អភិបាលខណ្ឌឫស្សីកែវ ចុះពិនិត្យគម្រោងពង្រីកផ្លូវ និងដាក់ប្រព័ន្ធលូ ផ្លូវលេខ៣៦ តភ្ជាប់ពី ផ្លូវជាតិលេខ៥ ទៅកាន់ផ្លូវលេខ៩៩

លោក ជិន ប៊ុនធឿន អភិបាលនៃគណៈអភិបាលខណ្ឌឫស្សីកែវ បានដឹកនាំក្រុមការងារចុះត្រួតពិនិត្យវឌ្ឍនភាពការងារពង្រីកផ្លូវ និងការដាក់ប្រព័ន្ធលូសងខាងផ្លូវលេខ៣៦ ដែលតភ្ជាប់ពី ផ្លូវជាតិលេខ៥ ទៅកាន់ផ្លូវលេខ៩៩ ស្ថិតក្នុងភូមិសាស្ត្រ សង្កាត់ឫស្សីកែវ កាលពីថ្ងៃទី២៤ ខែមិថុនា ឆ្នាំ២០២៦។

ការចុះពិនិត្យនេះធ្វើឡើងក្នុងគោលបំណងតាមដាន និងជំរុញដំណើរការអនុវត្តគម្រោងអភិវឌ្ឍន៍ហេដ្ឋារចនាសម្ព័ន្ធនៅមូលដ្ឋាន ឱ្យសម្រេចបានតាមផែនការ និងប្រកបដោយគុណភាពខ្ពស់។ តាមការគ្រោងទុក បន្ទាប់ពីគម្រោងសាងសង់រួចរាល់ ផ្លូវលេខ៣៦នឹងមានទំហំធំទូលាយជាងផ្លូវចាស់ ដែលនឹងរួមចំណែកសម្រួលដល់ការធ្វើដំណើរ កាត់បន្ថយការកកស្ទះចរាចរណ៍។

ក្នុងឱកាសនោះដែរ លោកអភិបាលខណ្ឌ និងក្រុមការងារ បានបន្តចុះពិនិត្យការដ្ឋានដាក់ប្រព័ន្ធលូ និងការរៀបចំចិញ្ចើមផ្លូវតាមបណ្តោយ ផ្លូវជាតិលេខ៥ ស្ថិតក្នុង សង្កាត់ទួលសង្កែទី១ ដើម្បីធានាថា ការងារសាងសង់ប្រព្រឹត្តទៅតាមស្តង់ដារបច្ចេកទេស និងអាចប្រើប្រាស់បានយូរអង្វែង។

ជាមួយគ្នានេះ ជិន ប៊ុនធឿន ក៏បានជំរុញឱ្យក្រុមហ៊ុនទទួលម៉ៅការសាងសង់ ពន្លឿនល្បឿនការងារ ឱ្យសម្រេចបានតាមកាលកំណត់ ព្រមទាំងយកចិត្តទុកដាក់ខ្ពស់លើគុណភាពសំណង់ ដើម្បីធានាថា គម្រោងអភិវឌ្ឍន៍ទាំងនេះអាចឆ្លើយតបនឹងតម្រូវការរបស់ប្រជាពលរដ្ឋ និងរួមចំណែកលើកកម្ពស់សោភ័ណភាពទីក្រុង និងមូលដ្ឋាន ឱ្យកាន់តែប្រសើរឡើង៕ អត្ថបទ៖សំណាង