ព័ត៌មានជាតិ

សមរភូមិក្រោយ បន្តកម្លាំងសាមគ្គីបរិច្ចាគឈាមទៅកាន់វីរកងទ័ព និងជនភៀសសឹក សម្រាប់ប្រើប្រាស់តាមភាពចាំបាច់

បានផុស

៤ ខែ មុន

នៅ

ថ្ងៃសុក្រ ២ មករា ២០២៦

ដោយ

អ្នកសមរភូមិក្រោយ បានបន្តកម្លាំងរួបរួម និងសាមគ្គីគ្នាបរិច្ចាគឈាមទៅកាន់វីរកងទ័ព និងជនភៀសសឹក នៅបន្ទាត់ព្រំដែន សម្រាប់ប្រើប្រាស់តាមភាពចាំបាច់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីស្ថានការណ៍បញ្ហាជម្លោះនៅតាមខ្សែបន្ទាត់ព្រំដែនរវាងកម្ពុជា-ថៃ មានការថមថយកម្ដៅបន្តិចក៏ពិតមែន ប៉ុន្តែទឹកចិត្តរួបរួមដ៏មុតស្រួចរបស់ប្រជាជនកម្ពុជាជាអ្នកសមរភូមិក្រោយ គឺមិនបាននៅស្ងៀមនោះឡើយ ពោលគឺនៅតែបន្តចលនាក្នុងការជួយជាជំនួយនានាតាមលទ្ធភាពដែលអាចធ្វើទៅបាន ដើម្បីផ្តល់ទៅកាន់វីរជនកងទ័ព និងជនភៀសសឹក។

ជាក់ស្ដែងកាលពីព្រឹកថ្ងៃទី ០១ ខែមករា ឆ្នាំ ២០២៦ ម្សិលមិញ ក្រុមការងារគ្រូពេទ្យស្ម័គ្រចិត្តរបស់ឯកឧត្ដមឧបនាយករដ្ឋមន្ត្រី ហ៊ុន ម៉ានី បានរៀបចំពិធីចូលរួមបរិច្ចាគឈាមដើម្បីជួយទៅជួរមុខ ដើម្បីរួមចំណែកជាកម្លាំងដ៏រឹងមាំបន្ថែមក្នុងការជួយការពារបូរណភាពទឹកដីកម្ពុជា ពីការឈ្លានពានពីសំណាក់រដ្ឋបរទេស។

ពិធីនេះធ្វើឡើងក្រោមវត្តមាន លោក លេង ផាលី រដ្ឋលេខាធិការក្រសួងផែនការ ជាសមាជិកគណៈអចិន្ត្រៃយ៍ គណៈកម្មាធិការកណ្តាលសហភាពសហព័ន្ធយុវជនកម្ពុជា (សសយក) និងជាប្រធានប្រតិបត្តិក្រុមការងារគ្រូពេទ្យស្ម័គ្រចិត្តរបស់ឯកឧត្ដមឧបនាយករដ្ឋមន្ត្រី ហ៊ុន ម៉ានី ដោយមានការចូលរួមពីសមាជិក សមាជិកា រួមទាំងអ្នកស្ម័គ្រចិត្តចូលរួមបរិច្ចាគឈាមជាង ៣០០ នាក់ ផងដែរ។

លោក ហាន សីហា សមាជិកក្រុមការងារក្រុមគ្រូពេទ្យស្ម័គ្រចិត្តឯកឧត្ដម ហ៊ុន ម៉ានី និងជាអគ្គនាយកក្រុមហ៊ុន ញូ-ធី-រីក បានឲ្យដឹងថា ក្រោមការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន និង សម្តេចមហាបវរធិបតី ហ៊ុន ម៉ាណែត បានលះបង់ រិះរកគ្រប់វិធី ធ្វើឲ្យប្រទេសមានសុខសន្តិភាព ជាពិសេស វីរកងទ័ព ១៨ នាក់ បានវិលមកមាតុភូមិជួបជុំគ្រួសារដូចដើមវិញ។ ក្នុងនាមជាអ្នកជួរក្រោយ និងមានឈាមជ័រជាខ្មែរ ចាំបាច់ត្រូវតែសាមគ្គីគ្នាជាធ្លុងមួយជាមួយរាជរដ្ឋាភិបាល ដើម្បីដោះស្រាយបញ្ហា និងពង្រឹងការការពារជាតិឲ្យបានរឹងមាំ ទោះស្ថិតក្នុងតម្លៃណាមួយក៏ដោយ។

អ្នកស្ម័គ្រចិត្តចូលរួមបរិច្ចាគឈាម បានសម្តែងនូវក្តីពេញចិត្តក្នុងការផ្តល់ឈាមសម្រាប់ជួយទៅកាន់ជួរមុខ ដែលនេះជាការបង្ហាញឲ្យឃើញពីស្មារតី និងទឹកចិត្តស្រលាញ់ជាតិមាតុភូមិរបស់ខ្លួន។

គួរបញ្ជាក់ថា កម្ពុជា ជាប្រទេសតូចមួយដែលជូរចត់ជួបឆ្អែតអស់ហើយចំពោះភ្នក់ភ្លើងសង្គ្រាម ដូច្នោះហើយបច្ចុប្បន្ននេះ ទាំងពលរដ្ឋទូទាំងប្រទេស និងរាជរដ្ឋាភិបាល គឺចង់បាន និងត្រូវការតែសន្តិភាពប៉ុណ្ណោះ។ ប្រទេសកម្ពុជា ពុំដែលមានបំណង ឬមហិច្ឆតាណាមួយ ក្នុងការទៅបង្កជម្លោះ ឬឈ្លានពានទឹកដីប្រទេសជិតខាងណានោះឡើយ៕

អត្ថបទ ៖ សំណាង