ផ្លូវជាតិលេខ ៧ Archives - Kampuchea Thmey Daily

តាមស្ថានីយជញ្ចីងថ្លឹងរថយន្តទូទាំងប្រទេស នឹងបំពាក់ប្រព័ន្ធបច្ចេកវិទ្យា AI គ្រប់គ្រងការដឹកជញ្ជូនលើសទម្ងន់

Dy Bunnara — Wed, 08 Jul 2026 02:35:47 +0000

ដើម្បីថែរក្សានិងការពារហេដ្ឋារចនាសម្ព័ន្ធផ្លូវថ្នល់ទូទាំងប្រទេស ក្រសួងសាធារណការ និងដឹកជញ្ជូន បានកំពុងជំរុញការប្រើប្រាស់បច្ចេកវិទ្យាទំនើប ដើម្បីពង្រឹងគ្រប់គ្រងការដឹកជញ្ជូនលើសទម្ងន់។

ថ្លែងនៅក្នុងពិធីសម្ពោធដាក់ឲ្យប្រើប្រាស់កំណាត់ផ្លូវជាតិលេខ ៧ ពីប្រជុំជនស្គន់ទៅក្រុងកំពង់ចាម លោក ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូនបានឲ្យដឹងថា ក្នុងគោលដៅទប់ស្កាត់ការដឹកជញ្ជូនលើសទម្ងន់ដែលនាំឲ្យខូចខាតផ្លូវថ្នល់ ក្រសួងសាធារណការ និងដឹកជញ្ជូន កំពុងរៀបចំបង្កើតប្រព័ន្ធគ្រប់គ្រងការដឹកជញ្ជូនលើសទម្ងន់ឆ្លាតវៃ និងស្វ័យប្រវត្តិកម្ម តាមរយៈការបំពាក់ប្រព័ន្ធអ៊ីនធឺណិត កាមេរ៉ា CCTV និងកាមេរ៉ា AI ដើម្បីថែរក្សា និងការពារហេដ្ឋារចនាសម្ព័ន្ធផ្លូវថ្នល់ទូទាំងប្រទេស។

បន្ថែមពីនេះ លោករដ្ឋមន្រ្តីបានបញ្ជាក់ថា ក្រសួងក៏នឹងលើកកម្រិតប្រព័ន្ធជញ្ជីងបច្ចុប្បន្នឱ្យទៅជាប្រព័ន្ធជញ្ជីងស្វ័យប្រវត្តដែលថ្លឹងរថយន្តក្នុងល្បឿនយឺត ដើម្បីពង្រឹងការត្រួតពិនិត្យឲ្យកាន់តែមានប្រសិទ្ធភាពថែមទៀត។

នៅក្នុងឱកាសដឹកនាំមន្រ្តីបច្ចេកទេសចុះពិនិត្យសកម្មភាពត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់នៅស្ថានីយថ្លឹងរថយន្តព្រៃព្នៅ ស្ថិតនៅទីតាំងចំណុចផ្លូវលេខ ៣៨៤ ភូមិភ្លយ សង្កាត់តាកោ ក្រុងព្រៃវែង ខេត្តព្រៃវែងកាលពីពេលថ្មីៗនេះ លោក ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានប្រកាសដាក់ចេញនូវវិធានការជាបន្ទាន់ ក្រោយរកឃើញជាក់ស្តែងនូវរថយន្តដឹកទំនិញលើសទម្ងន់កម្រិតកំណត់រហូតដល់ទៅ ៨៣ តោន។

ជាមួយការប្រកាសដាក់ចេញចំណាត់ការឆ្លើយតបភ្លាមៗ លោករដ្ឋមន្រ្តីបានបញ្ជាឲ្យរៀបចំដំឡើងប្រព័ន្ធកាមេរ៉ាសុវត្ថិភាព CCTV នៅគ្រប់ស្ថានីយជញ្ជីងអចល័តទាំងអស់ទាំង ៤៣ ទូទាំងប្រទេស ដែលប្រព័ន្ធនេះនឹងតភ្ជាប់មកប្រព័ន្ធការិយាល័យកណ្តាលរបស់ក្រសួងសាធារណការ និងដឹកជញ្ជូន និងតភ្ជាប់ដោយផ្ទាល់មកកាន់ទូរសព្ទដៃរបស់ថ្នាក់ដឹកនាំ ដើម្បីងាយស្រួលក្នុងការត្រួតពិនិត្យបន្ថែម។

លោកបានព្រមានពីការអនុវត្តអភិក្រមវះកាត់លើមន្ត្រីពាក់ព័ន្ធ ប្រសិនបើរកឃើញមានមន្ត្រីណាម្នាក់ជាប់ពាក់ព័ន្ធ ឬចូលរួមសកម្មភាពអនុញ្ញាតឱ្យមានការដឹកជញ្ជូនលើសទម្ងន់ ដោយយកអភិក្រមវះកាត់មកអនុវត្តតែម្តងដោយគ្មានការលើកលែងឡើយ។

ពាក់ព័ន្ធគម្រោងគម្រោងស្តារ និងលើកកម្រិតគុណភាពផ្លូវជាតិលេខ ៧ ពីប្រជុំជនស្គន់ដល់ក្រុងកំពង់ចាម រដ្ឋមន្ត្រីក្រសួងសាធារណការនិងដឹកជញ្ជូនបានបញ្ជាក់ថា កាលពីមុនកំណាត់ផ្លូវជាតិលេខ ៧ ពីប្រជុំជនស្គន់ដល់ក្រុងកំពង់ចាម ធ្លាប់ត្រូវបានស្តារ និងស្ថាបនាឡើងវិញម្តងរួចមកហើយកាលពីឆ្នាំ ១៩៩៩ ជាប្រភេទបេតុងកៅស៊ូ ដែលមានទទឹង ៧ ម៉ែត្រ និង ៩ ម៉ែត្រ។

កាលនោះ កំណាត់ផ្លូវនេះរួមជាមួយស្ពានមិត្តភាពកម្ពុជា-ជប៉ុន (ស្ពានគីហ្សូណា) ត្រូវបានសាងសង់ឡើងក្រោមជំនួយឥតសំណងរបស់រដ្ឋាភិបាលជប៉ុន។

លោករដ្ឋមន្រ្តីបានលើកឡើងពីមូលហេតុ ក្នុងជំរុញពង្រីកនិងលើកកម្ពស់គុណភាពផ្លូវនេះឡើងវិញឱ្យបានធំទូលាយ និងល្អប្រសើរជាងមុន ដោយផ្អែកលើការសិក្សាអំពីកំណើនដឹកជញ្ជូន ទំហំចរាចរណ៍ដែលកើនឡើងយ៉ាងខ្លាំង ក៏ដូចជាបញ្ហាកកស្ទះ និងគ្រោះថ្នាក់ចរាចរណ៍ដែលកើតឡើងជាញឹកញាប់។

គម្រោងសាងសង់កំណាត់ផ្លូវជាតិលេខ ៧ ពីប្រជុំជនស្គន់ទៅក្រុងកំពង់ចាម ត្រូវបានប្រកាសបើកការដ្ឋានសាងសង់ជាផ្លូវការកាលពីថ្ងៃទី ៩ ខែមករា ឆ្នាំ ២០២៣ ក្រោមអធិបតីភាពសម្តេចតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា។

ផ្លូវនេះមានប្រវែងសរុប ៤៥,៤៨៩ គីឡូម៉ែត្រ ស្ថាបនាជាប្រភេទផ្លូវក្រាលបេតុងកៅស៊ូ (AC) កម្រាស់ ៩ សង់ទីម៉ែត្រ បែងចែកចរាចរណ៍ មាន ៤ គន្លង (២ គន្លងទៅ និង ២ គន្លងមក) ដោយគន្លងនីមួយៗមានប្រវែង ៣,៧៥ ម៉ែត្រ និងមានសួនពុះចែកទ្រូងផ្លូវប្រវែង ១,៥ ម៉ែត្រ។

នៅលើកំណាត់ផ្លូវនេះក៏មានការសាងសង់ស្ពានសរុប ៨ កន្លែង រួមបញ្ចូលទាំងការសាងសង់ស្ពានថ្មីចំនួន ១ កន្លែង ប្រវែង ៤០ ម៉ែត្រ និងទទឹង ២៤ ម៉ែត្រ និងស្ពានថ្មីចំនួន ៦ កន្លែងផ្សេងទៀតមានប្រវែងសរុប ១០៦ ម៉ែត្រ។

នៅលើគម្រោងផ្លូវនេះ ក៏មានសាងសង់ស្ថានីយថ្លឹងរថយន្តដឹកជញ្ជូនលើសទម្ងន់កំណត់ចំនួន ២ កន្លែង។ ថែមទាំងបំពាក់ភ្លើងសញ្ញាចរាចរណ៍ចំនួន ៤ កន្លែង និងបង្គោលបញ្ចេញសំឡេងសម្រាប់ជនពិការឆ្លងកាត់ចំនួន ៨ បង្គោល។

ការស្ថាបនាផ្លូវនេះបានប្រើប្រាស់រយៈពេលសាងសង់ចំនួន ២៧ ខែ លឿនជាងផែនការគ្រោងទុកចំនួន ១៥ ខែ ដែលចំណាយសរុបប្រមាណជាង ១១៧ លានដុល្លារអាមេរិកក្រោមឥណទានសម្បទានពីរដ្ឋាភិបាលចិន រួមជាមួយថវិកាបដិភាគរបស់រាជរដ្ឋាភិបាលកម្ពុជា សម្រាប់ដោះស្រាយផលប៉ះពាល់ ការបោសសម្អាតមីន យុទ្ធភណ្ឌមិនទាន់ផ្ទុះ និងពន្ធអាករផ្សេងៗ។

ផ្លូវជាតិលេខ ៧ នេះ ជាសរសៃឈាមសេដ្ឋកិច្ចដ៏សំខាន់ដែលតភ្ជាប់ជាមួយបណ្តាញផ្លូវជាច្រើនឆ្ពោះទៅកាន់រាជធានី និងខេត្ត។ ចំណុចចាប់ផ្តើមផ្លូវនេះតភ្ជាប់ជាមួយផ្លូវជាតិលេខ ៦ ពីរង្វង់មូលស្គន់ ឆ្ពោះទៅរាជធានីភ្នំពេញ ខេត្តកំពង់ធំ និងខេត្តសៀមរាប និងតភ្ជាប់ត្រង់ចំណុចបំបែកស្រុកព្រៃឈរជាមួយផ្លូវជាតិលេខ ៦០ ភ្ជាប់ទៅកាន់ផ្លូវជាតិលេខ ៦ និងផ្លូវជាតិលេខ ៧០ ឆ្ពោះទៅកាន់ស្រុកកងមាស។

លើសពីនេះ វាតភ្ជាប់ជាមួយផ្លូវជាតិលេខ ៧១ ត្រង់ចំណុចបំបែកត្រើងទៅកាន់ស្រុកចម្ការលើ។ វាក៏តភ្ជាប់ជាមួយផ្លូវខេត្តលេខ ២២២ ឆ្ពោះទៅស្រុកស្ទឹងត្រង់ និងផ្លូវខេត្តលេខ ២២៣ ឆ្ពោះទៅស្រុកកងមាស និងខេត្តភូមិភាគឥសាន។

ការតភ្ជាប់ក្នុងក្របខណ្ឌអាស៊ាន ផ្លូវនេះជាផ្នែកមួយនៃផ្លូវហាយវេអាស៊ានលេខ ១១ (ASEAN Highway 11) ដែលតភ្ជាប់ជាមួយបណ្តាញផ្លូវសំខាន់ៗឆ្ពោះទៅកាន់ព្រំដែនកម្ពុជា និងបណ្តាញផ្លូវខេត្តនៃបណ្តាប្រទេសក្នុងមហាអនុតំបន់មេគង្គ។

ផ្លូវនេះដើរតួនាទីយ៉ាងសំខាន់ក្នុងការសម្រួលដល់ការធ្វើដំណើរ និងការដឹកជញ្ជូនកសិផល កសិ-ឧស្សាហកម្មនានា ដូចជា កៅស៊ូ ស្រូវ ដំឡូងមី ស្វាយចន្ទី ពោត ចេក អំពៅ ថ្នាំជក់ ធុរេន បន្លែ ផ្លែឈើ និងត្រីសាច់។ វាក៏ជួយលើកកម្ពស់វិស័យទេសចរណ៍ក្នុងខេត្តកំពង់ចាមដែលមានប្រាសាទបុរាណ និងរមណីយដ្ឋានធម្មជាតិ និងវប្បធម៌ប្រវត្តិសាស្ត្រផងដែរ។

ផលចំណេញផ្នែកសេដ្ឋកិច្ច បើតាមការសិក្សាវាយតម្លៃបានបញ្ជាក់ថា ផ្លូវនេះនឹងផ្ដល់អត្រាផលចំណេញផ្នែកសេដ្ឋកិច្ចរហូតដល់ ១៥,២៧% ដែលបង្ហាញពីការរួមចំណែកជំរុញកំណើនសេដ្ឋកិច្ចជាតិទៅថ្ងៃអនាគត៕

The post តាមស្ថានីយជញ្ចីងថ្លឹងរថយន្តទូទាំងប្រទេស នឹងបំពាក់ប្រព័ន្ធបច្ចេកវិទ្យា AI គ្រប់គ្រងការដឹកជញ្ជូនលើសទម្ងន់ appeared first on Kampuchea Thmey Daily.

ផ្លូវជាតិលេខ ៧ ពីស្គន់ទៅក្រុងកំពង់ចាម នឹងសម្ពោធដាក់ឲ្យប្រើប្រាស់ជាផ្លូវការនៅថ្ងៃ ០៧ ខែកក្កដា ខាងមុខនេះ

Dy Bunnara — Wed, 17 Jun 2026 03:04:35 +0000

បើតាមមន្រ្តីអ្នកនាំពាក្យក្រសួងសាធារណការនិងដឹកជញ្ជូនបានឲ្យដឹងថា កំណាត់ផ្លូវជាតិលេខ៧ ពីប្រជុំជនស្គន់ទៅក្រុងកំពង់ចាម គ្រោងសម្ពោធដាក់ឲ្យប្រើប្រាស់ជាផ្លូវការនៅថ្ងៃទី ០៧ ខែកក្កដា ឆ្នាំ ២០២៦ ដែលគ្រោងមានអ្នកចូលរួមប្រមាណ ៧ ពាន់នាក់។ នេះបើតាមលោក ផន រឹម មន្រ្តីអ្នកនាំពាក្យក្រសួងសាធារណការ និងដឹកជញ្ជូន។

កាលពីថ្ងៃទី១៥ ខែមិថុនា ឆ្នាំ២០២៦ ក្រុមការងារបច្ចេកទេសក្រសួងសាធារណការ និងដឹកជញ្ជូន ដឹកនាំដោយ ដឹកនាំដោយលោក លឹម ស៊ីដេនីន រដ្ឋលេខាធិការ និងជានាយកគម្រោង បានអញ្ជើញចុះត្រួតពិនិត្យលក្ខណៈបច្ចេកទេសលម្អិត និងធ្វើពិធីប្រគល់-ទទួលគម្រោងសាងសង់ និងពង្រីកផ្លូវជាតិលេខ៧ (ស្គន់-កំពង់ចាម) បន្ទាប់ពីគម្រោងនេះសម្រេចការអនុវត្តបានពេញលេញ ១០០% តាមផែនការកំណត់។

គម្រោងពង្រីក និងលើកកម្រិតផ្លូវជាតិលេខ ៧ មានប្រវែងសរុប ៤៥,៥០ គីឡូម៉ែត្រ ចាប់ពីទីប្រជុំជនស្គន់ ស្រុកជើងព្រៃ រហូតដល់ក្រុងកំពង់ចាម ខេត្តកំពង់ចាម ដែលជាផ្នែកមួយនៃបណ្តាញផ្លូវអាស៊ាន AH11។

កំណាត់ផ្លូវជាតិលេខ ៧ បានបើកការដ្ឋានសាងសង់កាលពីថ្ងៃទី០៩ ខែមករា ឆ្នាំ២០២៣ ដោយធ្វើការពង្រីកពីផ្លូវ ២ គន្លង ទៅជា ៤ គន្លង ដើម្បីឆ្លើយតបទៅនឹងកំណើនតម្រូវការចរាចរណ៍ និងការដឹកជញ្ជូនកាន់តែច្រើន។

ផ្លូវជាតិលេខ ៧ គឺជាខ្សែផ្លូវសេដ្ឋកិច្ចដ៏សំខាន់មួយ ដែលដើរតួនាទីជាសរសៃឈាមសេដ្ឋកិច្ចក្នុងការតភ្ជាប់តំបន់កណ្តាលទៅភាគឦសាននៃប្រទេស ជួយសម្រួលដល់ការធ្វើដំណើរ ការដឹកជញ្ជូនទំនិញ កសិផល និងផលិតផលឧស្សាហកម្ម ព្រមទាំងរួមចំណែកលើកកម្ពស់សកម្មភាពសេដ្ឋកិច្ច សង្គម និងការវិនិយោគនៅតាមបណ្តោយខ្សែផ្លូវ។

កំណាត់ផ្លូវជាតិលេខ៧ (ស្គន់-កំពង់ចាម) គ្រោងនឹងប្រារព្ធពិធីសម្ពោធដាក់ឱ្យប្រើប្រាស់ជាផ្លូវការនៅថ្ងៃទី០៧ ខែកក្កដា ឆ្នាំ២០២៦ ក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលជាសមិទ្ធផលថ្មីមួយបន្ថែមទៀតក្នុងការអភិវឌ្ឍហេដ្ឋារចនាសម្ព័ន្ធដឹកជញ្ជូនរបស់កម្ពុជា៕

The post ផ្លូវជាតិលេខ ៧ ពីស្គន់ទៅក្រុងកំពង់ចាម នឹងសម្ពោធដាក់ឲ្យប្រើប្រាស់ជាផ្លូវការនៅថ្ងៃ ០៧ ខែកក្កដា ខាងមុខនេះ appeared first on Kampuchea Thmey Daily.

គម្រោងពង្រីកផ្លូវជាតិលេខ ៧ ចំណាយជាង ១០០ លានដុល្លារ បញ្ចប់ការសាងសង់ទាំងស្រុង

អ៊ិន ពិសី — Mon, 15 Jun 2026 10:30:00 +0000

ក្រុមការងារបច្ចេកទេស នៃក្រសួងសាធារណការ និង ដឹកជញ្ជូន ចុះត្រួតពិនិត្យលក្ខណៈបច្ចេកទេសលម្អិត និង ប្រារព្ធពិធីប្រគល់-ទទួលគម្រោងពង្រីក និង លើកកម្រិតផ្លូវជាតិលេខ ៧ (ស្គន់-កំពង់ចាម) បន្ទាប់ពីគម្រោងនេះសម្រេចការអនុវត្តបានពេញលេញ ១០០% តាមផែនការកំណត់។

នាថ្ងៃទី ១៥ ខែមិថុនា ឆ្នាំ ២០២៦ នេះ ក្រុមការងារបច្ចេកទេស នៃក្រសួងសាធារណការ និង ដឹកជញ្ជូន ដឹកនាំដោយ លោក លឹម ស៊ីដេនីន រដ្ឋលេខាធិការក្រសួងសាធារណការ និង ដឹកជញ្ជូន និងជានាយកគម្រោង និង មានការចូលរួមពីមន្ត្រីជំនាញបច្ចេកទេស និងក្រុមហ៊ុនទទួលសាងសង់ បានអញ្ជើញចុះត្រួតពិនិត្យលក្ខណៈបច្ចេកទេសលម្អិត និង ប្រារព្ធពិធីប្រគល់-ទទួលគម្រោងសាងសង់ និង ពង្រីកផ្លូវជាតិលេខ ៧ (ស្គន់-កំពង់ចាម) បន្ទាប់ពីគម្រោងនេះសម្រេចការអនុវត្តបានពេញលេញ ១០០% តាមផែនការកំណត់។

លោក លឹម ស៊ីដេនីន បានឲ្យដឹងថា ការចុះពិនិត្យលើកនេះ ផ្តោតសំខាន់លើការត្រួតពិនិត្យគុណភាពសំណង់ លក្ខណៈបច្ចេកទេស សុវត្ថិភាពចរាចរណ៍ ការបំពាក់ផ្លាកសញ្ញា ប្រព័ន្ធបង្ហូរទឹក និង ហេដ្ឋារចនាសម្ព័ន្ធរងផ្សេងៗ ដើម្បីធានាថា គម្រោងមានគុណភាពរឹងមាំ សុវត្ថិភាព និង អាចប្រើប្រាស់បានយូរអង្វែង ស្របតាមបទដ្ឋានបច្ចេកទេសជាតិ និង អន្តរជាតិ។ ផ្លូវជាតិលេខ ៧ គឺជាខ្សែផ្លូវសេដ្ឋកិច្ចដ៏សំខាន់មួយ ដែលដើរតួនាទីជាសរសៃឈាមសេដ្ឋកិច្ចក្នុងការតភ្ជាប់តំបន់កណ្តាលទៅភាគឦសាន នៃប្រទេស ជួយសម្រួលដល់ការធ្វើដំណើរ ការដឹកជញ្ជូនទំនិញ កសិផល និង ផលិតផលឧស្សាហកម្ម ព្រមទាំងរួមចំណែកលើកកម្ពស់សកម្មភាពសេដ្ឋកិច្ច សង្គម និង ការវិនិយោគនៅតាមបណ្តោយខ្សែផ្លូវ។

លោករដ្ឋលេខាធិការ បន្តថា គម្រោងពង្រីក និង លើកកម្រិតផ្លូវជាតិលេខ ៧ នេះ មានប្រវែងសរុប ៤៥,៥០ គីឡូម៉ែត្រ ចាប់ពីទីប្រជុំជនស្គន់ ស្រុកជើងព្រៃ រហូតដល់ក្រុងកំពង់ចាម ខេត្តកំពង់ចាម ដែលជាផ្នែកមួយ នៃបណ្តាញផ្លូវអាស៊ាន AH11។ គម្រោងនេះ បានបើកការដ្ឋានសាងសង់កាលពីថ្ងៃទី ៩ ខែមករា ឆ្នាំ ២០២៣ ដោយធ្វើការពង្រីកពីផ្លូវ ២ គន្លង ទៅជា ៤ គន្លង ស្របតាមស្តង់ដារបច្ចេកទេស ដើម្បីឆ្លើយតបទៅនឹងកំណើនតម្រូវការចរាចរណ៍ និង ការដឹកជញ្ជូនកាន់តែច្រើន។

សូមជម្រាបថា កំណាត់ផ្លូវជាតិលេខ ៧ (ស្គន់-កំពង់ចាម) គ្រោងនឹងប្រារព្ធពិធីសម្ពោធដាក់ឲ្យប្រើប្រាស់ជាផ្លូវការនៅថ្ងៃទី ៧ ខែកក្កដា ឆ្នាំ ២០២៦ ក្រោមអធិបតីភាពដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលជាសមិទ្ធផលថ្មីមួយបន្ថែមទៀតក្នុងការអភិវឌ្ឍហេដ្ឋារចនាសម្ព័ន្ធដឹកជញ្ជូនរបស់កម្ពុជា៕
អត្ថបទ និង រូបភាព ៖ ឡេក ចាន់ពេជ្រ

The post គម្រោងពង្រីកផ្លូវជាតិលេខ ៧ ចំណាយជាង ១០០ លានដុល្លារ បញ្ចប់ការសាងសង់ទាំងស្រុង appeared first on Kampuchea Thmey Daily.

កំណាត់ផ្លូវជាតិលេខ ៧ ពីខេត្ដក្រចេះទៅព្រំដែនឡាវ ឈានចុះហត្ថលេខាសាងសង់លើកកម្រិតជាផ្លូវកៅស៊ូ AC

Dy Bunnara — Wed, 20 May 2026 10:12:39 +0000

កំណាត់ផ្លូវជាតិលេខ ៧ ដែលមានប្រវែង ៩៦,៦៣ គម លាតសន្ធឹងចាប់ពីខេត្ដក្រចេះទៅច្រកត្រពាំងក្រៀលជាប់ព្រំដែនឡាវ បានឈានទៅចុះហត្ថលេខាលើកិច្ចព្រមព្រៀងអនុវត្តគម្រោងធ្វើឱ្យប្រសើរឡើងវិញ ដែលនឹងត្រូវស្ថាបនាលើកកម្រិតពីផ្លូវកៅស៊ូ DBST ទៅជាផ្លូវក្រាលបេតុងកៅស៊ូ AC ដ៏មានគុណភាពខ្ពស់។

គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ ៧ ប៉ែកខាងជើងនេះ មានសក្ដានុពលបម្រើដល់វិស័យឡូជីស្ទីក ដែលនឹងជួយដល់ការជំរុញកំណើនសេដ្ឋកិច្ច និងការតភ្ជាប់នៅក្នុងតំបន់ភូមិភាគឦសាន ជាពិសេសតភ្ជាប់ទៅកាន់ព្រំដែនអន្ដរជាតិកម្ពុជា-ឡាវ (ត្រពាំងក្រៀល-ណងណុកខៀន)។

ផ្លូវជាតិលេខ ៧ គឺជាខ្សែផ្លូវជាតិមួយក្នុងចំណោមផ្លូវជាតិសំខាន់ៗរបស់ប្រទេសកម្ពុជា ដែលមានប្រវែងជាង ៥០០ គីឡូម៉ែត្រ លាតសន្ធឹងចាប់ចេញពីទីប្រជុំជនស្គន់ក្នុងខេត្តកំពង់ចាម ទៅច្រកទ្វារត្រពាំងក្រៀលជាប់ព្រំដែនជាមួយឡាវ។

បណ្តាញផ្លូវជាតិដ៏មានសក្តានុពលនេះ ត្រូវបានស្ថាបនាលើកកម្ពស់ជាផ្លូវ AC នៅលើកំណាត់មួយចំនួន។ ចាប់ពីរង្វង់មូលស្គន់ក្នុងស្រុកជើងព្រៃ រហូតដល់រង្វង់មូលស្ពានគីហ្សូណាទីរួមខេត្តកំពង់ចាម ដែលមានប្រវែង ៤៥,៤៨៩គ.ម បានកំពុងតែស្ថាបនាពង្រីកពី ២ គន្លងទៅ ៤ គន្លង ដែលគ្រោងបញ្ចប់នៅឆ្នាំ ២០២៦ នេះ។

ដោយឡែកកំណាត់ផ្លូវជាតិលេខ ៧ ពីរង្វង់មូលខ្លាស្ទុះក្នុងក្រុងក្រចេះ រហូតដល់ចំណុចគីឡូម៉ែត្រលេខ ៤២៤ ស្ថិតក្នុងភូមិអូរព្រះ ឃុំអូរគ្រៀង ស្រុកសំបូរ ចន្លោះ (គ.ម ៣៣១+២៥០ ដល់ គ.ម ៤២៤+៩៤០) ដែលមានប្រវែងជិត ៩៤ គីឡូម៉ែត្រ បានបញ្ចប់ការស្ថាបនាកែលម្អដោយក្រាលបេតុងកៅស៊ូ AC ក្រោមជំនួយឥតសំណងពីប្រទេសចិនដោយប្រើប្រាស់ថវិកាសាងសង់ប្រមាណជិត ៤០ លានដុល្លារ៕

The post កំណាត់ផ្លូវជាតិលេខ ៧ ពីខេត្ដក្រចេះទៅព្រំដែនឡាវ ឈានចុះហត្ថលេខាសាងសង់លើកកម្រិតជាផ្លូវកៅស៊ូ AC appeared first on Kampuchea Thmey Daily.

ផ្លូវជាតិលេខ ៧ ពង្រីក ៤ គន្លង ពីស្គន់ដល់ក្រុងកំពង់ចាមសម្រេចការស្ថាបនាបាន ៩៨%

Dy Bunnara — Wed, 06 May 2026 07:43:10 +0000

គម្រោងពង្រីក និងលើកកម្រិតផ្លូវជាតិលេខ ៧ ជាបួនគន្លង ចាប់ពីទីប្រជុំជនស្គន់រហូតដល់ក្រុងកំពង់ចាម ប្រវែង ៤៥,៥០៤ គីឡូម៉ែត្រ សម្រេចលទ្ធផលជារួមបាន ៩៨,៥៩%។

លោក ផន រឹម មន្រ្តីអ្នកនាំពាក្យក្រសួងសាធារណការ និងដឹកជញ្ជូនបានឲ្យដឹងថា ផ្អែកលើល្បឿនការងារ គម្រោងនឹងបញ្ចប់នាពេលឆាប់ៗខាងមុខ មានន័យថាលឿនជាងផែនការគ្រោងទុក។

ផ្លូវជាតិលេខ ៧ គឺជាខ្សែផ្លូវយ៉ាងសំខាន់ និងជាសរសៃឈាមសេដ្ឋកិច្ចដ៏មានសក្ដានុពល ជួយសម្រួលការធ្វើដំណើរ, ការដឹកជញ្ជូនផលិតផលកសិកម្ម,កសិឧស្សាហកម្ម ព្រមទាំងលើកកម្ពស់ការអភិវឌ្ឍ និងសកម្មភាពសេដ្ឋកិច្ច-សង្គមជាតិ។

លោក ផន រឹម បានបញ្ជាក់ថា ផ្លូវ ស្ពាន គឺជាសរសៃឈាមនៃសេដ្ឋកិច្ចជាតិ និងជាអាទិភាពគន្លឹះទី២ ក្នុងចំណោមអាទិភាពគន្លឹះទាំង៥ “មនុស្ស ផ្លូវ ទឹក ភ្លើង និងបច្ចេកវិទ្យា” នៃយុទ្ធសាស្ត្របញ្ចកោណដំណាក់កាលទី១ ដោយក្នុងកិច្ចការអាទិភាពទី២ នៃបញ្ចកោណទី២ គឺការលើកកម្ពស់ការតភ្ជាប់ និងការបង្កើនប្រសិទ្ធភាពនៃវិស័យដឹកជញ្ជូន និងក៏ជាគម្រោងយុទ្ធសាស្រ្តមួយដ៏សំខាន់សម្រាប់ការតភ្ជាប់ទំនាក់ទំនង និងជាក្តីសង្ឃឹមរវាងប្រជាពលរដ្ឋស្របពាក្យមួយដែលបានពោលថា «មានផ្លូវ មានក្តីសង្ឃឹម»៕

The post ផ្លូវជាតិលេខ ៧ ពង្រីក ៤ គន្លង ពីស្គន់ដល់ក្រុងកំពង់ចាមសម្រេចការស្ថាបនាបាន ៩៨% appeared first on Kampuchea Thmey Daily.

ផ្លូវ និងស្ពានចំនួន ៧ គម្រោងធំៗចាយទុនខ្ទង់ពាន់លានដុល្លារកំពុងដំណើរការសាងសង់ គ្រោងបញ្ចប់ឆាប់ៗនេះ

Dy Bunnara — Wed, 29 Apr 2026 04:03:15 +0000

ក្រសួងសាធារណការនិងដឹកជញ្ជូន បានកំពុងអនុវត្តគម្រោងសាងសង់ហេដ្ឋារចនាសម្ព័ន្ធផ្លូវនិងស្ពានធំៗចំនួន ៧ គម្រោង ដោយប្រើប្រាស់ថវិកាហិរញ្ញប្បទានពីដៃគូអភិវឌ្ឍន៍មានប្រវែងសរុបប្រមាណ ៤៥២,៤៨ គីឡូម៉ែត្រ ក្នុងទុនចំណាយរាប់ពាន់លានដុល្លារ។

គម្រោងហេដ្ឋារចនាសម្ព័ន្ធដែលកំពុងដំណើរការសាងសង់ ហើយគ្រោងបញ្ចប់បន្តបន្ទាប់ទាំងនោះរួមមាន៖

-ផ្លូវជាតិលេខ ៤ (ភ្នំពេញ-ក្រុងព្រះសីហនុ)

ផ្លូវជាតិលេខ ៤ ជាខ្សែផ្លូវជាតិដ៏មានសារៈសំខាន់បំផុត ព្រោះផ្លូវមួយខ្សែនេះជាបណ្តាញតភ្ជាប់ពីរាជធានីភ្នំពេញដែលជាតំបន់អភិវឌ្ឍ ជាមជ្ឈមណ្ឌលសេដ្ឋកិច្ចហិរញ្ញវត្ថុនិងឧស្សាហកម្មទៅខេត្តព្រះសីហនុ ដែលជាទីក្រុងកំពង់ផែសមុទ្រទឹកជ្រៅតែមួយគត់របស់ប្រទេសកម្ពុជា។

ដោយប្រើប្រាស់ហិរញ្ញប្បទានពីធនាគារពិភពលោក ផ្លូវជាតិលេខ ៤ ដែលកំពុងដំណើរការស្ថាបនាកែលម្អ រហូតមកដល់ពេលនេះសម្រេចបានប្រមាណ ៩០%។ ការស្ថាបនាត្រូវបានពង្រីកពី ២ គន្លង ទៅ ៤ គន្លង មានប្រវែង ៤៥ គីឡូម៉ែត្រ និងពង្រីកពីទទឹង ៧ ម៉ែត្រ ទៅទទឹង ១០ ម៉ែត្រ មានប្រវែង ១៥១ គីឡូម៉ែត្រ។

ផ្លូវជាតិលេខ ៤ មុនពេលក្រសួងសាធារណការនិងដឹកជញ្ជូន យកដាក់ក្នុងផែនការការស្ថាបនាកែលម្អឡើងវិញ គឺមានសភាពខូចខាតដែលធ្វើឱ្យការដឹកជញ្ជូនទៅមកមានការលំបាកខ្លាំង។ កន្លងមកផ្លូវមួយខ្សែនេះលិចទឹក ១ ឆ្នាំ ៥ ទៅ ៦ ដង នៅពេលដែលមានភ្លៀងធ្លាក់ខ្លាំង ធ្វើឱ្យមានការលំបាកដល់ប្រជាពលរដ្ឋនៅក្នុងការរស់នៅមិនអាចទៅសាលា ទៅផ្សារ ឬទៅមន្ទីរពេទ្យ ហើយឡានដឹកទំនិញត្រូវរង់ចាំរហូតដល់ទឹកស្រក ពេលខ្លះដឹកទំនិញទៅដល់កប៉ាល់មិនទាន់ជាដើម។

-កំណាត់ផ្លូវជាតិលេខ ៥ ភាគកណ្តាល (សិរីសោភ័ណ-ប៉ោយប៉ែត)

គិតត្រឹមសប្តាហ៍ទី១ ខែមេសា ឆ្នាំ២០២៦ កំណាត់ចុងក្រោយនៃគម្រោងស្តារនិងលើកកម្រិតគុណភាពផ្លូវជាតិលេខ ៥ (សិរីសោភ័ណ-ប៉ោយប៉ែត) ខេត្តបន្ទាយមានជ័យ ស្ថាបនាសម្រចបានលទ្ធផលជារួមបានប្រមាណ ៥១,០៧%។

តាមផែនការ គម្រោងស្តារនិងលើកកម្រិតគុណភាពផ្លូវជាតិលេខ ៥ (សិរីសោភ័ណ-ប៉ោយប៉ែត) ដែលមានប្រវែង ៣៥,១៤ គីឡូម៉ែត្រ គ្រោងបញ្ចប់នៅអំឡុងឆ្នាំ២០២៧។

-កំណាត់ផ្លូវជាតិលេខ ៧ (ស្គន់-កំពង់ចាម)

គម្រោងពង្រីក និងលើកកម្រិតផ្លូវជាតិលេខ ៧ ចាប់ពីទីប្រជុំជនស្គន់រហូតដល់ក្រុងកំពង់ចាម ស្ទើរតែឈានបញ្ចប់ ១០០% ខណៈគម្រោងនឹងបញ្ចប់នៅអំឡុងឆ្នាំ២០២៦ នេះ។

ផ្លូវជាតិលេខ ៧ បានបើកការដ្ឋានសាងសង់កាលពីថ្ងៃទី ០៩ ខែមករា ឆ្នាំ ២០២៣ ក្រោមកម្ចីសម្បទានជាង ១០០ លានដុល្លារពីរដ្ឋាភិបាលចិន។ កំណាត់ផ្លូវជាតិលេខ ៧ ត្រូវបានសាងសង់ពង្រីកពី ២ គន្លងទៅ ៤ គន្លង មានប្រវែង ៤៥ គីឡូម៉ែត្រ។ តាមរយៈកំណាត់ផ្លូវនេះជួយសម្រួលដល់ការធ្វើដំណើរ, ការដឹកជញ្ជូនផលិតផលកសិកម្ម, កសិឧស្សាហកម្ម ព្រមទាំងលើកកម្ពស់ការអភិវឌ្ឍ និងសកម្មភាពសេដ្ឋកិច្ច-សង្គមជាតិ។

–ផ្លូវល្បឿនលឿនភ្នំពេញ-បាវិត

កាលពីអំឡុងខែធ្នូ ឆ្នាំ២០២៥ លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានដឹកនាំកិច្ចប្រជុំពិភាក្សាពី “វឌ្ឍនភាព និងបញ្ហាប្រឈមនៃការអនុវត្តគម្រោងសាងសង់ផ្លូវល្បឿនលឿនភ្នំពេញ-ក្រុងបាវិត”។

កិច្ចប្រជុំនេះក៏មានការចូលរួមពីលោក ស៊ុន ចាន់ថុល ឧបនាយករដ្ឋមន្រ្តី អនុប្រធានទីមួយក្រុមប្រឹក្សាអភិវឌ្ឍន៍កម្ពុជា និងលោក ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន។

ផ្លូវល្បឿនលឿនភ្នំពេញ-បាវិត បានបើកការដ្ឋានសាងសង់កាលពីខែមិថុនា ឆ្នាំ២០២៣ ក្រោមអធិបតីភាពសម្តេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា ដែលចំណាយថវិកាសាងសង់សរុបប្រមាណ ១,៣៥ ពាន់លានដុល្លារ ក្រោមទម្រង់វិនិយោគសាងសង់-ប្រតិបត្តិការ-ផ្ទេរ (BOT) ដែលមានរយៈពេលប្រតិបត្តិការចំនួន ៥០ ឆ្នាំ។

ពាក់ព័ន្ធវឌ្ឍនភាពនៃការអនុវត្តគម្រោងផ្លូវល្បឿនលឿនភ្នំពេញ-ក្រុងបាវិត មន្រ្តីអ្នកនាំពាក្យក្រសួងសាធារណការ និងដឹកជញ្ជូនមិនបានបញ្ជាក់មកដល់ពេលនេះសម្រេចបានវឌ្ឍនភាពយ៉ាងណា ខណៈបើតាមផែនការគ្រោងបញ្ជប់នៅឆ្នាំ ២០២៧។

-ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា)

គិតត្រឹមថ្ងៃទី ២០ ខែមេសា ឆ្នាំ២០២៦ ដំណើរការស្ថាបនាស្ពានឆ្លងទន្លេបាសាក់ (ចាក់អង្រែក្រោម-ព្រែកប្រា) សម្រេចបានប្រមាណ ៦៨% ដែលផ្អែកតាមលទ្ធផលនេះការសាងសង់គឺលឿនជាងផែនការ ៦%។

ស្ពានឆ្លងទន្លេ (ចាក់អង្រែក្រោម-ព្រែកប្រា) ដែលកំពុងដំណើរការសាងសង់មានប្រវែងសរុប ១ ៦៥០ ម៉ែត្រ (ប្រវែងស្ពាន ៨៤៥,៧០ ម៉ែត្រ, ទទឹងផ្លូវ ២៧ ម៉ែត្រ ផ្លូវតភ្ជាប់ក្បាលស្ពានប្រវែង ៨០៤,៣០ ម៉ែត្រ ទទឹងធម្មតាផ្លូវ ២០ម៉ែត្រ)។

ស្ពានឆ្លងទន្លេបាសាក់ (ចាក់អង្រែក្រោម-ព្រែកប្រា) បានបើកការដ្ឋានកាលពីខែកុម្ភៈ ឆ្នាំ២០២៤ ក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោក វ៉ាង វិនធៀន ឯកអគ្គរដ្ឋទូតចិនប្រចាំកម្ពុជា។

នៅពេលស្ថាបនាបញ្ចប់ដាក់ឲ្យដំណើរការ នឹងជួយកាត់បន្ថយការកកស្ទះចរាចរណ៍លើស្ពានព្រះមុនីវង្ស ក៏ដូចជាជួយពង្រឹងដល់ទំនាក់ទំនងសេដ្ឋកិច្ចសង្គមរវាងរាជធានីភ្នំពេញប៉ែកខាងត្បូង ព្រលានយន្តហោះអន្តរជាតិតេជោក្រុងតាខ្មៅ កាត់បន្ថយការកកស្ទះចរាចរណ៍នៅតាមដងទន្លេបាសាក់ និងជួយពន្លឿនការអភិវឌ្ឍតំបន់នោះ ជាពិសេសធ្វើឱ្យប្រសើរឡើងដល់ប្រសិទ្ធភាពនៃការដឹកជញ្ជូន និងភស្តុភារកម្មនៅក្នុងតំបន់រាជធានីភ្នំពេញ។

-ស្ពានឆ្លងកាត់ទន្លេមេគង្គ នៅខេត្តក្រចេះ

ដូចការគ្រោងទុក “ស្ពានមិត្តភាពកម្ពុជា-ចិន មេគង្គក្រចេះ” បានបើកឲ្យប្រជាពលរដ្ឋឆ្លងកាត់ជាអចិន្ត្រៃយ៍នៅថ្ងៃទី១ ខែមេសា ឆ្នាំ២០២៦។

ស្ពានមិត្តភាពកម្ពុជា-ចិន មេគង្គក្រចេះ បានបើកការដ្ឋានសាងសង់កាលពីថ្ងៃទី ០២ ខែមករា ឆ្នាំ២០២៣ ក្រោមអធិបតីភាពសម្តេចតេជោ ហ៊ុន សែន អតីតនាយករដ្ឋមន្ត្រី និងលោក វ៉ាង វិនធៀន អតីតឯកអគ្គរដ្ឋទូតចិនប្រចាំកម្ពុជា។

ស្ពានមិត្តភាពកម្ពុជា-ចិន មេគង្គក្រចេះ ជាស្ពានយុទ្ធសាស្ត្រភ្ជាប់ពីស្រុកចិត្របុរីនៅត្រើយខាងកើត ទៅស្រុកព្រែកប្រសព្វ នៅត្រើយខាងលិច។

“ស្ពានមិត្តភាពកម្ពុជា-ចិន មេគង្គក្រចេះ” ជាគម្រោងហេដ្ឋារចនាមសម្ព័ន្ធយុទ្ធសាស្រ្តមួយដ៏សំខាន់ ដែលនឹងចូលរួមបង្កើនប្រសិទ្ធភាពនៃវិស័យដឹកជញ្ជូន ពិសេសការដឹកជញ្ជូនទិន្នផលកសិ-ឧស្សាហកម្ម ភ្ជាប់ទីប្រជុំជនខេត្តក្រចេះទៅខេត្តកំពង់ធំ រួមទាំងការតភ្ជាប់វិស័យទេសចរណ៍ទៅកាន់ខេត្តភូមិភាគឦសានដែលមានខេត្តស្ទឹងត្រែង រតនគិរី និងមណ្ឌលគិរីជាមួយបណ្តាញផ្លូវជាតិសំខាន់ៗផ្សេងទៀត។

-ស្ពានឆ្លងកាត់ទន្លេមេគង្គ “ដីឥដ្ឋ-ថ្មគរ”

ស្ពានដីឥដ្ឋ-ថ្មគរ ដែលបើកការដ្ឋានសាងសង់ស្របជាមួយគម្រោងផ្លូវល្បឿនលឿនភ្នំពេញ-បាវិត គិតត្រឹមថ្ងៃទី ២២ ខែមេសា ឆ្នាំ២០២៦ សាងសង់សម្រេចវឌ្ឍនភាពការងារបានប្រមាណ ៤៧,៦ % លឿនជាងផែនការ ២,៦០%។

ស្ពានដីឥដ្ឋ-ថ្មគរ បានបើកការដ្ឋានសាងសង់កាលពីថ្ងៃទី ៧ ខែមិថុនា ឆ្នាំ២០២៣ ក្រោមអធិបតីភាពសម្តេចតេជោ ហ៊ុន សែន អតីតនាយករដ្ឋមន្ត្រី បច្ចុប្បន្នជាប្រធានព្រឹទ្ធសភា និងលោក វ៉ាង វិនធៀន អតីតឯកអគ្គរដ្ឋទូតចិនប្រចាំកម្ពុជា។

គិតត្រឹមថ្ងៃទី២២ ខែមេសា ឆ្នាំ២០២៦ ការដ្ឋានសាងសង់ស្ពានដីឥដ្ឋ-ថ្មគរ សម្រេចបានវឌ្ឍនភាពការងារ ៤៧,៦ % ខណៈតាមផែនការគ្រោងបញ្ចប់នៅឆ្នាំ ២០២៧ ទន្ទឹមការដ្ឋានសាងសង់ផ្លូវល្បឿនលឿនភ្នំំពេញបាវិត។

ស្ពាននេះជាគម្រោងដ៏សំខាន់សម្រាប់ការតភ្ជាប់សេដ្ឋកិច្ច ការដឹកជញ្ជូន ពីភាគខាងត្បូងនិងខាងកើត រាជធានីភ្នំពេញ ដោយភា្ជប់មហាវិថី ស៊ី ជីនពីង (ក្រវាត់ក្រុងទី៣) ត្រង់ចំណុចផ្លូវជាតិលេខ ១ និងត្រើយខាងកើតភ្ជាប់ទៅផ្លូវល្បឿនលឿនភ្នំពេញ-បាវិត៕

The post ផ្លូវ និងស្ពានចំនួន ៧ គម្រោងធំៗចាយទុនខ្ទង់ពាន់លានដុល្លារកំពុងដំណើរការសាងសង់ គ្រោងបញ្ចប់ឆាប់ៗនេះ appeared first on Kampuchea Thmey Daily.

គម្រោងពង្រីកផ្លូវជាតិលេខ ៧ ចំណាយជាង $១០០ លាន សម្រេចបានជិត ៩០% លឿនជាងផែនការ

deth leng — Wed, 18 Mar 2026 04:00:49 +0000

គម្រោងពង្រីក និងលើកកម្រិតផ្លូវជាតិលេខ៧ ជាបួនគន្លង ចាប់ពីទីប្រជុំជនស្គន់ រហូតដល់ខេត្តកំពង់ចាម សម្រេចបានការសាងសង់ជិត ៩០% ពោលគឺគ្រោងបញ្ចប់នៅឆ្នាំ ២០២៦ លឿនជាងផែនការ។

លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន បានឱ្យដឹងថា គម្រោងពង្រីក និងលើកកម្រិតផ្លូវជាតិលេខ៧ កំពុងសម្រុកចាក់កៅស៊ូ AC, គូសគំនូសចរាចរណ៍, បំពាក់ផ្លាកសញ្ញាចរាចរណ៍ និងដាក់អំពូលសូឡាបំភ្លឺពេលរាត្រី។ គិតត្រឹមដើមខែមីនា ឆ្នាំ២០២៦ គម្រោងនេះសម្រេចលទ្ធផលជារួម៨៩,៨៨%ហើយ។

បើតាមអ្នកនាំពាក្យរូបនេះ ផ្អែកលើល្បឿនសកម្មភាពការដ្ឋាន គម្រោងនេះនឹងបញ្ចប់នៅអំឡុងឆ្នាំ២០២៦ ខាងមុខ លឿនជាងផែនការគ្រោងទុក។

ផ្លូវជាតិលេខ៧ គឺជាខ្សែផ្លូវយ៉ាងសំខាន់ និងជាសរសៃឈាមសេដ្ឋកិច្ចដ៏មានសក្ដានុពល ជួយសម្រួលការធ្វើដំណើរ, ការដឹកជញ្ជូនផលិតផលកសិកម្ម, កសិឧស្សាហកម្ម ព្រមទាំងលើកកម្ពស់ការអភិវឌ្ឍ និងសកម្មភាពសេដ្ឋកិច្ច-សង្គមជាតិ។

គម្រោងពង្រីកកំណាត់ផ្លូវជាតិលេខ៧ មានប្រវែង ៤៥ គីឡូម៉ែត្រ នឹងត្រូវពង្រីកពី២ គន្លងទៅ ៤ គន្លង បានបើកការដ្ឋានសាងសង់កាលពីថ្ងៃទី ០៩ ខែមករា ឆ្នាំ ២០២៣ ក្រោមកម្ចីសម្បទានជាង ១០០ លានដុល្លាររបស់រដ្ឋាភិបាលចិន។

គម្រោងពង្រីក និងលើកកម្រិតគុណភាពផ្លូវជាតិលេខ ៧ នេះ សាងសង់ដោយក្រុមហ៊ុនសាជីវកម្មស្ពាន និងថ្នល់ចិន (CRBC) ដោយប្រើរយៈពេលសាងសង់ ៤០ ខែ ហើយគ្រោងនឹងបញ្ចប់នៅឆ្នាំ ២០២៦៕

អត្ថបទ៖ ឡេង ដេត

The post គម្រោងពង្រីកផ្លូវជាតិលេខ ៧ ចំណាយជាង $១០០ លាន សម្រេចបានជិត ៩០% លឿនជាងផែនការ appeared first on Kampuchea Thmey Daily.

ផ្លូវជាតិលេខ ៧ ពីស្គន់ទៅក្រុងកំពង់ចាម នឹងស្ថាបនាបញ្ចប់មុនចូលឆ្នាំខ្មែរ

Dy Bunnara — Fri, 07 Nov 2025 07:41:14 +0000

ប្រភពពីមន្រ្តីក្រសួងសាធារណការ និងដឹកជញ្ជូនបានឲ្យដឹងថា ផ្លូវជាតិលេខ៧ ពីទីប្រជុំជន់ស្គន់ដល់ស្ពានគីហ្សូណាក្រុងកំពង់ចាម នឹងរួចរាល់មុនផែនការ ដែលនឹងអាចសាងសង់បញ្ចប់នៅមុនចូលឆ្នាំខ្មែរខាងមុខនេះ។

លោក ផន រឹម មន្រ្តីអ្នកនាំពាក្យក្រសួងសាធារណការនិងដឹកជញ្ជូនបានបញ្ជាក់ថា ផ្លូវជាតិលេខ ៧ ដែលកំពុងស្ថាបនាពង្រីកពី ២ គន្លងទៅ ៤ គន្លង វឌ្ឍនភាពពេលនេះសម្រេចបានប្រមាណ ៦៩,៦៥% ហើយអាចនឹងរួចរាល់មុនផែនការចូលឆ្នាំខ្មែរខាងមុខ។

បើតាមមន្រ្តីអ្នកនាំពាក្យក្រសួងសាធារណការនិងដឹកជញ្ជូនរូបនេះ ក្រោយបញ្ចប់ការស្ថាបនា ផ្លូវជាតិលេខ ៧ ដ៏ធំទូលាយដែលត្រូវបានស្ថាបនាពង្រីកទទឹងផ្លូវដល់ទៅ ២៤ ម៉ែត្រ នឹងសម្រួលដល់ការធ្វើដំណើរទៅមករបស់ពលរដ្ឋលែងលំបាកកកស្ទះ និងនាំលំហូរការធ្វើចរាចរណ៍កាន់តែឆាប់រហ័សជាងមុន។

ផ្លូវជាតិលេខ ៧ បានចាប់ផ្តើមការដ្ឋានសាងសង់នៅថ្ងៃទី១១ ខែមីនា ឆ្នាំ២០២៤។ ផ្លូវនេះការស្ថាបនាត្រូវលើកកម្រិតគុណភាពជាប្រភេទផ្លូវ AC (Asphalt concrete) កម្រាស់ ៩ សង់ទីម៉ែត្រ ជាមួយទទឹងផ្លូវ ២៤,៥ ម៉ែត្រ។ ការដ្ឋានផ្លូវនេះ ក៏ត្រូវសាងសង់ស្ពានថ្មីតូចធំចំនួន៨ (ស្មើប្រវែងសរុប ១៥៦ ម៉ែត្រ), ជួសជុលស្ពានតូចធំ (ចាស់) ចំនួន ៧ ស្ពាន (ស្មើប្រវែងសរុប ១១៦ ម៉ែត្រ) រួមទាំងស្ថាបនាលូរំដោះទឹកភ្លៀង, លូរំដោះទឹកកខ្វក់ និងបរិក្ខារចរាចរណ៍នានា។

ផ្លូវជាតិលេខ ៧ គឺជាខ្សែផ្លូវយ៉ាងសំខាន់ និងជាសរសៃឈាមសេដ្ឋកិច្ចដ៏មានសក្ដានុពល តភ្ជាប់ជាមួយផ្លូវជាតិលេខ ៦ ពីរង្វង់មូលស្គន់ឆ្ពោះទៅទិសដៅរាជធានីភ្នំពេញ និងទិសដៅទៅខេត្តកំពង់ធំ សៀមរាប។ កំណាត់ផ្លូវជាតិនេះ ក៏តភ្ជាប់ជាមួយផ្លូវជាតិលេខ ៨ និងផ្លូវជាតិលេខ១១ ឆ្ពោះទៅកាន់ខេត្តព្រៃវែង និងតភ្ជាប់ជាមួយផ្លូវ ៧១C, ផ្លូវជាតិលេខ៧៣ ឆ្ពោះទៅកាន់ខេត្តត្បូងឃ្មុំ និងផ្លូវជាតិលេខ៧៦,ផ្លូវជាតិលេខ៧៨ ឆ្ពោះទៅកាន់ខេត្តស្ថិតនៅភូមិភាគឦសាន ដូចជា៖ ខេត្តក្រចេះ ស្ទឹងត្រែង មណ្ឌលគិរី និងខេត្តរតនគិរី។ ខ្សែផ្លូវនេះ ក៏ភ្ជាប់ជាមួយបណ្តាញខ្សែផ្លូវរបស់បណ្តាប្រទេស នៃមហាអនុតំបន់មេគង្គ (GMS) ផងដែរ។

The post ផ្លូវជាតិលេខ ៧ ពីស្គន់ទៅក្រុងកំពង់ចាម នឹងស្ថាបនាបញ្ចប់មុនចូលឆ្នាំខ្មែរ appeared first on Kampuchea Thmey Daily.

ផ្លូវជាតិលេខ ៧ Archives - Kampuchea Thmey Daily

គម្រោងពង្រីកផ្លូវជាតិលេខ ៧ ចំណាយជាង ១០០ ​លានដុល្លារ បញ្ចប់ការសាងសង់ទាំងស្រុង

កំណាត់​ផ្លូវជាតិ​លេខ​ ៧ ពី​ខេត្ដក្រចេះទៅព្រំដែន​ឡាវ ឈាន​ចុះហត្ថលេខា​សាងសង់លើកកម្រិត​ជា​ផ្លូវ​កៅស៊ូ AC​

ផ្លូវជាតិលេខ ៧ ពង្រីក​ ៤ គន្លង ពី​ស្គន់​ដល់ក្រុងកំពង់ចាម​សម្រេច​ការ​ស្ថាបនា​បាន ៩៨%

​គម្រោង​ពង្រីកផ្លូវជាតិលេខ ៧ ​ចំណាយជាង $១០០ ​លាន ​សម្រេចបាន​ជិត ៩០%​ លឿនជាងផែនការ​

ផ្លូវជាតិលេខ ៧ ពី​ស្គន់ទៅ​ក្រុង​កំពង់ចាម នឹង​ស្ថាបនា​បញ្ចប់​មុន​ចូលឆ្នាំខ្មែរ

គម្រោងពង្រីកផ្លូវជាតិលេខ ៧ ចំណាយជាង ១០០ លានដុល្លារ បញ្ចប់ការសាងសង់ទាំងស្រុង

កំណាត់ផ្លូវជាតិលេខ ៧ ពីខេត្ដក្រចេះទៅព្រំដែនឡាវ ឈានចុះហត្ថលេខាសាងសង់លើកកម្រិតជាផ្លូវកៅស៊ូ AC

ផ្លូវជាតិលេខ ៧ ពង្រីក ៤ គន្លង ពីស្គន់ដល់ក្រុងកំពង់ចាមសម្រេចការស្ថាបនាបាន ៩៨%

គម្រោងពង្រីកផ្លូវជាតិលេខ ៧ ចំណាយជាង $១០០ លាន សម្រេចបានជិត ៩០% លឿនជាងផែនការ

ផ្លូវជាតិលេខ ៧ ពីស្គន់ទៅក្រុងកំពង់ចាម នឹងស្ថាបនាបញ្ចប់មុនចូលឆ្នាំខ្មែរ