាប់រហ័ស។ លោកបានស្នើឱ្យមនុស្សបង្កើនជំនាញលើ AI នៅផ្ទះខ្លួនឯង។

លោកបានបន្តថា៖ «អ្វីដែលសំខាន់បំផុតនោះគឺថា ជំនាញ AI គឺជាជំនាញអនុវត្តជាក់ស្តែង។ វាជាជំនាញអនុវត្ត អ្នកត្រូវតែប្រើបច្ចេកវិទ្យា។ ការយកចិត្តទុកដាក់លើការរៀនដោយខ្លួនឯងក្នុងសម័យនេះ កាន់តែសំខាន់។ ប្រសិនបើអ្នកមិនអាចធ្វើវាបានទេ អ្នកនឹងដើរក្រោយគេ»៕