ពលរដ្ឋខ្មែរ Archives - Kampuchea Thmey Daily

ក្រុមគ្រូពេទ្យសមាគមបេសកកម្មមនុស្សធម៌កម្ពុជា ចុះព្យាបាលជំងឺជូនពលរដ្ឋ នៅមណ្ឌលសុវត្ថិភាពជនភៀសសឹកក្នុងវត្តចាន់ស៊ីដោយឥតគិតថ្លៃ

អ៊ិន ពិសី — Sun, 16 Nov 2025 09:40:43 +0000

ប្រជាពលរដ្ឋ ២ ភូមិ គឺ ភូមិព្រៃចាន់ និង ភូមិជោគជ័យ ដែលរងគ្រោះដោយសារយោធាថៃបាញ់ប្រហាររងរបួសធ្ងន់ ៣ នាក់ និងស្លាប់ម្នាក់ កាលពីវេលាម៉ោងប្រមាណជិត ៤ រសៀល ថ្ងៃទី ១២ ខែវិច្ឆិកា ឆ្នាំ ២០២៥ ព្រមទាំងជនភៀសសឹកប្រហែល ៧០០ គ្រួសារ មកស្នាក់នៅក្នុងវត្តចាន់ស៊ី ឃុំកូប ស្រុកអូរជ្រៅ ខេត្តបន្ទាយមានជ័យ ត្រូវបានក្រុមគ្រូពេទ្យសមាគមបេសកកម្មមនុស្សធម៌កម្ពុជា សហការជាមួយក្រុមគ្រូពេទ្យ មន្ទីរសុខាភិបាលខេត្តបន្ទាយមានជ័យ ចុះពិនិត្យ និងព្យាបាលជំងឺទូទៅជូនពួកគាត់នៅមណ្ឌលសុវត្ថិភាពជនភៀសសឹក ក្នុងវត្តចាន់ស៊ី ដោយឥតគិតថ្លៃ ចំនួន ២ ថ្ងៃ ចាប់ពីថ្ងៃទី ១៦ ដល់ថ្ងៃទី ១៧ ខែវិច្ឆិកា ឆ្នាំ ២០២៥។ ការពិនិត្យ និងព្យាបាលជំងឺទូទៅនេះ មានក្រុមគ្រូពេទ្យស្ម័គ្រចិត្តបារាំងចំនួន ១៥ នាក់ និងខ្មែរ ៨ នាក់ ក្នុងនោះ វេជ្ជបណ្ឌិត ៥ នាក់ ដោយមិនយកកម្រៃនោះទេ។

លោកវេជ្ជបណ្ឌិត ម្នាក់ ចំណោម ៥ នាក់ បានឲ្យដឹងថា ដោយមើលឃើញប្រជាពលរដ្ឋរាប់រយគ្រួសាររងគ្រោះដោយសារយោធាថៃបាញ់ប្រហារ ហើយបានភៀសខ្លួនមកស្នាក់នៅក្នុងវត្តចាន់ស៊ីនេះ ភាគច្រើន គឺមនុស្សចាស់មានជំងឺជាប់ខ្លួន ទើប សម្ដេចធិបតី និង លោកជំទាវបណ្ឌិត ពេជ ចន្ទ មុន្នី ហ៊ុន ម៉ាណែត ឲ្យដឹកនាំក្រុមគ្រូពេទ្យ ចុះជួយពិនិត្យ និងព្យាបាលជំងឺជូនពលរដ្ឋ ព្រោះគ្មានលទ្ធភាពព្យាបាលជំងឺនៅតាមគ្លីនិកឯកជន។

ប្រជាពលរដ្ឋភៀសខ្លួនដោយសារយោធាថៃបាញ់ប្រហារប្រហែល ៧០០ គ្រួសារ មកស្នាក់នៅបណ្ដោះអាសន្នក្នុងវត្តកាន់ស៊ីនេះ បានអរគុណដល់ សម្ដេចធិបតី និង លោកជំទាវបណ្ឌិត ពេជ ចន្ទ មុន្នី ហ៊ុន ម៉ាណែត មិនត្រឹមតែផ្ដល់ទីជម្រក ទឹក ភ្លើង ម្ហូបអាហារ ថវិកា សម្ភារៈផ្ទះបាយ មុង ភួយ ប៉ុណ្ណោះទេ ថែមទាំងដឹកនាំក្រុមគ្រូពេទ្យសមាគមបេសកកម្មមនុស្សធម៌កម្ពុជា ផ្ដល់ការពិនិត្យព្យាបាលជំងឺដោយឥតគិតថ្លៃជូនពួកគាត់ទៀតផង។

ប្រជាពលរដ្ឋអញ្ជើញមកទទួលសេវាពិនិត្យ និងព្យាបាលសុខភាពទាំងអស់ បានសម្ដែងក្តីសប្បាយរីករាយ និងថ្លែងអំណរគុណជាអនេកចំពោះ សម្ដេចធិបតី និង លោកជំទាវបណ្ឌិត ពេជ ចន្ទ មុន្នី ហ៊ុន ម៉ាណែត , រដ្ឋបាលខេត្តបន្ទាយមានជ័យ និងរដ្ឋបាលស្រុកអូរជ្រៅ ដែលជួយសម្រួលដល់ក្រុមគ្រូពេទ្យជំនាញ ចុះមកពិនិត្យ និងព្យាបាលសុខភាពដល់កន្លែងស្នាក់នៅពួកគាត់ដោយពុំមានការបង់ថ្លៃអ្វីទាំងអស់ទៀតផង៕

អត្ថបទ ៖ វ៉ាន់ ណាង

The post ក្រុមគ្រូពេទ្យសមាគមបេសកកម្មមនុស្សធម៌កម្ពុជា ចុះព្យាបាលជំងឺជូនពលរដ្ឋ នៅមណ្ឌលសុវត្ថិភាពជនភៀសសឹកក្នុងវត្តចាន់ស៊ីដោយឥតគិតថ្លៃ appeared first on Kampuchea Thmey Daily.

ខេត្តចំនួន ៤ រងគ្រោះដោយទឹកជំនន់ ប៉ះពាល់ពលរដ្ឋជាង ៩ ពាន់គ្រួសារ ដំណាំស្រូវ និងដំណាំរួមផ្សំជាង ១ ម៉ឺនហិតា

អ៊ិន ពិសី — Wed, 03 Sep 2025 04:10:09 +0000

ខេត្តចំនួន ៤ រួមមាន ខេត្តស្ទឹងត្រែង ក្រចេះ កំពង់ចាម និងខេត្តត្បូងឃ្មុំ បានរងប៉ះពាល់ដោយទឹកជំនន់នៅក្នុងរដូវវស្សានេះ បណ្តាលឱ្យប៉ះពាល់ប្រជាពលរដ្ឋជាង ៩ ពាន់គ្រួសារ ស្មើនឹងជាង ៣ ម៉ឺន ៦ ពាន់នាក់ ដំណាំស្រូវដំណាំរួមផ្សំ និងទ្រទ្រង់សេដ្ឋកិច្ចជាង ១ ម៉ឺនហិតា ក្នុងនោះ ខូចខាតជាង ៨ ពាន់ហិតា។

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ មានប្រសាសន៍នៅព្រឹកថ្ងៃទី ៣ កញ្ញា នេះថា ភ្លៀងធ្លាក់ច្រើននៅផ្ទៃរងទឹកភ្លៀង នៃអាងទន្លេមេគង្គលើ និងនៅក្នុងភូមិសាស្ត្រ នៃប្រទេសវៀតណាម ថៃ និងឡាវ បង្កឱ្យទឹកហូរធ្លាក់ចុះមកទន្លេមេគង្គ និងដៃទន្លេច្រើន ធ្វើឱ្យទឹកជំនន់ទន្លេមេគង្គមានការជន់ឡើង លឿនជាលើកទីមួយ ចាប់ពីថ្ងៃទី ២៨ ខែកក្កដា ហើយស្ថានីយជលសាស្ត្រក្នុងភូមិសាស្ត្រ ខេត្តស្ទឹងត្រែង ក្រចេះ និងកំពង់ចាម ក៏បានជន់ឡើងជិតដល់កម្រិតប្រុងប្រយ័ត្ន និងបង្កឱ្យមានការលិចលង់ជាបន្តបន្ទាប់នៅតាមបណ្តាក្រុងស្រុកមួយចំនួន នៃខេត្តស្ទឹងត្រែង ក្រចេះ កំពង់ចាម និងខេត្តត្បូងឃ្មុំ ធ្វើឱ្យប៉ះពាល់ប្រជាជនចំនួន ៩.០៦៦ គ្រួសារ ស្មើនឹង ៣៦.២៦៤ នាក់ និងជម្លៀសទៅទីទួលសុវត្ថិភាព ២៩៦ គ្រួសារ ផ្ទះលិចទឹក ៦៩៦ ខ្នង សាលារៀន ៧ កន្លែង វត្តអារាម ២ កន្លែង អគាររដ្ឋបាលឃុំ ១ កន្លែង និងជម្លៀសសត្វពាហណៈ ៥៧៨ ក្បាល។

លោកបានបន្តថា ក្រៅពីនេះ ទឹកជំនន់បានប៉ះពាល់ដល់ដំណាំស្រូវលិចទឹក ៧.២៤១ ហិតា ដំណាំរួមផ្សំ និងទ្រទ្រង់សេដ្ឋកិច្ច ៤.៣១០ ហិតា ដំណាំស្រូវខូច ៤.៦០៦ ហិតា និងដំណាំរួមផ្សំ និងទ្រទង់សេដ្ឋកិច្ចខូច ៣.៩៩៩ ហិតា ផ្លូវជាតិលិចទឹក ១៦០ ម៉ែត្រ ផ្លូវលំគ្រួសក្រហម និងបេតុងលិចទឹក ប្រវែង ១០២.០៦៨ ម៉ែត្រ ស្ពានលិចទឹក ៧ កន្លែង និងការបាក់ច្រាំងទន្លេស្ទឹងចំនួន ៥ ករណី នៅក្នុងខេត្តកំពង់ចាម និងត្បូងឃ្មុំ ក្នុងនោះ បាក់ស្រុតផ្ទះចូលទន្លេ ស្ទឹង ចំនួន ២ ខ្នង រំកិលផ្ទះ និងរុះរើចេញ ១ ខ្នង បាក់ស្រុតដីច្រាំងទន្លេប្រវែង ១.៥៤៦ ម៉ែត្រ និង ទទឹងពី ៥ ទៅ ៤០ ម៉ែត្រ៕

អត្ថបទ ៖ សំអឿន

The post ខេត្តចំនួន ៤ រងគ្រោះដោយទឹកជំនន់ ប៉ះពាល់ពលរដ្ឋជាង ៩ ពាន់គ្រួសារ ដំណាំស្រូវ និងដំណាំរួមផ្សំជាង ១ ម៉ឺនហិតា appeared first on Kampuchea Thmey Daily.

ក្រោយកិច្ចប្រជុំGBC ពលរដ្ឋមួយចំនួនបានវិលទៅលំនៅដ្ឋានវិញ ខណៈខ្លះទៀតចាំមើលសភាពការណ៍សិន

Ken Malis — Fri, 08 Aug 2025 09:30:00 +0000

បន្ទាប់ពីកិច្ចប្រជុំ GBC ថ្នាក់រដ្ឋមន្ត្រីការពារជាតិកម្ពុជា-ថៃ កាលពីរសៀលថ្ងៃទី៧ ខែសីហា ឆ្នាំ២០២៥ បានបញ្ចប់ដោយជោគជ័យ និងទទួលបានលទ្ធផលផ្លែផ្កា រហូតចេញនូវសេចក្ដីប្រកាសរួមរបស់ភាគីទាំងពីរ ដែលបានឯកភាពគ្នាលើ ១៣ចំណុចនោះ។ ពេលនេះប្រជាពលរដ្ឋខ្មែរ មួយចំនួនដែលបានជម្លៀសខ្លួនទៅតំបន់សុវត្ថិភាព ក្នុងអំឡុងពេលថៃបើកការឈ្លានពានមកលើកម្ពុជា បាននាំគ្នាត្រឡប់ទៅលំនៅដ្ឋានវិញជាបណ្តើរៗហើយ ខណៈមួយចំនួនទៀតកំពុងស្ថិតនៅតំបន់សុវត្ថិភាពនៅឡើយ ដោយរងចាំមើលសភាពការណ៍សិន។

លោក គឹម ចាន់បញ្ញា អភិបាលរងខេត្តព្រះវិហារ បានប្រាប់ «កម្ពុជាថ្មី»ថា បន្ទាប់ពីមានកិច្ចប្រជុំ GBC រួចមក ប្រជាពលរដ្ឋក្នុងខេត្តព្រះវិហារមួយចំនួនតូចបានត្រឡប់ទៅលំនៅដ្ឋានវិញហើយ ជាក់ស្តែងកាលពីម្សិលមិញនេះ មានជាង១០០គ្រួសារ បានត្រឡប់ទៅលំនៅដ្ឋានវិញ។ ដោយឡែក នៅថ្ងៃទី៨ ខែសីហា នេះ ក៏មានប្រជាពលរដ្ឋមួយចំនួន បានវិលត្រឡប់ទៅលំនៅដ្ឋានវិញជាបន្តបន្តាប់ផងដែរ។ លោកបញ្ជាក់ថា សម្រាប់ពលរដ្ឋដែលចង់ចង់ត្រឡប់ទៅលំនៅដ្ឋានរៀងៗខ្លួនវិញ គឺអាចទៅបាន អាជ្ញាធរមិនមានការហាមឃាត់ឡើយ។

ចំណែក លោក ម៉េត មាសភក្តី អ្នកនាំពាក្យខេត្តឧត្តរមានជ័យ បានឱ្យកម្ពុជាថ្មីដឹងដែរថា ប្រជាពលរដ្ឋក្នុងខេត្តឧត្តរមានជ័យ ដែលត្រូវបានជម្លៀសទៅតាមបណ្តាខេត្តផ្សេងៗ រួមទាំងជនភៀសសឹកនៅតាមជំរំសុវត្ថិភាព ក៏បានវិលត្រឡប់ទៅលំនៅដ្ឋានរបស់គាត់រៀងៗខ្លួនវិញខ្លះហើយដែរ ក៏ប៉ុន្តែប្រជាពលរដ្ឋភាគច្រើនបានបន្តរស់នៅក្នុងជំរំភៀសសឹកដដែល ព្រោះពួកគាត់រងចាំមើលសភាពការណ៍មួយ ទៅពីរថ្ងៃទៀតសិន។

សូមជម្រាបថា ចាប់តាំងពីថៃបានបើកការវាយប្រហារមកលើកម្ពុជាមុន កាលពីថ្ងៃទី២៤ ខែកក្កដា ឆ្នាំ២០២៥ អាជ្ញាធរខេត្តឧត្តរមានជ័យ និងអាជ្ញាធរខេត្តព្រះវិហារ បានជម្លៀសពលរដ្ឋពលរដ្ឋទៅកាន់តំបន់សុវត្ថិភាព ដើម្បីរក្សាសុវត្ថិភាពរបស់ពលរដ្ឋ ព្រមទាំងបានរៀបចំកន្លែងស្នាក់នៅបណ្ដោះអាសន្ន មានបន្ទប់ទឹក និងស្បៀងអាហារផងដែរ៕

អត្ថបទ៖ គេន ម៉ាលិះ

The post ក្រោយកិច្ចប្រជុំGBC ពលរដ្ឋមួយចំនួនបានវិលទៅលំនៅដ្ឋានវិញ ខណៈខ្លះទៀតចាំមើលសភាពការណ៍សិន appeared first on Kampuchea Thmey Daily.

រយៈពេល ២ ថ្ងៃ មានពលរដ្ឋខ្មែរឆ្លងដែនចូលមកកម្ពុជាតាមច្រកខេត្តបាត់ដំបង ជិត ៣ ពាន់នាក់

អ៊ិន ពិសី — Fri, 27 Jun 2025 05:02:08 +0000

ក្នុងរយៈពេល ២ ថ្ងៃ គឺ ថ្ងៃទី ២៥ និងទី ២៦ ខែមិថុនា ឆ្នាំ ២០២៥ មានប្រជាពលរដ្ឋខ្មែរ ជិត ៣ ០០០ នាក់ បានឆ្លងដែនចេញពីប្រទេសថៃចូលមកប្រទេសកម្ពុជាតាមច្រកខេត្តបាត់ដំបង ដើម្បីមករស់នៅស្រុកកំណើតវិញ និងបម្រើការងារនៅប្រទេសកម្ពុជា តាមការអំពាវនាវរបស់រាជរដ្ឋាភិបាល និងក្រសួងការងារ និងបណ្ដុះបណ្ដាលវិជ្ជាជីវៈ។

តាមការបញ្ជាក់ពី លោក សឿម ប៊ុនរិទ្ធ អភិបាលរងខេត្ត និងជាអ្នកនាំពាក្យរដ្ឋបាលខេត្តបាត់ដំបង បានលើកឡើងថា នៅក្នុងរយៈពេល ២ ថ្ងៃ គិតចាប់ពីថ្ងៃទី ២៥ និងទី ២៦ ខែមិថុនា ឆ្នាំ ២០២៥ កន្លងទៅ ថ្មីៗ នេះ គឺមានប្រជាពលរដ្ឋខ្មែរឆ្លងដែនចេញពីប្រទេសថៃចូលមកកម្ពុជា តាមច្រកខេត្តបាត់ដំបង មានចំនួនសរុប ២ ៩៤៩ នាក់ ក្នុងនោះ ស្រី ១ ៣៨៣ នាក់ និងកុមារ ៥៤ នាក់។

លោកអភិបាលរងបានបន្តថា ក្នុងចំណោមពលរដ្ឋខ្មែរដែលវិលមកកាន់ប្រទេសកម្ពុជាខាងលើនេះ គឺមានពលករចំនួន ១ ៧២៧ នាក់ និង ស្រីចំនួន ៧៧៥ នាក់។ ចំណោមពលករទាំងនោះ គឺមានមួយចំនួនបានមកចុះឈ្មោះដើម្បីរកការងារធ្វើដែលមានរាប់ម៉ឺនកន្លែងក្នុងប្រទេសកម្ពុជា។ នៅមុខច្រកព្រំដែន ក៏មានរថយន្តពណ៌ខៀវមួយគ្រឿង ដែលនៅទីនោះគឺជាក្រុមការងាររបស់ក្រសួងការងារ និងបណ្ដុះបណ្ដាលវិជ្ជាជីវៈ ដែលពួកគាត់ចាំទទួលពលករត្រឡប់មកពីប្រទេសថៃ ស្ម័គ្ររកការងារធ្វើភ្លាមៗ តែម្ដង។

លោកអភិបាលរងខេត្ត សង្កត់ធ្ងន់ថា នៅក្នុងចំនួនច្រកអន្តរជាតិ និងច្រកតំបន់សរុបចំនួន ៥ ដែលស្ថិតក្នុងទឹកដីខេត្តបាត់ដំបង គឺមានច្រកចំនួន ៤ គឺ ច្រកអន្តរជាតិដូង ច្រកអន្តរជាតិភ្នំដី ច្រកតំបន់អូរអន្លក់ និងច្រកតំបន់អូររំដួល គឺ ភាគីថៃ បានបើកទ្វារច្រក ចាប់ពីម៉ោង ៨ ព្រឹក ដល់ម៉ោង ៤ ល្ងាច ឯច្រកតំបន់ ៤០០ ក្នុងស្រុកសំឡូត គឺ ត្រូវបានបិទទាំងស្រុង។ បើទោះបីជាភាគីថៃបើកច្រក ដើម្បីថតបង្ហោះដោយចោទប្រកាន់ថាភាគីកម្ពុជាជាអ្នកបិទយ៉ាងណាក៏ដោយ ក៏ភាគីកម្ពុជាមិនបានបើកបិទៗ ទៅតាមពួកគេនោះឡើយ គឺ ភាគីកម្ពុជា រក្សាជំហរដដែល លុះត្រាណាតែភាគីថៃបើកច្រកទាំងអស់ឡើងវិញ ទើបកម្ពុជាព្រមបើកតាមក្រោយ។ បច្ចុប្បន្នពលករខ្មែរ នៅតែបន្តធ្វើដំណើរជាហូរហែចូលមកកាន់ទឹកដីកម្ពុជាវិញ ដោយមិនដាច់រយៈឡើយ ដោយសារតែតាមច្រកអន្តរជាតិគឺយើងបើកច្រកថ្មើរជើង ដើម្បីឲ្យពួកគាត់វិលចូលមកកាន់ស្រុកកំណើតវិញ៕

អត្ថបទ ៖ សោ និយមរ័ត្ន

The post រយៈពេល ២ ថ្ងៃ មានពលរដ្ឋខ្មែរឆ្លងដែនចូលមកកម្ពុជាតាមច្រកខេត្តបាត់ដំបង ជិត ៣ ពាន់នាក់ appeared first on Kampuchea Thmey Daily.

ជាង ២០ ថ្ងៃ ពលករ ពលការិនី និស្សិត និងពលរដ្ឋខ្មែរ ជាង ១ ម៉ឺននាក់ ចូលរួមអបអរសាទរ “សង្ក្រាន្តខ្មែរនៅសាធារណរដ្ឋកូរ៉េ”

អ៊ិន ពិសី — Thu, 17 Apr 2025 01:40:15 +0000

ក្រសួងការងារ និងបណ្ដុះបណ្ដាលវិជ្ជាជីវៈ សហការជាមួយស្ថានឯកអគ្គរាជទូតកម្ពុជាប្រចាំសាធារណរដ្ឋកូរ៉េ , ក្រុមការងារ ESEA ព្រមទាំងសមាគមខ្មែរ និងសហគមន៍ខ្មែរ បានរៀបចំកម្មវិធីអបអរសាទរ “សង្ក្រាន្តខ្មែរនៅសាធារណរដ្ឋកូរ៉េ” សរុបចំនួន ១០ ទីតាំង មានអ្នកចូលរួមប្រមាណជាង ១ ម៉ឺននាក់ ក្នុងរយៈពេលជាង ២០ ថ្ងៃ គិតចាប់ពីថ្ងៃទី ២៣ ខែមីនា រហូតដល់ថ្ងៃទី ១៣ ខែមេសា ឆ្នាំ ២០២៥។

ការរៀបចំសង្ក្រាន្តនៅតាមតំបន់នានាសរុប ១០ ទីតាំងនេះ រួមមាន ៖ តំបន់មីយាំង , តំបន់ហ្វាសង់ (២ទីតាំង) , តំបន់ជេជូ , តំបន់ថេហ្គូ , តំបន់អឺយចុងប៊ូ (៣ទីតាំង) , តំបន់អានសាន (២ទីតាំង) , តំបន់ក្វាងជូតូច , តំបន់គីមហ៊េ និងតំបន់ក្វាងជូធំ (៣ទីតាំង) នៃសាធារណរដ្ឋកូរ៉េ ដើម្បីអបអរពិធីបុណ្យចូលឆ្នាំថ្មីប្រពៃណីជាតិ ឆ្នាំម្សាញ់ សប្តស័ក ព.ស.២៥៦៩ ដោយមានការអញ្ជើញចូលរួមយ៉ាងច្រើនកុះករពីអាណិកជនខ្មែរ ពលករ ពលការិនី និងនិស្សិតខ្មែរ ដែលកំពុងរស់នៅ ធ្វើការ និងសិក្សារៀនសូត្រនៅសាធារណរដ្ឋកូរ៉េ។

កម្មវិធីសង្ក្រាន្តខ្មែរនៅសាធារណរដ្ឋកូរ៉េ ចាប់ផ្ដើមដោយពិធីសាសនា ស្របទៅតាមប្រពៃណីទំនៀមទម្លាប់ព្រះពុទ្ធសាសនារបស់ខ្មែរ ការលេងល្បែងប្រជាប្រិយខ្មែរដូចជា បោះអង្គញ់ ចោលឈូង ទាញព្រ័ត្រ និងលាក់កន្សែង ប្រកបដោយបរិយាកាសសប្បាយរីករាយក្រៃលែង។ កម្មវិធីនេះ ក៏មានការដាក់បង្ហាញនូវស្តង់ម្ហូបអាហារខ្មែរ សម្លៀកបំពាក់ប្រពៃណីខ្មែរ និងផលិតផលខ្មែរជាច្រើនផងដែរ។

តាមការគ្រោងទុកការរៀបចំកម្មវិធី “សង្ក្រាន្តខ្មែរនៅសាធារណរដ្ឋកូរ៉េ” នឹងសហការរៀបចំនៅតាមតំបន់ផ្សេងៗ ជាបន្តបន្ទាប់ទៀត ដើម្បីឱ្យពលករ ពលការិនី និស្សិត ក៏ដូចជាសហគមន៍ខ្មែរនៅទីនោះ មានឱកាសបានចូលរួមកម្មវិធីសង្ក្រាន្តឆ្នាំថ្មី ដើម្បីអបអរបុណ្យចូលឆ្នាំថ្មីប្រពៃណីជាតិដូចនៅស្រុកកំណើត។

គួរបញ្ជាក់ផងដែរថា ក្រុមការងារ ESEA គណៈកម្មាធិការគណបក្សនៅសាធារណរដ្ឋកូរ៉េ សមាគមខ្មែរ និងសហគមន៍ខ្មែរនៅសាធារណរដ្ឋកូរ៉េ តែងតែសហការរៀបចំកម្មវិធីសង្ក្រាន្តខ្មែរនៅសាធារណរដ្ឋកូរ៉េជារៀងរាល់ឆ្នាំ ជូនដល់ប្រជាពលរដ្ឋខ្មែរដែលរស់នៅទីនោះ ក្នុងបំណងដើម្បីបង្កើននូវភាពសប្បាយរីករាយក្នុងការអបអរសាទរពិធីបុណ្យចូលឆ្នាំប្រពៃណីជាតិរបស់ខ្លួន៕

The post ជាង ២០ ថ្ងៃ ពលករ ពលការិនី និស្សិត និងពលរដ្ឋខ្មែរ ជាង ១ ម៉ឺននាក់ ចូលរួមអបអរសាទរ “សង្ក្រាន្តខ្មែរនៅសាធារណរដ្ឋកូរ៉េ” appeared first on Kampuchea Thmey Daily.

លោក គួច ខេវិន ចង់ឃើញប្រជាជនខ្មែររួមគ្នាស្រឡាញ់ព្រៃឈើ សត្វព្រៃ និងបរិស្ថានធម្មជាតិ

អុន ស្រីមាន — Sun, 08 Sep 2024 04:22:31 +0000

ផលិតករកម្មវិធីកម្សាន្តល្បីឈ្មោះលោក គួច ខេវិន បានបំផុសដល់ប្រជាជនកម្ពុជាឲ្យចេះរួមគ្នាស្រ ឡាញ់ព្រៃឈើ សត្វព្រៃនិងបរិស្ថានធម្មជាតិហើយចូលរួមថែរក្សាឲ្យបានគង់វង្ស។ ក្រៅពីនេះលោកក៏បានចាត់ទុក កញ្ញា ស៊ូវ៉ាណា ប្រធានអង្គការការពារព្រៃឈើ និងសត្វព្រៃជានិមិត្តរូបនៃក្តីស្រលាញ់ផងដែរ។

ជាមួយគ្នានៃការបំផុសនេះ លោក គួច ខេវិន ក៏បានលើកឡើងពី កញ្ញា ស៊ូវ៉ាណា ជាប្រធានអង្គការការពារព្រៃ ឈើនិងសត្វព្រៃ(WILDLIFE Alliance) ដែលបានខិតខំអស់ពីកម្លាំងកាយចិត្ត ប្រាជ្ញាស្មារតីប្រើប្រាស់គ្រប់ពេលវេលាបំពេញកិច្ចការដ៏មានសារសំខាន់ ថែរក្សារការពារធនធានព្រៃឈើសត្វព្រៃកម្រនៅកម្ពុជាអស់រយៈពេលជាច្រើនឆ្នាំកន្លងមកដោយពុំខ្លាចនឿយហត់ ។

លោក គួច ខេវិនបានបន្តថា “ខ្ញុំបានចាត់ទុកកញ្ញា ស៊ូ វ៉ាណា(Dr.Suwanna Gauntlett) គឺជានិមិត្តរូបនៃសេចក្តីស្រឡាញ់ Idol របស់ខ្ញុំ,IdoL របស់ខ្ញុំដែលD r. Suwannaធ្លាប់បានណែនាំបង្ហាត់បង្រៀនឲ្យខ្ញុំនិងប្រជាជនកម្ពុជាស្រឡាញ់ព្រៃឈើសត្វព្រៃ និងបរិស្ថានធម្មជាតិតំបន់ភ្នំហើយចូលរួមថែរក្សាឲ្យបានគង់វង្សសម្រាប់មនុស្សជាតិជំនាន់ក្រោយៗ” ។

លោក គួច ខេវិន បានបន្ថែមទៀតថា លោកចង់ឃើញពលរដ្ឋកម្ពុជាស្រលាញ់ព្រៃឈើ សត្វព្រៃ និងបរិស្ថានធម្មជាតិ តំបន់ភ្នំ និងចូលរួមថែរក្សាឲ្យបានគង់វង្សសម្រាប់មនុស្សជាតិជំនាន់ក្រោយហើយលោកពិតជាពេញចិត្ត និងគាំទ្រចំពោះការបំផុសគំនិតដល់ពលរដ្ឋនៅសហគមន៍អេកូទេសចរណ៍ជីផាករបស់កញ្ញាស៊ូវ៉ណ្ណា ដែលលះបង់គ្រប់យ៉ាងដើម្បីកម្ពុជា។

សូមបញ្ជាក់ថាកញ្ញា ស៊ូវ៉ាណា (Dr. Suwanna Gau ntlett) ប្រធានអង្គការការពារព្រៃឈើនិងសត្វព្រៃ(W ILDLIFE Alliance) បានបង្កើតអង្គការមួយនេះកាលពីឆ្នាំ២០០២ ហើយបានបណ្ដុះបណ្ដាលដល់សហគមសុវណ្ណាបៃតងនិងអេកូធម្មជាតិជីផាកនិងជួយដល់ពលរដ្ឋនៅតំបន់នោះចំនួន១៥០គ្រួសារឲ្យផ្លាស់ប្ដូរពីរបរធ្លាប់កាប់ឈើនិងបរបាញ់សត្វមកមានមានជំនាញផ្សេងៗទៀតដូចជា បណ្ដុះកូនឈើនៅសហគមអេកូទេសចរណ៍ជីផាកនៅស្រុកថ្មបាំងខេត្តកោះកុង៕

ដោយ៖ ចាន់រ៉ា

The post លោក គួច ខេវិន ចង់ឃើញប្រជាជនខ្មែររួមគ្នាស្រឡាញ់ព្រៃឈើ សត្វព្រៃ និងបរិស្ថានធម្មជាតិ appeared first on Kampuchea Thmey Daily.

ពលរដ្ឋខ្មែរពីរនាក់ដែលបើកទូកឆ្លងចូលដែនសមុទ្រវៀតណាម ត្រូវបានដោះលែងមកវិញហើយ

Thoeun Vansong — Fri, 19 Jul 2024 02:13:06 +0000

ពលរដ្ឋខ្មែរចំនួន២នាក់ដែលបានបើកទូកទេសចរណ៍ដឹកភ្ញៀវ ឆ្លងចូលដែនសមុទ្រវៀតណាម ហើយត្រូវបានឃាត់ខ្លួននោះ បានត្រឡប់មកដល់កម្ពុជាវិញហើយ ក្រោយក្រសួងនគរបាលវៀតណាម បានលេីកលែងទោស និងដោះលែង។

ការដែលអាជ្ញាធរវៀតណាមដោះលែងពលរដ្ឋខ្មែរទាំង២នាក់មកវិញនេះ គឺបន្ទាប់ពីមានកិច្ចអន្តរាគមន៍ពីក្រសួងមហាផ្ទៃកម្ពុជា។ តាមរយៈជំនួបរវាងរដ្ឋមន្ត្រីក្រសួងមហាផ្ទៃកម្ពុជា និងក្រសួងនគរបាលវៀតណាម កាលពីរសៀលថ្ងៃទី១៣ ខែកក្កដា ឆ្នាំ២០២៤ លោក ស សុខា ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ បានស្នេីលោកឧត្តមសេនីយ៍ឯក បម្រុង លឿង តាមក្វាង រដ្ឋមន្រ្តីក្រសួងនគរបាលវៀតណាម សុំលេីកលែងទោស និងដោះលែងពលរដ្ឋខ្មែរទាំង ២នាក់ ដែលបានបើកទូកទេសចរណ៍ដឹកភ្ញៀវស្ទូចត្រី ឆ្លងចូលដែនសមុទ្រវៀតណាម ឱ្យវិលត្រឡប់ចូលមកប្រទេសកម្ពុជាវិញ។

ដោយផ្អែកលេីលទ្ធផលពិភាក្សានៃជំនួបខាងលេីនេះ ជាពិសេសកិច្ចសហប្រតិបត្តិការរវាងប្រទេសទាំងពីរ ព្រមទាំងការវាយតម្លៃខ្ពស់ចំពោះការផ្លាស់ប្តូរព័ត៌មានអំពីសភាពការណ៍សន្តិសុខ និងការដោះស្រាយបញ្ហាផ្សេងៗនៅតាមព្រំដែន ភាគីវៀតណាម បានយល់ព្រមលេីកលែងទោស និងបានដោះលែងពលដ្ឋខ្មែរចំនួន២រូប និងបានបញ្ជូនវិលត្រឡប់មកប្រទេសវិញ នាយប់ថ្ងៃទី១៨ ខែកក្កដា ឆ្នាំ២០២៤ តាមច្រកទ្វារព្រំដែនអន្តរជាតិព្រែកចាក ខេត្តកំពត។

មន្រ្តីអន្តោប្រវេសន៍ប្រចាំនៅច្រកទ្វារព្រំដែនអន្តរជាតិព្រែកចាក បានជូនពលរដ្ឋខ្មែរទាំងពីរនាក់ដល់ក្រុមគ្រួសារ និងបានត្រឡប់ទៅលំនៅដ្ឋានវិញផងដែរ។

សូមបញ្ជាក់ថា ប្រជាពលរដ្ឋខ្មែរចំនួន ២រូប ត្រូវបានអាជ្ញាធរវៀតណាមឃាត់ខ្លួន កាលពីថ្ងៃទី២១ ខែមេសា ឆ្នាំ២០២៤ មកម្ល៉េះ ដែលបានបើកទូកទេសចរណ៍ដឹកភ្ញៀវស្ទូចត្រី ឆ្លងចូលដែនសមុទ្រវៀតណាម៕

The post ពលរដ្ឋខ្មែរពីរនាក់ដែលបើកទូកឆ្លងចូលដែនសមុទ្រវៀតណាម ត្រូវបានដោះលែងមកវិញហើយ appeared first on Kampuchea Thmey Daily.

ក្រសួងការងារ ប្រកាសឱ្យពលរដ្ឋខ្មែរធ្វើតេស្តជំនាញ និងតេស្តភាសាជប៉ុនផ្នែកការងារភោជនីយដ្ឋាន ដើម្បីទៅធ្វើការនៅជប៉ុន

អ៊ិន ពិសី — Wed, 24 Apr 2024 09:06:46 +0000

ក្រសួងការងារ និងបណ្ដុះបណ្ដាលវិជ្ជាជីវៈ បានប្រកាសឱ្យពលរដ្ឋខ្មែរទៅធ្វើតេស្តជំនាញ និងតេស្តភាសាជប៉ុនផ្នែកការងារនៅភោជនីយដ្ឋាន ដើម្បីបានទៅធ្វើការនៅប្រទេសជប៉ុន ទទួលបានប្រាក់ខែខ្ពស់ ជួយលើកស្ទួយជីវភាពគ្រួសារកាន់តែប្រសើរ។

លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងនៅក្នុងសេចក្ដីជូនដំណឹងមួយដែលទើបចេញផ្សាយនៅថ្ងៃទី ២៤ មេសា នេះថា យោងតាមការជូនដំណឹងពីក្រសួងយុត្តិធម៌ នៃប្រទេសជប៉ុន ក្រសួងការងារ និងបណ្ដុះបណ្ដាលវិជ្ជាជីវៈ សូមជូនដំណឹងដល់ទីភ្នាក់ងារជ្រើសរើសឯកជនទាំងអស់ និងសាធារណជនដែលមានបំណងទៅធ្វើការនៅប្រទេសជប៉ុន ក្នុងគម្រោងពលករជំនាញ ឱ្យបានជ្រាបថា អង្គភាពទទួលបន្ទុកការធ្វើតេស្តជំនាញ និង តេស្តភាសាជប៉ុន នឹងរៀបចំការធ្វើតេស្តជំនាញ និងតេស្តភាសាជប៉ុនផ្នែកការងារនៅភោជនីយដ្ឋាន តាមរយៈ ប្រព័ន្ធកុំព្យូទ័រ (CBT) ក្នុងគម្រោងពលករជំនាញ។

លោករដ្ឋមន្ត្រី បានបន្តថា ចំពោះកាលបរិច្ឆេទធ្វើតេស្តធ្វើឡើងនៅថ្ងៃទី ១១ និង ១២ ខែឧសភា ឆ្នាំ ២០២៤ ថ្ងៃទី ២១ និង ២២ ខែឧសភា ឆ្នាំ ២០២៤ ថ្ងៃទី ២៨-៣០ ខែឧសភា ឆ្នាំ ២០២៤ ថ្ងៃទី ៦,៧ និង ១០ ខែមិថុនា ឆ្នាំ ២០២៤ ថ្ងៃទី ១៥ និង ១៦ ខែមិថុនា ឆ្នាំ ២០២៤ នៅវិទ្យាស្ថានអភិវឌ្ឍន៍វិស័យ អប់រំ (EDI) ដែលមានអាសយដ្ឋាន ៖ ផ្ទះលេខ ៩A ផ្លូវលេខ ៣៧០ សង្កាត់បឹងកេងកង ១ ខណ្ឌបឹងកេងកង រាជធានីភ្នំពេញ ដែលការចុះឈ្មោះធ្វើតេស្តមានតម្លៃ ៣៣ ដុល្លារ បង់ជូនទៅអង្គភាពទទួលបន្ទុកការធ្វើតេស្តជំនាញ និងតេស្តភាសាជប៉ុន។ យ៉ាងណាក៏ដោយ លោករដ្ឋមន្ត្រី បានបញ្ជាក់ថា កាលបរិច្ឆេទ នៃការធ្វើតេស្តខាងលើនេះ អាចនឹងផ្លាស់ប្ដូរ អាស្រ័យទៅតាមស្ថានភាពជាក់ស្ដែង។

លោករដ្ឋមន្ត្រី បានបន្តទៀតថា លក្ខខណ្ឌចុះឈ្មោះធ្វើតេស្តជំនាញ និងតេស្តភាសាជប៉ុន គឺ ចាប់ពីអាយុ ១៧ ឆ្នាំ ឡើងទៅ ដោយមិនគិតពីកម្រិតវប្បធម៌ឡើយ ហើយចំនួនបេក្ខជនដែលអាចទទួលដើម្បីស្នើសុំធ្វើតេស្តគឺចំនួន ១០០ នាក់ ក្នុងមួយខែ។ ចំណែកប្រធានបទ ឬ វិញ្ញាសាសម្រាប់ការធ្វើតេស្តផ្នែកការងារនៅភោជនីយដ្ឋាន រួមមាន អនាម័យចំណីអាហារ ការរៀបចំអាហារ និងការផ្តល់សេវាកម្មសម្រាប់អតិថិជន។

លោករដ្ឋមន្ត្រី បានបន្ថែមថា ឯកសារចាំបាច់ដែលត្រូវយកមកជាមួយនៅថ្ងៃធ្វើតេស្តរួមមាន ៖អត្តសញ្ញាណប័ណ្ណ លិខិតឆ្លងដែន ឬ ប័ណ្ណបើកបរ។

គួរបញ្ជាក់ថា គិតត្រឹមឆ្នាំ ២០២៣ កម្ពុជា បានផ្តល់ឱកាសការងារនៅក្រៅប្រទេសជូនប្រជាពលរដ្ឋចំនួន ១ ៣៥៦ ៦១៦ នាក់ ស្រីចំនួន ៥៥២ ៨៥១ នាក់ ក្នុងនោះនៅប្រទេសជប៉ុន មានពលករចំនួន ២០ ០៥៦ នាក់ ស្រី ៩ ១៥៥ នាក់ ភាគច្រើនជាកម្មសិក្សាការីទទួលបានប្រាក់ខែ ១ ៤០០ ដុល្លារ ក្នុង ១ ខែ ដោយពួកគេទៅធ្វើការលើផ្នែកវេចខ្ចប់ សំណង់ ចំណីអាហារ សេវាកម្ម សណ្ឋាគារ ភោជនីយដ្ឋាន កសិកម្មដាំដុះ និងចិញ្ចឹមសត្វ៕

អត្ថបទ ៖ សំអឿន

The post ក្រសួងការងារ ប្រកាសឱ្យពលរដ្ឋខ្មែរធ្វើតេស្តជំនាញ និងតេស្តភាសាជប៉ុនផ្នែកការងារភោជនីយដ្ឋាន ដើម្បីទៅធ្វើការនៅជប៉ុន appeared first on Kampuchea Thmey Daily.