លោក ឃឹម ស៊ុនសូដា អភិបាល នៃគណៈអភិបាលខណ្ឌកំបូល បានចាត់តាំងលោក ទ្រី ណារ៉េត អភិបាលរងខណ្ឌ ដឹកនាំមន្ត្រីជំនាញពីការិយាល័យសាធារណការ ដឹកជញ្ជូន អនាម័យ បរិស្ថាន និងសណ្តាប់ធ្នាប់សាធារណៈ សហការជាមួយអាជ្ញាធរសង្កាត់ និងភូមិពាក់ព័ន្ធ ចុះអនុវត្តការងារកាយពង្រីកចិញ្ចើមផ្លូវសាធារណៈ កាលពីថ្ងៃព្រហស្បតិ៍ ទី១៩ ខែមីនា ឆ្នាំ២០២៦។

ការងារនេះត្រូវបានអនុវត្តលើផ្លូវបេតុងលេខ៤២ ដែលមានទីតាំងស្ថិតនៅក្រោយតំបន់សេដ្ឋកិច្ចពិសេស រ៉ូយ៉ាល់គ្រុបភ្នំពេញ ក្នុងភូមិបឹងធំទី៣ សង្កាត់បឹងធំ ខណ្ឌកំបូល រាជធានី ភ្នំពេញ។ ការពង្រីកនេះមានទំហំប្រមាណ ៤ម៉ែត្រ អមសងខាងផ្លូវ ដើម្បីស្តារឡើងវិញនូវទំហំផ្លូវសាធារណៈឲ្យមានស្តង់ដារ និងសមស្របសម្រាប់ការធ្វើចរាចរណ៍។

លោក ទ្រី ណារ៉េត បានឱ្យដឹងថា មូលហេតុសំខាន់ដែលបណ្តាលឲ្យមានបញ្ហានេះ គឺដោយសារប្រជាពលរដ្ឋមួយចំនួនបានចាក់បេតុងលើចិញ្ចើមផ្លូវខ្ពស់ជាងផ្លូវសាធារណៈ បណ្តាលឲ្យផ្លូវរួមតូច និងរារាំងប្រព័ន្ធរំដោះទឹក។ បញ្ហានេះបានបង្កឲ្យមានការកកស្ទះចរាចរណ៍ និងទឹកដក់លិចផ្លូវយ៉ាងធ្ងន់ធ្ងរ នៅពេលមានភ្លៀងធ្លាក់ ជាពិសេសក្នុងរដូវវស្សា។

ការចុះអនុវត្តការងារកាយពង្រីកចិញ្ចើមផ្លូវនេះ គឺមានគោលបំណងសំខាន់ ដើម្បីធានាឲ្យមានចរាចរណ៍រលូន សុវត្ថិភាពសម្រាប់ប្រជាពលរដ្ឋ កម្មករ និងកម្មការនី ដែលធ្វើដំណើរឆ្លងកាត់តំបន់នេះជារៀងរាល់ថ្ងៃ ព្រមទាំងជួយបង្កើនប្រសិទ្ធភាពប្រព័ន្ធបង្ហូរទឹក ដើម្បីកាត់បន្ថយបញ្ហាទឹកលិចផ្លូវ៕ អត្ថបទ៖សំណាង

The post អាជ្ញាធរខណ្ឌកំបូល ដាក់គ្រឿងចក្រកាយពង្រីកចិញ្ចើមផ្លូវដោះស្រាយការកកស្ទះ និងបញ្ហាទឹកលិចផ្លូវនៅតំបន់បឹងធំ appeared first on Kampuchea Thmey Daily.

ការ​ចុះ​ពិនិត្យ​នេះ ផ្តោត​សំខាន់​លើ​គម្រោង​ពង្រីក​ផ្លូវ​លេខ ​៣៦ ដែលមាន​ទីតាំង​ចាប់ពី​មុខ​សាកលវិទ្យាល័យ​ការពារ​ជាតិ (សាលា​ដែក​) ឆ្ពោះ​មក​កាត់​ផ្លូវ​បេតុង​ថ្មី បន្ត​រហូតដល់​ផ្លូវ​លេខ​ ៩៩ ស្ថិត​ក្នុង​សង្កាត់​ឫស្សីកែវ។ តំបន់​នេះ ត្រូវ​បាន​គេ​ស្គាល់​ថា ជា​ចំណុច​មានការ​កកស្ទះ​ចរាចរណ៍​ខ្លាំង ជាពិសេស​នៅ​ម៉ោង​របស់​ប្រជាពលរដ្ឋ​ចេញ​-​ចូល ធ្វើការ និង​កំណើន​យានយន្ត និង​ការ​អភិវឌ្ឍ​លំនៅឋាន​បន្តបន្ទាប់។

លោក ជិន ប៊ុនធឿន មានប្រសាសន៍ថា គម្រោង​ពង្រីក​ផ្លូវ​នេះ នឹងត្រូវ​អនុវត្ត​ក្នុងពេល​ឆាប់ៗ ខាង​មុខ ដោយមាន​គោលបំណង​ធ្វើឲ្យ​ប្រសើរឡើង​នូវ​លំហូរ​ចរាចរណ៍ កាត់បន្ថយ​ការ​កកស្ទះ និង​បង្កើន​សុវត្ថិភាព​សម្រាប់​ប្រជាពលរដ្ឋ។ លោក​បាន​អំពាវនាវ​ឲ្យ​ប្រជាពលរដ្ឋ​ដែល​ពាក់ព័ន្ធ ចូលរួម​សហការ​ជាមួយ​អាជ្ញាធរ ក្នុងការ​អនុវត្តតាម​នីតិវិធី និង​បទប្បញ្ញត្តិ​ពាក់ព័ន្ធ ដើម្បី​ធានា​ថា​គម្រោង​អាច​ដំណើរការ​បាន​ដោយ​រលូន និង​ទាន់​ពេលវេលា។

បន្ទាប់ពី​ពិនិត្យ​ទីតាំង​គម្រោង​ផ្លូវ​លេខ​ ៣៦ ​រួចមក លោក​អភិបាលខណ្ឌ និង​ក្រុមការងារ បាន​បន្ត​ចុះ​ពិនិត្យ​ស្ថានភាព​លំនៅឋាន​ប្រជាពលរដ្ឋ​ដែល​ស្ថិតក្នុង​គម្រោង​ពង្រីក​ផ្លូវ​លេខ​ ៩៣ ត្រង់​ចំណុច​មុខ​វត្ត​ទួល​សង្កែ ក្នុង​សង្កាត់​ទួល​សង្កែ​ទី ១។ តំបន់​នេះ​ក៏​ជា​ចំណុច​មាន​ចរាចរណ៍​មមាញឹក និង​ត្រូវ​ការ​កែលម្អ​ហេដ្ឋារចនាសម្ព័ន្ធ​ផ្លូវ​ដើម្បី​ឆ្លើយតប​នឹង​តម្រូវការ​អភិវឌ្ឍន៍​នា​ពេល​បច្ចុប្បន្ន។ ការ​ពង្រីក​ផ្លូវ​ទាំងពីរ​ខ្សែ​នេះ គឺជា​ផ្នែក​មួយ​ នៃ​ផែនការ​អភិវឌ្ឍន៍​ហេដ្ឋារចនាសម្ព័ន្ធ​ក្នុង​មូលដ្ឋាន សំដៅ​លើ​ការ​កែលម្អ​បរិស្ថាន​រស់នៅ សោភ័ណភាព​ទីក្រុង និង​ការ​បង្កើន​ប្រសិទ្ធភាព​បណ្ដាញ​ចរាចរណ៍​ក្នុង​ខណ្ឌ​ឫស្សីកែវ។

ជាមួយគ្នានេះ អាជ្ញាធរ​ខណ្ឌ​ ក៏បាន​បន្ត​អំពាវនាវ​ឲ្យ​ប្រជាពលរដ្ឋ​ពាក់ព័ន្ធ បន្ត​ផ្តល់​កិច្ចសហការ​យ៉ាង​ជិតស្និទ្ធ ដើម្បី​រួមចំណែក​អភិវឌ្ឍន៍​មូលដ្ឋាន​ឲ្យ​កាន់តែ​រីកចម្រើន និង​ឆ្លើយតប​តាម​គោលនយោបាយ​អភិវឌ្ឍន៍​ទីក្រុង​ប្រកបដោយ​ចីរភាព៕

អត្ថបទ ៖ សំណាង

The post រដ្ឋបាលខណ្ឌឫស្សីកែវ ចុះពិនិត្យទីតាំងគម្រោងពង្រីកផ្លូវលេខ ៣៦ និង ផ្លូវលេខ ៩៣ ដើម្បីកាត់បន្ថយការកកស្ទះចរាចរណ៍ appeared first on Kampuchea Thmey Daily.

ការចុះវាស់វែងនិងកំណត់ចិញ្ចើមផ្លូវ គឺពិតជាមិនធម្មតា ព្រោះទទឹងផ្លូវនីមួយៗមានទំហំសឹងតែស្មើផ្លូវជាតិទៅហើយ ដូច្នេះផលប៉ះពាល់ក៏មានទំហំធំធេងទៅតាមហ្នឹងដែរ ដែលបញ្ហានេះហើយបានធ្វើឲ្យប្រជាពលរដ្ឋផ្ទុះប្រតិកម្ម ដោយខ្លះទៀតបានធ្វើការតវ៉ានៅមុខសាលាក្រុងបាត់ដំបង ដើម្បីបន្ធូរបន្ថយទំហំផ្លូវនិងបន្ថយការប៉ះពាល់ដល់លំនៅដ្ឋានរបស់ពួកគាត់ដែលរស់នៅរាប់សិបឆ្នាំមកហើយ។

ជាក់ស្ដែងនៅចំណុចផ្លូវកាត់ទទឹងលេខ ១២១ ដែលជាផ្លូវមានទំហំតូចជាងផ្លូវលេខ១ លេខ២ លេខ៣ និងលេខ៤ ផងនោះ ត្រូវបានមន្ត្រីទំនាញដែលចុះរបស់វែងបញ្ជាក់ថា ផ្លូវនេះតម្រូវឲ្យពង្រីកទទឹងសរុបប្រវែង ៣០ ម៉ែត្រ ដើម្បីចាក់បេតុងភ្ជាប់ពីផ្លូវលេខ៣ ទៅកាន់ផ្លូវលេខ៤ ខាងមុខវត្តទួលតាឯក ដូច្នេះបើផ្លូវតូចពង្រីកដល់ថ្នាក់ហ្នឹង ចុះទម្រាំផ្លូវលេខ១,២,៣និង៤ ត្រូវពង្រីកប៉ុណ្ណាដែរ ? 

រហូតមកទល់នឹងពេលនេះ យើងមិនទាន់ទទួលបានចម្លើយពីអាជ្ញាធរក្រុង ឬមន្ត្រីទំនាញណាមួយឡើយ ដើម្បីបញ្ជាក់ឲ្យដឹងថា តើការពង្រីកដល់ថ្នាក់ហ្នឹង សំអាងហេតុផលអ្វីខ្លះ ឬក៏ជាបទបញ្ជារបស់ក្រសួង ព្រោះប្រជាពលរដ្ឋបានលើកឡើងដែរថា ផ្លូវ ទូទាំងក្រុងមិនទាន់ធ្វើរួចផង។ដែលសព្វថ្ងៃនេះកំពុងហុយពេញបន្ទុក ឥឡូវថែមទាំងពង្រីកផ្លូវខ្នាតយក្សទៀត ដូច្នេះតើផលប៉ះពាល់ដល់ធ្ងន់ធ្ងររបស់ពួកគាត់ ដែលរស់នៅតាមបណ្ដោយផ្លូវលេខ៤ ចាប់ពីរង្វង់មូលព្រះនរាយណ៍ រហូតដល់ស្តុបពេទ្យពពីរ នឹងទៅជាយ៉ាងណា ? អត្ថបទ : សោ និយមរ័ត្ន

The post ពលរដ្ឋក្នុងក្រុងបាត់ដំបង កំពុងផ្ទុះប្រតិកម្មទៅនឹងការពង្រីកផ្លូវធ្វើឲ្យប៉ះពាល់ខ្លាំងពេក appeared first on Kampuchea Thmey Daily.

កាលពី​ព្រឹក​ថ្ងៃ​ទី ៨ ខែ​កក្កដា ឆ្នាំ ២០២៥ នេះ លោក ប៉ាង លីដា អភិបាល​រង​ខណ្ឌ​ពោធិ៍​សែន​ជ័យ ទទួល​បន្ទុក​បរិស្ថាន សណ្ដាប់ធ្នាប់ និង​អនាម័យ បាន​ប្រាប់​ឱ្យ​ដឹង​ថា ដោយ​មាន​ការ​ចង្អុលបង្ហាញ​ពី​លោក សក់ ច័ន្ទកញ្ញារិទ្ធ អភិបាល នៃ​គណៈ​អភិបាល​ខណ្ឌ​ពោធិ៍​សែន​ជ័យ បញ្ជា​ឱ្យ​លោក​ចុះ​ពិនិត្យ​ជាក់ស្ដែង ដើម្បី​បើក​ផ្លូវ​មួយ​ខ្សែ​ឱ្យ​ធំ​ទូលាយ​ងាយស្រួល​ក្នុង​ការ​ធ្វើ​ដំណើរ​ដល់​ប្រជាពលរដ្ឋ ទើប​លោក​ធ្វើ​លិខិត​ជូនដំណឹង​ដល់​ប្រជាពលរដ្ឋ និង​ជា​ម្ចាស់​កម្មសិទ្ធិ​ណា​ដែល​សាងសង់​រំលោភ​មក​លើ​ចំណី​ផ្លូវ​សាធារណៈ​ឱ្យ​រុះរើ​ចេញ​ជាបន្ទាន់។

លោក​បន្ត​ថា ក្រោយ​ជូនដំណឹង​រួច លោក​បាន​ដឹកនាំ​មន្ត្រី​ជំនាញ​ និង​ដាក់​គ្រឿងចក្រ​ឈូស​ឆាយ​ពង្រីក​ផ្លូវ​មួយ​ខ្សែ ​ដោយ​ចាប់ពី​កែង​មហាវិថី​ឈ្នះ ឈ្នះ រហូត​ទៅដល់​សាលាសង្កាត់​ត្រពាំង​ក្រសាំង ស្ថិត​ក្នុង​សង្កាត់​ត្រពាំង​ក្រសាំង ខណ្ឌ​ពោធិ៍​សែន​ជ័យ។

អាជ្ញាធរ ក៏បាន​អរគុណ​ដល់​ប្រជាពលរដ្ឋ​ទាំងអស់ ដែល​ចូលរួម​សហការ ដើម្បី​បើក​ផ្លូវ​មួយ​ខ្សែ​ខាង​លើ​ឱ្យ​ធំ​ទូលាយ​ងាយស្រួល​ក្នុង​ការ​ចរាចរណ៍៕

អត្ថបទ ៖ សុខា

The post អាជ្ញាធរខណ្ឌពោធិ៍សែនជ័យ ឈូសឆាយពង្រីកផ្លូវមួយខ្សែក្នុងសង្កាត់ត្រពាំងក្រសាំង appeared first on Kampuchea Thmey Daily.

ប្រជាពលរដ្ឋរស់នៅតាមដងផ្លូវ បានសម្ដែងសេចក្ដីត្រេកអរ ដោយឃើញអាជ្ញាអភិវឌ្ឍហេដ្ឋារចនាសម្ព័ន្ធ ជាពិសេសពង្រីកផ្លូវដែលមានសភាពតូចចង្អៀតបូកជាគោលដៅបែបធំទូលាយ ដើម្បីរជាពលរដ្ឋងាយស្រួលធ្វើចរាចរណ៍នៅពេលបច្ចុប្បន្ន។

អ្នកស្រី ឈិន ផា អាយុ ៦០ឆ្នាំ ជាអាជីវករលក់ដូរនៅកែងផ្សារ ស្ថិតនៅភូមិប៊ូស្រា ឃុំប៊ូស្រា ស្រុកពេជ្រាដាខេត្តមណ្ឌលគិរី បានឱ្យដឹងថា ក្រោយការជូនដំណឹងរបស់អាជ្ញាធរថា មានការពង្រីកផ្លូវដើម្បីបង្កការងាយស្រួលដល់ប្រជាពលរដ្ឋក្នុងការធ្វើដំណើរ គាត់រីករាយក្នុងការសហការជាមួយអាជ្ញាធរ ហើយក៏ចង់ឃើញផ្លូវមានភាពធំទូលាយដោយកន្លងទៅ ផ្លូវធ្វើដំណើរនៅចំណុចនេះ មានការតូចចង្អៀតងាយបង្កហានិភ័យក៏ដូចជាគ្រោះថ្នាក់ចរាចរណ៍ជាយថាហេតុផងដែរ។

ក្នុងនាមជាប្រជាពលរដ្ឋមួយរូប រស់នៅក្នុងស្រុកពេជ្រាដា អ្នកស្រី បានថ្លែងអំណរគុណដល់អាជ្ញាធរស្រុក ដែលបានយកចិត្តទុកដាក់ទៅដល់ប្រជាពលរដ្ឋ ក្នុងការស្ថាបនាអភិវឌ្ឍហេដ្ឋារចនាសម្ព័ន្ធ នៅក្នុងស្រុកពេជ្រាដា ធ្វើយ៉ាងណាដើម្បីឱ្យប្រជាពលរដ្ឋងាយស្រួលក្នុងការធ្វើដំណើរជាងមុនបន្ថែមទៀត។

ចំណែក លោក យឹម សុផាត អាយុ ៦២ឆ្នាំ ជាអាជីវករលក់បាយម្ហូបនៅក្បែដងផ្លូវដែលអាជ្ញាធរបានពង្រីកនៅចំណុចទីតាំងខាងលើនេះ ហើយបានប៉ះលំនៅឋានរបស់គាត់ ក៏បានសហការជាមួយអាជ្ញាធរដោយក្ដីរីករាយ ដោយយល់ឃើញថាកំណាត់ផ្លូវពីមុនផ្លូវមានសភាពតូចចង្អៀត លំបាកក្នុងការធ្វើដំណើរ ជាពិសេសផ្លូវមានសភាពហុយ ដែលធ្វើឱ្យប៉ះពាល់ដល់អតិថិជនដែលបានមកបរិភោគ នៅហាងរបស់គាត់។

លោកបានបញ្ជាក់ថា ក្នុងនាមអាជីវករ ដែលមានមុខរបរលក់នៅក្បែរដងផ្លូវនេះ សូមកោតសរសើរ និងថ្លែងអំណរគុណដល់អាជ្ញាធរ រដ្ឋបាលស្រុកពេជ្រាដា ដែលបានខ្នះខ្នែងក្នុងការអភិវឌ្ឍហេដ្ឋារចនាសម្ព័ន្ធ ជាពិសេសជួយសម្រួល ចរាចរណ៍ជូនប្រជាពលរដ្ឋដែលធ្វើដំណើរនៅក្នុងមូលដ្ឋាននេះផងដែរ៕

អត្ថបទ៖រៀម សុខហេង

The post អាជ្ញាធរស្រុកពេជ្រាដា គ្រោងធ្វើរង្វង់មូលចំណុចផ្លូវបំបែក និងកំពុងពង្រីកផ្លូវសាធារណៈ ដើម្បីពលរដ្ឋងាយស្រួលធ្វើដំណើរ appeared first on Kampuchea Thmey Daily.

ការណែនាំនេះ បានធ្វើឡើងគ្រាដែលសម្ដេចតេជោ ហ៊ុន សែន បានអញ្ជើញជាអធិបតី ក្នុងខួបលើកទី ៤៥ នៃទិវាការចងចាំដំណើរឆ្ពោះទៅកាន់ ការផ្ដួលរំលំរបបប្រល័យពូជសាសន៍ ប៉ុល ពត (២០ មិថុនា ១៩៧៧ – ២០ មិថុនា ២០២២) និងសម្ពោធសមិទ្ធផលនានា នៅតំបន់ប្រវត្តិសាស្ត្រយោធាតេជោកោះថ្ម X16 ស្ថិតនៅភូមិកោះថ្ម ឃុំទន្លូង ស្រុកមេមត់ ខេត្តត្បូងឃ្មុំ នាព្រឹកថ្ងៃទី ២០ ខែមិថុនា ឆ្នាំ ២០២២នេះ។

សម្តេចតេជោនាយករដ្ឋមន្ត្រី បានឲ្យដឹងថា ​​សម្តេច បាន​និយាយជាមួយនាយករដ្ឋមន្ត្រីវៀតណាមរួចហើយ អំពីបំណងទៅថ្ងៃក្រោយ នឹងអាចបើកជាច្រកទ្វារអន្តរជាតិ​ នៅពេលសមស្របណាមួយ តែនៅថ្ងៃនេះមិនទាន់អាចប្រកាសបានទេ ដោយសារនូវមានកិច្ចការងារមួយចំនួនទៀត ត្រូវពិភាក្សាគ្នា។​សម្តេចថា «​ផ្លូវដែលយើងធ្វើមកកោះថ្មនេះ វាមានត្រឹមតែ ៨​ម៉ែត្រ សូមឯកឧត្តម ស៊ុន ចាន់ថុល ចាប់ផ្ដើមពង្រីកវាយ៉ាងហោចណាស់ឲ្យប៉ុនផ្លូវជាតិលេខ ៧​ តភ្ជាប់មកតំបន់ព្រំដែន។ ព្រោះខ្ញុំជឿថា ថ្ងៃក្រោយតំបន់នេះ នឹងក្លាយជាតំបន់ផ្លាស់ប្ដូរសេដ្ឋកិច្ច»។

នៅក្នុងឱកាសដដែលនេះ សម្ដេចតេជោ ហ៊ុន សែន ក៏បានឲ្យដឹងដែរថា សម្ដេចបានចេញ​សេចក្តីសម្រេច​តាមការស្នើសុំ របស់លោកនាយឧត្តមសេនីយ៍ សៅ សុខា និងលោកឧបនាយករដ្ឋមន្រ្តី ជា សុផារ៉ា រួចហើយដើម្បី​បង្កក់ដីនៅទីនោះជាង ១១៧៦ ហិកតា ដើម្បីត្រៀមបម្រុងទុកការបង្កើតតំបន់សេដ្ឋកិច្ចពិសេស និងតំបន់រោងចក្រ។​ ​

សម្ដេចតេជោនាយករដ្ឋមន្ត្រី បានលើកឡើងទៀតថា ​តំបន់នោះ ក៏អាចក្លាយជាតំបន់កែច្នៃផងដែរ ពីព្រោះកសិផល និងវត្ថុធាតុដើមរបស់កម្ពុជា មានច្រើនណាស់នៅតំបន់ឥសាន ដែលតភ្ជាប់ទៅកាន់តំបន់​នោះ​។ ដូច្នេះសម្តេចស្នើឲ្យ​ពង្រីកផ្លូវនៅតំបន់នោះ នាឆ្នាំ ២០២៣ ឬឆ្នាំ ២០២៤ខាងមុខ​​។ ​ការធ្វើដូច្នេះ ក៏ដើម្បីទាក់ទាញអ្នកវិនិយោគទុន បើទោះបីជាពេលនេះ គេមិនទាន់​ចាប់អារម្មណ៍។ ប៉ុន្តែថ្ងៃក្រោយគេនឹងចាប់អារម្មណ៍។ ជាមួយគ្នានោះ សម្ដេចតេជោ ហ៊ុន សែន ក៏បានស្នើឲ្យមានការរៀបចំ​ប្រព័ន្ធទឹក ប្រព័ន្ធភ្លើង សេវាទូរស័ព្ទ ឬសេវាកម្មផ្សេងៗ ​ដើម្បីបម្រើដល់សេចក្តីត្រូវការ នៅតំបន់នោះផងដែរ។​

ចំណែកបញ្ហាពាណិជ្ជកម្ម រវាងប្រទេសកម្ពុជា និងវៀតណាម សម្ដេចតេជោ ហ៊ុន សែន បានបញ្ជាក់ថា ទំហំពាណិជ្ជកម្មរវាងប្រទេសទាំងពីរ សម្រាប់ ៥ ខែឆ្នាំនេះ បាន​ឡើងជាង ៥ពាន់លានដុល្លារ​ ហើយអ្វី​ដែលគួរ​ឲ្យភ្ញាក់ផ្អើលនោះ គឺមុនកូវីដ-១៩មកដល់ ប្រទេស​ទាំងពីរ​ បានដាក់គោលដៅត្រឹម ៥ពាន់លានដុល្លារប៉ុណ្ណោះ។ ប៉ុន្តែ​សម្រេចបានរហូតដល់ ៩ពាន់លានដុល្លារ ​ហើយសង្ឃឹមថា ទំហំពាណិជ្ជកម្មរវាងប្រទេសទាំងពីរ នឹងឡើងទៅដល់ជាង ១០ពាន់លានដុល្លារ ប្រសិនបើគ្មានអ្វីប្រែប្រួល​៕

អត្ថបទ៖ កោះកែវ

The post ​សម្តេចតេជោ ហ៊ុន សែន ណែនាំឲ្យរដ្ឋមន្រ្តីក្រសួងសាធារណការ​ ពង្រីកផ្លូវទៅកាន់តំបន់កោះថ្ម​ appeared first on Kampuchea Thmey Daily.