បាក់រលំអគារ​កំពុង​សាងសង់​ក្នុងទីក្រុង​បាងកក របួសកម្មករ​១៣​នាក់

យោងតាមការចេញផ្សាយរបស់សារព័ត៌មាន​ The Nation នៅថ្ងៃទី៧ ខែកក្កដានេះ ការដ្ឋាន​សំណង់​មួយ​ក្នុង​ខណ្ឌ Min Buri ក្នុងទីក្រុង​បាងកក ​បានបាក់រលំបង្កជាភាពចលាចលមួយរំពេចបណ្ដាល​ឲ្យ​កម្មករ ១៣នាក់​រង​របួស។

ហេតុការណ៍​នេះ​បាន​កើតឡើង​កាលពី​វេលា​ម៉ោង​៧​និង​៥៥​នាទី​យប់ថ្ងៃអាទិត្យ នៅស្ថានីយ៍បូមទឹក Min Buri របស់អាជ្ញាធរទឹកក្រុង ដែលមានទីតាំងនៅ Soi Nimit Mai 6។

អង្គភាពសង្គ្រោះមកពីស្ថានីយ៍ពន្លត់អគ្គិភ័យ និងជួយសង្គ្រោះ បានឆ្លើយតបភ្លាមៗចំពោះហេតុការណ៍នេះ។ បើតាម​អ្នក​មើល​ការ​ខុស​ត្រូវ​ការ​ដ្ឋាន​ នៅ​ពេល​កើត​ហេតុ​មាន​កម្មករ​ចំនួន ១៦០​នាក់ក្នុងការដ្ឋាន។ កម្មករទាំងអស់ត្រូវបានជម្លៀសដោយសុវត្ថិភាព ហើយគ្មាននរណាម្នាក់ជាប់នៅក្រោមគំនរបាក់បែកនោះទេ។ កម្មករ​ចំនួន​១៣​នាក់​ដែល​រង​របួស​ត្រូវ​បាន​ក្រុម​សង្គ្រោះ​ស្ម័គ្រ​ចិត្ត​ដឹក​ទៅ​កាន់​មន្ទីរពេទ្យ​ក្បែរ​នោះ។

របាយការណ៍បឋមបានបង្ហាញថា ការបាក់រលំបានកើតឡើងកំឡុងពេលសាងសង់គម្រោងហេដ្ឋារចនាសម្ព័ន្ធដ៏សំខាន់មួយ ដែលរួមមានអាងស្តុកទឹកស្អាតទំហំ ៧០,០០០ ម៉ែត្រគូប អគារចម្រោះទឹក ស្ពានតភ្ជាប់អាងទឹកថ្មី និងអាងដែលមានស្រាប់ និងកន្លែងផ្ទុកសារធាតុក្លរីន។ គម្រោងនេះបានចាប់ផ្តើមនៅថ្ងៃទី ១៩ ខែកក្កដា ឆ្នាំ ២០២៣ ហើយគ្រោងនឹងបញ្ចប់នៅថ្ងៃទី ៥ ខែកញ្ញា ឆ្នាំ ២០២៥ ជាមួយនឹងថវិកាចំនួន៦៩០ពាន់លានបាត។ ពេលនេះអាជ្ញាធរថៃកំពុងស៊ើបអង្កេតមូលហេតុនៃការបាក់រលំនិងការពារហានិភ័យបន្ថែមទៀត៕

អត្ថបទ៖ ប៊ុន សុភាព