នៅក្នុងកម្មវិធី ទិវាពិភពលោកនៃអ្នកបរិច្ចាគឈាមក្រោមប្រធានបទ៖ “មួយដំណក់ នៃទឹកចិត្តសប្បុរសធម៌ ផ្តល់ឈាមសង្គ្រោះជីវិត” លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាម
បានមានប្រសសន៍ថា បច្ចុប្បន្ននេះ នៅកម្ពុជាចំនួនអ្នកស្ម័គ្រចិត្តបរិច្ចាគឈាម និងមិនទទួលកម្រៃមានប្រមាណជាង២០% ប៉ុណ្ណោះ ខណៈអត្រានៃការបរិច្ចាគឈាមជំនួសដោយក្រុមគ្រួសារធ្នកជំងឺនៅតែមានកម្រិតខ្ពស់រហូតដល់ទៅជិត៨០% ដែលទាមទារឱ្យប្រជាពលរដ្ឋយកចិត្តទុលដាក់ និងចូលរួមបរិច្ចាគឈាមដោយស្ម័គ្រចិត្តឱ្យបានសកម្មនិងផុលផុសបន្ថែមទៀត។

លោកវេជ្ជបណ្ឌិតបានលើកឡើងថា ជាក់ស្តែងក្នុងរយៈពេល៥ខែ ឆ្នាំ២០២៦ កម្ពុជាទទួលបានអំណោយឈាមទូទាំងប្រទេសសរុបចំនួន ៧៨,៣៩៣ប្លោក ក្នុងនោះ ចំនួនអ្នកស្ម័គ្រចិត្តបរិច្ចាគឈាម និងមិនទទួលកម្រៃមាន ២០.៧% ស្មើនឹង ១៦,២៤៦ប្លោកនៃអំណោយឈាម ទូទាំងប្រទេស ហើយបានចែកចាយប្រើប្រាស់នៅតាមមន្ទីរពេទ្យរដ្ឋនិងឯកជន មានចំនួន៨៩,៨២៣ប្លោក។

លោកវេជ្ជបណ្ឌិតបានបន្តថា «ផ្អែកលើទិន្នន័យខាងលើនេះ បានបង្ហាញយ៉ាងច្បាស់ថា តម្រូវការឈាមដើម្បីសង្គ្រោះជីវិតជនរងគ្រោះ និងអ្នកជំងឺនៅតាមមន្ទីរពេទ្យនានា គឺមានការកើនឡើងជារៀងរាល់ថ្ងៃ។ ទោះបីជាចលនានៃការបរិច្ចាគ ឈាមដោយស្ម័គ្រចិត្តមានសន្ទុះគួរឱ្យកត់សម្គាល់ក៏ដោយ ប៉ុន្តែអត្រានៃការបរិច្ចាគឈាមជំនួសដោយ ក្រុមគ្រួសារអ្នកជំងឺ នៅតែមានកម្រិតខ្ពស់រហូតដល់ទៅជិត ៨០%»។

លោកវេជ្ជបណ្ឌិតបានបន្តទៀតថា « ហេតុដូច្នេះហើយ ទើបយើងខ្ញុំជានិច្ចកាលតែងតែធ្វើការអំពាវនាវយ៉ាងទទូចសូមកុំរង់ចាំដល់ពេល មានតម្រូវការឈាមផ្ទាល់ខ្លួន ឬសមាជិកគ្រួសារ ទើបយើងចាប់ផ្តើមធ្វើការបរិច្ចាគឈាមនោះឡើយ។ យើងត្រូវរួមគ្នាកែប្រែទម្លាប់នេះ ដោយងាកមកចូលរួមក្នុងចលនាផ្តល់ឈាមដោយស្ម័គ្រចិត្តឱ្យបាន ទៀងទាត់ និងជាប្រចាំ ដើម្បីធានាបាននូវ សុវត្ថិភាព សមភាព និង ស្ថេរភាព នៃស្តុកឈាមជាតិ»។

លោកវេជ្ជបណ្ឌិត បានបន្ថែមថា«ឈាមតែមួយដំណក់ដែលកើតចេញពីទឹកចិត្តសប្បុរសពិតប្រាកដ គឺពិត ជាមានតម្លៃមហាសាល រកអ្វីប្រៀបផ្ទឹមពុំបាន ក្នុងការប្តូរយកអាយុជីវិតរបស់ប្រជាពលរដ្ឋយើងត្រឡប់មកវិញពីសេចក្តីស្លាប់។ មជ្ឈមណ្ឌលជាតិផ្តល់ឈាម សូមកត់ត្រាទុកនូវរាល់វីរភាព និងសកម្មភាព មនុស្សធម៌គ្រប់បែបយ៉ាងរបស់លោកអ្នក ហើយសូមថ្លែងអំណរគុណជាអនេកប្បការ ចំពោះការបរិច្ចាគ ឈាមដោយស្ម័គ្រចិត្ត និងមិនទទួលកម្រៃនាពេលនេះ»។

គួរបញ្ជាក់ថាក្នុងឆ្នាំ២០២៥កម្ពុជាទទួលបានអំណោយឈាមចំនួន ១៩៥ ១៧៥ ប្លោក កើនឡើង១៧,២៧% ធៀបទៅនឹងឆ្នាំ២០២៤។ក្នុងនោះចំនួនការបរិច្ចាគ ឈាមដោយស្ម័គ្រចិត្ត និងមិនទទួលកម្រៃមាន៦៤០១១ប្លោកស្មើនឹង៣២.៨%នៃអំណោយឈាមនៅទូទាំងប្រទេស។ ចំពោះការផ្គត់ផ្គង់ឈាម និងសមាសភាពឈាមមានចំនួន ២១២ ៤២៨ ប្លោក កើនឡើង ១៨,៤៥% ធៀបទៅនឹងឆ្នាំ២០២៤៕
អត្ថបទ៖សំអឿន

The post អត្រាការបរិច្ចាគឈាមជំនួសនៅកម្ពុជា នៅតែមានកម្រិតខ្ពស់រហូតដល់ទៅជិត ៨០% នៅទូទាំងប្រទេស appeared first on Kampuchea Thmey Daily.

លោក ហ៊ុ កុសល អ្នកតំណាងសាខាសមាគមផ្សព្វផ្សាយពិភពលោក (ពួកជំនុំនៃព្រះ) ប្រចាំខេត្តមណ្ឌលគិរី បានឱ្យដឹងថា កាលពីថ្ងៃទី៧ ខែមិថុនា ឆ្នាំ២០២៦ សមាជិកសមាគមផ្សព្វផ្សាយពិភពលោក (ពួកជំនុំនៃព្រះ) មកពីខេត្តមណ្ឌលគិរី ខេត្តក្រចេះ និងខេត្តរតនគិរី សរុបប្រមាណ ៦០នាក់ បាននាំគ្នាចូលរួមបរិច្ចាគឈាមដោយស្ម័គ្រចិត្តនៅមន្ទីរពេទ្យបង្អែកខេត្តមណ្ឌលគិរី ដើម្បីផ្តល់ក្តីស្រឡាញ់ និងជួយសង្គ្រោះជីវិតអ្នកជំងឺដែលកំពុងត្រូវការឈាមជាបន្ទាន់។

លោកបានបញ្ជាក់ថា ការរួមគ្នាចូលរួមកម្មវិធីបរិច្ចាគឈាមនេះ ក៏ធ្វើឡើងក្នុងឱកាសអបអរសាទរខួបលើកទី៦២ នៃការបង្កើតពួកជំនុំនៃព្រះផងដែរ។

លោកបន្ថែមថា ការបរិច្ចាគឈាមមិនត្រឹមតែជាការផ្តល់ជំនួយដល់អ្នកដទៃប៉ុណ្ណោះទេ ប៉ុន្តែថែមទាំងជាការបង្ហាញពីក្តីស្រឡាញ់ មេត្តាករុណា និងការយកចិត្តទុកដាក់ចំពោះមនុស្សជាតិ ស្របតាមគោលការណ៍នៃការរស់នៅក្នុងសង្គមដែលប្រកបដោយសាមគ្គីភាព និងការជួយគ្នាទៅវិញទៅមក។

ជាមួយគ្នានេះ សកម្មភាពខាងលើក៏បានបង្ហាញពីស្មារតីទទួលខុសត្រូវចំពោះសង្គម ការចែករំលែក និងសាមគ្គីភាពរបស់យុវជន ដែលបានលះបង់ពេលវេលា និងកម្លាំងកាយចិត្ត ដើម្បីរួមចំណែកបំពេញតម្រូវការឈាមសម្រាប់ការព្យាបាលអ្នកជំងឺ និងករណីសង្គ្រោះបន្ទាន់ផ្សេងៗ។

លោកវេជ្ជបណ្ឌិត ទុយ ស្រស់ ប្រធានមន្ទីរពេទ្យបង្អែកខេត្តមណ្ឌលគិរី បានសម្តែងការកោតសរសើរចំពោះទឹកចិត្តដ៏ប្រពៃរបស់យុវជនទាំងអស់ និងបានអំពាវនាវឱ្យសាធារណជនបន្តចូលរួមបរិច្ចាគឈាមឱ្យបានកាន់តែច្រើន ដើម្បីធានាថាមានស្តុកឈាមគ្រប់គ្រាន់សម្រាប់ជួយសង្គ្រោះជីវិតអ្នកជំងឺនៅពេលចាំបាច់។

លោកបានគូសបញ្ជាក់ថា៖ «សកម្មភាពមនុស្សធម៌នេះ គឺជាគំរូដ៏ល្អមួយសម្រាប់យុវជន និងសហគមន៍ទូទៅ ក្នុងការចូលរួមធ្វើអំពើល្អ និងរួមគ្នាកសាងសង្គមដែលពោរពេញដោយក្តីស្រឡាញ់ សាមគ្គីភាព និងការចែករំលែក»៕

អត្ថបទ៖រៀម សុខហេង

The post យុវជនសាសនាគ្រឹស្តប្រមាណ ៦០នាក់ បរិច្ចាគឈាមនៅមន្ទីរពេទ្យបង្អែកខេត្តមណ្ឌលគិរី ជួយសង្គ្រោះជីវិតអ្នកជំងឺ appeared first on Kampuchea Thmey Daily.

លោក ណុប សាងអូន អនុប្រធានមន្ទីរពេទ្យបង្អែកខេត្តរតនគិរី មានប្រសាសន៍ថា ការទទួលអំណោយឈាម និងការគ្រប់គ្រងឈាម ត្រូវបានអនុវត្តតាមយន្តការដែលមានប្រសិទ្ធភាព ដើម្បីធានាការផ្គត់ផ្គង់ឈាមឲ្យបានគ្រប់គ្រាន់សម្រាប់អ្នកជំងឺនៅក្នុងខេត្ត។ ជាមួយគ្នានេះ លោកថ្លែងអំណរគុណដល់ប្អូនៗជានិស្សិតដែលបានចូលរួមបរិច្ចាគឈាម ដោយចាក់ទុកថាជាសកម្មភាពដ៏សប្បុរសធម៌ជួយដល់សង្គម ជាពិសេសពលរដ្ឋក្រីក្រដែលកំពុងខ្វះខាតឈាម។

មន្ទីរពេទ្យទទួលការបរិច្ចាគឈាមជារៀងរាល់ថ្ងៃ ប៉ុន្តែការទទួលយកជាក់ស្តែង អាស្រ័យលើស្ថានភាពស្តុកឈាមដែលមានស្រាប់ ដើម្បីជៀសវាងការលើសចំណុះ ឬការខូចគុណភាពឈាម។ លោកបញ្ជាក់ថា៖«ក្នុងករណីស្តុកឈាមពេញ មន្ទីរពេទ្យនឹងមិនទទួលឈាមភ្លាមៗទេ ប៉ុន្តែនឹងកត់ត្រាព័ត៌មានអ្នកបរិច្ចាគ ដូចជា ឈ្មោះ អាសយដ្ឋាន និងលេខទូរស័ព្ទ ដើម្បីអាចទាក់ទងវិញ នៅពេលមានតម្រូវការចាំបាច់»។ លោកបានបន្តថា យុទ្ធសាស្ត្រនៃការកៀងគរឈាមនេះ ផ្តោតសំខាន់លើការជួយសង្គ្រោះអ្នកជំងឺដែលកំពុងសម្រាកព្យាបាលនៅមន្ទីរពេទ្យ ជាពិសេសអ្នកជំងឺក្រីក្រដែលខ្វះខាតសាច់ញាតិ ឬអ្នកផ្តល់ឈាម។

ចំពោះលក្ខខណ្ឌបរិច្ចាគឈាម អ្នកបរិច្ចាគត្រូវមានសុខភាពល្អ និងមានអាយុចាប់ពី ១៨ ឆ្នាំឡើងទៅ ដោយមិនកំណត់ភេទ។ បុរសអាចបរិច្ចាគបានរហូតដល់ ៤ ដងក្នុងមួយឆ្នាំ ខណៈនារីអាចបរិច្ចាគបាន ៣ ដងក្នុងមួយឆ្នាំ។ លោកក៏បានបញ្ជាក់ថា ការបរិច្ចាគឈាមមានអត្ថប្រយោជន៍ជាច្រើនចំពោះសុខភាព ដូចជា ជួយបង្កើនសុខភាពបេះដូង កាត់បន្ថយកំហាប់ឈាម និងហានិភ័យនៃជំងឺមហារីកខ្លះៗ។ លើសពីនេះ វាជួយគ្រប់គ្រងកម្រិតជាតិដែកក្នុងរាងកាយ ជៀសវាងការលើសជាតិដែក ដែលអាចប៉ះពាល់ដល់ថ្លើម និងលំពែង ហើយក៏ជួយកាត់បន្ថយកម្រិតកូឡេស្តេរ៉ុល និងជួយគ្រប់គ្រងទម្ងន់ផងដែរ។

លោក សំ ប៊ុនថន នាយកវិទ្យាស្ថានពហុបច្ចេកទេសកម្ពុជាអាស៊ី ប្រាប់កម្ពុជាថ្មីថា សកម្មភាពនេះ ជាយុទ្ធនាការបរិច្ចាគឈាមលើកទី ៤ របស់វិទ្យាស្ថាន CAPI ដែលជាកម្មវិធីសង្គមសប្បុរសធម៌ ផ្តោតលើការចូលរួមដោះស្រាយបញ្ហាកង្វះឈាមនៅតាមមន្ទីរពេទ្យ និងលើកកម្ពស់ស្មារតីជួយសង្គមក្នុងចំណោមយុវជន។លោកបន្ថែមថា និស្សិតមកពីថ្នាក់ផ្សេងៗ បានចូលរួមយ៉ាងសកម្មក្នុងការបរិច្ចាគឈាមដោយបានអនុវត្តតាមគោលការណ៍ស្ម័គ្រចិត្តទាំងស្រុង ដោយគ្មានការបង្ខិតបង្ខំ ដើម្បីឱ្យនិស្សិតយល់ដឹងពីតម្លៃនៃការជួយសង្គ្រោះជីវិតនិងកាត់បន្ថយភាពភ័យខ្លាចចំពោះការបរិច្ចាគឈាម។

ក្នុងនាមជាអ្នកដឹកនាំ លោកធ្លាប់បានបរិច្ចាគឈាមចំនួន ៣ លើករួចមកហើយ ដែលជាគំរូល្អមួយសម្រាប់និស្សិត និងសាធារណជន។ ឆ្លងកាត់បទពិសោធន៍៣លើកមកនេះ លោកបានលើកឡើងថា ការបរិច្ចាគឈាមជួយជំរុញឱ្យរាងកាយផលិតគ្រាប់ឈាមថ្មីៗ ដែលអាចធ្វើឱ្យសុខភាពប្រសើរឡើង និងជួយពិនិត្យសុខភាពបឋមផងដែរ៕

ដោយ៖ ខៀវ ចាប

The post ក្នុងស្មារតីជួយសង្គម! និស្សិតប្រមាណ ៦០នាក់ បរិច្ចាគឈាមជូនមន្ទីរពេទ្យបង្អែកខេត្តរតនគិរី ដើម្បីសង្គ្រោះអាយុជីវិត appeared first on Kampuchea Thmey Daily.

ក្រសួងសុខាភិបាលបានបន្តថា ក្នុងឆ្នាំ២០២៥មានអ្នកបរិច្ចាគឈាមដោយស្ម័គ្រចិត្ត និងអ្នកបរិច្ចាគឈាមជំនួសចំនួន ១៨៣,១៤១ប្លោក មានការកើនឡើង ៩,៩៧%បើធៀបទៅនឹងឆ្នាំ២០២៤ ដែលប្រមូលឈាមបានប្រមាណ ១សែន៧ម៉ឺនប្លោក។

លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាមបានមានប្រសាសន៍ថា ការទទួលបានអំណោយឈាមច្រើននេះ ដោយសារមានការចូលរួមការបរិច្ចាគឈាមពីសំណាក់ប្រជាពលរដ្ឋ យុវជនយ៉ាងផុលផុស ពិសេសមានការចូលរួមពីសហភាពសហព័ន្ធយុវជនកម្ពុជា យុវជនកាកបាទក្រហមនិងយុវជនកាយរឹទ្ធិជាដើម។

លោកវេជ្ជបណ្ឌិត បានបន្តថា សន្ទុះនៃការចូលរួមបរិច្ចាគឈាមកើនឡើងនេះបានធ្វើឱ្យមជ្ឈមណ្ឌលជាតិផ្តល់ឈាមអាចមានលទ្ធភាពស្តុកឈាមបានគ្រប់គ្រាន់ជួយកាត់បន្ថយការបរិច្ចាគឈាមជំនួសសាច់ញាត និងបងប្អូនរបស់អ្នកជំងឺបានមួយកម្រិត ខណៈបច្ចុប្បន្នក្នុង១ថ្ងៃ មានតម្រូវការឈាមនៅទូទាំងប្រទេសបានកើនឡើងដល់ ៤០០ប្លោក។ ក្នុងនោះនៅរាជធានីភ្នំពេញ មានតម្រូវការឈាមដល់ ៣៥០ប្លោក និងតាមខេត្ត ៥០ប្លោក ដោយសារនៅតាមខេត្តការវះកាត់មានតិចជាងនៅរាជធានីភ្នំពេញ ពោលគឺ ក្នុង១នាទីត្រូវការឈាម១ប្លោក។

លោកវេជ្ជបណ្ឌិតបានបន្តទៀតថា ឈាមទាំងនោះ បានយកទៅប្រើប្រាស់ក្នុងការជួយសង្គ្រោះអាយុជីវិតអ្នកជំងឺពាក់ព័ន្ធទៅនឹងគ្រោះចរាចរណ៍ ស្ត្រីសម្រាលកូន ការវះកាត់ធំៗ ដូចជាវះកាត់ជំងឺបេះដូង ជំងឺមិនឆ្លងរួមមានជំងឺមហារីកនិងជំងឺលាងឈាមជាដើម។

លោកវេជ្ជបណ្ឌិត បានអំពាវនាវដល់យុវជនបន្តចូលរួមការបរិច្ចាគឈាមនេះឱ្យបានផុលផុសបន្ថែមទៀតដើម្បីឱ្យមជ្ឈមណ្ឌលជាតិមានស្តុកឈាមគ្រប់គ្រាន់សម្រាប់ជួយសង្គ្រោះអាយុជីវិតអ្នកជំងឺដែលត្រូវការឈាមជាចាំបាច់ពិសេសជំងឺមិនឆ្លងដែលមានការកើនឡើង៕

អត្ថបទ៖សំអឿន

The post ការផ្គត់ផ្គង់ឈាមដល់មន្ទីរពេទ្យរដ្ឋ និងឯកជន មានកំណើនជាង២១ម៉ឺនប្លោកក្នុងឆ្នាំ២០២៥ កើនជាង១៧% appeared first on Kampuchea Thmey Daily.

លោកបានជំរុញបែបនេះ នៅក្នុងកិច្ចប្រជុំបូកសរុបលទ្ធផលការងារប្រចាំឆ្នាំ២០២៥ និងលើកទិសដៅឆ្នាំ២០២៦ របស់សហភាពសហព័ន្ធយុវជនកម្ពុជា ខេត្តកណ្តាល នាព្រឹកថ្ងៃទី១១ ខែកុម្ភៈ ឆ្នាំ២០២៦។ ទន្ទឹមនេះ លោកបានណែនាំដល់មន្ទីរសុខាភិបាល នៃរដ្ឋបាលខេត្តកណ្ដាល មន្ទីរពេទ្យជ័យជំនះ និងមន្ទីរពេទ្យតេជោសែនកោះធំ គិតគូរៀបចំឱ្យមានប្រព័ន្ធគ្រប់គ្រងឈាមឱ្យបានល្អ ត្រូវតាមដានបរិមាណឈាមឱ្យបានជាប្រចាំ ព្រមទាំងធ្វើការផ្ទេរទៅមជ្ឈមណ្ឌលជាតិផ្តល់ឈាមនៅពេលចាំបាច់ ដើម្បីកាត់បន្ថយការខូចខាត់ធនធានឈាម ដោយសារតែឈាមអាចរក្សាទុកបានត្រឹមតែ៤ សប្តាហ៍ប៉ុណ្ណោះ។

ជាមួយគ្នានេះ លោកក៏បានលើកទឹកចិត្តដល់សមាជិកឱ្យបន្តពង្រឹងសកម្មភាពស្ម័គ្រចិត្ត ក្នុងការបម្រើសង្គមជាតិ ជាពិសេសត្រូវបន្តផ្សព្វផ្សាយ និងពង្រីកសមាជិក ស.ស.យ.ក ឱ្យបានកាន់តែច្រើនឡើងថែមទៀត សំដៅជួយគ្នាក្នុងការងារកសាងសង្គមជាតិឱ្យមានភាពរីកចម្រើន។

លោកអភិបាលខេត្ត បានបញ្ជាក់ថា «ការងាររបស់សមាជិក ស.ស.យ.ក គឺជាការងារស្ម័គ្រចិត្ត ដោយមិនមានប្រាក់ឧបត្ថម្ភ ឬប្រាក់ខែឡើយ ប៉ុន្តែជាឱកាសដ៏មានតម្លៃសម្រាប់យុវជនក្នុងការចូលរួមសកម្មភាពសង្គម និងមនុស្សធម៌ ទទួលបាននូវបទពិសោធន៍ជាក់ស្ដែងពីការងាររបស់ខ្លួន មានឱកាសទទួលបានជោគជ័យឆាប់រហ័សក្នុងជីវិត»។

ក្នុងឱកាសនោះដែរ លោកអភិបាលខេត្ត បានកោតសរសើរចំពោះ ថ្នាក់ដឹកនាំ ព្រមទាំងសមាជិកសមាជិកាសហភាពសហព័ន្ធយុវជនកម្ពុជា ខេត្តកណ្តាល (ស.ស.យ.ក) ទាំងអស់ដែលបានខិតខំបំពេញការងារស្នូលរបស់ខ្លួន ក្នុងការបម្រើកិច្ចការសង្គម និងការងារស្ម័គ្រចិត្តនានាទទួលបានលទ្ធផលយ៉ាងល្អប្រសើរ៕

The post ប្រធាន ស.ស.យ.ក ខេត្តកណ្តាល ជំរុញទឹកចិត្តដល់សមាជិក បន្តចូលរួមបរិច្ចឈាមស្ម័គ្រចិត្តឱ្យបានទៀងទាត់ appeared first on Kampuchea Thmey Daily.

ទោះបី​ស្ថានការណ៍​បញ្ហា​ជម្លោះ​នៅ​តាម​ខ្សែបន្ទាត់​ព្រំដែន​រវាង​កម្ពុជា-ថៃ មាន​ការ​ថមថយ​កម្ដៅ​បន្តិច​ក៏​ពិត​មែន ប៉ុន្តែ​ទឹកចិត្ត​រួបរួម​ដ៏​មុត​ស្រួច​របស់​ប្រជាជន​កម្ពុជា​ជា​អ្នក​សមរភូមិ​ក្រោយ គឺ​មិន​បាន​នៅ​ស្ងៀម​នោះ​ឡើយ ពោល​គឺ​នៅតែ​បន្ត​ចលនា​ក្នុង​ការ​ជួយ​ជា​ជំនួយ​នានា​តាម​លទ្ធភាព​ដែល​អាច​ធ្វើ​ទៅ​បាន ដើម្បី​ផ្តល់​ទៅកាន់​វីរជន​កងទ័ព និង​ជនភៀសសឹក។

ជាក់ស្ដែង​កាលពី​ព្រឹក​ថ្ងៃ​ទី ០១ ខែ​មករា ឆ្នាំ ២០២៦ ម្សិលមិញ ក្រុមការងារ​គ្រូពេទ្យ​ស្ម័គ្រចិត្ត​របស់​ឯកឧត្ដម​ឧបនាយករដ្ឋមន្ត្រី ហ៊ុន ម៉ានី បាន​រៀបចំ​ពិធី​ចូលរួម​បរិច្ចាគ​ឈាម​ដើម្បី​ជួយ​ទៅ​ជួរមុខ ដើម្បី​រួមចំណែក​ជា​កម្លាំង​ដ៏​រឹងមាំ​បន្ថែម​ក្នុង​ការ​ជួយ​ការពារ​បូរណភាព​ទឹកដី​កម្ពុជា ពី​ការ​ឈ្លានពាន​ពី​សំណាក់​រដ្ឋ​បរទេស។

ពិធី​នេះ​ធ្វើឡើង​ក្រោម​វត្តមាន លោក លេង ផាលី រដ្ឋលេខាធិការ​ក្រសួងផែនការ ជា​សមាជិក​គណៈ​អចិន្ត្រៃយ៍ គណៈកម្មាធិការ​កណ្តាល​សហភាព​សហព័ន្ធ​យុវជន​កម្ពុជា (​សស​យក​) និង​ជា​ប្រធាន​ប្រតិបត្តិ​ក្រុមការងារ​គ្រូពេទ្យ​ស្ម័គ្រចិត្ត​របស់​ឯកឧត្ដម​ឧបនាយករដ្ឋមន្ត្រី ហ៊ុន ម៉ានី ដោយ​មាន​ការ​ចូលរួម​ពី​សមាជិក សមាជិកា រួម​ទាំង​អ្នកស្ម័គ្រចិត្ត​ចូលរួម​បរិច្ចាគ​ឈាម​ជាង ៣០០ នាក់ ផង​ដែរ។

លោក ហាន សីហា សមាជិក​ក្រុមការងារ​ក្រុម​គ្រូពេទ្យ​ស្ម័គ្រចិត្ត​ឯកឧត្ដម ហ៊ុន ម៉ានី និង​ជា​អគ្គនាយក​ក្រុមហ៊ុន ញូ​-​ធី​-​រីក បាន​ឲ្យ​ដឹង​ថា ក្រោម​ការ​ដឹកនាំ​របស់ សម្តេច​អគ្គ​មហា​សេនា​បតី​តេ​ជោ ហ៊ុន សែន និង សម្តេច​មហា​បវរ​ធិបតី ហ៊ុន ម៉ាណែត បាន​លះបង់ រិះរក​គ្រប់​វិធី ធ្វើ​ឲ្យ​ប្រទេស​មាន​សុខ​សន្តិភាព ជាពិសេស វីរ​កងទ័ព ១៨ នាក់ បាន​វិល​មក​មាតុភូមិ​ជួបជុំ​គ្រួសារ​ដូចដើម​វិញ។ ក្នុងនាម​ជា​អ្នក​ជួរ​ក្រោយ និង​មាន​ឈាមជ័រ​ជា​ខ្មែរ ចាំបាច់​ត្រូវ​តែ​សាមគ្គី​គ្នា​ជា​ធ្លុង​មួយ​ជាមួយ​រាជរដ្ឋាភិបាល ដើម្បី​ដោះស្រាយ​បញ្ហា និង​ពង្រឹង​ការ​ការពារ​ជាតិ​ឲ្យ​បាន​រឹងមាំ ទោះ​ស្ថិត​ក្នុង​តម្លៃ​ណាមួយ​ក៏ដោយ។

អ្នកស្ម័គ្រចិត្ត​ចូលរួម​បរិច្ចាគ​ឈាម បាន​សម្តែង​នូវ​ក្តី​ពេញចិត្ត​ក្នុង​ការ​ផ្តល់​ឈាម​សម្រាប់​ជួយ​ទៅកាន់​ជួរមុខ ដែល​នេះ​ជា​ការ​បង្ហាញ​ឲ្យ​ឃើញ​ពី​ស្មារតី និង​ទឹកចិត្ត​ស្រលាញ់​ជាតិ​មាតុភូមិ​របស់​ខ្លួន។

គួរ​បញ្ជាក់​ថា កម្ពុជា ជា​ប្រទេស​តូច​មួយ​ដែល​ជូរចត់​ជួប​ឆ្អែត​អស់​ហើយ​ចំពោះ​ភ្នក់ភ្លើងសង្គ្រាម ដូច្នោះ​ហើយ​បច្ចុប្បន្ន​នេះ ទាំង​ពលរដ្ឋ​ទូទាំង​ប្រទេស និង​រាជរដ្ឋាភិបាល គឺ​ចង់បាន និង​ត្រូវការ​តែ​សន្តិភាព​ប៉ុណ្ណោះ។ ប្រទេស​កម្ពុជា ពុំ​ដែល​មាន​បំណង ឬ​មហិច្ឆតា​ណាមួយ ក្នុង​ការ​ទៅ​បង្កជម្លោះ ឬ​ឈ្លានពាន​ទឹកដី​ប្រទេស​ជិតខាង​ណា​នោះ​ឡើយ៕

អត្ថបទ ៖ សំណាង

The post សមរភូមិក្រោយ បន្តកម្លាំងសាមគ្គីបរិច្ចាគឈាមទៅកាន់វីរកងទ័ព និងជនភៀសសឹក សម្រាប់ប្រើប្រាស់តាមភាពចាំបាច់ appeared first on Kampuchea Thmey Daily.

លោក អូន សាវុធ ប្រធានមន្ទីរពេទ្យបង្អែកខេត្តរតនគិរី ប្រាប់កម្ពុជាថ្មីថា គិតត្រឹមថ្ងៃទី ១៦ ខែធ្នូនេះ មានប្រជាពលរដ្ឋមកពីគ្រប់ទិសទី ចូលរួមបរិច្ចាគឈាមបានចំនួន ១១១នាក់ ក្នុងនោះស្រី ៤២នាក់។ លោកគូសបញ្ជាក់ថា គោលបំណងដែលប្រកាសអំពាវនាវនេះ ដើម្បីត្រៀមឈាមទាំងនោះជួយសង្គ្រោះជីវិតវីរកងទ័ពជួរមុខ ព្រោះឈាមរបស់អ្នក គឺជាថាមពលនៃជីវិត និងសេចក្តីសង្ឃឹម។ លោកឱ្យដឹងថា មន្ទីរពេទ្យបង្អែកខេត្តរតនគិរី ក៏មានក្រុមការងារបានចុះទៅកន្លែងភៀសសឹក កាលពីថ្ងៃទី១៥ ខែ ដើម្បីផ្តល់ការពិនិត្យ និងព្យាបាលជំងឺជូនប្រជាពលរដ្ឋភៀសសឹកនៅក្នុងជំរុំ ស្ថិតនៅខេត្តឧត្តមានជ័យ។

ជំរុំភៀសសឹកនោះ មានប្រជាជនកំពុងស្នាក់នៅសរុបចំនួន៣,៨១១គ្រួសារ ស្មើនឹង១៣,៥៨២នាក់ ក្នុងនោះមានអ្នកមកសម្រាកព្យាបាលជំងឺចំនួន៤នាក់ (ស្រី៣នាក់) ពិគ្រោះជំងឺចំនួន១៦២នាក់ (ស្រី១១៧នាក់) និងបានអប់រំសុខភាពចំនួន១២៣នាក់ (ស្រីចំនួន៩៨នាក់)៕

ដោយ៖ ខៀវ ចាប

The post មន្ទីរពេទ្យបង្អែកខេត្តរតនគិរី អំពាវនាវឱ្យចូលរួមបរិច្ចាគឈាមសម្រាប់ត្រៀមជួយវីរកងទ័ពរងរបួស appeared first on Kampuchea Thmey Daily.

កម្មវិធីនេះទទួលបានការចូលរួមក្រោមអធិបតីភាពពីសំណាក់ ឯកឧត្តម ផេង សិទ្ធី អភិបាលរងនៃគណៈអភិបាលខេត្តបាត់ដំបង, លោក ជុងហៀង ថាវសិទ្ធ ប្រធានទីផ្សារអភិវឌ្ឍន៏ផលិតផល ក្រុមហ៊ុន វ័ន ហ្រ្វេតធើនីធី (វីតាល់), លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាម, តំណាងសាកលវិទ្យាល័យជាតិបាត់ដំបង ថ្នាក់ដឹកនាំ មន្រ្ដីរាជការ ដៃគូអាជីវកម្មរបស់វីតាល់ និងសិស្ស-និស្សិតរាប់រយនាក់។  

លោក ជុងហៀង ថាវាសិទ្ធ ប្រធានទីផ្សារអភិវឌ្ឍន៏ផលិតផល ក្រុមហ៊ុនវីតាល់ បានមានប្រសាសន៍ថា ថ្ងៃនេះក្នុងនាម វីតាល់ លោកពិតជាមានសេចក្តីរីករាយឥតឧបមា ដែលបានចូលរួមជាថ្មីម្ដងទៀតជាមួយ «យុទ្ធនាការបរិច្ចាគឈាមសង្គ្រោះជីវីត» ក្រោមការគាំទ្រពីក្រសួងសុខាភិបាល និងមជ្ឈមណ្ឌលជាតិផ្តល់ឈាម។ លោកសូមថ្លែងអំណរគុណយ៉ាងជ្រាលជ្រៅដល់ រដ្ឋបាលខេត្ត និងសាកលវិទ្យាល័យជាតិបាត់ដំបង ដែលបានផ្តល់ការអនុញ្ញាត និងសហការរៀបចំ បង្កលក្ខណៈយ៉ាងប្រសើរសម្រាប់ពិធីនេះ។ នេះជាលើកទី៧ ក្នុងឆ្នាំ២០២៥ ដែលវីតាល់បានចូលរួមជាមួយមជ្ឈមណ្ឌលជាតិផ្តល់ឈាម ក្នុងយុទ្ធនាការបរិច្ចាគឈាមកន្លងមកនៅតាមបណ្ដាខេត្ត-ក្រុងទទួលបានអំណោយឈាមពីសប្បុរសជនប្រមាណជាង ៥,០០០នាក់។ បន្ថែមពីនេះ     វីតាល់បានចូលរួមផ្សព្វផ្សាយ និងបំផុសគំនិតបរិច្ចាគឈាមដោយស្ម័គ្រចិត្ត ចេញពីប្រជាពលរដ្ឋ សាធារណជន និងសិស្សានុសិស្ស ដើម្បីបំពេញស្តុកឈាមសុវត្ថិភាព ជួយសង្គ្រោះជនរងគ្រោះប្រកបដោយក្ដីសង្ឃឹម ដែលគម្រោងនេះគឺភ្ជាប់ទៅនឹងសកម្មភាពជាប្រចាំរបស់ វីតាល់ និងមូលនិធិ២៥រៀល ដែលជានិច្ចកាល ចូលរួមឧបត្ថម្ភគាំទ្រដល់កិច្ចការងារបរិច្ចាគឈាម។ 

ឯកឧត្តម ផេង សិទ្ធី អភិបាលរងនៃគណៈអភិបាលខេត្តបាត់ដំបង បានមានប្រសាសន៍ថា ការចូលរួមផ្ទាល់ពីវិស័យឯកជន និងសប្បុរសជននានា គឺពិតជាពុំអាចខ្វះបានឡើយ ដើម្បីជម្រុញឱ្យវិស័យសុខាភិបាលជាពិសេសចលនាបរិច្ចាគឈាមបន្តកើតឡើងជាបន្តបន្ទាប់ទាំងថ្នាក់ជាតិ និងសម្រាប់ខេត្តបាត់ដំបងផ្ទាល់។ ឆ្លៀតក្នុងឱកាសនេះ ឯកឧត្តម បានសម្តែងនូវការកោតសរសើរចំពោះការចូលរួមចំណែកលើការងារសង្គមដ៏ថ្លៃថ្លារបស់ វីតាល់ តួយ៉ាងកម្មវិធីថ្ងៃនេះដែលបានផ្ដួចផ្ដើមរៀបចំកម្មវិធីបរិច្ចាគឈាមដោយស្ម័គ្រចិត្ត នៅក្នុងមូលដ្ឋាននៃសាកលវិទ្យាល័យជាតិបាត់ដំបង។

បន្ថែមពីនេះ ឯកឧត្តម ក៏សូមចូលរួមអំពាវនាវដល់សប្បុរសជនពីគ្រប់ស្ថាប័នរដ្ឋ និងឯកជន បន្តចូលរួមសកម្មភាពបរិច្ចាគឈាមដោយស្ម័គ្រចិត្ត មិនមែនសម្រាប់តែក្នុងកម្មវិធីថ្ងៃនេះទេប៉ុណ្ណោះទេ តែនឹងបន្តបរិច្ចាគឈាមដោយស្ម័គ្រជាប្រចាំ ព្រោះនេះជាកាយវិការមនុស្សធម៌ដ៏មានតម្លៃបំផុត ដែលមិនអាចកាត់ថ្លៃបានសម្រាប់សង្គម និងមនុស្សជាតិរបស់យើង។ ឆ្លៀតក្នុងឱកាសដ៏វិសេសវិសាលនេះ លោកសូមធ្វើការសំដែងនូវការដឹងគុណចំពោះវីរៈកងទ័ពកម្ពុជា ដែលឈរជើងយ៉ាងអង់អាចក្លាហាន នៅគ្រប់ទិសសមរភូមិជួរមុខ ការពារអធិបតេយ្យភាព និងបូរណភាពទឹកដី និងសូមធ្វើការដឹងគុណ និងអរគុណយ៉ាងជ្រាលជ្រៅបំផុតជូនរាជរដ្ឋាភិបាល ដែលបាននឹងកំពុងខិតខំប្រឹងប្រែង ខ្នះខ្នែង អត់ធ្មត់ខ្ពស់ ដើម្បីដោះស្រាយបញ្ហាព្រំដែន ដោយសន្តិវិធី ដោយអនុវត្តនូវយុទ្ធសាស្ត្រ ស្ងាត់តែមិនស្ងៀម តាមរយៈការគោរពច្បាប់អន្តរជាតិ និងមធ្យោបាយការទូត ដើម្បីបញ្ចៀសសង្គ្រាម ការពារសន្តិភាព និងការពារបូរណភាពទឹកដី។

ជាក់ស្ដែងយុទ្ធនាការផ្ដល់ឈាមថ្ងៃនេះ  អាចកើតឡើងមានបានក៏ដោយសារការគាំទ្រពីសំណាក់អតិថិជន និងអ្នកប្រើប្រាស់របស់      វីតាល់ផ្ទាល់ ដែលជានិច្ចកាល វីតាល់ បានបន្តរក្សាបេសកកម្មក្នុងការកាត់ប្រាក់ចំណេញ២៥៛ ពីវីតាល់១ដប មកប្រើប្រាស់ជាមូលធនសម្រាប់ការងារសង្គម។  វីតាល់  នឹងបន្តរក្សានូវមូលដ្ឋាននៃការរៀបចំ និងឧបត្ថម្ភគាំទ្រដល់គ្រប់រូបភាពនៃសកម្មភាព និងយុទ្ធនាការនៃការបរិច្ចាគអំណោយឈាម ពីគ្រប់ស្ថាប័ន ដើម្បីចូលរួមចំណែកក្នុងការជួយសង្គ្រោះជីវិតអ្នកជំងឺដែលត្រូវការឈាមនៅតាម        ស្ថាប័នសុខាភិបាលនានា៕

   «វីតាល់ទឹកពិសាគុណភាពខ្ពស់, វីតាល់មោទនភាពផលិតផលជាតិ»

The post យុទ្ធនាការ “បរិច្ចាគឈាមសង្គ្រោះជីវិត” របស់វីតាល់ បានធ្វើដំណើរមកដល់ទឹកដីនៃខេត្តបាត់ដំបង appeared first on Kampuchea Thmey Daily.