កញ្ញា សាមឿន ញ៉ែង ជួយឲ្យក្រុមបាល់ទះវិទ្យាល័យកោះញែក យកឈ្នះ ក្រុមវិទ្យាល័យ ហ៊ុនសែន មណ្ឌលគិរី

ការប្រកួតវិញ្ញាសាបាល់ទះមហាជនដណ្តើមពានរង្វាន់មន្ទីរអប់រំយុវជននិងកីឡាខេត្តមណ្ឌលគិរី កីឡាការិនី សាមឿន ញ៉ែង មកពីវិទ្យាល័យកោះញែក ធ្វើល្អ ជួយក្រុមយកឈ្នះវិទ្យាល័យ ហ៊ុនសែនមណ្ឌលគិរី លទ្ធផល ៣-២សិត ក្នុងនោះក្រុមកីឡាបាល់ទះនារីមកពីវិទ្យាល័យកោះញែកធ្វើបានល្អ ក្នុងជុំទី១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងការប្រកួតនោះ កីឡាករលេចធ្លោជាងគេនៅក្នុងក្រុម គឺកីឡាការិនី សាមឿន ញ៉ែង បានលើកឡើងថា ការប្រកួតទះនេះជាលើកទី២ហើយសម្រាប់រូបគេដែលបានមកប្រកួតមហាជនថ្នាក់ក្រុង ប៉ុន្តែឆ្នាំមុនក្រុមគេធ្វើមិនបានល្អនោះទេ ដែលជាប់ចំណាត់ថ្នាក់លេខ២។ ក្នុងឆ្នាំនេះក្រុមគេលេងល្អខ្លាំង ជាក់ស្តែងក្រុមគេនៅថ្ងៃនេះបានយកឈ្នះ វិទ្យាល័យ ហ៊ុនសែនមណ្ឌលគិរី លទ្ធផល ៣-២សិត។

កីឡាការិនីបន្ថែមថា ក្រុមខ្លួនធ្វើបានល្អដែលថ្ងៃនេះដោយសារគេសហការគ្នានៅក្នុងក្រុមបានល្អ ជាពិសេស មានអ្នកគ្រូបង្វឹកបានណែនាំ ប្រាប់ពីយុទ្ធសាស្ត្រការលេងផងដែរ។ រូបគេជឿជាក់ថា ការប្រកួតនៅវគ្គបន្ទាប់គេសង្ឃឹមថានឹងធ្វើបានល្អបន្ថែមទៀត ហើយក្រុមគេរំពឹងថានឹងអាចឈានដល់ការលើកពានជយលាភីជើងឯកមហាជនបាល់ទះថ្នាក់ខេត្តជាក់ជាមិនខាន។ ជាមួយគ្នានេះ អ្នកគ្រូបង្វឹកមកពីវិទ្យាល័យកោះញែក ក៏បានលើកឡើងផងដែរថា ក្នុងនាមជាគ្រូបង្វឹកនៅក្នុងក្រុមតែងតែបង្ហាត់បង្ហាញទិចនិកការលេងជាពិសេសលើកទឹកចិត្តឲ្យក្រុម ព្យាយាមកុំបាក់ស្មារតី ទោះបីជាលទ្ធផលយ៉ាងណាក៏ដោយ  ហើយបានលើកទឹកចិត្តក្រុមរបស់ខ្លួន ជាប់ជានិច្ច។

ចំណែកឯក្រុមដែលមិនទាន់ ធ្វើបានល្អនៅពេលនេះ កីឡាការិនីមកពីក្រុមវិទ្យាល័យហ៊ុនសែនមណ្ឌលគិរីក៏បានឲ្យដឹងថា ក្រុមគេធ្វើមិនបានល្អនៅពេលនេះគេមានការសោកស្ដាយ។ ប៉ុន្តែយ៉ាងណាមិញ នេះជាការចាញ់ក្នុងជុំទី១តែប៉ុណ្ណោះ ហើយក្រុមរបស់គេ និងតាំងចិត្តព្យាយាមធ្វើឲ្យបានល្អ នៅជុំក្រោយៗវិញ ព្រោះកីឡារចាញ់នៅពេលនេះគឺជាការធម្មតាតែប៉ុណ្ណោះ៕

អត្ថបទ៖រៀម សុខហេង