លោកបន្តថា ការកើនឡើងនៃមូលដ្ឋានសុខាភិបាលនេះ ដើម្បីជួយសម្រួលដល់សមាជិក ប.ស.ស ក្នុងការទៅពិនិត្យពិគ្រោះ និងព្យាបាលជំងឺ និងឆ្លើយតបទៅនឹងចំនួនសមាជិក ប.ស.ស ដែលមានការកើនឡើងជាបន្តបន្ទាប់ ដោយសារប្រជាពលរដ្ឋមានជំនឿទុកចិត្ត និងយល់ដឹងច្បាស់ពីអត្ថប្រយោជន៍នៃ ប.ស.ស។ ជាមួយនឹងកំណើនដៃគូនេះ លោកបានអំពាវនាវដល់មូលដ្ឋានសុខាភិបាលដៃគូជាមួយ ប.ស.ស ទាំងអស់ ត្រូវអនុវត្តតាមការណែនាំ ដើម្បីបម្រើប្រជាពលរដ្ឋឱ្យបានរហ័ស ច្បាស់លាស់ និងប្រកបដោយវិជ្ជាជីវៈខ្ពស់។

ជាក់ស្តែងក្នុងរយៈពេល១១ខែឆ្នាំ២០២៥ ប.ស.ស. បានចុះបញ្ជី សមាជិកថ្មីបានចំនួន ៦៦៣,២១២នាក់ ស្រី ៣៤៣,៤៣៥នាក់។ បើគិតមកដល់សប្តាហ៍នេះ ប.ស.ស. មានសមាជិកសរុបចំនួន ៣,៤៧៤,៦២១នាក់ ស្រីចំនួន ១,៩១១,១៣២នាក់ មានកំណើនប្រមាណ៣០% ធៀបនឹងទិន្នន័យបច្ចុប្បន្នភាពសមាជិកកាលពីឆ្នាំ២០២៤។

គួរបញ្ជាក់ថា កាលពីថ្ងៃទី ២៩ ខែមករា ឆ្នាំ ២០២៥ ប.ស.ស បានចេញសេចក្ដីណែនាំស្ដីពីការពង្រឹងតួនាទីភារកិច្ចរបស់មូលដ្ឋានសុខាភិបាលដៃគូ ប.ស.ស ក្នុងការផ្តល់សេវាសុខាភិបាលជូនសមាជិក ប.ស.ស ប្រកបដោយតម្លាភាព និងប្រសិទ្ធភាព និងសង្គតិភាព។

លើសពីនេះចង់ឱ្យមូលដ្ឋានសុខាភិបាលជាដៃគូជាមួយ ប.ស.ស បំពេញការងារ និងបែបបទក្នុងការទទួលពិនិត្យព្យាបាលជំងឺសមាជិក ប.ស.ស កាន់តែមានការទទួលខុសត្រូវខ្ពស់ ប្រសិទ្ធភាព តម្លាភាព សង្គតិភាព និងគណនេយ្យភាព ក្នុងការបម្រើប្រជាពលរដ្ឋ យកចិត្តទុកដាក់ចំពោះសុខភាពពលរដ្ឋ ជៀសវាងការមិនពេញចិត្ត ឬបញ្ហាមិនប្រក្រតីណាមួយកើតឡើង៕

អត្ថបទ ៖ សំអឿន

The post ប.ស.ស. បានពង្រីកមូលដ្ឋានសុខាភិបាលជាដៃគូកើនឡើងដល់១ ៦១៥ កន្លែងនៅទូទាំងប្រទេស appeared first on Kampuchea Thmey Daily.

អគ្គនាយករង ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈរបស់ប្រទេសកម្ពុជាលោក ហេង សុផាន់ណារិទ្ធ បានឡើងទទួលពានរង្វាន់ពីលោក Jose Arnulfo A. Veloso ប្រធាន​សមាគម​សន្តិសុខ​សង្គមអាស៊ាន (ASSA) សម្រាប់ឆ្នាំ២០២៤-២០២៥ និងជាប្រធាន​អង្គភាព​សន្តិសុខសង្គម​សម្រាប់មន្រ្តីរដ្ឋាភិបាល (GSIS) នៃប្រទេសហ្វីលីពីន។

គិតទាំងលើកនេះទៀត ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈរបស់កម្ពុជា ទទួលបានពានរង្វាន់អង្គភាពឆ្នើមចំនួន ១០លើកហើយពីសមាគម ASSA ចំពោះការ​អនុវត្ត​របបសន្តិសុខសង្គម។

កិច្ចប្រជុំក្រុមប្រឹក្សាភិបាលនៃសមាគមសន្តិសុខសង្គមអាស៊ាន (ASSA) លើកទី៤២ នេះ រៀបចំឡើងក្នុងគោលបំណងពិនិត្យ និងពិភាក្សាអំពីវឌ្ឍនភាពនៃការអនុវត្តផែនការ​សកម្មភាព​ឆ្នាំ២០២៤-២០២៥ របស់សមាគម ASSA និងផែនការសកម្មភាពការងារបន្តសម្រាប់ឆ្នាំ២០២៥-២០២៦ របស់សមាគមផងដែរ។ ក្នុងឱកាសនោះតំណាង​ប.ស.ស. លោក ហេង សុផាន់ណារិទ្ធ បានចុះហត្ថលេខាលើការសន្យាប្រកបដោយចីរភាពរបស់សមាគម ASSA ផងដែរ។

សូមបញ្ជាក់ថា កិច្ចប្រជុំខាងលើ ប្រព្រឹត្តទៅនៅទីក្រុងបានដាស៊េរីបេហ្កាវ៉ាន់ នៃប្រទេស​ព្រុយណេ ដែលរៀបចំដោយមូលនិធិសោធនិវត្តន៍សម្រាប់កម្មករនិយោជិត (ETF) នៃប្រទេស​ព្រុយណេ ដែលជាប្រធានផ្លាស់វេននៃសមាគម ASSA បន្ទាប់ពីអង្គភាពសន្តិសុខ​សង្គម​សម្រាប់​មន្ត្រីរដ្ឋាភិបាល (GSIS) នៃប្រទេសហ្វីលីពីន ដោយមានការចូលរួមពីតំណាងស្ថាប័ន​សន្តិសុខ​សង្គមជាសមាជិកនៃសមាគម ASSA ចំនួន ២០ស្ថាប័ន ដែលមកពីបណ្តាប្រទេសអាស៊ានទាំង ១០៕

The post សមាគមសន្ដិសុខ​អាស៊ាន​ផ្ដល់​ពានរង្វាន់​អង្គភាព​ឆ្នើម​ដល់​ ប.ស.ស. កម្ពុជា appeared first on Kampuchea Thmey Daily.

១. ប័ណ្ណសមាជិក ប.ស.ស.

ប័ណ្ណសមាជិក ប.ស.ស. ចេញដោយ បេឡាជាតិសន្តិសុខសង្គម។ អត្ថប្រយោជន៍នៃប័ណ្ណនេះ សម្រាប់ប្រើសេវាផ្នែកថែទាំសុខភាពឥតគិតថ្លៃនៅតាមមណ្ឌលសុខភាព និងមន្ទីពេទ្យរដ្ឋ និងឯកជនទូទាំងប្រទេសដែលជាដៃគូជាមួយ ប.ស.ស. ផ្នែកហានិភ័យការងារ ផ្នែកប្រាក់សោធន និងតាវកាលិកនានា។ រាល់បន្ទុកចំណាយជារបស់បេឡាជាតិសន្តិសុខសង្គម។

២. ប័ណ្ណមូលនិធិសមធម៌សុខាភិបាល

ប័ណ្ណនេះមាន ២ប្រភេទ ទី១) សម្រាប់ ក្រុមប្រឹក្សាឃុំ-សង្កាត់-ស្រុក-ក្រុង-ខណ្ឌ-រាជធានី-ខេត្ត និងសម្រាប ទី២) សម្រាប់កម្មករនិយោជិតក្រៅប្រព័ន្ធ។ ប័ណ្ណមូលនិធិសមធម៌សុខាភិបាលចេញដោយ បេឡាជាតិសន្តិសុខសង្គម ដែលមានអត្ថប្រយោជន៍ សម្រាប់ប្រើប្រាស់សេវាផ្នែកថែទាំសុខភាពឥតគិតថ្លៃនៅតាមមណ្ឌលសុខភាព និងមន្ទីពេទ្យរដ្ឋ ទូទាំងប្រទេស។ ប័ណ្ណនេះ បន្ទុកចំណាយដោយ រាជរដ្ឋាភិបាល។

៣. ប័ណ្ណសមធម៌

ប័ណ្ណសមធម៌ គឺសម្រាប់គ្រួសារក្រីក្រកម្រិត១ និងកម្រិត២ ចេញដោយក្រសួងផែនការ ដែលអាចប្រើសេវាថែទាំសុខភាពឥតគិតថ្លៃ នៅតាមមណ្ឌលសុខភាព និងមន្ទីពេទ្យរដ្ឋ ទូទាំងប្រទេស និងអត្ថប្រយោជន៍មិនមែនវេជ្ជសាស្ត្រ (ឧបត្ថម្ភសេវាសាហ៊ុយធ្វើដំណើរ ថ្លៃអាហារអ្នកជំងឺ និងវិភាគទានបុណ្យសព)។ បន្ទុកចំណាយដោយ រាជរដ្ឋាភិបាល។

៤. ប័ណ្ណអាទិភាពទទួលសេវាសុខភាពសាធារណៈ

ប័ណ្ណនេះ សម្រាប់អ្នកជំងឺសម្រាកនៅមន្ទីរពេទ្យរដ្ឋ (គ្រួសារក្រីក្រដែលគ្មានប័ណ្ណសមធម៌)។ ជាប្រភេទប័ណ្ណចេញដោយក្រសួងសុខាភិបាល ដើម្បីប្រើសេវាផ្នែកថែទាំសុខភាពឥតគិតថ្លៃ នៅតាមមណ្ឌលសុខភាព និងមន្ទីរពេទ្យរដ្ឋទូទាំងប្រទេស និងអត្ថប្រយោជន៍មិនមែនវេជ្ជសាស្ត្រ (ឧបត្ថម្ភសេវាសាហ៊ុយធ្វើដំណើរ ថ្លៃអាហារអ្នកជំងឺ និងវិភាគទានបុណ្យសព)។ បន្ទុកចំណាយដោយ រាជរដ្ឋាភិបាល៕

The post ឈ្វេងយល់ អំពីប្រភេទប័ណ្ណសម្រាប់ប្រើប្រាស់សេវាថែទាំសុខភាពដោយឥតគិតថ្លៃ appeared first on Kampuchea Thmey Daily.

ថ្ងៃនេះកម្ពុជាថ្មី សូមបង្ហាញនូវមូលដ្ឋានសុខាភិបាលចំនួន ៩២កន្លែង ដែលទទួលស្គាល់ដោយបេឡាជាតិរបបសន្តិសុខសង្គម។

សម្រាប់រាជធានីភ្នំពេញ រួមមាន មន្ទីរពេទ្យកាល់ម៉ែត មន្ទីរពេទ្យព្រះកុសមៈ មន្ទីរពេទ្យមិត្តភាពខ្មែរៈ-សូវៀត មន្ទីរពេទ្យព្រះអង្គឌួង មណ្ឌលសុភាពទួលគោក មន្ទីរពេទ្យបង្អែកសម្តេចឪ មណ្ឌលសុខភាពទឹកថ្លា មន្ទីរពេទ្យបង្អែកពោធិចិនតុង មណ្ឌលសុខភាពស្ទឹងមានជ័យ មន្ទីរពហុព្យាបាល និងសម្ភពសុខលាភមេត្រី មណ្ឌលសុខភាពគោករកា និងមន្ទីរសម្រាកព្យាបាលមូលមិត្ត។

ចំពោះខេត្តកណ្តាល រួមមាន មន្ទីរពេទ្យបង្អែកជ័យជំនះ មណ្ឌលសុខភាពបែកចាន មន្ទីរពេទ្យបង្អែកអង្គស្នួល មន្ទីរពេទ្យបង្អែកកោះធំ មន្ទីរពេទ្យបង្អែកស្រុកស្អាង មណ្ឌលសុខភាពព្រែកអញ្ចាញ មន្ទីរពេទ្យបង្អែកប៊ុនរានី ហ៊ុន សែនរកាកោង មណ្ឌលសុខភាពវិហារសួគ៌ មណ្ឌលសុខភាពសំរោងធំ និងមន្ទីរពេទ្យបង្អែកខ្សាច់កណ្តាល។

ខេត្តកំពង់ស្ពឺ រួមមាន មន្ទីរពេទ្យបង្អែកកំពង់ស្ពឺ មន្ទីរពេទ្យបង្អែកឧដុង្គ មន្ទីរពេទ្យបង្អែកស្រុកគងពិសី។ ខេត្តស្វាយរៀងមាន មន្ទីរពេទ្យបង្អែកស្វាយរៀង មន្ទីរពេទ្យបង្អែកេជីភូ។ ខេត្តកំពង់ឆ្នាំង មន្ទីរពេទ្យបង្អែកខេត្តកំពង់ឆ្នាំង មន្ទីរពេទ្យបង្អែកកំពង់ត្រឡាច។ ខេត្តព្រះសីហនុ ​មន្ទីរពេទ្យបង្អែកខេត្តព្រះសីហនុ មន្ទីរសម្រាកព្យាបាល CT មណ្ឌលសុខភាពវាលរេញ មណ្ឌលសុខភាពអណ្តូងថ្ម និងមណ្ឌលសុភាពរាម។ ខេត្តសៀមរាប មន្ទីរពេទ្យបង្អែកសៀមរាប មណ្ឌលសុភាពពួក។ ខេត្តបន្ទាយមានជ័យ មន្ទីរពេទ្យបង្អែកប៉ោយប៉ែត(អូជ្រៅ) មន្ទីរពេទ្យបង្អែកខេត្តមិត្តភាពកម្ពុជា-ជប៉ុន មង្គមបុរី និងមន្ទីរពេទ្យបង្អែកសិរីសោភ័ណ។

ខេត្តកំពង់ចាម មន្ទីរពេទ្យបង្អែកស្រុកជើងព្រៃ មន្ទីរពេទ្យបង្អែកស្រុកព្រៃឈរ មន្ទីរពេទ្យបង្អែកខេត្តកំពង់ចាម និងមន្ទីរពេទ្យបង្អែកព្រែកកក់(ស្ទឹងត្រង់)។ ខេត្តត្បូងឃ្មុំ មន្ទីរពេទ្យបង្អែកស្រុកពញាក្រែក មន្ទីរពេទ្យបង្អែកស្រុកមេមត់ មន្ទីរពេទ្យបង្អែកស្រុកត្បូងឃ្មុំ។ ខេត្តក្រចេះ មន្ទីរពេទ្យបង្អែកខេត្តក្រចេះ មន្ទីរពេទ្យបង្អែកស្រុកឆ្លូង មន្ទីរពេទ្យបង្អែកស្រុកស្នួល។ ខេត្តព្រៃវែង មន្ទីរពេទ្យបង្អែកអ្នកលឿង មន្ទីរពេទ្យបង្អែកខេត្តព្រៃវែង មន្ទីរពេទ្យបង្អែកពារាំង មន្ទីរពេទ្យបង្អែកស្វាយអន្ទរ មណ្ឌលសុភាពក្តឿងរាយ និងមន្ទីរពេទ្យបង្អែកស្រុកកំចាយ។

ខេត្តតាកែវ មន្ទីរពេទ្យបង្អែកបាទី មន្ទីរពេទ្យភ្នែកតាកែវ មន្ទីរពេទ្យខេត្តតាកែវ និងមណ្ឌលសុខភាពត្រាំខ្នារ។ ខេត្តកំពត មន្ទីរពេទ្យបង្អែកខេត្តកំពត មន្ទីរពេទ្យបង្អែកកំពង់ត្រាច។ ខេត្តកែប មន្ទីរពេទ្យបង្អែកខេត្តកែប។ ខេត្តកោះកុង មន្ទីរពេទ្យបង្អែកស្រែអំបិល មន្ទីរពេទ្យបង្អែកខេត្តកោះកុង។ ខេត្តបាត់ដំបង មន្ទីរពេទ្យបង្អែកខេត្តបាត់ដំបង មណ្ឌលសុខភាពត្រាង មណ្ឌលខុភាពស្តៅ មន្ទីរពេទ្យបង្អែកសំពៅលូន មន្ទីរពេទ្យបង្អែកថ្មគោល។ ខេត្តប៉ៃលិន មន្ទីរពេទ្យបង្អែកប៉ៃលិន។ ខេត្តពោធិ៍សាត់ មន្ទីរពេទ្យបង្អែកខេត្តពោធិ៍សាត់ មណ្ឌលសុខភាពឈើតុំ មន្ទីរពេទ្យបង្អែកស្រុកក្រគរ មន្ទីរពេទ្យបង្អែកស្រុកភ្នំក្រវាញ មណ្ឌលសុខភាពស្នាមព្រះ និងមន្ទីរពេទ្យបង្អែកបាកាន។

ខេត្តកំពង់ធំ មន្ទីរពេទ្យបារាយណ៍-សន្ទុក មន្ទីរពេទ្យបង្អែកខេត្តកំពង់ធំ មន្ទីរពេទ្យបង្អែកស្ទោង។ ខេត្តស្ទឹងត្រែង មន្ទីរពេទ្យបង្អែកខេត្តស្ទឹងត្រែង។ ខេត្តរតនគិរី មន្ទីរពេទ្យបង្អែកខេត្តរតនគិរី មន្ទីរពេទ្យបង្អែកបកែវ។ ខេត្តមណ្ឌលគិរី មន្ទីរពេទ្យបង្អែកសែនមនោរម្យ មណ្ឌលសុខភាពអូរអាម មណ្ឌលសុខភាពកែវសីម៉ា។ ខេត្តឧត្តរមានជ័យ មន្ទីរពេទ្យបង្អែកខេត្តឧត្តរមានជ័យ មណ្ឌលសុខភាពអូរស្មាច់ មន្ទីរពេទ្យបង្អែកស្រុលអន្លង់វែង។ ខេត្តព្រះវិហារ មន្ទីរពេទ្យបង្អែក១៦មករា មណ្ឌលសុខភាពភ្នំដែក មណ្ឌលសុខភាពជាំក្សាន្ត និងមណ្ឌលសុខភាពស្រអែម៕

អត្ថបទ៖ គេន ម៉ាលិះ

The post មកស្គាល់មន្ទីរពេទ្យ និងមណ្ឌលសុភាពចំនួន ៩២កន្លែង ដែលជាដៃគូរបស់ ប.ស.ស appeared first on Kampuchea Thmey Daily.

នេះបើតាមការអះអាងរបស់លោក បណ្ឌិត ហេង សុផាន់ណារឹទ្ធ អគ្គនាយករង ប.ស.ស.និងជាអ្នកនាំពាក្យក្រសួងការងារនិងបណ្តុះបណ្តាលវិជ្ជាជីវៈ។

ក្រោយថ្មីៗនេះ មានជនអនាមិកបានបង្កើតគណនីតេឡេក្រាមក្លែងក្លាយ ដោយបានបន្លំឈ្មោះជាភ្នាក់ងារ ប.ស.ស. និងបានយកឡូហ្គោរបស់ ប.ស.ស. ទៅដាក់តាំងធ្វើជា Profile គណនី ដើម្បីឆបោកសមាជិក ប.ស.ស. ដោយព្យាយាមប្រើគ្រប់វិធីសាស្រ្តផ្សេងៗ ពោលបន្លំជាមន្រ្តី ប.ស.ស. ទាក់ទងទៅនរណាម្នាក់តម្រូវឱ្យបង់ប្រាក់ ឬស្នើសុំព័ត៌មានផ្ទាល់ខ្លួន លេខសម្ងាត់ធនាគារ ឬ ស្កែន QR Code ជាដើម…។ល។)

ដោយមើលឃើញពីបញ្ហានេះ លោកបណ្ឌិត បានណែនាំដល់សាធារណជន ដោយគូសបញ្ជាក់ថា សមាជិក ប.ស.ស. ជាបុគ្គលស្វ័យនិយោជន៍ និងអ្នកក្នុងបន្ទុកសមាជិក ប.ស.ស ទាំងអស់ អាចបង់ភាគទានមក ប.ស.ស. ចាប់ពីថ្ងៃទី១ ដល់ថ្ងៃទី១៥ នៃរៀងរាល់ខែ តាមរយៈធនាគារដៃគូ ប.ស.ស. ដែលរួមមាន៖ 
– ធនាគារ អេស៊ីលីដា ភីអិលស៊ី (ACLEDA BANK PLC.)
– ធនាគារ វឌ្ឍនៈអាស៊ីចំកាត់ (ABA BANK)
– ធនាគារ កាណាឌីយ៉ា ក.អ (CANADIA BANK PLC.)
– ធនាគារ ពាណិជ្ជកម្មក្រៅប្រទេស នៃកម្ពុជា (FTB Bank Cambodia) 
– ធនាគារ ភ្នំពេញ ពាណិជ្ជ (PPCBank)

លោក បណ្ឌិត បញ្ជាក់ទៀតថា ក្នុងករណីមានមន្ទិលសង្ស័យចំពោះករណីខាងលើនេះ សមាជិកប.ស.សទាំងអស់ អាចទំនាក់ទំនងទៅកាន់ក្រុមការងារតាមរយៈទូរស័ព្ទបន្ទាន់ 1286 ឬ 1297 ព្រោះថា ប.ស.ស.នៃក្រសួងការងារ និងបណ្តុះបណ្តាលវិជ្ជាជីវៈ មិនមានគោលការណ៍តម្រូវឱ្យសមាជិក ប.ស.ស. បង់ភាគទានតាមរយៈការស្កែន QR Code ឡើយ។

បើតាមលោកបណ្ឌិត គិតមកត្រឹមសប្តាហ៍ទី៣ ខែមេសា ឆ្នាំ២០២៥នេះ សមាជិកប.ស.ស. បានកើនឡើងដល់ ៣ ០៥៥ ៣៤៨នាក់ ស្រី ១ ៦៨៥ ៤៥៦នាក់ក្នុងនោះបុគ្គលដែលស្ថិតក្នុងវិស័យសាធារណៈចំនួន ៥០៦ ០៦៥នាក់ ស្រី ១៤៩៤១៥នាក់ បុគ្គលដែលស្ថិតក្នុងវិស័យឯកជន ចំនួន ១ ៨៦៦ ០៦៥នាក់ ស្រី ១១២៦ ១៨៩នាក់ បុគ្គលស្វ័យនិយោជន៍ចំនួន ៤៩៩ ៥៩៣នាក់ ស្រី ៣០៤០៨២នាក់ និងអ្នកក្នុងបន្ទុក១៨៣ ៦២៥នាក់ ស្រី ១០៥ ៧៧០នាក់៕អត្ថបទ៖សំអឿន

The post ការបង់ភាគទាន ប.ស.ស គឺធ្វើតាមកម្មវិធីធនាគារដៃគូតែមួយគត់ មិនមានការបង់តាម QR Code ឡើយ appeared first on Kampuchea Thmey Daily.

ការប្រកាសដាក់ឱ្យដំណើរការរបបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្តគឺជាការយកចិត្តទុកដាក់ខ្ពស់របស់រាជរដ្ឋាភិបាលទៅលើការគាំពារសុខមាលភាពរបស់ពលរដ្ឋកម្ពុជាទូទាំងប្រទេស សំដៅឱ្យប្រជាពលរដ្ឋអាចគ្រប់គ្រងការចំណាយលើបញ្ហាសុខភាព និងគ្រោះថ្នាក់ផ្សេងៗ ដែលអាចរក្សាលំនឹងប្រាក់ចំណូលក្នុងគ្រួសារ និងបង្កើនផលិតភាពការងារ។ 

លោករដ្ឋលេខាធិការ បានបង្ហាញថា គិតក្នុងរយៈពេលមួយឆ្នាំនេះ ប.ស.ស. នៃក្រសួងការងារ និងបណ្តុះបណ្តលវិជ្ជាជីវៈ បានចុះបញ្ជីសមាជិកក្នុងកម្មវិធីថែទាំសុខភាពតាមរបបភាគទានដោយស្ម័គ្រចិត្តមានចំនួនសរុប ៥៦៣ ៦៩៤នាក់ (បុគ្គលស្វ័យនិយោជន៍ចំនួន ៤២៦ ៤៨៦នាក់ និងអ្នកក្នុងបន្ទុកចំនួន ១៣៧ ២០៨នាក់)។

ជារួម ការពង្រីកការគ្របដណ្តប់ការថែទាំសុខភាពសម្រាប់សមាជិក ប.ស.ស. មានចំនួនកើនឡើងសរុបរហូតដល់ ២ ៦៨២ ៤៤២នាក់ ធៀបនឹងឆ្នាំ២០២៣ មានការកើនឡើងប្រមាណជា ៣៤%។ ក្នុងនោះ សមាជិក ប.ស.ស. តាមរបបភាគទានដោយស្ម័គ្រចិត្តបានទៅប្រើប្រាស់សេវានៅតាមមូលដ្ឋានសុខាភិបាលជាដៃគូ ប.ស.ស. សរុបមានចំនួន ៧៤១ ៧០៨ដង ក្នុងរយៈពេល១ឆ្នាំមកនេះ។

បន្ថែមពីនេះទៀត លោករដ្ឋលេខាធិការ លើកឡើងថា ប.ស.ស. ក៏ជាអង្គភាពមួយដែល រាជរដ្ឋាភិបាល បានចាត់តាំងឱ្យអនុវត្តកម្មវិធី ផ្តល់ប្រាក់ឧបត្ថម្ភបន្ថែមរបស់រាជរដ្ឋាភិបាលសម្រាប់ស្រ្តីមានផ្ទៃពោះ និងកុមារអាយុក្រោម២ឆ្នាំ ដែលជាសមាជិក ប.ស.ស. (របបភាគទានជាកាតព្វកិច្ច) ដោយរយៈពេលមួយឆ្នាំគិតពីខែវិច្ឆិកា ឆ្នាំ២០២៣ ដល់ខែវិច្ឆិកា ឆ្នាំ២០២៤ បានបើកផ្តល់ជូនម្តាយចំនួន ១១៦ ៣៦៦នាក់ និងកូនចំនួន ១១៤ ៤៩៨នាក់ គិតជាទឹកប្រាក់សរុប ៩៣ ០៣០លានរៀល។ ជាមួយគ្នានេះ បើគិតចាប់ពីអនុវត្តកម្មវិធីនេះកាលពីខែសីហា ឆ្នាំ២០២៣មក ប.ស.ស. បានបើកផ្តល់ជូនទៅម្តាយចំនួន ៥៦៥ ៤៤៣នាក់ និងកូនចំនួន ៥៥២ ៨៩៤ នាក់ គិតជាទឹកប្រាក់សរុប ២៨៣ ១៩៥លានរៀល ។

គួរបញ្ជាក់ថា ចាប់តាំងពីសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី បានប្រកាសដាក់ឱ្យអនុវត្តជាផ្លូវការកម្មវិធី របបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្ត ក្រុមការងារនៃក្រសួងការងារ និងបណ្តុះបណ្តាលវិជ្ជាជីវៈ បាននិងកំពុងបន្តចុះផ្សព្វផ្សាយតាមរាជធានី ខេត្ត និងចុះយុទ្ធនាការផ្ទាល់តាមរោងចក្រ សហគ្រាស ផ្ទះជួល ផ្សារ និងទីប្រជុំជនយ៉ាងសកម្មនៅរាជធានី ខេត្តទូទាំងប្រទេស រួមនិងការផ្សព្វផ្សាយតាមបណ្តាញសង្គមផ្លូវការដូចជា Facebook, Telegram, YouTube, TikTok និងតាមបណ្តាញសង្គមរបស់សិល្បករ តារាចម្រៀង និងអ្នកមានប្រជាប្រិយភាពក្នុងបណ្ដាញសង្គមយ៉ាងផុសផុល។

លើសពីនេះទៀត ក៏មានក្រុមការងារចុះទៅធ្វើការចុះបញ្ជិកាចល័តដោយផ្ទាល់នៅតាមទីប្រជុំជន ផ្សារ ក្រសួង ស្ថាប័ន និងបានដាក់ឱ្យអនុវត្តការចុះបញ្ជីតាម Online (Nssf Member App) ចាប់តាំងពីថ្ងៃទី០១ ខែសីហា ឆ្នាំ២០២៤មក ដើម្បីជួយសម្រួលបន្ថែមដល់ប្រជាជន ក្នុងការចុះបញ្ជី និងទទួលបានបណ្ណសមាជិក៕

The post រយៈពេល១ឆ្នាំ ការពង្រីកវិសាលភាពរបស់ ប.ស.ស. ដើរតួរនាទីយ៉ាងសំខាន់ក្នុងកិច្ចគាំពារសុខមាលភាពរបស់ពលរដ្ឋកម្ពុជា appeared first on Kampuchea Thmey Daily.

អាជីវករលក់ដូរតាមផ្លូវ វ័យ ៥៦ ឆ្នាំ ឈ្មោះ ផាន ភី កំពុងអង្គុយរង់ចាំការចាប់លេខរៀងចូលស្នើសុំប័ណ្ណ ប.ស.ស. នៅរាជធានីភ្នំពេញបាននិយាយថា លោក និងភរិយាបានធ្វើដំណើរពីក្រុងអរីយក្សត្រ មកស្នើសុំប័ណ្ណ ប.ស.ស. នៅភ្នំពេញ។ លោកបានដឹងច្បាស់ពីអត្ថប្រយោជន៍របស់ ប.ស.ស. ទាក់ទងការថែទាំសុខភាព និងព្យាបាលជំងឺ។ លោក បន្តថា កន្លងមក លោកមិនបានដឹងថាប្រជាពលរដ្ឋដែលកំពុងប្រកបរបរតាមផ្លូវអាចស្នើសុំប័ណ្ណ ប.ស.ស. បានទេ ព្រោះមានតែមន្រ្តីរាជការ និងបុគ្គលិកក្រុមហ៊ុន ប៉ុន្ដែពេលនេះវាជាប្រវត្តិសាស្រ្តថ្មីមួយសម្រាប់កម្ពុជា ក៏ដូចជារូបលោកដែរ។

លោក ផាន ភី បានទទួលព័ត៌មានពីបណ្ដាញសង្គម និងអ្នកជិតខាងនិយាយប្រាប់ ទើបលោកប្រញាប់នាំភរិយាមកស្នើសុំប័ណ្ណ ប.ស.ស. ដើម្បីទទួលបានអត្ថប្រយោជន៍ទាំងពីរនាក់។ លោកទាំងពីរនាក់ប្ដីប្រពន្ធមានវ័យកាន់ចំណាស់ ហើយក៏មានជំងឺប្រចាំកាយច្រើនផងដែរ។

លោក ផាន ភី បញ្ជាក់ថា៖ “ខ្ញុំក៏ចង់នាំម្ដាយខ្ញុំមកធ្វើប័ណ្ណ ប.ស.ស. ដែរ ព្រោះគាត់ឧស្សាហ៍ទៅពិនិត្យជំងឺ ហើយត្រូវចំណាយលុយជាច្រើនទាំងទិញថ្នាំពេទ្យ សេវាពិនិត្យ និងសេវាព្យាបាល ហើយបើម្ដាយខ្ញុំមានប័ណ្ណ ប.ស.ស. ដែរ គឺនឹងកាត់បន្ថយការចំណាយយ៉ាងច្រើន។ ឥឡូវនេះ គាត់នៅផ្ទះ តែខ្ញុំ និងប្រពន្ធខ្ញុំមកធ្វើសិន រួចហើយចាំនាំគាត់មកពេលក្រោយទៀត”។

ដូចជាអាជីវករជាច្រើនទៀតក្នុងរាជធានីភ្នំពេញដែរ អ្នកស្រី លៀង លីនដា អាជីវករនៅសង្កាត់ស្ទឹងមានជ័យ បានបង្ហាញអារម្មណ៍ពិតថា អ្នកស្រីពិតជាសប្បាយរីករាយខ្លាំងណាស់ ព្រោះមិនធ្លាប់នឹកស្មានថា ត្រឹមជាពលរដ្ឋអាជីវករធម្មតាមានមុខរបរតិចតួចនៅផ្ទះ ក៏អាចទទួលបានសិទ្ធិក្នុងការស្នើសុំប័ណ្ណសមាជិក ប.ស.ស. បានដែរ។ អ្នកស្រីបន្តថា ប័ណ្ណ ប.ស.ស. ពិតជាសំខាន់ណាស់សម្រាប់អ្នកស្រី ព្រោះវាអាចជួយសម្រាលលើបន្ទុកចំណាយបានច្រើនណាស់នៅពេលអ្នកស្រីឈឺទៅពេទ្យ ពិសេសពេលសម្រាលកូនមិនអស់ថ្លៃ ហើយថែមទាំងបានប្រាក់ឧបត្ថម្ភពី ប.ស.ស. ទៀត។ អ្នកស្រីបានថ្លែងអំណរគុណដល់រាជរដ្ឋាភិបាលដែលបានយកចិត្តទុកដាក់ចំពោះសុខភាពប្រជាពលរដ្ឋ។

អ្នកស្រី លីនដា លើកឡើងថា៖ “ពេលយើងទៅពិនិត្យសុខភាព ឬក៏ទៅព្យាបាល គឺយើងមិនចាំបាច់ចំណាយលុយផ្ទាល់ខ្លួនទេ ព្រោះយើងជាសមាជិក ប.ស.ស។ កន្លងមក ខ្ញុំគិតថា ខ្ញុំគ្មានឱកាសទទួលបានប័ណ្ណ ប.ស.ស. នោះទេ ដោយសារយើងមិនមែនជាបុគ្គលិកក្រុមហ៊ុន តែពេលនេះខ្ញុំមិនមានការព្រួយបារម្ភទៀតទេ ព្រោះ ប.ស.ស. អាចជួយសម្រាលបន្ទុកគ្រួសារខ្ញុំបានច្រើន”។

អាជីករ កែវ សុវណ្ណរិទ្ធ ជាអ្នកលក់ដូរនៅតាមផ្លូវ បាននិយាយទាំងទឹកមុខសប្បាយរីកយាយថា លោកបានប្រកបមុខរបបរលក់បាយនៅតាមផ្លូវអស់រយៈពេល ៦ ឆ្នាំហើយ ទើបតែទទួលបានប័ណ្ណ ប.ស.ស. ទេ ដោយសារកន្លងមក លោកមិនធ្លាប់ដឹងថា អាជីវករដូចពួកលោក ក៏អាចទទួលបានប័ណ្ណ ប.ស.ស. ដែរ។ លោកធ្លាប់តែលឺថា ប័ណ្ណ ប.ស.ស. អាចទទួលបានសម្រាប់តែមន្រ្តីរាជការ និងបុគ្គលិកក្រុមហ៊ុន ប៉ុន្ដែពេលនេះលោកក៏អាចទទួលបានការគាំពារទៅលើការថែទាំសុខភាព រួមទាំងប្រាក់បំណាច់មាតុភាពដូចទៅនឹងមន្រ្តីរាជការ និងអ្នកដែលកំពុងមានការងារធ្វើជាសមាជិក ប.ស.ស. ដទៃទៀតដែរ។

លោក សុវណ្ណរិទ្ធ បញ្ជាក់ថា៖ “អាជីវករគ្រប់គ្នា គួរតែទៅស្នើសុំប័ណ្ណ ប.ស.ស. ដើម្បីបានក្លាយជាសមាជិក និងអាចប្រើប្រាស់សេវាកម្មតាមរយៈការពិនិត្យសុខភាព និងការព្យាបាលជំងឺ។ ខ្ញុំទើបតែបានស្នើសុំប័ណ្ណ ប.ស.ស. ដែរ ហើយក៏បានប្រើប្រាស់ពីរលើករួចមកហើយ វាពិតជាជួយសម្រួលបន្ទុកខ្ញុំបានច្រើនពិតមែន”។

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា គិតត្រឹមថ្ងៃទី២០ ខែសីហា ឆ្នាំ២០២៤នេះ បេឡាជាតិសន្តិសុខសង្គម (ប.ស.ស.) នៃក្រសួងការងារ និងបណ្ដុះបណ្ដាលវិជ្ជាជីវៈ មានសមាជិក ប.ស.ស. ផ្នែកថែទាំសុខភាពតាមរបបភាគទានដោយស្ម័គ្រចិត្តសរុបចំនួន ៤០៤ ៤៥៧ នាក់ និងអ្នកក្នុងបន្ទុកសមាជិក ប.ស.ស. មានចំនួន ៨៧ ៩០៧ នាក់។ ក្នុងនោះបុគ្គលស្វ័យនិយោជន៍ និងអ្នកក្នុងបន្ទុកសមាជិក ប.ស.ស. ចំណាយត្រឹម ១៥ ៦០០ រៀលក្នុង ១ខែ តាមរយៈគោលនយោបាយថ្មីរបស់ប្រមុខរាជរដ្ឋាភិបាលកម្ពុជាដែលបានប្រកាសដាក់ចេញកាលពី ថ្ងៃទី១៤ ខែវិច្ឆិកា ឆ្នាំ២០២៣ កន្លងទៅនេះ។

លោក កត្តា អ៊ន បន្តថា ប្រជាពលរដ្ឋទទួលបានអត្ថប្រយោជន៍សំខាន់ៗរួមមាន ទី១. ការទទួលបានសេវាពិនិត្យពិគ្រោះយោបល់ ព្យាបាល និងថែទាំ។ ទី២. ការទទួលបានប្រាក់បំណាច់មាតុភាព និងទី៣. ការទទួលបានប្រាក់វិភាជន៍បូជាសព។ បន្ថែមពីនេះ សមាជិក ប.ស.ស. ជាបុគ្គលស្វ័យនិយោជន៍ និងអ្នកក្នុងបន្ទុកសមាជិក ប.ស.ស. ទាំងអស់អាចពិនិត្យពិគ្រោះយោបល់ និងព្យាបាលជំងឺនៅគ្រប់មន្ទីរពេទ្យជាដៃគូ ប.ស.ស. ទូទាំងប្រទេសដោយឥតគិតថ្លៃ៕

The post បុគ្គលស្វ័យនិយោជន៍ អាជីវករតាមផ្លូវ ថ្លែងអំណរគុណរដ្ឋាភិបាលអាណត្តិថ្មី គិតគូរសុខភាពប្រជាពលរដ្ឋ appeared first on Kampuchea Thmey Daily.

ថ្លែងក្នុងសិក្ខាសាលាពិគ្រោះយោបល់ស្ដីពី “វិធីសាស្ត្រប្រមូលភាគទានតាមវិធីសាស្ត្រតាមបទពិសោធន៍” នៅថ្ងៃទី២៧ ខែឧសភា នេះ លោក PAGUMAN SINGH ថ្លែងអំណរគុណ ចំពោះការរៀបចំសិក្ខាសាលានេះឡើង ដើម្បីសិក្សាពីមូលដ្ឋានគ្រឹះឱ្យបានច្បាស់ ជៀសវាងនូវហានិភ័យណាមួយដែលកើតមានឡើង ព្រោះប្រព័ន្ធសន្ដិសុខសង្គម គឺមានសារៈសំខាន់ណាស់សម្រាប់ប្រទេសនីមួយៗ ហើយយើងទាំងអស់គ្នាត្រូវរួមដៃគ្នា សាមគ្គីគ្នា ដើម្បីរក្សានូវនិរន្ដរភាពប្រព័ន្ធសន្ដិសុខសង្គមនេះឱ្យបានល្អប្រសើរបន្ថែមទៀត។

លោក ម៉េង ហុង អគ្គនាយក ប.ស.ស. ស្ដីទី នៃក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា ការបណ្តុះបណ្តាលនាឱកាសនេះមានសារៈប្រយោជន៍​ណាស់សម្រាប់សិក្ខាកាមទាំងអស់ ត្រូវចូលរួមពិភាក្សាផ្លាស់ប្តូរមតិយោបល់គ្នាប្រកបដោយពុទ្ធិសំដៅពង្រឹងចំណេះដឹងមូលដ្ឋាន ក្នុងការបំពេញការងារលើវិស័យសន្តិសុខសង្គម ជាពិសេសទៅលើវិធីសាស្រ្តប្រមូលភាគទានប្រកបដោយប្រសិទ្ធភាព សុវត្ថិភាព ដែលគ្រូឧទ្ទេសលោកនឹងបង្ហាត់​ បង្ហាញ​ ពីបទពិសោធន៍ល្អៗជាច្រើន រួម​ទាំង​ការចែករំលែកពីភាពជោគជ័យក្នុងការអនុវត្តទៅលើរបបសន្តិសុខសង្គមកន្លងមក។

តាមរយៈសិក្ខាសាលានេះ លោកអគ្គនាយក ប.ស.ស. ស្ដីទី សង្ឃឹមជឿជាក់ថា សិក្ខាកាមទាំងអស់នឹងចូលរួមយ៉ាងសកម្មក្នុងការសិក្សារៀនសូត្រក្នុងសិក្ខាសាលាពិគ្រោះយោបល់នេះ ជាពិសេសត្រូវយកចំណេះដឹងមកអភិវឌ្ឍប្រព័ន្ធសន្តិសុខសង្គមនៅកម្ពុជាឱ្យកាន់តែទូលំទូលាយ និងមានលក្ខណៈល្អប្រសើរ ដើម្បីធានាប្រព័ន្ធសន្តិសុខសង្គម នៅកម្ពុជាឱ្យកាន់តែមានការទទួលស្គាល់ពីគ្រប់មជ្ឈដ្ឋានជាតិ និងអន្តរជាតិ៕

អត្ថបទ៖ សំអឿន

The post អ្នកជំនាញអង្គការ ILO៖ ប្រព័ន្ធសន្ដិសុខសង្គមមានសារៈសំខាន់ណាស់សម្រាប់ប្រទេសនីមួយៗ appeared first on Kampuchea Thmey Daily.