ពិធីចូលឆ្នាំថ្មី Archives - Kampuchea Thmey Daily

ល្បែងប្រជាប្រិយជាតិជាច្រើន ត្រូវបានយកទៅលេងកម្សាន្តក្នុងកម្មវិធីសង្ក្រាន្តនានា តាមថ្នាក់មូលដ្ឋាន

អ៊ិន ពិសី — Sat, 11 Apr 2026 06:17:41 +0000

ល្បែងប្រជាប្រិយជាតិជាច្រើន ត្រូវបានយកទៅលេងកម្សាន្តនៅក្នុងកម្មវិធីសង្ក្រាន្តនានា តាមថ្នាក់មូលដ្ឋាន ក្នុងរាជធានីភ្នំពេញ។

កាលពីវេលាល្ងាចថ្ងៃទី ០៩ ខែមេសា ឆ្នាំ ២០២៦ ថ្មីៗ នេះ គណៈកម្មការគ្រប់គ្រងផ្សារតាម៉ាប់ព្រែកជ្រៃ បានរៀបចំកម្មវិធីសង្ក្រាន្តផ្សារ ដើម្បីជាការអបអរសាទរក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ឆ្នាំ ២០២៦ ដោយមានការអញ្ជើញចូលរួមពីអាជីវករក្នុងផ្សារជាច្រើនផងដែរ។

លោក ខាវ ថន ប្រធានគ្រប់គ្រងផ្សារតាម៉ាប់ព្រែកជ្រៃ បានឲ្យដឹងថា កម្មវិធីសង្ក្រាន្តនេះ រៀបចំឡើងតាមរយៈការមូលមតិគ្នាជាធ្លុងមួយដោយគណៈគ្រប់គ្រងផ្សារ និងអ្នកលក់ដូរ ដើម្បីចូលរួមចំណែកក្នុងការថែរក្សាបាននូវទំនៀមទំលាប់ វប្បធម៌ប្រពៃណីរបស់ប្រទេសជាតិ ស្របពេលដែលស្រុកទេសកំពុងស្ថិតក្នុងយុគសម័យអភិវឌ្ឍន៍ ក្រោមម្លប់ដ៏ត្រជាក់ត្រជុំ នៃសុខសន្តិភាព។

ក្រុមអាជីវករដែលបានចូលរួមកម្សាន្ត ពិតជារីករាយកម្សាន្តជាមួយការលេងល្បែងប្រពៃណីរបស់ជាតិ ដែលជាកេរ្តិ៍បន្សល់ទុកមកពីបរមបុរាណឲ្យគ្រប់ជន្មានុជនទាំងអស់អាចកម្សាន្តបាន លេងដោយសីលធម៌ និងការគោរពគ្នាទៅមក។

គួរបញ្ជាក់ថា ឆ្នាំនេះ នៅរាជធានីភ្នំពេញ គឺជាគោលដៅធំសំខាន់ក្នុងការរៀបចំព្រឹត្តិការណ៍ “ នគរសង្ក្រាន្ត “ ដើម្បីអបអរក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ដែលនឹងធ្វើឡើងរយៈពេល ០៦ ថ្ងៃ គិតចាប់ពីថ្ងៃទី ១៤ ដល់ថ្ងៃទី ១៩ ខែមេសា ឆ្នាំ ២០២៦។ គោលដៅសំខាន់ៗ ទាំងនោះ រួមមាន ៖ រមណីយដ្ឋានវប្បធម៌ប្រវត្តិសាស្ត្រវត្តភ្នំ , ផ្លូវថ្មើរជើងចតុមុខ (Walk street) , សួនវត្តបទុមវតី , ផ្សារទួលទំពូង , សួនច្បារវឌ្ឍនៈ ដល់ផ្សារាត្រី និង ទីតាំងបាសាក់លែន៕
អត្ថបទ ៖ សុភា

The post ល្បែងប្រជាប្រិយជាតិជាច្រើន ត្រូវបានយកទៅលេងកម្សាន្តក្នុងកម្មវិធីសង្ក្រាន្តនានា តាមថ្នាក់មូលដ្ឋាន appeared first on Kampuchea Thmey Daily.

ជាង ២០ ថ្ងៃ ពលករ ពលការិនី និស្សិត និងពលរដ្ឋខ្មែរ ជាង ១ ម៉ឺននាក់ ចូលរួមអបអរសាទរ “សង្ក្រាន្តខ្មែរនៅសាធារណរដ្ឋកូរ៉េ”

អ៊ិន ពិសី — Thu, 17 Apr 2025 01:40:15 +0000

ក្រសួងការងារ និងបណ្ដុះបណ្ដាលវិជ្ជាជីវៈ សហការជាមួយស្ថានឯកអគ្គរាជទូតកម្ពុជាប្រចាំសាធារណរដ្ឋកូរ៉េ , ក្រុមការងារ ESEA ព្រមទាំងសមាគមខ្មែរ និងសហគមន៍ខ្មែរ បានរៀបចំកម្មវិធីអបអរសាទរ “សង្ក្រាន្តខ្មែរនៅសាធារណរដ្ឋកូរ៉េ” សរុបចំនួន ១០ ទីតាំង មានអ្នកចូលរួមប្រមាណជាង ១ ម៉ឺននាក់ ក្នុងរយៈពេលជាង ២០ ថ្ងៃ គិតចាប់ពីថ្ងៃទី ២៣ ខែមីនា រហូតដល់ថ្ងៃទី ១៣ ខែមេសា ឆ្នាំ ២០២៥។

ការរៀបចំសង្ក្រាន្តនៅតាមតំបន់នានាសរុប ១០ ទីតាំងនេះ រួមមាន ៖ តំបន់មីយាំង , តំបន់ហ្វាសង់ (២ទីតាំង) , តំបន់ជេជូ , តំបន់ថេហ្គូ , តំបន់អឺយចុងប៊ូ (៣ទីតាំង) , តំបន់អានសាន (២ទីតាំង) , តំបន់ក្វាងជូតូច , តំបន់គីមហ៊េ និងតំបន់ក្វាងជូធំ (៣ទីតាំង) នៃសាធារណរដ្ឋកូរ៉េ ដើម្បីអបអរពិធីបុណ្យចូលឆ្នាំថ្មីប្រពៃណីជាតិ ឆ្នាំម្សាញ់ សប្តស័ក ព.ស.២៥៦៩ ដោយមានការអញ្ជើញចូលរួមយ៉ាងច្រើនកុះករពីអាណិកជនខ្មែរ ពលករ ពលការិនី និងនិស្សិតខ្មែរ ដែលកំពុងរស់នៅ ធ្វើការ និងសិក្សារៀនសូត្រនៅសាធារណរដ្ឋកូរ៉េ។

កម្មវិធីសង្ក្រាន្តខ្មែរនៅសាធារណរដ្ឋកូរ៉េ ចាប់ផ្ដើមដោយពិធីសាសនា ស្របទៅតាមប្រពៃណីទំនៀមទម្លាប់ព្រះពុទ្ធសាសនារបស់ខ្មែរ ការលេងល្បែងប្រជាប្រិយខ្មែរដូចជា បោះអង្គញ់ ចោលឈូង ទាញព្រ័ត្រ និងលាក់កន្សែង ប្រកបដោយបរិយាកាសសប្បាយរីករាយក្រៃលែង។ កម្មវិធីនេះ ក៏មានការដាក់បង្ហាញនូវស្តង់ម្ហូបអាហារខ្មែរ សម្លៀកបំពាក់ប្រពៃណីខ្មែរ និងផលិតផលខ្មែរជាច្រើនផងដែរ។

តាមការគ្រោងទុកការរៀបចំកម្មវិធី “សង្ក្រាន្តខ្មែរនៅសាធារណរដ្ឋកូរ៉េ” នឹងសហការរៀបចំនៅតាមតំបន់ផ្សេងៗ ជាបន្តបន្ទាប់ទៀត ដើម្បីឱ្យពលករ ពលការិនី និស្សិត ក៏ដូចជាសហគមន៍ខ្មែរនៅទីនោះ មានឱកាសបានចូលរួមកម្មវិធីសង្ក្រាន្តឆ្នាំថ្មី ដើម្បីអបអរបុណ្យចូលឆ្នាំថ្មីប្រពៃណីជាតិដូចនៅស្រុកកំណើត។

គួរបញ្ជាក់ផងដែរថា ក្រុមការងារ ESEA គណៈកម្មាធិការគណបក្សនៅសាធារណរដ្ឋកូរ៉េ សមាគមខ្មែរ និងសហគមន៍ខ្មែរនៅសាធារណរដ្ឋកូរ៉េ តែងតែសហការរៀបចំកម្មវិធីសង្ក្រាន្តខ្មែរនៅសាធារណរដ្ឋកូរ៉េជារៀងរាល់ឆ្នាំ ជូនដល់ប្រជាពលរដ្ឋខ្មែរដែលរស់នៅទីនោះ ក្នុងបំណងដើម្បីបង្កើននូវភាពសប្បាយរីករាយក្នុងការអបអរសាទរពិធីបុណ្យចូលឆ្នាំប្រពៃណីជាតិរបស់ខ្លួន៕

The post ជាង ២០ ថ្ងៃ ពលករ ពលការិនី និស្សិត និងពលរដ្ឋខ្មែរ ជាង ១ ម៉ឺននាក់ ចូលរួមអបអរសាទរ “សង្ក្រាន្តខ្មែរនៅសាធារណរដ្ឋកូរ៉េ” appeared first on Kampuchea Thmey Daily.

ចូលឆ្នាំថ្មីឆ្នាំម្សាញ់នេះ នៅភ្នំពេញ នឹងបើកឱ្យមានការលេងកម្សាន្តសប្បាយ រហូត ៥ ថ្ងៃ ចាប់ពីថ្ងៃទី ១២ មេសា តទៅ

អ៊ិន ពិសី — Tue, 01 Apr 2025 09:54:03 +0000

ដើម្បីចូលរួមអបអរឆ្នាំថ្មី ឆ្នាំម្សាញ់ ព.ស ២៥៦៨ រដ្ឋបាលរាជធានីភ្នំពេញ នឹងរៀបចំកម្មវិធីដ៏អធិកអធម សង្ក្រាន្តវត្តភ្នំ ឆ្នាំ ២០២៥ ដោយកម្មវិធីនេះ នឹងប្រារព្ធធ្វើឡើងនៅរមណីយដ្ឋានប្រវត្តិសាស្ត្រវត្តភ្នំ ចំនួន ៣ ថ្ងៃ ត្រូវនឹងថ្ងៃទី ១៤, ១៥ និង ថ្ងៃទី ១៦ ខែមេសា ឆ្នាំ ២០២៥ បន្ថែមនេះ សម្រាប់ផ្លូវថ្មើរជើង ឬ Walk Street វិញ ក៏បានរៀបចំមុនថ្ងៃចូលឆ្នាំ ២ ថ្ងៃ ហើយថែម ៣ ថ្ងៃ ក្នុងថ្ងៃចូលឆ្នាំ ឡើងដល់ ៥ ថ្ងៃ សម្រាប់បម្រើជូនប្រជាពលរដ្ឋ និងទេសចរជាតិ-អន្តរជាតិ កម្សាន្តសប្បាយ។ នេះបើតាមការបញ្ជាក់ពីលោកស្រី ដោ សម្ផស្ស អ្នកនាំពាក្យសាលារាជធានីភ្នំពេញ។

លោកស្រី ដោ សម្ផស្ស បានបន្តថា សង្ក្រាន្តវត្តភ្នំ ឆ្នាំ ២០២៥ នេះ រដ្ឋបាលរាជធានីភ្នំពេញ នឹងរៀបចំឱ្យមានពិធីសាសនា ដូចជា ការទទួលទេវតាឆ្នាំថ្មី ដង្ហែព្រះពុទ្ធរូប ពូនភ្នំខ្សាច់ ស្រង់ព្រះជាដើម។ ដោយឡែកសម្រាប់កម្មវិធីកម្សាន្តសប្បាយៗ មានដូចជា ការសម្តែងសិល្បៈរបាំប្រពៃណី មានរបាំទ្រុត ចាប៉ីដងវែង ល្ខោនយីកេ ល្ខោនមហោរី ការលេងល្បែងប្រជាប្រិយជាតិដែលជាកេរដំណែលដូនតាខ្មែរ និងមានប្រគំតន្ត្រី បុរាណ-សម័យ ការរាំលេងកម្សាន្តគ្រប់ទម្រង់ និងគ្រប់ចង្វាក់ភ្លេង និងតាំងពិព័រណ៍ផលិតផលខ្មែរនៅរមណីយដ្ឋានប្រវត្តិសាស្ត្រវត្តភ្នំនេះតែម្ដង។ ជាមួយគ្នានេះ រដ្ឋបាលរាជធានី ក៏បានលើកទឹកចិត្តឱ្យពលរដ្ឋដែលចូលរួម ស្លៀកសម្លៀកបំពាក់ប្រពៃណី ក្នុងកម្មវិធីប្រពៃណីខ្មែរ ដើម្បីលើកស្ទួយដល់វប្បធម៌ជាតិផងដែរ។ បន្ថែមពីនេះ រដ្ឋបាលរាជធានីភ្នំពេញ នឹងភ្ជាប់ផ្លូវថ្មើរជើង Walk Street ជាមួយការរៀបចំសង្ក្រាន្តវត្តភ្នំផងដែរ ពោលគឺផ្លូវថ្មើរជើង នឹងបើកបន្តដល់ ៥ ថ្ងៃ ដោយបន្ថែម ៣ ថ្ងៃ នៃថ្ងៃបុណ្យចូលឆ្នាំខ្មែរ រហូតដល់បញ្ចប់បុណ្យចូលឆ្នាំថ្មី។

លោកស្រីបន្តទៀតថា ឆ្នាំនេះ ទីតាំងកម្សាន្ត គឺមានបរិវេណធំជាងឆ្នាំកន្លងទៅ ហើយអ្វីដែលចាប់អារម្មណ៍ នៅផ្លូវថ្មើរជើង Walk Street គឺធ្វើនៅថ្ងៃសៅរ៍ និងថ្ងៃអាទិត្យ ចំថ្ងៃទី ១២ និងទី ១៣ ខែមេសា សម្រាប់ថ្ងៃចូលឆ្នាំគឺចាប់ពីថ្ងៃទី ១៤-១៥-១៦ ដូច្នេះ រដ្ឋបាលរាជធានីភ្នំពេញ នឹងរៀបចំឱ្យមានកម្មវិធីនេះ ចាប់ពីថ្ងៃទី ១២ រហូតដល់ថ្ងៃទី ១៦ ភ្ជាប់គ្នាតែម្ដង។ រមណីយដ្ឋានវត្តភ្នំ នឹងធ្វើសង្ក្រាន្តរយៈពេល ៣ ថ្ងៃ ១៤ ដល់ ១៦ តាំងពីម៉ោង ៨ ព្រឹក ដល់ម៉ោង ២០ យប់ មានកម្មវិធីបែបប្រពៃណី កម្មវិធីសប្បាយកម្សាន្តជាច្រើន មានការទទួលទេវតា ដង្ហែព្រះពុទ្ធរូប ពូនភ្នំខ្សាច់ ស្រង់ព្រះ សម្តែងសិល្បៈរបាំប្រពៃណី លេងល្បែងប្រជាប្រិយជាតិ មានប្រគំតន្ត្រី បុរាណ-សម័យ ការរាំលេងកម្សាន្ត និងតាំងពិព័រណ៍ផលិតផលខ្មែរ នៅរមណីយដ្ឋានប្រវត្តិសាស្ត្រវត្តភ្នំ ដោយឡែកចំពោះ Walk Street វិញ នៅថ្ងៃចូលឆ្នាំនេះ នឹងបើករយៈពេល ៥ ថ្ងៃតែម្ដង ដោយចាប់តាំងពីថ្ងៃទី ១២ ដល់ ១៦ អញ្ចឹងខុសប្លែកពីរាល់សប្ដាហ៍ ដែលធ្វើតែ ២ ថ្ងៃ នៅសប្ដាហ៍ នៃថ្ងៃចូលឆ្នាំ ហ្នឹង គឺធ្វើរហូតដល់ ៥ ថ្ងៃ។

រដ្ឋបាលរាជធានីភ្នំពេញ ក៏បានអំពាវនាវដល់ប្រជាពលរដ្ឋគ្រប់មជ្ឈដ្ឋានទាំងអស់ អញ្ជើញមកចូលរួមទស្សនាកម្សាន្តសប្បាយ នៅសង្ក្រាន្តវត្តភ្នំ និងផ្លូវថ្មើរជើង របស់រដ្ឋបាលរាជធានីភ្នំពេញ ឱ្យបានច្រើនកុះករ ក្រោមម្លប់សន្តិភាពដ៏ត្រជាក់ត្រជំនេះ។

លោកស្រីអ្នកនាំពាក្យ បានបន្ថែមថា ក្រៅពីការរៀបចំសង្ក្រាន្តវត្តភ្នំ អាជ្ញាធរមូលដ្ឋានតាមបណ្តាខណ្ឌទាំង ១៤ ខណ្ឌ ក៏បានត្រៀមរៀបចំធ្វើសង្ក្រាន្តរបស់ខណ្ឌនីមួយៗ ដែរ។ សម្រាប់ការការពារសន្តិសុខសណ្ដាប់ធ្នាប់ និងរបៀបរៀបរយសាធារណៈវិញ រដ្ឋបាលរាជធានីភ្នំពេញ នឹងធានាជូនប្រជាពលរដ្ឋអាចមកលេងកម្សាន្តដោយភាពរីករាយ ដោយមិនមានក្តីបារម្ភ ដោយសាររដ្ឋបាលរាជធានីភ្នំពេញ មិនបានកាត់បន្ថយកម្លាំង ឬវិធានការណាមួយឡើយ ពោលគឺរដ្ឋបាលរាជធានីភ្នំពេញបានត្រៀមរួចរាល់ក្នុងការផ្តល់នូវការថែរក្សាសន្តិសុខសណ្តាប់ធ្នាប់ របៀបរៀបរយសាធារណៈជូនប្រជាពលរដ្ឋ។

សូមរំលឹកថា ទំនៀមទំលាប់ពិធីចូលឆ្នាំប្រព្រឹត្តទៅចំនួន ៣ ថ្ងៃ។ ថ្ងៃដំបូងជាថ្ងៃមហាសង្ក្រាន្ត , ថ្ងៃទី ២ ជាថ្ងៃ វនបត , ថ្ងៃទី៣ ជាថ្ងៃឡើងស័ក។ រីឯការកំណត់ខែ ថ្ងៃ ម៉ោង នាទីដែលឆ្នាំចាស់ត្រូវផុតកំណត់ ហើយទេព្ដាឆ្នាំថ្មីត្រូវចុះមកទទួលតំណែងពីទេព្តាឆ្នាំចាស់នោះ គេអាចដឹងបាន ដោយប្រើក្បួនហោរាសាស្ត្របុរាណ គឺក្បួនមហាសង្ក្រាន្ត៕

អត្ថបទ ៖ ស្រីរ័ត្ន

The post ចូលឆ្នាំថ្មីឆ្នាំម្សាញ់នេះ នៅភ្នំពេញ នឹងបើកឱ្យមានការលេងកម្សាន្តសប្បាយ រហូត ៥ ថ្ងៃ ចាប់ពីថ្ងៃទី ១២ មេសា តទៅ appeared first on Kampuchea Thmey Daily.

ពលរដ្ឋភូមិឃ្មួញ ខណ្ឌសែនសុខ កំពុងរៀបចំតុបតែងភូមិស្វាគមន៍សង្ក្រាន្តឆ្នាំថ្មី

អ៊ិន ពិសី — Tue, 01 Apr 2025 07:26:13 +0000

កៀកថ្ងៃបុណ្យចូលឆ្នាំថ្មី ខិតជិតមកដល់ ប្រជាពលរដ្ឋដែលរស់នៅភូមិឃ្មួញ សង្កាត់ឃ្មួញ ខណ្ឌសែនសុខ រាជធានីភ្នំពេញ បាននិងកំពុងរៀបចំ លម្អ ដើម្បីត្រៀមស្វាគមន៍ទទួលចូលឆ្នាំថ្មី ប្រពៃណីជាតិខ្មែរ និងសង្ក្រាន្តប្រចាំភូមិផងដែរ។

ប្រកបដោយស្នាមញញឹម យុវជន វិឆ្ឆិកា ដែលកំពុងរៀបចំ តុបតែង ចងគោម ទង់បុណ្យ បានឱ្យដឹងថា នេះជាឆ្នាំទី ២ ដែលភូមិឃ្មួញ បានរៀបចំកម្មវិធីសង្ក្រាន្តលក្ខណៈធំបែបនេះ ហើយប្រជាពលរដ្ឋភូមិនេះសហការគ្នាចំណាយថវិកាផ្ទាល់ខ្លួន ដើម្បីរៀបចំតុបតែងលម្អតាមផ្លូវក្នុងភូមិសម្រាប់បុណ្យចូលឆ្នាំថ្មី ប្រពៃណីជាតិខ្មែរ ដែលខិតជិតឈានមកដល់នាពេលខាងមុខនេះ ក៏ដូចជាកម្មវិធីសង្ក្រាន្តប្រចាំភូមិឃ្មួញផងដែរ។

ដោយឡែកប្រជាពលរដ្ឋក្នុងភូមិឃ្មួញ ក៏បានលើកឡើងដែរថា មិនខុសគ្នាទៅនឹងតំបន់ផ្សេងៗ ទេ សម្រាប់នៅភូមិឃ្មួញនេះ បានរៀបចំប្រារព្ធពិធីទៅតាមប្រពៃណីជាតិខ្មែរ ដោយពេលព្រឹក ពលរដ្ឋក្នុងភូមិ ក៏ដូចជាមកពីទីជិតទីឆ្ងាយ បាននាំយកចង្ហាន់ទៅប្រគេនព្រះសង្ឃវត្តឃ្មួញ ព្រោះភូមិឃ្មួញនេះជាចំណុះជើងវត្តស្រាប់ វត្ត និងភូមិ គឺនៅជាប់គ្នាម្ដង។ ដោយឡែកពេលរសៀល ប្រជាពលរដ្ឋ បានចូលទៅក្នុងវត្ត ដើម្បីទទួលពរជ័រ ស្រោចទឹកដោយព្រះចៅអធិការផង មុននឹងបើកកម្មវិធី។

ជាមួយគ្នានេះផងដែរ ប្រជាពលរដ្ឋចូលរួមកម្សាន្ត ក៏ដូចជាចាស់ក្នុងភូមិ ក៏បានស្លៀកសម្លៀកបំពាក់ប្រពៃណីខ្មែរ ដើម្បីរួមគ្នាលើកស្ទួយវប្បធម៌ ប្រពៃណីជាតិ និងចូលរួមលេងល្បែងប្រជាប្រិយខ្មែរជាការលើកតម្កើងវប្បធម៌ប្រពៃណីខ្មែរផងដែរ។

សូមបញ្ជាក់ថា កម្មវិធីសង្ក្រាន្តវត្តឃ្មួញ ភូមិឃ្មួញ ប្រារព្ធទៅរយៈពេល ៥ ថ្ងៃ ចាប់ពីថ្ងៃទី ១២ ដល់ ១៦ ខែមេសា ខាងមុខនេះ សូមប្រជាពលរដ្ឋជិតឆ្ងាយចូលរួមដោយសេរី។ ចំពោះអាជ្ញាធរមូលដ្ឋាន កម្លាំងសមត្ថកិច្ច ក៏បានចូលរួមការពារសណ្ដាប់ធ្នាប់របៀបរៀបរយក្នុងកម្មវិធីផងដែរ៕

អត្ថបទ ៖ សំណាង

The post ពលរដ្ឋភូមិឃ្មួញ ខណ្ឌសែនសុខ កំពុងរៀបចំតុបតែងភូមិស្វាគមន៍សង្ក្រាន្តឆ្នាំថ្មី appeared first on Kampuchea Thmey Daily.

សង្ក្រាន្តវត្តដំបូកខ្ពស់ នឹងរៀបចំកម្មវិធីសប្បាយភាពជាច្រើន នៅដើមខែមេសា ខាងមុខនេះ

អ៊ិន ពិសី — Thu, 27 Mar 2025 07:29:21 +0000

រដ្ឋបាលសង្កាត់បឹងទំពន់ទី ២ សហការជាមួយគណៈកម្មការវត្តដំបូកខ្ពស់ បានរៀបចំកម្មវិធីសង្ក្រាន្ត អបអរសាទរបុណ្យចូលឆ្នាំថ្មី នៅដើមខែមេសា ចាប់ផ្ដើមរយៈពេល ៣ ថ្ងៃ គឺ នៅថ្ងៃទី ២ ដល់ថ្ងៃទី ៤ ខែមេសា ខាងមុខនេះ។

ព្រះអង្គ ខាន់ សុវណ្ណ ព្រះចៅអធិការវត្តដំបូកខ្ពស់ មានសង្ឃដីកាថា គណៈកម្មការវត្ត បានរៀបចំទីតាំងជាច្រើន មានទាំងទីតាំងសប្បាយភាព (តំបន់ត្រជាក់) , ការប្រគំតន្ត្រី និងមានតារាសម្ដែងសិល្បៈចូលរួម រួមជាមួយទីតាំងលេងល្បែងកម្សាន្តបែបប្រពៃណីផងដែរ។

លោក អ៊ុម ហ៊ុយឈុនហេង ចៅសង្កាត់បឹងទំពន់ទី ២ បានឲ្យដឹងថា សង្ក្រាន្តវត្តដំបូកខ្ពស់ នៅសង្កាត់បឹងទំពន់ទី ២ ឆ្នាំ ២០២៥ នេះ នឹងចាប់ផ្ដើមរយៈពេល ៣ ថ្ងៃ គឺ នៅថ្ងៃទី ២ ដល់ថ្ងៃទី ៤ ខែមេសាខាងមុខ ដោយមានកម្មវិធីកម្សាន្ត និងសប្បាយភាពជាច្រើន មិនខុសពីឆ្នាំចាស់ឡើយ។ ចំពោះការការពារសន្តិសុខសុវត្ថិភាព និងរបៀបរៀបរយសាធារណៈជូនប្រជាពលរដ្ឋ ក៏ត្រូវបានធានាល្អប្រសើរផងដែរ ពីសំណាក់អាជ្ញាធរ និងកម្លាំងសមត្ថកិច្ច។

លោកចៅសង្កាត់បន្ថែមថា ក្រៅពីលេងល្បែងប្រជាប្រិយ យោងតាមសេចក្ដីជូនដំណឹងរដ្ឋបាលរាជធានីភ្នំពេញ អាជ្ញាធរមានសមត្ថកិច្ច ក៏បានហាមប្រាមមិនអនុញ្ញាតឲ្យលេងអ្វីប្រាសចាកពីល្បែងប្រពៃណីនោះដែរ ជាក់ស្ដែងដូចជាការលេងគប់ទឹកតាមដងផ្លូវ អាចបណ្ដាលឲ្យមានគ្រោះថ្នាក់ដល់ធ្វើដំណើរផងដែរ។

ប្រជាពលរដ្ឋ បានសម្តែងក្តីរីករាយចំពោះការរៀបចំកម្មវិធីសង្ក្រាន្តនេះឡើងមក អាចឲ្យពួកគាត់ចូលរួមលេងកម្សាន្តជាមួយកម្មវិធីសប្បាយនានាជាច្រើន ដែលអាជ្ញាធររៀបចំឡើងមកនៅថ្ងៃប្រារព្ធកម្មវិធី។ ទន្ទឹមនោះដែរ ពលរដ្ឋ ក៏បានថ្លែងអំណរអរគុណដល់អាជ្ញាធរមូលដ្ឋានសង្កាត់ខណ្ឌ ដែលបានរៀបចំកម្មវិធីឲ្យពួកគាត់បានចូលរួមលេងសប្បាយនាឱកាសបុណ្យចូលឆ្នាំខ្មែរ ប្រពៃណីជាតិ។

សូមបញ្ជាក់ថា នៅតាមបណ្តាមូលដ្ឋានសង្កាត់នានា ក្នុងក្របខណ្ឌរាជធានីភ្នំពេញ ក៏មានការរៀបចំកម្មវិធីសង្ក្រាន្តនេះឡើងមកដូចគ្នាផងដែរ គ្រាន់តែជាកម្មវិធីតូច ឬធំ តាមលទ្ធភាព នៃការរៀបចំរបស់ក្រុមអាជ្ញាធរ ឬគណៈកម្មការរៀបចំប៉ុណ្ណោះ។ កម្មវិធីនេះ ជាពេលវេលាអាចឲ្យប្រជាពលរដ្ឋក្នុងមូលដ្ឋាន ក៏ដូចជាពលរដ្ឋមកពីគ្រប់ទិសទីតំបន់ អាចអញ្ជើញចូលរួមកម្សាន្តបានដោយសេរី និងរីករាយ៕

អត្ថបទ ៖ សុភា

The post សង្ក្រាន្តវត្តដំបូកខ្ពស់ នឹងរៀបចំកម្មវិធីសប្បាយភាពជាច្រើន នៅដើមខែមេសា ខាងមុខនេះ appeared first on Kampuchea Thmey Daily.

ឡាវ ចេញសេចក្ដីណែនាំសម្រាប់បុណ្យចូលឆ្នាំថ្មី អ្នកល្មើសនឹងរងទោសទណ្ឌ

Mean Ratana — Thu, 28 Mar 2024 08:33:03 +0000

រដ្ឋបាលរដ្ឋធានីវៀងចន្ទន៍ប្រទេសឡាវ បានចេញសេចក្តីណែនាំសម្រាប់ប្រជាពលរដ្ឋមូលដ្ឋានរបស់ខ្លួន ចូលរួមសហការអនុវត្តនាឱកាសបុណ្យចូលឆ្នាំថ្មីប្រពៃណីឡាវខាងមុខនេះ ។ ថ្ងៃចូលឆ្នាំប្រពៃណីឡាវ ក៏ដូចនឹងថ្ងៃចូលឆ្នាំប្រពៃណីខ្មែរផងដែរ ពោលគឺចាប់ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៤ ខាងមុខ ។

តាមសារព័ត៌មានក្នុងស្រុកឡាវ Laotian Times បានឲ្យដឹងថា សេចក្តីណែនាំសម្រាប់ឆ្នាំថ្មីដាក់ចេញនោះ គឺដើម្បីធានាសុវត្ថិភាព និងការគោរពដល់ទំនៀមទម្លាប់ប្រពៃណីផង ។

នៅក្នុងខ្លឹមសារសេចក្តីណែនាំ គឺបានបម្រាមលើផ្លូវ និងទីតាំងសាធារណៈ ។ ក្នុងនោះមានការហាមប្រាមការលេងទឹកក្នុងរូបភាពមួយចំនួន ដូចជាមិនឲ្យប្រើប្រាស់ទឹកកខ្វក់ ទឹកកក ស៊ីទែនទឹកធំៗ ហាមឃាត់ការស្លៀកសម្លៀកបំពាក់មិនសមរម្យ ក៏ដូចជាការបង្កសំឡេងកងរំពងរំខាន ដោយគ្មានការអនុញ្ញាតពីអាជ្ញាធរ និងហាមប្រាមលើការដុតផាវ ឬគ្រឿងផ្ទុះមួយចំនួនផងដែរ ។

ដោយឡែក អ្នកបើកបរយានជំនិះទាំងឡាយ នឹងត្រូវហាមឃាត់ពីការប្រើប្រាស់គ្រឿងស្រវឹង នៅតំបន់មួយចំនួន ចំណែកតម្លៃទំនិញតាមហាងលក់ តម្រូវមិនឲ្យឡើងថ្លៃនៅឱកាសបុណ្យចូលឆ្នាំ ។

សម្រាប់ការបំពានសេចក្តីណែនាំនេះ ក៏មានទោសបញ្ញត្តិផងដែរ មិនថាជនជាតិឡាវ ឬអន្តរជាតិ នឹងត្រូវពិន័យ ដូចជាការហៅណែនាំ ការពិន័យទឹកប្រាក់ ឃាត់ខ្លួន អាស្រ័យកម្រិតល្មើស ហើយសមត្ថកិច្ចប៉ូលិស និងដាក់ពង្រាយនៅតាមតំបន់គោលដៅសំខាន់ៗដើម្បីត្រៀមបង្ការហានិភ័យបទល្មើស ក៏ដូចជាគ្រោះថ្នាក់ផ្សេងៗ ។ តាមរយៈការអនុវត្តនេះ សាធារណជនដែលប្រារព្ធពិធីចូលឆ្នាំថ្មីឡាវ នឹងរីករាយ ព្រមទាំងរក្សាបាននូវសុខសុវត្ថិភាព និងសណ្តាប់ធ្នាប់ក្នុងក្រុងវៀងចន្ទន៍ ៕

ដោយ៖ មាន រតនា

The post ឡាវ ចេញសេចក្ដីណែនាំសម្រាប់បុណ្យចូលឆ្នាំថ្មី អ្នកល្មើសនឹងរងទោសទណ្ឌ appeared first on Kampuchea Thmey Daily.

ថ្ងៃទី ១ នៃពិធីបុណ្យចូលឆ្នាំថ្មី មានភ្ញៀវទេសចរជាង ២លាននាក់ បានដើរលេងកម្សាន្ដនៅទូទាំងប្រទេសកម្ពុជា

sopheak khoun — Sat, 15 Apr 2023 02:44:24 +0000

ក្រសួងទេសចរណ៍ បានឲ្យដឹងថា ថ្ងៃទី ១ នៃពិធីបុណ្យចូលឆ្នាំថ្មី ប្រពៃណីជាតិខ្មែរ ត្រូវនឹងថ្ងៃទី ១៤ ខែមេសា ឆ្នាំ ២០២៣ មានភ្ញៀវទេសចរជាតិ-អន្តរជាតិ ដើរលេងកម្សាន្តប្រមាណជាង ២លាននាក់។

ទំព័រហ្វេសប៊ុករបស់ក្រសួងទេសចរណ៍ បានឲ្យនៅព្រឹកថ្ងៃទី ១៥ ខែមេសា ឆ្នាំ ២០២៣នេះថា តាមរបាយការណ៍ទទួលបានពីមន្ទីរទេសចរណ៍រាជធានី-ខេត្ត បានឲ្យដឹងថា សម្រាប់ថ្ងៃទី ១ នៃពិធីបុណ្យចូលឆ្នាំ ប្រពៃណីជាតិខ្មែរ ត្រូវនឹងថ្ងៃទី ១៤ ខែមេសា ឆ្នាំ ២០២៣ មានភ្ញៀវទេសចរដើរលេងកម្សាន្តនៅតំបន់ទេសចរណ៍ និងរមណីយដ្ឋានទេសចរណ៍នានា នៅទូទាំងប្រទេសសរុបចំនួន ២,០៩៨,៥០១នាក់ ក្នុងនោះ៖

-ភ្ញៀវជាតិ ២,០៧៩,៦៧០នាក់

-ភ្ញៀវបរទេសផ្ទៃក្នុង ១៨,៨៣១នាក់

គោលដៅទេសចរណ៍សំខាន់ៗ រួមមាន៖

-ខេត្តសៀមរាប ៤៣៦,៦៧៩នាក់

-ខេត្តបាត់ដំបង ៣០៥,៦១៥នាក់

-រាជធានីភ្នំពេញ ២៦៣,៥៤៩នាក់

-ខេត្តស្វាយរៀង ១៤៤,៧៧៨នាក់

-ខេត្តកណ្តាល ១២៨,៦៩១នាក់

-ខេត្តបន្ទាយមានជ័យ ១០៨,៥១៤នាក់

-ខេត្តកំពង់ឆ្នាំង ១០៣,៧៨៤នាក់

-ខេត្តព្រះសីហនុ ១០២,០៩៦នាក់

-ខេត្តកំពត ៩៥,៣៤៤នាក់

បើតាមក្រសួងទេសចរណ៍ ចរន្តនៃការដើរកម្សាន្តនាថ្ងៃចូលឆ្នាំប្រពៃណីជាតិ នាថ្ងៃទី ១ ឆ្នាំ ២០២៣នេះ មានសភាព ផុសផុលខ្លាំង ធៀបនឹងថ្ងៃចូលឆ្នាំទី ១កាលពីឆ្នាំ ២០២២។ ជាក់ស្តែង តួលេខខាងលើ មានការកើនឡើងប្រមាណ ១៤៣.១៩ភាគរយ ធៀបនឹងថ្ងៃចូលឆ្នាំទី ១ ឆ្នាំ ២០២២ ដែលភ្ញៀវសរុបមានត្រឹមតែប្រមាណ ៨៦ម៉ឺននាក់ប៉ុណ្ណោះ។

ដោយឡែក ស្ថិតិខាងលើ គឺរាប់តែចំនួនភ្ញៀវទេសចរដែលទៅកម្សាន្តនៅរមណីយដ្ឋាន និងគោលដៅទេសចរណ៍ និងចំនួនភ្ញៀវ និងបងប្អូនប្រជាពលរដ្ឋដែលទៅកម្សាន្ត នៅតាមកន្លែងសំខាន់ៗប្រារព្ធសង្រ្កាន្តតែប៉ុណ្ណោះ ដោយមិនបានគិតដល់ចំនួនប្រជាពលរដ្ឋជាច្រើនផ្សេងទៀត ដែលលេងកម្សាន្តនៅតាមភូមិស្រុក ឬកម្មវិធីសង្រ្កាន្តជាលក្ខណៈឯកជន ឬក្នុងទ្រង់ទ្រាយតូច។

ការរៀបចំព្រឹត្តិការណ៍អង្គរសង្រ្កាន្ត នៅខេត្តសៀមរាបឆ្នាំ ២០២៣ ដែលជាខួប ១០ឆ្នាំនៃព្រឹត្តិការណ៍នេះ ដែលបានប្រារព្វពិធីបើកជាផ្លូវការ ក្រោមអធិបតីភាពដ៏ខ្ពង់ខ្ពស់របស់សម្តេចតេជោ ហ៊ុន សែន និងសម្តេចកិត្តិព្រឹទ្ធិបណ្ឌិត ប៊ុន រ៉ានី ហ៊ុនសែន នាថ្ងៃទី ១៤ ខែមេសា ឆ្នាំ ២០២៣ បានទាក់ទាញភ្ញៀវទេសចរ និងបងប្អូនប្រជាពលរដ្ឋយ៉ាងច្រើនកុះករ ដែលមានសកម្មភាពកម្សាន្តសប្បាយជាច្រើន ដែលបង្ហាញពីវប្បធម៌ ប្រពៃណី ជាពិសេសទិដ្ឋភាពនៃការបំបែកឯតទគ្គកម្មបេះដូងច្រើនជាងគេនៅលើពិភពលោកនៅប្រាសាទអង្គរវត្ត៕

The post ថ្ងៃទី ១ នៃពិធីបុណ្យចូលឆ្នាំថ្មី មានភ្ញៀវទេសចរជាង ២លាននាក់ បានដើរលេងកម្សាន្ដនៅទូទាំងប្រទេសកម្ពុជា appeared first on Kampuchea Thmey Daily.

ថ្ងៃចូលឆ្នាំ រដ្ឋបាលរាជធានី រាប់បាត្រព្រះសង្ឃ ៧៥អង្គ អបអរឆ្នាំថ្មី

KC Virak — Fri, 14 Apr 2023 03:14:28 +0000

រដ្ឋបាលរាជធានីភ្នំពេញ នៅព្រឹកថ្ងៃទី១៤ មេសា ឆ្នាំ២០២៣នេះ ជាថ្ងៃចូលឆ្នាំទី១ បានរៀបចំពិធីសូត្រមន្តរាប់បាត្រព្រះសង្ឃចំនួន ៧៥អង្គ ដើម្បីចូលរួមអបអរសាទរទេវតាឆ្នាំថ្មីព្រះនាម កិមិរាទេវី ជាបុត្រីទី៦ របស់កបិលមហាព្រហ្ម ដែលនឹងចុះមកគ្រប់គ្រងភពផែនដី ជំនួសទេវតាឆ្នាំចាស់ នៅម៉ោង ៤រសៀលនេះ។

ពិធីនេះបានធ្វើឡើងក្រោមវត្តមាន លោក ម៉ប់ សារិន ប្រធានក្រុមប្រឹក្សារាជធានីភ្នំពេញ លោក ឃួង ស្រេង អភិបាលនៃគណៈអភិបាលរាជធានីភ្នំពេញ និងលោកស្រី នៅសាលារាជធានីភ្នំពេញ។

ពិធីនេះបានបង្ហាញឱ្យឃើញពីការគោរពប្រតិបត្តិប្រពៃណីទំនៀមទម្លាប់ ជាតិពិសេសក្នុងឧិកាសទទួលទេវតាឆ្នាំថ្មី ដើម្បីបណ្តេញគ្រោះចង្រៃផងទាំងពួង ដែលកើតមានកាលពីឆ្នាំចាស់ និងសុំពរជ័យពីទេវតាឆ្នាំថ្មី ក៏ដូចជារួមចំណែកថែរក្សាប្រពៃណីទំនៀមទម្លាប់ និងវប្បធម៏ជាតិដ៏ល្អផូរផង់របស់ខ្មែរយើង។

នេះជាឆ្នាំទី២ នៃការប្រារព្វពិធីសូត្រមន្តរាប់បាត្ររបស់រដ្ឋបាលរាជធានីភ្នំពេញ ក៏ដូចស្ថាប័ននានា និងបងប្អូនប្រជាពលរដ្ឋក្រោយពីអាក់ខានមិនបានរៀបចំពិធីនេះអស់រយៈពេល ២ឆ្នាំ ដោយសារការរីករាលដាលនៃជំងឺកូវីដ-១៩។

ពិធីបុណ្យចូលឆ្នាំថ្មី ប្រពៃណីជាតិ ត្រូវបានរាជរដ្ឋាភិបាលអនុញ្ញាតប្រារព្ធ និងមានការជួបជុំកម្សាន្តសប្បាយជាធម្មតាឡើងវិញ។ ដើម្បីចូលរួមអបអរសាទរពិធីបុណ្យចូលឆ្នាំថ្មីប្រពៃណីជាតិនេះដែរ រដ្ឋបាលរាជធានីភ្នំពេញ បានប្រកាសជូនដំណឹងពីការប្រារព្ធកម្មវិធីសង្ក្រាន្តវត្តភ្នំ នៅរមណីដ្ឋានវប្បធម៌ប្រវត្តិសាស្ត្រវត្តភ្នំ រយៈពេល ៣ថ្ងៃ។

ជាមួយគ្នានេះ រដ្ឋបាលរាជធានីភ្នំពេញ ក៏បានជូនដំណឹងពីការហាមឃាត់ មិនអនុញ្ញាតលេងល្បែងមិនមែនជាប្រពៃណីវប្បធម៌ជាតិ ឱ្យប្រកាន់ខ្ជាប់សេចក្តីថ្លៃថ្នូរ ចូលរួមទប់ស្កាត់រាល់បទល្មើសផ្សេងៗដែលអាចកើតមានឡើងក្នុងឧិកាសបុណ្យចូលឆ្នាំថ្មីប្រពៃណីជាតិ ចូលរួមទប់ស្កាត់ពីគ្រោះអគ្គីភ័យ បើកបរគោរពច្បាប់ចរាចរណ៍ បើកបរ កុំពិសារគ្រឿងស្រវឹងជាដើម។

គួរបញ្ជាក់ថា កម្ពុជាជាប្រទេសដែលកាន់ព្រះពុទ្ធសាសនា ដូច្នេះសេចក្តីសប្បាយរីករាយ ត្រូវបានផ្សារភ្ជាប់ទៅនឹង មហាកុសលផ្សេងៗដើម្បីធ្វើឱ្យបុណ្យចូលឆ្នាំថ្មី កាន់តែមានអត្ថន័យ និងជាប្រយោជន៍ធំធេងសម្រាប់ពលរដ្ឋខែ្មរ ដូចជាសុំខមាទោស សម្តែងនូវកតញ្ញូចំពោះដូនតា ឪពុកម្តាយ ពិធីស្រង់ព្រះពុទ្ធបដិមា បង្សុកូលរំលឹកដល់វិញ្ញាណក្ខន្ធអ្នកមានគុណ ឬសាច់ញាតិ និងកម្មវិធីផ្សេងៗទៀត៕

អត្ថបទ៖ ស្រីរ័ត្ន

The post ថ្ងៃចូលឆ្នាំ រដ្ឋបាលរាជធានី រាប់បាត្រព្រះសង្ឃ ៧៥អង្គ អបអរឆ្នាំថ្មី appeared first on Kampuchea Thmey Daily.