យុវជនសាសនាគ្រឹស្តប្រមាណ ៦០នាក់ បរិច្ចាគឈាមនៅមន្ទីរពេទ្យបង្អែកខេត្តមណ្ឌលគិរី ជួយសង្គ្រោះជីវិតអ្នកជំងឺ

យុវជនសាសនាគ្រឹស្តប្រមាណ ៦០នាក់ បានរួមគ្នាចូលរួមកម្មវិធីបរិច្ចាគឈាមដោយស្ម័គ្រចិត្ត នៅមន្ទីរពេទ្យបង្អែកខេត្តមណ្ឌលគិរី ក្នុងគោលបំណងចែករំលែកក្តីស្រឡាញ់ មនុស្សធម៌ និងជួយសង្គ្រោះជីវិតអ្នកជំងឺដែលកំពុងត្រូវការឈាមជាបន្ទាន់។ ការបរិច្ចាគឈាមត្រូវបានចាត់ទុកថាជាទង្វើដ៏មានតម្លៃ ព្រោះឈាមមួយប្លោកអាចជួយសង្គ្រោះជីវិតមនុស្សបានជាច្រើននាក់ និងជួយបំពេញតម្រូវការឈាមសម្រាប់ការព្យាបាលអ្នកជំងឺនៅតាមមន្ទីរពេទ្យ។

លោក ហ៊ុ កុសល អ្នកតំណាងសាខាសមាគមផ្សព្វផ្សាយពិភពលោក (ពួកជំនុំនៃព្រះ) ប្រចាំខេត្តមណ្ឌលគិរី បានឱ្យដឹងថា កាលពីថ្ងៃទី៧ ខែមិថុនា ឆ្នាំ២០២៦ សមាជិកសមាគមផ្សព្វផ្សាយពិភពលោក (ពួកជំនុំនៃព្រះ) មកពីខេត្តមណ្ឌលគិរី ខេត្តក្រចេះ និងខេត្តរតនគិរី សរុបប្រមាណ ៦០នាក់ បាននាំគ្នាចូលរួមបរិច្ចាគឈាមដោយស្ម័គ្រចិត្តនៅមន្ទីរពេទ្យបង្អែកខេត្តមណ្ឌលគិរី ដើម្បីផ្តល់ក្តីស្រឡាញ់ និងជួយសង្គ្រោះជីវិតអ្នកជំងឺដែលកំពុងត្រូវការឈាមជាបន្ទាន់។

លោកបានបញ្ជាក់ថា ការរួមគ្នាចូលរួមកម្មវិធីបរិច្ចាគឈាមនេះ ក៏ធ្វើឡើងក្នុងឱកាសអបអរសាទរខួបលើកទី៦២ នៃការបង្កើតពួកជំនុំនៃព្រះផងដែរ។

លោកបន្ថែមថា ការបរិច្ចាគឈាមមិនត្រឹមតែជាការផ្តល់ជំនួយដល់អ្នកដទៃប៉ុណ្ណោះទេ ប៉ុន្តែថែមទាំងជាការបង្ហាញពីក្តីស្រឡាញ់ មេត្តាករុណា និងការយកចិត្តទុកដាក់ចំពោះមនុស្សជាតិ ស្របតាមគោលការណ៍នៃការរស់នៅក្នុងសង្គមដែលប្រកបដោយសាមគ្គីភាព និងការជួយគ្នាទៅវិញទៅមក។

ជាមួយគ្នានេះ សកម្មភាពខាងលើក៏បានបង្ហាញពីស្មារតីទទួលខុសត្រូវចំពោះសង្គម ការចែករំលែក និងសាមគ្គីភាពរបស់យុវជន ដែលបានលះបង់ពេលវេលា និងកម្លាំងកាយចិត្ត ដើម្បីរួមចំណែកបំពេញតម្រូវការឈាមសម្រាប់ការព្យាបាលអ្នកជំងឺ និងករណីសង្គ្រោះបន្ទាន់ផ្សេងៗ។

លោកវេជ្ជបណ្ឌិត ទុយ ស្រស់ ប្រធានមន្ទីរពេទ្យបង្អែកខេត្តមណ្ឌលគិរី បានសម្តែងការកោតសរសើរចំពោះទឹកចិត្តដ៏ប្រពៃរបស់យុវជនទាំងអស់ និងបានអំពាវនាវឱ្យសាធារណជនបន្តចូលរួមបរិច្ចាគឈាមឱ្យបានកាន់តែច្រើន ដើម្បីធានាថាមានស្តុកឈាមគ្រប់គ្រាន់សម្រាប់ជួយសង្គ្រោះជីវិតអ្នកជំងឺនៅពេលចាំបាច់។

លោកបានគូសបញ្ជាក់ថា៖ «សកម្មភាពមនុស្សធម៌នេះ គឺជាគំរូដ៏ល្អមួយសម្រាប់យុវជន និងសហគមន៍ទូទៅ ក្នុងការចូលរួមធ្វើអំពើល្អ និងរួមគ្នាកសាងសង្គមដែលពោរពេញដោយក្តីស្រឡាញ់ សាមគ្គីភាព និងការចែករំលែក»៕

អត្ថបទ៖រៀម សុខហេង