តាមរយៈសារដែលបានបង្ហោះលើគណនី Facebook នៅថ្ងៃទី០៣ ខែឧសភា ឆ្នាំ២០២៦ សាររបស់លោក ឆាយ បូរ៉ា បានរំលឹកថា បញ្ហានេះមិនមែនជារឿងថ្មីទេ ប៉ុន្តែកំពុងក្លាយជាស្ថានភាពគួរឱ្យព្រួយបារម្ភកាន់តែខ្លាំងឡើង នៅក្នុងឧស្សាហកម្មភាពយន្តជាតិ។

ការលើកឡើងនេះ បានទាក់ទាញការចាប់អារម្មណ៍យ៉ាងទូលំទូលាយពីសាធារណជន ជាពិសេសអ្នកជំនាញក្នុងវិស័យភាពយន្ត និងអក្សរសិល្ប៍ ដែលបានចូលរួមបញ្ចេញមតិយោបល់យ៉ាងសកម្ម។ មតិយោបល់មួយចំនួនបានសន្និដ្ឋានថា កត្តាសំខាន់ អាចទាក់ទងនឹងភាពអន់ថយនៃសិល្បៈ គុណតម្លៃរឿង ឬបច្ចេកទេសថត ឯខ្លះយល់ថា អាចទាក់ទងនឹងការពេញនិយម (Trending) នូវលំហូរចូលនៃភាពយន្តក្រៅស្រុក។

ជាមួយគ្នានេះ ក៏មានមតិយោបល់មួយចំនួនផ្សេងទៀត យល់ថា បញ្ហានេះអាចពាក់ព័ន្ធនឹងការកើនឡើងនៃការពេញនិយមលើមាតិកាខ្លីៗតាមបណ្ដាញសង្គម ដូចជា TikTok ដែលធ្វើឱ្យទស្សនិកជនមានទំនោរទៅរកការកម្សាន្តដែលមិនចាំបាច់មានគុណតម្លៃអប់រំអ្វីឡើយ ពោលគឺមើលគ្រាន់តែដើម្បីកម្សាន្តអារម្មណ៍។

លើសពីនេះ ក៏មានការវែកញែកថា និន្នាការនេះក៏បានជំរុញឱ្យមានការកើនឡើង នៃអ្នកសម្តែងក្រៅអាជីព ដែលចូលរួមក្នុងការផលិតភាពយន្តដោយខ្វះបទពិសោធ និងការបណ្តុះបណ្តាលវិជ្ជាជីវៈ។ ស្ថានភាពនេះ ត្រូវបានមើលឃើញដែរថា ជាផ្នែកមួយធ្វើឱ្យគុណតម្លៃសិល្បៈនៃភាពយន្តខ្មែរ ទទួលរងផលប៉ះពាល់ផងដែរ។

យ៉ាងណាមិញ ប្រធានបទខាងលើនេះ ក៏ត្រូវបានគេមើលឃើញថា ជាសញ្ញាវិជ្ជមានមួយ សម្រាប់ជំរុញឱ្យមានការពិចារណាឡើងវិញ និងស្វែងរកដំណោះស្រាយ ដើម្បីលើកកម្ពស់គុណភាព និងស្ដារឡើងវិញនូវតម្លៃសិល្បៈក្នុងវិស័យភាពយន្តខ្មែរ នៅពេលអនាគត៕

The post លោក ឆាយ បូរ៉ា លើកពីក្តីកង្វល់ចំពោះគុណភាពភាពយន្តខ្មែរ ជំរុញឱ្យមានមតិវែកញែក និងពិចារណារកមូលហេតុ appeared first on Kampuchea Thmey Daily.

រឿង «ភូមិគ្រឹះម្លិះ» ត្រូវបានសម្ពោធ កាលពីល្ងាចថ្ងៃទី២៤ ខែកុម្ភៈ នៅផ្សារទំនើប ជីប ម៉ុង មេហ្គា ម៉ល ២៧១ ដោយមានការអញ្ជើញចូលរួមពី លោក ទិត ថាវរិទ្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ អ្នកឧកញ៉ា ម៉ៅ ចំណាន គិត ម៉េង ប្រធានសមាគមន៍សិល្បករខ្មែរ រួមទាំងសិល្បករ សិល្បការិនីជាច្រើនរូបទៀត។

តាមរយៈកិច្ចសម្ភាសជាមួយ «កម្ពុជាថ្មី» លោក ប៉ែន ចំរុង បានឱ្យដឹងថា ក្នុងនាមជាផលិតករ លោកមានភាពលំបាកច្រើន ព្រោះត្រូវរៀបចំដោយខ្លួនឯងគ្រប់យ៉ាង ខុសពីតួសម្តែង ដែលគ្រាន់តែស្លៀកពាក់ស្អាត មើលស្គ្រីបហើយចូលថតតែប៉ុណ្ណោះ។ ប៉ុន្តែទោះជាយ៉ាងណា លោកក៏អរគុណភាពលំបាកនេះ ដែលធ្វើ​ឱ្យលោកស្គាល់នូវការពិតជាច្រើន។ មិនត្រឹមតែជាផលិតករ លោក ប៉ែន ចំរុង ក៏ជាតួឯកក្នុងរឿង «ភូមិគ្រឹះម្លិះ» ផងដែរ។

លោកបានបញ្ជាក់ទៀតថា ការផលិតរឿងនេះឡើង គឺដោយសារតែការស្រលាញ់ ហើយស្របនឹងពេលបច្ចប្បន្ន វិស័យភាពយន្ត​កំពុងត្រូវការផលិតករដែលមានតម្រូវការទីផ្សារ ជាពិសេសភាពយន្តដែលមានរសជាតិថ្មីៗ។ លោកបានលើកឡើងដូច្នេះថា «ទីផ្សារកំពុងតម្រូវការ ទីផ្សារកំពុងតែចង់បានភាពយន្តដែលមានរសជាតិថ្មីៗ អញ្ចឹងបានខ្ញុំផលិត ហើយសំខាន់ទៅទៀតរសជាតិដែលយើងផលិតនេះ ជឿជាក់ថាបងប្អូននឹងមាននូវអ្វីដែលប្លែក ហើយថ្មី សម្រាប់លោកអ្នកដែរ»។

បើតាមលោក ប៉ែន ចំរុង នៅក្នុងសាច់រឿង «ភូមិគ្រឹះម្លិះ» បានបង្កប់នូវអាថ៌កំបាំង កំប្លែង និងឃាតកម្មជាដើម។ ជាមួយគ្នានេះ លោកក៏បានអរគុណដល់អ្នកគាំទ្រលោកកន្លងមក ហើយលោកសង្ឃឹមថា ភាពយន្តមួយនេះនឹងទទួលបានការគាំទ្រច្រើនផងដែរ៕

ដោយ៖ គេន ម៉ាលិះ

The post ធ្លាប់តែជាតួសម្តែង!​​ ប៉ែន ចំរុង ចេញស្នាដៃផលិតរឿងជាលើកដំបូង ក្នុងភាពយន្ត «ភូមិគ្រឹះម្លិះ» appeared first on Kampuchea Thmey Daily.

លោក MICHAEL W. FAHEY ផលិតករ​ភាពយន្ត​ពី​ក្រុមហ៊ុន Bright Bay Creative និងសហការី បានលើកឡើងថា ដោយសារតែ​មើលឃើញ​កម្ពុជា​ធ្លាប់​ទទួល​បដិសណ្ឋារកិច្ច​ល្អ​ទាំងភ្ញៀវជាតិ និងអន្តរជាតិតូច​ធំ និង​មាន​សុខសន្តិភាព សុវត្ថិភាព​ដ៏​ល្អ រួម​ទាំងភាព​ល្បីល្បាញជាបេតិកភណ្ឌពិភពលោក និងភាព​រួសរាយរាក់​ទាក់របស់ប្រជាជនកម្ពុជា ទើប​លោក​គោរពស្នើសុំអនុសាសន៍ពីលោក ហួត ហាក់ រដ្ឋមន្ត្រីក្រសួងទេសចរណ៍ ដើម្បីគាំទ្រ​កិច្ចសហការគាំទ្រលើ​គម្រោងថតវីដេអូបែបផ្សងព្រេងនៅប្រាសាទអង្គរវត្ត និងតំបន់ផ្សេងៗទៀត ក្នុងខេត្តសៀមរាបនាពេលខាងមុខ​។

ជាលទ្ធផលនៃជំនួបនៅថ្ងៃទី២៧ ខែមីនា ឆ្នាំ២០២៥នេះ ដែលមានសារៈសំខាន់ និងប្រកបដោយផ្លែផ្កានេះ លោករដ្ឋមន្ត្រី ហួត ហាក់ បានកោតសរសើរ និងវាយតម្លៃខ្ពស់ ចំពោះគំរោងវីដេអូ និងការសម្រេចចិត្តដ៏ត្រឹមត្រូវរបស់ក្រុមហ៊ុនដែលបានជ្រើសរើសប្រទេសកម្ពុជា ជាទីតាំងថត និងសូមស្វាគមន៍ក្នុងការផ្តល់កិច្ចសហការគាំទ្រដល់ក្រុមហ៊ុន។

សូមបញ្ជាក់ថា ក្រុម​ហ៊ុន​Bright Bay Creative ក៏មាន​ដៃគូក្រុមហ៊ុន​សហការ​ជា​ច្រើន​ដូចជា NETFLIX, Youtube, Discovery, NFLPA, IMG, Facebook, COMPLEX, Music Television(MTV) , FOX Sport និង ដៃគូសហការជាច្រើនទៀត ដែល​រាល់​វីដេអូ​នីមួយៗ ទទួលបានការទស្សនា និង​តាម​ដាន​ជិត២០០លាននាក់៕

កែសម្រួលដោយ ៖ នាគព័ន្ធ

The post ផលិត​ករភាពយន្តខ្នាត​ធំ​ដ៏​ល្បី​របស់​បរទេស​ ស្នើយក​ប្រទេស​កម្ពុជា ពិសេស​តំបន់​អង្គរវត្ត​ជា​ទីតាំង​ផលិតវិដេអូ appeared first on Kampuchea Thmey Daily.

ការ​លើកឡើង​របស់លោក  លៀក លីដា នេះ​ធ្វើឡើងបន្ទាប់ពី​សង្កេតឃើញ​មានទស្សនៈ​របស់ទស្សនិកជន​មួយ​ចំនួន​បានធ្វើការរិះគន់​ដល់​វិស័យ​ភាពយន្ត​របស់​ជាតិ​ថា គ្មានគុណភាព ឬមិនល្អមើល​ដូច​ភាពយន្តរបស់បរទេស។ ត្រង់ចំណុចនេះ​ត្រូវ​បាន​លោក លៀក លីដា បានសង្កត់ធ្ងន់ថា ជាការ​មិនឲ្យតម្លៃ​លើស្នា​ដៃ​ផលិតករក្នុងស្រុក។

ផលិតករភាព​យន្តល្បីឈ្មោះ​លោក លៀក លីដា បាន​បញ្ជាក់ភ្ជាប់ និងខ្លឹមសារ​ដូច្នេះ​ថា “សូមចូលរួម​ការពារវិស័យ​ភាពយន្តជាតិ​របស់យើង កុំ​ឲ្យធ្លាក់ចូលនៅក្នុងទស្សនៈ​ត្រីស្អុយមួយ គឺស្អុយមួយ​កន្ត្រក។ ព្រោះទស្សនៈនេះ អាចធ្វើឲ្យវិស័យមួយ​ដែលកំពុងតែត្រូវការការគាំពារ​អាចស្លាប់ទៅវិញបាន“។

លោក លៀក លីដា បាន​និយាយទៀតថា ដើម្បីការពារវិស័យភាពយន្ត​ជាតិ​យើង​ទាំងមូល​គឺ សូមបងប្អូនប្រើ​ពាក្យ​ពេចន៍​ឲ្យ​ចំគោលដៅ​ក្រោយ​ពេលបងប្អូនទស្សនាភាពយន្តជាតិ​របស់​​យើង​គួរតែប្រើពាក្យថា​រឿងរបស់ផលិតកម្មមួយនេះ​អត់ល្អមើល ឬរឿងរបស់ផលិតកម្មមួយនោះល្អមើល។ លោកបន្តថា សូមបង​ប្អូនពេល​បាន​ទស្សនា និងចេញពី​រោងកុន​មកវិញនិយាយ​ពាក្យរិះគន់ ឬបង្អាប់​ថារឿងខ្មែរ​ឥឡូវអត់ល្អ​មើល ឬមើលមិនកើតទេ។

លៀក លីដា បន្ថែមទៀតថា បើសិនមានការរិះគន់បែបនេះគឺ ធ្វើឲ្យប៉ះពាល់​ដល់​អារម្មណ៍របស់​ផលិតករ​ដទៃទៀតដែល​ពួកគាត់បាន​ខិតខំផលិត ជាពិសេសទៀតគឺ ធ្វើឲ្យប៉ះពាល់ដល់​វិស័យភាពយន្តជាតិ​យើង​ទាំងមូលតែម្តង៕

អត្ថបទ៖ ចាន់រ៉ា

The post លៀក លីដា ស្នើរួមគ្នាការពារវិស័យភាពយន្តជាតិ កុំឲ្យធ្លាក់ក្នុងទស្សនៈ ត្រីស្អុយមួយ ស្អុយមួយកន្ត្រក appeared first on Kampuchea Thmey Daily.

ការលើក​ឡើង​របស់​លោក លៀក លីដា នេះ​ស្រប​ពេល​ដែល​រឿង “ប្រវត្តិ​ស្នេហ៍​នាង​នាថ” កំពុង​ទទួល​បាន​ការ​គាំទ្រ និង​ចាប់​អារម្មណ៍​ខ្លាំង​ពី​ទស្សនិកជន​គ្រប់​មជ្ឈដ្ឋាន ​បន្ទាប់​រឿងនេះ​ត្រូវបាន​ធ្វើពិធី​សម្ពោធ​ដាក់​បញ្ចាំង​កាល​ពីថ្មីៗ​កន្លង​មកនេះ។ រឿង«ប្រវត្តិ​ស្នេហ៍​នាងនាថ» គឺជា​ភាព​យន្តខ្នាតធំ​ដែល​បង្ហាញ​ពី​អត្តសញ្ញាណជាតិ​ខ្មែរ និងចាយទុនផលិត​រហូតជាង ១លានដុល្លារ​ឯណ្ណោះ។

លោក លៀក លីដា បាន​ឲ្យ​ដឹង​ថា“តាមរយៈ​រឿង​ប្រវត្តិស្នេហ៍​នាង​នាថ គឺខ្ញុំពិត​ជា​មាន​ចេតនា​ចង់​ឲ្យអ្នក​ទស្សនា​យល់ច្បាស់​ពីតម្លៃនៃសន្តិភាព នឹង​យល់ច្បាស់​ពីការ​លះបង់​សាច់ស្រស់ ឈាមស្រស់រ​បស់មេទ័ព​ដើម្បីការពារជាតិ​ ជាពិសេស​គឺថ្នាក់​ដឹកនាំ​គ្រប់រូប​ គ្រប់ជាន់ថ្នាក់​ដែល​លោក​បាន​ខំ​តស៊ូរក​សន្តិភាព​ជូនប្រទេសកម្ពុជា“។

ផលិតករ​ខ្មែររូប​នេះបាន​លើកឡើងទៀតថា លោកក៏មាន​ចិត្តគោរព​អញ្ជើញថ្នាក់ដឹក​នាំគ្រប់ជាន់ថ្នាក់​មកទស្សនា​រឿងរឿង «ប្រវត្តិ​ស្នេហ៍​នាងនាថ» ដោយផ្ទាល់ផងដែរ ប៉ុន្តែមិនដឹងធ្វើតាមណា។ លោក លៀក លីដា​ ធ្លាប់បញ្ជាក់ថា រឿង​«ប្រវត្តិស្នេហ៍​នាងនាថ » ជារឿង ខ្មែរពិត​ៗមិនបាន​ចម្លង​មកពីប្រទេសណាមួយឡើយ។

គួររម្លឹកថា កន្លងមក​លោក លៀក លីដា បាននិយាយថា រឿង​«ប្រវត្តិស្នេហ៍នាងនាថ» គឺត្រូវបានចងក្រង និងប្រមូលនៅអ្វីដែលដូនតាយើង​បានបន្សល់ទុក​ឲ្យ​ ហើយនៅក្នុងសាច់រឿងនេះ​ទាំងមូលបាន​បង្កប់នូវ​សិល្បៈ​ វប្បធម៌ របស់​ខ្មែរយើង ​ជា​ពិសេស​ខ្លឹមសារនៃការអប់រំ និងតម្លៃនៃសន្តិភាព៕

អត្ថបទ៖ ចាន់រ៉ា

The post លៀក លីដា ៖ តាមរយៈរឿង”ប្រវត្តិស្នេហ៍នាងនាថ” ខ្ញុំមានចេតនាចង់ឲ្យអ្នកទស្សនាយល់ច្បាស់ពីតម្លៃសន្តិភាព appeared first on Kampuchea Thmey Daily.

ដើម្បី​លើកស្ទួយ​វិស័យ​ភាពយន្ត​ជាតិ​ឲ្យ​កាន់​តែ​ល្បី រន្ទឺ​ទៅ​កាន់​ពិភព​លោក​ផលិតកររឿង ” ប្រវត្តិ​ស្នេហ៍​នាង នាថ” លោក លៀក លីដា ​បាន​ចេញ​មុខ​មក​អំពាវនាវ​ជា​ថ្មី​ម្តង​ទៀត​ដល់​មហាជន និង​យុវជន​ត្រូវ​រួមគ្នា​គាំទ្រ​ស្នាដៃ​ភាពយន្ត​ជាតិ​ក្នុង​ការ​រួម​ចំណែក​ផ្សព្វផ្សាយ​វប្បធម៌​ខ្មែរ​បន្ថែម​ទៀត។

លោក លៀក លីដា បាន​ស្នើ​ទៅកាន់​អ្នកគាំទ្រ​ថា “វាមិន​ពិបាក​ទេ បើ​ប្រជាពលរដ្ឋ​ខ្មែរ​ចង់ចូលរួម​ក្នុង​ការជួយ​ផ្សព្វផ្សាយ​វប្បធម៌​របស់​យើងពួក ខ្ញុំបានចូលរួមចំណែក​រៀបចំ​ចងក្រង​រួចហើយ បង​ប្អូនគ្រាន់​តែជួយ ចែកចាយបន្តជាការស្រេច“។ លោកលើកឡើងដែរថា តួអ្នកភូមិ​ក្នុងរឿង ប្រវត្តិស្នេហ៍នាងនាថ បាន​មកដល់​ទីក្រុងភ្នំពេញ។ បងប្អូនណា​ខ្លះ​បានជួបពួកគាត់?

អ្នក​ដឹកនាំ​សម្តែង​លោក លៀក លីដា បាន​បញ្ជាក់​បន្ថែមថា “ខ្ញុំបាទ និងក្រុមការងារ ld បានចូលរួម​ចំណែក​ផ្សព្វផ្សាយវប្បធម៌​​របស់​ប្រជាជន​ខ្មែរ​យើង តាមរយៈ​ភាពយន្ត​របស់យើងខ្ញុំ“។

គួរឲ្យដឹងដែរថា លោក លៀក លីដា ដែលជា​ផលិតករខ្មែរ និង​ជាអ្នកដឹកនាំ​សម្តែងល្បីឈ្មោះ ខណៈ​ដែលភាពយន្តខ្នាត​ធំរឿង” ប្រវត្តិស្នេហ៍​នាងនាថ” កំពុងទទួល​បាន​ការ​ចាប់​អារម្មណ៍​គាំទ្រពី​ទស្សនិកជន​ លោក​អំពាវនាវ​ដល់​មហាជន​ខ្មែរ​ចូលរួម​ថែរក្សា​ ស្រលាញ់វប្បធម៌ និង​គាំទ្រអ្នកផលិតផងដែរ៕

អត្ថបទ៖ ចាន់រ៉ា

The post លោក លៀក លីដា អំពាវនាវគាំទ្រស្នាដៃភាពយន្តជាតិ ដើម្បីរួមចំណែកផ្សព្វផ្សាយវប្បធម៌ខ្មែរ appeared first on Kampuchea Thmey Daily.

ជាមួយ​គ្នា​នេះ​ដែរ ផលិតករ លោក លៀក លីដា ក៏បាន​ស្នើ​ដល់​ក្រសួង ឬ​ស្ថាប័ន​ពាក់ព័ន្ធ គួរ​ចេញ​វិធានការ​ទប់ស្កាត់ ឬ​កាត់បន្ថយ​ផង​ដែរ។ ជាថ្មី​ម្តង​ទៀត លោក លីដា បាន​ចេញ​មក​បញ្ជាក់​ទៀត​ថា វិស័យ​សិល្បៈ គឺជា​ផ្លូវ​យ៉ាង​សំខាន់ ដើម្បី Promote ប្រទេស ទៅ​កាន់​ឆាក​អន្តរជាតិ។

ផលិតករ​លោក លៀក លីដា បាន​លើក​ឡើង​ថា «ឥទ្ធិពល នៃ​វិស័យ​សិល្បៈ បាន​ធ្វើ​ឲ្យ​ទេសចរ​ហូរ​ចូល​ប្រទេស​ថៃ​យ៉ាង​គំហុក ក្រោយពី កញ្ញា Lisa សមាជិក​ក្រុម black pink បាន​ចេញ​មក​ថត​បទ​ចម្រៀង​នៅ china town ប្រទេស​ថៃ។ សូម​ថ្នាក់ដឹកនាំ និង​អ្នក​ពាក់ព័ន្ធ​វិស័យ​សិល្បៈ​ទាំងមូល នៃ​ប្រទេស​យើង មេត្តា​យកចិត្តទុកដាក់ និង​ជំរុញ​បន្ថែម​នូវ​វិស័យ​សិល្បៈ​គ្រប់​ទម្រង់​របស់​ប្រទេស​យើង»។

លោក លៀក លីដា និយាយ​បន្ថែម​ថា «វិស័យ​សិល្បៈ គឺជា​ផ្លូវ​យ៉ាង​សំខាន់ ដើម្បី Promote ប្រទេស​យើង​ទៅកាន់​ឆាក​អន្តរជាតិ Congratulation to Ms Lisa (ក្រសួងទេសចរណ៍ ក្រសួង​វប្បធម៌)»។

ប្រាកដ​ណាស់ បច្ចុប្បន្ន​គេ​ក៏​សង្កេតឃើញ​មាន​ផលិតករ​ភាពយន្ត​មួយ​ចំនួន បាន​ប្រកាស​ពី​ការ​ក្ស័យធន​រហូត​បិទទ្វារ​ផលិតកម្ម និង​ខ្លះ​បាន​ដកឃ្លា​ពី​ការ​ផលិត​រឿង ដោយ​យក​ពេល​ទៅ​រក​ជំនួញ​ផ្សេងៗ គ្នា ដើម្បី​ទ្រទ្រង់​សេដ្ឋកិច្ច​គ្រួសារ។

ចំពោះ​ការ​ប្រកាស​ក្ស័យធន ឬ​ឈាន​ដល់​ការ​បិទទ្វារ​ផលិតកម្ម​នេះ មាន​ការ​លើក​ឡើង​ថា ដោយសារ​កត្តា​ខ្វះ​ការ​គាំទ្រ​ពី​សំណាក់​មជ្ឈដ្ឋាន​ពលរដ្ឋ​ខ្មែរ ខណៈ​ភាពយន្ត​ខ្លះ​ត្រូវ​ចំណាយ​ទុន​រហូត​ខ្ទង់​រាប់​សែន​ដុល្លារ​ក្នុង​ការ​ផលិត ប៉ុន្តែ​នៅ​ពេល​ចាក់​បញ្ចាំង​តាម​រោងកុន គឺ​ទទួល​បាន​ផល​ចំណេញ​មិន​ស្មើ​ដើម​វិញ​ទេ។ នេះ​ជា​ហេតុ​ដែល​ធ្វើ​ឲ្យ​ផលិតករ​ខ្លះ​ប្រកាស​បិទទ្វារ​តែម្ដង៕

អត្ថបទ ៖ ចាន់រ៉ា

The post លៀក លីដា ចាត់ទុកវិស័យសិល្បៈជាផ្លូវយ៉ាងសំខាន់ ដើម្បី Promote ប្រទេស ទៅកាន់ឆាកអន្តរជាតិ appeared first on Kampuchea Thmey Daily.

ផលិតករ​ភាពយន្ត​ខ្មែរ​រូប​នេះ​កន្លង​មក​បាន​អះអាង​ថា​ នៅ​ក្នុង​សាច់រឿងរឿង “ប្រវត្តិស្នេហ៍នាងនាថ”​ គឺ​បាន​បញ្ចូល​ផងដែរ​នូវវប្បធម៌​ អរិយធម៌​ដែល​គេប្រើ​ទូកង​របស់ខ្មែរដើម្បីទៅធ្វើ​សឹកសង្គ្រាមកាលពីសម័យដើម។លោកថា វប្បធម៌​អរិយធម៌​ខ្មែរ​ត្រូវបានដាក់​បញ្ចូល​ទៅក្នុង​កុន​មួយ​នេះគឺ (រឿងប្រវត្តិស្នេហ៍នាងនាថ )។

ឆ្លើយតប​ចំពោះការចុះផ្សាយរបស់សារព័ត៌មានថៃមួយនៅថ្ងៃទី២៦ ខែមិថុនា ឆ្នាំ២០២៤នេះ លោក លៀក លីដា បានបញ្ជាក់ទាំងហួសចិត្តថា សារព័ត៌មានរបស់ប្រទេសថៃធំប៉ុណ្ណឹងដែរ បែរជាមិនចេះវែកញែកប្រភេទរឿង ថាចម្លង ឬក៏ដូចរឿងខ្ញុំ ជាប្រភេទរឿងស្នេហា​កំប្លែងអត់មានខ្មោចទេ។ 

លោក លៀក លីដា និយាយទៀយថា«​ម្តេចបានថា​ដូច ឬចម្លងរឿងខ្មោចកំប្លែងរបស់អ្នកឯងកើត រឿង​ខ្ញុំបាន​បញ្ចូលទៅដោយ​វប្បធម៌ អរិយធម៌ និង​សារអប់រំដ៏ល្អ​ផូរផង់​របស់​ប្រទេសកម្ពុជា ម្តេចបានថា ដូចរឿងខ្មោច​អាឡាក់អាឡែត​របស់អ្នកឯង​ទាំងអ្នកឯង​មិនទាន់បានមើលរឿងខ្ញុំ​ផងអរគុណ​សម្រាប់ការតាមដាន​ការងាររបស់ខ្ញុំ»។

កន្លងមក​លោក លៀក លីដា ក៏ធ្លាប់​បាន​បញ្ជាក់​ហើយថា ​រឿង «ប្រវត្តិស្នេហ៍នាងនាថ» គឺត្រូវបានចងក្រង និងប្រមូលនៅអ្វីដែលដូនតា​យើងបានបន្សល់​ទុកឲ្យ​នៅក្នុងសាច់រឿងនេះទាំងមូលបាន​បង្កប់នូវសិល្បៈ​វប្បធម៌របស់ខ្មែរ ជាពិសេសខ្លឹមសារនៃការអប់រំ និង​តម្លៃ​នៃ​សន្តិភាព។ លោកថា បើគេថា​យើងcopy ជារឿងរបស់គេ យើង​ឈប់នាំគ្នាឈ្លោះ ឈប់នាំគ្នា​ខឹង​ម្យ៉ាង​ទៀតលោកក៏​បញ្ជាក់ជំហរគ្មានគោលការណ៍​ដូចចំណងជើងរឿង”ប្រវត្តិស្នេហ៍នាងនាថ”តាមការស្នើសុំបរទេសណាទេ៕

អត្ថបទ៖ ចាន់រ៉ា

The post លៀក លីដា ប្រតិកម្ម ក្រោយសារព័ត៌មានថៃមួយផ្សាយថា រឿង«ប្រវត្តិស្នេហ៍នាងនាថ» លួចចម្លងរបស់ខ្លួន appeared first on Kampuchea Thmey Daily.