ប៊ីចេង Archives - Kampuchea Thmey Daily

ប៊ីចេងបន្លំពាណិជ្ជសញ្ញា និងក្លែងក្លាយ ១៨ តោន ត្រូវដុតបំផ្លាញចោល

Sorn Phanith — Thu, 28 Jul 2022 08:28:59 +0000

ប៊ីចេងសញ្ញារូបវែក ដែលបានក្លែងបន្លំពាណិជ្ជសញ្ញា និងក្លែងផលិតផលទំនិញ ដែលត្រូវបានគណៈកម្មាធិការ ប្រយុទ្ធប្រឆាំងផលិតផលក្លែងក្លាយ នៃស្នងការដ្ឋានការនគរខេត្តសៀមរាប បានធ្វើការឆែកឆេរត្រួតពិនិត្យ និងដកហូត ១៨ តោន កាលពីឆ្នាំ២០១៩ ត្រូវបានដុតបំផ្លាញចោល នៅព្រឹកថ្ងៃទី ២៨ ខែកក្កដា ឆ្នាំ ២០២២ ស្ថិតនៅភូមិអន្លង់ពីរ ឃុំត្រពាំងធំ ស្រុកប្រាសាទបាគង ខេត្តសៀមរាប។

តាមការបញ្ជាក់របស់លោកឧត្តមសេនីយ៍ទោ ទូច យុទ្ធា អនុលេខាធិការដ្ឋាន បានឲ្យដឹងផងដែរថា វត្ថុតាងទាំងនេះ គឺជាបទល្មើស ក្នុងការក្លែងបន្លំពាណិជ្ជសញ្ញា និងក្លែងផលិតផលទំនិញ ដោយបានរំលោភទៅលើសិទ្ធបញ្ញា ក្រុមហ៊ុនដែលបានធ្វើការចុះបញ្ជីនៅក្រសួងពាក់ព័ន្ធ។ ម្យ៉ាងទៀតវត្ថុតាងទាំងនេះ ក៏ត្រូវបានកម្លាំងសមត្ថកិច្ចជំនាញ បានធ្វើការដកហូតកាលពីថ្ងៃទី១៨ ខែ ធ្នូ ឆ្នាំ២០១៩ នៅភូមិខ្នារ សង្កាត់ជ្រាវ ក្រុងខេត្តសៀមរាប យកមករក្សាទុកនៅស្នងការនគរបាលខេត្ត ដើម្បីរង់ចាំការសម្រេចពីតុលាការ ក្នុងការរៀបចំដុតបំផ្លាញចោល ហើយចំពោះបុគ្គលសង្ស័យក៏ត្រូវបានបញ្ជូនទៅសាលាដំបូងផងដែរ ។

លោកឧត្តមសេនីយ៍ទោ ក៏បានបន្តទៀតថា ប៊ីចេងក្លែងក្លាយទាំង ១៨ តោននេះ សមត្ថកិច្ចក្រុមប្រតិបត្តិការ នៃគណៈកម្មាធិការ ប្រយុទ្ធប្រឆាំងផលិតផលក្លែងក្លាយ បានសហការជាមួយអាជ្ញាធរមូលដ្ឋាន បានចុះធ្វើការឆែកឆេរត្រួតពិនិត្យជាក់ស្ដែង បានរកឃើញមានការរក្សាទុក សម្ភារៈ វេចខ្ចប់លក់ និងចែកចាយផលិតផល ដែលជាការបង្កនូវគ្រោះថ្នាក់ មានហានិភ័យខ្ពស់ ដល់សុខភាព និង សុវត្ថិភាពសង្គម ដល់អ្នកប្រើប្រាស់ ហើយក្រោយពេលនីតិវិធីរបស់ស្ថាប័នតុលា ការបានចប់សព្វគ្រប់ហើយ ទើបគណៈកម្មាធិការប្រយុទ្ធប្រឆាំងផលិតផលក្លែងក្លាយ សុំធ្វើការរៀបចំដុតបំផ្លាញចោលនៅថ្ងៃនេះ។

លោកក៏បានបញ្ជាក់ថា រាល់បទល្មើសទាំងអស់ យើងគ្រប់រូបត្រូវចូលរួមសហការជាមួយសមត្ថកិច្ចជំនាញ ក្នុងការបង្ក្រាប ទប់ស្កាត់នូវផលិតផលក្លែងក្លាយ ដែលគ្មានស្លាកយីហោត្រឹមត្រូវ និង មិនបានចុះកម្មសិទ្ធបញ្ញានៅក្រសួង ដែលបានធ្វើចរាចរនៅតាមទីផ្សារ ឬតាមហាងទីកន្លែងផ្សេងៗទៀត គឺត្រូវធ្វើការបង្ក្រាបឲ្យខាងតែបាន។ ក្នុងនោះលោកក៏បានបញ្ជាក់ទៀតថា គ្រប់សកម្មភាព បទល្មើសទាំងអស់ ដែលធ្វើឲ្យប៉ះពាល់ដល់សុខភាពរបស់ប្រជាពលរដ្ឋ កម្លាំងសមត្ថកិច្ចនៅតែធ្វើការបង្ក្រាបឲ្យដូចភ្លៀង រលឹម ហើយក៏មិនខ្លបខ្លាចជនល្មើសទាំងនោះឡើយ។

តាមការបញ្ជាក់របស់លោក ប៉ុន តារា ព្រះរាជអាជ្ញារង នៃសាលាដំបូងខេត្តសៀមរាប បានឲ្យដឹងថា ចំពោះករណី បុគ្គលម្ចាស់ផលិតផលក្លែងក្លាយនេះ ត្រូវបានសាលាដំបូងខេត្ត ចេញសាលក្រមដាក់ពន្ធនាគាររយៈពេល ១ ឆ្នាំ។ ក្នុងនោះដែរតំណាងក្រុមហ៊ុន ដែលជាអ្នកដើមបណ្តឹង បានធ្វើការបកស្រាយបង្ហាញ នូវសារៈសំខាន់ៗនៅលើកញ្ចប់ប៊ីចេងសញ្ញារូបវែក ដើម្បីជាចំណុចសម្គាល់ទៅលើផលិតផលក្លែងក្លាយ និងមិនក្លែងក្លាយ សម្រាប់ប្រជាពលរដ្ឋយើងគ្រប់រូបយកទៅប្រើប្រាស់ ៕

អត្ថបទ៖ គឿនវេត

The post ប៊ីចេងបន្លំពាណិជ្ជសញ្ញា និងក្លែងក្លាយ ១៨ តោន ត្រូវដុតបំផ្លាញចោល appeared first on Kampuchea Thmey Daily.

ប្រើគ្រឿងផ្សំ ៣ មុខនេះច្រើនក្នុងអាហារ ប្រៀបបាននឹងយកជំងឺដាក់ខ្លួន

Sonya — Fri, 13 Aug 2021 01:39:05 +0000

ចម្អិនម្ហូបអាហារម្តងៗ យើងតែងប្រើគ្រឿងផ្សំជាច្រើនមុខ ដើម្បីបន្ថែមរសជាតិអាហារឲ្យកាន់តែឆ្ងាញ់ ក្នុងនោះមានគ្រឿងផ្សំ ៣ មុខ ដែលគេប្រើញឹកញាប់ជាងគេ គឺ អំបិល ស្ករ និងប៊ីចេង។ ចំពោះគ្រឿងផ្សំទាំង៣នេះ អ្នកជំនាញអះអាងថា បើយើងប្រើច្រើនពេកប៉ះពាល់ចំពោះសុខភាពខ្លាំងណាស់។

១. អំបិល

អំបិលជាគ្រឿងផ្សំដ៏ពេញនិយម ដែលសឹងគ្រប់មុខម្ហូបមិនអាចខ្វះអំបិលបានឡើយទោះតិច ឬច្រើ។ តែទោះយ៉ាងណាយើងម្នាក់ៗត្រូវកំណត់បរិមាណវាតិចជាង ៥ ក្រាម/ថ្ងៃ (១ស្លាបព្រាកាហ្វេ) ប៉ុណ្ណោះ ទើបមិនមានផលប៉ះពាល់ចំពោះសុខភាព បើតាមអង្គការសុខភាពពិភពលោក។ ញ៉ាំប្រៃជាមូលហេតុឈានទៅមានជំងឺលើសសម្ពាធឈាម គ្រោះថ្នាក់សរសៃឈាមខួរក្បាល ជំងឺបេះដូង មហារីកក្រពះ- ពោះវៀន ក្រួសតម្រងនោម និងជំងឺជាច្រើនទៀត។

២. ស្ករ

អង្គការសុខភាពពិភពលោកណែនាំឱ្យមនុស្សពេញវ័យញ៉ាំជាតិស្ករសរុបតិចជាង ១០% ក្នុងចំណីអាហារសរុបប្រចាំថ្ងៃ ឯកុមារវិញតិចជាង ៥%។ “ស្ករ” ជាសារធាតុបន្ថែមក្នុងចំណីអាហារ ជួយឲ្យមានរសជាតិផ្អែម ឆ្ងាញ់ ទាក់ទាញ និងចង់ញ៉ាំ។ យ៉ាងណា បើយើងញ៉ាំជាតិស្ករច្រើនពេក នាំឲ្យមានបញ្ហាគ្រោះថ្នាក់ចំពោះសុខភាព ពិសេសទៅជាធាត់លើសទម្ងន់ ប្រឈមនឹងកើតជំងឺសរសៃឈាមបេះដូង លើសសម្ពាធឈាម ទឹកនោមផ្អែម ជំងឺបេះដូងជាដើម។

៣. ប៊ីចេង

ប៊ីចេងជាម៉ូលេគុលគីមី ប្រើជាគ្រឿងបន្ថែមរសជាតិ និងរក្សាគុណភាពអាហារ។ ជាយូរមកហើយ យើងតែងឮពាក្យចចាមអារ៉ាមលើកឡើងថា ញ៉ាំប៊ីចេងធ្វើឲ្យពុកឆ្អឹង តែមកដល់ពេលនេះមិនទាន់មានភស្តុតាងណាបញ្ជាក់រឿងនេះជាការពិតនៅឡើយ។ ទោះមិនបង្កឲ្យពុកឆ្អឹង ប៊ីចេងអាចបង្កឲ្យមានជំងឺផ្សេងៗជាច្រើន។ ប៊ីចេង ដែលជាសារធាតុរំញោចរសជាតិ អាចបង្កឲ្យយើងឈឺក្បាល ដូច្នេះដើម្បីទទួលបានសុខភាពល្អ គួរតែប្រើប៊ីចេងនៅក្នុងកម្រិតតិចបំផុត ហើយបើគិតថាខ្លួនឯងប្រតិកម្មដូចជា ឈឺក្បាល បែកញើស វិលមុខ ស្ពឹកដៃជើង ឬកន្លែងផ្សេង ឈឺទ្រូង ក្អួត ចង្អោរ គួរចៀសវាងអាហារមានជាតិប៊ីចេង៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ គ្រឿងទេសដែលបង្កើនភាពស៊ាំដល់រាងកាយ ខណៈអាចរកបានដោយងាយនៅក្នុងផ្ទះ

ចុចអាន៖ ឱសថរុក្ខជាតិ ពិតជាអាចការពារកូវីដបាន ឬគ្រាន់តែជាពាក្យចចាមអារ៉ាម

ចុចអាន៖ ល្បីខ្ទឹមខ្មៅ ជាឱសថអាចការពារមហារីក បានពិតមែន?

The post ប្រើគ្រឿងផ្សំ ៣ មុខនេះច្រើនក្នុងអាហារ ប្រៀបបាននឹងយកជំងឺដាក់ខ្លួន appeared first on Kampuchea Thmey Daily.

តើប៊ីចេង អាចមានអត្ថប្រយោជន៍ ចំពោះសុខភាពអត់?

សាង ស្រីល័ក្ខ — Mon, 01 Feb 2021 02:37:20 +0000

គ្រឿងផ្សំដែលជួយឲ្យអាហារកាន់តែមានរសជាតិឆ្ងាញ់ឡើងនោះ គឺប៊ីចេង។ ក្រៅពីជួយធ្វើឲ្យអាហារឆ្ងាញ់ជាងមុន តើប៊ីចេងមានអត្ថប្រយោជន៍ចំពោះសុខភាពដែរ ឬទេ?

សម្រាប់ចម្ងល់នេះដែរវេជ្ជបណ្ឌិត លី ឬទ្ធីគុណ បានឲ្យដឹងថា ប៊ីចេងគឺជាគ្រឿងផ្សំរបស់អាហារ ដែលជាទូទៅត្រូវបានទទួលស្គាល់ថាមានសុវត្ថិភាពចំពោះសុខភាព។ ចំណែកអ្នកមានអាការៈឈឺក្បាល វិល មុខក្អួតចង្អោរ គិតថាខ្លួនកំពុងតែមានប្រតិកម្មមិនល្អជាមួយនឹងការបរិភោគមានជាតិប៊ីចេងគួរតែដាក់វាក្នុងបរិមាណតិចតួចទៅបានហើយ ឬមិនប្រើសោះក៏បានដែរ ចៀសវាងបញ្ហាទាំងនោះ។

រីឯសំណួរសួរថា ប៊ីចេងមានអត្ថប្រយោជន៍ចំពោះសុខភាពដែរឬទេ? ចម្លើយគឺគ្មានទេ តែសម្រាប់មនុស្សចាស់ដែលធ្លាក់ចុះចំណង់អាហារ អាចធ្វើឲ្យពួកគាត់បានទទួលរសជាតិឆ្ងាញ់របស់អាហារបានច្រើនជាងមុន និងចាប់ផ្ដើមឡើងគីឡូជាងមុនក៏ថាបាន។

វេជ្ជបណ្ឌិតផ្នែកទូទៅរូបនោះបញ្ជាក់ទៀតថា ប៊ីចេងគឺគ្រឿងផ្សំដែលមិនគំរាមកំហែងដល់សុខភាពដូចអំបិល ឬស្ករឡើយ។ ដូចនេះយើងអាចប្រើប្រាស់វានៅអាហារក្នុងបរិមាណសមរម្យ ហើយបើទោះជាដាក់ច្រើនក៏មិនជាបញ្ហាឡើយ គ្រាន់តែអាហារបាត់បង់រសជាតិឆ្ងាញ់ ទៅជាភ្លាវវិញតែប៉ុណ្ណោះ ឬសម្រាប់អ្នកចូលចិត្តរសជាតិភ្លាវនោះអាចចាត់ទុកថាគ្មានបញ្ហា។

ប៊ីចេងត្រូវបានផលិតដោយវិធីឡើងមេធម្មជាតិ ហើយវត្ថុធាតុដើមសំខាន់ៗមានដូចជា អំពៅ ដំឡូងមី ជាដើម៕

អត្ថបទផ្ដល់សិទ្ធិដោយ៖ Hellokrupet

ចុចអាន៖ដឹង ៣ ចំណុចនេះ អ្នកឈប់ ឬខ្ជិលហាត់ប្រាណនឹងងាកទៅហាត់វិញមិនខាន

ចុចអាន៖ផឹកទឹកក្រូចឆ្មារពេលព្រឹក ផ្ដល់អត្ថប្រយោជន៍ដល់សុខភាពយ៉ាងតិច ៦ យ៉ាង

The post តើប៊ីចេង អាចមានអត្ថប្រយោជន៍ ចំពោះសុខភាពអត់? appeared first on Kampuchea Thmey Daily.