បេសកកម្មផ្សព្វផ្សាយតំបន់ទេសចរណ៍ភ្នំបូកគោ Archives - Kampuchea Thmey Daily

ហេតុអ្វីត្រូវដាំស្ពៃបូកគោ ឆ្លាស់ជាមួយផ្កាស្ពៃរឿង? អ្នកជំនាញប្រាប់ពីមូលហេតុ

Dy Bunnara — Wed, 12 Jun 2024 03:42:49 +0000

មន្រ្តីបច្ចេកទេសកសិកម្មបានបង្ហាញពីបច្ចេកទេសក្នុងការដាំស្ពៃបូកគោ ដែលត្រូវដាំឆ្លាស់ជាមួយផ្កាស្បៃរឿង ដើម្បីការពារពីការបំផ្លាញពីសត្វល្អិតចង្រៃ និងជួយឲ្យដំណាំលូតលាស់បានល្អ។

លោក ណាល់ វិឆែ ប្រធានផ្នែកបច្ចេកទេសកសិកម្មនៅកសិដ្ឋានបន្លែសរីរាង្គបូកគោបានឲ្យដឹងថា ស្ពៃបូកគោជារុក្ខជាតិត្រូវការទឹកច្រើន តែមិនជាំទឹក។

ជាដំណាំដែលត្រូវការថែទាំនិងរើសអាកាសធាតុបន្តិច អ្នកបច្ចេកទេសរូបនេះបានលើកពីការដាំដុះស្ពៃបូកគោ ត្រូវដាំឆ្លាស់ជាមួយផ្កាស្ពៃរឿង ដែលមានប្រយោជន៍ជួយដល់ដំណាំលូតលាស់បានល្អនិងការពារពីពពួកមេរោគមកបំផ្លាញ។

លោកថា ក្លិនរបស់ផ្កាស្បៃរឿងជួយបណ្តេញពពួកមេអំបៅដែលមកពងបំផ្លាញ។ ប្រយោជន៍មួយទៀត ផ្កាស្ពៃរឿងគឺជាជីជួយផ្តល់ជីវជាតិដល់ដី។ លើសពីនេះឫសរបស់ផ្កាស្ពៃរឿងក៏ជួយកម្ចាត់ពពួកមេរោគក្នុងដី។

បញ្ចប់ការសិក្សាជំនាញកសិកម្ម ពីសាកលវិទ្យាល័យកសិកម្មចម្ការដូង និងធ្លាប់បានបន្តការសិក្សានៅប្រទេសជប៉ុន លោក ណាល់ វិឆែ បានអះអាងថា កាលណាដីមានមេណាតូត (មេរោគ) អាចប៉ះពាល់ដល់ផលដំណាំ បើដាំស្រូវគឺស្រូវក្រិន បើដាំបន្លែគឺបន្លែក្រិន។ លោកបន្តថា ឫសរបស់ផ្កាស្ពៃរឿងក្រៅពីជួយធ្វើឲ្យដីធូរ ផ្ការបស់វាក៏ជួយស្រូបយកសារធាតុចិញ្ចឹមពីបរិយាកាស ហើយបម្លែងសារធាតុពីបរិយាកាសមកសារធាតុចិញ្ចឹមនៅក្នុងដីផ្តល់ដល់ផលដំណាំជុំវិញខ្លួន៕

ទស្សនាវិដេអូបង្ហាញពីបច្ចេកទេសដាំស្ពៃបូកគោ៖

The post ហេតុអ្វីត្រូវដាំស្ពៃបូកគោ ឆ្លាស់ជាមួយផ្កាស្ពៃរឿង? អ្នកជំនាញប្រាប់ពីមូលហេតុ appeared first on Kampuchea Thmey Daily.

ទំនប់ស្ទាក់ទឹកស្អាតដ៏ធំមួយលើភ្នំបូកគោ បញ្ចប់សាងសង់នៅ ២ ខែទៀត អាចផ្ទុកទឹកបាន ១ លានម៉ែត្រគីប

Dy Bunnara — Mon, 03 Jun 2024 04:28:26 +0000

ទំនប់ស្ទាក់ទឹកស្អាតដ៏ធំមួយនៅលើឧទ្យានជាតិព្រះមុនីវង្សបូកគោ កំពុងឈានទៅសម្រេចបញ្ចប់ការសាងសង់ក្នុងពេលដ៏ខ្លីខាងមុខនេះ។

លោក កែវ សិទ្ធ នាយកផ្នែកលក់ក្រុមហ៊ុនសុខា អូតែល បានគូសបញ្ជាក់ប្រាប់ដល់បណ្តាញក្រុមអ្នកសារព័ត៌មានក្នុងដំណើរទស្សនកិច្ចនៅឧទ្យានជាតិបូកគោកាលពីសប្តាហ៍មុនថា ទំនប់ទឹកនេះមានលទ្ធភាពអាចផ្ទុកទឹកបានរហូតដល់ ១ លានម៉ែត្រគីប។

បើតាមផែនការគ្រោងបញ្ចប់ការសាងសង់រយៈពេល ៣ ឆ្នាំ ប៉ុន្តែលទ្ធផលជាក់ស្ដែងគិតត្រឹមពេលនេះ អាចរួចរាល់ក្នុងរយៈពេលពីរទៅបីខែខាងមុខទៀត។ នេះបើតាមលោក កែវ សិទ្ធ។

លោកបន្តថា ទំនប់ទឹកដែលចាយថវិកាសាងសង់ជាង ៥ លានដុល្លារ នឹងជួយបង្កើនសមត្ថភាពក្នុងការផ្គត់ផ្គត់ទឹកស្អាតមិនឲ្យខ្វះខាត ខណៈកន្លងទៅទឹកស្អាតដែលប្រើប្រាស់ទូទៅមានប្រភពពីបឹងធម្មជាតិមួយនៅលើភ្នំបូកគោ។

បើតាមលោក កែវ សិទ្ធិ ទីតាំងទំនប់នេះថ្ងៃក្រោយ ក៏នឹងអាចក្លាយជាគោលដៅទេសចរណ៍បន្ថែមទៀត ដោយសារវិសាលភាពផ្ទៃទឹកដ៏ធំល្វឹងល្វើយព័ទ្ធជុំវិញដោយធម្មជាតិយ៉ាងស្រស់បំព្រង៕

The post ទំនប់ស្ទាក់ទឹកស្អាតដ៏ធំមួយលើភ្នំបូកគោ បញ្ចប់សាងសង់នៅ ២ ខែទៀត អាចផ្ទុកទឹកបាន ១ លានម៉ែត្រគីប appeared first on Kampuchea Thmey Daily.

ស្រ្ត័របីរីនៅភ្នំបូកគោ អាចលក់មួយគីឡូបានជាង ២៥ ដុល្លារ

Dy Bunnara — Fri, 31 May 2024 05:32:54 +0000

ស្រ្ត័របីរីដែលជាដំណាំត្រូវការអាកាសធាតុត្រជាក់ត្រូវបានដាំដុះនៅលើផ្ទៃដីជាង ១ ហិកតា នៅលើកំពូលភ្នំបូកគោ។ ផ្លែឈើលោកខាងលិចនេះមានវិតាមីនសេខ្ពស់ ជំនួយដល់សុខភាព ហើយមានតម្រូវការខ្ពស់នៅលើទីផ្សារ។

នៅលើភ្នំបូកគោដែលមានអាកាសធាតុត្រជាក់ពេញមួយឆ្នាំ ត្រូវបានអ្នកជំនាញកូរ៉េបានកំុំពុងសាកល្បងយកដំណាំលោកខាងលិចមកដាំ និងក៏កំពុងហុចផលជាទីគាប់ចិត្ត។

លោក ឆី ហូរ អ្នកមើលការខុសត្រូវ និងជាមគ្គុទ្ទេសក៍នៅចម្ការស្រ្ត័របីរីនៅកសិដ្ឋានភ្នំបូកគោបានឲ្យដឹងថា ដំណាំស្រ្ត័បរ័រីនេះ កសិដ្ឋានរបស់លោកទើបតែសាកល្បងដាំបានតែមួយឆ្នាំប៉ុណ្ណោះ។ ដំណាំបស្ចិមប្រទេសនេះរើសភូមិសាស្ត្របន្តិច ដែលត្រូវការតំបន់ដែលមានអាកាសធាតុត្រជាក់ និងសំណើម ហើយក៏ត្រូវយកចិត្តទុកដាក់លើការថែទាំឲ្យដិតដល់ផងដែរ។

ខណៈដំណាំស្រ្ត័របីរីមានតម្រូវការ និងតម្លៃខ្ពស់លក់លើទីផ្សារ ស្រ្ត័បរីដែលដាំដុះនៅលើភ្នំបូកគោអាចលក់បានមួយគីឡូដល់ទៅ ២៥ ដុល្លារ។ តម្លៃនេះបើធៀបស្រ្ត័របីរីនាំចូលថោកជាង ២០ ភាគរយ។ នេះបើតាមលោក ឆី ហូរ។

ស្រ្ត័ប័ររីនៅកសិដ្ឋានភ្នំបូកគោអាចផ្តល់ផលប្រចាំថ្ងៃបានជាង ១៥ ទៅ ២០ គីឡូក្រាមក្នុងមួយថ្ងៃ។

លោក ឆី ហូរ បានបញ្ជាក់ថា ស្រ្ត័បរីមានវិតាមីនសេច្រើនជាងផ្លែប៉ោម និងក្រូចទៅទៀត។ ប្រើប្រៀបធៀបផ្លែប៉ោម ស្រ្ត័ប័ររីមានវីតាមីនសេច្រើនជាង ១០ ដង និងល្អសម្រាប់ស្រ្តីមានផ្ទៃពោះ។

បើតាមលោក ឆី ហួរ អតិថិជនដែលត្រូវការ អាចមកទិញនៅកសិដ្ឋានផ្ទាល់ ឬនៅតាមហាងមួយចំនួននៅភ្នំពេញ៕

The post ស្រ្ត័របីរីនៅភ្នំបូកគោ អាចលក់មួយគីឡូបានជាង ២៥ ដុល្លារ appeared first on Kampuchea Thmey Daily.

បង្ហើបតម្លៃបន្ទប់ស្នាក់នៅសណ្ឋាគារប្រណិតឋានសួគ៌បូកគោ នៅលើកំពូលភ្នំបូកគោ

Dy Bunnara — Thu, 30 May 2024 00:28:56 +0000

សណ្ឋាគារឋានសួគ៌បូកគោ បានចាប់ផ្ដើមដំណើរការអាជីវកម្មផ្តល់សេវាស្នាក់នៅដល់ភ្ញៀវទេសចរនៅឆ្នាំ ២០១២ ទន្ទឹមការសម្ពោធដាក់ឲ្យប្រើប្រាស់ហេដ្ឋារចនាសម្ព័ន្ធផ្លូវតភ្ជាប់ពីជើងភ្នំទៅកំពូលភ្នំដែលមានកម្ពស់ជាង ១ ពាន់ម៉ែត្រ។

សណ្ឋាគារប្រណិតលំដាប់ផ្កាយនៅលើកំពូលភ្នំបូកគោមានបន្ទប់សរុបចំនួន ៤១២ បន្ទប់ ដោយបែងចែកជា ២ ប្រភេទ មានប្រភេទបន្ទប់ម៉ាស៊ីនត្រជាក់ និងប្រភេទកង្ហារ។

បើតាមបុគ្គលិកផ្នែកទទួលភ្ញៀវនៅសណ្ឋាគារឋានសួគ៌បូកគោ បានបង្ហើបពីតម្លៃបន្ទប់ស្នាក់នៅក្នុងសណ្ឋាគារឋានសួគ៌បូកគោ បើសិនភ្ញៀវកក់មុន នៅថ្ងៃធម្មតា (អាទិត្យ ដល់ ព្រហស្បតិ៍) សម្រាប់បន្ទប់កង្ហារគ្រែមួយនិងគ្រែពីរតម្លៃ ៣០ ដុល្លារ និងថ្ងៃចុងសប្ដាហ៍ (សុក្រដល់ថ្ងៃសៅរ៍) តម្លៃ ៣៥ ដុល្លារ។

ដោយឡែកបន្ទប់ម៉ាស៊ីនត្រជាក់ ថ្ងៃធម្មតា (អាទិត្យដល់ព្រហស្បតិ៍) តម្លៃ ៥០ ដុល្លារ និងថ្ងៃចុងសប្ដាហ៍ (សុក្រដល់ថ្ងៃសៅរ៍) តម្លៃ ៥៥ ដុល្លារ។

ក្រៅពីបន្ទប់ធម្មតា (Standard Room) សណ្ឋាគារក៏មានបន្ទប់ស្វិតរូម (VIP) ដែលមាន ៣៨ បន្ទប់។ បន្ទប់ស្វីតរូមមានប្រភេទកង្ហារ និងម៉ាស៊ីនត្រជាក់ តម្លៃចាប់ពី ៧០ ដុល្លារ ដល់ ១៤០ ដុល្លារ។

លក្ខណៈពិសេសបន្ទប់ស្វីតរួម មានខ្នាតទំហំរហូតដល់ ៥៨ ម៉ែត្រការ៉េ រួមទាំងមានកន្លែងទទួលភ្ញៀវផងដែរ។

បើតាមបុគ្គលិកដដែលបានបញ្ជាក់ថា តម្លៃខាងលើជាតម្លៃពិសេស ខណៈពីមុនតម្លៃបន្ទប់ធម្មតាចាប់ពី ៨៥ ដុល្លារដល់ ៩៥ ដុល្លារ និងបន្ទប់ស្វីតរួមចាប់ពី ១៦៥ ដល់ ១៧៥ ដុល្លារក្នុងមួយយប់។

ការបញ្ចុះតម្លៃនេះដោយសារស្ថានភាពវិបត្តិសាកល និងណាមួយក៏ដោយសារក្រុមហ៊ុនចង់ជំរុញឲ្យភ្ញៀវទេសចរមកស្នាក់នៅនិងមកកម្សាន្តនៅឧទ្យានជាតិបូកគោឲ្យបានច្រើន។

គួរបញ្ជាក់ថា តម្លៃបន្ទប់ស្នាក់នៅនេះ ក៏រួមបញ្ចូលការផ្តល់អាហារពេលព្រឹកសម្រាប់មនុស្សពីរនាក់ផងដែរ៕

The post បង្ហើបតម្លៃបន្ទប់ស្នាក់នៅសណ្ឋាគារប្រណិតឋានសួគ៌បូកគោ នៅលើកំពូលភ្នំបូកគោ appeared first on Kampuchea Thmey Daily.

អ្នកឧកញ៉ា សុខ គង់ អះអាងគ្មានបំណងចង់លក់សណ្ឋាគារសុខានៅជ្រោយចង្វារនោះទេ

Dy Bunnara — Thu, 30 May 2024 00:20:24 +0000

ឆ្លើយតបទៅសំនួររបស់កម្ពុជាថ្មីក្នុងសន្និសីទកាលពីរសៀលម្សិលមិញនេះ ជុំវិញគម្រោងលក់សណ្ឋាគារសុខានៅជ្រោយចង្វារ អ្នកឧកញ៉ា សុខ គង់ បានឆ្លើយបញ្ជាក់ថា លោកគ្មានបំណងចង់លក់សណ្ឋាគារសុខានៅជ្រោយចង្វារនោះទេ។

ថ្លែងនៅក្នុងជំនួបជាមួយអ្នកសារព័ត៌មានចម្រុះមកពីជាង ៣០ ស្ថាប័ន ដែលបានចុះទៅទស្សនកិច្ចសិក្សាស្វែងយល់ពីសក្ដានុពលអភិវឌ្ឍនៅតំបន់ឧទ្យានជាតិព្រះមុនីវង្សបូកគោ អ្នកឧកញ៉ា សុខ គង់ បានគូសបញ្ជាក់ថា កន្លងមកមានការផ្សព្វផ្សាយពីការលក់ហូតែលសុខានៅភ្នំពេញ។

អ្នកឧកញ៉ាបានអះអាងថា ដោយសារមានការផុសផ្សព្វផ្សាយថាលក់មិនចេញ អីចឹងទើបលោករុញឲ្យខាងផ្នែកទីផ្សារដាក់លក់បណ្តោយទៅ។ តែលោកអះអាងថា គ្មានបំណងចង់លក់នោះទេ។

ជុំវិញការប្រកាសដាក់លក់សណ្ឋាគារសុខានៅភ្នំពេញ អ្នកឧកញ៉ាមិនបានផ្តល់ការបញ្ជាក់បន្ថែម មកដល់ពេលនេះគម្រោងនៅតែបន្ត ឬក៏មានអ្នកចចារទិញយ៉ាងណានោះទេ។

កន្លងទៅនេះ មានប្រភពព័ត៌មានក្នុងស្រុកបានផ្សព្វផ្សាយថា អ្នកឧកញ៉ា សុខ គង់ បានប្រកាសដាក់លក់សណ្ឋាគារសុខានិងដីនៅតំបន់ជ្រោយចង្វារដែលមានទំហំជាង ១០ ហិកតា ក្នុងតម្លៃប្រមាណ ១ ៥០០ លានដុល្លារ ដើម្បីយកទុនទៅវិនិយោគបន្ថែមនៅរមណីយដ្ឋានបូកគោ។

ជុំវិញការវិនិយោគនៅតំបន់ឧទ្យានជាតិព្រះមុនីវង្សបូកគោ អ្នកឧកញ៉ា សុខ គង់ បានឲ្យដឹងថា ក្រុមហ៊ុនបានចាយទុនវិនិយោគអស់ប្រមាណ ៨០០ លានដុល្លារ ហើយមកដល់ពេលនេះក្រុមហ៊ុននៅមិនទាន់រកប្រាក់ចំណេញបាននៅឡើយទេ។

ទោះបីផលចំណេញមិនទាន់អាចទូទាត់ការចំណាយ បើតាមអ្នកជំនួញចាស់វស្សារូបនេះនៅតែអះអាងថានឹងមិនបោះបង់គម្រោងអភិវឌ្ឍនៅឧទ្យានជាតិព្រះមុនីវង្សបូកគោកនិងនៅតែបន្តទៅតាមលទ្ធភាព។

អ្នកឧកញ៉ា សុខ គង់ បានបញ្ជាក់ថា ក្រុមហ៊ុននឹងនៅតែបន្តគម្រោងអភិវឌ្ឍនៅឧទ្យានជាតិបូកគោ។ អ្នកឧកញ៉ាបានលើកឡើងពីគម្រោងអភិវឌ្ឍធំៗចំនួនពីរដែលកំពុងដំណើរការ រូមមានគម្រោងស្ថាបនាផ្លូវថ្មីតភ្ជាប់ពីផ្លូវជាតិលេខ ៤ មកឧទ្យានជាតិបូកគោ ដែលចាយទុនវិនិយោគរាប់សិបលានដុល្លារ រួមទាំងគម្រោងសាងសង់ព្រះពុទ្ធប្បដិមាកកម្ពស់ ១០៨ ម៉ែត្រ ដើម្បីបម្រើដល់វិស័យព្រះពុទ្ធសាសនា និងទាក់ទាញទេសចរមកកម្សាន្ត។

នៅឆ្នាំ២០០៨ រាជរដ្ឋាភិបាលកម្ពុជា បានប្រគល់ឧទ្យានជាតិព្រះមុនីវង្សបូកគោឲ្យក្រុមហ៊ុនសុខាអូតែលវិនិយោគ ដើម្បីអភិវឌ្ឍជារមណីយដ្ឋានទេសចរណ៍ដ៏ទាក់ទាញរបស់ប្រទេសកម្ពុជា។

ក្រោយទទួលបានសិទ្ធិវិនិយោគ ក្រុមហ៊ុនបានចាប់ផ្ដើមដំណើរការសាងសង់ពង្រីកផ្លូវពីជើងភ្នំឡើងទៅលើកំពូលភ្នំដែលមានចម្ងាយជាង ៣៣ គីឡូម៉ែត្រ ជាអាទិភាពទីមួយ ដែលបានសម្ពោធបើកការដ្ឋានសាងសង់កាលពីថ្ងៃទី១៩ មករា ឆ្នាំ ២០០៨ និងសម្ពោធដាក់ឲ្យប្រើប្រាស់នៅឆ្នាំ ២០១២។

ក្រុមហ៊ុនបានចំណាយការសាងសង់ហេដ្ឋារចនាសម្ព័ន្ធផ្គត់ផ្គង់មានទឹក អគ្គិសនី និងប្រព័ន្ធផ្លូវខ្វាត់ខ្វែង ដើម្បីសម្រួលដល់ការធ្វើដំណើរកម្សាន្តរបស់ភ្ញៀវទេសចរ។ លើសពីនេះទៀត ក្រុមហ៊ុនក៏បានដំណើរការជួសជុសឡើងវិញ និងថែទាំសំណង់អគារចាស់ៗដែលបន្សល់ពីសម័យអាណានិគមបារាំង និងសង្គមរាស្ត្រនិយម មានដូចជា អាគារសាលាក្រុង និង អាគារកាស៊ីណូចាស់ជាដើម៕

The post អ្នកឧកញ៉ា សុខ គង់ អះអាងគ្មានបំណងចង់លក់សណ្ឋាគារសុខានៅជ្រោយចង្វារនោះទេ appeared first on Kampuchea Thmey Daily.

ផ្លូវឡើងឧទ្យានជាតិបូកគោ អាចធ្វើដំណើរបាន ២៤ ម៉ោង ដោយឥតបង់ថ្លៃ

Dy Bunnara — Wed, 29 May 2024 00:47:10 +0000

ប្រភពពីបុគ្គលិកក្រុមហ៊ុន សុខា អូថែល បានឲ្យដឹងថា ផ្លូវកៅស៊ូប្រវែងជាង ៣០ គីឡូម៉ែត្រ តភ្ជាប់ពីផ្លូវជាតិលេខ ៣ ឡើងទៅឧទ្យានជាតិព្រះមុនីវង្សបូកគោ អនុញាតិឲ្យពលរដ្ឋនិងអ្នកទេសចរអាចធ្វើដំណើរបាន ២៤ ម៉ោង និងឥតបង់ថ្លៃ។

លោក ធឿន ប៊ុនថន ប្រធានផ្នែកលក់របស់ក្រុមហ៊ុន សុខា អូតែល បានប្រាប់ក្រុមអ្នកសារព័ត៌មានក្នុងដំណើរទស្សនកិច្ចនៅឧទ្យានជាតិព្រះមុនីវង្សបូកគោថា ក្រោយក្រុមហ៊ុនទទួលបានការអនុញ្ញាតវិនិយោគពីរដ្ឋាភិបាល ក្រុមហ៊ុនបានចាប់ផ្តើមដំណើរការសាងសង់ពង្រីកផ្លូវពីជើងភ្នំឡើងទៅលើកំពូលភ្នំដែលមានចម្ងាយ ៣៣ គីឡូម៉ែត្រ ដែលជាអាទិភាពទីមួយនិងបានសម្ពោធដាក់ឲ្យប្រើប្រាស់នៅឆ្នាំ២០១២ ទន្ទឹមការសម្ពោធដាក់ឲ្យដំណើរការសណ្ឋាគារឋានសួគ៌បូកគោនៅលើកំពូលភ្នំ។

លោកថា ផ្លូវនេះបានពង្រីកទទឹង ៨ ម៉ែត្រ ដែលអាចឲ្យរថយន្តជិះចៀសគ្នាបាន ខណៈដែលផ្លូវចាស់បន្សល់ពីសម័យអាណានិគមបារាំង មានទទឹងតូចចង្អៀតមិនអាចឲ្យយានយន្តធ្វើដំណើរបានងាយស្រួល ហើយត្រូវកំណត់ម៉ោងឡើងចុះថែមទៀត។

បើតាមប្រធានផ្នែកលក់របស់ក្រុមហ៊ុន សុខា អូតែល ដំណើរការស្ដារនិងសាងសង់ពង្រីកផ្លូវឡើងទៅលើកំពូលភ្នំនេះ សាងសង់ដោយវិស្វករខ្មែរសុទ្ធសាធ ដែលបានពុះពារឧបសគ្កនៃដំណើរការសាងសង់ត្រូវកាត់ផ្ទាំងថ្មធំៗ ការចៀរជម្រាលភ្នំ រួមទាំងអាកាសធាតុលំបាក។ ការស្ថាបនាផ្លូវនេះផ្តោតលើការពង្រឹងយកគុណភាព ក្រៅពីចាក់បេតុង ក៏បានអ៊ុតកៅស៊ូបន្ថែមពីលើដោយចាយថវិកាខ្ទង់មួយ ១ លានដុល្លារ ក្នុងចម្ងាយផ្លូវ ១ គីឡូម៉ែត្រ។

លោកបន្តថា ផ្លូវឡើងភ្នំបូកគោត្រូវបានប្រសិទ្ធិនាមថា “មហារុក្ខវិថិគីរីតេជោ” ហើយបច្ចុប្បន្នពលរដ្ឋអាចធ្វើដំណើរបាន ២៤ ម៉ោង និងដោយឥតគិតថ្លៃ។

ក្រៅពីសាងសង់ហេដ្ឋារចនាសម្ព័ន្ធផ្គត់ផ្គង់ ទឹក អគ្គិសនី និងប្រព័ន្ធផ្លូវខ្វាត់ខ្វែងដើម្បីសម្រួលដល់ការធ្វើដំណើរកម្សាន្តរបស់ភ្ញៀវទេសចរ ក្រោយទទួលបានសិទ្ធិវិនិយោគនៅលើរមនីយដ្ឋានភ្នំបូកគោ ក្រុមហ៊ុន សុខាអូតែល បានជួសជុសថែទាំសំណង់អគារចាស់ៗដែលបន្សល់ពីសម័យអាណានិគមបារាំង និងសង្គមរាស្ត្រនិយម មានដូចជា អាគារសាលាក្រុង និង អាគារកាស៊ីណូចាស់ជាដើម៕

The post ផ្លូវឡើងឧទ្យានជាតិបូកគោ អាចធ្វើដំណើរបាន ២៤ ម៉ោង ដោយឥតបង់ថ្លៃ appeared first on Kampuchea Thmey Daily.

ព្រះពុទ្ធប្បដិមាខ្ពស់បំផុតលើកំពូលភ្នំបូកគោ សាងសង់សម្រេចបានជាង ៣០ ភាគរយ

Dy Bunnara — Tue, 28 May 2024 17:41:46 +0000

គម្រោងសាងសង់ព្រះពុទ្ធប្បដិមាដែលមានកម្ពស់រហូតដល់ ១០៨ ម៉ែត្រ នៅលើកំពូលភ្នំបូកគោ វឌ្ឍនភាពគិតមកដល់ពេលនេះសម្រេចបានជាង ៣០ ភាគរយ។

លោក ប្រិញ សាវុធ ប្រធានផ្នែកទំនាក់ទំនងក្រុមហ៊ុនសុខាអូតែលតំណាងឲ្យឧកញ៉ា សុខ ចន្ធី បានឲ្យដឹងថា ការសាងសង់ព្រះពុទ្ធបដិមាដ៏ខ្ពស់បំផុតនៅអាស៊ីអាគ្នេយ៍នេះ បានចាប់ផ្តើមនៅខែមករា ឆ្នាំ ២០២៣ រហូតដល់ពេលនេះសម្រេចបានជាង ៣០% ខណៈគម្រោងទាំងមូលគ្រោងបញ្ចប់ក្នុងរយៈពេល ៤ ទៅ ៥ ឆ្នាំ។

ក្រុមហ៊ុន សុខា អូតែល បានទទួលការអនុញ្ញាតពីរាជរដ្ឋាភិបាលកម្ពុជាសាងសង់ព្រះពុទ្ធប្បដិមាកម្ពស់ ១០៨ ម៉ែត្រ នៅលើខ្នងភ្នំបូកគោ។ គម្រោងមានការសាងសង់ព្រះពុទ្ធប្បដិមាកម្ពស់ ១០៨ ម៉ែត្រ គង់នៅលើខឿនអមដោយព្រះពុទ្ធរូបចំនួន ១២ អង្គគង់ក្នុងបុស្បុក និង ក្រៅពីនេះមានព្រះពុទ្ធរូបតូចៗកម្ពស់ ០.៣១ ម៉ែត្រចំនួន ៨ ម៉ឺន ៤ ពាន់អង្គទៀត ដាក់តម្កល់នៅតាមជញ្ជាំងខាងក្នុងខឿនក្រោមព្រះពុទ្ធប្បដិមាអង្គធំ ដែលគ្រោងចំណាយថវិកាប្រមាណ ៦០ លានដុល្លារអាមេរិក។

លោក ប្រិញ សាវុធ បន្តថា សប្បុរសជនដែលមានសទ្ធាជ្រះថ្លាចង់ភ្ជាប់និស្ស័យក្នុងការកសាងព្រះពុទ្ធប្បដិមាខាងលើនេះ អាចចូលរួមជាបច្ច័យតាមសទ្ធារៀងៗខ្លួន ឬអាចជាវព្រះពុទ្ធរូបអង្គតូចៗ ដើម្បីដាក់តម្កល់នៅតាមជញ្ជាំងខាងក្នុងខឿន ដែលអាចចារឹកឈ្មោះសប្បុរសជនផ្ទាល់ ឬ ឈ្មោះអ្នកមានគុណនៅខាងមុខបល្ល័ង្កព្រះអង្គ។

បើតាមលោក ប្រិញ សាវុធ ការរៀបចំសាងសង់ព្រះពុទ្ធបដិមាដ៏ខ្ពស់នេះ ក៏ទទួលបានការចូលរួមពីពុទ្ធសាសនិកពីប្រទេសមួយចំនួនដូចជា ជប៉ុន ថៃ វៀតណាម តាមរយៈការជាវព្រះអង្គតូចៗសម្រាប់ដាក់តម្កល់នៅក្រោមខឿនព្រះអង្គធំកម្ពស់ ១០៨ ម៉ែត្រ។

ព្រះពុទ្ធប្បដិមាកម្ពស់ ១០៨ ម៉ែត្រដ៏ស្កឹមស្កៃនៅលើខ្នងភ្នំបូកគោ សាងសង់នៅលើផ្ទៃដីទំហំជិត ១០០ ហិកតា ដែលគ្រោងរៀបចំជាមជ្ឍមណ្ឌលព្រះពុទ្ធសាសនា ដែលរៀបរាប់ពីដំណើរប្រវត្តិរបស់ព្រះពុទ្ធតាំងពីចាប់បដិសន្ធិ ត្រាស់ដឹង រហូតដល់ចូលបរិនិព្វាន។

តាមរយៈគម្រោងសាងសង់ព្រះពុទ្ធបដិមាដ៏ខ្ពស់បំផុតនេះ លោក ប្រិញ សាវុធ អះអាងថា ក៏នឹងជួយលើកស្ទួយវិស័យទេសចរសាសនាក្នុងប្រទេសកម្ពុជា ខណៈដែលប្រទេសជិតខាងមួយចំនួនដូចជាថៃ និងភូមា បានយកទីអារាមនិងទីសក្ការៈបូជាជាផ្នែកជួយទ្រទ្រង់ទាក់ទាញអ្នកទេសចរមកកម្សាន្ត។

ក្នុងចំណោមកម្មករជាង ១០០ នាក់ នៅការដ្ឋានសាងសង់ព្រះពុទ្ធប្បដិមានលើភ្នំបូកគោ លោក ភក្តី ដែលមានស្រុកកំណើតនៅខេត្តស្វាយរៀង ក៏បង្ហាញមោទនភាពដែលបានចូលរួមចំណែកក្នុងគម្រោងសាងសង់សំណង់ព្រះពុទ្ធរូបដ៏ធំនេះ។

បុរសវ័យជាង ៤០ ឆ្នាំរូបនេះមើលឃើញថា នៅថ្ងៃខាងមុខព្រះពុទ្ធរូបដ៏ធំស្កឹមស្កៃនេះសាងសង់រួចរាល់ នឹងក្លាយជាទីគោរពបូជាដ៏ធំបំផុតនៅប្រទេសកម្ពុជា និងអាចទាក់ទាញពលរដ្ឋគ្រប់ទិសទីមកទស្សនា៕

The post ព្រះពុទ្ធប្បដិមាខ្ពស់បំផុតលើកំពូលភ្នំបូកគោ សាងសង់សម្រេចបានជាង ៣០ ភាគរយ appeared first on Kampuchea Thmey Daily.

ចាយថវិកាជាង ៣ លានដុល្លារក្នុងមួយគីឡូម៉ែត្រ ផ្លូវកាត់ថ្មីពីផ្លូវជាតិលេខ ៤ មកឧទ្យានជាតិភ្នំបូកគោ

Dy Bunnara — Tue, 28 May 2024 13:32:08 +0000

កំណាត់ផ្លូវថ្មីប្រវែងជាង ៦០ គីឡូម៉ែត្រ តភ្ជាប់ពីផ្លូវជាតិលេខ ៤ មកឧទ្យានជាតិភ្នំបូកគោបានសម្រេចការឈូសបើកផ្លូវបញ្ចប់ ១០០% និងកំពុងឈានទៅចាក់បេតុង ដោយគ្រោងចំណាយថវិកាសាងសង់ប្រហែល ៣ លានដុល្លារក្នុងប្រវែងផ្លូវមួយគីឡូម៉ែត្រ។

លោក ស្វាយ វុឌ្ឍី នាយកនីតិកម្ម និងទំនាក់ទំនងសាធារណៈនៃក្រុមហ៊ុនសុខាអូថែលបានប្រាប់ក្រុមអ្នកសារព័ត៌មានក្នុងដំណើរទស្សនកិច្ចស្វែងយល់ពីគម្រោងអភិវឌ្ឍនៅតំបន់ឧទ្យានជាតិបូកគោថា ការចាយថវិកាអស់ច្រើន ដោយសារផ្លូវដែលត្រូវស្ថាបនាជាផ្លូវថ្មីទាំងស្រុង ហើយតាមការសិក្សាពីមន្រ្តីជំនាញនិងមន្រ្តីក្រសួងសាធារណការនិងដឹកជញ្ជូនក្នុងមួយគីឡូម៉ែត្រត្រូវចាយថវិកាអស់ប្រហែល ៣ លានដុល្លារ។

«ការសាងសង់ចាយទុនអស់ច្រើននេះ ដោយសារជាផ្លូវស្ថាបនាថ្មីទាំងស្រុង ហើយការសាងសង់ត្រូវកាត់ព្រៃ ឈូសឡើងចុះភ្នំ បន្ថែមការធ្វើស្ពាន និងលូបន្ថែមទៀត»។ លោក ស្វាយ វុឌ្ឍីបញ្ជាក់បន្ថែម។

លោក ស្វាយ វុឌ្ឍី បន្តថា ឧទ្យាជាតិបូកគោមានផ្ទៃដីលាតសន្ធឹងវែង ដោយកន្លងទៅមានតែផ្លូវមួយខ្សែពីផ្លូវជាតិលេខ ៣។ ដូចនេះ ដោយមានការអនុញ្ញាតពីរដ្ឋាភិបាល ក្រុមហ៊ុនបានស្ថាបនាផ្លូវមួយខ្សែថ្មីមួយទៀតតភ្ជាប់ពីផ្លូវជាតិលេខ ៤ ត្រង់គីឡូម៉ែត្រលេខ ១៥៨ ត្រង់ចម្ការដូងប្រេងឧកញ៉ាម៉ុង ឫទ្ធី មកឧទ្យានជាតិបូកគោ។

លោក ស្វាយ វុឌ្ឍី

ក្រោយឈូសឆាយជាទម្រង់ផ្លូវសម្រេចបាន ១០០% បើតាមលោក ស្វាយ វុឌ្ឍី ក្រុមការងារកំពុងចាប់ផ្តើមចាក់បេតុងពីការដ្ឋានសាងសង់ព្រះពុទ្ធប្បដិមាកម្ពស់ ១០៨ ម៉ែត្រចុះទៅខាងក្រោម ដោយបច្ចុប្បន្នសម្រេចចាក់បេតុងបានចម្ងាយជាង ២ គីឡូម៉ែត្រ ហើយកំពុងបន្តទៅមុខជាជំហានៗបន្តទៀត។

យ៉ាងណាគម្រោងបញ្ចប់នៅពេលណា លោក ស្វាយ វុឌ្ឍី មិនទាន់ហ៊ានកំណត់អាស្រ័យលើស្ថានភាពសេដ្ឋកិច្ច។

បើតាមលោក លោក ស្វាយ វុឌ្ឍី គម្រោងស្ថាបនាផ្លូវនេះទទួលបន្ទុករ៉ាប់រ៉ងទាំងស្រុងដោយក្រុមហ៊ុន ដោយមិនការជួយគាំំទ្រហិរញ្ញវត្ថុពីខាងណានោះទេ ហើយដោយសារបច្ចុប្បន្នស្ថានភាពសេដ្ឋកិច្ចកំពុងជួបវិបត្តិ បានជះឥទ្ធិពលដល់ការវិនិយោគ។ តែបើសេដ្ឋកិច្ចល្អប្រសើរឡើងវិញនឹងជំរុញឲ្យបានលឿន។

លោក ស្វាយ វុឌ្ឍី ក៏សម្លឹងឃើញអនាគតនៃផ្លូវមួយខ្សែនេះនឹង នៅពេលបញ្ចប់ការស្ថាបនានឹងជួយសម្រួលដល់ការធ្វើដំណើរ បង្កើតបណ្តាញតភ្ជាប់យ៉ាងប្រទាក់ក្រឡាពីចរាចរណ៍ផ្លូវជាតិលេខ ៤ មកខេត្តកំពត៕

The post ចាយថវិកាជាង ៣ លានដុល្លារក្នុងមួយគីឡូម៉ែត្រ ផ្លូវកាត់ថ្មីពីផ្លូវជាតិលេខ ៤ មកឧទ្យានជាតិភ្នំបូកគោ appeared first on Kampuchea Thmey Daily.

បេសកកម្មផ្សព្វផ្សាយតំបន់ទេសចរណ៍ភ្នំបូកគោ Archives - Kampuchea Thmey Daily

ហេតុអ្វីត្រូវ​ដាំ​​ស្ពៃ​បូកគោ​ ឆ្លាស់ជាមួយ​​ផ្កាស្ពៃរឿង? ​ អ្នកជំនាញប្រាប់ពីមូលហេតុ

ស្រ្ត័របីរី​នៅ​ភ្នំ​បូកគោ​ អាច​លក់​មួយ​គីឡូ​បាន​ជាង ២៥ ដុល្លារ

បង្ហើប​តម្លៃ​បន្ទប់​ស្នាក់នៅ​​សណ្ឋាគារ​ប្រណិត​ឋានសួគ៌​បូកគោ​ នៅ​លើ​កំពូល​ភ្នំ​បូកគោ

អ្នក​ឧកញ៉ា សុខ គង់ អះអាង​​គ្មាន​បំណង​ចង់​លក់​សណ្ឋាគារ​សុខា​នៅ​ជ្រោយ​ចង្វារ​នោះ​ទេ