ជីវិតកម្សាន្ដ

លៀក លីដា ចាត់ទុកវិស័យសិល្បៈជាផ្លូវយ៉ាងសំខាន់ ដើម្បី Promote ប្រទេស ទៅកាន់ឆាកអន្តរជាតិ

បានផុស

២ years មុន

នៅ

ថ្ងៃអង្គារ ៩ កក្កដា ២០២៤

ដោយ

កាលពីថ្មីៗ កន្លងទៅ គេចាំបានថា លោក លៀក លីដា ដែលគេស្គាល់ជាផលិតករភាពយន្ត និងម្ចាស់ផលិតកម្ម LD ធ្លាប់លើកឡើងអំពីក្តីព្រួយបារម្ភលើវិស័យភាពយន្តជាតិ អាចនឹងដួលសាជាថ្មី ខណៈមើលឃើញថា ចំនួន នៃភាពយន្តបរទេសបានសម្រុកហូរចូលច្រើន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយគ្នានេះដែរ ផលិតករ លោក លៀក លីដា ក៏បានស្នើដល់ក្រសួង ឬស្ថាប័នពាក់ព័ន្ធ គួរចេញវិធានការទប់ស្កាត់ ឬកាត់បន្ថយផងដែរ។ ជាថ្មីម្តងទៀត លោក លីដា បានចេញមកបញ្ជាក់ទៀតថា វិស័យសិល្បៈ គឺជាផ្លូវយ៉ាងសំខាន់ ដើម្បី Promote ប្រទេស ទៅកាន់ឆាកអន្តរជាតិ។

ផលិតករលោក លៀក លីដា បានលើកឡើងថា «ឥទ្ធិពល នៃវិស័យសិល្បៈ បានធ្វើឲ្យទេសចរហូរចូលប្រទេសថៃយ៉ាងគំហុក ក្រោយពី កញ្ញា Lisa សមាជិកក្រុម black pink បានចេញមកថតបទចម្រៀងនៅ china town ប្រទេសថៃ។ សូមថ្នាក់ដឹកនាំ និងអ្នកពាក់ព័ន្ធវិស័យសិល្បៈទាំងមូល នៃប្រទេសយើង មេត្តាយកចិត្តទុកដាក់ និងជំរុញបន្ថែមនូវវិស័យសិល្បៈគ្រប់ទម្រង់របស់ប្រទេសយើង»។

លោក លៀក លីដា និយាយបន្ថែមថា «វិស័យសិល្បៈ គឺជាផ្លូវយ៉ាងសំខាន់ ដើម្បី Promote ប្រទេសយើងទៅកាន់ឆាកអន្តរជាតិ Congratulation to Ms Lisa (ក្រសួងទេសចរណ៍ ក្រសួងវប្បធម៌)»។

ប្រាកដណាស់ បច្ចុប្បន្នគេក៏សង្កេតឃើញមានផលិតករភាពយន្តមួយចំនួន បានប្រកាសពីការក្ស័យធនរហូតបិទទ្វារផលិតកម្ម និងខ្លះបានដកឃ្លាពីការផលិតរឿង ដោយយកពេលទៅរកជំនួញផ្សេងៗ គ្នា ដើម្បីទ្រទ្រង់សេដ្ឋកិច្ចគ្រួសារ។

ចំពោះការប្រកាសក្ស័យធន ឬឈានដល់ការបិទទ្វារផលិតកម្មនេះ មានការលើកឡើងថា ដោយសារកត្តាខ្វះការគាំទ្រពីសំណាក់មជ្ឈដ្ឋានពលរដ្ឋខ្មែរ ខណៈភាពយន្តខ្លះត្រូវចំណាយទុនរហូតខ្ទង់រាប់សែនដុល្លារក្នុងការផលិត ប៉ុន្តែនៅពេលចាក់បញ្ចាំងតាមរោងកុន គឺទទួលបានផលចំណេញមិនស្មើដើមវិញទេ។ នេះជាហេតុដែលធ្វើឲ្យផលិតករខ្លះប្រកាសបិទទ្វារតែម្ដង៕

អត្ថបទ ៖ ចាន់រ៉ា