អ្នកនាង ឈីង ជាម្ចាស់កសិដ្ឋានបណ្ដុះផ្សិតប៊ីចេង ប្រាប់ កម្ពុជាថ្មី ថា ទាក់ទងជាមួយការងារបណ្ដុះផ្សិតនេះ កសិដ្ឋានរបស់អ្នកនាងបានចាប់ផ្ដើមធ្វើវាយូរមកហើយ។​​ ដោយឡែកចំពោះផ្សិតប៊ីចេង កសិដ្ឋានទើបតែបានសាកល្បងបណ្ដុះវាឡើងមកនៅឆ្នាំ ២០២៦នេះ តែប៉ុណ្ណោះ។

ម្ចាស់កសិដ្ឋានរូបនេះ បានឱ្យដឹងទៀតថា មូលហេតុដែលកសិដ្ឋានដាក់ឈ្មោះប្រភេទនេះថា «ផ្សិតប៊ីចេង» ដោយសារតែរសជាតិវាស្រដៀងទៅនឹងផ្សិតអំបោះដែលយើងធ្លាប់បរិភោគកន្លងមក។ មួយវិញទៀត ការដាក់ឈ្មោះបែបនេះដោយសារតែប្រភពដើមរបស់ផ្សិតមានឈ្មោះជាភាសាចិន ដែលពិបាកក្នុងការហៅទើបកសិដ្ឋានសម្រេចហៅថា «ផ្សិតប៊ីចេង» តែម្ដងទៅ។

ដ្បិតផ្សិតប៊ីចេង ទើបតែមានវត្តមាននៅក្នុងទឹកដីប្រទេសកម្ពុជា និងកំពុងទទួលការគាំទ្រក៏ពិតមែន ប៉ុន្ដែម្ចាស់កសិដ្ឋានខាងរូបនេះ នៅតែទូទូចស្នើចិត្តប្រជាជនខ្មែរសូមបន្តជួយគាំទ្រផលិតផលក្នុងស្រុកឱ្យកាន់តែច្រើនជាងមុន ខណៈកន្លងមកគ្រាន់តែផ្សិតក៏យើងនាំចូលពីប្រទេសថៃដែរ ប៉ុន្ដែពេលនេះកសិដ្ឋានក្នុងស្រុករបស់យើងអាចផលិតបាន និងអាចផ្គត់ផ្គង់គ្រប់គ្រាន់ទៅតម្រូវការទីផ្សារប្រចាំថ្ងៃ ហេតុនេះសូមជួយគាំទ្រឱ្យបានផុសផុលជាងនេះផងចុះ។

យ៉ាងណាមិញ ចំពោះទីផ្សារបច្ចុប្បន្ន ផ្សិតប៊ីចេង កំពុងទទួលបានការគាំទ្រយ៉ាងច្រើនគួរសម ខណៈកសិដ្ឋានបានធ្វើការបោះដុំ និងលក់រាយទៅកាន់ផ្សារទំនើបមួយចំនួននៅក្នុងរាជធានីភ្នំពេញផងដែរ។

គួរឱ្យដឹងថា ក្រៅពីកាបណ្ដុះផ្សិតប៊ីចេងសម្រាប់ផ្គត់ផ្គង់ទីផ្សារក្នុងស្រុក កសិដ្ឋានចែឈីង ក៏មានប្រភេទពូជផ្សិតជាច្រើនមុខទៀតរួមមាន៖ ផ្សិតប៊ូតុង ផ្សិតត្រចៀកកណ្ដុរ ផ្សិតលិនជឺ និងផ្សិតជាច្រើនមុខទៀត ដែលប្រភេទផ្សិតទាំងនេះសុទ្ធសឹងតែសម្បូរទៅដោយសារធាតុចិញ្ចឹមខ្ពស់ ជាតិសរសៃ វីតាមីន និងសារធាតុប្រឆាំងអុកស៊ីតកម្ម ដែលផ្តល់អត្ថប្រយោជន៍យ៉ាងច្រើនដល់សុខភាពរាងកាយរបស់មនុស្សទូទៅ៕

អត្ថបទ ៖ សួស សិត

The post អ្នកសៀមរាប​បណ្ដុះផ្សិតប៊ីចេង និងផ្សិតច្រើនប្រភេទ ជំនួសឱ្យការនាំចូលពីប្រទេសថៃ appeared first on Kampuchea Thmey Daily.

ជារៀងរាល់ឆ្នាំ ឱ្យតែដល់រដូវនេះ អ្នកភូមិតែងតែនាំគ្នាទៅរកផ្សិតប៉ក់ នៅតាមព្រៃសហគមន៍ បន្ទាប់ពីទំនេរការធ្វើស្រែ ចម្ការ ដើម្បីរកចំណូលបន្ថែម សម្រាប់ផ្គត់ផ្គង់ជីវភាពគ្រួសារ។ ផ្សិតប៉ក់នេះ អ្នកភូមិអាចលក់បានតម្លៃថ្លៃរហូតដល់ ៦ម៉ឺនរៀល ក្នុងមួយគីឡូក្រាម នៅដើមរដូវដំបូង ប៉ុន្តែតម្លៃនេះនឹងធ្លាក់ចុះវិញ អាស្រ័យទៅតាមរដូវកាល និងអាកាសធាតុ។ ដោយសារតម្លៃថ្លៃគួរសម្យនេះហើយ ទើបអ្នកភូមិនាំគ្នាសម្រុកចេញទៅរកតាមព្រៃសហគមន៍នៅក្បែរមូលដ្ឋានរបស់ខ្លួន ស្ទើរស្ងាត់ភូមិ។

ប្រជាពលរដ្ឋមួយរូបមានអ្នកស្រី ប៊ួ នឿន អាយុ៤៨ ជាជនជាតិដើមភាគតិចព្នង មានទីលំនៅបច្ចុប្បន្នភូមិពូកេះ ឃុំមេម៉ង់ ស្រុកកែវសីមា ខេត្តមណ្ឌលគិរី បានរៀបរាប់ថា សព្វថ្ងៃគាត់មានមុខរបរជាកសិករ ធ្វើស្រែចម្ការ ហើយទំនេរពីការងារ គាត់តែងតែដើររកមើលនៅតាមព្រៃសហគមន៍របស់ខ្លួន ដូចជាអនុផលរុក្ខជាតិផ្សេងៗ ដែលអាចយកទៅលក់ឱ្យឈ្មួញគ្រាន់ដោះស្រាយជីវភាពប្រចាំថ្ងៃ។

អ្នកស្រីបន្តថា៖«ឱ្យតែដល់ចុងខែមេសា បន្ទាប់ពីភ្លៀងជោកជាំដី ក្រុមគ្រួសារខ្ញុំតែងតែដើររុករក រុក្ខជាតិមួយប្រភេទ ហៅថាផ្សិត(ប៉ក់) ដែលវាមានតម្លៃថ្លៃ រហូតដល់ ៦ម៉ឺនរៀលឯណោះក្នុងមួយគីឡូក្រាម។ ប៉ុន្តែនៅក្នុងឆ្នាំនេះអាកាស​ធាតុប្រែប្រួលប្រភេទផ្សិតប៉ក់នេះដុះរៀងយឺតជាងរាល់ឆ្នាំបន្តិច គឺចូលខែឧសភាសប្ដាហ៍ទីមួយទើបផ្សិតចាប់ផ្ដើមដុះបណ្តើរៗ»។ បើតាមការអះអាងអ្នកស្រី ប៊ួ នឿន គាត់អាចរកបានក្នុងមួយថ្ងៃ ៣ទៅ៤គីឡូក្រាម ហើយបើធៀបនឹងឆ្នាំមុនអាចរកបានរហូតទៅដល់ជាង១០គីឡូទៅ២០គីឡូក្រាម។

អ្នករើសផ្សិតរូបនេះបានបញ្ជាក់ថា ឯតម្លៃនៅក្នុងឆ្នាំនេះវិញ គឺមិនសូវជាបានតម្លៃថ្លៃខ្លាំងដូចឆ្នាំមុនទេ គឺឈ្មួញឱ្យក្នុងមួយគីឡូក្រាមចន្លោះពី ៤ ទៅក្បែរ ៥ម៉ឺនរៀល បើធៀបនឹងឆ្នាំមុនៗតម្លៃឆ្នាំនេះធ្លាក់ចុះបន្តិច។ ការដើររកផ្សិតប្រភេទកម្រនេះ មិនមែនមានតែក្រុមគ្រួសាររបស់គាត់ទេ គឺមានបងប្អូនប្រជាពលរដ្ឋនៅក្នុងភូមិចេញទៅរកផ្សិតមួយប្រភេទនេះទាំងចាស់ទាំងក្មេងស្ទើរស្ងាត់ភូមិ។

ប៊ួ នឿន បានឱ្យដឹងថា៖«ព្រោះថាផ្សិតនេះ មានអាយុកាលខ្លីប៉ុណ្ណោះបើសិនជាយើងរើសមិនទាន់យកទៅលក់ឱ្យឈ្មួញនោះទេវានឹងអាចចាស់ហើយទុំ ពេលនោះឈ្មួញមិនទទួលទិញនោះទេ»។

ស្របពេលដែលប្រជាពលរដ្ឋ រស់នៅភូមិឃុំខាងលើ នាំគ្នាសម្រុកចេញរុករកផ្សិត ដែលមានតម្លៃថ្លៃនេះ ក៏មានឈ្មួញជាច្រើន បានឈរចាំនៅតាមដងផ្លូវដើម្បីរង់ចាំទទួលទិញផ្សិតប៉ក់ពីបងប្អូនប្រជាពលរដ្ឋយ៉ាងច្រើនហូរហែផងដែរ។
ឈ្មួញមួយរូប លោក សុខលី ដែលចាំទទួលទិញផ្សិតប៉ក់ ពីបងប្អូនប្រជាពលរដ្ឋនៅតាមដងផ្លូវ បានឱ្យដឹងថា គាត់តែងតែទទួលទិញផ្សិតប៉ក់ពីបងប្អូនប្រជាពលរដ្ឋជារៀងរាល់ឆ្នាំនៅក្នុងតំបន់នេះ រួចហើយខ្ចប់ឱ្យមានរបៀបរៀបរយ ដឹកតាមរថយន្តយកទៅលក់បន្តឱ្យឈ្មួញថៃតាមច្រកអានសេះខេត្តព្រះវិហារ។

លោកបន្តថា ពាក់ព័ន្ធនឹងតម្លៃហាងឆេងទីផ្សារវិញ មានការឡើងចុះជាប្រចាំ ដែលហាងឆេងនេះមិនមែនលោកជាអ្នកទម្លាក់នោះទេ គឺភាគីខាងថៃដែលតម្រូវទិញតាមអាកាសធាតុ ពោលបើមានភ្លៀងធ្លាក់ជោកជាំ គេរៀងទម្លាក់តម្លៃបន្តិច ប៉ុន្តែបើថ្ងៃខ្លះរាំងភ្លៀង ចន្លោះមួយថ្ងៃទៅរពីថ្ងៃវិញ តម្លៃនឹងឡើងវិញបន្តិច។ បើតាមឈ្មួញរូបនេះ តម្លៃដែលលោកទិញពីម្សិលមិញ មួយគីឡូក្រាម៤៣០០០រៀល ប៉ុន្តែថ្ងៃនេះ ហាងឆេងមានការធ្លាក់ចុះ គឺលោកទិញត្រឹមតែ ក្នុងមួយគីឡូក្រាម ៣៥០០០រៀលប៉ុណ្ណះ។

គួរបញ្ជាក់ផងដែរថា ខេត្តមណ្ឌលគិរីសម្បូរទៅដោយធនធានធម្មជាតិ អនុផលព្រៃឈើ រុក្ខជាតិយ៉ាងច្រើនសម្បូរបែបនៅតាមព្រៃធនធានធម្មជាតិ ពិសេសនៅព្រៃសហគមន៍ក្បែរមូលដ្ឋានរបស់បងប្អូនប្រជាពលរដ្ឋ ដូច្នេះបញ្ជាក់ឱ្យឃើញថា ដើមឈើនៅឈរ មិនមានកាំបិតកាប់បំផ្លាញពីសំណាក់ជនទុច្ចរិត វានឹងអាចហុចផលដល់ប្រជាពលរដ្ឋនៅក្នុងសហគមន៍ជារៀងរហូត៕

អត្ថបទ៖ រៀម សុខហេង

The post មណ្ឌលគិរី! អ្នកភូមិសម្រុកចូលព្រៃ រុករកផ្សិតប៉ក់ដែលមានតម្លៃថ្លៃលក់ទៅឱ្យឈ្មួញ appeared first on Kampuchea Thmey Daily.

ផ្សិតមានរូបរាងតូចៗទាំងនេះ ដុះនៅមុនផ្សិតកាចូតាមដើមឈើ។ ចំណែក ផ្សិត កាចូ ផ្សិតក្ងោក ផ្សិតអាចមន៍ក្របី ជាទូទៅដុះនៅរដូវក្តៅខ្លាំងនៅរដូវប្រាំងស្ងួតហួតហែងមិនមានភ្លៀងធ្លាក់អស់ជាច្រើនខែ ហើយស្រាប់តែគៀកដល់រដូវវស្សាមានភ្លៀងធ្លាក់ខ្លាំងជោគជាំដីជាលើកទី១ នៅពាក់កណ្ដាលខែមេសា ផ្សិតទាំងនេះ ក៏ដុះនៅតាមតាមដើមឈើដែលគេកាប់រំលំទុកចោលយូរឆ្នាំហើយពុកផុយ មានដូចជា ដើមផ្ចឹក ដើមសុក្រំ ដើមចន្ទី ដើមស្នោរជាដើម។

ផ្សិតដែលដុះជាប់នឹងដើមឈើទាំងនោះ មាន២ពណ៌ គឺពណ៌ស និងពណ៌ក្រម៉ៅ មានកម្ពស់៥ សង់ទីម៉ែត្រ។ ពណ៌ផ្សិតទាំងនេះ មានលក្ខណៈខុសគ្នា គឺយោងទៅតាមដើមឈើដែលវាដុះ។ សម្រាប់ពណ៌ស មានដូចជា ដើមចន្ទី និងដើមស្នោរ ចំណែក ពណ៌ក្រម៉ៅវិញ ដុះនៅតាមដើមសុក្រំ ដើមផ្ចឹក។ ដើមឈើងាប់ពុកផុយទាំងនេះ ត្រូវទឹកភ្លៀង២ ទៅ ៣ដង ក៏ដុះចេញជាផ្សិតរយៈពេល១ ថ្ងៃ ទៅ ២ថ្ងៃ អាចទៅដកយកមកធ្វើម្ហូបអាហារ ទើបផុយល្អមិនស្វិត។ ប៉ុន្តែ បើវាដុះលើសពី៣ថ្ងៃ ផ្សិតទាំងនេះចាស់ ហើយនៅពេលយកទៅស្ល ឬឆា មិនផុយល្អសម្រាប់បរិភោគនោះទេ។ នៅខែភ្លៀងដើមឆ្នាំនេះ ជនជាតិដើមភាគតិចនៅតាមភូមិនីមួយៗ ក្នុងខេត្តរតនគិរី បានបបួលគ្នាស្ពាយកាផា ទៅដកផ្សិតនៅតាមព្រៃភ្នំ និងបេះត្រួយរុក្ខជាតិ ទើបលូតលាស់ថ្មី។

ជនជាតិដើមភាគតិចមួយរូបនៅក្នុងខេត្តរតនគិរី គឺអ្នកស្រី គី បានប្រាប់ឱ្យដឹងថា គាត់សប្បាយចិត្តជាមួយទឹកភ្លៀងធ្លាក់ដើមឆ្នាំនេះ ពីព្រោះផ្សិតចាប់ផ្តើមដុះនៅតាមឈើពុក គាត់នាំកូនរបស់គាត់ទៅដកយកមកធ្វើម្ហូប។ គាត់បន្តថា ផ្សិតនេះឆា ឬធ្វើសម្ល មានរសជាតិឆ្ងាញ់។ មិនត្រឹមតែធ្វើម្ហូបអាហារនោះទេ គាត់ក៏វេចខ្ចប់ដាក់ក្នុងថង់ប្លាស្ទិកដោយ១ថង់ គាត់លក់បានតម្លៃ២ ០០០រៀល បើបានចំនួន១កាផា គាត់យកទៅលក់ឱ្យអ្នកភូមិ ឬលើសពី១កាផា គាត់យកទៅលក់នៅផ្សារវើនសៃ៕

ដោយ៖ ខៀវ ចាប

The post ផ្សិតដុះតាមព្រៃភ្នំ ជាបន្លែដ៏ពេញនិយម និងយកធ្វើម្ហូបដ៏ឆ្ងាញ់ពិសាររបស់ជនជាតិដើមភាគតិចក្នុងខេត្តរតនគិរី appeared first on Kampuchea Thmey Daily.

លោក ណយ ខុង មេឃុំព្រែកមាសស្រុកសៀមប៉ាងបានបញ្ជាក់ថា៖ ប្រជាកសិករភាគច្រើននៅរដូវនេះពួកគាត់ទៅរកផ្សិត បន្លែបង្ការធម្មជាតិទៅតាមព្រៃឆ្ងាយៗ ឬតាមតំបន់ព្រុំដែន ស្ថិតនៅឆ្ងាយពីភូមិនិងកន្លែងរស់នៅប្រមាណពី ១០ទៅ​២០គីឡូម៉ែត្រក៍មានដែរ។

លោកបន្តថា៖ នៅរដូវភ្លៀងធ្លាក់ជោគជាំដំបូងមានផ្សិតផក់ ហៅថាផ្សិតបាយ ឬផ្សិតស្បែក ដុះមុនគេ ហើយរំលងបានមួយខែក្រោយមក ទើបមានពពួកផ្សិតក្ងោក និងផ្សិតអន្សោង ដុះមកបន្តបន្ទាប់ទៀត។ ចំណែកប្រជាកសិករបាននាំគ្នាទៅរកយកមកបរិភោគ និងលក់ក្នុងមួយរដូវ អាចរកប្រាក់ចំណូលបានពីផលអនុផលព្រៃឈើនេះ ចាប់ពី៥០ម៉ឺនទៅ១​លានរៀលផងដែរក្នុងមួយគ្រួសារ។

ប្អូនស្រី វ៉ាត់ ពិ អ្នករកផ្សិតផក់រស់នៅឃុំព្រះរំកិល ស្រុកបុរីអូរស្វាយសែនជ័យ បានបញ្ចាក់ ថា៖ដោយសារតែមួយរដូវមានម្តងផ្សិតផក់បាយ, ផ្សិតផក់ស្បែកនេះ ងាយស្រូលលក់ ក្នុងតម្លៃមួយគីឡូក្រាម លក់បាន ១៥.០០០​ទៅ​២០.០០០​រៀល។

លោកស្រី ញឹម ភីលី រស់នៅភូមិកាំងដីស អ្នកលក់ផ្សិតនេះបានបញ្ជាក់ថា៖ ផ្សិតផក់បាយ, ផ្សិតផក់ស្បែកនេះលក់ចេញវិញមានតម្លៃ២៥.០០០ទៅ៣០.០០០រៀល ក្នុងមួយគីឡូក្រាម ហើយអ្នកបរិភោគច្រើនទិញយកទៅស្ងោរជាមួយសាច់មាន់-ឆ្អឹងជំនីជ្រូក-ឬស្លប្រហើរម្សៅជាដើម។

កញ្ញា រី កង្រី រស់នៅឃុំកោះសំពាយស្រុកសៀមបូក បានបញ្ជាក់ថា៖ភ្ញៀវទេសចរឬប្រជាពលរដ្ឋដែលធ្លាប់បរិភោគមិនអាចមើលរំលងទេ ឱ្យតែដល់រដូវមានផ្សិត គឺត្រូវតែទិញយកទៅធ្វើម្ហូម ដូចជាស្ងោរជាដើម ដើម្បីបានស្គាល់រស់ជាតិក្នុងមួយឆ្នាំមានម្តង។

លោកវេជ្ជបណ្ឌិត ទន វុទ្ធីអនុប្រធានមន្ទីរសុខាភិបាលខេត្តស្ទឹងត្រែងបានណែនាំថា៖ អ្នកបរិភោគផ្សិតធម្មជាតិគ្រប់ប្រភេទត្រូវធ្វើអនាម័យ និងចំអិនឲ្យបានឆ្អិនល្អហើយ បើមិនស្គាល់ប្រភពច្បាស់លាស់ទេសូមកុំបរិភោគ ដើម្បីយើងលើកកម្ពស់ការប្រុងប្រយ័ត្នខ្ពស់ ក្នុងការថែទាំសុខភាព។ 

សូមបញ្ជាក់ថា៖ ផ្សិតធម្មជាតិ មានច្រើនប្រភេទដូចជាផ្សិតផក់បាយ, ផ្សិតផក់ស្បែក ផ្សិតអន្សោង-ផ្សិតក្ងោក-ផ្សិតរងារ-និងផ្សិតកញ្ចូរ ជាដើម ដែលដុះទៅតាមរដូវ ក្នុងព្រៃភ្នំ ធម្មជាតិ ដែលមានដើមឈើធំខ្ពស់ៗជាដើម៕

អត្ថបទ៖ ងិនលីម

The post អ្នកភូមិផ្អើលនាំគ្នាជិះគោយន្តទៅរកផ្សិតនៅរដូវភ្លៀងធ្លាក់ជោគជាំដី appeared first on Kampuchea Thmey Daily.

លោក ណយ ខុង មេឃុំព្រែកមាស ស្រុកសៀមប៉ាង បានបញ្ជាក់ថា ប្រជាកសិករភាគច្រើននៅរដូវនេះពួកគាត់ទៅរកផ្សិត បន្លែបង្ការធម្មជាតិទៅតាមព្រៃឆ្ងាយៗ ឬតាមតំបន់ព្រុំដែន ស្ថិតនៅឆ្ងាយពីភូមិ និងកន្លែងរស់នៅប្រមាណពី ១០ទៅ​២០គីឡូម៉ែត្រក៏មានដែរ។

លោកបន្តថា នៅរដូវភ្លៀងធ្លាក់ជោគជាំដំបូងមានផ្សិតផក់ ហៅថាផ្សិតបាយ ឬផ្សិតស្បែក ដុះមុនគេ ហើយរំលងបានមួយខែក្រោយមក ទើបមានពពួកផ្សិតក្ងោក និងផ្សិតអន្សោងដុះមកបន្តបន្ទាប់ទៀត។ ចំណែកប្រជាកសិករបាននាំគ្នាទៅរកយកមកបរិភោគ និងលក់ក្នុងមួយរដូវអាចរកប្រាក់ចំណូលបានពីផលអនុផលព្រៃឈើនេះចាប់ពី៥០ម៉ឺនទៅ១​លានរៀលផងដែរក្នុងមួយគ្រួសារ ។

ប្អូនស្រី វ៉ាត់ ពិ អ្នករកផ្សិតផក់រស់នៅឃុំព្រះរំកិល ស្រុកបុរីអូរស្វាយសែនជ័យ បានបញ្ចាក់ថា ដោយសារតែមួយរដូវមានម្តងផ្សិតផក់បាយ ផ្សិតផក់ស្បែកនេះ ងាយស្រូលលក់ ក្នុងតម្លៃមួយគីឡូក្រាមលក់បាន១៥.០០០ ទៅ២០.០០០រៀល។

លោកស្រី ញឹម ភីលី រស់នៅភូមិកាំងដីស អ្នកលក់ផ្សិតនេះបានបញ្ជាក់ថា ផ្សិតផក់បាយ, ផ្សិតផក់ស្បែកនេះលក់ចេញវិញមានតម្លៃ២៥.០០០ ទៅ៣០.០០០រៀល ក្នុងមួយគីឡូក្រាម ហើយអ្នកបរិភោគច្រើនទិញយកទៅស្ងោរជាមួយសាច់មាន់-ឆ្អឹងជំនីជ្រូក-ឬស្លប្រហើរម្សៅជាដើម ។

កញ្ញា រី កង្រី រស់នៅឃុំកោះសំពាយ ស្រុកសៀមបូក បានបញ្ជាក់ថា ភ្ញៀវទេសចរ ឬប្រជាពលរដ្ឋដែលធ្លាប់បរិភោគមិនអាចមើលរំលងទេ ឱ្យតែដល់រដូវមានផ្សិត គឺត្រូវតែទិញយកទៅធ្វើម្ហូបដូចជាស្ងោរជាដើម ដើម្បីបានស្គាល់រស់ជាតិក្នុងមួយឆ្នាំមានម្តង។

លោកវេជ្ជបណ្ឌិត ទន វុទ្ធី អនុប្រធានមន្ទីរសុខាភិបាលខេត្តស្ទឹងត្រែង បានណែនាំថា អ្នកបរិភោគផ្សិតធម្មជាតិគ្រប់ប្រភេទត្រូវធ្វើអនាម័យ និងចំអិនឲ្យបានឆ្អិនល្អ ហើយបើមិនស្គាល់ប្រភពច្បាស់លាស់ទេសូមកុំបរិភោគ ដើម្បីយើងលើកកម្ពស់ការប្រុងប្រយ័ត្នខ្ពស់ក្នុងការថែទាំសុខភាព។ 

សូមបញ្ជាក់ថា ផ្សិតធម្មជាតិមានច្រើនប្រភេទដូចជាផ្សិតផក់បាយ, ផ្សិតផក់ស្បែក ផ្សិតអន្សោង-ផ្សិតក្ងោក-ផ្សិតរងារ  -និងផ្សិតកញ្ចូរ ជាដើម ដែលដុះទៅតាមរដូវក្នុងព្រៃភ្នំធម្មជាតិ ដែលមានដើមឈើធំខ្ពស់ៗជាដើម៕

អត្ថបទ៖ ងិនលីម

The post អ្នកស្រុកសៀមប៉ាង ធ្វើដំណើរ១០ទៅ២០គីឡូ ដើម្បីរកផ្សិតនៅក្នុងព្រៃ appeared first on Kampuchea Thmey Daily.

លោក Djibril Ba អ្នកដឹកនាំការពិសោធន៍មានប្រសាសន៍ថាផ្សិតផ្ទុកសារធាតុរ៉ែជាច្រើនដូចជា ប៉ូតាស្យូម និងអាស៊ីដអាមីណូ Ergothioneineដែលអាចកាត់បន្ថយនិភ័យនៃការវិវត្តជំងឺបាក់ទឹកចិត្ត និងជំងឺថប់បារម្ភ ។ គាត់បន្តទៀតថាបើរាងកាយយើងមានកម្រិត Ergothioneine ខ្ពស់វាអាចជួយការពារភាពតានតឹងអុកស៊ីតកម្មដែលដើរតួនាទីយ៉ាងសំខាន់ក្នុងការវិវត្តនៃជំងឺផ្លូវចិត្តផ្សេងៗ រួមទាំងជំងឺធ្លាក់ទឹកចិត្តផងដែរ ។

យោងតាមឯកសារស្រាវជ្រាវដដែល ផ្សិតក៏មានសារធាតុផ្សេងទៀតដូចជា វីតាមីន B12 សារធាតុប្រឆាំងអុកស៊ីតកម្ម និងភ្នាក់ងារប្រឆាំងការរលាកជាដើមដែលជួយកាត់បន្ថយសភាពថប់បារម្ភដូចគ្នា ។

យ៉ាងណាមិញលោក Ba បានបញ្ជាក់ថាគាត់មិនមានទិន្នន័យប្រភេទផ្សិតដែលអ្នកពិសោធន៍ទទួលទានច្បាស់លាស់ទេ ប៉ុន្តែផ្សិតទូទៅដែលយើងបរិភោគប្រចាំថ្ងៃសុទ្ធតែផ្ដល់ប្រយោជន៍ទាំងអស់ ៕

ប្រែសម្រួល ៖ វារី

ចុចអាន ៖ អាហារ ៧ ប្រភេទ អ្នកជំងឺបាក់ទឹកចិត្តមិនគួរបរិភោគ

The post ការទទួលទានផ្សិត ជួយកាត់បន្ថយហានិភ័យជំងឺបាក់ទឹកចិត្ត និងថប់បារម្ភយ៉ាងមានប្រសិទ្ធភាព appeared first on Kampuchea Thmey Daily.

១ ជួយទប់ជាតិខ្លាញ់ដែលលើសក្នុងឈាម អាច​ជួយ​សម្រក​ទម្ងន់ និង​ការពារ​ការ​ធាត់​ផង​ដែរ។

២ ធ្វើឲ្យ​ប្រសើរឡើងនូវប្រព័ន្ធ excretory។

៣ ចិញ្ចឹមស្បែកឲ្យ​កាន់តែមានសំណើម។

៤ ជួយកាត់បន្ថយកូលេស្តេរ៉ុលក្នុងរាងកាយ។

៥ ព្យាបាល​ជំងឺ​ថ្លើម ក្រពះ និង​ពោះវៀន​រ៉ាំរ៉ៃ។

៦ មាន​ផ្ទុក​សារធាតុ Flammulin ដែលអាចរារាំងការ​លូតលាស់​នៃ​កោសិកា​មហារីក។

៧ ពង្រឹងប្រព័ន្ធការពាររាងកាយ។

៨ វា​អាចជួយគ្រប់គ្រងកម្រិតជាតិស្ករក្នុង​ឈាម​ សក្តិសម​សម្រាប់​អ្នកជំងឺ​ទឹកនោមផ្អែម។

៩ បំប៉នខួរក្បាល ពង្រឹងការចងចាំបានល្អ។

១០ ជំរុញការរំលាយអាហារក្នុងរាងកាយ ជួយឲ្យ​រាងកាយ​ស្រូបយក​សារធាតុចិញ្ចឹម​បាន​យ៉ាង​ល្អប្រសើរ។

ទោះបីជាផ្សិតម្ជុល​ឆ្ងាញ់គ្រប់មុខម្ហូបក៏ដោយ។ ប៉ុន្តែកុំភ្លេចថា​ផ្សិត​ម្ជុលមានមេរោគច្រើនគួរសម មុនបរិភោគត្រូវ​លាង​សម្អាតឲ្យ​បាន​ស្អាត កាត់​ឫស​ចេញ ហើយ​ត្រូវ​ចម្អិន​ឲ្យឆ្អិន​មុន​ពេល​ទទួលទាន។ កុំ​បរិភោគ​ឆៅ​ ព្រោះ​អាច​បង្ក​ជា​បញ្ហា​រាករូស​ឈឺពោះ​បាន៕

ប្រែសម្រួល៖ សាង ស្រីល័ក្ខ

ចុចអាន៖ផ្សិតជួយការពារបញ្ហាភ្លេចភ្លាំង និងខួរក្បាលបានយ៉ាងល្អ

ចុចអាន៖ចូលចិត្តញ៉ាំប្រៃ អាចធ្វើឲ្យប៉ះពាល់ដល់សុខភាពបេះដូង

The post អត្ថប្រយោជន៍ ១០ យ៉ាងនៃផ្សិតម្ជុល ជួយសម្រកទម្ងន់និងជំងឺទឹកនោមផ្អែម appeared first on Kampuchea Thmey Daily.

ការ​ស្រាវជ្រាវ​ធ្វើ​ឡើង​ដោយ​សាកលវិទ្យាល័យ​ជាតិ​សិង្ហបុរី​​ បាន​តាម​ដាន​លើ​របប​អាហារ​​របស់​ពលរដ្ឋ​​សិង្ហបុរី​​ ៦៦៣​​នាក់ មាន​អាយុ​​លើស​ពី ​៦០​ឆ្នាំ ហើយ​​រក​ឃើញ​ថា មនុស្ស​​ចាស់មាន​វ័យ​​លើ ​៦០​ឆ្នាំ​ ច្រើន​មាន​បញ្ហា​បាត់​បង់​ កម្រិត​យល់​ដឹង​ច្រើន​ ឬ​ហៅ​ថា Mild cognitive impairment (MCI)។

យ៉ាង​ណា​មិញ​ នៅ​ពេល​ពួក​គេ​​ពិនិត្យ​មើល​របប​អាហារ​ឃើញ​ថា មនុស្ស​ចាស់​​​បានញ៉ាំ​​​ប្រភេទ​បន្លែ​ផ្សិត​​ក្នុង​របប​អាហារ​ច្រើនដង ​ក្នុង​​មួយ​​សប្តាហ៍ មានការភ្លេច​ភ្លាំង​ និង​បញ្ហា​ស្មារតី​ខ្សោយ ​តិច​ជាង​អ្នក​មិន​ញ៉ាំផ្សិត​។

“នេះ​ពិត​ជា​គួរ​ឱ្យ​ភ្ញាក់​ផ្អើល​ និង​លើក​ទឹក​ចិត្ត​ឲ្យ​ញ៉ាំ​បន្លែ​ផ្សិត”។ នេះ​បើ​តាម​​​លោក​​ Lei Feng ជា​សាស្រ្តាចារ្យ​ដឹក​នាំ​ការ​ស្រាវជ្រាវ​ខាង​លើ​។

​​​​​​​
សាស្រ្តាចារ្យ​​សិង្ហបុរី​រូប​នេះ បន្ថែម​ទៀត​ថា ប្រភេទ​បន្លែ​ផ្សិត​សម្បូរ​ទៅ​ដោយ​សារធាតុ​ Ergothioneine ជា​សារធាតុ​​ប្រឆាំងជំងឺ​មហារីក។ ​​​ដូច​នេះ ​មាន​​បន្លែ​ផ្សិត​​ច្រើន​ក្នុង​របប​អាហារ ជួយ​ការពារ​ខួរ​ក្បាល​បាន​យ៉ាង​មាន​ប្រសិទ្ធិភាព ជំរុញសមត្ថភាព​​​​​​​ក្នុង​​ការ​គិត និង​វិភាគ​បាន​កាន់​តែ​ប្រសើរ​។

បន្ថែម​ពី​នេះ​ប្រភេទ​បន្លែ​​ផ្សិត​ ក៏​មាន​​សាធាតុ​ចិញ្ចឹម ដូច​ជា​ វីតាមីន​ D Selenium និង Spermidine ​​ជួយ​ការពារ​​កោសិកា​សរសៃ​ប្រសាទ​ទៀតផង​៕

អត្ថបទផ្ដល់ដោយ៖Hello Krupet

ចុចអាន៖ការសិក្សាបង្ហាញថា ញ៉ាំអាហារកែច្នៃច្រើន អាចធ្វើឲ្យសមត្ថភាពខួរក្បាលធ្លាក់ចុះ

The post ផ្សិតជួយការពារបញ្ហាភ្លេចភ្លាំង និងខួរក្បាលបានយ៉ាងល្អ appeared first on Kampuchea Thmey Daily.