ប្រវត្តិកីឡាករ Archives - Kampuchea Thmey Daily

អតីតយុវជនបឹងកេត មឿនលីម សុបញ្ញា ក្លាយជាកីឡាករជឺជីតស៊ូដ៏ឆ្នើម

chean virakbot — Thu, 04 Sep 2025 01:45:44 +0000

កីឡាករ មឿនលីម សុបញ្ញា មានបំណងក្លាយជាកីឡាករបាល់ទាត់អាជីព ប៉ុន្តែចុងក្រោយបានក្លាយជាកីឡាករជឺជីតស៊ូតជម្រើសជាតិកម្ពុជាដ៏ជោគជ័យលើឆាកអន្តរជាតិ។

ពីក្មេងស្រឡាញ់បាល់ទាត់ ដល់ធំក្លាយជាកីឡាករជឺជីតស៊ូ

សុបញ្ញា បានរៀបរាបថា ខ្លួនមានកំណើតនៅរាជធានីភ្នំពេញ ប៉ុន្តែឪពុកម្តាយជាអ្នកខេត្តកំពង់ចាម។ កាលពីតូច រូបគេចូលចិត្តបាល់ទាត់ទាំងមើលតាមទូរទស្សន៍ ទៅមើលផ្ទាល់នៅពហុកីឡដ្ឋានជាតិអូឡាំពិក និងលេងបាល់ទាត់។ ចំណង់ចំណូលចិត្តលើបាល់ទាត់បានបើកផ្លូវឲ្យខ្លួនទទួលបានឱកាសហ្វឹកហាត់ត្រឹមត្រូវនៅក្នុងក្រុមយុវជនអាយុ១៥ឆ្នាំរបស់ក្លិបបឹងកេត។

កីឡាករបានប្រាប់ថា ៖«កាលពីក្មេង ខ្ញុំហាត់បាល់ទាត់ រហូតបានជាប់ក្រុមយុវជនបឹងកេត អាយុ ១៥ឆ្នាំ។ នៅពេលនោះ ប៉ារបស់ខ្លួនមិនសូវពេញចិត្តកីឡាបាល់ទាត់ទេ ដោយសារកីឡានេះហានិភ័យខ្ពស់ គាត់ឲ្យខ្ញុំឈប់ពីបាល់ទាត់។ ខ្ញុំស្រឡាញ់បាល់ទាត់ណាស់។ ខ្ញុំចូលចិត្តលេង ហើយមើលតាមទូរទស្សន៍រហូត។ ពេលខ្ញុំបានចូលហ្វឹកហាត់នៅក្រុមយុវជនបឹងកេត គេសរសើរខ្ញុំថា មានបច្ចេកទេសល្អ ធ្វើឲ្យខ្ញុំកាន់តែមានទឹកចិត្តប្រឹងប្រែង តែប៉ារបស់ខ្ញុំអត់ចង់ឲ្យចាប់អាជីពបាល់ទាត់។ គាត់ឲ្យខ្ញុំបោះបង់ចោលបាល់ទាត់ ធ្វើឲ្យខ្ញុំពិបាកចិត្ត សោកស្តាយយ៉ាងខ្លាំង»។

ទោះបីជាដើរចេញពីកីឡាបាល់ទាត់ ក៏យុវជនរូបនេះមិនឃ្លាតទៅណាឆ្ងាយពីកីឡាឡើយ។ នៅដើមឆ្នាំ ២០២២ មឿនលីម សុបញ្ញា បានចាប់អារម្មណ៍នឹងកីឡាជឺជីតស៊ូ។ កីឡាករបានប្រាប់ថា ពេលខ្លួនមើលការប្រកួតកីឡាគុនចម្រុះ រូបគេបានចាប់អារម្មណ៍ពីក្បាច់ប្លែកៗដូចជាក្បាច់ឃ្លេ ចំបាប់ និងជឺជីតស៊ូជាដើម។ ពេលនោះ រូបគេស្គាល់ក្លិបជឺជីតស៊ូមួយឈ្មោះ «គិរី» ហើយក៏បានទៅសុំហ្វឹកហាត់។

សុបញ្ញា បានបន្តរៀបរាប់ថា ៖«ពេលខ្ញុំហាត់កីឡាជឺជីតស៊ូដំបូង គឺពិបាកដែរ ពីព្រោះកីឡានេះមានក្បាច់ បច្ចេកទេសច្រើន ខុសប្លែកពីកីឡាបាល់ទាត់។ បញ្ហាលំបាកជាងគេគឺខ្ញុំបានហាត់កីឡាបាល់ទាត់តាំងពីតូច ដល់មកហាត់កីឡាជឺជីតស៊ូគឺប្លែក»។ ការហ្វឹកហាត់កីឡាជឺជីតស៊ូពីដំបូងៗមិនបានប្រាប់ឪពុកម្តាយឲ្យដឹងឡើយ ដោយសារពួកគាត់មិនចង់ឲ្យចាប់អាជីពកីឡា។ ទាល់តែរូបគេចូលរួមប្រកួតកីឡាជឺជីតស៊ូថ្នាក់ជាតិ ចុងឆ្នាំ ២០២២ ទើបទទួលបានការគាំទ្រលើកទឹកចិត្តពីឪពុក បន្ទាប់ពីរូបគេបានឈ្នះមេដាយប្រាក់ថ្នាក់ជាតិ។

កីឡាករបាននិយាយថា ៖«ប៉ារបស់ខ្ញុំឲ្យរៀន គណនេយ្យ និងហិរញ្ញវត្ថុ ពីព្រោះគាត់ធ្វើការងារផ្នែកនេះ។ គាត់ចង់ឲ្យខ្ញុំធ្វើការផ្នែកនេះដែរ។ គាត់អត់ចង់ឲ្យចាប់អាជីពកីឡាទេ»។

ការប្រកួតលើឆាកអន្តរជាតិ

កីឡាករ មឿនលីម សុបញ្ញា ត្រូវបានកោះហៅចូលជម្រើសជាតិជឺជីតស៊ូកម្ពុជា និងទទួលបានឱកាសចេញទៅប្រកួតនៅក្រៅប្រទេសជាច្រើនលើក ក្រោយហ្វឹកហាត់ និងបានចូលរួមប្រកួតថ្នាក់ជាតិ។ រូបគេមិនបានចូលរួមប្រកួតកីឡាស៊ីហ្គេម ឆ្នាំ ២០២៣ ដែលប្រទេសកម្ពុជា ធ្វើជាម្ចាស់ផ្ទះលើកដំបូងទេ។ ទោះបីជាយ៉ាងណា ចាប់ពីឆ្នាំ ២០២៣ រហូតដល់ឆ្នាំ ២០២៥ រូបគេបានចេញទៅប្រកួតក្នុងព្រឹត្តិការណ៍អន្តរជាតិជាច្រើនទាំងកម្រិតអាស៊ាន អាស៊ី និងតំបន់។ ជាក់ស្តែង កីឡាទ្វីបអាស៊ី Asian Games ឆ្នាំ ២០២៣ នៅប្រទេសចិន។ ការប្រកួតកីឡាជឺជីតស៊ូជើងឯកអាស៊ាន ការប្រកួតកីឡាជឺជីតស៊ូជើងឯកអាស៊ីថ្នាក់តំបន់ ឆ្នាំ ២០២៤ និង ២០២៥។

កាលពីដើម ឆ្នាំ ២០២៥ មឿនលីម សុបញ្ញា បានចេញទៅហ្វឹកហាត់នៅសហរដ្ឋអាមេរិករយៈពេល ៣ ខែ។ នៅទីនោះ រូបគេក៏បានចូលរួមប្រកួតក្នុងកម្មវិធីមួយចំនួនដោយបានឈ្នះមេដាយមាស ២គ្រឿង ថែមទៀតផង។

សមិទ្ធផល

គិតត្រឹមខែកក្កដា ឆ្នាំ ២០២៥ កីឡាករ មឿនលីម សុបញ្ញា បានឈ្នះមេដាយអន្តរជាតិមិនក្រោម ២០ គ្រឿងឡើយ ទាំងការប្រកួតតំណាងឲ្យក្លិប និងតំណាងជាតិ។ នៅឆ្នាំ ២០២៥ រូបគេបានឈ្នះមេដាយមាស ៤ និងប្រាក់ ២ ពីព្រឹត្តិការណ៍អន្តរជាតិផ្សេងដូចជា SEA Ju-Jitsu Championship, Asian Ju-Jitsu Championship និងការប្រកួតនៅសហរដ្ឋអាមេរិក Nationals Jiu-Jitsu Open។

ឆ្នាំ ២០២៤ រូបគេបានឈ្នះមេដាយមាស ៨ ប្រាក់ ១ និងសំរិទ្ធ ១ ពីព្រឹត្តិការណ៍អន្តរជាតិនានាដូចជា ASIAN Regional Championship Southeast Asia, AFG OPEN International និង Ju-Jitsu Thailand Championship ព្រមទាំងព្រឹត្តិការណ៍អន្តរជាតិមួយចំនួនទៀតដែលរូបគេចាំមិនអស់។

កីឡាករបានលើកឡើងថា ៖«គោលដៅសំខាន់របស់ខ្ញុំគឺចង់ឈ្នះមេដាយមាសក្នុងព្រឹត្តិការណ៍ធំផ្លូវការគឺកីឡាស៊ីហ្គេម កីឡាទ្វីបអាស៊ី និងមេដាយមាសពិភពលោកជូនជាតិ»។

កីឡាផ្តល់ឲ្យស្មារតីរឹងមាំ

កាលពីកុមារភាព មឿនលីម សុបញ្ញា មិនសូវមែនចេះនិយាយច្រើន ឬប្រាស្រ័យទំនាក់ល្អជាមួយអ្នកដទៃឡើយ ប៉ុន្តែការចាប់អាជីពកីឡាបានផ្តល់ឲ្យរូបគេមានសុខភាពល្អ ស្មារតីល្អ និងទំនាក់ទំនងល្អជាមួយអ្នកដទៃ។

កីឡាករបានលើកឡើងថា ៖«បច្ចុប្បន្ន ខ្ញុំជឿជាក់លើខ្លួនឯង និងចេះគោរពមនុស្សជុំវិញខ្លួនល្អ។ កាលពីមុន ខ្ញុំអៀនច្រើន មិនចង់និយាយ ខ្លាច ខ្មាសអៀនពេលនិយាយជាមួយដទៃ»។

សព្វថ្ងៃ កីឡាករ មឿនលីម សុបញ្ញា ជានិស្សិតជំនាញ«គណនេយ្យ និងហិរញ្ញវត្ថុ»នៅសាលា CamEd ក្នុងរាជធានីភ្នំពេញ។ កីឡាករសូមអរគុណដល់អ្នកមានគុណ និងក្រុមគ្រួសារដែលជួយទំនុកបម្រុង គាំទ្រ និងលើកទឹកចិត្តរូបគេ។ ជាមួយគ្នានេះ រូបគេក៏សូមអរគុណដល់លោកគ្រូ Jasper Paas និងគ្រូនៅសាលាដែលបានឧបត្ថម្ភលើកទឹកចិត្ត ព្រមទាំងថវិកាសម្រាប់ការហ្វឹកហាត់រហូតមក៕

អត្ថបទ៖ វីរបុត្រ
រូបភាពរបស់សហព័ន្ធកីឡាជឺជីតស៊ូកម្ពុជា

The post អតីតយុវជនបឹងកេត មឿនលីម សុបញ្ញា ក្លាយជាកីឡាករជឺជីតស៊ូដ៏ឆ្នើម appeared first on Kampuchea Thmey Daily.

កីឡាការិនីស្រស់សោភាវ័យ១៩ឆ្នាំ ហេង ស៊ីវហ៊ាង កំពុងស្ថិតលើផ្លូវជោគជ័យ

chean virakbot — Wed, 13 Nov 2024 06:12:06 +0000

កីឡាការិនីវ័យក្មេង ហេង ស៊ីវហ៊ាង កំពុងធ្វើដំណើរលើវិថីកីឡាប្រកបដោយមោទនភាពសម្រាប់ខ្លួនឯង ក្រុមគ្រួសារ និងសង្គមជាតិ បន្ទាប់ពីកញ្ញាបានប្តូរពីកីឡាតេក្វាន់ដូទៅចាប់អាជីពកីឡាជឺជីតស៊ូក្នុងរយៈពេលប្រមាណ២ឆ្នាំចុងក្រោយ។

កាលពីអាយុប្រមាណ៨ឆ្នាំ ហេង ស៊ីវហ៊ាង បានចាប់អារម្មណ៍នឹងវីរកីឡាការិនីតេក្វាន់ដូកម្ពុជា ស៊ន សៀវម៉ី ដែលទទួលបានជោគជ័យលើឆាកអន្តរជាតិក្នុងឆ្នាំ២០១៤ ហើយក៏ចង់ក្លាយជាបុគ្គលម្នាក់ដែលទទួលបានការចាប់អារម្មណ៍ពីមហាដែរ។ កញ្ញាតែងតែចង់ជម្នះនឹងពាក្យ ក្មេងស្រីមិនអាចធ្វើអ្វីបាន ព្រមទាំងក្តីស្រឡាញ់ចំពោះកីឡាបានក្លាយជាមូលដ្ឋានគ្រឹះធ្វើឲ្យកញ្ញាចាប់អាជីពកីឡា។

កញ្ញា ស៊ីវហ៊ាង បានរៀបរាប់ថា ៖«ពេលខ្ញុំហាត់កីឡាដំបូង ពិបាកខ្លាំង ទាំងកាយ និងស្មារតី។ ខ្ញុំជាក្មេងស្រី គេនិយាយបែបនេះ បែបនោះ សូម្បីតែម៉ាក់ប៉ាក៏អត់សូវគាំទ្រដែរពីដំបូង។ ពួកគាត់ប្រហែលជាគិតថា ពេលនោះខ្ញុំគ្រាន់តែជាក្មេងស្រី ធ្វើអ្វីមិនច្បាស់ ទើបពួកគាត់មិនសូវគាំទ្រ តែពេលឃើញខ្ញុំផ្តោតយកយកចិត្តទុកដាក់មែនទែនទើបពួកគាត់គាំទ្រពេញទំហឹង»។

កីឡាការិនីដែលមានដើមកំណើតនៅរាជធានីភ្នំពេញបានចាប់ផ្តើមហ្វឹកហាត់កីឡាតេក្វាន់ដូដំបូងនៅឆ្នាំ២០១៤។ យ៉ាងណា មាឌតូច និងនៅក្មេង ស្របពេលកីឡាការិនីតេក្វាន់ដូក៏មានច្រើន ដូច្នេះកញ្ញាមិនបានជាប់ជម្រើសជាតិឡើយ។ ការហ្វឹកហាត់កីឡាតេក្វាន់ដូរយៈពេល៧ឆ្នាំ មិនសូវមានអំណោយផល កញ្ញាក៏សម្រេចឈប់ពីកីឡាតេក្វាន់ដូទៅហ្វឹកហាត់កីឡាថ្មីគឺជឺជីតស៊ូនៅចុងឆ្នាំ២០២២។

កញ្ញា ហេង ស៊ីវហ៊ាង បានប្រាប់ថា គោលដៅធំបំផុតគឺប្រកួតកីឡាស៊ីហ្គេម ឆ្នាំ២០២៣ នៅពេលកម្ពុជាធ្វើជាម្ចាស់ផ្ទះ។ ពេលនោះសហព័ន្ធកីឡាជឺជីតស៊ូកម្ពុជាត្រូវការកីឡាករ កីឡាការិនីត្រៀមស៊ីហ្គេម ដូច្នេះហើយបានជាកញ្ញាសម្រេចចាប់យកកីឡាថ្មីមួយនេះ។

កញ្ញាបាននិយាយថា ៖«ហាត់កីឡាជឺជីតស៊ូដំបូងពិបាកចិត្តខ្លាំង ពីព្រោះខ្ញុំហាត់វិញ្ញាសាសម្តែង។ វិញ្ញាសាសម្តែងត្រូវការហ្វឹកហាត់ដដែលៗរាល់ថ្ងៃ សម្តែងយ៉ាងណាឲ្យពិតៗ។ ជាពិសេសបុកហាត់ខ្លាំងត្រៀមស៊ីហ្គេម ហើយហាត់ដដែលៗធ្វើឲ្យខ្ញុំធុញ។ សឹងតែធ្វើឲ្យខ្ញុំបោះបង់ចោលពាក់កណ្តាលទី តែដោយសារខ្ញុំចង់ប្រកួតស៊ីហ្គេមទើបមិនបោះបង់ចោល»។

«ម្យ៉ាងទៀត ពេលនោះ ប៉ាម៉ាក់ខ្ញុំគាំទ្រ លើកទឹកចិត្តខ្លាំងឲ្យខ្ញុំខំប្រឹងទៅ ព្រោះជាឱកាសកម្រសម្រាប់តំណាងជាតិក្នុងកីឡាស៊ីហ្គេម»។ កញ្ញាបានបន្ថែម។

ការប្រឹងប្រែងរយៈពេលប៉ុន្មានខែមុនពេលកីឡាស៊ីហ្គេម ឆ្នាំ២០២៣ មកដល់បានផ្តល់ឲ្យកីឡាការិនីវ័យ១៩ឆ្នាំទទួលបានមេដាយប្រាក់៣គ្រឿងជូនជាតិក្នុងនាមជាម្ចាស់ផ្ទះរៀបចំការប្រកួតកីឡាស៊ីហ្គេម។

កញ្ញាបាននិយាយថា ៖«គោលដៅធំទី១ដែលខ្ញុំសម្រេចបានគឺបានប្រកួតកីឡាស៊ីហ្គេមនៅលើដីប្រទេសកំណើត ហើយខ្ញុំក៏ទទួលបានមេដាយជាបន្តបន្ទាប់ទៀតជូនជាតិ»។

កីឡាការិនីអាយុ១៩ឆ្នាំដែលមានដើមកំណើតនៅរាជធានីភ្នំពេញទើបតែប្រឡងជាប់បាក់ឌុបឆ្នាំ២០២៤ និងបន្តចូលសាកលវិទ្យាល័យឆ្នាំទី១។

សមិទ្ធផលដែលកញ្ញាសម្រេចបាន

មេដាយប្រាក់ វិញ្ញាសាសម្តែងគូ Women’s Duo កីឡាស៊ីហ្គេម ឆ្នាំ២០២៣
មេដាយប្រាក់ វិញ្ញាសាសម្តែងគូ Women’s Show កីឡាស៊ីហ្គេម ឆ្នាំ២០២៣
មេដាយប្រាក់ វិញ្ញាសាគូបុរស-នារី Mixed Duo កីឡាស៊ីហ្គេម ឆ្នាំ២០២៣
មេដាយប្រាក់២ និងសំរិទ្ធ ពីព្រឹត្តិការណ៍ ASIAN Championship លើកទី៧ ឆ្នាំ២០២៣
មេដាយប្រាក់១ ពីព្រឹត្តិការណ៍ JJIF Ju-Jitsu E Tournament ឆ្នាំ២០២៣
មេដាយសំរិទ្ធ២ ពីព្រឹត្តិការណ៍ ASIAN Championship លើកទី៨ ឆ្នាំ២០២៤
មេដាយមាស៣ ប្រាក់១ និងសំរិទ្ធ១ ពីព្រឹត្តិការណ៍ ASIAN Regional Championship Southeast Asia ឆ្នាំ២០២៤

អត្ថបទ៖ វីរបុត្រ
រូបថត៖ ផ្តល់ឲ្យដោយកញ្ញា ហេង ស៊ីវហ៊ាង

The post កីឡាការិនីស្រស់សោភាវ័យ១៩ឆ្នាំ ហេង ស៊ីវហ៊ាង កំពុងស្ថិតលើផ្លូវជោគជ័យ appeared first on Kampuchea Thmey Daily.

កែវ សុខផេង នឹងបានកុងត្រា២ឆ្នាំ ប្រាក់ខែ៤ពាន់ដុល្លារ បើចូលភ្នំពេញក្រោន

chean virakbot — Wed, 28 Feb 2024 02:09:52 +0000

លោក កែវ សុខង៉ន អ្នកចាត់ការក្លិបបាល់ទាត់ភ្នំពេញក្រោនហ៊ានផ្តល់កុងត្រា និងប្រាក់ខែខ្ពស់ឲ្យអតីត កែវ សុខផេង ប្រសិនបើវិលត្រឡប់មកកាន់អាជីពបាល់ទាត់ជាមួយភ្នំពេញក្រោន។

លោក កែវ សុខង៉ន ដែលជាបងប្រុសបង្កើតរបស់ កែវ សុខផេង បាននិយាយថា ៖«បើឥឡូវមកក្រោន ខ្ញុំនឹងផ្ដល់កុងត្រាឲ្យគាត់២ឆ្នាំ ប្រាក់បៀវត្ត4k (៤ពាន់ដុល្លារ) គោរពនិងផ្ដល់អ្វីដែលគាត់លះបង់កន្លងមក។ គាត់ជួយជម្រើសជាតិកម្ពុជាយើងច្រើនណាស់»។

កីឡាករបាល់ទាត់ជម្រើសជាតិកម្ពុជា កែវ សុខផេង បានចូលនិវត្តន៍ពីអាជីពបាល់ទាត់ចាប់ពីថ្ងៃទី៥ ខែមេសា ឆ្នាំ២០២៣នេះ ដោយសាររបួសរ៉ាំរៃ។

កែវ សុខផេង ត្រូវបានចាត់ទុកជាកីឡាករបាល់ទាត់កម្ពុជាម្នាក់ទទួលបានជោគជ័យទាំងក្នុងជម្រើសជាតិ និងក្លិប ចាប់តាំងពីរូបគេបានលេងបាល់ទាត់អាជីពនៅឆ្នាំ២០១២។ ក្លិបអាជីពលើកដំបូងគឺ បឹងកេត ពីឆ្នាំ២០១២ ដល់ ២០១៥ រូបគេបង្ហាញខ្លួនបាន៣៧ដងនៅលើទីលាន និងរកបាន២១គ្រាប់។ ក្លិបនេះ រូបគេបានជួយឲ្យឈ្នះជើងឯកលីគកំពូលកម្ពុជាឆ្នាំ២០១២។

បន្ទាប់មក សុខផេង បានផ្លាស់ទៅក្លឹបភ្នំពេញក្រោន ពីឆ្នាំ២០១៥ ដល់២០១៧។ ក្នុងរយៈពេល៣ឆ្នាំនេះ រូបគេបង្ហាញខ្លួនលើទីលាន៥១ដង រកបាន២៧គ្រាប់ និងជួយឲ្យភ្នំពេញក្រោន ឈ្នះជើងឯកលីគកំពូលកម្ពុជា ក្នុងឆ្នាំ២០១៥។

ឆ្នាំ២០១៨ ប្អូនប្រុសបង្កើតរបស់ កែវ សុខង៉ន បានផ្ទេរទៅកាន់ក្លិបលីគកំពូលម៉ាឡេស៊ី PKNP ហើយលេងបានតែ៤ដងប៉ុណ្ណោះ ប៉ុន្តែរកបាន១គ្រាប់ដែលបានក្លាយជាកីឡាករកម្ពុជាទី១រកបានគ្រាប់បាល់ក្នុងលីគកំពូលម៉ាឡេស៊ី។

យ៉ាងណា ឆ្នាំ២០១៨ដដែល កែវ សុខផេង បានវិលត្រឡប់មកកម្ពុជាវិញដោយបានចូលរួមជាមួយក្លិបវិសាខា។ ក្លិបចុងក្រោយនេះ រូបគេបានបង្ហាញខ្លួនលើទីលានប្រមាណ៩៤ដង រកបាន៥១គ្រាប់ និងជួយឲ្យវិសាខាឈ្នះពានរង្វាន់សម្តេចតេជោ ហ៊ុន សែន ៣លើកជាប់គ្នាគឺឆ្នាំ២០២០ ២០២១ និង២០២២។

និយាយពីជម្រើសជាតិកម្ពុជាវិញ កែវ សុខផេង ត្រូវបានកោះហៅចូលតំណាងជាតិលើឆាកអន្តរជាតិតាំងពីឆ្នាំ២០១៥ទាំងក្រុមធំ និងយុវជន។ ការបង្ហាញខ្លួនឲ្យក្រុមយុវជនអាយុក្រោម២៣ និងឈុតធំបាន៦២លើក រកបាន១៥គ្រាប់ក្នុងព្រឹត្តិការណ៍សំខាន់ជាច្រើនដូចជា ជម្រុះជើងឯកពិភពលោក ជម្រុះជើងឯកអាស៊ី ជើងឯកអាស៊ាន កីឡាស៊ីហ្គេម និងមិត្តភាពអន្តរជាតិជាដើម។

សមិទ្ធផលសម្រាប់ក្រុមជម្រើសជាតិគួរឲ្យកត់សំគាល់គឺនៅពេល រូបគេស៊ុតបាន៤គ្រាប់ក្នុងព្រឹត្តិការណ៍កីឡាស៊ីហ្គេម លើកទី៣០ ឆ្នាំ២០១៩ នៅប្រទេសហ្វីលីពីន គឺស៊ុតចូលហ្វីលីពីន១គ្រាប់, ចូលទីម័រខាងកើត១គ្រាប់, ចូលម៉ាឡេស៊ី១គ្រាប់ និងមីយ៉ាន់ម៉ា១គ្រាប់ ហើយជាការជួយឲ្យក្រុម U23 កម្ពុជាឡើងទៅកាន់វគ្គពាក់កណ្តាលផ្តាច់ព្រ័ត្រលើកដំបូងក្នុងប្រវត្តិសាស្ត្រកីឡាស៊ីហ្គេម៕

អត្ថបទ៖ វីរបុត្រ

The post កែវ សុខផេង នឹងបានកុងត្រា២ឆ្នាំ ប្រាក់ខែ៤ពាន់ដុល្លារ បើចូលភ្នំពេញក្រោន appeared first on Kampuchea Thmey Daily.

ប្រវត្តិក្រាស់ Doni សមាជិកថ្មីរបស់បញ្ជាការដ្ឋានអង្គរក្សធ្លាប់លេងលីគជប៉ុន និងបារ៉ែន

chean virakbot — Thu, 18 Jan 2024 02:03:23 +0000

កីឡាករបាល់ទះជម្រើសជាតិឥណ្ឌូណេស៊ី Doni Haryono បានក្លាយជាសមាជិកថ្មីរបស់ក្លិបបញ្ជាការដ្ឋានអង្គរក្សក្នុងព្រឹត្តិការណ៍បាល់ទះតេជោលីគរដូវកាលដំបូង បន្ទាប់ពីដំណើរការបាន១សប្តាហ៍។

កីឡាករកើតនៅទី២១ ខែកុម្ភៈ ឆ្នាំ១៩៩៩ ក្នុងតំបន់ Magelang ខេត្ត Jawa Tengah ប្រទេសឥណ្ឌូណេស៊ី។ កីឡាករដែលមានកម្ពស់១.៩១ម៉ែត្រមានបទពិសោធច្រើនទាំងការលេងឲ្យក្លិប និងជម្រើសជាតិឥណ្ឌូណេស៊ី។

មុនពេលក្លាយជាកីឡាករបាល់ទះអាជីព Doni Haryono យុវជនដ៏មានទេពកោសល្យម្នាក់នេះធ្លាប់លេងកីឡាបាល់ទាត់នៅសាលាបឋមសិក្សា និងអនុវិទ្យាល័យ។ រូបគេធ្លាប់ត្រូវបានកោះហៅចូលក្រុមបាល់ទាត់ជម្រើសជាតិឥណ្ឌូណេស៊ីអាយុក្រោម១៦ឆ្នាំក្នុងនាមជាអ្នកចាំទី ប៉ុន្តែឪពុករបស់ខ្លួនសម្រេចឲ្យលេងបាល់ទះវិញ។ រូបគេបានចាប់ផ្តើមលេងបាល់ទះនៅពេលរៀនវិទ្យាល័យតាមបំណងប្រាថ្នារបស់ឪពុកដោយបានចូលហ្វឹកហាត់នៅមជ្ឈមណ្ឌលហ្វឹកហាត់ និងអប់រំរបស់ខេត្ត Central Java។

កីឡាករ Doni Haryono (លេខ៩)ពេលលេងស៊ីហ្គេមនៅកម្ពុជា

បន្ទាប់មក រូបគេបានចាប់ផ្តើមចូលរួមប្រកួតជើងឯកថ្នាក់ជាតិកម្រិតយុវជន។ នៅឆ្នាំ២០១៥ រូបគេបានចូលរួមក្រុមបាល់ទះយុវជនឥណ្ឌូណេស៊ីក្នុងព្រឹត្តិការណ៍កីឡាសិស្សអាស៊ាន ASEAN School Games នៅឆ្នាំ២០១៥ និង២០១៦។

ឆ្នាំ២០១៧ Doni បានចូលរួមជាមួយក្រុមបាល់ទះជម្រើសជាតិឥណ្ឌូណេស៊ីក្រុមធំក្នុងព្រឹត្តិការណ៍កីឡាស៊ីហ្គេម នៅប្រទេសម៉ាឡេស៊ី ដោយបានជួយក្រុមទទួលបានមេដាយប្រាក់។ បន្ទាប់មករូបគេបានជួយក្រុមបាល់ទះជម្រើសជាតិឥណ្ឌូណេស៊ីទទួលបានមេដាយមាសកីឡាស៊ីហ្គេម៣លើកជាប់គ្នាគឺ ស៊ីហ្គេមឆ្នាំ២០១៩ នៅហ្វីលីពីន ស៊ីហ្គេមឆ្នាំ២០២១នៅវៀតណាម និងស៊ីហ្គេមឆ្នាំ២០២៣ នៅប្រទេសកម្ពុជា។

កីឡាករ Doni Haryono (លេខ៩) ពេលលេងស៊ីហ្គេមនៅកម្ពុជា

ក្រៅពីនោះ រូបគេក៏បានជួយក្រុមជម្រើសជាតិឥណ្ឌូណេស៊ីឈ្នះជើងឯកលីគបាល់ទះអាស៊ាន SEA Men’s V.League ២ដងក្នុងឆ្នាំ២០២៣ដែលរៀបចំនៅឥណ្ឌូណេស៊ី និងហ្វីលីពីន។

រហូតមកដល់ពេលនេះ Doni Haryono បានលេងឲ្យក្លិបបាល់ទះអាជីពផ្លូវការចំនួន៧ផ្សេងនៅក្នុងប្រទេស៤ផ្សេងគ្នារាប់ទាំងកម្ពុជា។ ចាប់ផ្តើមដំបូងក្នុងឆ្នាំ២០១៦ រូបគេលេងឲ្យក្លិប Bekasi BVN នៅក្នុងលីគបាល់ទះឥណ្ឌូណេស៊ី។ ចន្លោះឆ្នាំ២០១៧-១៨ រូបគេលេងឲ្យក្លិបឥណ្ឌូណេស៊ី Jakarta Pertamina Energi។ នៅក្លិបនេះហើយដែលរូបគេបានឈ្នះជើងឯកលីគកំពូលឥណ្ឌូណេស៊ីជាលើកដំបូងក្នុងឆ្នាំ២០១៧។

ឆ្នាំ២០១៩ រូបគេបានចូលរួមជាមួយក្លិប Jakarta BNI 46 មុនពេលផ្លាស់ទៅក្រៅប្រទេសជាលើកដំបូងដោយបានចូលរួមជាមួយក្លិប Al Nasser ក្នុងលីគបាល់ទះបារ៉ែនជាកន្លែងដែលរូបគេបានចំណាយពេល២រដូវកាលឆ្នាំ២០២០ និង២០២១។ បន្ទាប់មក រូបគេបានវិលត្រឡប់មកឥណ្ឌូណេស៊ីវិញដោយចូលរួមក្លិប Bogor LavAni ក្នុងឆ្នាំ២០២២ ជាកន្លែងដែលរូបគេបានឈ្នះជើងឯកលីគកំពូលឥណ្ឌូណេស៊ីជាលើកទី២។

កាលពីឆ្នាំ២០២៣ Doni បានចូលរួមជាមួយក្លិប VC Nagano Tridents របស់លីគបាល់ទះកំពូលជប៉ុនដែលបានបញ្ចប់នៅចំណាត់ថ្នាក់លេខ៩ក្នុងចំណោម១០ក្លិប បន្ទាប់ពីឆ្លងកាត់៣៦ប្រកួតគឺឈ្នះតែ៥ប្រកួតប៉ុណ្ណោះ និងបានចាញ់៣១ប្រកួត។

តាមព័ត៌មានដែលបានផ្សាយថា ក្រោយចាកចេញពីប្រទេសជប៉ុន កីឡាករ Doni Haryono បានចូលក្លិបឥណ្ឌូណេស៊ី STIN Pasundan ប៉ុន្តែពេលនេះបានធ្វើដំណើរមកប្រទេសកម្ពុជាដើម្បីចូលរួមជាមួយក្លិបបញ្ជាការដ្ឋានអង្គរក្សសម្រាប់បាល់ទះតេជោលីគ។

ប្រវត្តិលេងឲ្យក្លិប

ឆ្នាំ២០១៦ ក្លិប Bekasi BVN (ឥណ្ឌូណេស៊ី)
ឆ្នាំ២០១៧-១៨ ក្លិប Jakarta Pertamina Energi (ឥណ្ឌូណេស៊ី)
ឆ្នាំ២០១៩ ក្លិប Jakarta BNI 46 (ឥណ្ឌូណេស៊ី)
ឆ្នាំ២០២០-២១ ក្លិប Al Nasser (បារ៉ែន)
ឆ្នាំ២០២២ ក្លិប Bogor LavAni ((ឥណ្ឌូណេស៊ី)
ឆ្នាំ២០២៣ ក្លិប VC Nagano Tridents (ជប៉ុន)
ឆ្នាំ២០២៤ ក្លិបបញ្ជាការដ្ឋានអង្គរក្ស (កម្ពុជា)

ក្រុមឥណ្ឌូណេស៊ីឈ្នះមេដាយមាសស៊ីហ្គេមនៅកម្ពុជា

សមិទ្ធផល

មេដាយមាសស៊ីហ្គេម ៣លើក សម្រាប់ជម្រើសជាតិឥណ្ឌូណេស៊ី ឆ្នាំ២០១៩ ២០២១ និង២០២៣
ជើងឯកលីគអាស៊ាន SEA V.League ២លើក សម្រាប់ជម្រើសជាតិ ឆ្នាំ២០២៣
ពានរង្វាន់កីឡាករឆ្នើមបំផុតប្រចាំព្រឹត្តិការណ៍កីឡាស៊ីហ្គេម ឆ្នាំ២០១៩
ពានរង្វាន់កីឡាករឆ្នើមបំផុតប្រចាំលីគឥណ្ឌូណេស៊ី ឆ្នាំ២០២២
ជើងឯកលីគបាល់ទះឥណ្ឌូណេស៊ី ឆ្នាំ២០១៧ ជាមួយក្លិប Jakarta Pertamina Engergi
ជើងឯកលីគបាល់ទះឥណ្ឌូណេស៊ី ឆ្នាំ២០២២ ជាមួយក្លិប Bogor LavAni
មេដាយប្រាក់កីឡាសិស្សអាស៊ាន ឆ្នាំ២០១៦
មេដាយប្រាក់ស៊ីហ្គេម ឆ្នាំ២០១៧

អត្ថបទ៖ វីរបុត្រ

The post ប្រវត្តិក្រាស់ Doni សមាជិកថ្មីរបស់បញ្ជាការដ្ឋានអង្គរក្សធ្លាប់លេងលីគជប៉ុន និងបារ៉ែន appeared first on Kampuchea Thmey Daily.

សារ៉េត គ្រីយ៉ា ៖«ម៉ាក់ទិញកង់ឲ្យជិះ ខ្ចប់បាយ ទៅហាត់បាល់ទាត់»

chean virakbot — Wed, 17 Aug 2022 05:15:05 +0000

សារ៉េត គ្រីយ៉ា ជាខ្សែការពារដ៏រឹងមាំ លេចធ្លោរបស់ព្រះខ័នរាជស្វាយរៀង និងក្រុមបាល់ទាត់ជម្រើសជាតិកម្ពុជា ប៉ុន្តែការពិតជីវិតតស៊ូកាលពីកុមារភាពអ្នកគាំទ្រស្ទើរតែមិនបានដឹងឡើយ។

សារ៉េត គ្រីយ៉ា

ខ្សែការពារម្ចាស់អាវលេខ១៣របស់ព្រះខ័នរាជស្វាយរៀងដែលមានដើមកំណើតនៅខេត្តកណ្តាលបានតស៊ូប្រឹងប្រែង និងជម្នះការលំបាកច្រើនណាស់កាលពីកុមារភាព។ កាលពីតូច រូបគេធ្លាប់ដើរស៊ីឈ្នួលឃ្វាលគោ ដឹកត្រី ដើម្បីបានប្រាក់ជួយដល់គ្រួសារដែលមានជីវភាពខ្វះខាតខ្លាំង។

ទន្ទឹមជាមួយគ្នានេះ សារ៉េត គ្រីយ៉ា ចូលចិត្តលេងបាល់ទាត់យ៉ាងខ្លាំង។ រាល់ពេលទំនេរ រូបគេតែងតែទៅលេងបាល់ទាត់ជាមួយមិត្តភក្តិ។ អាយុ១៤ឆ្នាំ រូបគេបានធ្វើតេស្តនៅយុវជនជម្រើសជាតិកម្ពុជាអាយុក្រោម១៤ឆ្នាំ ប៉ុន្តែមិនជាប់។ យ៉ាងណា មួយឆ្នាំក្រោយមក រូបគេបានធ្វើតេស្តជាប់យុវជនម្រើសជាតិអាយុក្រោម១៥ឆ្នាំ។ បន្ទាប់មក រូបគេបានទៅធ្វើសុំលោកគ្រូរបស់ព្រះខ័នរាជស្វាយរៀងដើម្បីហ្វឹកហាត់ជាមួយថ្នាលយុវជន។

សារ៉េត គ្រីយ៉ា

គ្រីយ៉ា បានរៀបរាប់ថា ៖«ជីវភាពគ្រួសារខ្ញុំលំបាកណាស់។ អត់មានស្បែកជើងពាក់ អត់មានអីជិះទៅហាត់បាល់។ ពេលខ្លះ ខ្ញុំខ្ចីស្បែកជើងគេពាក់ទៅហាត់។ ខ្ញុំបានសុំលោកគ្រូ កុសល នៅព្រះខ័នរាជស្វាយរៀងហាត់ជាមួយក្រុមយុវជនក្រោមអាយុ១៥ឆ្នាំ។ ពេលនោះ គាត់សួរខ្ញុំថា មានអីជិះអត់? ខ្ញុំប្រាប់ថា មានគឺកង់ តែពេលនោះអត់ទាន់មានកង់ទេ។ ហាត់បានប៉ុន្មានថ្ងៃ ម៉ាក់បានទិញកង់ឲ្យ។ ថ្ងៃខ្លះខ្ញុំជិះម៉ូតូជាមួយមិត្តភក្តិទៅហាត់»។

អ្វីដែលជំរុញឲ្យ យុវជនរូបនេះខិតខំប្រឹងប្រែងក្នុងការហ្វឹកហាត់ទេ្វឡើងគឺការជំរុញលើកទឹកចិត្តពីម្តាយ និងក្រុមគ្រួសារ។ ថ្វីបើពួកគាត់ខ្វះខាតលុយកាក់ ទ្រព្យសម្បត្តិ ប៉ុន្តែពួកគាត់មិនខ្វះទឹកចិត្តក្នុងការជំរុញកូនម្នាក់នេះឲ្យទៅហ្វឹកហាត់បាល់ទាត់នោះទេ។

សារ៉េត គ្រីយ៉ា និង ប្រាក់ មុន្នីឧត្តម

សារ៉េត គ្រីយ៉ា បន្តរៀបរាប់ថា ៖«ខ្ញុំធ្លាប់ស៊ីឈ្នួលដឹកត្រី។ ពេលខ្លះឃ្វាលគោឲ្យគេ តែខ្ញុំនៅតែតស៊ូហាត់បាល់ទាត់។ ម៉ាក់ជួយជំរុញលើកទឹកចិត្តខ្លាំង ដោយសារគាត់ឃើញខ្ញុំស្រឡាញ់។ គាត់បានរៀបចំឲ្យខ្ញុំទៅហាត់។ ព្រឹកឡើង គាត់ដាំបាយដាក់ប្រអប់ ដាំទឹកតែដាក់ឲ្យទៅស្ទើររាល់ថ្ងៃ។ និយាយទៅ ម៉ាក់ជំរុញខ្ញុំ លើកទឹកចិត្តខ្ញុំខ្លាំងមែនទែន»។

ក្នុងនាមជាខ្សែការពារសំខាន់ម្នាក់ សារ៉េត គ្រីយ៉ា បានជួយព្រះខ័នរាជស្វាយរៀងឈ្នះជើងឯកលីគកំពូលកម្ពុជា២ដង និងពានរង្វាន់សម្តេចតេជោ ហ៊ុន សែន ២ដង៕ សូមរង់ចាំតាមដានលំអិតពីប្រវត្តិរបស់ គ្រីយ៉ា។

អត្ថបទ៖ វីរបុត្រ

The post សារ៉េត គ្រីយ៉ា ៖«ម៉ាក់ទិញកង់ឲ្យជិះ ខ្ចប់បាយ ទៅហាត់បាល់ទាត់» appeared first on Kampuchea Thmey Daily.

លាតត្រដាងកំណើតបាល់ទាត់ ជា សំណាង របស់ព្រះខ័នរាជស្វាយរៀង

chean virakbot — Tue, 16 Aug 2022 08:45:04 +0000

រយៈពេលជាង១០ឆ្នាំហើយដែលខ្សែបម្រើ ជា សំណាង ប្រកបអាជីពបាល់ទាត់នៅក្លឹបព្រះខ័នរាជស្វាយរៀង និងធ្លាប់ឈ្នះពានរង្វាន់ធំសំខាន់៦ជាមួយក្លឹបដែលមានមូលដ្ឋាននៅខេត្តស្វាយរៀងមួយនេះ។ យ៉ាងណា អ្នកគាំទ្របានស្គាល់រូបគេច្បាស់តែនៅលើទីលានបៃតងប៉ុណ្ណោះ ខណៈកំណើតបាល់ទាត់ពីដំបូងប្រហែលជាមិនទាន់ជ្រាបឡើយ។

ជា សំណាង

កីឡាករដែលមានបងប្អូនបង្កើត៤នាក់ ក្នុងនោះប្រុស៣ ស្រី១ និងដើមកំណើតនៅស្រុកកំពង់ត្រាច ខេត្តកំពតមិនធ្លាប់បានហ្វឹកហាត់ ឬបណ្តុះបណ្តាលអាជីពត្រឹមត្រូវក្នុងថ្នាលយុវជនណាមួយឡើយ។ រូបគេចូលចិត្ត ស្រឡាញ់បាល់ទាត់តាមរយៈការមើលតាមទូរទស្សន៍តាំងពីតូច និងបានលេងបាល់ទាត់ដើម្បីសប្បាយរីករាយប៉ុណ្ណោះ។

ជា សំណាង បានរៀបរាប់ឲ្យ«កម្ពុជាថ្មី»ដឹងថា ៖«កាលពីតូច ខ្ញុំលេងបាល់ទាត់ ព្រោះតែការស្រឡាញ់ ដោយសារមើលគេលេងតាមទូរទស្សន៍។ ពេលនោះ ខ្ញុំលេងដើម្បីសប្បាយប៉ុណ្ណោះ។ ខ្ញុំអត់ស្រមៃក្លាយជាកីឡាករអាជីពអីទេ»។

កាលពីដំបូងក្រុមគ្រួសារមិនទឹកចិត្តឲ្យក្មេងប្រុសម្នាក់នេះលេងបាល់ទាត់ទេ ប៉ុន្តែពួកគេជំរុញឲ្យខិតខំរៀនសូត្រច្រើនជាង។ ទោះជាយ៉ាងណាការប្រឹងប្រែងលេងតាមក្តីស្រឡាញ់ និងឃើញលទ្ធផលល្អ ក្រុមគ្រួសារក៏លែងជំទាស់ ហើយជំរុញលើកទឹកចិត្តបន្ថែម។

«កាលពីដំបូង ក្រុមគ្រួសាររបស់ខ្ញុំចង់ឲ្យរៀនសូត្រច្រើនជាង តែពេលខ្ញុំជាប់ក្រុម U23 ពួកគាត់ក៏ចាប់ផ្តើមជំរុញលើកទឹកចិត្តខ្លាំងឡើង»។ ជា សំណាង បានបញ្ជាក់។

កត្តាពីរសំខាន់ដែលជំរុញឲ្យកីឡាករមានកំណើតនៅខេត្តកំពតរូបនេះប្រឹងប្រែងក្នុងអាជីពបាល់ទាត់។ សំណាងបានប្រាប់ថា ៖«កត្តាដែលជំរុញឲ្យខ្ញុំប្រឹងប្រែងខ្លាំងគឺទី១ចំពេលដែលបាល់ទាត់កម្ពុជាកំពុងរីកចម្រើន។ ទី២ការស្រឡាញ់ពេញចិត្តកីឡានេះដោយខ្លួនឯង»។

ការលេងបាល់ទាត់កាលពីក្មេងយ៉ាងជោកជាំបានបើកផ្លូវឲ្យរូបគេស្វែងរកកន្លែងដែលអាចលេងបាល់ទាត់ពិតប្រាកដ និងអាជីព។ ទីបំផុតនៅឆ្នាំ២០១០ រូបគេបានទៅចូលរួមជាមួយក្រុមយុវជនអាយុក្រោម១៩ឆ្នាំរបស់ព្រះខ័នរាជស្វាយរៀង។

ជា សំណាង បានប្រាប់ថា ៖«ខ្ញុំអត់បានហ្វឹកហាត់ជាមួយក្រុមយុវជនរបស់ព្រះខ័នរាជស្វាយរៀងទេ។ ខ្ញុំចាំបានថា ខ្ញុំបានហ្វឹកហាត់ជាមួយ U19 ព្រះខ័នរាជស្វាយរៀងតែពីរថ្ងៃប៉ុណ្ណោះ ក៏បានឡើងមកហាត់ជាមួយក្រុមធំតែម្តង ហើយក៏បានលេងរហូតដល់ឥឡូវ»។

ជា សំណាង (កណ្តាល)

ទោះជាយ៉ាងណា ឱកាសនៃការបានលេងនៅក្លឹបបាល់ទាត់អាជីពពិតប្រាកដមិនមែនជាការងាយស្រួលនោះទេ។ បុរសម្ចាស់អាវលេខ៨បានប្រាប់ថា ៖«ខ្ញុំជួបការលំបាកច្រើន។ ពេលខ្លះស្ទើរតែអស់សង្ឃឹម ប៉ុន្តែខ្ញុំចេះតែតស៊ូដោយខ្លួនឯង និងប្រឹងតស៊ូ អត់ធន់។ ទីបំផុតខ្ញុំអាចឈរជើងលើវាលស្មៅបៃតងអាជីពបានដល់សព្វថ្ងៃ»។

រយៈពេលជាង១០ឆ្នាំកន្លងទៅនេះបាល់ទាត់បានផ្តល់អត្ថប្រយោជន៍ដល់រូបគេច្រើនទាំងសុខភាព កេរ្តិ៍័ឈ្មោះ និងជីវភាពប្រចាំថ្ងៃរបស់គ្រួសារ។

រហូតដល់ពេលនេះ ជា សំណាង បានឈ្នះពានរង្វាន់ធំជាមួយព្រះខ័នរាជស្វាយរៀងចំនួន៦គឺ ពានរង្វាន់សម្តេចតេជោ ហ៊ុន សែន ៤ដង និងជម្រើសជើងឯកលីគ២ដង៕

អត្ថបទ៖ វីរបុត្រ

The post លាតត្រដាងកំណើតបាល់ទាត់ ជា សំណាង របស់ព្រះខ័នរាជស្វាយរៀង appeared first on Kampuchea Thmey Daily.

ជីវិតហែលឆ្លងក្នុងបាល់ទាត់ពីតូចរបស់ អៀន ពិសី មុនពេលសម្រេចក្តីស្រមៃ

chean virakbot — Fri, 01 Jul 2022 02:29:08 +0000

អៀន ពិសី ត្រូវបានអ្នកគាំទ្របាល់ទាត់ដឹងថា ជាទំពាំងលូតលាស់ចេញពីថ្នាលយុវជនសាលាបាល់ទាត់ជាតិបាទីមុនពេលបោះជំហានចូលក្លឹបអាជីពព្រះខ័នរាជស្វាយរៀង និងជាប់ជម្រើសជាតិកម្ពុជា។ យ៉ាងណា អ្នកគាំទ្រប្រហែលជាមិនដឹងពីរឿងរ៉ាវស្ថិតនៅពីក្រោយអាជីពបាល់ទាត់លេចធ្លោនៅលើទីលាននាពេលបច្ចុប្បន្នឡើយ។

កីឡាករ អៀន ពិសី

ការលេងបាល់ទាត់កាលពីតូចគឺជាអនុស្សាវរីយ៍ដ៏កម្រដែលដក់ជាប់ក្នុងខួរក្បាល និងមិនអាចបំភ្លេចបានរបស់កីឡាករ អៀន ពិសី។ កីឡាករអាយុ២០ឆ្នាំរូបនេះបានប្រាប់ថា ៖«កាលនៅតូច ខ្ញុំចេះតែលេងសប្បាយៗតាមសាលា តាមវាលស្រែ។ ឲ្យតែចេញពីរៀន ទៅលេងបាល់។ ពេលខ្លះអត់ទៅផ្ទះញាំបាយទឹកអីទេ គិតតែទៅលេងបាល់»។

អៀន ពិសី បន្តថា ៖«ខ្ញុំចូលចិត្តបាល់ខ្លាំងណាស់។ ចេញពីរៀនមិនទាន់ទេ ដឹងតែទៅលេងបាល់។ ពេលនោះ ខ្ញុំអត់ចង់ក្លាយជាកីឡាករអាជីពអីទេ។ តែពេលលេងយូរៗ ទៅគេឃើញខ្ញុំលេងល្អ គេសរសើរ ឲ្យខ្ញុំខំប្រឹងបន្ថែមទៀត។ ពេលនោះប៉ារបស់ខ្ញុំក៏លើកទឹកចិត្តដែរ»។

កីឡាករ អៀន ពិសី

ទោះជាយ៉ាងណា មិនមែនគ្រប់គ្នានៅក្នុងគ្រួសារសុទ្ធតែជំរុញកីឡាកររូបនេះឲ្យខំប្រឹងលេងបាល់នោះទេ ប៉ុន្តែបង្ខំឲ្យរូបគេយកចិត្តទុកដាក់លើការសិក្សាជាងបាល់ទាត់។ ពិសី ប្រាប់ថា ៖«ដល់ថ្នាក់បងៗរបស់ខ្ញុំស្តីឲ្យ វ៉ៃ ពេលខ្លះដេញពីទីលាន ពីព្រោះពួកគាត់ឲ្យខ្ញុំខំប្រឹងរៀន តែខ្ញុំនៅតែទៅលេងបាល់»។

ការលះបង់ពេលវេលាទៅលេងបាល់ទាត់ពិតជាមិនបានធ្វើឲ្យសមាជិកក្រុមព្រះខ័នរាជស្វាយរៀងម្នាក់នេះអត់ប្រយោជន៍ឡើយ។ ដោយមើលឃើញចំណង់ចំណូលចិត្តរបស់ខ្លួនពេញចិត្តខ្លាំងចំពោះបាល់ទាត់ និងមានការលើកទឹកចិត្តពីអ្នកជុំវិញខ្លួនផងនោះ អៀន ពិសី បានសម្រេចទៅធ្វើតេស្តនៅក្រុមយុវជនបាល់ទាត់គិរីវង់សុខសែនជ័យ និងបានជាប់ដូចបំណង។

បន្ទាប់មកអាយុប្រហែលជា១៤ឆ្នាំ អៀន ពិសី បានធ្វើតេស្តជាប់នៅសាលាបាល់ទាត់ជាតិបាទីដែលជាកន្លែងផ្តល់ឱកាសឲ្យរូបគេបានហ្វឹកហាត់បាល់ទាត់អាជីពពិតប្រាកដ និងបានសិក្សារហូតចប់ថ្នាក់ទី១២។

កីឡាករ អៀន ពិសី ជាមួយកីឡាករគិរីវង់សុខសែនជ័យ

នៅពេលកាលកំណត់សម្រាប់ការបណ្តុះបណ្តាលថ្នាលយុវជនសាលាបាល់ទាត់ជាតិបាទីនៅជំនាន់នោះដល់ពេលត្រូវរំសាយ អៀន ពិសី បានជ្រើសរើសចូលរួមជាមួយក្លឹបព្រះខ័នរាជស្វាយរៀងកាលពីឆ្នាំ២០២០។ ក្រោយលេចធ្លោនៅក្លឹបដែលមានមូលដ្ឋាននៅខេត្តស្វាយរៀង រូបគេក៏ត្រូវបានកោះហៅចូលក្រុមបាល់ទាត់ជម្រើសជាតិកម្ពុជាដែលចេញទៅប្រកួតពានរង្វាន់ AFC Asian Cup នៅប្រទេសឥណ្ឌាកាលពីពេលថ្មីៗនេះ។

អៀន ពិសី បានជាប់ក្រុមបាល់ទាត់យុវជនជម្រើសជាតិកម្ពុជាអាយុក្រោម១៩ឆ្នាំ កាលពីឆ្នាំ២០១៩ និងក្រុមយុវជនកម្ពុជាអាយុក្រោម២៣ឆ្នាំ ឆ្នាំ២០២១ និងក្រុមធំឆ្នាំ២០២២នេះ។

កីឡាករខ្សែបម្រើស្លាបរូបនេះមានកំណើតនៅខេត្តកណ្តាល ប៉ុន្តែក្រុមគ្រួសារបានផ្លាស់ទៅរស់នៅស្រែតាកោ សង្កាត់រការក្នុង ក្រុងដូនកែវ ខេត្តតាកែវ។ រូបគេជាកូនទី៧ ក្នុងចំណោមបងប្អូន៨នាក់ ដែលឪពុកម្តាយបានចែកឋាន ហើយបច្ចុប្បន្នរស់នៅជាមួយឪពុកម្តាយធម៌៕

អៀន ពិសី ក្នុងក្រុមព្រះខ័នរាជស្វាយរៀង

អត្ថបទ៖ វីរបុត្រ

The post ជីវិតហែលឆ្លងក្នុងបាល់ទាត់ពីតូចរបស់ អៀន ពិសី មុនពេលសម្រេចក្តីស្រមៃ appeared first on Kampuchea Thmey Daily.

យុវជនឆ្នើម ជូ ស៊ីនទី មិននឹកស្មានខ្លួនឯងដើរមកដល់ចំណុចនេះ

chean virakbot — Tue, 28 Jun 2022 01:51:42 +0000

ជូ ស៊ីនទី ជាខ្សែបម្រើកណ្តាលគួរឲ្យចាប់អារម្មណ៍មួយរូបប្រចាំក្លឹបព្រះខ័នរាជស្វាយរៀង និងក្រុមបាល់ទាត់ជម្រើសជាតិកម្ពុជានាពេលបច្ចុប្បន្ន ប៉ុន្តែអ្នកគាំទ្រភាគច្រើនប្រហែលជាមិនបានដឹងពីដំណើរជីវិតពិតកាលពីកុមារភាពរបស់យុវជនរូបនេះឡើយ។

ជូ ស៊ីនទី

កីឡាករដែលមានដើមកំណើតនៅខេត្តបាត់ដំបង ជូ ស៊ីនទី កំពុងរីករាយនឹងអ្វីដែលខ្លួនទទួលបាននាពេលបច្ចុប្បន្ន ខណៈកាលពីកុមារភាពរបស់ខ្លួនមិនបានគិតវែងឆ្ងាយក្នុងការចាប់យកបាល់ទាត់ជាអាជីពពិតប្រាកដឡើយ។

ស្ថិតក្នុងវ័យ១៩ឆ្នាំ ស៊ីនទី បានប្រាប់«កម្ពុជាថ្មី»ថា ៖«ដូចក្មេងដទៃក្នុងភូមិដែរ ដើមឡើយ ខ្ញុំលេងបាល់ដើម្បីសប្បាយរីករាយប៉ុណ្ណោះ។ ក្រោយមក មានគេបង្កើតក្រុមបាល់ទាត់មួយឈ្មោះ«Victory Poipet FC» ក៏បានធ្វើតេស្តជាប់លេងឲ្យក្រុមនេះ។ ពេលបានហ្វឹកហាត់ជាមួយក្រុមមួយនេះ ក៏បានឱកាសឲ្យលេងឲ្យក្រុមអធិរាជតំណាងខេត្ត»។

ជូ ស៊ីនទី ជួរមុខពីឆ្វេងទី១ ក្នុងក្រុមព្រះខ័នរាជស្វាយរៀង

នៅឆ្នាំ២០១៦ ជូ ស៊ីនទី បានធ្វើតេស្តជាប់នៅសាលាបាល់ទាត់ជាតិបាទីដែលជាឱកាសបានហ្វឹកហាត់បាល់ទាត់អាជីពជាលើកដំបូង និងបន្តការសិក្សាផង។ ហ្វឹកហាត់បាល់ទាត់ និងសិក្សារហូតចប់ថ្នាក់ទី១២ ក្រុមសាលាបាល់ទាត់បាទីជំនាន់នោះត្រូវបានរំសាយដោយសារកំណត់ត្រឹមចប់ថ្នាក់ទី១២។

ស៊ីនទី ប្រាប់ថា ៖«ខ្ញុំបានហាត់បាល់ផង រៀនផងនៅបាទីប្រហែលជា៥ឆ្នាំទើបខ្ញុំចូលព្រះខ័នរាជស្វាយរៀង។ ព្រះខ័នរាជស្វាយរៀងទាក់ទង់គឺឲ្យខ្ញុំចូលក្រុមធំតែម្តងគឺអត់យុវជនទេ»។

ជូ ស៊ីនទី (កណ្តាលលេខ៦) ក្នុងក្រុមជម្រើសជាតិកម្ពុជា

សម្រាប់រដូវកាល២០២១ដែលជាឆ្នាំដំបូងនៅក្លិបដែលមានមូលដ្ឋាននៅខេត្តស្វាយរៀងមួយនេះ ជូ ស៊ីនទី បានលេងញឹកញាប់ដែរ ប៉ុន្តែភាគច្រើនលេងក្នុងការប្តូរចូលវគ្គទី២ដែលមានន័យថា រូបគេមិនទាន់ជាប់ជម្រើស១១នាក់ដំបូងឡើយ។

ទោះជាយ៉ាងណា រដូវកាល២០២២នេះគឺជាឆ្នាំដែលយុវជនរូបនេះបានជាប់ជម្រើស១១នាក់ដំបូងស្ទើរមិនដាច់។ កីឡាករបាននិយាយថា ៖«ឆ្នាំដំបូង ខ្ញុំអត់ចាំបានលេងប៉ុន្មានដងទេ តែដឹងថា លេងបានច្រើនដែរ។ ដល់ឆ្នាំ២០២២នេះ ខ្ញុំលេងបានច្រើន ហើយជាប់ជម្រើស១១នាក់ដំបូងទៀត»។

រឹតតែពិសេសទៀតនោះ ជូ ស៊ីនទី ត្រូវបានកោះហៅចូលក្រុមបាល់ទាត់ជម្រើសជាតិកម្ពុជាក្រុមធំសម្រាប់ព្រឹត្តិការណ៍ប្រកួត AFC Asian Cup កាលពីពេលថ្មីៗនេះនៅប្រទេសឥណ្ឌា។ រូបគេក៏ទទួលបានការទុកចិត្តពីក្រុមគ្រូបង្វឹកដើម្បីបង្ហាញខ្លួននៅលើទីលានទាំងការប្តូរចូល និងជាប់ជម្រើស១១នាក់ដំបូងទៀតផង។

ជូ ស៊ីនទី

ស៊ីនទី បាននិយាយថា ៖«កាលខ្ញុំនៅក្មេង ខ្ញុំលេងបាល់សប្បាយៗហ្នឹងបង! លេងជាមួយមិត្តភក្តិដើម្បីសប្បាយ អត់ដែលគិតវែងឆ្ងាយផង។ ពេលខ្ញុំមានក្រុមលេងនៅប៉ោយប៉ែត គឺលេងដើម្បីសប្បាយៗ។ មិននឹកស្មានថា ខ្លួនឯងឈានមកដល់ចំណុចសព្វថ្ងៃនេះ»។

ទន្ទឹងជាមួយទទួលបានឱកាសល្អទាំងនៅក្រុមធំព្រះខ័នរាជស្វាយរៀង និងជម្រើសជាតិកម្ពុជា កីឡាករកម្ពស់១.៦០ម៉ែត្ររូបនេះមិនហ៊ានប្រាថ្នា ឬដាក់ក្តីស្រមៃអ្វីធំនៅពេលខាងមុខទេគឺមានតែការប្រឹងប្រែងនឹងអ្វីដែលខ្លួនទទួលបានសព្វថ្ងៃឲ្យបានល្អបំផុត។

ជូ ស៊ីនទី (កណ្តាល)

«ខ្ញុំមិនទាន់ហ៊ានគិតអ្វីនាពេលខាងមុខទេ។ អ្វីដែលខ្ញុំគិតគឺផ្តោតលើការហ្វឹកហាត់ និងលេងឲ្យបានល្អបំផុតនាពេលបច្ចុប្បន្ន ព្រោះខ្ញុំត្រូវការអភិវឌ្ឍខ្លួនឲ្យកាន់តែល្អជាងនេះថែមទៀត»។ ស៊ីនទីបានបញ្ជាក់៕

អត្ថបទ៖ វីរបុត្រ

The post យុវជនឆ្នើម ជូ ស៊ីនទី មិននឹកស្មានខ្លួនឯងដើរមកដល់ចំណុចនេះ appeared first on Kampuchea Thmey Daily.

ប្រវត្តិកីឡាករ Archives - Kampuchea Thmey Daily

អតីត​យុវជន​បឹងកេត មឿនលីម​ សុបញ្ញា ក្លាយ​ជា​កីឡាករ​ជឺជីតស៊ូ​ដ៏​ឆ្នើម

កីឡាការិនីស្រស់​សោភា​វ័យ​១៩​ឆ្នាំ ហេង ស៊ីវហ៊ាង កំពុង​ស្ថិតលើ​ផ្លូវជោគជ័យ

កែវ សុខផេង នឹងបានកុងត្រា២ឆ្នាំ ប្រាក់ខែ៤ពាន់ដុល្លារ បើចូលភ្នំពេញក្រោន

ប្រវត្តិក្រាស់ Doni សមាជិកថ្មីរបស់បញ្ជាការដ្ឋានអង្គរក្សធ្លាប់លេងលីគជប៉ុន និងបារ៉ែន

សារ៉េត​​ ​គ្រីយ៉ា​​ ៖«​​ម៉ាក់​​ទិញ​​កង់​​ឲ្យ​​ជិះ​​ ខ្ចប់​​បាយ​ ​ទៅ​​ហាត់​​បាល់ទាត់​»

លាត​​ត្រដាង​​​កំណើត​​​បាល់ទាត់​ ជា​ សំណាង​ របស់​ព្រះ​ខ័ន​រាជ​ស្វាយរៀង

​ជីវិត​​ហែល​​ឆ្លង​ក្នុង​​បាល់ទាត់​​​​ពី​​​តូច​​របស់​ អៀន​ ពិសី​ មុន​​ពេល​សម្រេចក្តីស្រមៃ​

យុវជន​​ឆ្នើម​ ជូ​ ស៊ីនទី​ មិន​​នឹក​ស្មាន​​ខ្លួន​​ឯង​ដើរ​មក​​ដល់​​ចំណុច​​​នេះ​

អតីតយុវជនបឹងកេត មឿនលីម សុបញ្ញា ក្លាយជាកីឡាករជឺជីតស៊ូដ៏ឆ្នើម

កីឡាការិនីស្រស់សោភាវ័យ១៩ឆ្នាំ ហេង ស៊ីវហ៊ាង កំពុងស្ថិតលើផ្លូវជោគជ័យ

សារ៉េត គ្រីយ៉ា ៖«ម៉ាក់ទិញកង់ឲ្យជិះ ខ្ចប់បាយ ទៅហាត់បាល់ទាត់»

លាតត្រដាងកំណើតបាល់ទាត់ ជា សំណាង របស់ព្រះខ័នរាជស្វាយរៀង

ជីវិតហែលឆ្លងក្នុងបាល់ទាត់ពីតូចរបស់ អៀន ពិសី មុនពេលសម្រេចក្តីស្រមៃ

យុវជនឆ្នើម ជូ ស៊ីនទី មិននឹកស្មានខ្លួនឯងដើរមកដល់ចំណុចនេះ