ព័ត៌មានជាតិ

ផ្លូវឡើងឧទ្យានជាតិបូកគោ អាចធ្វើដំណើរបាន ២៤ ម៉ោង ដោយឥតបង់ថ្លៃ

បានផុស

២ years មុន

នៅ

ថ្ងៃពុធ ២៩ ឧសភា ២០២៤

ដោយ

ប្រភពពីបុគ្គលិកក្រុមហ៊ុន សុខា អូថែល បានឲ្យដឹងថា ផ្លូវកៅស៊ូប្រវែងជាង ៣០ គីឡូម៉ែត្រ តភ្ជាប់ពីផ្លូវជាតិលេខ ៣ ឡើងទៅឧទ្យានជាតិព្រះមុនីវង្សបូកគោ អនុញាតិឲ្យពលរដ្ឋនិងអ្នកទេសចរអាចធ្វើដំណើរបាន ២៤ ម៉ោង និងឥតបង់ថ្លៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ធឿន ប៊ុនថន ប្រធានផ្នែកលក់របស់ក្រុមហ៊ុន សុខា អូតែល បានប្រាប់ក្រុមអ្នកសារព័ត៌មានក្នុងដំណើរទស្សនកិច្ចនៅឧទ្យានជាតិព្រះមុនីវង្សបូកគោថា ក្រោយក្រុមហ៊ុនទទួលបានការអនុញ្ញាតវិនិយោគពីរដ្ឋាភិបាល ក្រុមហ៊ុនបានចាប់ផ្តើមដំណើរការសាងសង់ពង្រីកផ្លូវពីជើងភ្នំឡើងទៅលើកំពូលភ្នំដែលមានចម្ងាយ ៣៣ គីឡូម៉ែត្រ ដែលជាអាទិភាពទីមួយនិងបានសម្ពោធដាក់ឲ្យប្រើប្រាស់នៅឆ្នាំ២០១២ ទន្ទឹមការសម្ពោធដាក់ឲ្យដំណើរការសណ្ឋាគារឋានសួគ៌បូកគោនៅលើកំពូលភ្នំ។

លោកថា ផ្លូវនេះបានពង្រីកទទឹង ៨ ម៉ែត្រ ដែលអាចឲ្យរថយន្តជិះចៀសគ្នាបាន ខណៈដែលផ្លូវចាស់បន្សល់ពីសម័យអាណានិគមបារាំង មានទទឹងតូចចង្អៀតមិនអាចឲ្យយានយន្តធ្វើដំណើរបានងាយស្រួល ហើយត្រូវកំណត់ម៉ោងឡើងចុះថែមទៀត។

បើតាមប្រធានផ្នែកលក់របស់ក្រុមហ៊ុន សុខា អូតែល ដំណើរការស្ដារនិងសាងសង់ពង្រីកផ្លូវឡើងទៅលើកំពូលភ្នំនេះ សាងសង់ដោយវិស្វករខ្មែរសុទ្ធសាធ ដែលបានពុះពារឧបសគ្កនៃដំណើរការសាងសង់ត្រូវកាត់ផ្ទាំងថ្មធំៗ ការចៀរជម្រាលភ្នំ រួមទាំងអាកាសធាតុលំបាក។ ការស្ថាបនាផ្លូវនេះផ្តោតលើការពង្រឹងយកគុណភាព ក្រៅពីចាក់បេតុង ក៏បានអ៊ុតកៅស៊ូបន្ថែមពីលើដោយចាយថវិកាខ្ទង់មួយ ១ លានដុល្លារ ក្នុងចម្ងាយផ្លូវ ១ គីឡូម៉ែត្រ។

លោកបន្តថា ផ្លូវឡើងភ្នំបូកគោត្រូវបានប្រសិទ្ធិនាមថា “មហារុក្ខវិថិគីរីតេជោ” ហើយបច្ចុប្បន្នពលរដ្ឋអាចធ្វើដំណើរបាន ២៤ ម៉ោង និងដោយឥតគិតថ្លៃ។

ក្រៅពីសាងសង់ហេដ្ឋារចនាសម្ព័ន្ធផ្គត់ផ្គង់ ទឹក អគ្គិសនី និងប្រព័ន្ធផ្លូវខ្វាត់ខ្វែងដើម្បីសម្រួលដល់ការធ្វើដំណើរកម្សាន្តរបស់ភ្ញៀវទេសចរ ក្រោយទទួលបានសិទ្ធិវិនិយោគនៅលើរមនីយដ្ឋានភ្នំបូកគោ ក្រុមហ៊ុន សុខាអូតែល បានជួសជុសថែទាំសំណង់អគារចាស់ៗដែលបន្សល់ពីសម័យអាណានិគមបារាំង និងសង្គមរាស្ត្រនិយម មានដូចជា អាគារសាលាក្រុង និង អាគារកាស៊ីណូចាស់ជាដើម៕