កិច្ចប្រជុំនេះ បានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ឯកឧត្តម ឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ និងឯកឧត្តម ឧត្តមសេនីយ៍ឯក កឹង ឃន អគ្គស្នងការរងនគរបាលជាតិ។

ក្នុងពិធីដ៏មានសារៈសំខាន់នេះ ក៏មានការអញ្ជើញចូលរួមពីលោក ម៉ែន អេង អភិបាលរងខេត្ត តំណាងឯកឧត្តមអភិបាលខេត្តស្វាយរៀង លោកអភិបាលក្រុងបាវិត លោក-លោកស្រីអភិបាលរងក្រុង កងកម្លាំងទាំង៣ប្រភេទ លោកចៅសង្កាត់ទាំង៥ ក្នុងក្រុងបាវិត ព្រមទាំងមន្ត្រីរាជការ និងមន្ត្រីពាក់ព័ន្ធជាច្រើនរូបទៀត។

គោលបំណង និងខ្លឹមសារសំខាន់ៗនៃកិច្ចប្រជុំនេះត្រូវបានរៀបចំឡើងក្នុងគោលបំណងពង្រឹងកិច្ចសហការ និងដាក់ចេញនូវវិធានការក្តៅ ក្នុងការគ្រប់គ្រងសន្តិសុខ សណ្តាប់ធ្នាប់ របៀបរៀបរយសង្គម ពិសេសផ្តោតសំខាន់លើទីតាំងស្នាក់នៅប្រមូលផ្តុំរបស់ជនបរទេស និងការបង្ក្រាបរាល់បទល្មើសបច្ចេកវិទ្យា ជាពិសេសគឺការឆបោកតាមប្រព័ន្ធអនឡាញ (Online Scams) ដែលកំពុងតែវិវត្តន៍ប្រែប្រួលយ៉ាងស្មុគស្មាញ។

ក្នុងឱកាសនោះ ថ្នាក់ដឹកនាំបានសង្កត់ធ្ងន់លើចំណុចគន្លឹះមួយចំនួន រួមមាន ១. ការរឹតបន្តឹងការគ្រប់គ្រងជនបរទេស៖ ត្រូវហ្មត់ចត់លើការពិនិត្យស្នាក់នៅ និងបណ្ណការងារ ដើម្បីធានាថាគ្រប់ទីតាំងអាជីវកម្មទាំងអស់ដំណើរការទៅដោយស្របច្បាប់។ ២. ការប្រយុទ្ធប្រឆាំងបទល្មើសបច្ចេកវិទ្យា៖ បង្កើនការស្រាវជ្រាវ បង្ក្រាបឱ្យទាន់ពេលវេលានូវរាល់សកម្មភាពឆបោកតាមប្រព័ន្ធព័ត៌មានវិទ្យា មិនទុកឱ្យក្រុងបាវិតក្លាយជាជម្រកនៃក្រុមឧក្រិដ្ឋជនអនឡាញឡើយ។ ៣. ការពង្រឹងកម្លាំងមូលដ្ឋាន៖ ជម្រុញឱ្យកងកម្លាំងមានសមត្ថកិច្ច និងអាជ្ញាធរដែនដី (ចៅសង្កាត់) ត្រូវក្តាប់ឱ្យជាប់រាល់រចនាសម្ព័ន្ធ និងចរន្តរស់នៅរបស់ប្រជាពលរដ្ឋ និងជនបរទេសក្នុងមូលដ្ឋានរបស់ខ្លួន។

ជាទីបញ្ចប់ ឯកឧត្តមអគ្គស្នងការរងនគរបាលជាតិទាំងពីររូប ក៏បានណែនាំដល់កងកម្លាំងមានសមត្ថកិច្ច និងអាជ្ញាធរពាក់ព័ន្ធទាំងអស់ ត្រូវតែសហការគ្នាជាធ្លុងមួយ ឆ្លើយតបឱ្យបានរហ័ស និងប្រកបដោយទំនួលខុសត្រូវខ្ពស់ ដើម្បីលើកកម្ពស់សន្តិសុខ សុវត្ថិភាព និងទំនុកចិត្តជូនដល់ប្រជាពលរដ្ឋក្រុងបាវិតទាំងមូល៕

ដោយ៖ ភក្ដី

The post អគ្គស្នងការរងនគរបាលជាតិ ប្រជុំផ្សព្វផ្សាយផែនការគ្រប់គ្រងសន្តិសុខ សុវត្ថិភាព និងការបង្ក្រាប Online Scams ក្នុងក្រុងបាវិត appeared first on Kampuchea Thmey Daily.

ពិធីនេះរៀបចំឡើងក្នុងគោលបំណងពង្រឹងសមត្ថភាពវិជ្ជាជីវៈ ការយល់ដឹងផ្នែកច្បាប់ និងការអនុវត្តវិន័យរបស់កងកម្លាំងយោធា ឲ្យកាន់តែមានប្រសិទ្ធភាព សមស្របតាមតម្រូវការការងារនាពេលបច្ចុប្បន្ន និងអនាគត។ ជាពិសេស វាជាវេទិកាសម្រាប់ធ្វើបច្ចុប្បន្នភាពចំណេះដឹង និងប្តេជ្ញាចិត្តក្នុងការអនុវត្តភារកិច្ចការពារសន្តិសុខ និងសន្តិភាពជាតិ។

ក្នុងឱកាសនេះ លោកឧត្តមសេនីយ៍ត្រីមេបញ្ជាការ បានធ្វើការសំណេះសំណាល សួរសុខទុក្ខ និងលើកទឹកចិត្តដល់នាយ នាយទាហានរង និងពលទាហានទាំងអស់ ដោយបានកោតសរសើរចំពោះការខិតខំប្រឹងប្រែង និងការបំពេញភារកិច្ចរបស់កងកម្លាំងក្នុងរយៈពេលកន្លងមក។ លោកក៏បានណែនាំឲ្យបន្តរក្សាឯកភាពភាពរឹងមាំ ស្មារតីវិន័យ និងការទទួលខុសត្រូវខ្ពស់ ក្នុងការអនុវត្តភារកិច្ចជូនជាតិ និងប្រជាជន។

ជាមួយគ្នានេះ លោកមេបញ្ជាការ បានអប់រំផ្សព្វផ្សាយអំពីខ្លឹមសារច្បាប់សំខាន់ៗ មួយចំនួន ដែលជាគោលការណ៍ដឹកនាំសម្រាប់កងយោធពលខេមរភូមិន្ទ រួមមាន ច្បាប់កាតព្វកិច្ចយោធា ដែលកំណត់អំពីតួនាទី និងភារកិច្ចរបស់ប្រជាពលរដ្ឋក្នុងការពារជាតិ ច្បាប់សោធននិវត្តន៍ ដែលពាក់ព័ន្ធនឹងសិទ្ធិ និងអត្ថប្រយោជន៍បន្ទាប់ពីបញ្ចប់អាជីពសេវាកម្មយោធា និងច្បាប់បញ្ញត្តិទូទៅរបស់កងយោធពលខេមរភូមិន្ទ ដែលកំណត់អំពីវិន័យ របៀបរៀបចំ និងការគ្រប់គ្រងកងកម្លាំងយោធា។

លោកសង្កត់ធ្ងន់ថា ច្បាប់ទាំងនេះ មានសារៈសំខាន់យ៉ាងខ្លាំង ក្នុងការលើកកម្ពស់ការយល់ដឹងផ្នែកច្បាប់ ការគោរពវិន័យ និងការអនុវត្តតួនាទីរបស់កងកម្លាំងឲ្យបានត្រឹមត្រូវ ស្របតាមគោលការណ៍ និងបទបញ្ជាដែលបានកំណត់។ វាក៏ជាមូលដ្ឋានសម្រាប់ការកសាងកងកម្លាំងយោធាឲ្យមានវិជ្ជាជីវៈ មានសីលធម៌ និងមានប្រសិទ្ធភាពខ្ពស់ក្នុងការបំពេញបេសកកម្ម៕
អត្ថបទ ៖ វីរៈ

The post មេបញ្ជាការតំបន់ប្រតិបត្តិការសឹករងតាកែវ ប្រជុំធ្វើបច្ចុប្បន្នភាព និងផ្សព្វផ្សាយច្បាប់សំខាន់ៗ ដល់កងកម្លាំងយោធា appeared first on Kampuchea Thmey Daily.

ការដាក់សំណើ ៦ ចំណុច និងជាឱកាសចុងក្រោយនេះ ត្រូវបានធ្វើឡើងនៅព្រឹកថ្ងៃទី ២៤ ខែមេសា ឆ្នាំ ២០២៦ ក្នុងកិច្ចប្រជុំជាមួយដៃគូ និងបណ្តាញសារព័ត៌មាន ដើម្បីជំរុញឲ្យរដ្ឋជាសមាជិក អង្គការសុខភាពពិភពលោក (WHO) ធ្វើការពិនិត្យបញ្ចប់នូវឧបសម្ព័ន្ធការចូលប្រើប្រាស់ និងការអាចទទួលបានការចែករំលែក អត្ថប្រយោជន៍ សំណាកមេរោគ (PABS) ដែលឧបសម្ព័ន្ធនេះនឹងភ្ជាប់ទៅនឹងកិច្ចព្រមព្រៀងជំងឺរាតត្បាតរបស់ WHO មុនកិច្ចប្រជុំលើកទី ៦ នៅទីក្រុងហ្សឺណែវ ប្រទេសស្វីស។

លោកវេជ្ជបណ្ឌិត ឈឹម សារ៉ាត់ នាយកប្រចាំតំបន់អាស៊ីអង្គការមូលនិធិថែទាំសុខភាពអ្នកជំងឺអេដស៍(AHF) បានមានប្រសាសន៍ថា ការដាក់សំណើទៅកាន់សហភាពអឺរ៉ុបនេះក្នុងគោលបំណងសំខាន់គឺដើម្បីឲ្យបណ្តាប្រទេសកំពុងអភិវឌ្ឈន៍ទទួលបាលសេវាសុខភាពសាធារណៈប្រកបដោយសមធម៏ និងដោយតម្លាភាពដូចជា វ៉ាក់សាំង និងឱសថព្យាបាលជំងឺផ្សេងៗ ពេលមានការរាតត្បាតជំងឺឆ្លងកើតឡើងជាសកល ខណៈកន្លងមក បណ្តាប្រទេសជឿនលឿនមួយចំនួនគិតតែផលប្រយោជន៍ផ្ទាល់ខ្លួន ដោយមិនបានយកចិត្តទុកដាក់ដល់ប្រទេសក្រីក្រឡើយ។

លោកវេជ្ជបណ្ឌិត បានបន្តថា «បើគ្មានកិច្ចព្រមព្រៀងដ៏រឹងមាំ និងអាចអនុវត្តបាននោះទេ ពិភពលោក នឹងប្រឈមនឹងការបរាជ័យម្តងទៀតដូចដែលយើងធ្លាប់បានបរាជ័យក្នុងយុគសម័យ នៃជំងឺកូវីដ-១៩ ខណៈពេលដែលយើងមិនអាចទទួលបានដោយសមភាពនូវការប្រើប្រាស់មធ្យោបាយសង្គ្រោះជីវិត ដែលបានបន្សល់ទុកឲ្យប្រទេសជាច្រើនប្រឈមមុខនឹងការរីករាលដាល នៃជំងីឆ្លងជាសកលនេះ»។

សូមរំលឹកថា កិច្ចព្រមព្រៀងស្តីពីជំងឺរាតត្បាតរបស់អង្គការសុខភាពពិភពលោក (WHO) ដែលត្រូវបានអនុម័តក្នុងខែឧសភា ឆ្នាំ ២០២៥ មិនអាចឈានទៅមុខបានទេ បើគ្មានឧបសម្ព័ន្ធ ការចូលប្រើប្រាស់ និងការទទួលបានការចែករំលែកអត្ថប្រយោជន៍ សំណាកមេរោគ(PABS) ដែលនៅក្នុងឧបសម្ព័ន្ធមានចែងពីការគ្រប់គ្រងក្នុងការផ្តល់សំណាកភ្នាក់ងារមេរោគបង្ករជំងឺ និងទិន្នន័យហ្សែនត្រូវបានចែកអត្ថប្រយោជន៍ដែលទទួលបាន រួមទាំងវ៉ាក់សាំង ការធ្វើរោគវិនិច្ឆ័យ និងការព្យាបាល ត្រូវបានប្រគល់ជូនវិញដោយស្មើភាព។

កិច្ចប្រជុំចរចា នាពេលខាងមុខ ជាឱកាសចុងក្រោយដែលបានកំណត់ពេលដើម្បីបញ្ចប់នូវកិច្ចព្រមព្រៀងអ្វីដែលគួរតែមាននូវក្នុងឧបសម្ព័ន្ធនេះ ដើម្បីឲ្យការចូលប្រើប្រាស់ និងកាអាចទទួលបានការចែករំលែកអត្ថប្រយោជន៍ សំណាកមេរោគ (PABS) ទទួលបានដោយសមធម៌ មុនពេលមានកិច្ចប្រជុំមហាសន្និបាត សុខភាពពិភពលោកក្នុងខែឧសភា មកដល់ ដែលជាពេលវេលាមួយដ៏សំខាន់ ខណៈពេលដែលបទប្បញ្ញត្តិ សមធម៌សំខាន់ៗ ផ្សេងៗ ដែលមាននូវក្នុងឧបសម្ព័ន្ធមិនទាន់បានដោះស្រាយ។

លោកវេជ្ជបណ្ឌិត បានបន្តទៀតថា លទ្ធផល នៃការចរចាទាំងនេះ នឹងកំណត់ថា តើការឆ្លើយតប នៃជំងឺរាតត្បាតនាពេលអនាគត បញ្ហាបន្ទាន់សុខភាពសាធារណៈ និងការព្រួយបារម្ភ ជាសកល និងក្នុងចន្លោះពេលមានការរីករាលដាលជំងឺជាសកលមួយពីមួយទៅមួយទៀត ត្រូវបានជំរុញដោះស្រាយដោយសមធម៌ទទួលសេវាសុខភាព និងកិច្ចសហប្រតិបត្តិការ ឬត្រូវបាន ពន្យារពេល ការមើលរំលង មិនដោះស្រាយ និងវិសមភាព។

លោកវេជ្ជបណ្ឌិត ចន ផាន់ណា ប្រធានគ្រប់គ្រងកម្មវិធីប្រចាំប្រទេសកម្ពុជា នៃអង្គការមូលនិធិថែទាំសុខភាពអ្នកជំងឺអេដស៍ បានឲ្យដឹងដែរថា សំណើសំខាន់ៗ ទៅកាន់រដ្ឋសមាជិក អង្គការសុខភាពពិភពលោក ក៏ដូចជាសហភាពអឺរ៉ុប រួមមាន ទី១.គ្មានសមធម៌ គ្មានកិច្ចព្រមព្រៀង ៖ កិច្ចព្រមព្រៀងជំងឺរាតត្បាតមិនអាចឈានទៅមុខបានទេបើគ្មានឧបសម្ព័ន្ធ PABS ដែលមានកាតព្វកិច្ចដែលធានាការចែករំលែកអត្ថប្រយោជន៍ដែលអាចអនុវត្តបាននៅគ្រប់ដំណាក់កាលទាំងអស់រួមមានដូចជា ជំងឺរាតត្បាតនាពេលអនាគត បញ្ហាបន្ទាន់សុខភាពសាធារណៈ និងការព្រួយបារម្មណ៏ជាសកល (PHEIC) និងក្នុងចន្លោះពេលមានការរីករាលដាលជំងឺជាសកលមួយ ពីមួយទៅមួយទៀត។ ទី២.ការចែករំលែកអត្ថប្រយោជន៍ជាកាតព្វកិច្ចក្នុងអំឡុងពេលមាន បញ្ហាបន្ទាន់សុខភាពសាធារណៈ និងការព្រួយបារម្ភជាសកល (PHEIC) និងក្នុងចន្លោះពេលមានការរីករាលដាលជំងឺជាសកលមួយពីមួយទៅមួយទៀត ៖ ភាពច្បាស់លាស់ និងមានការយល់ព្រមទុកជាមុន (ឧទាហរណ៍ មិនត្រូវបានពន្យារពេលដល់ការចរចាទ្វេភាគីរវាង WHO និងក្រុមហ៊ុនផលិត) គួរតែត្រូវបានរួមបញ្ចូលនូវចំនួនភាគរយ នៃវ៉ាក់សាំងដែលបានកំណត់ ការធ្វើរោគវិនិច្ឆ័យ និងការព្យាបាល អាជ្ញាប័ណ្ណដែលបានចរចាជាមុន និងការផ្ទេរចំណេះដឹង/បច្ចេកវិទ្យាការចូលរួមវិភាគទានហិរញ្ញវត្ថុប្រចាំឆ្នាំ និងការចូលប្រើប្រាស់ជាសាធារណៈចំពោះលទ្ធផលមិនមែនសម្រាប់ការធ្វើជំនួញ។ ទី៣.កិច្ចសន្យាស្តង់ដារ ៖ ដើម្បីធានាបាននូវការចុះបញ្ជីអ្នកប្រើប្រាស់ ការតាមដានប្រភពការទទួលខុសត្រូវ និងការអនុវត្តបាន នីតិវិធីសំខាន់ៗ ក្នុងកិច្ចសន្យាមានស្តង់ដារ ត្រូវតែចរចាជាមុនដោយប្រទេសនីមួយៗ ដោយមិនគួរទុកឲ្យមានការចរចាទ្វេភាគីរវាងអង្គការ WHO និងអ្នកទទួលផលទេ។ ទី៤.គ្មានការចុះឈ្មោះ គ្មានការចូលប្រើប្រាស់ ៖ ប្រទេសនានា ត្រូវតែគាំទ្រការចុះឈ្មោះអ្នកប្រើប្រាស់ជាកាតព្វកិច្ច ការតាមដានប្រភពប្រើប្រាស់ និងកិច្ចព្រមព្រៀងចូលប្រើទិន្នន័យ ដើម្បីការពារប្រព័ន្ធ និង ធានាថាវាមិនអាចត្រូវបានប្រើប្រាស់ដោយអនាមិកបាន។ ទី៥.បដិសេធប្រព័ន្ធផ្លូវពីរ ៖ ការប្រើប្រាស់វិធីសាស្ត្រ “hybrid” ឬវិធីសាស្ត្រទ្វេដង (dual track) ដែលបំបែកការទទួលបានព័ត៌មាន ឬធនធានចេញពីការចែករំលែកអត្ថប្រយោជន៍ នឹងបង្កឲ្យមានចន្លោះប្រហោង បន្ថយភាពរឹងមាំ នៃប្រព័ន្ធ និងអនុញ្ញាតឲ្យមានការគេចវេសពីកាតព្វកិច្ច និង ទី៦.គាំទ្រវិធីសាស្រ្តសុខភាពសាធារណៈចំពោះកម្មសិទ្ធិបញ្ញា ៖ កម្មសិទ្ធិបញ្ញា (IP) ត្រូវតែដឹកនាំដោយតម្រូវការសុខភាពសាធារណៈ ៖ ការប្រើប្រាស់ទាំងឡាយណាដែលមិនមែនជាពាណិជ្ជកម្ម មិនគួរបង្កើតកម្មសិទ្ធិបញ្ញាលើធនធាន ឬលទ្ធផលដែលត្រូវបានចែករំលែកជាសាធារណៈឡើយ នៅពេលដែលកម្មសិទ្ធិបញ្ញាកើតឡើងពីការប្រើប្រាស់ក្នុងវិស័យពាណិជ្ជកម្ម ការអនុញ្ញាតប្រើប្រាស់គួរតែត្រូវតែផ្តល់សិទ្ធិជូនអង្គការសុខភាពពិភពលោក (WHO) សម្រាប់ការចេញអាជ្ញាប័ណ្ណបន្ត ជាពិសេសសម្រាប់ប្រទេសកំពុងអភិវឌ្ឍន៍ហើយគ្មានកម្មសិទ្ធិបញ្ញាណាមួយគួររារាំងអ្នកដទៃពីការប្រើប្រាស់សម្ភារៈដែលបានចែករំលែកឡើយ។

គួរបញ្ជាក់ថា កិច្ចប្រជុំស្តីពីយុទ្ធនាការស្វែងរកការគាំទ្រកិច្ចព្រមព្រៀងក្នុងការទទួលបានសេវាសុខភាពប្រកបដោយសមធម៏នេះ ត្រូវបានរៀបចំឡើងស្របពេលជាមួយគ្នានៅតាមបណ្តាប្រទេសជាសមាជិករបស់អង្គការមូលនិធិថែទាំសុខភាពអ្នកជំងឺអេដស៍ (AHF) ចំនួន ៥០ រួមទាំងសហរដ្ឋអាមេរិក និងអាហ្វ្រិក អាមេរិកឡាទីន/ការ៉ាប៊ីន តំបន់អាស៊ី/ប៉ាស៊ីហ្វិក និងអឺរ៉ុបខាងកើត ដើម្បីអំពាវនាវដល់ប្រទេសសមាជិកអង្គការសុខភាពពិភពលោក ក៏ដូចជាសហគមន៍អឺរ៉ុបទទួលយកសំណើពីអង្គការ AHF និងអង្គការនានា ដើម្បីឲ្យប្រទេសក្រីក្រទទួលបានសេវាសុខភាពដោយសមធម៌៕
អត្ថបទ ៖ សំអឿន

The post អង្គការ AHF និងអង្គការក្នុងស្រុក ១៤ ផ្សេងទៀត ដាក់សំណើ ៦ ចំណុច ឲ្យសហភាពអឺរ៉ុបបញ្ឈប់ការរារាំងការទទួលបានសេវាសុខភាពដោយសមធម៌ appeared first on Kampuchea Thmey Daily.

លោក​បញ្ជាក់​ថា គិតត្រឹមចុង​ខែ​កុម្ភៈ ឆ្នាំ ២០២៦ ប្រជាជន​ភៀសសឹក​ដែល​ជម្លៀស​ពី​តំបន់​សមរភូមិ​មុខ​ស្នាក់នៅ​ក្នុង​ខេត្ត​សៀមរាប​សរុប​មាន​ចំនួន ៤ ៣៣១ គ្រួសារ ស្នើ​នឹង ១៣ ៧២០ នាក់ ក្នុងនោះ ស្នាក់នៅ​តាម​ផ្ទះ​មាន​ចំនួន ១ ៥៩៨ គ្រួសារ ស្នើ​នឹង ៥ ១៥២ នាក់ និង​នៅ​តាម​ទីតាំង​សុវត្ថិភាព មាន​ចំនួន ២ ៧៣៣ គ្រួសារ ស្មើនឹង ៨ ៥៦៨ នាក់ ដោយ​ប្រើប្រាស់​ទីតាំង​ចំនួន ៤៦ ទីតាំង លើ ១៣១ ទីតាំង។ ចំនួន​នេះ ជាចំនួនមួយ​ដែល​តម្រូវ​ឱ្យ​យើងទាំងអស់គ្នា ត្រូវ​បន្ត​យកចិត្តទុកដាក់ ជាពិសេស​ការ​ផ្គត់ផ្គង់​លើ​ស្បៀង​អាហារ​សម្រាប់​ពួកគាត់ ក្រៅពី​ជំនួយ​របស់​សប្បុរសជន​ដែល​បាន​ចុះ​ផ្ដល់​ជូន​ផ្ទាល់។

សូម​ជម្រាប​ថា សម្រាប់​កិច្ចប្រជុំ​សាមញ្ញ​លើក​ទី ២២ នា​ពេលនេះ ដើម្បី​ពិភាក្សា និង​ពិនិត្យ​លើ​វឌ្ឍនភាព​ការងារ និង​បញ្ហា​ប្រឈម ដូចជា​សន្តិសុខ​ស្បៀង និង​សេដ្ឋកិច្ច សង្គមកិច្ច ដែល​កិច្ចប្រជុំ​នេះ​មាន​ការ​ចូលរួម​ពី លោក លី សារី អភិបាល​រង​ខេត្ត រួមនឹង ឯកឧត្តម លោកជំទាវ សមាជិក​ក្រុម​ប្រឹក្សា​ខេត្ត ថ្នាក់​ដឹកនាំ​មន្ទីរ​អង្គភាព និង​រដ្ឋបាល​ក្រុង-ស្រុក ទាំង ១៣។

កិច្ចប្រជុំ​ក៏បាន​ពិនិត្យ និង​អនុម័ត​លើ​សេចក្ដីព្រាង​កំណត់​ហេតុ​កិច្ចប្រជុំ​សាមញ្ញ​លើក​ទី ២១ របស់​ក្រុម​ប្រឹក្សា​ខេត្ត អាណត្តិ​ទី ៤ កាលពីខែកុម្ភៈ កន្លងទៅ ពិនិត្យ ពិភាក្សា និង​អនុម័ត​លើ​សេចក្ដីព្រាង​របាយការណ៍​ប្រចាំ​ខែ​កុម្ភៈ ឆ្នាំ ២០២៦ និង​ពិនិត្យ ពិភាក្សា និង​អនុម័ត​លើ​សេចក្ដីព្រាង​ប្រតិទិន​សម្រាប់​ការ​រៀបចំ​កម្មវិធី​វិនិយោគ ៣ ឆ្នាំ រំកិល ឆ្នាំ ២០២៧-២០២៩ របស់​រដ្ឋបាល​ខេត្ត​សៀមរាប។

ក្នុង​ឱកាស​នោះ​ដែរ លោក​ប្រធាន​ក្រុមប្រឹក្សា​ខេត្ត ក៏បាន​កោតសរសើរ និង​វាយតម្លៃ​ចំពោះ​ក្រុម​ការងារ​ទាំងអស់​ដែល​បាន​អនុវត្ត​ការងារ​ប្រចាំ​ខែ​កុម្ភៈ ឆ្នាំ ២០២៦ បាន​ចេញ​ជា​លទ្ធផល​ល្អ​ប្រសើរ ទោះបីជា​មាន​ការ​ខ្វះ​ចន្លោះ​បន្តិចបន្តួច នឹង​ធ្វើការ​ពិភាក្សា និង​កែលម្អ​សម្រាប់​ទិសដៅ​ការងារ​ជា​បន្ត​ទៀត៕

អត្ថបទ ៖ គឿនវេត

The post ប្រធានក្រុមប្រឹក្សាខេត្តសៀមរាប ណែនាំអាជ្ញាធរក្រុង-ស្រុក បន្តបង្កើនការ យកចិត្តទុកដាក់លើសុខទុក្ខពលករ និងគ្រួសារយុទ្ធជនពលី appeared first on Kampuchea Thmey Daily.

ការ​ដឹកនាំ​ទៅ​ចូលរួម​ប្រជុំ​ថ្នាក់​ភូមិ​ពី​សំណាក់ លោក​ឧត្ដមសេនីយ៍​ឯក ឯក សំអូន នេះ ធ្វើឡើង​បន្ទាប់ពី​មាន​កិច្ចប្រជុំ​ថ្នាក់​លេខាធិការដ្ឋាន នៃ​គណៈកម្មាធិការ​ព្រំដែន​ថ្នាក់​យោធភូមិភាគ​កម្ពុជា​-​ថៃ (RBC) រវាង​យោធភូមិភាគ​ទី ៥ របស់​កម្ពុជា និង​កងទ័ព​ភូមិភាគ​ទី ១ របស់​ថៃ កាល​ថ្ងៃ​ទី ២១ ខែ​សីហា ឆ្នាំ ២០២៥ ដោយ​ភាគី​ទាំងពីរ​បាន​ឯកភាព​ដំណើរការ​កិច្ចប្រជុំ​មួយ​ផ្នែក​តាម​ប្រព័ន្ធ​បច្ចេកវិទ្យា​អន​ឡាញ រយៈពេល​ពេញ ១ ថ្ងៃ។

ជា​លទ្ធផល កិច្ចប្រជុំ​ក្រុម​លេខា បាន​ប្រព្រឹត្តទៅ​ដោយ​មាន​ការ​រីក​ចម្រើន​ជា​វិជ្ជមាន​មួយ​ចំនួន​គួរ​ឱ្យ​កត់សម្គាល់ ក្រោយពេល​ជួប​ប្រជុំ​ពិភាក្សា​គ្នា ដើម្បី​ត្រៀម​សម្រាប់​កិច្ចប្រជុំ​វិសាមញ្ញ​របស់​គណៈកម្មាធិការ​ព្រំដែន​ថ្នាក់​យោធភូមិភាគ កម្ពុជា​-​ថៃ (RBC) នៅ​ថ្ងៃនេះ​ផង​ដែរ៕

អត្ថបទ ៖ អ.ពៅ

The post កម្ពុជា-ថៃ ជួបប្រជុំគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) រវាងយោធភូមិភាគទី ៥ របស់កម្ពុជា និងកងទ័ពភូមិភាគទី ១ របស់ថៃ នៅខេត្តស្រះកែវ appeared first on Kampuchea Thmey Daily.

កាលពី​ព្រឹក​ថ្ងៃ​ទី ១១ ខែ​កក្កដា ឆ្នាំ ២០២៥ នេះ នៅ​សាលា​ឃុំ​សេ​ដា ស្រុក​តំបែរ ខេត្ត​ត្បូងឃ្មុំ មាន​ការ​រៀបចំ​ប្រជុំ​បើក​សំណើ​ដេញថ្លៃ​គម្រោង​ផ្លូវ​បេតុង​មូលនិធិ​ឃុំ​/​សង្កាត់។ កិច្ច​លទ្ធកម្ម​ប្រកប​ដោយ​តម្លាភាព សេរី​យុត្តិធម៌ សិទ្ធិ​ស្វ័យ​សម្រេច​របស់​គណៈកម្មការ​លទ្ធកម្ម ត្រូវ​បាន​អនុវត្ត​យ៉ាង​ល្អ​ប្រសើរ។ ស្ថិត​ក្នុង​ដំណាក់កាល​មាន​កម្លាំង​របស់​រដ្ឋបាល​ឃុំ ស្រុក​/​ខេត្ត និង​អ្នកសារព័ត៌មាន​ចូលរួម​សង្កេតការណ៍​ទៅ​តាម​នីតិវិធី​យ៉ាង​ល្អ​ប្រសើរ។ ផ្លូវ​បេតុង​អា​មេ ១ ខ្សែ នឹង​បង្ហាញ​ខ្លួន​នា​ពេល​ខាង​មុខ ប្រកប​ដោយ​គុណភាព​ខ្ពស់ ដើម្បី​ឆ្លើយតប​ទៅ​នឹង​សេចក្តី​ត្រូវការ​ជា​ចាំបាច់​របស់​ប្រជាពលរដ្ឋ​នៅ​មូលដ្ឋាន។ ក្នុង​កិច្ច​លទ្ធកម្ម​នោះ មាន​ក្រុមហ៊ុន​ចំនួន ៥ ដែល​បាន​ចូលខ្លួន​មក​ធ្វើការ​ប្រកួត​ប្រជែង ហើយ​ក្រុមហ៊ុន​ទទួល​បាន​សិទ្ធិ​សាងសង់​ផ្លូវ គឺ​បាន​ទៅ​ក្រុមហ៊ុន ហង្ស គួយហេង ​ដេញ​តម្លៃ​ទាប​ជាងគេ គឺ តម្លៃ​ជាង ២២៧ លាន​រៀល ដែល​តម្លៃ​ប៉ាន់ស្មាន ជាង ២៣២ លាន​រៀល។

លោក យ៉ា ហ្សាលី អភិបាល​រង​ស្រុក​តំបែរ បាន​បញ្ជាក់​ដល់​អ្នក​ទទួល​ការ​ថា ត្រូវ​ដាក់​សំណើ​ម្នាក់​ម្តងៗ តាម​លំដាប់លំដោយ និង​មាន​សណ្ដាប់ធ្នាប់។ ត្រូវ​ពិនិត្យ​សំណុំ​ឯកសារ​របស់​ខ្លួន​ឲ្យ​បាន​ច្បាស់​លាស់ និង​ត្រឹមត្រូវ​នូវ​ស្រោមសំបុត្រ នៃ​សំណើ​ដេញថ្លៃ (​បិទ​ជិត និង​ការ​ខ្នង​ស្រោមសំបុត្រ​)។ មិន​ត្រូវ​ធ្វើ​សកម្មភាព​រារាំង ប្រទាញ​គ្នា និង​បង្ក​ភាព​រញ៉េរញ៉ៃ​ក្នុង​អំឡុង​ពេល ១០ នាទី​នេះ។ អ្នក​ទទួល​ការ​ម្នាក់ មាន​សិទ្ធិ​បំពេញ​សំណើ​ដេញថ្លៃ​បាន​តែមួយ​ប៉ុណ្ណោះ​ក្នុង​មួយ​កិច្ចសន្យា។ ក្នុង​ករណី​អ្នក​ទទួល​ការ​ទាំងឡាយ​ណា​មិន​គោរព ហើយ​បំពាន​ល្មើស​ទៅ​នឹង​លក្ខខណ្ឌ​ខាងលើ រដ្ឋបាល​ខេត្ត នឹង​ចាត់​វិធានការ​ទៅតាម​នីតិវិធី ដោយ​ដាក់​ក្រុមហ៊ុន​នោះ ទៅ​ក្នុង​បញ្ជី​ខ្មៅ​ជា​រៀង​រហូត។

លោក យ៉ា ហ្សាលី បញ្ជាក់​ទៀត​ថា ចំពោះ​អ្នកសារព័ត៌មាន​អំឡុង​ពេល​សង្កេតការណ៍ ត្រូវ​ក្តាប់​សាច់​រឿង​ឲ្យ​ជុំ មិន​ត្រូវ​បំប្លែង បំភ្លៃ​ព័ត៌មាន​ខុស​ពី​ការ​ពិត រួច​ចែកចាយ​ឲ្យ​អ្នក​ផ្សេង​ធ្វើការ​ផ្សព្វផ្សាយ​នោះ​ទេ ត្រូវ​ផ្សព្វផ្សាយ​ព័ត៌មាន​ឲ្យ​មាន​លក្ខណៈ​គ្រប់​ជ្រុងជ្រោយ ប្រកប​ដោយ​ក្រមសីលធម៌ វិជ្ជាជីវៈ​ច្បាស់​លាស់។

លោក មុំ ស៊ីថា គណៈកម្មការ​ឃុំ​សេ​ដា បាន​បញ្ជាក់​ដែរ​ថា ចំពោះ​ផ្លូវ​បេតុង​ប្រវែង​ជិត ៤០០ ម៉ែត្រ ទទឹង ៤ ម៉ែត្រ កម្រាស់ ១ តឹក​កន្លះ នេះ ត្រូវ​បាន​ទៅ​ក្រុមហ៊ុន ហង្ស គួយហេង។ ក្រុមហ៊ុន ត្រូវ​ធ្វើ​ទៅ​តាម​កិច្ចសន្យា ពេល​សាងសង់ ត្រូវ​ស្ថិត​ក្រោម​ការ​ត្រួតពិនិត្យ​ពី​គណៈកម្មការ​លទ្ធកម្ម ករណី​ត្រាស់​សេ​បាត​ក្រោម ចង​ដែក លាយ​ស៊ីម៉ងត៍ ទៅតាម​បទដ្ឋាន​បច្ចេកទេស​ច្បាស់លាស់ ក្រោម​ការ​ណែនាំ​ពី​ជំនាញ មាន​.​គ្រូ​បង្គោល បច្ចេកទេស​ស្រុក និង​ឃុំ បែបនេះ​ ទើប​ទទួល​បាន​ផ្លូវ​ល្អ ប្រកប​ដោយ​គុណភាព ជា​ប្រយោជន៍​ដល់​ការ​អាស្រ័យ​ផល​ទាំងអស់​គ្នា៕

អត្ថបទ ៖ សាន វិឡែម

The post ពលរដ្ឋឃុំសេដា នឹងទទួលបានផ្លូវបេតុងអាមេថ្មី ១ ខ្សែ ប្រវែងជិត ៤០០ ម៉ែត្រ នាពេលខាងមុខ appeared first on Kampuchea Thmey Daily.

ជាក់ស្ដែង​កាលពី​ព្រឹក​ថ្ងៃ​ទី ២៤ ខែ​មករា ឆ្នាំ ២០២៥ នេះ រដ្ឋបាល​ខណ្ឌ ៧ មករា បាន​បើក​កិច្ច​ប្រជុំ​គណៈ​បញ្ជាការ​ឯកភាព ដែល​ដឹកនាំ​ដោយ លោក ថេង សុថុល អភិបាល នៃ​គណៈ​អភិបាលខណ្ឌ ៧ មករា មាន​ការ​ចូលរួម​ពី​លោក​អភិបាលរង លោក​ចៅសង្កាត់ លោកនាយ​ប៉ុស្តិ៍ និង​មន្ត្រី​ជំនាញ​ពាក់ព័ន្ធ​នៅ​ក្រោម​ឱវាទ។

លោក ថេង សុថុល អភិបាល នៃ​គណៈ​អភិបាលខណ្ឌ​ ៧​ មករា បាន​លើកឡើង​ក្នុង​កិច្ចប្រជុំ​គណៈ​បញ្ជាការ​ឯកភាព នេះ​ថា មន្ត្រី​ជំនាញ​ពាក់ព័ន្ធ​ទាំងអស់​ ត្រូវ​ពង្រឹង​បន្ត​យកចិត្តទុកដាក់​ពី​បញ្ហា សន្តិសុខ បរិស្ថាន ​អនាម័យ​ សណ្ដាប់ធ្នាប់​ នេះ ​ឲ្យ​បាន​ល្អ​ប្រសើរ ដើម្បី​រំដោះ​ចិញ្ចើម​ផ្លូវ​ ក៏ដូចជា​ការ​រក្សា​ចិញ្ចឹម​ផ្លូវ​សម្រាប់​អ្នក​ថ្មើរជើង​ និង​បរិស្ថាន​អនាម័យ​ល្អ​នោះ​តាម​ដង​ផ្លូវ​ និង​មូលដ្ឋាន​ខណ្ឌ​ទាំងមូល។

លោក​អភិបាល ក៏បាន​បន្ត​លើកឡើង ​និង​សំណូមពរ​ដល់​ប្រជាពលរដ្ឋ​ ក៏ដូចជា​អាជីវករ​ទាំងអស់​ដែល​ប្រកប​អាជីវកម្ម​រំលោភ​លើ​ចិញ្ចើមផ្លូវ​សាធារណៈ សូម​ចូលរួម​សហការ​ជាមួយ​អាជ្ញាធរ ​ដើម្បី​រៀបចំ​សណ្ដាប់ធ្នាប់​ចិញ្ចឹម​ផ្លូវ​ឲ្យ​មាន​បរិស្ថាន​អនាម័យ​ល្អ។

គួរ​បញ្ជាក់​ផង​ដែរ​ថា កាលពី​រសៀល​ថ្ងៃ​ទី ២២ ខែ​មករា ឆ្នាំ ២០២៥ ក្នុង​ពិធី​បិទ​សន្និបាត​បូកសរុប​លទ្ធផល​ការងារ​ឆ្នាំ ២០២៤ និង​លើក​ទិសដៅ​ការងារ​ឆ្នាំ ២០២៥ របស់​រដ្ឋបាល​រាជធានី​ភ្នំពេញ លោក​អភិ​សន្តិ​បណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ ក៏បាន​ណែនាំ​ឲ្យ​អាជ្ញាធរ​រាជធានី​ភ្នំពេញ ផ្តោត​យកចិត្តទុកដាក់​កិច្ចការ​រៀបចំ​សណ្ដាប់ធ្នាប់​សាធារណៈ​តាម​ដង​ផ្លូវ ជាពិសេស​លើ​ចិញ្ចើម​ផ្លូវ​គ្រប់​ខណ្ឌ​ទាំង ១៤។

ក្នុង​នោះ​ដែរ លោក ឃួង ស្រេង អភិបាល​រាជធានី​ភ្នំពេញ បាន​លើកទឹកចិត្ត​ឲ្យ​មាន​ការ​រៀបចំ​ចំណត​សាធារណៈ បន្ត​ខិតខំ​អនុវត្ត​ហេដ្ឋារចនាសម្ព័ន្ធ​រូបវន្ត និង​ត្រូវ​បន្ត​យកចិត្តទុកដាក់​អនុវត្ត​នូវ​វិធានការ​ចំនួន ៣ ទន្ទឹមគ្នា គឺ សណ្ដាប់ធ្នាប់​ចិញ្ចើម​ផ្លូវ សណ្ដាប់ធ្នាប់​សំណង់ និង​សណ្ដាប់ធ្នាប់​អ្នក​លក់ដូរ។

លោក​អភិបាល​រាជធានី បាន​គូស​បញ្ជាក់​ដែរ​ថា ចំពោះ​មុខ ទោះបី​កិច្ច​ការងារ​នេះ​មាន​ភាព​ស្មុគស្មាញ និង​ត្រូវ​ប្រឈមមុខ​នឹង​ផលប្រយោជន៍​ឯកជន​របស់​ម្ចាស់​លំនៅឋាន ម្ចាស់​អាជីវកម្ម អង្គភាព និង​វិស័យ​ឯកជន​មួយ​ចំនួន​ក្តី ប៉ុន្តែ​ជា​ឆន្ទៈ និង​ជា​ជំហរ​ដឹកនាំ​របស់​រដ្ឋបាល​រាជធានី​ភ្នំពេញ ចាំបាច់​ត្រូវតែ​អនុវត្ត​កិច្ច​ការងារ​នេះ​ដោយ​ឥត​រាថយ៕

អត្ថបទ ៖ សុភា

The post អភិបាលខណ្ឌ ៧ មករា ប្រជុំដាក់ផែនការ និងជំរុញមន្ត្រីពាក់ព័ន្ធ បន្តយកចិត្តទុកដាក់បញ្ហាសណ្ដាប់ធ្នាប់ក្នុងមូលដ្ឋាន appeared first on Kampuchea Thmey Daily.

កិច្ចប្រជុំ​នេះ​ដែរ ធ្វើឡើង​ក្រោម​វត្តមាន លោក គឹម ឈុនអ៊ូ ប្រធាន​ក្រុមប្រឹក្សា​ខណ្ឌ​បឹង​កេងកង , លោក សុខ សម្បត្តិ អភិបាល នៃ​គណៈ​អភិបាលខណ្ឌ​បឹង​កេងកង និង​មាន​ការ​ចូលរួម​ពី​សមាជិក-សមាជិកា​ក្រុមប្រឹក្សា​ខណ្ឌ ,លោក លោកស្រី ជា​អភិបាលរងខណ្ឌ នាយក នាយករង លោក​អធិការ មេបញ្ជាការ​កងរាជអាវុធហត្ថ ចៅសង្កាត់​ទាំង ៧ និង​មន្ត្រី​ចំណុះ​ជំនាញ​ជាច្រើន​ទៀត​ផង​ដែរ។

លោក សុខ សម្បត្តិ អភិបាល​ខណ្ឌ បាន​ឡើង​អាន​នូវ​របាយការណ៍​លើ​កិច្ច​ការងារ​ជាច្រើន​ដែល​រដ្ឋបាល​ខណ្ឌ​ទាំង​ថ្នាក់​សង្កាត់ និង​ខណ្ឌ​បាន​អនុវត្ត​សម្រេចបាន​លទ្ធផល​លើ​របៀបវារៈ​ការងារ ក្នុង​កិច្ចប្រជុំ​សាមញ្ញ​លើក​ទី ៤ កន្លងទៅ ជូន​អង្គប្រជុំ​ជ្រាប។

លោក​អភិបាល បាន​ឱ្យ​ដឹង​ថា​ ទាំង​កិច្ច​ការងារ​បម្រើ​សេវា​តម្រូវការ​ឯកសារ , ការងារ​ការពារ​សន្តិ​សុខ រួម​ជាមួយ​កិច្ច​ផ្សេងៗ​ ទៀត ថ្នាក់រដ្ឋបាល​ខណ្ឌ​ បាន​យកចិត្តទុកដាក់​បំផុត ដើម្បី​ជា​ការ​ឆ្លើយតប​ទៅ​នឹង​ការ​ត្រូវការ​របស់​​ប្រជាពលរដ្ឋ ព្រោះ​ការងារ​ទាំងនេះ គឺជា​កាតព្វកិច្ច​របស់​អាជ្ញាធរ ត្រូវ​យកចិត្ត​ទុក​ដាក់​ខ្ពស់ បម្រើ​ដោយ​មិន​មាន​ការ​រារែក។

ក្នុង​អង្គប្រជុំ​ដដែល​នោះ ក៏មាន​មន្ត្រី បានលើកឡើង​ពី​ផល​ប្រឈម​មួយចំនួន នៃ​ការ​កិច្ចការងារ​ដែល​កំពុង​អនុវត្ត ដើម្បី​ជា​ការ​សុំ​គោលការណ៍ និង​ការ​បង្ហាញ​ទិសដៅ​បន្ត ដើម្បី​យកទៅអនុវត្ត​ឱ្យ​ការងារ​សម្រេច​បាន​ដោយ​ប្រសិទ្ធភាព។

លោក គឹម ឈុន​អ៊ូ ប្រធាន​ក្រុមប្រឹក្សា ក្រោយពី​បាន​ស្តាប់​របាយការណ៍​សម្រេច​ការងារ និង​ផល​ប្រឈម​ខ្លះ​រួចមក លោក​បាន​ឡើង​មានមតិ ផ្តល់​ជា​អនុសាសន៍​សម្ខាន់ៗ​ ជាច្រើន ដើម្បី​ជា​ទន់​សម្រាប់​ការ​យក​ទៅ​អនុវត្ត​កិច្ចការងារ​ក្នុង​ដែន​សមត្ថកិច្ច​របស់ខ្លួន ដើម្បីឱ្យ​ប្រសិទ្ធភាព​ការងារ កាន់តែ​ល្អ​ប្រសើរ​ឡើង ពិសេស​សម្រាប់​មន្ត្រី​ក្មេងៗ​ ជំនាន់​ក្រោយៗ។

លោក​ប្រធាន​ក្រុមប្រឹក្សា ណែ​នាំ​ឱ្យ​អាជ្ញាធរ ត្រូវ​បន្ត​ការ​យកចិត្តទុកដាក់​ខ្ពស់​លើ​ការ​ដោះស្រាយ​ទុក្ខ​កង្វល់​របស់​ពលរដ្ឋ ពិសេស​សំណើ​សំណូមពរ​ផ្សេងៗ ដែល​ពួកគាត់​ស្នើ​សុំ​រក​កិច្ច​អន្តរាគមន៍ គឺ​ត្រូវតែ​ដោះស្រាយ​ជូន​ឱ្យ​បាន​ទាន់​ពេលវេលា និង​ប្រកបដោយ​ប្រសិទ្ធភាព​ផង​ដែរ។ កត្តា​ទាំងនេះ​ហើយ គឺជា​អ្វីដែល​ប្រជាជន​ចង់បាន​ពី​អាជ្ញាធរ ហើយក៏​ជាការ​ឆ្លើយតប​ទៅនឹង​ការងារ​យុទ្ធសាស្ត្រ​ចតុកោណ​របស់​រាជរដ្ឋាភិបាល​ផង​ដែរ៕

អត្ថបទ ៖ សុភា

The post ក្រុមប្រឹក្សាខណ្ឌបឹងកេងកង បើកកិច្ចប្រជុំសាមញ្ញលើកទី ៥ អាណត្តិទី ៤ appeared first on Kampuchea Thmey Daily.