បាក់អគារ Archives - Kampuchea Thmey Daily

ក្តីព្រួយបារម្ភទូទៅកើនឡើងកាន់តែខ្លាំង ក្នុងវិស័យសំណង់នៅថៃ

Minea Neu — Mon, 19 Jan 2026 07:02:03 +0000

ឧស្សាហកម្មសំណង់របស់ប្រទេសថៃកំពុងស្ថិតក្រោមការត្រួតពិនិត្យយ៉ាងតឹងរ៉ឹងនិងបង្កក្តីបារម្ភជាទូទៅ បន្ទាប់ពីមានឧបទ្ទវហេតុបាក់រលំជាញឹកញាប់បណ្តាលឲ្យគ្រោះថ្នាក់ស្លាប់មនុស្សជាបន្តបន្ទាប់។ ឧបទ្ទវហេតុទាំងនោះ រួមមានរថយន្តស្ទូចធ្លាក់លើរថភ្លើងដឹកអ្នកដំណើរដែលក្រឡាប់កាលពីសប្តាហ៍មុន និងការបាក់អគារការិយាល័យរដ្ឋមួយកន្លែងកាលពីមួយឆ្នាំមុន ដែលបានសម្លាប់កម្មករជិត១០០នាក់។

បាក់ស្ពាននៅថៃ។ Reuters

យោងតាមភ្នាក់ងារ AP, ការព្រួយបារម្ភជាសាធារណៈមានកម្រិតខ្ពស់ ជាពិសេសនៅទីក្រុងបាងកក ដោយសារគ្រោះថ្នាក់សំណង់ញឹកញាប់ និងជួនកាលបណ្តាលឱ្យស្លាប់លើគម្រោងផ្លូវធំៗផងដែរ។

ករណីគ្រោះថ្នាក់ចុងក្រោយនេះកើតឡើងដោយសារដងសន្ទូចនៃរថយន្តស្ទូចសំណង់មួយបានបាក់សង្កត់ និងសម្លាប់មនុស្ស២នាក់ កាលពីថ្ងៃព្រហស្បតិ៍សប្តាហ៍មុន ត្រឹមតែមួយថ្ងៃបន្ទាប់ពីសោកនាដកម្មរថភ្លើងដែលសម្លាប់មនុស្ស ៣២នាក់។

បញ្ហាចម្បងមានបីចំណុច ដូចជា អ្នកម៉ៅការសំណង់កត់ត្រាមិនច្បាស់ មានបញ្ហាជាប្រពន្ធ័ និងការព្រួយបារម្ភពីការចូលទុនជាមួយចិន។

ក្រោយកើតហេតុ សាធារណៈជន បានខឹងសម្បារ ផ្តោតលើក្រុមហ៊ុន Italian-Thai Development ដែលជាអ្នកម៉ៅការ ទទួលខុសត្រូវលើទីតាំងទាំងពីរ ដែលគ្រោះថ្នាក់បានកើតឡើងកាលពីសប្តាហ៍មុន។ ក្រុមហ៊ុនដែលត្រូវបានគេស្គាល់ថា Italthai ក៏ជាអ្នកម៉ៅការរួមគ្នារបស់អគារការិយាល័យរដ្ឋកម្ពស់ ៣៣ជាន់ ដែលបានដួលរលំ ខណៈដែលកំពុងសាងសង់ក្នុងខែមីនាឆ្នាំ២០២៥ បានសម្លាប់មនុស្សប្រហែល ១០០នាក់។

មិនតែប៉ុណ្ណោះ Italthai ដែលជាក្រុមហ៊ុនអភិវឌ្ឍន៍ដ៏ធំមួយ នៅក្នុងប្រទេសថៃដែលទទួលបានគម្រោងរបស់រដ្ឋាភិបាលជាច្រើន បានបដិសេធថាមិនបានធ្វើខុសនៅក្នុងករណីខាងលើឡើយ ដូចជាការធ្លាក់រថយន្តស្ទូចនាពេលថ្មីៗនេះផងដែរ។

ជាមួយគ្នានេះផងដែរ អតីតនាយករដ្ឋមន្រ្តីថៃ លោក អានុទីន ឆានវីរៈគុល (Anutin Charnvirakul) បានប្តឹងក្រុមហ៊ុនដែលធ្វើឱ្យមានគ្រោះថ្នាក់ជាដដែលផងដែរ ពិសេសលែងឱ្យវិនិយោគសាងសង់បន្ត។

ចំណែកអ្នកស៊ើបអង្កេតអាចស្វែងរកមូលហេតុបច្ចេកទេសនៃគ្រោះថ្នាក់ដូចជា កំហុសរបស់អ្នកសាងសង់ និងប្រើប្រាស់ឧបករណ៍មិនល្អ។

តែយ៉ាងណា អ្នករិះគន់និយាយថា សុវត្ថិភាពសំណង់ប្រឈមនឹងបញ្ហាជាប្រព័ន្ធកាន់តែខ្លាំង ដោយចង្អុលទៅលើបទប្បញ្ញត្តិដែលធូររលុង ការអនុវត្តមិនល្អ និងអំពើពុករលួយ។ ការស៊ើបអង្កេតដ៏យូរមួយបានកំណត់ថា ការដួលរលំអគារក្នុងខែមីនា ទោះបីជាបង្កឡើងដោយការរញ្ជួយដីក៏ដោយ គឺបណ្តាលមកពីគ្រឹះអគារខុសរចនាសម្ព័ន្ធ និងការគេចចេញពីបទប្បញ្ញត្តិនានា។

លោក Panudech Chumyen សាស្ត្រាចារ្យផ្នែកវិស្វកម្មសំណង់ស៊ីវិល នៅសាកលវិទ្យាល័យ Thammasat នៃទីក្រុងបាងកកបាននិយាយថា៖«ខ្ញុំមិនគិតថាប្រទេសថៃបរាជ័យផ្នែកចំណេះដឹងវិស្វកម្មឡើយ ឬសូម្បីតែផ្នែកបច្ចេកទេស។ ខ្ញុំគិតការបរាជ័យនេះ គឺជាប្រព័ន្ធតែម្តង វានៅមានចន្លោះប្រហោងជាច្រើនដែលខ្ញុំមិនដឹងថា យើងគួរចាប់ផ្តើមបញ្ឈប់វាដោយរបៀបណា»។

មិនតែប៉ុណ្ណោះ ការចូលរួមវិនិយោគរបស់ក្រុមហ៊ុនចិន ដែលធ្វើឱ្យដួលរលំអគារ ក៏ដូចជាគម្រោងផ្លូវដែក និងផ្លូវដែលមានបញ្ហា ក៏មានការលើកឡើងពីសាធារណៈជនផងដែរ។

ក្តីបារម្ភលើការអនុវត្តសំណង់របស់ចិនបានកើនឡើងនៅក្នុងប្រទេសថៃ បន្ទាប់ពីការដួលរលំកាលពីឆ្នាំមុន នៃគម្រោងការិយាល័យរដ្ឋដែលក្នុងនោះក្រុមហ៊ុនចិន China Railway No.១០ គឺជាអ្នកម៉ៅការរួមគ្នាជាមួយក្រុមហ៊ុន Italthai ។

ទោះបីជាយ៉ាងណា ឯកអគ្គរដ្ឋទូតចិនប្រចាំប្រទេសថៃ លោក Zhang Jianwei បានថ្លែងកាលពីថ្ងៃព្រហស្បតិ៍ថា ប្រទេសចិននឹងតម្រូវឱ្យក្រុមហ៊ុនរបស់ខ្លួនអនុវត្តតាមច្បាប់ នៅពេលចូលរួមក្នុងគម្រោងក្រៅប្រទេស។

លោកបន្តថា៖«ទីក្រុងប៉េកាំងមានឆន្ទៈណែនាំក្រុមហ៊ុនចិនឱ្យសហការយ៉ាងសកម្មជាមួយនឹងការស៊ើបអង្កេតរបស់អាជ្ញាធរថៃ» ៕

ប្រែសម្រួល៖ ណឺ មិនា

The post ក្តីព្រួយបារម្ភទូទៅកើនឡើងកាន់តែខ្លាំង ក្នុងវិស័យសំណង់នៅថៃ appeared first on Kampuchea Thmey Daily.

បាក់រលំអគារកំពុងសាងសង់ក្នុងទីក្រុងបាងកក របួសកម្មករ១៣នាក់

Bun sopheap — Mon, 07 Jul 2025 09:18:46 +0000

យោងតាមការចេញផ្សាយរបស់សារព័ត៌មាន The Nation នៅថ្ងៃទី៧ ខែកក្កដានេះ ការដ្ឋានសំណង់មួយក្នុងខណ្ឌ Min Buri ក្នុងទីក្រុងបាងកក បានបាក់រលំបង្កជាភាពចលាចលមួយរំពេចបណ្ដាលឲ្យកម្មករ ១៣នាក់រងរបួស។

(រូបភាព៖ The Nation)

ហេតុការណ៍នេះបានកើតឡើងកាលពីវេលាម៉ោង៧និង៥៥នាទីយប់ថ្ងៃអាទិត្យ នៅស្ថានីយ៍បូមទឹក Min Buri របស់អាជ្ញាធរទឹកក្រុង ដែលមានទីតាំងនៅ Soi Nimit Mai 6។

អង្គភាពសង្គ្រោះមកពីស្ថានីយ៍ពន្លត់អគ្គិភ័យ និងជួយសង្គ្រោះ បានឆ្លើយតបភ្លាមៗចំពោះហេតុការណ៍នេះ។ បើតាមអ្នកមើលការខុសត្រូវការដ្ឋាន នៅពេលកើតហេតុមានកម្មករចំនួន ១៦០នាក់ក្នុងការដ្ឋាន។ កម្មករទាំងអស់ត្រូវបានជម្លៀសដោយសុវត្ថិភាព ហើយគ្មាននរណាម្នាក់ជាប់នៅក្រោមគំនរបាក់បែកនោះទេ។ កម្មករចំនួន១៣នាក់ដែលរងរបួសត្រូវបានក្រុមសង្គ្រោះស្ម័គ្រចិត្តដឹកទៅកាន់មន្ទីរពេទ្យក្បែរនោះ។

របាយការណ៍បឋមបានបង្ហាញថា ការបាក់រលំបានកើតឡើងកំឡុងពេលសាងសង់គម្រោងហេដ្ឋារចនាសម្ព័ន្ធដ៏សំខាន់មួយ ដែលរួមមានអាងស្តុកទឹកស្អាតទំហំ ៧០,០០០ ម៉ែត្រគូប អគារចម្រោះទឹក ស្ពានតភ្ជាប់អាងទឹកថ្មី និងអាងដែលមានស្រាប់ និងកន្លែងផ្ទុកសារធាតុក្លរីន។ គម្រោងនេះបានចាប់ផ្តើមនៅថ្ងៃទី ១៩ ខែកក្កដា ឆ្នាំ ២០២៣ ហើយគ្រោងនឹងបញ្ចប់នៅថ្ងៃទី ៥ ខែកញ្ញា ឆ្នាំ ២០២៥ ជាមួយនឹងថវិកាចំនួន៦៩០ពាន់លានបាត។ ពេលនេះអាជ្ញាធរថៃកំពុងស៊ើបអង្កេតមូលហេតុនៃការបាក់រលំនិងការពារហានិភ័យបន្ថែមទៀត៕

(រូបភាព៖ The Nation)

(រូបភាព៖ AMARIN)

(រូបភាព៖ The Nation)

អត្ថបទ៖ ប៊ុន សុភាព

The post បាក់រលំអគារកំពុងសាងសង់ក្នុងទីក្រុងបាងកក របួសកម្មករ១៣នាក់ appeared first on Kampuchea Thmey Daily.

ថៃបញ្ចេញសំណងជាង១លានដុល្លារដល់គ្រួសារជនរងគ្រោះដោយរលំអគារ ខណៈ៣២នាក់នៅបាត់ខ្លួន

Bun sopheap — Mon, 28 Apr 2025 04:05:01 +0000

យោងតាមការចេញផ្សាយរបស់សារព័ត៌មានThe Nation នៅថ្ងៃទី ២៧ខែមេសានេះ ក្រសួងការងាររបស់ប្រទេសថៃ បានបង់ប្រាក់សំណងជាង៣៨លានបាត (១.១២លានដុល្លារ) រួចទៅហើយដល់ក្រុមគ្រួសារអ្នកស្លាប់ក្នុងហេតុការណ៍បាក់រលំអគារការិយាល័យសវនកម្មរដ្ឋ (SAO) ដោយសារឥទ្ធិពលនៃការរញ្ជួយដីនៅមីយ៉ាន់ម៉ា ខណៈរហូតដល់ពេលនេះ ការបាត់ខ្លះនៅមាន៣២នាក់ទៀត។

(រូបភាព៖ The Nation)

លោក Karom Phonphonklang អ្នកនាំពាក្យរងនៃទីស្តីការនាយករដ្ឋមន្រ្តី បានបង្ហាញទិន្នន័យពីក្រសួងការងារថាក្រសួងកំពុងផ្តល់សំណងដល់កម្មករ ដែលរងគ្រោះដោយការដួលរលំអគារការិយាល័យសវនកម្មរដ្ឋ (SAO) ក្នុងអំឡុងពេលរញ្ជួយដី។ ទិន្នន័យបានបញ្ជាក់ថា មនុស្សជាង ៥០នាក់នៅទូទាំងប្រទេសបានរងផលប៉ះពាល់ដោយជាង ៤០នាក់មកពីអគារ SAO ខណៈប្រាក់សំណងជាង ៣៨លានបាត (១.១២លានដុល្លារ) ត្រូវបានផ្តល់ជូនគ្រួសារសពរួចហើយ។

បើតាមលោក Karom កម្មករដែលរងរបួសក្នុងពេលដួលរលំក្នុងពេលបំពេញភារកិច្ច នឹងត្រូវរ៉ាប់រងដោយមូលនិធិសំណងផងដែរ ដោយក្នុងករណីមានរបួស ថ្លៃព្យាបាលនឹងត្រូវរ៉ាប់រងដោយផ្អែកលើថ្លៃចំណាយជាក់ស្តែងមិនលើសពី ៦៥,០០០ បាត(១៩២៨ដុល្លារ)។ ក្នុងករណីធ្ងន់ធ្ងរ ប្រសិនបើការព្យាបាលនៅក្នុងមន្ទីរពេទ្យឯកជន សំណងអតិបរមាគឺមួយលានបាត។

ប្រសិនបើព្យាបាលនៅមន្ទីរពេទ្យរដ្ឋតាំងពីចាប់ផ្តើមព្យាបាលរហូតដល់ជាសះស្បើយ ឬបើផ្ទេរពីមន្ទីរពេទ្យឯកជនមកមន្ទីរពេទ្យរដ្ឋដើម្បីបន្តការថែទាំ ថ្លៃព្យាបាលពិតប្រាកដនឹងត្រូវសងវិញរហូតដល់ជាសះស្បើយ។ សម្រាប់ប្រាក់សំណងប្រចាំខែកំឡុងពេលសម្រាកព្យាបាលតាមវេជ្ជបញ្ជាគឺរហូតដល់មួយឆ្នាំ ៧០% នៃប្រាក់ឈ្នួលរហូតដល់ ១៤០០០(៤១៥ ដុល្លារ)បាតក្នុងមួយខែនឹងត្រូវបានផ្តល់ជូន។

(រូបភាព៖ The Nation)

ក្នុងករណីបាត់បង់អវយវៈឬបាត់បង់សមត្ថភាពការងារ ប្រាក់សំណងប្រចាំខែនឹងត្រូវបង់ក្នុងអត្រា ៧០% នៃប្រាក់ឈ្នួលរហូតដល់ ១៤០០០ បាតក្នុងមួយខែ សម្រាប់រយៈពេលអតិបរមា ១២០ខែ។

ក្នុងករណីពិការអចិន្ត្រៃយ៍ សំណងប្រចាំខែនឹងត្រូវបង់ក្នុងអត្រា ៧០% នៃប្រាក់ឈ្នួលរហូតដល់ ១៤០០០ បាតក្នុងមួយខែសម្រាប់មួយជីវិត។

ក្នុងករណីមរណភាព ឬការបាត់ខ្លួន សំណងនឹងត្រូវបង់ក្នុងអត្រា ៧០% នៃប្រាក់ឈ្នួលរហូតដល់ ១៤០០០បាតក្នុងមួយខែ ដល់អ្នកទទួលផលដែលមានសិទ្ធិសម្រាប់រយៈពេល ១០ ឆ្នាំ រួមជាមួយនឹងការចំណាយបុណ្យសពចំនួន ៥០០០០បាត(១៤៨៣ ដុល្លារ) និងប្រាក់សោធននិវត្តន៍ពីមូលនិធិសន្តិសុខសង្គម។

គួរបញ្ជាក់ថាគិតត្រឹមថ្ងៃទី២៦ ខែមេសា ឆ្នាំ២០២៥ វេលាម៉ោង៦ល្ងាច មានជនរងគ្រោះសរុប ១០៣នាក់ក្នុងហេតុការណ៍បាក់អគារ SAO នៅទីក្រុងបាងកកដោយសាររញ្ជួយដីកាលពីខែមុន ក្នុងនោះស្លាប់ ៦២នាក់, របួស៩នាក់និង៣២នាក់បាត់ខ្លួន៕

(រូបភាព៖ The Nation)

អត្ថបទ៖ ប៊ុន សុភាព

The post ថៃបញ្ចេញសំណងជាង១លានដុល្លារដល់គ្រួសារជនរងគ្រោះដោយរលំអគារ ខណៈ៣២នាក់នៅបាត់ខ្លួន appeared first on Kampuchea Thmey Daily.

តើកម្មករ រងគ្រោះក្នុងហេតុការណ៍បាក់អគារនៅបាងកក ទទួលបានសំណងប៉ុន្មាន?

Sok Sovann — Mon, 07 Apr 2025 01:55:16 +0000

ប្រទេសថៃ នឹងផ្តល់សំណងដល់កម្មករដែលរងគ្រោះក្នុងហេតុការណ៍បាក់អគារសវនកម្មនៅទីក្រុងបាងកក ដោយគ្រូសារអ្នកស្លាប់នឹងទទួលបានប្រាក់មួយគ្រួសារចន្លោះពី១ទៅ២លានបាត (ជិត៣ម៉ឺនដុល្លារអាមេរិក ដល់ជិត ៥៨ ០០០ដុល្លារអាមេរិក)។

(រូបថត៖ Reuters)

តាមការចុះផ្សាយរបស់ Bangkok Post កាលពីថ្ងៃអាទិត្យទី៦ខែមេសាឆ្នាំ២០២៥, សេចក្តីប្រកាសនេះគឺធ្វើឡើងដោយអគ្គលេខាធិការក្រសួងការងារថៃលោក Boonsong Thapchaiyuth ហើយមិនត្រឹមតែសំណងទេ ក្រសួងក៏នឹងធានារ៉ាប់រងថ្លៃព្យាបាលកម្មកររបួស តាមរយៈការិយាល័យសន្តិសុខសង្គមផងដែរ។

ទន្លឹមនោះ លោកធានាថា ទាំងកម្មករថៃនិងអ្នកមកពីក្រៅប្រទេស គឺក្រសួងនឹងយកចិត្តទុកដាក់យ៉ាងស្មើភាពគ្នាបំផុត សូមកុំបារម្ភ ប៉ុន្តែជូនដំណឹងថា សាច់ញាតិអ្នកស្លាប់អាចដាក់សំណើសុំសំណង ហើយដំណើរការពិនិត្យនឹងធ្វើឡើង រីឯការផ្តល់ប្រាក់នឹងរួចរាល់ក្នុងរយៈពេល១៥ថ្ងៃ។

(រូបថត៖ Nation)

ទោះបីជាយ៉ាងណាក៏ដោយ កម្មករដែលនឹងទទួលបានសំណងទាំងនេះ ត្រូវតែជាកម្មករចុះឈ្មោះក្នុងគម្រោងសន្តិសុខសង្គម ចំណែកកម្មករដែលមិនស្ថិតក្នុងគម្រោងនេះ ក្រសួងនឹងវាយតម្លៃផ្សេង។

លើសពីនេះ ក្រោមគម្រោងសន្តិសុខសង្គម, រាល់កម្មករដែលបាត់បង់ការងារដោយគ្រោះរញ្ជួយដី នឹងទទួលបានប្រាក់ឧបត្ថម្ភ ៧៥០០បាត (២១៧ដុល្លារអាមេរិក) ក្នុងមួយខែ រយៈពេល៦ខែ។

(រូបថត៖ Nation)

សូមជម្រាបជាថ្មី រញ្ជួយដីកម្រិត៧.៧រ៉ិចទ័រ ជាមួយជម្រៅ១០គីឡូម៉ែត្រ បានវាយប្រហារប្រទេសមីយ៉ាន់ម៉ា ដោយបំផ្លាញទីក្រុង Mandalay យ៉ាងធ្ងន់ធ្ងរ ហើយឥទ្ធិពលរបស់វាក៏ជះមកដល់ប្រទេសថៃផងដែរ ដោយប៉ះពាល់ខ្លាំងលើរាជធានីបាងកក ដល់់ថ្នាក់បណ្តាលឲ្យបាក់រលំអគារសវនកម្មនេះ។

តួលេខមនុស្សស្លាប់នៅប្រទេសថៃ គិតត្រឹមថ្ងៃសុក្រគឺមានចំនួន២៤នាក់ ភាគច្រើនជាកម្មករសំណង់ ដែលបាត់បង់ជីវិតក្នុងការបាក់អគារសវនកម្មរដ្ឋនៅខណ្ឌចតុចក្រ។

អត្ថបទ៖ សុខ សុវណ្ណ

ចុចអាន៖ ថៃ សង្ស័យថា ដែកខុសស្តង់ដារ នាំឲ្យកើតគ្រោះមហន្តរាយបាក់អគារ អំឡុងពេលរញ្ជួយដី

The post តើកម្មករ រងគ្រោះក្នុងហេតុការណ៍បាក់អគារនៅបាងកក ទទួលបានសំណងប៉ុន្មាន? appeared first on Kampuchea Thmey Daily.

ថៃ សង្ស័យថា ដែកខុសស្តង់ដារ នាំឲ្យកើតគ្រោះមហន្តរាយបាក់អគារ អំឡុងពេលរញ្ជួយដី

Sok Sovann — Fri, 04 Apr 2025 08:22:29 +0000

ថៃ បានដាក់ការសង្ស័យថា មូលហេតុចម្បងមួយ ដែលនាំឲ្យបាក់អគារសវនកម្មនៅទីក្រុងបាងកក ក្រោយរងឥទ្ធិពលដោយគ្រោះរញ្ជួយដីពីប្រទេសមីយ៉ាន់ម៉ា កាលពីចុងខែមីនា គឺបណ្តាលមកពីការប្រើប្រាស់ដែកថែបដែលខុសស្តង់ដារយកទៅសាងសង់។

សំណល់នៃអគារសវនកម្មដែលបាក់រលំក្នុងទីក្រុង បាងកក (រូបថត៖ Reuters)

តាមការចុះផ្សាយរបស់ Bangkok Post នៅថ្ងៃសុក្រទី៤ខែមេសាឆ្នាំ២០២៥, លោកស្រីនាយករដ្ឋមន្ត្រី ផែថងថាន ស៊ីណាវ៉ាត្រា បានលើកឡើងថា វាអាចជាចម្លើយច្បាស់ៗដែលថា ដែកខុសស្តង់ដារជាមូលហេតុបណ្តាលឲ្យកើតមានគ្រោះមហន្តរាយបាក់អគារ អំឡុងពេលរញ្ជួយដី។ ពេលនេះរដ្ឋាភិបាលបើកការស៊ើបអង្កេតរួចហើយ ដោយការស៊ើបអង្កេតគឺផ្តោតសំខាន់ទៅលើគុណភាពដែកនៅការដ្ឋានសំណង់នេះតែម្តង។

នាយករដ្ឋមន្ត្រី ផែថងថាន ស៊ីណាវ៉ាត្រា (រូបថត៖ Reuters)

លោកស្រីបន្តថា ដែកថែបចំនួនប្រាំពីរប្រភេទ ត្រូវបានយកទៅធ្វើតេស្តរួចរាល់ ហើយរកឃើញថា មានដែកពីរប្រភេទដែលខុសស្តង់ដារ នោះគឺដែកកម្រាស់ ២០មិល្លីម៉ែត្រមួយប្រភេទនិង ៣២មិល្លីម៉ែត្រមួយប្រភេទ ដែលទិញពីក្រុមហ៊ុនចិន Xin Ke Yuan Steel Ltd នៅខេត្ត Rayong ប្រទេសថៃ។

សំណល់នៃអគារសវនកម្មដែលបាក់រលំក្នុងទីក្រុង បាងកក (រូបថត៖ Reuters)

តួលេខមនុស្សស្លាប់នៅប្រទេសថៃ គិតត្រឹមថ្ងៃសុក្រគឺមានចំនួន២៩នាក់ ភាគច្រើនជាកម្មករសំណង់ ដែលបាត់បង់ជីវិតក្នុងការបាក់អគារសវនកម្មរដ្ឋនៅខណ្ឌចតុចក្រ ខណៈ៣៣នាក់រងរបួស។

ងាកទៅប្រទេសមីយ៉ាន់ម៉ាឯណោះ មនុស្សស្លាប់ក្នុងគ្រោះធម្មជាតិដ៏មហន្តរាយនេះ បានកើនដល់ជិត៤ ០០០នាក់ ភាគច្រើននៅក្នុងទីក្រុង Mandalay ដែលជាចំណុចកណ្តាលនៃការរញ្ជួយ៕

អត្ថបទ៖ សុខ សុវណ្ណ

ចុចអាន៖ អាជ្ញាធរថៃប្រកាស បញ្ចប់ស្ថានភាពមហន្តរាយ នៅបាងកក លើកលែងតែតំបន់អគារដួលរលំ

The post ថៃ សង្ស័យថា ដែកខុសស្តង់ដារ នាំឲ្យកើតគ្រោះមហន្តរាយបាក់អគារ អំឡុងពេលរញ្ជួយដី appeared first on Kampuchea Thmey Daily.

ក្រសួងការងារ ក្រើនរំឭកម្ចាស់រោងចក្រសហគ្រាសពង្រឹងគុណភាពសំណង់ ក្រោយបាក់ដំបូលអគារ

Samean Lay — Thu, 01 Aug 2024 03:38:44 +0000

ក្រសួងការងារ និងបណ្តុះបណ្តាលវិជ្ជាជីវៈ បានក្រើនរំឭកជាថ្មីដល់ម្ចាស់រោងចក្រសហគ្រាសទាំងអស់ត្រូវពង្រឹងគុណភាពសំណង់ ដោយត្រូវសាងសង់តាមលក្ខណៈបច្ចេកទេស ចៀសវាបាក់រលំអគារបង្កគ្រោះថ្នាក់ដល់កម្មកររោងចក្រ និងខាតបង់ទ្រព្យសម្បត្តិ។

ការរំឭកជាថ្មីនេះ បន្ទាប់ពី មានករណីបាក់ដំបូលអគាររបស់ក្រុមហ៊ុនផលិតកាបូប វេនធូរ៉ា លេឌើវែរ (Ventura leatherwear) ដែលមានទីតាំងស្ថិតនៅតាមបណ្តោយផ្លូវជាតិលេខ៤១ ភូមិវាលវង់ ឃុំសែនដី ស្រុកសំរោងទង ខេត្តកំពង់ស្ពឺ កាលពីថ្ងៃទី៣០ ខែកក្កដា ឆ្នាំ ២០២៤។

រូបភាព៖ ហ្វេសប៊ុកសម្ព័ន្ធសហជីពចលនាកម្មករ

ជុំវិញហេតុការណ៍នេះ សម្ព័ន្ធសហជីពចលនាកម្មករ បានបង្ហោះសារនៅលើបណ្តាញសង្គមហ្វេសប៊ុក ដោយលើកឡើងថា ជាករណីស្រុតអគារ ប៉ុន្តែត្រូវបានមន្រ្តីអ្នកនាំពាក្យរងក្រសួងការងារ ច្រានចោល និងចាត់ទុកថាជាព័ត៌មានបង្កឱ្យមានការភាន់ច្រលំ។

លោក ស៊ុន មេសា អ្នកនាំពាក្យរងនៃក្រសួងការងារ និងបណ្តុះបណ្តាលវិជ្ជាជីវៈ បានបង្ហោះសារឆ្លើយតបនៅលើគណនីហ្វេសប៊ុកផ្ទាល់ខ្លួនថា ករណីនេះ មិនមែនជាការបាក់ស្រុតអគាររោងចក្រ ដូចការលើកឡើងរបស់សម្ព័ន្ធសហជីពចលនាកម្មករឡើយ គ្រាន់តែបាក់ដំបូលធ្លាក់គ្មានស្តង់ដាដែលថៅកែរោងចក្រតម្រូវឱ្យរុះរើចេញ។ លោកបន្ថែមថា ក្នុងករណីនេះ មិនមានមនុស្សគ្រោះថ្នាក់ ឬប៉ះពាល់ដល់កម្មករឡើយ។

ក្រោយហេតុការណ៍នេះ ក្រសួងការងារតាមរយៈលោក ស៊ុន មេសា ក៏បានណែនាំដល់រោងចក្រសហគ្រាសទាំងអស់ត្រូវពង្រឹង និងយកចិត្តទុកដាក់លើគុណភាពសំណង់ទៅតាមស្តង់ដាសំណង់របស់អាជ្ញាធរពាក់ព័ន្ធដើម្បីការពារបាននូវសុវត្ថិភាព និងផាសុខភាពដល់កម្មករនិយោជិតដែលកំពុងបម្រើការឱ្យស្របទៅតាមស្តង់ដាសុវត្ថិភាពការងារដែលមានចែងក្នុងច្បាប់របស់កម្ពុជា។

ជាមួយគ្នានេះលោក ស៊ុន មេសា ស្នើសុំបងប្អូនសហជីព តំណាងកម្មករ និងពលរដ្ឋទាំងអស់ដែលទទួលបានព័ត៌មានទាំងឡាយពាក់ព័ន្ធនានាក្នុងវិស័យការងារ កម្មករនិយោជិត ពលករ និងព័ត៌មានផ្សេងៗ បើមិនច្បាស់លាស់ សូមទាក់ទងមកក្រសួង ឬផ្តល់ដំណឹងនិងសួរនាំ តាមរយៈលេខប្រព័ន្ធHotline ១២៩៧ ឬ១២៨៦ ដែលបម្រើការ២៤ម៉ោង ដើម្បីទទួលបានពិតប្រាកដដោយចៀសវាងផ្សព្វផ្សាយព័ត៌មានមិនច្បាស់លាស់ ហើយធ្វើឱ្យមានការព្រួយបារម្ភ។
ផ្អែកតាមរូបភាព ដំបូលអគារដែលបានធ្លាក់ចុះរងការខូចខាតច្រើន ប៉ុន្តែស្ថានភាពសំណង់នៅជាន់ផ្ទាល់ដីពុំមានបាក់ស្រុតចុះក្រោមឡើយ៕

The post ក្រសួងការងារ ក្រើនរំឭកម្ចាស់រោងចក្រសហគ្រាសពង្រឹងគុណភាពសំណង់ ក្រោយបាក់ដំបូលអគារ appeared first on Kampuchea Thmey Daily.

បាក់អគារនៅចិន អ្នកស្លាប់កើនដល់ ៥៣នាក់

Sok Sovann — Fri, 06 May 2022 07:30:47 +0000

នៅថ្ងៃសុក្រទី៦ខែឧសភានេះ អាជ្ញាធរចិននិយាយថា មនុស្សចំនួន៥៣នាក់បានស្លាប់ នៅក្នុងហេតុការណ៍បាក់អគារ កណ្តាលប្រទេសចិន។ អាជ្ញាធរក៏បានប្រកាសផងដែរអំពីការបញ្ចប់បេសកកម្មជួយសង្គ្រោះ នៅក្នុងគ្រោះមហន្តរាយដែលគេស្តីបន្ទោស លើសំណង់ខុសច្បាប់។

អគារពាណិជ្ជកម្មក្នុងទីក្រុង Changsha បានបាក់កាលពីថ្ងៃសុក្រសប្តាហ៍មុន ដែលជំរុញឲ្យមានកិច្ចខិតខំប្រឹងប្រែងរយៈពេលប្រាំមួយថ្ងៃ ដើម្បីទាញអ្នកនៅរស់រានមានជីវិត ចេញពីបំណែកបាក់បែក។

ទូរទស្សន៍រដ្ឋ CCTV បានដកស្រង់សម្តីមន្ត្រីទីក្រុងដែលនិយាយថា “ការងារស្វែងរក និងជួយសង្គ្រោះនៅកន្លែងបាក់រលំអគារ Changsha បានបញ្ចប់ហើយ។ មនុស្សដែលជាប់ក្រោមគំនរបាក់បែក និងអ្នកដែលមិនអាចទំនាក់ទំនងបានពីកន្លែងកើតហេតុ គឺត្រូវបានគេរកឃើញទាំងអស់។ មនុស្ស ១០ នាក់ត្រូវបានជួយសង្គ្រោះ និង ៥៣នាក់បានស្លាប់”។

តាមការចុះផ្សាយរបស់ទីភ្នាក់ងារព័ត៌មាន ស៊ីនហួរ បានឲ្យដឹងថា ក្រុមអ្នកជួយសង្គ្រោះអាចស្វែងរកជនរងគ្រោះដែលនៅរស់ ដោយមានជំនួយពីសត្វសុនខហិតក្លិន ឧបករណ៍រាវរកសញ្ញាជីវិត និងដ្រូន ក៏ដូចជាពីសំឡេងស្រែក និងការគោះដោយអ្នកនៅរស់ផងដែរ។

ស្របពេលជាមួយគ្នានោះ មនុស្សចំនួន១១នាក់ រួមទាំងម្ចាស់អគារ និងអធិការសុវត្ថិភាពមួយក្រុម ត្រូវបានឃាត់ខ្លួនពាក់ព័ន្ធនឹងការបាក់រលំ រួមទាំងមនុស្ស២នាក់ ដែលត្រូវបានគេសង្ស័យថា ចូលរួមក្នុងអំពើខុសច្បាប់។

គួរបញ្ជាក់ថា ការបាក់អគារមិនមែនជារឿងចម្លែកទេនៅក្នុងប្រទេសចិន ដោយសារតែសុវត្ថិភាព និងស្តង់ដារសំណង់អន់ខ្សោយ ក៏ដូចជាអំពើពុករលួយក្នុងចំណោមមន្ត្រីដែលទទួលបន្ទុកអនុវត្តច្បាប់ផងដែរ។

កាលពីខែមករា ការផ្ទុះដែលបង្កឡើងដោយការលេចធ្លាយហ្គាស បានបណ្តាលឲ្យអគារមួយនៅទីក្រុង Chongqing ភាគនិរតី បាក់រលំសម្លាប់មនុស្សចំនួន ១៦ នាក់។

មនុស្សចំនួន២៥នាក់ ក៏បានបាត់បង់ជីវិតផងដែរនៅក្នុងខែមិថុនាឆ្នាំ២០២១ ពេលដែលការផ្ទុះហ្គាសបានវាយប្រហារបរិវេណលំនៅដ្ឋានមួយនៅទីក្រុង Shiyan៕

ប្រែសម្រួល៖ Vann Vann

ប្រភព៖ CNA

ចុចអាន៖ បាក់អគារនៅអ៊ីតាលី ស្លាប់ម្នាក់ ៨នាក់ទៀតបាត់ខ្លួន

The post បាក់អគារនៅចិន អ្នកស្លាប់កើនដល់ ៥៣នាក់ appeared first on Kampuchea Thmey Daily.

បាក់ស្រុតអគារនៅថៃ ពេលកំពុងចាក់ប្លង់សេ បណ្តាលឲ្យស្លាប់កម្មករ ៣ នាក់ និងរបួសធ្ងន់ ៤ នាក់

Sorn Phanith — Fri, 18 Feb 2022 02:29:03 +0000

ប្លង់សេ នៃអគារសំណង់មួយកន្លែង បានបាក់ស្រុតស្ទើរទាំងស្រុង បណ្តាលឲ្យសង្កត់ទៅលើកម្មករដែលកំពុងបំពេញការងារនៅខាងក្រោម រងរបួសធ្ងន់៤នាក់ និងបាត់បង់ជីវិតចំនួន៣នាក់ ខណ:ដែលអគារនេះកំពុងចាក់បេតុងនៅខាងលើ។ ហេតុការណ៍នេះ បានកើតឡើងនៅវេលាម៉ោង ២ រសៀល កាលពីថ្ងៃទី ១៧ ខែកុម្ភៈ ឆ្នាំ ២០២២ នៅក្នុងទីតាំងសំណង់មួយកន្លែងជាប់ផ្លូវព្រះរាម ៤ ក្នុងខណ្ឌឡុំភីនី ទីក្រុងបាងកក ប្រទេសថៃ។

យោងតាមប្រភពបានបញ្ជាក់ថា នៅមុនពេលកើតហេតុ គឺជាពេលដែលកំពុងចាក់ប្លង់សេនៅជាន់ខាងលើ ក៏ស្រាប់តែមានជ្រុងមួយបានបាក់ស្រុតចុះទៅខាងក្រោម បណ្តាលឲ្យសង្កត់ទៅលើកម្មករដែលកំពុងធ្វើការ ដែលជាក់ស្តែងនៅពេលនោះមានកម្មករស្លាប់ចំនួន ៣ នាក់ និងរងរបួសធ្ងន់ចំនួន ៤ នាក់ ដែលគេនៅមិនទាន់ដឹងថា មានកម្មករខ្មែរដែរឬយ៉ាងណានោះទេ ព្រោះនៅក្នុងទីតាំងនេះក៏មានកម្មករខ្មែររាប់រយនាក់ផងដែរ។

គួរបញ្ជាក់ថា អគារដែលកំពុងសាងសង់នេះ គឺទទួលម៉ៅការសាងសង់ដោយក្រុមហ៊ុន អ៊ីតាលៀន-ថៃ ឌីវើឡុបពើមែន ចាំកាត់ ដែលជាគម្រោងអភិវឌ្ឍន៍នៅលើផ្ទៃដី ១០៤ រ៉ៃ និងត្រូវចំណាយថវិកាប្រមាណ ១២០.០០០ លានបាត។ ក្រោយកើតហេតុ ទាំងសមត្ថកិច្ច ក៏ដូចជាមន្ត្រីពាក់ព័ន្ធ ពិសេសអង្គភាពជំនាញ កំពុងចុះសិក្សាលើបញ្ហានេះ៕

អត្ថបទ៖ សោ និយមរ័ត្ន

The post បាក់ស្រុតអគារនៅថៃ ពេលកំពុងចាក់ប្លង់សេ បណ្តាលឲ្យស្លាប់កម្មករ ៣ នាក់ និងរបួសធ្ងន់ ៤ នាក់ appeared first on Kampuchea Thmey Daily.

បាក់អគារ Archives - Kampuchea Thmey Daily

​ក្តី​ព្រួយ​បារម្ភ​ទូទៅ​កើន​ឡើង​កាន់តែខ្លាំង ​ក្នុង​វិស័យ​​សំណង់​នៅ​​ថៃ​

បាក់រលំអគារ​កំពុង​សាងសង់​ក្នុងទីក្រុង​បាងកក របួសកម្មករ​១៣​នាក់

ថៃ​បញ្ចេញ​សំណង​ជាង១លានដុល្លារ​​ដល់​គ្រួសារ​ជន​រង​គ្រោះ​ដោយ​រលំ​អគារ​ ខណៈ៣២នាក់នៅបាត់ខ្លួន

តើកម្មករ រងគ្រោះក្នុងហេតុការណ៍បាក់អគារនៅបាងកក ទទួលបានសំណងប៉ុន្មាន?

ថៃ សង្ស័យថា ដែកខុសស្តង់ដារ នាំឲ្យកើតគ្រោះមហន្តរាយបាក់អគារ អំឡុងពេលរញ្ជួយដី

ក្រសួងការងារ ក្រើនរំឭកម្ចាស់រោងចក្រសហគ្រាសពង្រឹងគុណភាពសំណង់ ក្រោយបាក់ដំបូលអគារ

បាក់អគារនៅចិន អ្នកស្លាប់កើនដល់ ៥៣នាក់

បាក់ស្រុតអគារនៅថៃ ពេលកំពុងចាក់ប្លង់សេ បណ្តាលឲ្យស្លាប់កម្មករ ៣ នាក់ និងរបួសធ្ងន់ ៤ នាក់

ក្តីព្រួយបារម្ភទូទៅកើនឡើងកាន់តែខ្លាំង ក្នុងវិស័យសំណង់នៅថៃ

បាក់រលំអគារកំពុងសាងសង់ក្នុងទីក្រុងបាងកក របួសកម្មករ១៣នាក់

ថៃបញ្ចេញសំណងជាង១លានដុល្លារដល់គ្រួសារជនរងគ្រោះដោយរលំអគារ ខណៈ៣២នាក់នៅបាត់ខ្លួន