បាញ់សម្លាប់ Archives - Kampuchea Thmey Daily

ជនសង្ស័យដែលបាញ់សម្លាប់លោក លិម គិមយ៉ា ត្រូវបានសមត្ថកិច្ចឃាត់ខ្លួននៅខេត្តបាត់ដំបង

Ngoeul Narath — Wed, 08 Jan 2025 12:21:49 +0000

សមត្ថកិច្ចមូលដ្ឋានខេត្តបាត់ដំបង បានសហការជាមួយកម្លាំងសមត្ថកិច្ចនាយកដ្ឋានសន្ដិសុខផ្ទៃក្នុងនៃអគ្គស្នងការនគរបាលជាតិឃាត់ខ្លួន ជនសង្ស័យ ដែលជាឃាតករបាញ់សម្លាប់លោក លិម គិមយ៉ា អតីតតំណាងរាស្ត្រ នៃអតីតគណបក្សសង្គ្រោះជាតិ។ នេះបើតាមសមត្ថកិច្ច នៃស្នងការដ្ឋាននគរបាលខេត្តបាត់ដំបង ប្រាប់«កម្ពុជាថ្មី» នៅយប់ថ្ងៃទី០៨ ខែមករា នេះ។ ជនសង្ស័យជាឃាតករសញ្ជាតិថៃ ត្រូវបានសមត្ថកិច្ចកម្ពុជា ឃាត់ខ្លួននៅក្នុងភូមិសាស្ត្រស្រុកមោងឬស្សី ខេត្តបាត់ដំបង នៅវេលាម៉ោង០១៖៣០ រសៀល ថ្ងៃទី០៨ ខែមករា ឆ្នាំ២០២៥នេះ។

លោក លិម គិមយ៉ា ត្រូវបានជនសង្ស័យ នៅម៉ោងប្រមាណ ៥ កន្លះ នាល្ងាចថ្ងៃអង្គារ ៧ មករា ឆ្នាំ២០២៥ ក្រុងបាងកកប្រទេសថៃ ក្នុងពេលធ្វើដំណើរជាមួយភរិយា និងឳពុកមាជាជនជាតិបារាំង។

ជនសង្ស័យដែលបាញ់លោក លិម គិមយ៉ា នៅក្រុងបាងកក គឺមានឈ្មោះថា អេកាឡាក់ ភាណយ (Ekkalak Pheanou) ជាអតីតទាហានជើងទឹកថៃ។

បើតាមការចេញផ្សាយរបស់ The Nation ជនសង្ស័យជាឃាតកររូបនេះជាប់សង្ស័យពីបទឃាតកម្មគិតទុកជាមុន ប្រើប្រាស់អាវុធនៅទីសាធារណៈដោយគ្មានមូលហេតុត្រឹមត្រូវ និង ការបាញ់បោះសេរីតាមទីសាធារណៈ៕

The post ជនសង្ស័យដែលបាញ់សម្លាប់លោក លិម គិមយ៉ា ត្រូវបានសមត្ថកិច្ចឃាត់ខ្លួននៅខេត្តបាត់ដំបង appeared first on Kampuchea Thmey Daily.

Justin កាន់ទុក្ខ តារារ៉េបល្បីម្នាក់ត្រូវគេបាញ់សម្លាប់រំលងអធ្រាត្រ

សាង ស្រីល័ក្ខ — Wed, 24 Apr 2024 06:57:53 +0000

ទីភ្នាក់ងារសារព័ត៌មានបរទេសរាយការណ៍ថា តារារ៉េបដ៏ល្បី Chris King ត្រូវបានបាញ់សម្លាប់ក្នុងអាយុ ៣២ឆ្នាំ នៅទីក្រុង Nashville រដ្ឋ Tennessee នៅវេលាម៉ោង ២ និង ៣០ នាទីរំលងអធ្រាត្រ កាលពីថ្ងៃសៅរ៍ ទី ២០ ខែមេសា ។ ដំណឹងនេះ បានធ្វើឲ្យទស្សនិកជនជាច្រើន មានការភ្ញាក់ផ្អើលយ៉ាងខ្លាំងផងដែរ។

អាជ្ញាធរបាននិយាយថា Chris King គឺជាមិត្តស្និទ្ធស្នាលជាមួយ Justin Bieber, Machine Gun Kelly, Keke Palmer និង Trippie Redd ពួកគេក៏ស្ថិតនៅហេតុការណ៍ផងដែរ។ King និងមិត្តភ័ក្តិមួយចំនួនបានដើរលេងនៅពេលយប់ ហើយជនសង្ស័យបីនាក់ប៉ុនប៉ងប្លន់ពួកគេ ទើបឈានដល់ការបាញ់ប្រហារបានកើតឡើង។

នៅពេលនោះ Chris King បានរងរបួសយ៉ាងធ្ងន់ធ្ងរ ហើយត្រូវបានគេនាំទៅមជ្ឈមណ្ឌលវេជ្ជសាស្ត្រសាកលវិទ្យាល័យ Vanderbilt រហូតដល់គាត់ស្លាប់តែម្ដង។ មកដល់ពេលនេះ មន្ត្រីប៉ូលិសបាននិយាយ អង្គភាពស៊ើបអង្កេតករណីមនុស្សឃាតកំពុងធ្វើការយ៉ាងខ្លាំង។

ថ្វីបើយ៉ាងណាក៏ដោយ ក្រោយដំណឹងមរណភាពរបស់ King មិត្តល្បីៗរបស់លោកបានចូលរួមរំលែកទុក្ខយ៉ាងក្រៀមក្រំបំផុត ខណៈមិត្តរួមជិតដិត Justin Bieber បានសរសេរសាររំលែកទុក្ខថា “ស្រឡាញ់ប្អូនណាស់! រឿងនេះពិតជាឈឺចាប់សម្រាប់ខ្ញុំនិងគ្រួសារ! សូមឲ្យក្រុមគ្រួសារគាត់កាន់ទុក្ខ សូមទៅកាន់ស្ថានបរមសុខ”៕

អត្ថបទ៖ សាង ស្រីល័ក្ខ

ចុចអាន៖Kim Ji Won ប្រឈមនឹងការចោទប្រកាន់ពីបទគេចពន្ធ ទិញផ្ទះតម្លៃ ៤.៦ លានដុល្លារ

The post Justin កាន់ទុក្ខ តារារ៉េបល្បីម្នាក់ត្រូវគេបាញ់សម្លាប់រំលងអធ្រាត្រ appeared first on Kampuchea Thmey Daily.

បុរសអាមេរិកម្នាក់ត្រូវប៉ូលិសចាប់ពីបទ រៀបផែនការសម្លាប់មនុស្សនៅអតីតវិទ្យាល័យរបស់ខ្លួន

Boa Sokunveary — Mon, 09 Oct 2023 09:28:43 +0000

បុរសម្នាក់នៅរដ្ឋ Florida ត្រូវប៉ូលិសចាប់ខ្លួន ព្រោះរកឃើញផែនការសម្លាប់មនុស្សទាំងអស់នៅអតីតវិទ្យាល័យ ក្នុងថ្ងៃខួបកំណើត ២២ ឆ្នាំរបស់គាត់ ។

លោក Henry Horton អាយុ ១៩ ឆ្នាំ ត្រូវប៉ូលិសឆែកឆេរឡាន ដោយសារចង្កៀងមុខខូច បែរជារកឃើញក្រដាសរៀបគម្រោងការសម្លាប់មនុស្សទៅវិញ ។

នៅលើក្រដាសសរសេរថា “សម្លាប់គ្រប់គ្នានៅវិទ្យាល័យ Okeechobee ដោយប្រើកាំភ្លើងរបស់ខ្ញុំ” ។ Horton សារភាពថា វិទ្យាល័យ Okeechobee គឺជាអតីតសាលារបស់ខ្លួនដែលរៀនចប់តាំងពីខែឧសភា ឆ្នាំ ២០២២ ហើយគាត់នឹងសម្លាប់ពួកគេនៅថ្ងៃទី២ ខែមករា ឆ្នាំ ២០២៦ ។

ក្រៅពីនេះ គម្រោងការសម្លាប់មនុស្សជាច្រើនរបស់ Horton ត្រូវបានគេរកឃើញរួមមាន ការបង្កើតគ្រាប់បែក សម្លាប់មនុស្សជាក្រុម និងផែនការសម្លាប់ម្ដាយចុងជាដើម ។

ជាក់ស្ដែងបុរសខាងលើធ្លាប់បាញ់សម្លាប់មនុស្ស ១៧ នាក់នៅវិទ្យាល័យ Marjory Stoneman Douglas ក្នុងឆ្នាំ ២០១៨ រួចមកហើយ ចំណែកឯប៉ូលិសក៏រឹបអូសបានកាំភ្លើងខ្លីមួយដើមដែល Horton លួចពីម្ដាយគាត់ផងដែរ ។

ទោះបីម្ដាយរបស់គាត់មិនអាចជួយដោះសារអ្វីបាន ប៉ុន្តែអ្នកស្រីព្យាយាមសំណូមពរឲ្យ Horton ទទួលសេវាព្យាបាលផ្លូវចិត្ត ជាជាងប្រឈមមុខនឹងការកាត់ទោសវិញ ។ សូម្បីម្ដាយចុងរបស់ Horton ក៏មិនជឿថា កូនគាត់កំពុងរៀបគម្រោងសម្លាប់នេះនោះដែរ ។

បន្ថែមពីលើនោះ លោកនឹងបង្ហាញខ្លួនក្នុងតុលាការនៅថ្ងៃទី៦ ខែវិច្ឆិកាខាងមុខនេះ ដោយសារ Horton ត្រូវបានចោទប្រកាន់ពីបទគំរាមសម្លាប់ជាលាយលក្ខណ៍អក្សរ ឬធ្វើបាបបុគ្គលផ្សេងទៀត ដូច្នេះគាត់ត្រូវឃុំខ្លួននៅពន្ធនាគារ Palm Beach ហើយប្រាក់ធានាមានចំនួន ១ លានដុល្លារឯណោះ ៕

ប្រែសម្រួល៖ វារី

ប្រភព៖ newyorkpost

ចុចអាន៖ ការរើសអើងពណ៌សម្បុរនៅ Florida នាំឲ្យខ្មាន់កាំភ្លើង បាញ់សម្លាប់មនុស្ស ៣នាក់

The post បុរសអាមេរិកម្នាក់ត្រូវប៉ូលិសចាប់ពីបទ រៀបផែនការសម្លាប់មនុស្សនៅអតីតវិទ្យាល័យរបស់ខ្លួន appeared first on Kampuchea Thmey Daily.

ប្ដីប្រពន្ធមួយគូ ដែលគេលួចកាប់ប្រហារកាលពីប៉ុន្មានឆ្នាំមុន ក្នុងរោងចិញ្ចឹមទា ពេលនេះត្រូវខ្មាន់កាំភ្លើងបាញ់សម្លាប់ដល់ក្រោមផ្ទះ

អ៊ិន ពិសី — Sat, 12 Aug 2023 04:08:31 +0000

ប្ដីប្រពន្ធមួយគូ ដែលគេលួចកាប់ប្រហារកាលពីប៉ុន្មានឆ្នាំមុន ពេលនេះត្រូវបានខ្មាន់កាំភ្លើងមិនស្គាល់អត្តសញ្ញាណ បាញ់សម្លាប់ស្លាប់យ៉ាងអាណោចអាធ័ម នៅទីតាំងរោងចិញ្ចឹមទា ស្រុកខ្សាច់កណ្ដាល ខេត្តកណ្ដាល។

ហេតុការណ៍ដ៏រន្ធត់នេះ បានកើតឡើងនៅវេលាម៉ោង ៣ និង ៣០ នាទីទៀបភ្លឺ ថ្ងៃទី ១២ ខែសីហា ឆ្នាំ ២០២៣ ចំណុចក្រោមផ្ទះរបស់ជនរងគ្រោះ ដែលជាទីតាំងរោងចិញ្ចឹមទា ភូមិថ្មី ឃុំសន្លុង ស្រុកខ្សាច់កណ្ដាល ខេត្តកណ្ដាល។ ចំណែកឯជនរងគ្រោះដែលត្រូវខ្មាន់កាំភ្លើងបាញ់សម្លាប់នោះ គឺ ឈ្មោះ ម៉ុច ម៉ៅ ត្រូវជាប្ដី និងប្រពន្ធឈ្មោះ គល់ ហាន់។

លោក ម៉ែន សុខឃឿន អធិការស្រុកខ្សាច់កណ្ដាល បានបញ្ជាក់ឲ្យដឹងនៅព្រឹកថ្ងៃទី ១២ សីហា នេះថា «ពិតជាមានករណីឃាតកម្មបាញ់សម្លាប់ទាំងប្ដី និងប្រពន្ធ ប្រាកដមែន»។

លោកអធិការស្រុកខ្សាច់កណ្ដាល បន្តថា បច្ចុប្បន្ន កម្លាំងសមត្ថកិច្ច បាននិងកំពុងស្រាវជ្រាវលើករណីឃាតកម្មនេះ។

គួរបញ្ជាក់ថា កាលពីប៉ុន្មានឆ្នាំមុន ក្រុមគ្រួសារជនរងគ្រោះ ក៏ត្រូវបានគេកាប់សុសសាច់ទាំងយប់ ស្ទើរស្លាប់ នៅក្នុងទ្រង់ទា របស់ជនរងគ្រោះ ស្ថិតនៅភូមិ-ឃុំខាងលើ ដោយរហូតមកទល់ពេលនេះ ពុំទាន់រកមុខជនដៃដល់ឃើញនៅឡើយ ស្រាប់តែពេលនេះត្រូវខ្មាន់កាំភ្លើងមកបាញ់សម្លាប់ បណ្ដាលឲ្យស្លាប់ទាំង ២ នាក់តែម្ដង៕

អត្ថបទ ៖ ពិសី

The post ប្ដីប្រពន្ធមួយគូ ដែលគេលួចកាប់ប្រហារកាលពីប៉ុន្មានឆ្នាំមុន ក្នុងរោងចិញ្ចឹមទា ពេលនេះត្រូវខ្មាន់កាំភ្លើងបាញ់សម្លាប់ដល់ក្រោមផ្ទះ appeared first on Kampuchea Thmey Daily.

ឃាតកជាប្តីបាញ់សម្លាប់ប្រពន្ធព្រមទាំងកូនក្នុងផ្ទៃ៤ខែ ពេលនេះចូលសារភាពហើយ

Kang Tola — Thu, 02 Mar 2023 15:17:48 +0000

ភ្នំពេញ ៖ ប្ដីចុងជាឃាតកក្រោយពីបាញ់សម្លាប់ប្រពន្ធទាំងដែលកូននៅក្នុងពោះ៤ខែ ពេលនេះជនសង្ស័យបានចូលសារភាពទោសកំហុសហើយនៅក្រសួងមហាផ្ទៃ។

ហេតុការណ៍នេះ បានបង្កឲ្យមានការភ្ញាក់ផ្អើល កាលពីវេលាម៉ោង៣និង៤០នាទីរសៀលថ្ងៃទី២ ខែមីនា ឆ្នាំ ២០២៣ នៅផ្ទះលេ១៦៨ ផ្លូវលេខKS03 បុរីពិភពថ្មី កួរស្រូវ ៣ ក្នុងភូមិកណ្ដាល សង្កាត់រលួស ខណ្ឌដង្កោ រាជធានីភ្នំពេញ។

ប្រភពពីកន្លែងកើតហេតុ ស្ត្រីរងគ្រោះ ឈ្មោះ ម៉ៃ សុគន្ធា ហៅ អេណា អាយុ ៣៤ឆ្នាំ មុខរបរសាឡន មានប្ដី២នាក់ហើយ។ ប្ដីមុនមានកូន ៤នាក់ និងបានលែងលះគ្នាអស់រយៈពេល១ឆ្នាំមកហើយ។ បន្ទាប់មកនាងបានយកប្ដីក្រោយ ដែលជាជនសង្ស័យ និងឮថា កំពុងមាន ផ្ទៃពោះ ៤ខែផង។ ចំណែកជនសង្ស័យឈ្មោះយ័ន្ត គុយហេង អាយុ៣៨ឆ្នាំ មុខរបរ មិនពិតប្រាកដ។

ប្រភពដដែល បាននិយាយទៀតថា ប្ដីប្រពន្ធនេះទើបទៅទិញផ្ទះកើតហេតុនោះ រស់នៅជាង ៣ខែប៉ុណ្ណោះ ហើយនៅមុនពេលមានការភ្ញាក់ផ្អើលនេះ ពុំមាននរណាបានដឹងថា ប្ដីប្រពន្ធនេះ មានទំនាស់គ្នារឿងអ្វី ហើយបាញ់សម្លាប់ក្នុងពេលណានោះឡើយ។

ប៉ុន្តែអ្នករស់នៅក្នុងបុរីនោះ បានឃើញទ្វារផ្ទះកើតហេតុ ចំហរ ហើយដោយខ្លាចមានចោរចូលលួចទ្រព្យសម្បត្តិ ទើបរាយការណ៍ ប្រាប់សន្តិសុខយាមបុរី ឲ្យទៅមើល។ ស្រាប់តែប្រទះឃើញស្ត្រីរងគ្រោះដេកស្លាប់ ក្នុងថ្លុក ឈាម ដោយមានស្នាម ត្រូវគ្រាប់កាំភ្លើង២គ្រាប់ ទើបមានការភ្ញាក់ផ្អើលរាយការណ៍ទៅសមត្ថកិច្ចចុះមកពិនិត្យជាក់ស្តែក។

ក្រោយពីជនសង្ស័យបានបាញ់សម្លាប់ប្រពន្ធខ្លួនរួចក៏ធ្វើដំណើរទៅសារភាពនៅក្រសួងមហាផ្ទៃដើម្បីទទួលកំហុស៕

ដោយ ៖ សុខា

The post ឃាតកជាប្តីបាញ់សម្លាប់ប្រពន្ធព្រមទាំងកូនក្នុងផ្ទៃ៤ខែ ពេលនេះចូលសារភាពហើយ appeared first on Kampuchea Thmey Daily.

Breaking News ៖ ករណីបាញ់សម្លាប់មនុស្សផ្អើលខេត្តបាត់ដំបងនោះ ពេលនេះសមត្ថកិច្ចឃាត់ខ្លួនបានហើយ

Kang Tola — Thu, 08 Dec 2022 14:31:37 +0000

បន្ទាយមានជ័យ ៖ នៅរសៀលថ្ងៃទី០៨ ខែធ្នូ ឆ្នាំ២០២២ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ និង លោកឧត្តមសេនីយ៍ទោ សាត គឹមសាន ស្នងការនគរបាលខេត្តបាត់ដំបង បានសហការគ្នាដឹកនាំកម្លាំងនគរបាលបើកការស្រាវជ្រាវ និងឃាត់ខ្លួនជនសង្ស័យបានចំនួន២នាក់ នៅក្រុងប៉ោយប៉ែតពាក់ព័ន្ធករណីបាញ់សម្លាប់មនុស្សមួយក្រុមនៅមាត់ស្ទឹងសង្កែក្រុងបាត់ដំបង កាលពីម៉ោង៤ទៀបភ្លឺយប់មិញ។

លោកឧត្តមសេនីយ៍ត្រី នូ ជីវ័ន្ត ស្នងការរង ផែនការងារព្រហ្មទណ្ឌ ក្រោយទទួលបាន បទបញ្ជាពីលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ និង លោក កើត វណ្ណារ៉េត ព្រះរាជអាជ្ញាអមសាលាដំបូងខេត្ត លោកបានដឹកនាំកម្លាំងផែនព្រហ្មទណ្ឌ សហការជាមួយ កម្លាំងអធិការនគរបាលក្រុងប៉ោយប៉ែត បើកការស្រាវជ្រាវនិងឃាត់ខ្លួនជនសង្ស័យបានចំនួន២នាក់ ដែលជាមុខសញ្ញារត់គេចខ្លួនមកពីខេត្តបាត់ដំបងពាក់ព័ន្ធករណីរឿងឃាតកម្មនៅមាត់ស្ទឹងសង្កែ។

លោកវរសេនីយ៍ឯក សៅ សារឿន អធិការនគរបាលក្រុងប៉ោយប៉ែត បានឲ្យដឹងថា ជនសង្ស័យចំនួន ០២នាក់ ១-ឈ្មោះ ហូ គឹមហៀង ហៅចយ ភេទប្រុស អាយុ ២៣ឆ្នាំ ជនជាតិខ្មែរ និង ២-ឈ្មោះ កែវ បញ្ញា ភេទប្រុស អាយុ២៨ឆ្នាំជនជាតិខ្មែរ មានទីលំនៅភូមិសមគ្គីមានជ័យ សង្កាត់អូរជ្រៅ ក្រុងប៉ោយប៉ែត យកមកសួរនាំនៅអធិការដ្ឋាននគរបាលក្រុង។ ក្រោយសួរនាំជនសង្ស័យទាំង២នាក់ ត្រូវបានប្រគល់ជូនទៅខាងនគរបាលខេត្តបាត់ដំបងមកទទួលយកទៅចាត់ការបន្តតាមនីតិវិធី។

គួរបញ្ជាក់ថា កាលពីវេលាម៉ោង៤និង០០នាទីទៀបភ្លឺនៃយប់ថ្ងៃទី៧ ខែធ្នូ ឆ្នាំ២០២២ ឈានចូលថ្ងៃទី០៨ ខែធ្នូ ឆ្នាំ២០២២ នៅចំណុចសួនច្បារមាត់ស្ទឹងសង្កែ ត្រើយខាងលិចទល់មុខធនាគារFTB ស្ថិតនៅភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង មានជនសង្ស័យមួយក្រុមបានបើករថយន្តមកដល់ចំណុចខាងលើ រួចបានយកកាំភ្លើងខ្លីបាញ់រះ លើយុវជនមួយក្រុមដែលកំពុងអង្គុយលេងជួបជុំគ្នា បណ្តាលឲ្យរងរបួសធ្ងន់ស្រាលចំនួន០៣នាក់ ដែលជំហានដំបូងត្រូវបានគេសន្និដ្ឋានថា ជារឿងគំនុំ ភ្លាមៗនោះជនសង្ស័យបាននាំគ្នាជិះរត់គេចខ្លួនបាត់ស្រមោល។ ក្នុងហេតុការណ៍នោះជនរងគ្រោះម្នាក់ ក្នុងចំណោម៣នាក់ បានស្លាប់បាត់បង់ជីវិតពេលគេបញ្ជូនទៅសង្គ្រោះនៅមន្ទីរពេទ្យ៕

The post Breaking News ៖ ករណីបាញ់សម្លាប់មនុស្សផ្អើលខេត្តបាត់ដំបងនោះ ពេលនេះសមត្ថកិច្ចឃាត់ខ្លួនបានហើយ appeared first on Kampuchea Thmey Daily.

សមាជិកគណបក្សប្រេស៊ីល ត្រូវបាញ់សម្លាប់ក្នុងថ្ងៃខួបកំណើត

Sok Sovann — Mon, 11 Jul 2022 01:54:34 +0000

មន្ត្រីក្នុងតំបន់ មកពីគណបក្សប្រឆាំងឆ្វេងនិយមប្រេស៊ីល (PT) ត្រូវបានបាញ់សម្លាប់កាលពីថ្ងៃសៅរ៍ទី០៩ខែកក្កដា ដោយឆ្មាំពន្ធនាគារសហព័ន្ធ ដែលស្រែកគាំទ្រប្រធានាធិបតីស្តាំនិយមលោក Jair Bolsonaro។

លោក Marcelo Arruda ដែលជាឆ្មាំក្រុង និងជាមន្ត្រីគណបក្ស PT កំពុងប្រារព្ធពិធីខួបកំណើតរបស់គាត់ក្នុងទីក្រុង Foz de Iguacu នៃរដ្ឋ Parana នៅពេលលោក Jorge Jose da Rocha Guaranho ចូលក្នុងព្រឹត្តិការណ៍នោះ ហើយបានបាញ់សម្លាប់គាត់តែម្តង។

លោក Arruda ក៏បាញ់តបវិញដោយសម្លាប់លោក Guaranho ផងដែរខណៈករណីនេះ ត្រូវបានគេជឿជាក់ថា ពាក់ព័ន្ធនឹងជម្លោះនយោបាយ។

លោក Marcelo Arruda

ការស្លាប់របស់បុរសទាំងពីរ បានកើតឡើង មុនការបោះឆ្នោតខែតុលា ដែលមនុស្សជាច្រើនគិតទុកជាមុនថា នឹងក្លាយទៅជារឿងដ៏អាក្រក់បំផុតនៅក្នុងប្រទេសប្រេស៊ីល ដែលញាំញីដោយជម្លោះនយោបាយ។

អតីតប្រធានាធិបតីឆ្វេងនិយម លោក Luiz Inacio Lula da Silva គឺជាបេក្ខជនប្រធានាធិបតីរបស់គណបក្ស PT ហើយតាមការស្ទង់មតិនាពេលបច្ចុប្បន្ន គាត់កំពុងមានសំឡេងនាំមុខលោក Bolsonaro។

លោក Bolsonaro ដែលបានប្រឆាំងលោក Lula និងសម្ព័ន្ធមិត្តឆ្វេងនិយមរបស់គាត់ជាយូរមកហើយនោះ តែងតែបំផុតគំនិតមិនទទួលយកការចាញ់ឆ្នោតណាមួយ ដោយលើកឡើងពីការលួចបន្លំការបោះឆ្នោត និងបញ្ហាជាមួយនឹងប្រព័ន្ធបោះឆ្នោតអេឡិចត្រូនិក។

ទោះបីជាយ៉ាងណាក៏ដោយ ការិយាល័យរបស់លោក Bolsonaro មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ៕

ប្រែសម្រួល៖ Vann Vann

ប្រភព៖ Reuters

ចុចអាន៖ លោក Abe ត្រូវគេបាញ់អំឡុងពេល ថ្លែងសុន្ទរកថា

The post សមាជិកគណបក្សប្រេស៊ីល ត្រូវបាញ់សម្លាប់ក្នុងថ្ងៃខួបកំណើត appeared first on Kampuchea Thmey Daily.

ខ្មាន់កាំភ្លើងលបបាញ់ពីដំបូលអគារ សម្លាប់មនុស្ស៦នាក់ នៅឯក្បួនដង្ហែ សហរដ្ឋអាមេរិក (មានវីដេអូ)

Sok Sovann — Mon, 04 Jul 2022 23:42:07 +0000

ប៉ូលិស កំពុងស្វែងរកខ្មាន់កាំភ្លើង ដែលបានបាញ់សម្លាប់មនុស្សចំនួន៦នាក់ នៅឯក្បួនដង្ហែទិវាឯករាជ្យក្បែរទីក្រុង Chicago សហរដ្ឋអាមេរិក។

ព្រឹត្តិការណ៍នៅក្នុងទីក្រុង Highland Park រដ្ឋ Illinois ត្រូវបានបញ្ឈប់ភ្លាមៗ នៅពេលស្នូរគ្រាប់កាំភ្លើងជាច្រើនគ្រាប់ បានបន្លឺឡើង នៅម៉ោងប្រហែល ១០ និង ១៥ នាទី (ម៉ោងក្នុងស្រុក)។

ក្រុមមន្ត្រីបាននិយាយថា មនុស្សចំនួន ២៤ នាក់ត្រូវបានបញ្ជូនទៅមន្ទីរពេទ្យ។

យោងតាមប៉ូលិស, ជនសង្ស័យគឺឈ្មោះ Robert E Crimo III អាយុ ២២ ឆ្នាំ ប្រដាប់ដោយអាវុធ និងមានគ្រោះថ្នាក់។

ជនសង្ស័យឈ្មោះ Robert E Crimo III

ជនសង្ស័យទំនងជា កំណត់គោលដៅលើអ្នកចូលរួមក្បួនដង្ហែដោយមិនរើសមុខ ជាមួយនឹងកាំភ្លើងដែលមានថាមពលខ្ពស់។

ជនសង្ស័យ ត្រូវបានគេជឿថា បានលបបាញ់ទៅលើសាធារណជន ពីលើដំបូលហាងក្បែរនោះ ជាកន្លែងដែលប៉ូលិសនិយាយថា ពួកគេបានរកឃើញ “ភស្តុតាងនៃអាវុធ”។

មនុស្សពេញវ័យ៥នាក់បានស្លាប់នៅកន្លែងកើតហេតុ ក៏ដូចជាជនរងគ្រោះម្នាក់ទៀត ដែលសមត្ថកិច្ចមូលដ្ឋាននិយាយថា បានស្លាប់នៅក្នុងមន្ទីរពេទ្យក្បែរនោះ។

គួរបញ្ជាក់ថា ថ្ងៃទី ៤ខែកក្កដា គឺជាថ្ងៃបុណ្យជាតិ ដែលរម្លឹកដល់ពេលអាណានិគមអាមេរិកបានប្រកាសឯករាជ្យពីចក្រភពអង់គ្លេសនៅឆ្នាំ ១៧៧៦៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ បាញ់ប្រហារនៅផ្សារទំនើបដាណឺម៉ាក ស្លាប់មនុស្ស៣នាក់ ប៉ូលិស ថាជា អំពើភេរវកម្ម

The post ខ្មាន់កាំភ្លើងលបបាញ់ពីដំបូលអគារ សម្លាប់មនុស្ស៦នាក់ នៅឯក្បួនដង្ហែ សហរដ្ឋអាមេរិក (មានវីដេអូ) appeared first on Kampuchea Thmey Daily.

បាញ់សម្លាប់ Archives - Kampuchea Thmey Daily

​ជនសង្ស័យដែលបាញ់សម្លាប់លោក លិម គិមយ៉ា ត្រូវបានសមត្ថកិច្ចឃាត់ខ្លួននៅខេត្តបាត់ដំបង

Justin កាន់ទុក្ខ តារា​រ៉េប​ល្បី​ម្នាក់​ត្រូវ​គេ​បាញ់​សម្លាប់​រំលង​អធ្រាត្រ​