ផ្សិតដុះតាមព្រៃភ្នំ ជាបន្លែដ៏ពេញនិយម និងយកធ្វើម្ហូបដ៏ឆ្ងាញ់ពិសាររបស់ជនជាតិដើមភាគតិចក្នុងខេត្តរតនគិរី

ផ្សិតរងាដុះនៅតាមដើមឈើដែលពុកផុយ គឺជាអាហារប្រចាំឆ្នាំរបស់ជនជាតិដើមភាគតិច ខេត្តរតនគិរី។ បន្លែផ្សិតនេះ គឺជនជាតិដើមភាគតិចនិយមហូបតាំងពីយូរយារណាស់មកហើយ វាជាអាហារពិសេសនៅរដូវភ្លៀងសម្រាប់ហូបនៅគ្រប់ក្រុមគ្រួសារនៅតាមទីជនបទចុងកាត់​មាត់ញក រស់នៅតាមព្រៃភ្នំ។

ផ្សិតមានរូបរាងតូចៗទាំងនេះ ដុះនៅមុនផ្សិតកាចូតាមដើមឈើ។ ចំណែក ផ្សិត កាចូ ផ្សិតក្ងោក ផ្សិតអាចមន៍ក្របី ជាទូទៅដុះនៅរដូវក្តៅខ្លាំងនៅរដូវប្រាំងស្ងួតហួតហែងមិនមានភ្លៀងធ្លាក់អស់ជាច្រើនខែ ហើយស្រាប់តែគៀកដល់រដូវវស្សាមានភ្លៀងធ្លាក់ខ្លាំងជោគជាំដីជាលើកទី១ នៅពាក់កណ្ដាលខែមេសា ផ្សិតទាំងនេះ ក៏ដុះនៅតាមតាមដើមឈើដែលគេកាប់រំលំទុកចោលយូរឆ្នាំហើយពុកផុយ មានដូចជា ដើមផ្ចឹក ដើមសុក្រំ ដើមចន្ទី ដើមស្នោរជាដើម។

ផ្សិតដែលដុះជាប់នឹងដើមឈើទាំងនោះ មាន២ពណ៌ គឺពណ៌ស និងពណ៌ក្រម៉ៅ មានកម្ពស់៥ សង់ទីម៉ែត្រ។ ពណ៌ផ្សិតទាំងនេះ មានលក្ខណៈខុសគ្នា គឺយោងទៅតាមដើមឈើដែលវាដុះ។ សម្រាប់ពណ៌ស មានដូចជា ដើមចន្ទី និងដើមស្នោរ ចំណែក ពណ៌ក្រម៉ៅវិញ ដុះនៅតាមដើមសុក្រំ ដើមផ្ចឹក។ ដើមឈើងាប់ពុកផុយទាំងនេះ ត្រូវទឹកភ្លៀង២ ទៅ ៣ដង ក៏ដុះចេញជាផ្សិតរយៈពេល១ ថ្ងៃ ទៅ ២ថ្ងៃ អាចទៅដកយកមកធ្វើម្ហូបអាហារ ទើបផុយល្អមិនស្វិត។ ប៉ុន្តែ បើវាដុះលើសពី៣ថ្ងៃ ផ្សិតទាំងនេះចាស់ ហើយនៅពេលយកទៅស្ល ឬឆា មិនផុយល្អសម្រាប់បរិភោគនោះទេ។ នៅខែភ្លៀងដើមឆ្នាំនេះ ជនជាតិដើមភាគតិចនៅតាមភូមិនីមួយៗ ក្នុងខេត្តរតនគិរី បានបបួលគ្នាស្ពាយកាផា ទៅដកផ្សិតនៅតាមព្រៃភ្នំ និងបេះត្រួយរុក្ខជាតិ ទើបលូតលាស់ថ្មី។

ជនជាតិដើមភាគតិចមួយរូបនៅក្នុងខេត្តរតនគិរី គឺអ្នកស្រី គី បានប្រាប់ឱ្យដឹងថា គាត់សប្បាយចិត្តជាមួយទឹកភ្លៀងធ្លាក់ដើមឆ្នាំនេះ ពីព្រោះផ្សិតចាប់ផ្តើមដុះនៅតាមឈើពុក គាត់នាំកូនរបស់គាត់ទៅដកយកមកធ្វើម្ហូប។ គាត់បន្តថា ផ្សិតនេះឆា ឬធ្វើសម្ល មានរសជាតិឆ្ងាញ់។ មិនត្រឹមតែធ្វើម្ហូបអាហារនោះទេ គាត់ក៏វេចខ្ចប់ដាក់ក្នុងថង់ប្លាស្ទិកដោយ១ថង់ គាត់លក់បានតម្លៃ២ ០០០រៀល បើបានចំនួន១កាផា គាត់យកទៅលក់ឱ្យអ្នកភូមិ ឬលើសពី១កាផា គាត់យកទៅលក់នៅផ្សារវើនសៃ៕

ដោយ៖ ខៀវ ចាប