ក្រោយកិច្ចប្រជុំGBC ពលរដ្ឋមួយចំនួនបានវិលទៅលំនៅដ្ឋានវិញ ខណៈខ្លះទៀតចាំមើលសភាពការណ៍សិន

បន្ទាប់ពីកិច្ចប្រជុំ GBC ថ្នាក់រដ្ឋមន្ត្រីការពារជាតិកម្ពុជា-ថៃ កាលពីរសៀលថ្ងៃទី៧ ខែសីហា ឆ្នាំ២០២៥ បានបញ្ចប់ដោយជោគជ័យ និងទទួលបានលទ្ធផលផ្លែផ្កា រហូតចេញនូវសេចក្ដីប្រកាសរួមរបស់ភាគីទាំងពីរ ដែលបានឯកភាពគ្នាលើ ១៣ចំណុចនោះ។ ពេលនេះ​ប្រជាពលរដ្ឋខ្មែរ មួយចំនួនដែលបានជម្លៀសខ្លួនទៅតំបន់សុវត្ថិភាព ក្នុងអំឡុងពេលថៃបើកការឈ្លានពានមកលើកម្ពុជា បាននាំគ្នាត្រឡប់ទៅលំនៅដ្ឋានវិញជាបណ្តើរៗហើយ ខណៈមួយចំនួនទៀតកំពុងស្ថិតនៅតំបន់សុវត្ថិភាពនៅឡើយ ដោយរងចាំមើលសភាពការណ៍សិន។

លោក គឹម ចាន់បញ្ញា អភិបាលរងខេត្តព្រះវិហារ បានប្រាប់ «កម្ពុជាថ្មី»ថា បន្ទាប់ពីមានកិច្ចប្រជុំ GBC រួចមក ប្រជាពលរដ្ឋក្នុងខេត្តព្រះវិហារមួយចំនួនតូចបានត្រឡប់ទៅលំនៅដ្ឋានវិញហើយ ជាក់ស្តែងកាលពីម្សិលមិញនេះ មានជាង១០០គ្រួសារ បានត្រឡប់ទៅលំនៅដ្ឋានវិញ។ ដោយឡែក នៅថ្ងៃទី៨ ខែសីហា នេះ ក៏មានប្រជាពលរដ្ឋមួយចំនួន បានវិលត្រឡប់ទៅលំនៅដ្ឋានវិញជាបន្តបន្តាប់ផងដែរ។ លោកបញ្ជាក់ថា សម្រាប់ពលរដ្ឋដែលចង់ចង់ត្រឡប់ទៅលំនៅដ្ឋានរៀងៗខ្លួនវិញ គឺអាចទៅបាន អាជ្ញាធរមិនមានការហាមឃាត់ឡើយ។

ចំណែក លោក ម៉េត មាសភក្តី អ្នកនាំពាក្យខេត្តឧត្តរមានជ័យ បានឱ្យកម្ពុជាថ្មីដឹងដែរថា ​ប្រជាពលរដ្ឋក្នុងខេត្តឧត្តរមានជ័យ ដែលត្រូវបានជម្លៀសទៅតាមបណ្តាខេត្តផ្សេងៗ រួមទាំងជនភៀសសឹកនៅតាមជំរំសុវត្ថិភាព ក៏បានវិលត្រឡប់ទៅលំនៅដ្ឋានរបស់គាត់រៀងៗខ្លួនវិញខ្លះហើយដែរ ក៏ប៉ុន្តែប្រជាពលរដ្ឋភាគច្រើនបានបន្តរស់នៅក្នុងជំរំភៀសសឹកដដែល ព្រោះពួកគាត់រងចាំមើលសភាពការណ៍មួយ ទៅពីរថ្ងៃទៀតសិន។

សូមជម្រាបថា ចាប់តាំងពីថៃបានបើកការវាយប្រហារមកលើកម្ពុជាមុន កាលពីថ្ងៃទី២៤ ខែកក្កដា ឆ្នាំ២០២៥ អាជ្ញាធរខេត្តឧត្តរមានជ័យ និងអាជ្ញាធរខេត្តព្រះវិហារ បានជម្លៀសពលរដ្ឋពលរដ្ឋទៅកាន់តំបន់សុវត្ថិភាព ដើម្បីរក្សាសុវត្ថិភាពរបស់ពលរដ្ឋ ព្រមទាំងបានរៀបចំកន្លែងស្នាក់នៅបណ្ដោះអាសន្ន មានបន្ទប់ទឹក និងស្បៀងអាហារផងដែរ៕

អត្ថបទ៖ គេន ម៉ាលិះ