ប្រទេសម៉ុងហ្គោលី Archives - Kampuchea Thmey Daily

នាយករដ្ឋមន្ត្រីម៉ុងហ្គោលីនៅចន្លោះចិននិងរុស្ស៊ី ចុះចេញពីអំណាច ក្រោយការតវ៉ាដ៏ខ្លាំង

Rann Reuy — Tue, 03 Jun 2025 08:32:51 +0000

នាយករដ្ឋមន្ត្រីម៉ុងហ្គោលី លោក Oyun-Erdene Luvsannamsrai បានប្រកាសលាលែងពីដំណែងនៅព្រឹកថ្ងៃអង្គារនេះ បន្ទាប់ពីការបរាជ័យក្នុងការទទួលបានការគាំទ្រគ្រប់គ្រាន់នៅក្នុងការបោះឆ្នោតផ្តល់ទំនុកចិត្តនៅក្នុងសភា ដែលរៀបចំឡើងដោយសារតែកំសួលនៃការតវ៉ារបស់ប្រជាជននៅក្នុងប្រទេស។

នាយករដ្ឋមន្ត្រីម៉ុងហ្គោលី លោក Luvsannamsrain Oyun-Erdene និយាយទៅកាន់សភាមុនការបោះឆ្នោតផ្តល់សេចក្តីទុកចិត្ត។ REUTERS

ប្រព័ន្ធផ្សព្វផ្សាយក្នុងស្រុងរបស់ម៉ុងហ្គោលី ikon.mn បានរាយការណ៍ថា នាយករដ្ឋមន្ត្រីបានទទួលសំឡេងគាំទ្រត្រឹមតែចំនួន៤៤សំឡេងប៉ុណ្ណោះ ពោលគឺតិចជាងចំនួន ៦៤សំឡេង ដែលត្រូវការ ដើម្បីបន្តតំណែងនេះ។

ការបោះឆ្នោតផ្តល់សេចក្តីទុកចិត្តរបស់សភា បានធ្វើឡើងបន្ទាប់ពីការតវ៉ាជាច្រើនសប្តាហ៍ដែលបង្កឡើងដោយរបាយការណ៍នៃការចំណាយដ៏ច្រើនសន្ធឹកសន្ធាប់របស់កូនប្រុសនាយករដ្ឋមន្ត្រី ស្របពេលដែលអ្នកតវ៉ាខ្លះបានអំពាវនាវឲ្យនាយករដ្ឋមន្ត្រីចុះចេញពីតំណែង។

តាមសេចក្តីរាយការណ៍របស់ សារព័ត៌មាន politico ដែលមានមូលដ្ឋាននៅរដ្ឋ Virginia សហរដ្ឋអាមេរិក មុនពេលបោះឆ្នោតសភា នាយករដ្ឋមន្ត្រីម៉ុងហ្គោលី លោក Oyun-Erdene បានព្រមានថា ការបោះឆ្នោតអាចនាំឱ្យមានអស្ថិរភាព និងអង្រួនលទ្ធិប្រជាធិបតេយ្យដែលកំពុងចុះខ្សោយរបស់ម៉ុងហ្គោលី។

លោក Oyun-Erdene ត្រូវបានស្រង់សម្តី ដូចបាននិយាយថា៖«ប្រសិនបើអភិបាលកិច្ចមិនស្ថិតស្ថេរ ស្ថានភាពសេដ្ឋកិច្ចកាន់តែយ៉ាប់យ៉ឺន ហើយគណបក្សនយោបាយមិនអាចមកមូលមតិគ្នាបានទេ។ វាអាចនាំឲ្យសាធារណជនបាត់បង់ជំនឿលើការគ្រប់គ្រងរបស់សភា និងអាចធ្វើឱ្យប្រព័ន្ធសភាប្រជាធិបតេយ្យរបស់យើងប្រឈមនឹងហានិភ័យនៃការដួលរលំ»។

ប្រជាជនម៉ុងហ្គោលីតវ៉ានៅទីក្រុង Ulaanbaatar នៅថ្ងៃទី២មិថុនា ទាមទារនាយករដ្ឋមន្ត្រីចុះចេញពីអំណាច។ REUTERS

គាត់បានការពារភាពសុចរិតរបស់គាត់ ប៉ុន្តែបានទទួលស្គាល់កំហុសមួយថា៖«ការលះបង់ពេលវេលាច្រើនពេកសម្រាប់គម្រោងធំៗ ខណៈដែលគាត់យកចិត្តទុកដាក់មិនគ្រប់គ្រាន់ចំពោះបញ្ហាសង្គម និងនយោបាយផ្ទៃក្នុង»។

លោក Oyun-Erdene បានកាន់មុខតំណែងនេះអស់រយៈពេល៤ឆ្នាំហើយ និងធ្លាប់ប្រឈមការអំពាវឲ្យចុះចេញពីអំណាចក្នុងពេលកន្លងមក និងបានរួចផុតពីការអំពាវនាវទាំងនោះ។

កាលពីឆ្នាំមុន សភាប្រទេសម៉ុងហ្គោលី ត្រូវបានពង្រីកពី ៧៦អាសនៈដល់១២៦អាសនៈ បន្ទាប់ពីកំណែទម្រង់ការបោះឆ្នោត និង ក៏ដោយសារតែការតម្រូវឲ្យមានរដ្ឋាភិបាលចម្រុះ។

ដោយជាប់ព្រំដែនរវាងរុស្ស៊ី និងចិន ម៉ុងហ្គោលីបានតស៊ូដើម្បីក្លាយជាប្រជាធិបតេយ្យបន្ថែមទៀត បន្ទាប់ពីសម័យបក្សតែ១គ្រប់គ្រងរដ្ឋ (party-state)។ រដ្ឋកុម្មុយនិស្តមួយក្នុងសម័យសង្គ្រាមត្រជាក់បាននិងកំពុងប្រែក្លាយទៅជាលទ្ធិប្រជាធិបតេយ្យតាំងពីការដួលរលំនៃសហភាពសូវៀត។

ក្រុមអ្នកតវ៉ាបាននិយាយថា ទ្រព្យសម្បត្តិរ៉ែរបស់ប្រទេសបានផ្តល់ផលប្រយោជន៍ដល់អាជីវកម្ម និងអ្នកមានទ្រព្យសម្បត្តិ ខណៈដែលជនជាតិម៉ុងហ្គោលីជាច្រើននៅតែរស់នៅក្នុងភាពក្រីក្រនៅឡើយ។

សារព័ត៌មាន politico បានដកស្រង់ទស្សនៈវិភាគរបស់ លោកស្រី Erin Murphy នាយករង និងជាសហការីជាន់ខ្ពស់នៃប្រទេសឥណ្ឌា និងសេដ្ឋវិទូអាស៊ីដែលកំពុងរីកចម្រើននៅមជ្ឈមណ្ឌលសម្រាប់ការសិក្សាយុទ្ធសាស្ត្រ និងអន្តរជាតិបាននិយាយថា «វាពិបាកណាស់ក្នុងការកសាងមូលដ្ឋានគ្រឹះសម្រាប់លទ្ធិប្រជាធិបតេយ្យ» នៅពេលដែលម៉ុងហ្គោលីក៏ត្រូវតែដោះស្រាយបញ្ហាសេដ្ឋកិច្ច ដែលជាប្រភពចម្បងនៃការខកចិត្តរបស់ប្រជាជន។

អ្នកស្រីបាននិយាយថា៖«យើងនៅតែត្រូវមើលថាតើមានអ្វីកើតឡើងបន្ទាប់ និងរបៀបដែលរដ្ឋាភិបាលថ្មីមានផែនការដោះស្រាយបញ្ហាទាំងនេះ»៕

រ៉ាន់ រើយ

The post នាយករដ្ឋមន្ត្រីម៉ុងហ្គោលីនៅចន្លោះចិននិងរុស្ស៊ី ចុះចេញពីអំណាច ក្រោយការតវ៉ាដ៏ខ្លាំង appeared first on Kampuchea Thmey Daily.

បវរកញ្ញាពិភពលោក ម៉ុងហ្គោលី រងការចោទប្រកាន់ពីបទប្រើហិង្សាដាក់ស្វាមី ១ថ្ងៃ២ដង

សាង ស្រីល័ក្ខ — Fri, 20 Dec 2024 08:41:48 +0000

បវរកញ្ញាពិភពលោកម៉ុងហ្គោលីឆ្នាំ ២០០៦ នាង Selenge Erdene-Ochir ដែលជាតំណាងប្រទេសក្នុងការប្រលងបវរកញ្ញាពិភពលោកក្នុងឆ្នាំនោះបានបង្ហាញខ្លួននៅក្នុងតុលាការចក្រភពអង់គ្លេស ដោយត្រូវបានចោទប្រកាន់ពីបទប្រើហិងស្សាលើប្តីរបស់នាងពីរដងក្នុងមួយថ្ងៃ។

សារព័ត៌មាន Daily Mail រាយការណ៍ថា បវរកញ្ញាវ័យ ៣៧ ឆ្នាំរូបនេះ បានបង្ហាញខ្លួននៅតុលាការ Aylesbury Crown កាលពីថ្ងៃអង្គារ បន្ទាប់ពីការចាប់ខ្លួនពីប៉ូលិស។ នាងប្រឈមនឹងការចោទប្រកាន់ពីការវាយដំពីរផ្សេងគ្នាប្រឆាំងនឹងប្តីរបស់នាងគឺលោក Robert Clay ដែលបានកើតឡើងនៅថ្ងៃទី ៣០ ខែតុលា នៅ Milton Keynes រដ្ឋ Buckinghamshire។ តុលាការបាននិយាយទៀតថា ការវាយប្រហារដែលត្រូវបានចោទប្រកាន់រួមមានការដាល់ចំកណ្ដាលមុខដួលដីឥដ្ឋ ដែលបណ្តាលឲ្យមានរបួសដល់មាត់យ៉ាងខ្លាំង។

ទោះបីជាយ៉ាងណាក៏ដោយ Erdene-Ochir បានបដិសេធការចោទប្រកាន់នេះ ដោយបានជំទាស់នឹងការរាប់ទាំងការវាយដំ ដែលនាំឲ្យមានគ្រោះថ្នាក់ដល់រាងកាយពិតប្រាកដ។ ជាមួយគ្នានោះ សូម្បីតែមេធាវីការពារក្តីរបស់នាងដែលដឹកនាំដោយលោក Jasvinder Toor បានបញ្ជាក់ជាថ្មីពីការបដិសេធរបស់នាងចំពោះការចោទប្រកាន់នេះផងដែរ។

យ៉ាងណាមិញ ចៅក្រមបានកំណត់ថ្ងៃជំនុំជម្រះសម្រាប់សប្តាហ៍នៃថ្ងៃទី ២០ ខែមេសា ឆ្នាំ ២០២៦ និងបានអនុញ្ញាតឲ្យ Erdene-Ochir បន្តនៅក្រៅឃុំដោយមានលក្ខខណ្ឌ។ លោកបានរំឭកនាងថា ការជំនុំជម្រះនឹងបន្តទៅមុខដោយគ្មាននាង ប្រសិនបើនាងមិនចូលរួម។

ក្នុងឆ្នាំ ២០០៦ Erdene-Ochir បានបង្កើតប្រវត្តិសាស្ត្រជាបេក្ខនារីម៉ុងហ្គោលីដំបូងគេ ដែលបានឈានដល់វគ្គផ្តាច់ព្រ័ត្រនៃការប្រកួតបវរកញ្ញាពិភពលោក។ នាងក៏ជាជនជាតិម៉ុងហ្គោលីដំបូងគេដែលបានប្រកួតប្រជែង និងធ្វើការឲ្យប៉ុស្តិ៍ម៉ូដ FTV៕

អត្ថបទ៖ សាង ស្រីល័ក្ខ

ចុចអាន៖តារាសម្ដែងសាច់ចាំ Tom Cruise ទទួលពានរង្វាន់កិត្តិយស ពីកងទ័ពជើងទឹកអាមេរិក

The post បវរកញ្ញាពិភពលោក ម៉ុងហ្គោលី រងការចោទប្រកាន់ពីបទប្រើហិង្សាដាក់ស្វាមី ១ថ្ងៃ២ដង appeared first on Kampuchea Thmey Daily.

នេះជាមូលហេតុ ម៉ុងហ្គោលី មិនចាប់ខ្លួនលោក ពូទីន តាមដីកា ICC

Sok Sovann — Wed, 04 Sep 2024 01:01:08 +0000

តុលាការឧក្រិដ្ឋកម្មអន្តរជាតិ (ICC), ប្រទេសអ៊ុយក្រែន និងសហភាពអឺរ៉ុប (EU) សុទ្ធតែអំពាវនាវឲ្យម៉ុងហ្គោលី ចាប់ខ្លួនប្រធានាធិបតីរុស្ស៊ី ហើយថ្វីត្បិតតែរដ្ឋាភិបាលទីក្រុងអ៊ូឡង់បាទ័រ គឺជាភាគីហត្ថលេខីរបស់ ICC ក៏ដោយ ក៏ខ្លួនមិនអនុវត្តតាមដីកាឆ្នាំ២០២៣ចាប់ខ្លួនលោក វ្ល៉ាឌីមៀរ ពូទីន ដែរ និងថែមទាំងបញ្ជាក់ហេតុផលច្បាស់ៗថា ម៉ុងហ្គោលី គឺពឹងផ្អែកយ៉ាងខ្លាំងលើប្រទេសជិតខាងសម្រាប់វិស័យថាមពល ហើយរក្សាគោលនយោបាយអព្យាក្រឹតភាព។

អ្នកនាំពាក្យរដ្ឋាភិបាលទីក្រុងអ៊ូឡង់បាទ័រ ប្រាប់ទៅសារព័ត៌មាន Politico EU តាមរយៈអ៊ីមែលកាលពីថ្ងៃអង្គារទី៣ខែកញ្ញាឆ្នាំ២០២៤ថា “ម៉ុងហ្គោលី នាំចូលផលិតផលប្រេង៩៥% និងថាមពលអគ្គិសនីប្រមាណ២០% ពីអ្នកជិតខាង។ ការផ្គត់ផ្គង់នេះគឺមានសារៈសំខាន់ខ្លាំងណាស់ ដើម្បីធានានូវអត្ថិភាពនិងប្រជាជនរបស់យើង ហើយម៉ុងហ្គោលី តែងតែរក្សាគោលនយោបាយអព្យាក្រឹតភាព ក្នុងទំនាក់ទំនងការទូតរបស់ខ្លួនទាំងអស់ ដូចដែលបានបង្ហាញនៅក្នុងសេចក្តីថ្លែងការណ៍តាំងពីដើមរៀងមក”។

សូមបញ្ជាក់ថា លោកពូទីន បានធ្វើដំណើរទៅប្រទេសម៉ុងហ្គោលី តាមការអញ្ជើញរបស់សមភាគី Ukhnaagiin Khurelsukh ហើយបានជួបជាមួយមន្ត្រីកំពូលៗនៅទីក្រុង អ៊ូឡង់បាទ័រ ដើម្បីពិភាក្សាអំពីភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ។

ប្រធានាធិបតីរុស្ស៊ី ក៏បានចូលរួមក្នុងពិធីរំលឹកខួបលើកទី៨៥នៃសមរភូមិ Khalkhin Gol ដែលជាជ័យជម្នះយ៉ាងធំធេងរបស់កងកម្លាំងសូវៀតនិងម៉ុងហ្គោលីលើកងទ័ពអធិរាជជប៉ុន ក្នុងសម័យសង្គ្រាមលោកលើកទី២ផងដែរ។

ក្នុងអំឡុងកិច្ចប្រជុំនោះ លោកពូទីនថែមទាំងអញ្ជើញសមភាគីម៉ុងហ្គោលី Ukhnaagiin Khurelsukh ឲ្យចូលរួមកិច្ចប្រជុំកំពូល BRICS នៅទីក្រុង Kazan នៃប្រទេសរុស្ស៊ីនាខែក្រោយទៀតផង។

សូមបញ្ជាក់ថា ម៉ុងហ្គោលីគឺជាប្រទេសគ្មានសមុទ្រដែលជាប់ព្រំដែនរុស្ស៊ីនៅភាគខាងជើង និងចិននៅភាគខាងត្បូង ហើយបានរក្សាទំនាក់ទំនងល្អទាំងជាមួយទីក្រុងមូស្គូនិងប៉េកាំង។

ត្បិតតែ ICC អាចចេញការថ្កោលទោសជាផ្លូវការចំពោះម៉ុងហ្គោលីដែលមិនហ៊ានចាប់ខ្លួនលោកពូទីនក៏ពិតមែន ប៉ុន្តែ ICC គ្មានសិទ្ធអំណាចអ្វី ដាក់ទណ្ឌកម្មឬពិន័យម៉ុងហ្គោលីបានឡើយ៕

អត្ថបទ៖ សុខ សុវណ្ណ

ចុចអាន៖ តើមានប្រមុខរដ្ឋណាដែលធ្លាប់ប្រឈមដីកាចាប់ខ្លួនពី ICC ដូចលោកពូទីន ហើយអនុវត្តយ៉ាងណា?

The post នេះជាមូលហេតុ ម៉ុងហ្គោលី មិនចាប់ខ្លួនលោក ពូទីន តាមដីកា ICC appeared first on Kampuchea Thmey Daily.

តើមានប្រមុខរដ្ឋណាដែលធ្លាប់ប្រឈមដីកាចាប់ខ្លួនពី ICC ដូចលោកពូទីន ហើយអនុវត្តយ៉ាងណា?

Rann Reuy — Tue, 03 Sep 2024 08:42:12 +0000

ដីកាចាប់ខ្លួនប្រធានាធិបតីរុស្ស៊ី លោក វ៉្លាឌីមៀ ពូទីន ដែលចេញកាលពីថ្ងៃទី១៧ខែមីនាឆ្នាំ២០២៣ ដោយតុលាការឧក្រិដ្ឋកម្មអន្តរជាតិ (ICC) កំពុងទាក់ទាញការចាប់អារម្មណ៍យ៉ាងខ្លាំងនាពេលនេះ ស្របពេលលោកពូទីនចេញបំពេញទស្សនកិច្ចលើកដំបូងក្នុងរដ្ឋហត្ថលេខីនិងសមាជិករបស់ ICC។

ជុំវិញដំណើរទស្សនកិច្ចរបស់លោកពូទីនដែលបានបញ្ជាកងទ័ពរបស់ខ្លួនចូលលុកលុយប្រទេសអ៊ុយក្រែនដែលបានបង្កើតសង្គ្រាមជិត១០០០កន្លងមកនេះ និងការប្រឈមមុខនឹងដីកាចាប់ខ្លួនដែលបានចេញកាលពីថ្ងៃទី១៧ខែមីនា២០២៣ តើលោកពូទីនពិតជាត្រូវចាប់ខ្លួនក្នុងដំណើរទស្សនកិច្ចនៅរដ្ឋជាសមាជិក ICC ដូចជាម៉ុងហ្គោលីនោះមែនឬយ៉ាងណា?

ប្រធានាធិបតីរុស្ស៊ី វ៉្លាឌីមៀ ពូទីន (ស្តាំ) និង ប្រធានាធិបតីម៉ុងហ្គោលី។ TASS

តទៅនេះ កម្ពុជាថ្មី សូមទាញអារម្មណ៍មិត្តអ្នកអានមកតាមដានករណីស្រដៀងគ្នានេះ ដែលមានប្រមុខរដ្ឋក្នុងអំណាចធ្លាប់ប្រឈមដីកាចាប់ខ្លួនដែរ ដើម្បីបានជ្រាបពីដំណើររឿងថាតើមានការចាប់ខ្លួនឬទេ?

ប្រធានាធិបតីស៊ូដង់ លោក Omar al-Bashir ឡើងកាន់អំណាចដោយរដ្ឋប្រហារយោធា ជាប្រមុខរដ្ឋដំបូងដែលប្រឈមដីកាចាប់ខ្លួន។

Omar al-Bashir ពេលនៅមានអំណាច។ AP

តាមការចុះផ្សាយមួយចំនួន បានលើកឡើងករណីរបស់ប្រមុខរដ្ឋស៊ូដង់ដែលបានទទួលដីកាចាប់ខ្លួនរបស់តុលាការឧក្រិដ្ឋកម្ម ដោយចោទប្រកាន់ឧក្រិដ្ឋកម្មប្រឆាំងមនុស្សជាតិនិងឧក្រិដ្ឋកម្មសង្គ្រាម។

ក្រុមប្រឹក្សាជម្រះមុនសវនាការនៃ ICC បានចេញដីកាចាប់ខ្លួនលោក Omar al-Bashir នៅថ្ងៃទី៤ខែមីនា ឆ្នាំ២០០៩ ដោយចោទប្រកាន់លោកពីបទឧក្រិដ្ឋកម្មប្រឆាំងមនុស្សជាតិចំនួន៥ករណី និងឧក្រិដ្ឋកម្មសង្គ្រាមចំនួន២ករណី ដែលសំដៅទៅលើការសម្លាប់ជនស៊ីវិលនៃទីក្រុង Darfur។

តាមរយៈការធ្វើរដ្ឋប្រហារយោធាមួយ លោក Omar al-Bashir បានឡើងកាន់អំណាចកាលថ្ងៃទី៣០ខែមិថុនាឆ្នាំ១៩៨៩ និងបន្តកាន់អំណាននេះរហូតដល់ថ្ងៃទី១១ខែមេសាឆ្នាំ២០១៩ ដោយការធ្វើរដ្ឋប្រហារទម្លាក់វិញ។

លោក Omar al-Bashir ពេលមានអំណាចដឹកនាំយោធា។

ព័ត៌មានមានមូលដ្ឋានប្រចាំតំបន់មជ្ឈិមបូព៌ា Al Jazeera បានលើកឡើងថា បន្ទាប់ពីកាន់អំណាចរយៈពេល៣០ឆ្នាំ អំណាចរបស់លោក Omar al-Bashir បានបញ្ចប់ទៅវិញស្ទើរតែដូចរបៀបដែលលោកដណ្តើមកាន់អំណាចដែរ។

Omar al-Bashir ក៏បានប្រឈដីកាចាប់ខ្លួនលើកទី២ពីតុលាការឧក្រិដ្ឋកម្មអន្តរជាតិ ដែលបានចេញក្រោយមកនៅថ្ងៃទី១២ខែកក្កដា ឆ្នាំ២០១០ ដោយបន្ថែមបទចោទចំនួន៣ករណីទៀត គឺបទចោទអំពើប្រល័យពូជសាសន៍។ លោកជាប្រមុខរដ្ឋដំបូងគេដែលត្រូវបានតុលាការ ICC ចោទប្រកាន់។

តាមការអត្ថាធិប្បាយរបស់អ្នកច្បាប់ដែលបានចុះផ្សាយនៅសារព័ត៌មាន The Dailystar រដ្ឋាភិបាលស៊ូដង់បានបដិសេធការអនុវត្តដីកានោះ ដោយសារប្រទេសស៊ូដង់មិនមែនជារដ្ឋភាគីនៃលក្ខន្តិកៈទីក្រុងរ៉ូមដែលបង្កើត ICC ដូច្នេះហើយបានអះអាងថាខ្លួនមិនចាំបាច់ប្រតិបត្តិដីកានោះទេ។

ទោះជាយ៉ាងណាក៏ដោយ ដំណោះស្រាយក្រុមប្រឹក្សាសន្តិសុខអង្គការសហប្រជាជាតិលេខ ១៥៩៣ បានបង្វែរប្រទេសស៊ូដង់ទៅ ICC ដែលផ្តល់យុត្តាធិការរបស់ ICC លើឧក្រិដ្ឋកម្មអន្តរជាតិដែលបានប្រព្រឹត្តនៅក្នុងប្រទេសស៊ូដង់ និងកាតព្វកិច្ចរដ្ឋាភិបាលរបស់ខ្លួនក្នុងការសហការជាមួយ ICC ។

បន្ទាប់ពីការចោទប្រកាន់ លោក al-Bashir បានធ្វើទស្សនកិច្ចទៅប្រទេសមួយចំនួននៅអាស៊ី អឺរ៉ុប និងអាហ្វ្រិក ដែលប្រទេសទាំងអស់នេះបដិសេធមិនចាប់ខ្លួនគាត់។ ក្នុងឆ្នាំ២០១៥ ក្នុងអំឡុងពេលដំណើរទស្សនកិច្ចទៅកាន់ប្រទេសអាហ្វ្រិកខាងត្បូងសម្រាប់កិច្ចប្រជុំសហភាពអាហ្រ្វិក (AU) តុលាការអាហ្រ្វិកខាងត្បូងបានហាមឃាត់លោក al-Bashir មិនឱ្យចាកចេញពីប្រទេស ខណៈពេលដែលវាពិចារណាថាតើត្រូវប្រគល់លោកទៅឱ្យ ICC ហើយក្រោយមកក៏ដោះលែងវិញ។

ប្រធានាធិបតីស៊ូដង់ Omar al-Bashir ក្នុងកិច្ចប្រជុំអន្តរជាតិពេលមានអំណាច។

ក្រោយមកទៀត al-Bashir បានទៅចូលរួមប្រជុំកំពូលប្រទេសតំបន់អារ៉ាប់ហៅថា Arab League ក្នុងឆ្នាំ២០១៧ ក្នុងប្រទេសហ្ស៊កដានី ដែលមិនបានអនុវត្តតាមដីកាចាប់ខ្លួននោះដែរ។

អង្គការសហប្រជាជាតិបាននិយាយថា ស្ថិតក្រោមអំណាចរបស់ al-Bashir ប្រជាជន៣០ម៉ឺននាក់ត្រូវបានសម្លាប់ និង២,៥លាននាក់បានបាត់បង់ទីជម្រកក្នុងជម្លោះដ៏ធំមួយនៅភាគខាងលិចប្រទេសក្នុងឆ្នាំ២០០៣ក្នុងជម្លោះដ៏សែនរុំារ៉ៃ។

ទោះបីមានការទាមទារម្តងហើយម្តងទៀតពីស្ថាប័នអន្តរជាតិឱ្យបង្វែរការឃុំខ្លួន al-Bashir

ទៅឱ្យទទួលទោសនៅ ICC រដ្ឋាភិបាលស៊ូដង់ដែលស្ថិតក្រោមក្រុមប្រឹក្សាមានទាំងយោធា និងស៊ីវិល បានត្រឹមសន្យាប៉ុណ្ណោះ ហើយរហូតដល់ពេលនោះអតីតប្រមុខរដ្ឋស៊ូដង់ដែលរងការចោទពីបទឧក្រិដ្ឋនៅតែមិនត្រូវបានបញ្ជូនប្រឈមមុខច្បាប់អន្តរជាតិនៅឡើយ៕

The post តើមានប្រមុខរដ្ឋណាដែលធ្លាប់ប្រឈមដីកាចាប់ខ្លួនពី ICC ដូចលោកពូទីន ហើយអនុវត្តយ៉ាងណា? appeared first on Kampuchea Thmey Daily.

ពូទីនទៅដល់ម៉ុងហ្គោលីដោយរលូន ទោះ ICC អំពាវនាវរដ្ឋសមាជិកបំពេញកាតព្វកិច្ច

Rann Reuy — Tue, 03 Sep 2024 03:48:03 +0000

ដំណើរទស្សនកិច្ចលើកដំបូងរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីនដែលចង់បានដោយដីកាចាប់ខ្លួនរបស់តុលាការឧក្រិដ្ឋកម្មអន្តរជាតិ (ICC) ទៅកាន់ប្រទេសម៉ុងហ្គោលីដែលជារដ្ឋឯករាជ្យជាសមាជិកហត្ថលេខីរបស់ ICC បង្កើតឱ្យមានការជជែក ការវិភាគ និងការតាមដានយ៉ាងយកចិត្តទុកដាក់ជុំវិញពិភពលោក ថាតើដំណើរទស្សនកិច្ចរបស់លោកពូទីនទៅកាន់ប្រទេសម៉ុងហ្គោលីប្រព្រឹត្តទៅបែបណា។

រដ្ឋមន្ត្រីការបរទេសម៉ុងហ្គោលី Batmunkh Battsetseg ទទួលស្វាគមន៍ដំណើររបស់លោកពូទីននៅល្ងាចថ្ងៃចន្ទ។ AP

មុនដំណើរទស្សនកិច្ចនេះ ICC បានជំរុញឱ្យរដ្ឋហត្ថលេខីបំពេញកាតព្វកិច្ចរបស់ខ្លួនក្នុងនាមរដ្ឋជាសមាជិក ហើយប្រទេសម៉ុងហ្គោលីបានចុះហត្ថលេខាលើការផ្តល់សត្យាប័ន ហើយ យោងតាមអង្គការឃ្លាំមើលសិទ្ធិមនុស្សអន្តរជាតិ (HRW) ប្រទេសម៉ុងហ្គោលីកាលខែមិថុនាកន្លងទៅទើបបានចុះហត្ថលេខាលើការគាំទ្រឥតងាករេ (unwavering support) ចំពោះគោលការរបស់ ICC។

ដូចការគ្រោងទុក ប្រធានាធិបតីរុស្ស៊ី លោក វ្ល៉ាឌីមៀ ពូទីន បានដល់ប្រទេសម៉ុងហ្គោលីនៅរាត្រីថ្ងៃចន្ទដើម្បីបំពេញទស្សនកិច្ចផ្លូវការនិងពិភាក្សានៅថ្ងៃអង្គារទី៣ខែកញ្ញានេះ ដោយភាគីទាំងពីរគ្រោងនឹងពិភាក្សាគ្នាលើរបៀបវារៈពាណិជ្ជកម្មផង និង ការចូលរួមកម្មវិធីជាតិរបស់ប្រទេសម៉ុងហ្គោលីផង។

ក្នុងកម្មវិធីជាតិរបស់ប្រទេសមុងហ្គោលី ប្រធានាធិបតីរុស្ស៊ីចូលរួមជាថ្នាក់ដឹកនាំកិត្តិយសក្នុងខួបទី៨៥ឆ្នាំនៃជ័យជំនះរួមគ្នារបស់ប្រទេសម៉ុងហ្គោលីនិងរុស្ស៊ីក្នុងការប្រយុទ្ធប្រឆាំងនឹងអធិរាជជប៉ុនក្នុងឆ្នាំ១៩៣៩នៅទន្លេ Khalkhin Gol ក្នុងប្រទេសម៉ុងហ្គោលី។ យោងការចុះផ្សាយរបស់ The Deplomat។

ក្នុងរបៀបវារៈពាណិជ្ជកម្មវិញ ភាគីម៉ុងហ្គោលី និងរុស្ស៊ី នឹងជជែកគ្នាអំពីការកសាងបំពង់បង្ហូរឧស្ម័នតភ្ជាប់ពីប្រទេសរុស្ស៊ីដោយឆ្លងកាត់ប្រទេសម៉ុងហ្គោលី ទៅកាន់ប្រទេសចិន។ ប្រទេសចិនជាដៃគូដ៏សំខាន់របស់ប្រទេសរុស្ស៊ី ក្នុងសង្គ្រាមលើទឹកដីអ៊ុយក្រែន ដោយសារភាគីចិនមិនបានថ្កោលទោសរុស្ស៊ីសូម្បីម្តងសម្រាប់ការលើកទ័ពចូលលុកលុយអ៊ុយក្រែនចាប់តាំពីថ្ងៃទី២៤ខែកុម្ភៈឆ្នាំ២០២២។

មិនត្រឹមតែមិនចេញសេចក្តីថ្លែងការថ្កោលទោស ឬឃាត់រុស្ស៊ីមិនឱ្យលើកទ័ពចូលអ៊ុយក្រែនទេ ចិនថែមទាំងពង្រឹងពាណិជ្ជកម្មដល់កម្រិតកំពូលជាមួយរុស្ស៊ី ខណៈបច្ចឹមប្រទេសប្រកាសដាក់ទណ្ឌកម្មជាបន្តបន្ទាប់ប្រឆាំងរុស្ស៊ី ដោយអំពាវនាវប្រទេសដៃគូចូលរួមអនុវត្តតាម។

យោងទីភ្នាក់ងារព័ត៌មានរុស្ស៊ី TASS រដ្ឋាភិបាលរុស្ស៊ីដែលគេស្គាល់ថា «វិមានក្រឹមឡាំង»បានប្រកាសថា ក្នុងអំឡុងកិច្ចពិភាក្សារបស់ភាគីទាំងពីរ ប្រមុខដឹកនាំនៃប្រទេសទាំងពីរនឹងពិភាក្សាអំពី «ទស្សនវិស័យសម្រាប់ការអភិវឌ្ឍបន្ថែមទៀតទំនាក់ទំនងរុស្ស៊ី-ម៉ុងហ្គោលី នៃភាពជាដៃគូយុទ្ធសាស្ត្រគ្រប់ជ្រុងជ្រោយ និងផ្លាស់ប្តូរទស្សនៈលើបញ្ហាអន្តរជាតិ និងតំបន់បច្ចុប្បន្ន»។

ជំនួយការប្រធានាធិបតីរុស្ស៊ី Yury Ushakov បានប្រកាសថា មេដឹកនាំទាំងពីរនឹងពិភាក្សាអំពីកិច្ចសហប្រតិបត្តិការរវាងប្រទេសទាំងពីរក្នុងការផលិតឧស្សាហកម្ម កសិកម្ម និងការដឹកជញ្ជូនផ្លូវដែក។

Ushakov បានបន្ថែមថា ការផ្តោតសំខាន់នឹងផ្តោតលើការអប់រំ រួមទាំងកម្មវិធីដើម្បីពង្រីកការបង្រៀនជាភាសារុស្សី និងការបណ្តុះបណ្តាលយុវជនម៉ុងហ្គោលីនៅសាកលវិទ្យាល័យរុស្ស៊ី៕

ដោយ រ៉ាន់ រើយ

The post ពូទីនទៅដល់ម៉ុងហ្គោលីដោយរលូន ទោះ ICC អំពាវនាវរដ្ឋសមាជិកបំពេញកាតព្វកិច្ច appeared first on Kampuchea Thmey Daily.

អ៊ុយក្រែន រិះគន់ម៉ុងហ្គោលី ដែលមិនចាប់ខ្លួន ពូទីន តាមដីកា ICC

Chheang — Tue, 03 Sep 2024 01:54:22 +0000

ក្រសួងការបរទេសអ៊ុយក្រែន បានប្រកាសកាលពីថ្ងៃទី២ខែកញ្ញាថា ការខកខានរបស់ប្រទេសម៉ុងហ្គោលីក្នុងការចាប់ខ្លួនមេដឹកនាំរុស្ស៊ី លោក វ្ល៉ាឌីមៀរ ពូទីន តាមដីកាតុលាការឧក្រិដ្ឋកម្មអន្តរជាតិ (ICC) បានធ្វើឲ្យមានផលប៉ះពាល់យ៉ាងធ្ងន់ធ្ងរដល់ប្រព័ន្ធច្បាប់ព្រហ្មទណ្ឌអន្តរជាតិ។

លោក វ៉្លាឌឺមៀរ ពូទីន នៅក្នុងប្រទេសម៉ុងហ្គោលី (រូបភាព៖ AP)

លោក ពូទីន បានទៅដល់ម៉ុងហ្គោលីកាលពីថ្ងៃចន្ទ សម្រាប់កិច្ចពិភាក្សាដែលទំនងជាផ្តោតលើបំពង់បង្ហូរឧស្ម័នថ្មីដែលតភ្ជាប់រុស្ស៊ី និងប្រទេសចិន។ អ៊ុយក្រែនបានជំរុញម៉ុងហ្គោលីកាលពីសប្តាហ៍មុនឲ្យចាប់ខ្លួនលោក ពូទីន ក្នុងអំឡុងពេលទស្សនកិច្ចនេះ។

ដីកាចាប់ខ្លួនរបស់ ICC ដែលបានចេញកាលពីឆ្នាំមុនប្រឆាំងនឹងលោក ពូទីន តម្រូវឲ្យប្រទេសសមាជិកទាំង១២៤ រួមទាំងម៉ុងហ្គោលីផងដែរនោះ ចាប់ខ្លួនប្រធានាធិបតីរុស្ស៊ី ហើយបញ្ជូនទៅទីក្រុងឡាអេ ដើម្បីកាត់ទោស ប្រសិនបើមេដឹកនាំរូបនេះមានវត្តមាននៅលើទឹកដីរបស់ពួកគេ។

អ្នកនាំពាក្យក្រសួងការបរទេសអ៊ុយក្រែន លោក Heorhiy Tykhyi បាននិយាយថា ការបរាជ័យរបស់ម៉ុងហ្គោលីក្នុងការឃុំខ្លួនលោកពូទីន គឺជា «ការប៉ះទង្គិចយ៉ាងធ្ងន់ធ្ងរដល់តុលាការឧក្រិដ្ឋកម្មអន្តរជាតិ និងប្រព័ន្ធច្បាប់ព្រហ្មទណ្ឌ»។

លោក Tykhyi បានសរសេរនៅលើបណ្ដាញសង្គម Telegram ថា៖ «ម៉ុងហ្គោលីបានអនុញ្ញាតឲ្យឧក្រិដ្ឋជនជាប់ចោទគេចវេសពីយុត្តិធម៌ ដោយហេតុនេះដូចបានចែករំលែកការទទួលខុសត្រូវចំពោះឧក្រិដ្ឋកម្មសង្គ្រាមងផងដែរ»។ លោកបានបន្ថែមថា អ៊ុយក្រែននឹងធ្វើការជាមួយសម្ព័ន្ធមិត្តរបស់ខ្លួន ដើម្បីធានាថាម៉ុងហ្គោលីនឹងទទួលបានការពិន័យ។

អ្នកនាំពាក្យវិមានក្រឹមឡាំង លោក Dmitry Peskov បានរៀបរាប់ថា ទីក្រុងមូស្គូមិនមានការព្រួយបារម្ភអំពីសកម្មភាពណាមួយទាក់ទងនឹងដីកានេះទេ ដោយនិយាយថា រុស្ស៊ីមាន «កិច្ចសន្ទនាដ៏ល្អ» ជាមួយម៉ុងហ្គោលី ហើយគ្រប់ទិដ្ឋភាពនៃដំណើរទស្សនកិច្ចត្រូវបានពិភាក្សាទុកជាមុន។

ដីការបស់ ICC ចោទប្រកាន់លោក ពូទីន ពីបទនិរទេសកុមាររាប់រយនាក់ចេញពីអ៊ុយក្រែនដោយខុសច្បាប់។ យ៉ាងណា វិមានក្រឹមឡាំង បានច្រានចោលការចោទប្រកាន់នេះ ដោយនិយាយថាការចោទប្រកាន់ធ្វើឡើងក្រោមហេតុផលនយោបាយ៕

ដោយ៖ ឈាង

The post អ៊ុយក្រែន រិះគន់ម៉ុងហ្គោលី ដែលមិនចាប់ខ្លួន ពូទីន តាមដីកា ICC appeared first on Kampuchea Thmey Daily.

ការមិនចាប់ខ្លួនពូទីននៅរដ្ឋសមាជិក ICC នឹងធ្វើឱ្យស្ថាប័នចុះខ្សោយ

Rann Reuy — Mon, 02 Sep 2024 10:19:27 +0000

ការធ្វើដំណើរទស្សនកិច្ចក្រៅប្រទេសរបស់ប្រធានាធិបតីរុស្ស៊ី លោក វ៉្លាឌីមៀ ពូទីនដែលនឹងជាន់ទឹកដីប្រទេសជាសមាជិកនៃតុលាការឧក្រិដ្ឋកម្មអន្តរជាតិ (ICC) លើកដំបូងនៅថ្ងៃទី៣ខែកញ្ញានេះដោយគ្មានការចាប់ខ្លួនតាមដីកាចាប់ខ្លួន អាចនឹងធ្វើឱ្យស្ថាប័នប្រព័ន្ធយុត្តិធម៌អន្តរជាតិមួយនេះគ្មានឥទ្ធិពលអំណាចក្នុងពេលអនាគត។

ស្ថាប័ន ICC ដែលត្រូវបានបង្កើតឡើងដំបូងក្នុងឆ្នាំ២០០២មានមូលដ្ឋាននៅទីក្រុងរ៉ូមប្រទេសអ៊ីតាលី និងរហូតបច្ចុប្បន្នមានប្រទេសជាសមាជិកហត្ថលេខី ចំនួន១២៤ បានចេញដីកាចាប់ខ្លួនប្រមុខរដ្ឋរុស្ស៊ី លោក វ៉្លាឌីមៀ ពូទីន ដែលកំពុងធ្វើសង្គ្រាមជាមួយប្រទេសជិតខាងអ៊ុយក្រែន។

ព័ត៌មាននៃដំណើរទស្សនកិច្ចរបស់លោក ពូទីន ទៅកាន់ប្រទេសជិតខាងម៉ុងហ្គោលីទទួលបានការចាប់អារម្មណ៍យ៉ាងខ្លាំង ដោយសារតែនៅខែមីនាឆ្នាំ២០២៣ តុលាការឧក្រិដ្ឋកម្មអន្តរជាតិ (ICC) បានចេញដីកាចាប់ខ្លួនលោកពូទីនបន្ទាប់ពីសង្រ្គាមនៅអ៊ុយក្រែនដោយចោទប្រកាន់គាត់ពីឧក្រិដ្ឋកម្មសង្រ្គាមនៃការនិរទេសខុសច្បាប់និងការដឹកជញ្ជូនកុមារនៅក្នុងទឹកដីកាន់កាប់របស់អ៊ុយក្រែន។

លោក ពូទីន គឺជាប្រមុខរដ្ឋដំបូងបំផុតនៃរដ្ឋសមាជិកអចិន្ត្រៃយ៍នៅក្នុងក្រុមប្រឹក្សាសន្តិសុខអង្គការសហប្រជាជាតិ (UNSC) ដែលមានដីកាចាប់ខ្លួនពី ICC។ ដើម្បីគេចពីភាពចម្រូងចម្រាស់ផ្លូវច្បាប់អន្តរជាតិនានា លោក ពូទីន ចាប់តាំងពីមានដីកានេះចេញមក មិនដែលធ្វើដំណើរទៅកាន់ប្រទេសណាដែលជាសមាជិករបស់ ICC ឡើយ។

ជាក់ស្តែងកាលចុងឆ្នាំ២០២៣ លោក ពូទីន បានលុបចោលដំណើរទស្សនកិច្ចទៅកាន់ប្រទេសអាហ្រ្វិកដែលធ្វើជាម្ចាស់ផ្ទះក្នុងការរៀបចំកិច្ចប្រជុំកំពូល BRICS ដែលរុស្ស៊ីជាប្រទេសស្ថាបនិកដ៏សំខាន់ក្នុងសមាគមមួយនេះ។

ប្រទេសម៉ុងហ្គោលីដែលជាប្រទេសភូមិផងរបងជាមួយមហាអំណាចរុស្ស៊ី ក្នុងនាមជាសមាជិកនៃ ICC និងជាហត្ថលេខីនៃលក្ខន្តិកៈទីក្រុងរ៉ូមក្នុងការបង្កើត ICC ត្រូវបានគេសន្មត់ថា គោរពដីកាចាប់ខ្លួនរបស់ ICC។ ប៉ុន្តែវាមិនអាចទៅរួចឡើយ ដោយសារចំណងមិត្តភាពរបស់ប្រទេសជិតខាងទាំងពីរនោះ។

ប្រធានាធិបតីម៉ុងហ្គោលី លោក Ukhnaa Khurelsukh បានអញ្ជើញប្រធានាធិបតីរុស្ស៊ី លោក វ៉្លាឌីមៀ ពូទីន សម្រាប់ការចូលរួមពិធីបុណ្យជ័យជំនះរួមគ្នាលើកទី៨៥របស់ប្រទេសម៉ុងហ្គោលីនិងរុស្ស៊ីនៅទន្លេ Khalkhin Gol ប្រឆាំងនឹងអធិរាជជប៉ុនក្នុងឆ្នាំ១៩៣៩។ យោងការចុះផ្សាយរបស់ The Deplomat។

The Deplomat បានសន្និដ្ឋានថា វាមិនទំនងទេដែលលោកពូទីននឹងត្រូវចាប់ខ្លួននៅក្នុងទឹកដីម៉ុងហ្គោលី ដោយសារតែម៉ុងហ្គោលីនៅតែបន្តពឹងផ្អែកខ្លាំងលើថាមពលរបស់រុស្ស៊ី។

ប្រទេសរុស្ស៊ីមិនមែនជារដ្ឋហត្ថលេខីបង្កើតតុលាការឧក្រិដ្ឋកម្មអន្តរជាតិនេះទេ ប៉ុន្តែប្រទេសម៉ុងហ្គោលីស្ថិតនៅជាប់ប្រទេសរុស្ស៊ីភាគខាងត្បូងជាសមាជិកហត្ថលេខីរបស់តុលាការនេះដែលមានមូលដ្ឋាននៅទីក្រុងរ៉ូមប្រទេសអ៊ីតាលី។

យោងការផ្សាយរបស់ទីភ្នាក់ងារព័ត៌មានរ៉យទ័រក្នុងពេលកន្លងមក ក្រសួងការបរទេសអ៊ុយក្រែនបាននិយាយនៅលើ Telegram ថា៖«យើងអំពាវនាវឱ្យអាជ្ញាធរម៉ុងហ្គោលីអនុវត្តតាមដីកាចាប់ខ្លួនអន្តរជាតិជាកាតព្វកិច្ច និងផ្ទេរលោកពូទីនទៅកាន់តុលាការឧក្រិដ្ឋកម្មអន្តរជាតិ»។

ICC បានចេញដីកាចាប់ខ្លួនកាលពីថ្ងៃទី១៧ ខែមីនាឆ្នាំ២០២៣ ប្រឆាំងនឹងលោក ពូទីន និងឧត្តមស្នងការទទួលសិទ្ធិកុមារ Maria Lvova-Belova របស់លោក ពូទីន ដោយចោទប្រកាន់អ្នកទាំងពីរពីបទឧក្រិដ្ឋកម្មសង្រ្គាមនៃការនិរទេសកុមាររាប់រយនាក់ចេញពីប្រទេសអ៊ុយក្រែនដោយខុសច្បាប់។ វិមានក្រឹមឡាំងបានច្រានចោលការចោទប្រកាន់នេះ ដោយនិយាយថាវាជាហេតុផលនយោបាយ។

ដីកានេះតម្រូវឱ្យរដ្ឋសមាជិកហត្ថលេខីចំនួន១២៤របស់តុលាការនេះ រួមមានប្រទេសម៉ុងហ្គោលីផង ចាប់ខ្លួនលោកពូទីន ហើយផ្ទេរគាត់ទៅទីក្រុងឡាអេ ដើម្បីកាត់ទោស ប្រសិនបើគាត់ដើរលើទឹកដីរបស់ពួកគេ។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកយកព័ត៌មានកាលថ្ងៃទី៣០ខែសីហាថា រដ្ឋាភិបាលសហព័ន្ធរុស្ស៊ីគ្មានការព្រួយបារម្ភជុំវិញដីការចាប់ខ្លួននេះទេ ដោយសាររដ្ឋាភិបាលទីក្រុងមូស្គូមានការសន្ទនាដ៏ល្អជាមួយមិត្តម៉ុងហ្គោលី។

តាមការស្រង់សម្តីរបស់រ៉យទ័រ នៅពេលសួរថាតើមានការពិភាក្សាជាមួយអាជ្ញាធរម៉ុងហ្គោលីអំពីដីការបស់ ICC ដែរឬទេ លោក Peskov បាននិយាយថា៖‍ជាក់ស្តែង ដំណើរទស្សនកិច្ចនេះ ទិដ្ឋភាពទាំងអស់នៃដំណើរទស្សនកិច្ចនេះត្រូវបានពិភាក្សាយ៉ាងម៉ត់ចត់»។

មិនទាន់មានសេចក្តីរាយការណ៍ណាមួយបង្ហាញលម្អិតអំពីគោលបំណងទស្សនកិច្ចរបស់មេដឹកនាំរុស្ស៊ីទៅកាន់ប្រទេសជិតខាងនេះនោះទេ ប៉ុន្តែកន្លងមកលោកពូទីនធ្លាប់ធ្វើដំណើរទៅកាន់ប្រទេសជិតខាងកូរ៉េខាងជើង ចិន កាហ្សាក់ស្ថាន និងប្រទេសខ្លះទៀតនៅអាស៊ីកណ្តាល ដើម្បីពង្រឹងមិត្តភាព ការធ្វើពាណិជ្ជកម្ម និង មានសេចក្តីរាយការណ៍ខ្លះថា ពិភាក្សារឿងពាណិជ្ជកម្មអាវុធផងដែរ៕

ដោយ រ៉ាន់ រើយ

The post ការមិនចាប់ខ្លួនពូទីននៅរដ្ឋសមាជិក ICC នឹងធ្វើឱ្យស្ថាប័នចុះខ្សោយ appeared first on Kampuchea Thmey Daily.

ប្រឈមដីកាចាប់ខ្លួន ពូទីននឹងជាន់ដីប្រទេសសមាជិក ICC លើកដំបូងនៅថ្ងៃទី៣កញ្ញា

Rann Reuy — Sat, 31 Aug 2024 00:23:15 +0000

ខណៈដែលប្រធានាធិបតីរុស្ស៊ី លោកវ្ល៉ាឌីមៀ ពូទីនគ្រោងទស្សនកិច្ចលើកដំបូងក្នុងប្រទេសម៉ុងហ្គោលីដែលជាប្រទេសភូមិផងរបងជាមួយនៅថ្ងៃទី៣ខែកញ្ញាខាងមុខនេះ អ៊ុយក្រែនបានជំរុញឱ្យរដ្ឋាភិបាលម៉ុងហ្គោលីចាប់ខ្លួនមេដឹកនាំរុស្ស៊ីតាមដីការបស់តុលាការឧក្រិដ្ឋកម្មអន្តរជាតិ (ICC) ដែលបង្គាប់ឱ្យរដ្ឋជាសមាជិកចាប់ខ្លួនលោកពូទីន។

លោក ពូទីន ពេលប្រជុំជាមួយមន្ត្រីរបស់ខ្លួន។ Kremlin

ប្រទេសម៉ុងហ្គោលីស្ថិតនៅជាប់ប្រទេសរុស្ស៊ីភាគខាងត្បូងជាសមាជិកហត្ថលេខីរបស់តុលាការឧក្រិដ្ឋកម្មអន្តរជាតិ (ICC)ដែលមានមូលដ្ឋាននៅទីក្រុងឡាអេប្រទេសហូឡង់ និងដែលបានចេញដីកាបង្គាប់ឱ្យរដ្ឋជាសមាជិកចាប់ខ្លួនលោកពូទីនដោយចោទប្រកាន់ពីបទឧក្រិដ្ឋកម្មសង្គ្រាមប្រព្រឹត្តិនៅប្រទេសអ៊ុយក្រែន។

យោងការផ្សាយរបស់ទីភ្នាក់ងារព័ត៌មានរ៉យទ័រ ក្រសួងការបរទេសអ៊ុយក្រែនបាននិយាយនៅលើ Telegram ថា៖«យើងអំពាវនាវឱ្យអាជ្ញាធរម៉ុងហ្គោលីអនុវត្តតាមដីកាចាប់ខ្លួនអន្តរជាតិជាកាតព្វកិច្ច និងផ្ទេរលោកពូទីនទៅកាន់តុលាការឧក្រិដ្ឋកម្មអន្តរជាតិនៅទីក្រុងឡាអេ»។

ICC បានចេញដីកាចាប់ខ្លួនកាលពីខែមីនា ឆ្នាំ ២០២៣ ប្រឆាំងនឹងលោក ពូទីន ដោយចោទប្រកាន់គាត់ពីបទឧក្រិដ្ឋកម្មសង្រ្គាមនៃការនិរទេសកុមាររាប់រយនាក់ចេញពីប្រទេសអ៊ុយក្រែនដោយខុសច្បាប់។ វិមានក្រឹមឡាំងបានច្រានចោលការចោទប្រកាន់នេះ ដោយនិយាយថាវាជាហេតុផលនយោបាយ។

ចាប់តាំងពីចេញដីកាកាលពីខែមីនាឆ្នាំ២០២៣នោះមក លោកពូទីនមិនដែលធ្វើដំណើរចេញទៅក្រៅប្រទេសក្នុងរដ្ឋដែលជាសមាជិករបស់ICCឡើយ សូម្បីកាលក្នុងកិច្ចប្រជុំកំពូល BRICS នៅអាហ្វ្រិកខាងត្បូងកាលឆ្នាំ២០២៣ដែលលោកគ្រោងចូលរួម ក៏ត្រូវលុបចោល ដើម្បីកាត់បន្ថយសម្ពាធលើរដ្ឋាភិបាលអាហ្វ្រិកខាងត្បូង ដោយសារក្រុមប្រឆាំងរដ្ឋាភិបាលបានបង្កើនការទាមទារឱ្យចាប់ខ្លួន។

ដោយ រ៉ាន់ រើយ

The post ប្រឈមដីកាចាប់ខ្លួន ពូទីននឹងជាន់ដីប្រទេសសមាជិក ICC លើកដំបូងនៅថ្ងៃទី៣កញ្ញា appeared first on Kampuchea Thmey Daily.

ប្រទេសម៉ុងហ្គោលី Archives - Kampuchea Thmey Daily

នាយករដ្ឋមន្ត្រី​ម៉ុងហ្គោលី​នៅចន្លោះចិន​និងរុស្ស៊ី ចុះ​ចេញពីអំណាច​ ក្រោយ​​ការ​តវ៉ាដ៏ខ្លាំង

បវរកញ្ញា​ពិភពលោក ​ម៉ុងហ្គោលី រងការចោទប្រកាន់​ពី​បទប្រើហិង្សាដាក់ស្វាមី ១ថ្ងៃ២ដង

នេះជាមូលហេតុ ម៉ុងហ្គោលី មិនចាប់ខ្លួនលោក ពូទីន តាមដីកា ICC

តើ​​មាន​ប្រមុខ​រដ្ឋណា​ដែល​ធ្លាប់​ប្រឈម​​ដី​កា​ចាប់​ខ្លួន​​ពី​ ICC ដូច​លោក​ពូទីន ហើយ​អនុវត្តយ៉ាងណា​​?​

​ពូទីន​​​ទៅដល់​ម៉ុងហ្គោលី​​ដោយ​រលូន ទោះ​ ICC អំពាវនាវ​រដ្ឋសមាជិក​បំពេញ​កាតព្វកិច្ច​

អ៊ុយក្រែន រិះគន់​ម៉ុងហ្គោលី ដែល​មិន​ចាប់​ខ្លួន​ ពូទីន តាម​ដីកា ICC

ការ​មិនចាប់​ខ្លួន​ពូទីន​នៅរដ្ឋសមាជិក ICC នឹងធ្វើ​ឱ្យស្ថាប័ន​ចុះ​ខ្សោយ​

​ប្រឈម​ដីកាចាប់ខ្លួន​ ពូទីន​នឹង​ជាន់​ដី​ប្រទេសសមាជិក​ ICC លើក​ដំបូង​នៅ​ថ្ងៃទី​៣កញ្ញា​

នាយករដ្ឋមន្ត្រីម៉ុងហ្គោលីនៅចន្លោះចិននិងរុស្ស៊ី ចុះចេញពីអំណាច ក្រោយការតវ៉ាដ៏ខ្លាំង

បវរកញ្ញាពិភពលោក ម៉ុងហ្គោលី រងការចោទប្រកាន់ពីបទប្រើហិង្សាដាក់ស្វាមី ១ថ្ងៃ២ដង

តើមានប្រមុខរដ្ឋណាដែលធ្លាប់ប្រឈមដីកាចាប់ខ្លួនពី ICC ដូចលោកពូទីន ហើយអនុវត្តយ៉ាងណា?

ពូទីនទៅដល់ម៉ុងហ្គោលីដោយរលូន ទោះ ICC អំពាវនាវរដ្ឋសមាជិកបំពេញកាតព្វកិច្ច

អ៊ុយក្រែន រិះគន់ម៉ុងហ្គោលី ដែលមិនចាប់ខ្លួន ពូទីន តាមដីកា ICC

ការមិនចាប់ខ្លួនពូទីននៅរដ្ឋសមាជិក ICC នឹងធ្វើឱ្យស្ថាប័នចុះខ្សោយ

ប្រឈមដីកាចាប់ខ្លួន ពូទីននឹងជាន់ដីប្រទេសសមាជិក ICC លើកដំបូងនៅថ្ងៃទី៣កញ្ញា