បាល់ទះនារី Archives - Kampuchea Thmey Daily

ពានរង្វាន់សម្ដេច ក្រឡាហោម ផ្នែកនារីរកឃើញក្រុមខ្លាំងឡើងទៅវគ្គផ្ដាច់ព្រ័ត្រហើយ

Sina Noun — Fri, 27 Feb 2026 09:05:54 +0000

បន្ទាប់ពីធ្វើការប្រកួតវគ្គសន្សំពិន្ទុក្នុងពូលតាំងពីថ្ងៃទី២១ រហូតដល់ថ្ងៃទី២៧ ខែកុម្ភៈ ឆ្នាំ២០២៦ នេះពានរង្វាន់សម្ដេច ក្រឡាហោម លើកទី៤ ផ្នែកនារីបានរកឃើញជើងខ្លាំង ២ក្រុមឡើងទៅវគ្គផ្ដាច់ព្រ័ត្រហើយគឺក្រុមស្នងការ ន.ប រាជធានីភ្នំពេញ និងក្រុមអកសមុទ្រ។

ក្រុមស្នងការ ន.ប រាជធានីភ្នំពេញ

ការប្រកួតវគ្គសន្សំពិន្ទុក្នុងពូលរហូតដល់វគ្គពាក់កណ្ដាលផ្ដាច់ព្រ័ត្រត្រូវបានបញ្ចប់នៅរសៀលថ្ងៃទី២៧ ខែកុម្ភៈ ឆ្នាំ២០២៦ នេះហើយដោយរកឃើញក្រុមខ្លាំងចំនួន ២គឺក្រុមស្នងការ ន.ប រាជធានីភ្នំពេញ បន្ទាប់ពីបានយកឈ្នះលើក្រុមមន្ទីរអប់រំ ខេត្តពោធិ៍សាត់ ៣-០។

ចំណែកមួយគូទៀតនោះគឺក្រុមបាល់ទះអកសមុទ្រ បានយកឈ្នះលើក្រុមក្រសួងមហាផ្ទៃ ដោយលទ្ធផល ៣-០ ផងដែរបានឡើងទៅវគ្គផ្ចាច់ព្រ័ត្រនៅថ្ងៃទី១ ខែមីនា ឆ្នាំ២០២៦ ឆាប់ៗខាងមុខនេះ។

ក្រុមអកសមុទ្រ

រង់ចាំទស្សនាទាំងអស់គ្នារវាងក្រុមស្នងការ ន.ប រាជធានីភ្នំពេញ ឬក្រុមអកសមុទ្រ ជាអ្នកលើកពានសម្ដេច ក្រឡាហោម លើកទី៤ ឆ្នាំ២០២៦ ខាងផ្នែកនារីនេះ។ ការប្រកួតធ្វើឡើងនៅថ្ងៃ១ ខែមីនា ឆ្នាំ២០២៦ វេលាម៉ោង ៤ល្ងាចនៅវិមានពហុកីឡដ្ឋានជាតិ៕

អត្ថបទដោយ៖ នួន ស៊ីណា

The post ពានរង្វាន់សម្ដេច ក្រឡាហោម ផ្នែកនារីរកឃើញក្រុមខ្លាំងឡើងទៅវគ្គផ្ដាច់ព្រ័ត្រហើយ appeared first on Kampuchea Thmey Daily.

លោក Sam Kenamer ទោះក្រុមមិនបានឡើងទៅជុំបន្ត ប៉ុន្តែមានមោទកភាពចំពោះការខំប្រឹងរបស់ក្មេងៗ

Sina Noun — Fri, 27 Feb 2026 06:55:59 +0000

គ្រូបង្វឹកក្រុមបាល់ទះនារី CIA លោក Sam Kenamer ថាលោកពិតជាមោទកភាពចំពោះកូនក្រុមរបស់លោកដែលខំប្រឹងប្រែងអស់ពីសមត្ថភាពក្នុងការប្រកួតពានរង្វាន់សម្ដេច ក្រឡាហោម លើកទី៤ នេះបើទោះជាក្រុមមិនបានឡើងទៅជុំបន្តក៏ដោយ។

លោក Sam Kenamer (ខាងឆ្វេង)

លោក Sam Kenamer បើទោះក្រុម CIA មិនបានឡើងទៅជុំបន្តយ៉ាងណាក្ដី ប៉ុន្តែលោកសប្បាយចិត្ត និងមានមោកទភាពចំពោះក្រុមជាខ្លាំង។ ដោយសារតែមើលឃើញពីការខំប្រឹងប្រែងអស់ពីសមត្ថភាពក្នុងការប្រកួតប្រជែងជាមួយក្រុមដទៃទៀត។

ក្រុមរបស់លោកគឺមានសុទ្ធតែក្មេងៗអាយុប្រហែល ១៣-១៤ឆ្នាំប៉ុណ្ណោះ ដូច្នេះមិនសូវមានបទពិសោធច្រើននៅលើទីលានប្រកួតនោះឡើយ។ យ៉ាងណាការចូលរួមក្នុងការប្រកួតពានរង្វាន់សម្ដេច ក្រឡាហោម នេះគឺបង្ហាត់បង្រៀនច្រើនដល់កូនក្រុមរបស់លោកដូចជាយល់ដឹងពីការលេងបាល់ទះកាន់តែច្បាស់ ចេះសហការគ្នា និងបានធ្វើឲ្យរាងកាយរហ័សរហួនផងដែរ។ ការចូលរួមរបស់ CIA ជាការរួមចំណែកលើកស្ទួយវិស័យកីឡាបាល់ទះនៅកម្ពុជា។

ក្រុមបាល់ទះ CIA

គ្រូបង្វឹករូបនេះនឹងដឹកនាំក្រុមមកចូលរួមនៅឆ្នាំក្រោយទៀតបើទោះជាក្រុមមិនទទួលបានជោគជ័យធំ ឬបានឡើងទៅជុំបន្តដូចនេះក្ដី។ ការគាំទ្រពីមហាជន និងបទពិសោធល្អៗលើទីលាន ដូច្នេះក្រុមរបស់លោកត្រូវតែមកចូលរួមនៅឆ្នាំក្រោយៗទៀត។

បញ្ជាក់ដែរថា ក្រុមបាល់ទះនៃសាលា CIA FIRST INTL SCHOOL បានធ្លាក់ត្រឹមវគ្គជម្រុះក្នុងពូល A ហើយបន្ទាប់ពីធ្វើមិនបានល្អ។ យ៉ាងណានៅប្រកួតលើកទី៣ ចុងក្រោយកាលពីរសៀលថ្ងៃទី២៤ ខែកុម្ភៈ ឆ្នាំ២០២៦ នេះក្រុម CIA បានយកឈ្នះលើក្រុម MAHA JAK ដោយលទ្ធផល ៣-០ មុនបិទបញ្ចប់វគ្គជម្រុះក្នុងពូល៕

អត្ថបទដោយ៖ នួន ស៊ីណា

The post លោក Sam Kenamer ទោះក្រុមមិនបានឡើងទៅជុំបន្ត ប៉ុន្តែមានមោទកភាពចំពោះការខំប្រឹងរបស់ក្មេងៗ appeared first on Kampuchea Thmey Daily.

ម៉ីម៉ី លីប្រូរបស់ក្រសួងមហាផ្ទៃមិនបានលេងពានសម្ដេច ស ខេង ជាប់ទៅបន្តសិក្សានៅអូស្ត្រាលី

Sina Noun — Wed, 18 Feb 2026 07:50:39 +0000

កីឡាការិនីឆ្នើមរបស់ក្រុមបាល់ទះក្រសួងមហាផ្ទៃ ដែលគេស្គាល់ថា ម៉ីម៉ី មិនបានចូលរួមជួយក្រុមក្នុងការប្រកួតប្រជែងពានរង្វាន់សម្ដេចក្រឡាហោម ស ខេង លើកទី៤ ឆ្នាំ២០២៦ ដែលផ្នែកនារីនឹងចាប់ផ្ដើមនៅថ្ងៃទី២១ កុម្ភៈនេះ។

ម៉ីម៉ី ប្រកួតកន្លងទៅ

កីឡាការិនី ខូវ វីវៀន (ម៉ីម៉ី) បានឲ្យដឹងថា រូបគេពិតសោកស្ដាយដែលមិនបានចូលរួមក្នុងប្រកួតប្រជែងពានរង្វាន់សម្ដេច ក្រឡាហោម នៅពេលនេះ ព្រោះខំប្រឹងប្រែងហ្វឹកហាត់ជាយូរមកហើយ។ ដោយសារការពន្យាពេលការប្រកួតកន្លងមកទើបចៃដន្យដល់ថ្ងៃដែលខ្លួនត្រូវទៅអូស្ត្រាលី។ ប្រសិនបើបានលេងតែមួយប្រកួតក៏រូបគេអស់ចិត្តដែរ ប៉ុន្តែត្រូវហោះទៅថ្ងៃទី២០ កុម្ភៈ មុនបើកការប្រកួតមួយថ្ងៃ។

ម៉ីម៉ី ប្រកួតកន្លងទៅ

លីប្រូរបស់ក្រុមក្រសួងមហាផ្ទៃរូបនេះ អរគុណចំពោះអ្នកគាំទ្រដែលតែងតែស្រឡាញ់ និងលើកទឹកចិត្តដល់ខ្លួនក្នុងការប្រកួតកន្លងមក។ យ៉ាងណា ម៉ីម៉ីៗ ក៏សំណូមពរដល់អ្នកគាំទ្រសូមបន្តទៅទស្សនា និងលើកទឹកចិត្តកីឡាករ កីឡាការិនីទាំងអស់គ្នាក្នុងការប្រកួតពានរង្វាន់សម្ដេចក្រឡាហោម លើកទី៤នេះដើម្បីចូលរួមលើកស្ទួយវិស័យកីឡាបាល់ទះនៅកម្ពុជាឲ្យកាន់តែរីកចម្រើន។

ម៉ីម៉ី ប្រកួតកន្លងទៅ

បញ្ជាក់ដែរថា ខូវ វីវៀន ជាកីឡាការិនីនៃក្រុមបាល់ទះនារីក្រសួងមហាផ្ទៃ និងជាកីឡាការិនីដែលមានអ្នកគាំទ្រស្គាល់ច្រើន។ រូបគេលេងកីឡាបាល់ទះនេះប្រហែល ៥ឆ្នាំមកហើយតាំងពីមិនទាន់បញ្ចប់ការសិក្សាវិទ្យាល័យ។ នៅថ្ងៃទី២០ ខែកុម្ភៈ ឆ្នាំ២០២៦ កញ្ញានឹងត្រូវហោះទៅប្រទេសអូស្ត្រាលីដើម្បីបន្តការសិក្សាសកលវិទ្យាល័យរយៈពេល ៣ឆ្នាំ៕

ក្រុមកីឡាបាល់ទះក្រសួងមហាផ្ទៃ

ម៉ីម៉ី លីប្រូក្រសួងមហាផ្ទៃ

អត្ថបទដោយ៖ នួន ស៊ីណា

The post ម៉ីម៉ី លីប្រូរបស់ក្រសួងមហាផ្ទៃមិនបានលេងពានសម្ដេច ស ខេង ជាប់ទៅបន្តសិក្សានៅអូស្ត្រាលី appeared first on Kampuchea Thmey Daily.

លោក គុណ ប៊ុនសាន កីឡាការិនីបាល់ទះឥលូវមានច្រើនសមត្ថភាពល្អទៀតសហព័ន្ធគួរបង្កើតឲ្យមានលីគនារីៗ

Sina Noun — Tue, 28 Oct 2025 07:56:09 +0000

គ្រូបង្វឹកបាល់ទះ និងជាអតីតកីឡាករផងនោះលោក គុណ ប៊ុនសាន ចង់ឃើញសហព័ន្ធបង្កើតជាលីគបាល់ទះនារី ព្រោះធនធាននារីឥលូវមានច្រើន និងប្រកបដោយសមត្ថភាពទៀតផង។

លោក គុណ ប៊ុនសាន ពេលបង្ហាត់សិស្ស

គ្រូបង្វឹកបាល់ទះផ្នែកនារីរបស់ក្រុមបាល់ទះស្នងការ លោក គុណ ប៊ុនសាន បានឲ្យដឹងថា ពីមុនមិនមានកីឡាការិនីបាល់ទះច្រើន ឬសំបូរអ្នកហ្វឹកហាត់ដូចជំនាន់ឥលូវនេះទេ។ ការហ្វឹកហាត់ និងការប្រកួតផ្សេងៗភាគច្រើនគឺមានតែផ្នែកបុរសប៉ុណ្ណោះ។

ទិដ្ឋភាពសិស្សៗហ្វឹកហាត់បែបសុខភាព

អតីតលីប្រូរបស់វិសាខាខាងលើបន្តទៀតថា ឥលូវនេះខុសពីជំនាន់មុនដាច់ ព្រោះមានសិស្សនារីៗតាមសាលាឯកជនចូលហ្វឹកហាត់បាល់ទះនេះច្រើន។ អ្នកទាំងនោះហ្វឹកហាត់ដោយទឹកចិត្តស្រឡាញ់ហើយថែមទាំងមានសមត្ថភាពល្អទៀតផង។ ចំណែកកម្ពស់វិញក៏មានកីឡាការិនីខ្លះដល់ទៅជាង ១.៧០Cm ក៏មានដែរ និងលេងបានល្អៗទៀត។ លោកសង្ឃឹមថានៅថ្ងៃខាងមុខសហព័ន្ធនឹងបង្កើតជាលីគបាល់ទះនារីៗឡើងដើម្បីឲ្យមានធនធាននារីដូចផ្នែកបុរសដែរ និងជាការផ្ដល់ឱកាសឲ្យបានបញ្ចេញសមត្ថភាព ឬមានធនធានចូលរួមប្រកួតប្រជែងដូចប្រទេសដទៃ។

ទិដ្ឋភាពសិស្សៗហ្វឹកហាត់បែបសុខភាព

លោកជឿជាក់ថាប្រសិនបើបង្កើតឲ្យមានលីគនេះមែននោះនឹងមានការចូលរួមប្រកួតប្រជែងគ្នាច្រើន និងអាចស្វែងរកនូវកីឡាការិនីល្អៗជាមិនខានឡើយ។ នេះជាក្ដីបំណងមួយរបស់គ្រូបង្វឹកដែលកំពុងបណ្ដុះធនធានថ្នាលជាច្រើននាពេលបច្ចុប្បន្ននេះ។

ទិដ្ឋភាពសិស្សៗហ្វឹកហាត់បែបសុខភាព

បញ្ជាក់ដែរថា បច្ចុប្បន្ននេះវិស័យបាល់ទះមានភាពរីកចម្រើនខ្លាំង សន្ទុះការគាំទ្រ និងហ្វឹកហាត់លេងបែបសុខភាពក៏មានច្រើនផងដែរ។ តាមសាលាឯកជនជាច្រើនពិសេសនៅរាជធានីភ្នំពេញបានបង្កើតឲ្យមានជាការហ្វឹកហាត់បាល់ទះបែបសុខភាពនេះជាច្រើនរៀងរាល់ចុងសប្ដាហ៍។ យ៉ាងណាសហព័ន្ធកីឡាបាល់ទះកម្ពុជានៅមិនទាន់មានជាការប្រកួតលីគ ឬពានរង្វាន់ផ្នែកនារីជាប្រចាំឲ្យដូចផ្នែកបុរសនៅឡើយទេ។ ផ្នែកបុរសបច្ចុប្បន្ននេះមានការប្រកួតតេជោលីគ ការប្រកួតពានរង្វាន់សម្ដេចក្រឡាហោម និងពានរង្វាន់មួយចំនួនទៀត៕

ទិដ្ឋភាពសិស្សៗហ្វឹកហាត់បែបសុខភាព

អត្ថបទដោយ៖ នួន ស៊ីណា

The post លោក គុណ ប៊ុនសាន កីឡាការិនីបាល់ទះឥលូវមានច្រើនសមត្ថភាពល្អទៀតសហព័ន្ធគួរបង្កើតឲ្យមានលីគនារីៗ appeared first on Kampuchea Thmey Daily.

កញ្ញា សាមឿន ញ៉ែង ជួយឲ្យក្រុមបាល់ទះវិទ្យាល័យកោះញែក យកឈ្នះ ក្រុមវិទ្យាល័យ ហ៊ុនសែន មណ្ឌលគិរី

អុន ស្រីមាន — Fri, 21 Mar 2025 04:33:32 +0000

ការប្រកួតវិញ្ញាសាបាល់ទះមហាជនដណ្តើមពានរង្វាន់មន្ទីរអប់រំយុវជននិងកីឡាខេត្តមណ្ឌលគិរី កីឡាការិនី សាមឿន ញ៉ែង មកពីវិទ្យាល័យកោះញែក ធ្វើល្អ ជួយក្រុមយកឈ្នះវិទ្យាល័យ ហ៊ុនសែនមណ្ឌលគិរី លទ្ធផល ៣-២សិត ក្នុងនោះក្រុមកីឡាបាល់ទះនារីមកពីវិទ្យាល័យកោះញែកធ្វើបានល្អ ក្នុងជុំទី១។

ក្នុងការប្រកួតនោះ កីឡាករលេចធ្លោជាងគេនៅក្នុងក្រុម គឺកីឡាការិនី សាមឿន ញ៉ែង បានលើកឡើងថា ការប្រកួតទះនេះជាលើកទី២ហើយសម្រាប់រូបគេដែលបានមកប្រកួតមហាជនថ្នាក់ក្រុង ប៉ុន្តែឆ្នាំមុនក្រុមគេធ្វើមិនបានល្អនោះទេ ដែលជាប់ចំណាត់ថ្នាក់លេខ២។ ក្នុងឆ្នាំនេះក្រុមគេលេងល្អខ្លាំង ជាក់ស្តែងក្រុមគេនៅថ្ងៃនេះបានយកឈ្នះ វិទ្យាល័យ ហ៊ុនសែនមណ្ឌលគិរី លទ្ធផល ៣-២សិត។

កីឡាការិនីបន្ថែមថា ក្រុមខ្លួនធ្វើបានល្អដែលថ្ងៃនេះដោយសារគេសហការគ្នានៅក្នុងក្រុមបានល្អ ជាពិសេស មានអ្នកគ្រូបង្វឹកបានណែនាំ ប្រាប់ពីយុទ្ធសាស្ត្រការលេងផងដែរ។ រូបគេជឿជាក់ថា ការប្រកួតនៅវគ្គបន្ទាប់គេសង្ឃឹមថានឹងធ្វើបានល្អបន្ថែមទៀត ហើយក្រុមគេរំពឹងថានឹងអាចឈានដល់ការលើកពានជយលាភីជើងឯកមហាជនបាល់ទះថ្នាក់ខេត្តជាក់ជាមិនខាន។ ជាមួយគ្នានេះ អ្នកគ្រូបង្វឹកមកពីវិទ្យាល័យកោះញែក ក៏បានលើកឡើងផងដែរថា ក្នុងនាមជាគ្រូបង្វឹកនៅក្នុងក្រុមតែងតែបង្ហាត់បង្ហាញទិចនិកការលេងជាពិសេសលើកទឹកចិត្តឲ្យក្រុម ព្យាយាមកុំបាក់ស្មារតី ទោះបីជាលទ្ធផលយ៉ាងណាក៏ដោយ ហើយបានលើកទឹកចិត្តក្រុមរបស់ខ្លួន ជាប់ជានិច្ច។

ចំណែកឯក្រុមដែលមិនទាន់ ធ្វើបានល្អនៅពេលនេះ កីឡាការិនីមកពីក្រុមវិទ្យាល័យហ៊ុនសែនមណ្ឌលគិរីក៏បានឲ្យដឹងថា ក្រុមគេធ្វើមិនបានល្អនៅពេលនេះគេមានការសោកស្ដាយ។ ប៉ុន្តែយ៉ាងណាមិញ នេះជាការចាញ់ក្នុងជុំទី១តែប៉ុណ្ណោះ ហើយក្រុមរបស់គេ និងតាំងចិត្តព្យាយាមធ្វើឲ្យបានល្អ នៅជុំក្រោយៗវិញ ព្រោះកីឡារចាញ់នៅពេលនេះគឺជាការធម្មតាតែប៉ុណ្ណោះ៕

អត្ថបទ៖រៀម សុខហេង

The post កញ្ញា សាមឿន ញ៉ែង ជួយឲ្យក្រុមបាល់ទះវិទ្យាល័យកោះញែក យកឈ្នះ ក្រុមវិទ្យាល័យ ហ៊ុនសែន មណ្ឌលគិរី appeared first on Kampuchea Thmey Daily.

ប៉ូឡូញនិងប្រេស៊ីល មិនទាន់ស្គាល់បរាជ័យក្នុងការប្រកួតបាល់ទះនារីពិភពលោក

Pha Rothana — Fri, 31 May 2024 04:47:43 +0000

កាប្រកួតបាល់ទះនារីពិភពលោកនារី FIVB Volleyball Women’s Nations League ឆ្នាំ២០២៤ ក្នុងវគ្គវិលជុំសន្សំពិន្ទុដំណើរការបានចំនួន៦ប្រកួត ក្នុងនោះក្រុមបាល់ទះនារីជម្រើសជាតិប៉ូឡូញ និងប្រេស៊ីល ជាក្រុម២មិនទាន់ស្គាល់បរាជ័យដូចគ្នា។

ក្រុមនារីបូឡ៉ញចាប់ផ្ដើមការប្រកួតបានយ៉ាងល្អ កំពុងឈរនៅលេខ១ បណ្ដោះអាសន្នក្នុងតារាងពិន្ទុ បន្ទាប់ពីប្រកួត៦លើក ឈ្នះទាំង៦ មាន១៨ពិន្ទុ។ ប៉ូឡូញកំពុងបោះជំហានទៅកាន់វគ្គ៨ក្រុមចុងក្រោយ ខណៈការប្រកួតវិលជុំសន្សំពិន្ទុនៅសល់៦ប្រកួតទៀត។

លទ្ធផល៦ប្រកួតរបស់ក្រុមបាល់ទះនារីប៉ូឡូញ៖

ប៉ូឡូញ ៣-០ អុីតាលី
ប៉ូឡូញ ៣-០ បារាំង
ប៉ូឡូញ ៣-០ ជប៉ុន
ប៉ូឡូញ ៣-១ ស៊ែប៊ី
ប៉ូឡូញ ៣-០ កូរ៉េខាងត្បូង

ក្រុមបាល់ទះនារីប្រេស៊ីលចាប់ផ្ដើមបានយ៉ាងល្អ ក្រោយប្រកួត៦លើក ឈ្នះទាំង៦ មាន១៧ពិន្ទុ ឈរនៅលេខ២ក្នុងតារាងពិន្ទុ។ ក្រុមនារីប្រេស៊ីល កំពុងឈរនៅលេខ២ ក្នុងតារាងចំណាត់ថ្នាក់បាល់ទះនារីពិភពលោក ដូច្នេះការឆ្លងទៅវគ្គ៨ក្រុមចុងក្រោយមិនមែនជាបញ្ហាចោទទេ។ ការប្រកួតបន្ទាប់ ប្រេស៊ីលត្រូវជួបជាមួយក្រុមអុីតាលីជាក្រុមឈរនៅលេខ៣ក្នុងតារាងពិន្ទុ។

លទ្ធផល៦ប្រកួតរបស់ក្រុមបាល់ទះប្រេស៊ីល៖

ប្រេស៊ីល ៣-១ កាណាដា
ប្រេស៊ីល ៣-០ កូរ៉េខាងត្បូង
ប្រេស៊ីល ៣-១ សហរដ្ឋអាមេរិក
ប្រេស៊ីល ៣-០ ស៊ែប៊ី
ប្រេស៊ីល ៣-២ ជប៉ុន

អត្ថបទ៖ ផា រតនា

The post ប៉ូឡូញនិងប្រេស៊ីល មិនទាន់ស្គាល់បរាជ័យក្នុងការប្រកួតបាល់ទះនារីពិភពលោក appeared first on Kampuchea Thmey Daily.

ក្រុមបាល់ទះនារីជប៉ុនរំពឹងរកបានជ័យជម្នះពីបារាំងរសៀលនេះ

Pha Rothana — Thu, 30 May 2024 02:59:15 +0000

ក្រុមបាល់ទះនារីជប៉ុននឹងត្រូវជួបជាមួយក្រុមបាល់ទះនារីបារាំង វេលាម៉ោង៣រសៀល ថ្ងៃនេះក្នុងការប្រកួតវិលជុំសន្សំពិន្ទុសប្ដាហ៍ទី២ក្នុងពានរង្វាន់បាល់ទះនារីពិភពលោកឆ្នាំ២០២៤នៅប្រទេសថៃ។

ក្រុមនារីជប៉ុនត្រូវការជ័យជម្នះជាចាំបាច់ ដើម្បីស្វែងរកឱកាសឡើងទៅវគ្គ៨ចុងក្រោយ ខណៈបច្ចុប្បន្នពួកគេកំពុងឈរនៅលេខ៦ បណ្ដោះអាសន្ន ក្រោយប្រកួត៥លើក ឈ្នះ៣ ចាញ់២ មាន៩ពិន្ទុ។

ស្ថិតិប្រកួត៥លើកចុងក្រោយរបស់ក្រុមបាល់ទះនារីជប៉ុន៖

ជប៉ុន ៣-២ តួកគី
ជប៉ុន ៣-០ ប៊ុលហ្គារី
ជប៉ុន ៣-០ អាល្លឺម៉ង់
ជប៉ុន ០-៣ ប៉ូឡូញ
ជប៉ុន ២-៣ ប្រេស៊ីល

ចំពោះក្រុមបាល់ទះនារីបារាំងចាប់ផ្ដើមមិនបានល្អសោះ ក្នុងការប្រកួតពានរង្វាន់បាល់ទះនារីពិភពលោកឆ្នាំនេះ ក្រោយប្រកួតបាន៥លើក ឈ្នះ១ ចាញ់៤ ឈរនៅលេខ១៥ក្នុងតារាងពិន្ទុ។ ប្រសិនបើពួកគេចាញ់ការប្រកួតជាមួយក្រុមជប៉ុនរសៀលនេះ ឱកាសឡើងវគ្គ៨ចុងក្រោយកាន់តែតិច។

សម្រាប់រូបមន្តក្នុងវគ្គវិលជុំសន្សំពិន្ទុពានរង្វាន់រង្វាន់បាល់ទះនារីពិភពលោក FIVB Volleyball Women’s Nations League មានក្រុមចំនួន១៦ចូលរួម ក្នុងនោះក្រុមលេខ១ដល់លេខ៧ និងក្រុមធ្វើជាម្ចាស់ផ្ទះបានឡើងទៅវគ្គ៨ក្រុមចុងក្រោយ៕

ស្ថិតិប្រកួត៥លើកចុងក្រោយរបស់ក្រុមនារីបារាំង៖

បារាំង ០-៣ អាល្លឺម៉ង់
បារាំង ០-៣ ប៉ូឡូញ
បារាំង ៣-១ ប៊ុលហ្គារី
បារាំង ០-៣ តួកគី
បារាំង ០-៣ អុីតាលី

អត្ថបទ៖ ផា រតនា

The post ក្រុមបាល់ទះនារីជប៉ុនរំពឹងរកបានជ័យជម្នះពីបារាំងរសៀលនេះ appeared first on Kampuchea Thmey Daily.

នារីថៃរកបានជ័យជម្នះដំបូង ក្នុងការប្រកួតបាល់ទះនារីពិភពលោក

Pha Rothana — Wed, 29 May 2024 03:39:57 +0000

ក្រុមបាល់ទះនារីថៃរកបានជ័យជម្នះដំបូងក្នុងការប្រកួតពានរង្វាន់បាល់ទះនារីពិភពលោក FIVB Volleyball Women’s Nations League ឆ្នាំ២០២៤។

ក្នុងការប្រកួតសប្ដាហ៍ទី២ វគ្គវិលជុំសន្សំពិន្ទុ ក្រុមបាល់ទះនារីថៃបានយកឈ្នះក្រុមបាល់ទះនារីសាធារណរដ្ឋដូមីនីកែន ក្នុងលទ្ធផល ៣-១ (២៥-២២, ២០-២២, ២៥-១៧, ២៦-២៤)។ នេះជាជ័យជម្នះលើកដំបូងរបស់ពួកគេក្រោយឆ្លងកាត់ការប្រកួត៥រួចមកហើយ។ បច្ចុប្បន្នក្រុមនារីថៃកំពុងឈរនៅលេខ១៣ បណ្ដោះអាសន្ន ក្រោយប្រកួត៥លើក ឈ្នះ១ និងចាញ់៤ មាន៣ពិន្ទុ។ ក្រុមនារីមានសិទ្ធិឡើងទៅវគ្គ៨ក្រុមចុងក្រោយក្នុងនាមជាម្ចាស់ផ្ទះ ដូច្នេះការប្រកួតវគ្គវិលជុំសន្សំពិន្ទុ ពួកគេមិនសូវមានសម្ពោធទេ។

សម្រាប់ការប្រកួតបន្ទាប់ ក្រុមនារីថៃត្រូវជួបជាមួយក្រុមនារីបារាំង នៅថ្ងៃទី៣១ ខែឧសភា វេលាម៉ោង១១:៣០ថ្ងៃត្រង់។ ក្រុមបាល់ទះនារីបារាំងក្នុងការប្រកួត FIVB Volleyball Women’s Nations League ឆ្នាំ២០២៤ ក៏ធ្វើមិនបានល្អដែរ បន្ទាប់ពីប្រកួត៤លើក ឈ្នះ១ ចាញ់៣ មាន៣ពិន្ទុ ឈរនៅលេខ១៤ បណ្ដោះអាសន្ន។ មុនពេលជួបក្រុមនារីថៃក្រុមនារីបារាំងត្រូវជួបអុីតាលី និងក្រុមនារីសាធារណរដ្ឋដូមីនីកែន។

សម្រាប់លទ្ធផល១គូទៀតកាលពីយប់ម្សិលមិញក្រុមបាល់ទះនារីប្រេស៊ីលបានយកឈ្នះក្រុមបាល់ទះនារីជប៉ុន យ៉ាងលំបាកក្នុងលទ្ធផល ៣-២ (២៤-២៦, ២៦-២៤, ១៩-២៥, ២៥-២០, ១៥-១១)៕

អត្ថបទ៖ ផា រតនា

The post នារីថៃរកបានជ័យជម្នះដំបូង ក្នុងការប្រកួតបាល់ទះនារីពិភពលោក appeared first on Kampuchea Thmey Daily.

បាល់ទះនារី Archives - Kampuchea Thmey Daily

ពាន​រង្វាន់​សម្ដេច​ ក្រឡាហោម​ ផ្នែក​នារី​រក​ឃើញ​ក្រុម​ខ្លាំង​ឡើង​ទៅ​វគ្គ​ផ្ដាច់ព្រ័ត្រ​ហើយ​

លោក​ Sam Kenamer ទោះ​ក្រុម​មិន​បាន​ឡើង​ទៅ​ជុំ​បន្ត​ ប៉ុន្តែ​មាន​មោទកភាព​ចំពោះ​ការ​ខំប្រឹង​របស់​ក្មេងៗ

ម៉ី​ម៉ី​ លីប្រូ​របស់​ក្រសួង​មហាផ្ទៃ​មិន​បានលេង​​ពាន​សម្ដេច ស ខេង​ ជាប់​ទៅបន្ត​សិក្សានៅ​អូស្ត្រាលី​

កញ្ញា សាមឿន ញ៉ែង ជួយឲ្យក្រុមបាល់ទះវិទ្យាល័យកោះញែក យកឈ្នះ ក្រុមវិទ្យាល័យ ហ៊ុនសែន មណ្ឌលគិរី

ប៉ូឡូញនិងប្រេស៊ីល មិនទាន់ស្គាល់បរាជ័យក្នុងការប្រកួតបាល់ទះនារីពិភពលោក

ក្រុមបាល់ទះនារីជប៉ុនរំពឹងរកបានជ័យជម្នះពីបារាំងរសៀលនេះ

នារីថៃរកបានជ័យជម្នះដំបូង ក្នុងការប្រកួតបាល់ទះនារីពិភពលោក

ពានរង្វាន់សម្ដេច ក្រឡាហោម ផ្នែកនារីរកឃើញក្រុមខ្លាំងឡើងទៅវគ្គផ្ដាច់ព្រ័ត្រហើយ

លោក Sam Kenamer ទោះក្រុមមិនបានឡើងទៅជុំបន្ត ប៉ុន្តែមានមោទកភាពចំពោះការខំប្រឹងរបស់ក្មេងៗ

ម៉ីម៉ី លីប្រូរបស់ក្រសួងមហាផ្ទៃមិនបានលេងពានសម្ដេច ស ខេង ជាប់ទៅបន្តសិក្សានៅអូស្ត្រាលី